Benjamin Toere: ܒܘ ܣܝܣܬܶܡ ܚܰܬ݂ܐ ܕܘ ܝܘܠܦܳܢܐ ܐܘ ܬܶܟܢܳܠܳܙ̰ܝ / Bu sistam ḥaṯo du yulfono u tëknoloži
Bu sistam ḥaṯo du yulfono u tëknoloži
ܐܘ ܕܳܪܐ ܕܟܷܬܢܰܐ ܐܶܒܶܗ ܟܳܡܝܬܰܘܡܰܪܠܶܗ ܐܘ ܕܳܪܐ ܕܘ ܝܘܠܦܳܢܐ، ܐܘ ܡܶܕܶܐ ܪܰܒܐ ܕܘ ܕܳܪܰܢܐ ܕܟܘܠ ܝܰܘܡܐ ܕܟܳܡܝܫܰܘܫܛܐ ܐܝ ܒܪܝܬ݂ܐ ܒܰܡ ܡܶܕܳܢܶܐ ܚܰܬ݂ܶܐ ܕܟܳܢܳܦܷܩ. ܒܝ ܬܷܔܰܪܰܐ ܐܘ ܡܶܕܶܐ ܕܟܳܡܷܛܠܷܒ ܐܰܕܝܳܡܰܐ ܒܝ ܩܰܡܰܝܬܐ ܝܘܠܦܳܢܐ ܝܐ ܘܝܕ݂ܰܥܬ݂ܐ ܝܐ. ܕܘܟܬܼܶܗ ܕܘ ܚܰܝܠܐ ܘܕܘ ܔܰܝܰܪܢ ܡܷܕܠܶܗ ܐܘ ܚܰܝܠܐ ܕܟܳܡܝܬܰܘܡܰܪܠܶܗ ܢܘܟܠܶܐܶܪ. ܘܒܘ ܬܶܟܢܳܠܳܙ̰ܝ ܕܷܡܫܰܘܫܷܛ ܡܘ ܓܰܒܐ ܕܰܐ ܐܶܣܳܪܶܐ ܢܳܫܳܝܶܐ ܐܘ ܡܛܳܝܳܐ ܠܝ ܐܝܕ݂ܰܥܬ݂ܐ ܗܰܘܝ ܦܫܝܩܐ ܓ݂ܰܠܰܒܶܐ. ܐܘ ܢܘܦܘܣ ܐܰܘ ܐܘ ܥܰܡܐ ܥܰܠ ܕܙܰܝܷܬ ܓ݂ܰܠܰܒܶܐ ܗܰܘܝ ܣܢܝܩܘܬ݂ܐ ܕܡܷܡܛܶܐ ܒܶܐܣܳܪܶܐ ܠܰܢ ܢܳܫܶܐ ܟܘܠܠܶܗ. ܐܘ ܕܰܪܒܐ ܦܫܝܩܐ ܘܪܰܟ݂ܝܣ ܕܘ ܡܛܳܝܐ ܠܘ ܥܰܡܰܢܐ ܟܘܠܶܗ ܕܡܝܫܰܘܫܰܛܘܰܐ ܐܘ ܬܶܟܢܳܠܳܙ̰ܝ ܕܰܐ ܐܶܣܳܪܶܐ ܕܟܳܡܝܬܰܘܡܰܪܠܶܗ ܒܘ ܬܘܪܟܳܝܐ ܐܝܠܶܬܝܫܝܡ ܬܶܟܢܳܠܳܙ̰ܝܣܝ، ܘܕܥܳܒܰܪܘܰܐ ܠܰܚ ܚܰܝܶܐ ܕܰܐܢ ܢܳܫܶܐ ܟܘܠܠܶܗ ܝܐ. ܘܗܰܘܟ݂ܰܐ ܗܰܘܝ ܐܰܕܝܳܡܰܐ ܒܫܷܟܷܠ ܦܫܝܩܐ ܓ݂ܰܠܰܒܶܐ ܒܷܚܕ݂ܐ ܩܰܛܝܢܬܐ ܟܳܡܷܡܛܶܗ ܠܓ݂ܰܠܰܒܶܐ ܡܘ ܥܰܡܐ. ܘܰܐ ܝܰܠܝܦܶܐ ܪܰܒܶܐ ܕܷܒܪܝܬ݂ܐ ܟܷܡܡܝ ܐܘ ܕܳܪܐ ܚܰܬ݂ܐ ܟܬܳܘܶܐ ܐܘ ܕܳܪܐ ܕܰܐ ܐܶܣܳܪܶܐ ܕܘ ܬܶܟܢܳܠܳܙ̰ܝ. ܒܰܚ ܚܰܡܫܝ ܐܷܫܢܶܐ ܚܰܪܳܝܶܐ ܒܰܫ ܫܘܚܠܳܦܶܐ ܘܒܰܫ ܫܘܫܳܛܶܐ ܕܗܰܘܝ ܒܷܒܪܝܬ݂ܐ ܡܫܰܚܷܠܦܝ ܐܰܫ ܫܶܬܶܣܶܐ ܕܰܥ ܥܰܡܶܐ ܟܘܠܠܶܗ ܘܥܰܒܷܪܪܶܗ ܡܶܕܳܢܶܐ ܚܰܬ݂ܶܐ ܓ݂ܰܠܰܒܶܗ ܠܰܡ ܡܰܪܷܕܘܳܬ݂ܐ ܥܰܬܝܩܶܐ. ܐܘ ܡܶܕܰܢܐ ܕܗܰܘܝ ܒܷܒܪܝܬ݂ܐ ܡܘ ܓܰܒܐ ܕܰܐܢ ܐܶܣܳܪܶܐ ܥܰܡܳܝܶܐ ܛܪܶܠܶܗ ܕܷܡܩܰܕܡܐ ܐܝ ܒܪܝܬ݂ܐ ܠܷܚܕ݂ܳܕ݂ܶܐ، ܕܰܥ ܥܰܡܶܐ ܕܟܷܬܢܶܐ ܣܟ݂ܝܪܶܐ ܘܬܰܠܝܶܐ ܘܪܰܚܘܩܶܐ ܡܘ ܓܰܘܳܢܳܝܐ ܕܰܢ ܢܳܫܶܐ، ܗܰܢܝ ܠܐ ܩܰܕܝܪܝ ܡܰܣܷܛܪܝ ܪܘܚܰܝܝܶܗ ܘܟܼܠܝܛܝ ܒܰܐܝܢ ܕܰܥ ܥܰܡܶܐ ܘܒܰܝܢ ܕܰܡ ܡܰܪܷܕܘܳܬ݂ܶܐ ܚܪܶܢܶܐ. ܐܰܥ ܥܰܡܶܐ ܕܟܷܬܢܶܐ ܒܩܰܠܝܠܘܬ݂ܐ ܐܰܕܝܳܡܰܐ ܟܷܡܔܰܪܒܝ ܗܶܫ ܕܙܷܒܛܝ ܪܘܚܰܝܝܶܗ ܕܠܐ ܡܷܟ݂ܠܳܛܝ ܒܰܥ ܥܰܡܶܐ ܚܪܶܢܶܐ ܐܶܠܐ ܐܘ ܝܰܘܡܐ ܒܘ ܝܰܘܡܐ ܟܳܚܳܙܝܢܰܐ ܐܰܡ ܡܶܕܳܢܶܐ ܕܟܳܙܒܛܝ ܐܰܥ ܥܰܡܶܐ ܒܷܚܕ݂ܳܕܶܐ݂ ܒܕܰܠܠܶܗ ܕܡܝܣܰܟܪܝ، ܘܟܳܚܳܙܝܢܰܐ ܐܘ ܬܶܟܢܳܠܳܙ̰ܝ ܕܰܢ ܐܶܣܳܪܶܐ ܐܝܢܰܩܠܰܐ ܕܷܡܒܰܪܒܷܙ ܒܷܒܪܝܬ݂ܐ ܠܐ ܦܪܷܩܠܶܐ ܦܰܩܝܪܐ ܐܰܘ ܥܰܬܝܪܐ ܐܶܠܐ ܡܷܕܠܶܗ ܠܓܰܘܶܗ ܟܘܠܠܶܗ ܐܰܥ ܥܰܡܶܐ ܒܘ ܫܷܟܷܠ ܕܟܷܬܢܶܐ. ܐܰܕܝܳܡܰܐ ܐܰܥ ܥܰܡܶܐ ܐܰܘ ܐܰܕ ܕܰܘܠܰܬ ܐܝ ܥܰܬܝܪܘܬ݂ܰܬ݂ܶܗ ܟܳܡܷܚܫܳܘܐ ܒܘ ܬܶܟܢܳܠܳܙ̰ܝ ܕܟܷܬܬܶܗ ܐܰܘ ܒܘ ܬܶܟܢܳܠܳܙ̰ܝ ܕܟܳܣܰܝܡܝ ܘܕܟܳܡܷܦܩܝ ܚܰܬ݂ܬ݂ܐ. ܟܘܠܰܢ ܟܳܚܳܙܝܢܰܐ ܐܰܕܝܳܡܰܐ ܐܰܕ ܕܰܘܠܰܬ ܥܰܬܝܪܶܐ ܕܷܒܪܝܬܐ ܗܰܢܝ ܕܟܳܩܘܕܪܝ ܡܷܣܬܰܥܡܠܝ ܐܘ ܬܶܟܢܳܠܳܙ̰ܝܢܶܗ. ܘܡܰܘܟ݂ܰܐ ܗܷܢܷܟ ܟܳܣܰܝܡܝ ܐܰܫ ܫܘܫܳܛܶܐ ܪܰܒܶܐ ܕܘ ܬܶܟܢܳܠܳܙ̰ܝ. ܐܰܡ ܡܶܕܳܢܰܢܝ ܟܘܠܠܶܗ ܟܳܡܝܣܳܡܝ ܒܐܝܕ݂ܶܗ ܕܰܐܢ ܢܳܫܶܐ ܝܰܠܝܦܶܐ، ܡܰܘܟ݂ܰܐ ܣܬܶܐ ܟܳܚܳܙܝܢܰܐ ܒܰܐܢ ܢܷܫܢܰܢܝ ܐܰܚ ܚܰܪܳܝܶܐ ܐܘ ܝܘܠܦܳܢܐ ܕܘ ܬܶܟܢܳܠܳܙ̰ܝ ܥܰܒܷܪ ܠܰܒ ܒܶܝܬ݂ ܣܶܦܪܶܐ ܕܷܒܪܝܬ݂ܐ ܟܘܠܰܐ. ܐܰܥ ܥܰܡܶܐ ܟܘܠܠܶܗ ܟܳܡܔܰܪܒܝ ܕܡܷܦܩܝ ܥܠܰܝܡܶܐ ܢܰܗܝܪܶܐ ܝܰܠܝܦܶܐ ܘܟ݂ܰܠܳܩܶܐ ܠܰܫܰܢ ܕܩܘܕܪܝ ܕܷܡܫܰܘܫܛܝ ܪܘܚܰـܝـܝܶܗ. ܐܰܕ ܕܰܘܠܰܬ ܕܟܷܬܢܶܐ ܪܰܒܶܐ ܡܘ ܓܰܒܐ ܕܘ ܬܶܟܢܳܠܳܙ̰ܝ ܡܰܘܟ݂ܰܐ ܣܬܶܐ ܙܘܙܶܐ ܪܰܒܶܐ ܟܳܡܰܣܷܪܦܝ ܥܰܠ ܐܰܒ ܒܶܝܬ݂ ܣܶܦܪܶܐ. ܟܳܚܳܙܝܢܰܐ ܕܘ ܬܶܟܢܳܠܳܙ̰ܝ ܒܶܐ ܐܰܝܕܰܪܒܐ ܥܰܒܷܪ ܠܟܘܠ ܕܘܟܬ݂ܐ ܕܰܚ ܚܰܝܶܐ ܕܰܢ ܢܳܫܶܐ ܟܳܚܳܙܝܢܰܐ ܕܥܰܒܷܪ ܠܰܕ ܕܷܟܳܬ݂ܶܗ ܕܘ ܝܘܠܦܳܢܐ ܣܬܶܐ، ܒܰܐ ܫܘܫܳܛܶܐ ܪܰܒܶܐ ܡܫܰܚܷܠܦܝ ܓܰܘܶܐ ܕܰܣ ܣܷܕܪܶܐ ܕܰܒ ܒܶܝܬ݂ ܣܶܦܪܶܐ. ܐܰܣ ܣܶܦܳܩܶܐ ܕܟܳܡܝܬܷܣܬܰܥܷܡܠܝ ܒܘ ܝܘܠܦܳܢܐ ܟܳܡܝܚܰܬ݂ܬܝ ܥܰܡ ܐܘ ܬܶܟܢܳܠܳܙ̰ܝ، ܟܘܠ ܣܷܕܪܐ ܐܰܕܝܳܡܰܐ ܟܝܒܶܗ ܠܘܚܐ ܕܘ ܐܶܠܶܟܬܪܳܢܝܟ ܘܒܐܝܕܶܐ ܕܰܝ ܝܳܠܘܦܶܐ ܬܰܒܠܶܬ ܕܟܳܡܝܬܰܘܣܪܝ ܒܰܠ ܠܘܚܰܢܷܟ ܘܰܗ ܗܷܪܓܶܐ ܟܘܠܠܶܗ ܡܰܥܠܘ ܐܝܢܬܶܪܢܶܬ ܘܒܘ ܬܶܟܢܳܠܳܙ̰ܝ ܟܳܡܝܬܰܚܟܷܢ ܠܰܝ ܝܳܠܘܦܶܐ. ܘܥܰܡ ܐܘ ܡܶܕܰܢܐ ܟܘܠܠܶܗ ܐܰܘ ܘܳܠܝܳܬܼܐ ܕܟܳܡܝܬܰܗܘܝ ܠܰܝ ܝܳܠܘܦܶܐ ܡܶܕܳܢܶܐ ܕܟܳܠܳܙܰܡ ܚܰܐ ܚܳܙܰܠܶܗ ܘܣܳܝܰܡܶܗ ܒܘ ܐܝܢܬܰܪܢܰܬܢܶܗ. ܐܰܥ ܥܰܡܶܐ ܕܦܰܝܫܝ ܪܰܚܘܩܶܐ ܒܘ ܬܰܪܟܝܘܐ ܕܘ ܬܶܟܢܳܠܳܙ̰ܝ ܠܰܒ ܒܶܝܬ݂ ܣܶܦܪܶܐ ܟܳܚܳܙܝܢܰܗ ܓ݂ܰܠܰܒܶܗ ܠܰܟ݂ܰܠܦ ܡܰܕ ܕܰܘܠܰܬ ܥܰܬܝܪܶܢܶܗ، ܘܟܳܚܳܙܝܢܰܗ ܠܐ ܟܳܘܰܠܠܶܗ ܫܘܫܳܛܐ ܒܰܚ ܚܰܝܰܬ݂ܶܗ. ܚܰܐ ܡܰܐ ܡܶܕܳܢܶܐ ܚܰܬ݂ܶܐ ܘܪܰܒܶܐ ܕܰܢ ܐܷܫܢܰܢܝ ܐܰܚ ܚܰܪܳܝܶܐ ܐܰܗ ܗܷܪܓܶܐ ܕܥܰܠ ܐܘ ܐܝܢܬܶܪܢܶܬ ܕܟܳܡܝܬܰܚܟܷܢ ܕܟܳܡܝܬܰܘܡܷܪ ܠܘ ܡܶܕܰܢܐ ܒܘ ܬܘܪܟܳܝܐ ܣܰܐܢܰܠ ܐܶܝـܝܬܝܡ ܝܘܠܦܳܢܐ ܕܥܰܠ ܐܘ ܢܰܘܠܐ، ܣܰܐܢܰܠ ܐܶܝـܝܬܝܡ ܗܰܘ ܟܳܛܳܪܶܐ ܣܢܝܩܘܬ݂ܐ ܠܘ ܝܳܠܘܦܐ ܕܩܳܝܷܡ ܡܘ ܒܰܝܬܐ ܕܷܐܙܶܝܐ ܠܘ ܒܶܝܬ݂ ܣܶܦܪܐ ܐܶܠܐ ܡܝ ܕܘܟܬ݂ܐ ܕܟܷܬܝܐ ܝܰܬܝܘܐ ܚܳܙܶܐ ܐܘ ܡܰܠܦܳܢܐ ܘܫܳܡܷܥ ܐܰܗ ܗܷܪܓܶܐ ܟܘܠܠܶܗ. ܐܘ ܡܶܕܰܢܐ ܐܘ ܝܰܘܡܐ ܒܘ ܝܰܘܡܐ ܟܳܙܳܝܷܬ ܒܰܦ ܦܷܪܥܶܐ ܟܘܠܠܶܗ ܕܰܒ ܒܶܝܬ݂ ܣܶܦܪܶܐ. ܟܝܬܐ ܐܰܕܝܳܡܰܐ ܒܶܝܬ݂ ܨܰܘܒܶܐ ܪܰܒܶܐ ܕܟܷܬܬܶܗ ܒܰܐ ܐܰܠܦܰܝܐ ܝܳܠܘܦܶܐ ܕܟܳܡܷܣܬܰܥܷܡܠܝ ܐܘ ܣܝܣܬܰܡܰܢܐ. ܐܘ ܡܶܕܰܢܐ ܟܝܬ ܐܶܠܶܗ ܠܗܝܩܘܬ݂ܐ ܪܰܒܬ݂ܐ ܡܰܐ ܡܰܠܦܳܢܶܐ ܘܡܰܝ ܝܳܠܘܦܶܐ ܘܡܰܘܟ݂ܰܐ ܣܬܶܐ ܐܷܫܡܐ ܒܷܐܫܡܐ ܟܳܥܳܒܷܪ ܠܰܒ ܒܶܝܬ݂ ܨܰܘܒܶܐ ܘܠܟܘܠܠܶܗ ܐܰܕ ܕܰܪܓ݂ܶܐ ܕܰܒ ܒܶܝܬ ܣܶܦܪܶܐ. ܐܰܫ ܫܘܫܳܛܰܢܝ ܐܰܪ ܪܰܒܶܐ ܕܟܳܐܘܷܢ ܥܰܡ ܐܘ ܬܶܟܢܳܠܳܙ̰ܝ ܒܘ ܝܘܠܦܳܢܐ ܟܳܠܳܙܰܡ ܡܰܐ ܝܰܠܝܦܶܐ ܪܰܒܶܐ ܕܝ ܒܪܝܬ݂ܐ ܡܝܔܰܪܒܝ ܡܝܥܰܝܢܝ ܡܰܐ ܓܰܒܶܐ ܟܘܠܠܶܗ ܘܒܷܬ݂ܷܪ ܡܝܬܰܪܟܘܝ ܒܰܚ ܚܰܝܶܐ ܕܰܝ ܝܳܠܘܦܶܐ، ܟ݂ܘܕ ܟܷܬܬܶܗ ܦܰܝܕܰܐ ܓܰܠܰܒܶܐ ܗܰܘܟ݂ܰܐ ܟܷܬܶܐ ܣܬܶܐ ܣܰܩܘܒܠܐ ܕܘ ܡܶܕܰܢܐ ܘܡܶܕܳܢܶܐ ܦܰܘܕܐ ܣܬܶܐ. ܟ݂ܘܕ ܟܳܛܳܪܶܐ ܐܝ ܚܒܰܢܳܢܘܬ݂ܐ ܙܰܝـܕܐ ܐܰܘ ܕܰܢ ܢܳܫܶܐ ܝܰܘܡܐ ܒܘ ܝܰܘܡܐ ܟܳܫܷܒܗܝ ܠܰܪ ܪܳܒܳܬܶܐ ܘܟܳܡܰܝܬ݂ܝ ܐܰܢ ܐܶܣܳܪܶܐ ܢܳܫܳܝܳܐ ܐܰܘ ܐܰܢ ܐܶܣܳܪܶܐ ܚܘܒܳܢܳܝܶܐ.602 ܡܶܠܶܐ ܒܢܝܡܝܢ ܬܪܐ
