Ayhan Gürkan: ܐܘ ܪܚܳܡܳܐ / U rḥomo

U rḥomo

ܐܝ ܚܘܒܐ ܐܘ ܪܶܓ݂ܫܐ ܡܩܰܕܫܳܐ ܝܐ ܕܟܳܛܳܥܰܢܠܶܗ ܐܘ ܒܰܪܢܳܫܐ ܒܠܶܒܶܗ. ܐܝܢܰܩܰܐ ܕܟܳܚܳܙܝܢܰܐ ܐܶܡܰܝܢܰܐ، ܒܰܒܰܝܢܰܐ، ܐܰܚܘܢܳܢܰܝܢܰܐ، ܐܰܢ ܢܰܥܝܡܰܝܕ݂ܰܢ، ܐܰܢ ܢܳܫܶܐ ܕܟܳܪܷܚܡܝܢܰܐ، ܐܰܘ ܐܝܢܰܩܰܐ ܕܟܳܡܰܬ݂ܷܟܪܝܢܰܠܷܢ، ܠܶܒܰܝܢܰܐ ܟܳܡܷܦܨܰܚ. ܐܝ ܒܪܝܬ݂ܰܝܕ݂ܰܢ ܟܳܫܘܦܪܐ ܘܟܳܪܰܘܚܐ. ܐܝ ܚܘܒܐ ܕܟܝܬ ܒܓܰܘܶܗ ܕܘ ܒܰܪܢܳܫܐ ܟܳܡܰܪܷܚܩܳܠܶܗ ܕܥܳܝܰܫ ܠܰܫܰܢ ܪܘܚܶܗ ܘܕܗܳܘܶܐ ܐܶܢܳܢܳܝܐ. ܐܘ ܒܰܪܢܳܫܐ ܕܟܷܬܝܐ ܡܰܠܝܐ ܚܘܒܐ ܠܰܬܝܐ ܡܘܡܟܘܢ ܕܛܳܥܰܢ ܪܶܓ݂ܫܶܐ ܕܝ ܐܶܢܳܢܳܝܘܬ݂ܐ. ܩܰܝ ܐܰܢ ܢܳܫܶܐ ܒܰܣ ܟܳܡܷܪܚܳܡܝ؟ ܠܐ. ܐܝ ܚܘܒܐ ܕܗܝܘܐ ܠܘ ܒܰܪܢܳܫܐ ܗܷܢܓܝ ܓ݂ܰܠܰܒܶܐ ܝܐ ܢܳܫܐ ܠܐ ܟܳܩܳܕܰܪ ܕܡܰܚܷܬܠܰܗ ܚܷܕܘܕ. ܐܘ ܒܪܰܢܳܫܐ ܢܰܩܩܰܬ ܟܝܒܶܗ ܐܳܒܶܠܰܗ ܠܘܰܪܕܐ ܘܟܝܒܶܗ ܐܳܒܶܠܰܗ ܠܚܰܝܘܰܢ ܣܬܶܐ. ܩܰܝ ܐܰܟ݂ ܟ݂ܷܠܩܰܬ ܕܟܷܬܢܶܐ ܣܰܓ݂ ܒܰܣ ܟܳܡܷܪܚܳܡܝ؟ ܠܐ. ܐܝܢܰܩܰܐ ܚܰܐ ܕܪܳܚܰܡ ܐܘ ܫܘܓ݂ܠܰܝܕ݂ܶܗ، ܐܝ ܨܷܢܥܰܝܕ݂ܶܗ، ܐܝ ܪܰܕ݂ܰܝܬܰܝܕ݂ܶܗ. ܐܰܘ ܐܰܬܬ݂ܐ ܕܪܷܚܡܐ ܐܘ ܡܘܬܦܰܩ ܕܝܕ݂ܰܗ، ܐܘ ܣܰܘܐ ܣܰܘܬܐ ܕܪܷܚܡܝ ܐܘ ܒܰܝܬܐ ܕܡܰܦܷܬܬܶܗ ܐܰܚ ܚܰܝܰܬ݂ܬ݂ܶܗ ܐܶܒܶܗ، ܗܰܢܝ ܛܘܦܣܳܐ ܢܶܐ. ܐܰܪ ܪܶܓ݂ܫܶܐ ܚܰܐ ܕܦܳܪܰܩ ܕܪܳܚܰܡ ܕܡܷܪܚܰܡ ܠܰܬܢܶܐ ܠܘ ܒܰܪܢܳܫܐ ܒܰܣ. ܐܰܠܳܗܐ ܐܘ ܫܘܦܪܐ ܕܰܪ ܪܶܓ݂ܫܶܐ ܕܘ ܪܚܳܡܐ ܠܐ ܒܰܣ ܠܘ ܒܰܪܢܳܫܐ ܗܘܠܶܗ. ܟܝܒܰܢ ܕܳܐܒܝܢܰܐ ܐܝ ܘܰܪܕܐ ܛܘܦܣܐ. ܐܘ ܡܶܕܰܢܐ ܡܔܰܪܷܦ݁. ܠܰܫܰܢ ܕܡܝܬ݂ܰܒܰܬ ܐܰܘ ܘܰܪܕܶܐ ܐܰܝܕܰܪܒܐ ܒܝ ܚܘܒܐ ܟܳܡܘܪܩܝ ܟܳܝܷܪܘܝ. ܬܪܶܐ ܫܰܬܠܶܐ ܕܥܰܝܢܝ ܔܷܢܣ ܕܘܰܪܕܐ ܡܰܚܬܝ ܒܕܘܟܬ݂ܐ ܒܓܰܘܶܗ ܕܬܰܪܬܶܐ ܤܷܛܠܐ ܕܥܰܦܪܐ. ܐܰܣ ܤܷܛܠܰܢܝ ܥܰܝܢܝ ܫܷܡܫܐ ܟܳܚܳܙܷܢ ܘܟܘܠ ܝܰܘܡܐ ܥܰܝܢܝ ܡܝܩܛܰܪ ܕܡܰܝܶܐ ܟܳܡܝܬܰܗܘܶܠܷܢ. ܒܰܣ ܐܘ ܦܰܪܩ ܕܟܝܬ ܠܷܚܕ݂ܐ ܡܰܢܢܶܗ ܟܘܠ ܝܰܘܡܐ ܟܳܡܝܬܰܘܡܰܪܠܰܗ ܟ݂ܰܒܪܶܐ ܒܰܣܝܡܶܐ، ܡܠܳܣܐ ܘܪܚܳܡܐ، ܐܝ ܚܪܶܬܐ ܟܘܠ ܝܰܘܡܐ ܟܳܡܝܬܰܘܡܰܪܠܰܗ ܟ݂ܰܒܪܶܐ ܕܣܘܥܪܶܐ ܘܙܰܥܒܰܪܰܐ. ܐܝ ܘܰܪܕܰܝܐ ܕܪܷܚܡܝܘܰܝܠܰܗ ܝܰܘܡܐ ܥܰܠ ܐܘ ܝܰܘܡܐ ܦܩܷܚܠܰܗ ܘܝܰܪܝܘܐ. ܐܶܠܐ ܐܝ ܘܰܪܕܐ ܕܷܡܣܰܥܪܝܘܰܝܠܰܗ ܘܕܙܷܒܪܝܘܰܝܠܰܗ ܒܓܰܘܶܗ ܕܷܟܡܐ ܝܰܘܡܶܐ ܫܰܥܝܬ݂ܐ، ܒܰܕ݂ܝܠܐ ܐܘ ܢܰܫܝܦܐ. ܗܰܢܐ ܡܝܪ ܐܶܠܶܗ ܔܶܪܳܒܐ ܕܘ ܪܚܳܡܐ ܘܕܝ ܚܘܒܐ. ܗܷܫ ܫܰܡܝܥܝܬܘ ܕܢܰܥܝܡܶܐ ܕܡܰܝـܝܬ݂ܝ ܡܘ ܠܐ ܪܚܳܡܐ؛ ܒܷܒܪܝܬ݂ܐ ܣܝܡ ܒܘܚܳܢܐ ܥܰܠ ܐܘ ܡܶܕܰܢܐ. ܒܕܘܟܳܬ݂ܶܐ ܓ݂ܰܠܰܒܶܐ ܐܰܝ ܝܰܬܘܡܶܐ ܗܰܢܝ ܕܠܰܬܬܶܗ ܐܶܡܐ ܘܒܰܒܐ، ܐܝ ܕܰܘܠܶܐ ܟܳܦܷܬܚܐ ܕܘܟܬ݂ܐ ܠܰܫܰܢ ܕܗܷܘܝܰܠܠܶܗ ܡܳܪܐ، ܟܳܡܷܪܘܰܠܠܶܗ ܘܟܳܡܰܩܪܰܠܠܶܗ ܗܘܠ ܕܡܳܛܷܢ ܠܥܘܡܪܐ ܕܩܘܕܪܝ ܕܷܡܕܰܒܪܝ ܐܰܚ ܚܰـܝܰܬ݂ܬ݂ܶܗ. ܒܕܘܟܳܬ݂ܶܐ ܓ݂ܰܠܰܒܶܐ ܐܰܢ ܢܰܥܝܡܶܐ ܕܟܳܡܝܬܰܚܬܝ ܒܰܒ ܒܳܬܶܐ ܕܰܝ ܝܰܬܘܡܶܐ ܒܰܬ ܬܠܳܬ݂ܐ ܚܰܐ ܡܰܢܢܶܗ ܟܳܡܳܝܰܬ݂ ܡܷܐ ܕܠܐ ܟܳܡܷܪܚܰܡ ܟ݂ܘܕ ܟܳܠܳܙܰܡ. ܐܘ ܣܰܒܰܒ ܕܘ ܡܶܕܰܢܐ ܟܷܐܡܡܝ؛ ܐܘ ܢܰܥܝܡܐ ܥܰܠ ܕܠܐ ܟܳܡܳܝܰܕ ܐܝ ܚܘܒܐ ܘܐܘ ܪܚܳܡܐ ܕܟܳܠܳܙܰܡܠܶܗ. ܐܘ ܣܝܣܬܰܡ ܕܝ ܨܷܚـܚܰـܝܕ݂ܶܗ ܗܶܕܝ ܗܶܕܝ ܟܳܚܳܪܰܘ، ܘܓ݂ܰܠܰܒܶܐ ܡܰܢ ܢܰܥܝܡܰܢܝ ܟܳܥܰܝܫܝ ܟܶܘܶܐ ܕܘ ܗܰܘܢܐ ܘܕܝ ܪܘܚܐ ܣܬܶܐ. ܐܘ ܒܘܚܳܢܰܢܐ ܟܷܡܬ݂ܰܒܰܬ ܒܷܐ ܡܷܩܩܰܐ ܡܘܗܝܡ ܝܐ ܐܘ ܪܚܳܡܐ ܘܐܝ ܚܘܒܐ. ܕܟܳܡܰܥܝܫܐ ܐܘ ܒܰܪܢܳܫܐ، ܕܟܳܛܷܪܝܐ ܕܷܒܪܝܬ݂ܐ ܕܗܷܘܝܐ ܕܘܟܬ݂ܐ ܕܝ ܥܝܶܫܶܐ، ܕܰܢ ܢܳܫܶܐ ܐܰܝܕܰܪܒܐ ܟܝܒܷܢ ܕܥܰܝܫܝ ܥܰܡ ܚܕ݂ܳܕ݂ܶܐ ܟ݂ܘܕ ܐܰܚܘܢܳܢܶܐ؛ ܒܷܫܪܳܪܐ ܐܝ ܚܘܒܐ ܝܐ. ܥܰܡ ܚܒܳܠ ܝܰܘܡܐ ܥܰܠ ܐܘ ܝܰܘܡܐ ܥܰܠ ܕܟܳܩܰܝܪܐ ܐܝ ܚܘܒܐ ܟܳܬܰܝܡܐ ܐܝ ܦܨܝܚܘܬ݂ܐ ܐܘ ܪܚܳܡܐ ܡܶܐ ܥܰܠ ܦܳܬ݂ܰܗ ܕܷܒܪܝܬ݂ܐ. ܐܝܢܰܩܰܐ ܕܰܢ ܢܳܫܶܐ ܕܠܐ ܟܳܛܷܥܢܝ ܚܘܒܐ ܘܕܚܷܟܡܝ ܥܰܠ ܒܪܝܬ݂ܐ ܟܝܒܰܢ ܕܷܐܡܡܝܢܰܐ؛ ܐܝ ܚܰܪܰܝܬܐ ܕܷܒܪܝܬ݂ܐ ܐܰܬ݂ܝܐ. ܡܰܘܟ݂ܰܐ ܟܝܒܰܢ ܕܦܷܪܫܝܢܰܐ ܐܰܢ ܢܳܫܶܐ ܠܷܬܪܶܐ ܓܰܒܶܐ. ܐܰܢ ܢܳܫܶܐ ܕܟܳܪܷܚܡܝ، ܘܰܐܢ ܢܳܫܶܐ ܕܠܐ ܟܳܪܷܚܡܝ. ܡܠܦܢܐ ܐܝܗܐܢ ܓܘܪܩܐܢ 399