Benjamin Toere: ܝܘܚܰܢܷܢ ܕܒܶܐ ܥܰܒ݂ܕܐ ܟܳܡܰܚܟܶܐ ܬܰܫܥܝܬܼܐ ܕܝ ܫܘܦܶܪܬܝـܝܶܐ / Yuḥanën d Be Cavdo komaḥke tašciṯo di šufertiye

Yuḥanën d Be Cavdo komaḥke tašciṯo di šufertiye

ܒܚܰܐ ܡܰܝ ܝܰܘܡܶܐ ܕܘ ܣܰܬ݂ܘܐ ܝܰܬܝܘܳܘܰܝܢܐ ܥܰܡ ܐܰܚܘܢܝ ܩܰܫܐ ܡܝܟܰܐܝܠ ܡܷܔܓ݂ܳܠܝܘܰܝܢܰܐ ܡܷܪܠܶܠܝ؛ ܡܩܰܦܶܠܝ ܬܰܫܷܥܝܳܬ݂ܶܐ ܥܰܬܝܩܶܐ ܕܰܡ ܡܷܕܗܳܝܶܐ ܕܡܶܐ ܡܶܩܷܡ ܕܟܳܡܰܚܟܷܢܢܶܗ ܐܰܣ ܣܳܘܶܐ. ܠܰܬܝܐ ܐܝܕ݂ܝܥܐ ܡܰܢ ܡܩܰܝܕܝܠܶܗ ܐܶܠܐ ܡܰܛܷܢ ܠܐܝܕ݂ܶܗ، ܡܷܪܠܝܠܶܗ ܩܘܕܪܷܬ ܕܳܐܒܷܬܠܝܢܶܐ. ܡܷܪܠܶܠܝ؛ ܡܷܢ ܟܣܰܝܡܰܬ ܐܰܦ݁ܦ݁ܶܗ؟ ܡܷܪܠܝ ܓܟܳܬ݂ܰܘܢܰܢܶܗ ܒܘ ܠܶܫܳܢܐ ܛܘܪܳܝܐ. ܘܗܰܘܟ݂ܰܐ ܡܝܕܝܠܝ ܡܝܢܶܗ. ܐܝ ܬܰܫܥܝܬ݂ܐ ܩܰܡܰܝܬܐ ܚܰܐ ܓܰܒܪܐ ܡܷܕܗܳܝܐ ܐܷܫܡܶܗ ܝܘܚܰܢܷܢ ܕܟܷܐܡܡܷܢܶܗ ܒܶܐ ܥܰܒ݂ܕܐ ܟܳܡܰܚܟܶܐ ܠܰܗ. ܒܷܬ݂ܷܪ ܡܷܐ ܕܟܳܡܳܕܷ݂ܥ ܥܰܠ ܪܘܚܶܗ، ܗܰܘܟ݂ܰܐ ܟܳܐܡܷܪ؛ ܐܳܢܐ ܝܘܚܰܢܷܢ ܕܒܶܐ ܥܰܒ݂ܕܐ ܗܘܠ ܕܥܷܡܪܝ ܗܰܘܝ ܚܰܡܫܰܥܣܰܪ ܐܷܫܢܶܐ ܥܰܡ ܒܰܒܝ ܣܰܡܘܰܝܢܐ ܪܘܥܝܘܬ݂ܐ. ܒܘ ܣܰܬ݂ܘܐ ܕܷܡܟ݂ܝܘܰܝܢܰܐ ܒܰܫ ܫܟܰܦܬܰܬ ܘܒܘ ܪܰܒܷܥ ܕܘܥܪܝܘܰܝܢܰܐ ܠܘ ܒܰܝܬܐ ܗܘܠ ܕܒܰܒܝ ܟܰܝܷܘܠܶܗ ܠܰܘ ܩܰܕܷܪ ܕܷܐܙܙܶܝܐ ܠܘ ܛܘܪܐ. ܗܘܠ ܕܥܷܡܪܝ ܗܰܘܝ ܥܷܣܪܝ ܐܷܫܢܶܐ ܣܰܡܘܰܝܢܐ ܐܰܫ ܫܘܓ݂ܠܳܢܶܐ ܕܝ ܩܪܝܬ݂ܐ. ܒܷܬ݂ܷܪ ܡܶܐ ܕܥܷܡܪܝ ܗܰܘܝ ܥܷܣܪܝ ܐܷܫܢܶܐ ܐܰܙܙܝܢܐ ܠܝ ܥܰܣܟܰܪܝـܝܶܐ ܬܰܡܐ ܓ݂ܰܠܰܒܶܐ ܡܳܚܷܢܘܰܝܠܝ. ܥܰܣܩܘܬ݂ܐ ܓ݂ܰܠܰܒܶܐ ܓܪܷܫܠܝ ܥܰܠ ܕܟܷܬܘܰܝܢܐ ܡܫܝـܚܳܝܐ، ܢܰܩܠܰܐ ܡܶܐ ܠܐ ܡܶܕܶܐ ܐܘ ܩܳܡܘܛܰܢ ܒܕܶܠܶܗ ܕܡܳܚܶܐ ܠܝ، ܡܚܶܠܶܗ ܟܡܐ ܥܰܠ ܦܶܡܝ ܠܘ ܓܰܒܐ ܕܝ ܪܰܣܬܶܐ ܬܘܝܪ ܚܰܐ ܡܰܥ ܥܰܪܫܳܢܰܝܕ݂ܝ ܘܒܷܬ݂ܷܪ ܡܚܶܠܶܗ ܚܕ݂ܐ ܠܝ ܫ̰ܰܦ݁ܦ݁ܶܐ ܬܰܡܳܐ ܣܬܶܐ ܬܘܝܪ ܚܰܐ ܡܰܥ ܥܰܪܫܳܢܰܝܕ݂ܝ. ܘܗܰܘܟܼܰܐ ܒܘ ܫܷܟܷܠܰܢܐ ܡܟܰܡܶܠܝ ܐܝ ܥܰܣܟܰܪܝܰـܝܕ݂ܝ. ܐܝܢܰܩܠܰܐ ܕܰܐܬ݂ܝܢܐ ܠܘ ܒܰܝܬܐ ܙܘܷܢܠܰܢ ܬܪܰܟܬܪ ܝܰܠܷܦܢܐ ܐܰܥܠܶܗ ܫܘܦܶܪܬܝـܝܶܐ ܘܣܳܝܰܡܘܰܝܢܐ ܐܰܫ ܫܘܓ݂ܠܳܢܶܐ ܕܝ ܩܪܝܬܼܐ ܐܶܒܶܗ. ܒܚܰܐ ܡܰܝ ܝܰܘܡܶܐ ܐܳܢܐ ܘܰܐܚܘܢܝ ܥܰܡ ܚܕ݂ܳܕ݂ܶܐ ܐܰܙܙܰܢܐ ܠܘ ܬܰܠܬܳܡܐ ܕܰܟ ܟܶܦܶܐ ܡܶܐ ܒܰܝܢ ܕܰܢ ܐܰܪܥܳܬ݂ܶܐ. ܐܳܢܐ ܩܳܠܰܥܘܰܝܢܐ ܐܘ ܬܪܰܟܬܳܪ، ܐܘ ܐܰܒܪܐ ܕܰܐܚܘܢܝ ܣܰܠܷܩ ܥܰܠ ܐܝ ܥܰܪܰܒܰܐ ܕܟܷܬܝܐ ܡܥܰܠܰܩܬܐ ܒܘ ܬܪܰܟܬܳܪ ܕܟܷܐܡܡܝܠܰܗ ܐܝ ܬܪܶܠܰܗ. ܡܷܪܠܝܠܶܗ ܒܪܰܙܝ ܐܝܢܰܩܠܰܐ ܕܡܳܛܝܢܰܐ ܓܰܒ ܒܰܒܘܟ݂ ܢܚܰܬ ܡܥܰܘܶܢܶܗ ܐܳܢܐ ܣܬܶܐ ܓܷܙܝܢܐ ܒܳܝܰܙܢܐ ܐܰܟ ܟܶܦܶܐ. ܡܷܪܠܶܠܝ ܬܰܡܰܡ ܥܰܡܐ؛ ܗܶܫ ܕܠܐ ܡܰܛܝܢܐ ܓܰܒ ܐܘ ܒܰܒܐ ܡܚܰܠܰܩܠܶܗ ܪܘܚܗ ܡܝ ܥܰܪܰܒܰܐ ܕܘ ܬܪܰܟܬܪ. ܐܝܢܰܩܠܰܐ ܕܷܡܚܰܠܰܩܠܶܗ ܪܘܚܶܗ ܐܝ ܓܷܡܠܰܟܶܐ ܕܰܐܥܠܶܗ ܡܥܰܠܩܐ ܒܝ ܩܘܪܢܝܬ݂ܐ ܕܝ ܥܰܪܰܒܰܐ ܘܢܰܦܷܠ ܬܰܚܬܝ ܬܰܟܰܪܶܐ. ܐܳܢܐ ܣܬܶܐ ܠܐ ܦܪܷܩܠܝ ܐܶܒܶܗ ܕܷܫܠܝ ܐܰܥܠܶܗ ܘܫܰܦܷܥܢܐ، ܟܷܬܘܰܐ ܢܳܫܶܐ ܒܰܕ ܕܷܟܳܬ݂ܰܢܷܟ ܗܷܢܟܷ ܐܝܢܰܩܠܰܐ ܕܷܦܪܷܩܩܶܗ ܡܗܰܘܰܪܪܶܗ ܐܰܥܠܝ ܗܷܕܝ ܟܰܠܝܢܐ. ܢܰܚܷܬܢܐ ܚܙܶܠܝ ܟܰܠܶܐ ܝܐ ܡܙ̰ܝܕܐ ܐܝܕ݂ܶܗ ܘܪܰܓ݂ܠܶܗ ܟܰܝـܝܘܶܐ ܓܼܰܠܰܒܶܐ، ܛܥܷܢܠܰܢ ܡܰܚܰܬܠܰܢ ܢܰܩܠܰܐ ܚܪܶܬܐ ܒܘ ܬܪܰܟܬܪ ܘܡܳܒܶܠܰܢ ܠܝ ܩܷܤܛܰܟ݂ܰܢܰܐ. ܐܳܢܐ ܡܰܝܶܠܝ ܪܘܚܝ ܕܝ ܥܰܣܟܰܪܝـܝܶܐ ܠܐ ܙܷܒܛܳܠܝ ܥܰܠ ܕܠܰܬܘܰܝܠܝ ܐܰܗܠܝـܝܶܐ. ܒܷܬܼܷܪ ܡܝ ܢܰܩܠܰܝܐ ܡܷܕܠܝܠܝ ܐܰܗܠܝـܝܶܐ، ܗܶܕܝ ܐܳܢܐ ܐܘ ܫܰܒܳܐ ܕܒܶܐ ܩܰܫܐ ܐܘ ܡܷܕܗܳܝܐ ܙܘܷܢܠܰܢ ܠܰܢ ܩܰܡܝܳܢ ܥܰܡ ܚܕ݂ܳܕ݂ܶܐ ܐܷܙܙܰܘܰܝܢܰܐ ܠܷܣܟܰܢܕܰܪܘܢ ܡܰܝܬܶܘܰܝܢܐ ܡܰܠ. ܡܷܐ ܕܷܦܬܝܚ ܐܘ ܬܰܪܥܐ ܕܘ ܥܷܪܰܩ ܒܕܶܠܰܢ ܐܷܙܙܰܢ ܘܳܐܬ݂ܳܝܢܰܐ ܠܘ ܥܷܪܰܩ. ܒܘ ܙܰܒܢܰܘܐ ܙ̰ܒܳܝ ܕܡܰܝܬܷܢܰܐ ܡܰܙܳܛ ܐܝ ܩܰܣܰܐ ܕܘ ܩܰܡܝܳܢ ܡܫܰܚܷܠܦܳܠܰܢ ܣܝܡܳܠܰܢ ܬܰܢܟܶܪ. ܡܶܐ ܡܰܘܨܰܠ ܡܶܐ ܙܰܟܼܐ ܘܡܶܐ ܕܷܟܳܬ݂ܶܐ ܚܪܶܢܶܐ ܓ݂ܰܠܰܒܶܐ ܛܘܥܢܝܘܰܝܢܰܐ ܡܰܠ. ܐܶܠܐ ܒܘ ܙܰܒܢܰܘܐ ܐܰܛ ܛܰܝܶܐ ܓܼܰܠܰܒܶܐ ܡܷܦܩܝܘܰܝܠܰܢ ܥܰܣܩܘܬ݂ܐ ܥܰܠ ܕܟܷܬܘܰܝܢܰܐ ܡܫܝܚܳܝܶܐ. ܢܰܩܠܰܐ ܚܕ݂ܐ ܡܰܟܠܰܠܰܠܝ ܙܷܕ ܡܶܐ ܐܰܪܒܰܥ ܣܰܥܰܝܰܬ ܐܷܡܡܝܘܰܝܠܰܢ ܗܰܬܘ ܐܰܡ ܡܫܝܚܳܝܶܐ ܟܳܩܘܛܠܘܛܘ ܐܰܩ ܩܳܢܨܳܠܳܨܰܝܕ݂ܰܢ ܒܰܐܘܪܘܦܰ݁ܐ، ܘܗܰܬܘ ܟܳܐܬ݂ܘܬܘ ܪܰܚܰܐ ܟܳܫܘܓ݂ܠܘܬܘ ܗܰܪܟܶܐ. ܗܷܕܝ ܐܳܢܐ ܣܬܶܐ ܐܰܙܙܝܢܐ ܡܰܫܟܶܠܝ ܠܘ ܪܰܒܰܬ݂ܬ݂ܶܗ ܡܷܪܠܝ ܗܰܢܝ ܒܰܣ ܣܰܥܰܝܰܬ ܟܳܡܰܟܠܝܠܰܢ ܥܰܠ ܕܟܷܬܢܰܐ ܡܫܝܚܳܝܶܐ. ܐܘ ܪܰܒܰܬ݂ܬ݂ܶܗ ܡܷܪܠܰܠܶܗ ܣܘܡܘ ܫܘܓ݂ܠܶܗ. ܐܳܢܐ ܣܬܶܐ ܡܷܕܠܝ ܐܘ ܬܰܢܟܶܪ ܕܕܳܥܰܪܢܐ ܠܘ ܒܰܝܬܐ ܒܘ ܕܰܪܒܐ ܟܷܬܘܰܐ ܟܰܫܶܐ ܥܶܠܰܝܬܐ ܘܟܷܬܘܰܐ ܩܰܡܝܳܢ ܒܩܰܡܘܬ݂ܝ ܒܷܚܕ݂ܐ ܢܰܩܠܰܐ ܟܰܠܝ ܒܦܷܠܓܶܗ ܕܘ ܕܰܪܒܐ. ܐܳܢܐ ܣܬܶܐ ܒܣܘܪܥܰܐ ܢܳܚܰܬܘܰܝܢܐ ܒܝ ܟܰܫܶܐ ܟܷܬܘܰܐ ܩܰܡܝܳܢܶܐ ܚܪܶܢܶܐ ܒܘ ܓܰܒܐ ܚܪܶܢܐ ܕܘ ܕܰܪܒܐ ܐܰܬ݂ܳܝܶܐ. ܐܳܢܐ ܣܬܶܐ ܦܰܝܷܫܢܐ ܡܰܔܒܘܪ ܘܡܚܶܠܝ ܐܶܒܶܗ. ܟܷܬܘܰܐ ܥܰܣܶܟܷܪ ܩܰܪܝܘܶܐ ܠܬܰܡܐ ܪܰܗܝܛܝ ܕܡܷܦܩܝܠܝ ܡܘ ܬܰܢܟܶܪ. ܒܰܡ ܡܰܙܪܰܒܰܬ ܗܘܠ ܕܩܰܕܝܪܝ ܡܷܦܩܝܠܝ ܡܰܚܰܬܰܠܠܝ ܒܝ ܥܰܪܰܒܰܐ ܕܝ ܥܰܣܟܰܪܝـܝܶܐ ܘܡܳܒܰܠܰܠܝ ܠܷܩܪܝܬ݂ܐ ܩܰܪܘܬܐ ܠܬܰܡܐ ܕܟܷܬܘܰܐ ܐܶܒܰܗ ܩܷܣܛܰܟ݂ܰܢܰܐ. ܡܰܚܰܬܰܠܠܝ ܒܓܰܘܰܗ ܐܰܙܙܷܢܢܶܗ ܕܩܳܪܷܢ ܠܘ ܬܰܟ݂ܬܳܪ ܒܷܬܼܷܪ ܒܦܷܠܓܶܗ ܕܣܰܥܰܝܶܐ ܐܰܬܼܝ ܐܘ ܬܰܟ݂ܬܪ ܚܷܪܠܶܗ ܥܰܠ ܪܰܓ݂ܠܳܬ݂ܝ ܡܷܪܠܶܗ؛ ܐܳܢܐ ܠܰܝܒܝ ܣܰܡܢܐ ܡܶܕܶܐ ܗܰܪܟܶܐ ܓܠܳܙܰܡ ܡܷܒܠܘܬܷܠܶܗ ܠܕܘܟܬ݂ܐ ܛܰܘܬܷܪ. ܡܚܶܠܶܠܝ ܬܪܶܐ ܡܚܰܛܶܐ ܕܘ ܢܩܳܪܐ ܐܷܫܡܳܐ ܬ݂ܢܷܚܘܰܝܢܐ ܒܰܡ ܡܚܰܛܰܢܷܟ، ܩܰܝܷܡ ܡܒܰܠܰܠܝ ܠܩܷܣܛܰܟ݂ܰܢܰܐ ܛܰܘܬܷܪ. ܬܰܡܐ ܣܷܡܡܶܗ ܪܰܓܼܠܝ ܥܰܡܰܠܝـܝܶܐ ܡܰܕܡܰܟܼܰܠܝ ܬܠܳܬ݂ܐ ܘܥܷܣܪܝ ܝܰܘܡܶܐ، ܟܷܬܘܰܐ ܬܰܟ݂ܬܪ ܡܫܝܚܳܝܐ ܓܰܠܼܰܒܶܐ ܛܰܘܘܐ ܡܥܰܘܰܢܠܶܠܝ. ܐܝܢܰܩܠܰܐ ܕܟܰܡܝܠܝ ܐܰܬ ܬܠܳܬ݂ܐ ܥܷܣܪܝ ܝܰܘܡܰܝܕ݂ܝ ܐܰܬ݂ܝ ܡܷܪܠܶܠܝ ܐܰܢܰܩܠܰܐ ܟܝܒܘܟ݂ ܢܷܦܩܷܬ ܡܝ ܩܷܣܛܰܟܼܰܢܰܐ. ܐܳܢܐ ܣܬܶܐ ܡܚܰܕ݂ܰܪܠܝ ܪܘܚܝ ܠܰܦ ܦܷܠܓܶܗ ܕܝܰܘܡܐ ܕܢܳܦܰܩܢܐ، ܒܘ ܬܰܪܥܐ ܡܰܟܠܰܠܰܠܝ ܘܡܷܪܪܶܗ؛ ܓܠܳܙܰܡ ܕܳܐܒܰܬ ܬܠܰܬܼܡܐ ܕܝܢܳܪܶܐ ܚܰܩ ܕܦܰܝـܝܫܰܬ ܒܝ ܩܷܣܛܰܟ݂ܢܰܐ. ܐܳܢܐ ܣܬܶܐ ܡܷܪܠܝܠܷܢ ܐܝܢܰܩܠܰܝܐ ܛܪܰܝܘ ܐܰܕ ܠܰܠܝܐ ܣܬܶܐ ܕܳܡܰܟܼܢܐ ܗܰܪܟܶܐ ܙ̰ܒܳܝ ܕܷܡܫܰܕܰܪܢܐ ܟܼܰܒܪܐ ܠܘ ܐܰܗܷܠ ܕܟܷܬܠܝ ܒܬܘܪܟܝـܝܰܐ ܡܰܝܬܷܢ ܐܰܟ ܟܰܠܰܘܰܬ݂ܟ݂ܘ. ܡܷܪܰܠܠܝ؛ ܠܐ ܟܳܘܶܐ ܕܦܰܝܫܷܬ ܗܰܪܟܶܐ، ܘܕܠܐ ܡܰܝܬܷܬ ܐܰܟ ܟܰܠܰܘܰܬ ܟܛܳܪܝܢܰܐ ܕܡܝܫ̰ܳܟܷܬ ܒܘ ܚܰܦܷ݁ܣ. ܐܳܢܐ ܣܬܶܐ ܪܰܓ݂ܠܳܬ݂ܝ ܡܰܣܪܶܘܰܝܢܶܐ ܠܰܝܒܝܘܰܐ ܒܘ ܫܷܟܷܠܰܢܐ ܕܥܳܒܰܪܢܐ ܠܰܚ ܚܰܦ݁ܣܰܬ. ܩܰܝܷܡ ܡܫܰܕܰܪܠܝ ܟܼܰܒܪܐ ܠܐܝܩܰܪܬ݂ܐ ܕܟܷܬܘܰܝܠܰܢ ܐܝܕ݂ܝܥܶܐ ܒܡܰܘܨܰܠ ܗܰܢܷܟ ܐܰܬ݂ܷܢ ܠܰܦܦܶܠܝ ܘܗܘܘܶܗ ܐܰܟ ܟܰܠܰܘܰܬ ܡܶܚܠܳܦܝ ܘܡܳܦܰܩܰܠܝ ܡܝ ܩܷܣܛܰܟܼܰܢܰܐ ܘܡܒܰܠܰܠܝ ܠܘ ܒܰܝܬܼܐ ܘܦܰܝܷܫܢܐ ܫܰܒܬ݂ܐ ܓܰܒܰܝܝܶܗ. ܡܫܰܕܰܪܘܰܝܠܝ ܟ݂ܰܒܪܐ ܠܝ ܩܪܝܬ݂ܐ ܕܳܐܬ݂ܶܐ ܢܳܫܳܐ ܡܳܝܰܕܠܝ. ܒܷܬ݂ܷܪ ܡܶܐ ܫܰܒܬ݂ܐ ܐܰܬ݂ܝ ܒܰܪܨܰܘܡܐ ܐܘ ܐܰܒܪܐ ܕܚܳܠܝ ܡܘܣܰܐ ܕܒܶܐ ܦܷܢܔܶܐ ܡܰܚܰܬܠܶܠܝ ܒܘ ܩܰܡܝܳܢ ܕܷܡܒܶܠܝ ܠܡܝܕܷܢ. ܒܷܬ݂ܷܪ ܡܶܐ ܕܡܰܛܝܢܰܐ ܠܝ ܩܪܝܬܼܐ ܫܰܬܐ ܕܝܰܘܡܰܘܳܬ݂ܶܐ ܠܐ ܩܰܕܷܪܢܐ ܕܩܳܝܰܡܢܐ ܡܰܓ ܓܰܠܶܐ ܗܘܠ ܕܪܰܓܠܝ ܢܰܝـܝܚܐ. ܒܷܬ݂ܷܪ ܡܶܐ ܕܪܰܓ݂ܠܝ ܢܰܝـܝـܚܐ ܢܰܩܠܰܐ ܚܪܶܬܐ ܩܰܝܷܡܢܐ ܘܒܕܶܠܝ ܕܣܰܡܢܐ ܫܘܦܶܪܬܝـܝܶܐ، ܒܷܬ݂ܷܪ ܐܳܢܐ ܘܬܪܶܐ ܓܘܢܕܝ ܡܶܐ ܕܝܕ݂ܰܢ ܡܷܕܗܳܝܶܐ ܐܰܙܙܰܢܐ ܠܡܶܪܣܝܢ ܡܠܶܠܰܢ ܐܘ ܩܰܡܝܳܢ ܥܰܡܪܐ ܕܡܷܒܠܝܢܰܠܶܗ ܠܬܰܗܪܰܢ ܕܘ ܐܝܪܰܢ. ܢܰܦܝܩܝܢܰܐ ܠܘ ܕܰܪܒܐ ܐܝܢܰܩܠܰܐ ܕܡܰܛܝܢܰܐ ܠܘ ܚܘܕܘܬ ܕܦܰܝܬܝܢܰܐ ܠܘ ܐܝܪܰܢ. ܚܙܰܠܠܶܗ ܐܝ ܦ݁ܝܠܰܩܰܐ ܕܘ ܩܰܡܝܳܢ ܡܷܪܪܶܗ ܠܐ ܟܳܛܳܪܝܢܰܐ ܕܦܰܝܬܝ ܐܰܩ ܩܰܡܝܳܢܶܐ ܕܰܡ ܡܷܪܕܢܳܝܶܐ ܗܰܪܟܶܐ. ܐܰܚܢܰܐ ܣܬܶܐ ܟܷܬܘܰܝܠܰܢ ܚܰܐ ܡܰܥܡܘܪ ܐܝܕ݂ܝܥܐ ܡܶܐ ܓܙܝܪܐ ܫܳܓܰܠܘܰܐ. ܩܪܶܠܰܢܠܶܗ ܗܝـܝܶܐ ܡܥܰܘܰܢܠܶܠܰܢ ܘܦܰܝـܝܬܝܢܰܐ ܐܘ ܚܘܕܘܬ ܐܘ ܠܰܠܝܰܘܐ ܕܰܡܝܟ݂ܝܢܰܐ ܒܘ ܓܷܡܪܷܟ ܕܘ ܐܝܪܰܢ. ܐܝܢܰܩܠܰܐ ܕܗܰܘܝ ܨܰܦܪܰܝܬܐ ܢܰܦܝܩܝܢܰܐ ܠܘ ܕܰܪܒܐ ܕܷܐܙܙܰܢܐ ܠܬܰܗܪܰܢ ܩܠܷܥܠܰܢ ܚܰܡܡܷܫܡܐ ܟܝܠܳܡܰܬܪܰܬ ܗܷܕܝ ܟܰܠܝܢܰܐ ܒܕܘܟܬ݂ܐ ܕܡܷܬ݂ܢܳܚܝܢܰܐ، ܠܰܩܝܢܰܐ ܬܰܡܐ ܒܚܰܐ ܫܘܦܶܪ ܡܷܪܕܢܳܝܐ ܐܝܕ݂ܝܥܐ، ܐܰܬܼܝ ܝܰܬܘ ܓܰܒܰܢ ܡܷܪܠܶܗ ܟܘܕ݂ܥܘܬܘ ܨܰܦܪܐ ܡܷܢ ܝܐ؟ ܡܷܪܠܰܢ ܠܐ؛ ܡܷܪܠܶܗ ܨܰܦܪܐ ܐܘ ܪܰܡܰܙܰܢܝܐ ܝܰܥܢܝ ܐܘ ܨܰܘܡܐ ܕܰܛ ܛܰܝܶܐ ܝܐ ܡܰܘܟ݂ܰܐ ܐܰܕܝܰܘܡܰܐ ܙܘܰܢܷܢܟ݂ܘ ܡܘܟܠܐ ܘܠܰܚܡܐ ܓܼܰܠܰܒܶܐ ܥܰܠ ܕܠܰܦ݁ܟ݂ܘ ܒܘ ܨܰܘܡܐ ܕܐܘܟ݂ܠܘܬܘ ܡܶܕܶܐ ܒܝ ܫܘܩܐ. ܢܳܫܐ ܕܚܳܙܰܠܟ݂ܘ ܟܝܬܐ ܕܡܳܚܷܢܟ݂ܘ ܘܟܝܬܐ ܕܩܘܛܠܷܢܟ݂ܘ. ܐܰܚܢܰܐ ܣܬܶܐ ܐܰܙܙܰܢܐ ܙܘܷܢܠܰܢܠܰܢ ܟܘܠ ܡܶܕܶܐ ܒܘ ܙܳܝܘܕܐ، ܘܢܰܦܝܩܝܢܰܐ ܠܘ ܕܰܪܒܐ ܕܷܐܙܙܰܢܐ ܠܬܰܗܪܰܢ ܘܒܘ ܙܰܒܢܰܘܐ ܣܬܶܐ ܟܷܬܘܰܐ ܚܰܪܒ ܒܰܝܢ ܠܘ ܐܝܪܰܢ ܘܠܘ ܥܷܪܩܰ. ܕܶܪܬܷܪ ܝܰܘܡܐ ܡܰܛܝܢܰܐ ܠܬܰܗܪܰܢ ܐܝܢܰܩܠܰܐ ܕܥܰܒܝܪܝܢܰܐ ܠܓܰܘܰܗ ܚܙܶܠܰܢ ܟܰܠܷܢ ܐܰܒ ܒܳܬܶܐ ܥܶܠܳܝܶܐ ܘܪܰܒܰܢܷܟ ܟܘܠܠܶܗ ܢܰܦܝܠܶܗ ܘܬܘܝܪܶܐ ܒܘ ܚܰܪܒ ܕܗܰܘܝܘܰܐ. ܚܰܐ ܔܰܡ ܠܐ ܦܰܝܷܫܘܰܐ ܣܰܓ݂ܠܰܡ. ܒܘ ܙܰܒܢܰܘܐ ܐܝ ܚܟܘܡܶܐ ܟ݂ܘܡܰܝܢܝ ܘܰܐ. ܐܘ ܪܰܕܝܐ ܕܬܰܗܪܰܢ ܡܷܪܠܶܗ؛ ܐܘ ܚܰܐ ܕܡܝܚܰܝܨܷܠ ܐܝ ܢܰܩܠܰܐ ܕܟܳܐܟ݂ܷܠ ܐܰܘ ܕܟܳܫܳܬܶܐ ܡܶܕܶܐ ܒܘ ܨܰܘܡܐ ܓܡܷܡܚܶܠܶܗ ܐܰܪܒܥܝ ܙ̰ܳܦ݁ܰܛ ܗܰܟܰܐ ܡܰܝܷܬ݂ ܗܰܟܰܐ ܦܰܝܷܫ ܗܝـܝܶܐ ܘܐܘ ܢܰܨܝܒܰܝܕ݂ܶܗ. ܐܰܚܢܰܐ ܣܬܶܐ ܦܰܝـܝܫܝܢܰܐ ܚܰܡܫܰܥܣܪ ܝܰܘܡܶܐ ܒܬܰܗܪܰܢ ܗܘܠ ܕܡܰܢܚܰܬܬܶܗ ܐܘ ܡܰܠ ܕܟܝܬܐ ܒܘ ܩܰܡܝܳܢ. ܠܐ ܡܰܔܪܝܘܰܝܢܰܐ ܠܐ ܕܫܳܬܝܢܰܐ ܔܓ݂ܰܪܰܐ ܘܕܠܐ ܐܘܟ݂ܠܝܢܰܐ ܡܘܟܠܐ ܬܳܠܝܘܰܝܢܰܐ ܪܘܚܰܢ ܒܓܰܘܶܗ ܕܘ ܩܰܡܝܳܢ ܐܝܢܰܩܠܰܐ ܕܐܘܟ݂ܠܝܘܰܝܢܰܐ ܘܕܫܳܬܝܘܰܝܢܰܐ ܡܶܕܶܐ. ܒܷܬ݂ܷܪ ܡܶܐ ܕܡܰܟ݂ܠܰܠܶܗ ܐܘ ܡܰܠ ܐܰܚܢܰܐ ܣܬܶܐ ܢܰܦܝܩܝܢܰܐ ܠܘ ܕܰܪܒܐ ܕܕܘܥܪܝܢܐ ܠܘ ܒܰܝܬܐ. ܡܶܐ ܬܰܗܪܰܢ ܗܘܠ ܠܘ ܚܘܕܘܬ ܕܬܘܪܟܝـܝܰܐ ܐܰܠܦܐ ܟܝܠܳܡܰܬܪܶܐ ܝܐ. ܡܶܩܷܡ ܡܶܐ ܕܡܰܛܝܢܰܐ ܐܘ ܦ݁ܳܠܝܣ ܡܰܟܠܶܠܶܠܰܢ ܡܷܪܠܰܢܠܶܗ؛ ܡܷܢ ܟܷܐܒܥܷܬ؟ ܡܷܪܠܶܗ؛ ܟܳܣܰܝܡܘܬܘ ܣܘܪܥܰܐ ܓ݂ܰܠܰܒܶܐ، ܡܳܦܷܩܘ ܐܰܦ݁ ܦܰ݁ܨܰܦܳ݁ܪܬܶܐ. ܗܘܠܰܢܠܶܢܶܗ ܩܰܝܷܡ ܩܛܷܥܠܶܠܰܢ ܔܷܙܰܐ. ܒܠܰܠܝܐ ܡܰܛܝܢܰܐ ܠܘ ܚܘܕܘܬ ܕܬܘܪܟܝـܝܰܐ ܐܶܠܐ ܐܘ ܬܰܪܥܐ ܣܟ݂ܝܪܳܘܰܐ. ܒܠܰܠܝܐ ܦܰܝـܝܫܝܢܰܐ ܡܰܔܒܘܪ ܕܦܰܝܫܝܢܰܐ ܬܰܡܐ. ܟܷܬܘܰܐ ܟܡܐ ܫܘܦܶܪܝܢ ܚܪܶܢܶܐ ܬܰܡܐ ܠܰܙ ܘܰܝܢܶܐ ܝܰܥܢܝ ܡܝ ܟܼܰܣܪܰܐ ܕܬܷܪܰܒܙܳܢ ܘܰܝܢܶܐ. ܚܙܰܠܠܶܗ ܕܡܷܪܕܢܳܝܶܐ ܢܰܐ ܐܰܬܷܼܢ ܠܓܰܒܰܢ ܐܷܒܥܝܘܰܐ ܕܡܷܦܩܝ ܩܰܠܶܐ ܕܡܰܥܰܔܙܝܠܰܢ ܐܷܡܡܝܘܰܐ ܐܰܡ ܡܷܪܕܢܳܝܶܐ ܠܐ ܟܳܛܳܪܷܢ ܐܰܚܢܰܐ ܕܢܘܚܬܝܢܰܐ ܠܙܰܟܼܐ ܡܰܘܟ݂ܰܐ ܠܐ ܪܷܚܡܝܘܰܐ ܐܰܡ ܡܷܪܕܢܳܝܶܐ. ܟܷܬܘܰܐ ܬܰܡܐ ܫܘܦܶܪܝܢ ܚܪܶܢܶܐ ܟܘܪܬ ܡܶܐ ܐܰܓ݂ܪܝ ܐܝ ܘܰܠܰܝܶܐ ܐܝܢܰܩܠܰܐ ܕܫܰܡܝܥܝ ܐܘ ܩܳܠܐ ܗܷܢܷܟ ܣܬܶܐ ܐܰܬ݂ܷܢ ܐܝܢܰܩܠܰܐ ܕܰܐܕ݂ܝܥܝ ܡܷܪܕܢܳܝܶܐ ܢܰܐ ܡܷܪܪܶܗ ܠܰܚ ܚܪܶܢܶܐ ܗܰܢܝ ܐܰܕ݂ ܕܰܝܦܰܝܕ݂ܰܢ ܢܶܐ ܕܷܡܔܰܪܒܘܬܘ ܕܡܰܥܰܔܙܘܬܘܢܢܶܗ ܓܢܳܦܷܩ ܩܰܠܶܐ ܦ݁ܝܣ ܗܰܪܟܶܐ. ܥܰܠ ܕܰܐܚܢܰܐ ܐܝܢܰܩܠܰܐ ܕܟܷܙܰܢܳܐ ܕܡܰܝܬܝܢܰܐ ܦܰܚܡܐ ܡܶܐ ܬܰܡܐ ܟܳܘܷܢܠܰܢ ܡܳܪܐ ܓ݂ܰܠܰܒܶܐ، ܒܟܼܶܪ ܕܰܟ ܟܘܪܡܰܢܔܰܢܷܟ ܟܼܰܠܝܨܝܢܰܐ ܡܝ ܩܰܠܶܐ. ܡܶܐ ܕܗܰܘܝ ܨܰܦܪܰܝܬܐ ܫܰܦܝܥܝܢܰܐ ܐܘ ܚܘܕܘܬ ܘܒܷܬܪܶܐ ܝܰܘܡܶܐ ܗܘܠ ܕܡܰܛܝܢܰܐ ܠܡܝܕܷܢ. ܐܝܢܰܩܠܰܐ ܕܡܰܛܝܢܰܐ ܠܡܷܕ݂ܝܰܕ݂ ܐܰܢ ܢܳܫܶܐ ܠܰܕ݂ܝܥܝܠܰܢ ܥܰܠ ܕܰܩܢܰܢ ܝܰܪܷܟ݂ܘܰܐ ܓܼܰܠܰܒܶܐ. ܒܠܰܠܝܐ ܐܰܬܷܼܢ ܐܰܓ ܓܘܢܕܝ ܟܘܠܠܶܗ ܓܰܒܰܢ ܡܫܰܝܠܝܘܰܐ ܐܘ ܕܰܪܒܐ ܘܡܷܢ ܔܰܪܝ ܒܪܝܫܰܢ ܒܘ ܐܝܪܰܢ، ܗܘܠ ܦܷܠܓܶܗ ܕܠܰܠܝܐ ܡܰܚܟܶܠܰܢ ܟܘܠ ܡܶܕܶܐ ܕܐܰܬܼܝ ܠܪܝܫܰܢ ܒܘ ܕܰܪܒܐ. ܒܢܝܡܝܢ ܬܳܪܶܐ 1094 ܡ̈ܠܐ.