Šëkri Aqtaš: ܐܰܝܟܐ ܝܐ ܕܘܟܬ݂ܶܗ ܕܰܦ ܦܰܩܝܪܶܐ؟ / Ayko yo dukṯe daf faqire?
Ayko yo dukṯe daf faqire?
ܒܚܰܐ ܡܰܝ ܝܰܘܡܶܐ ܒܰܣܝܡܶܐ ܘܦܰܝܘܚܶܐ ܕܘ ܪܰܒܷܥ܆ ܥܰܪܷܩܢܐ ܡܘ ܫܓ݂ܘܫܝܐ ܘܡܘ ܪܰܗܛܐ ܘܡܘ ܬܰܥܒܐ ܕܘ ܫܘܓ݂ܠܐ، ܘܢܰܦܷܩܢܐ ܠܰܪܘܰܠ ܡܝ ܡܕ݂ܝܬܐ ܕܟܳܪܰܟ݂ܢܐ ܒܰܝܢ ܐܰܚ ܚܰܩܠܳܬ݂ܐ ܘܐܘ ܓܶܠܐ ܘܰܢ ܐܝܠܳܢܶܐ. ܒܷܬ݂ܷܪ ܙܰܒܢܐ ܟܰܪܝܐ ܡܰܛܝܢܐ ܠܝ ܕܰܝܪܐ ܕܡܳܪܝ ܗܳܒܶܝܠ ܘܡܳܪܝ ܐܰܒܪܳܗܳܡ ܕܟܳܢܷܦܠܐ ܒܷܢ ܢܦܳܩܶܗ ܕܝܰܘܡܐ ܕܡܷܕ݂ܝܰܕ݂܆ ܥܰܠ ܐܘ ܕܰܪܒܐ ܕܟܐܘܙܙܶܗ ܠܥܝܘܰܪܕܐ. ܝܰܬܘܢܐ ܒܘ ܒܘܣܬܳܢܐ ܝܰܢܝ ܒܘ ܦ݁ܰܪܩ ܕܓܰܒ ܐܝ ܕܰܝܪܐ ܕܟܷܬܝܐ ܡܟ݂ܰܡܠܐ ܒܰܢ ܐܝܠܳܢܶܐ ܘܒܰܘ ܘܰܪܕܶܐ ܫܰܦܝܪܶܐ ܘܒܘ ܓܶܠܐ ܝܰܪܘܩܐ. ܒܕܶܠܝ ܕܚܳܝܰܪܢܐ ܒܝ ܡܕ݂ܝܬܐ ܕܡܷܕ݂ܝܰܕ݂ ܘܒܰܢ ܢܳܫܰܝܕ݂ܰܗ. ܘܒܰܒ ܒܳܬܶܐ ܥܰܬܝܩܶܐ ܕܰܣ ܣܘܪܝܳܝܶܐ ܕܷܛܪܰܢܢܶܗ ܐܰܡ ܡܳܪܰܬ݂ܬ݂ܶܗ ܘܰܐܙܙܷܢ ܠܰܐܘܪܘܦ݁ܰܐ. ܘܒܰܥ ܥܡܰܪܰܬ ܥܶܠܳܝܶܐ ܘܫܰܦܝܪܶܐ. ܘܒܘ ܡܰܙܠܐ ܘܡܰܬ݂ܝܐ ܘܒܘ ܪܰܗܛܐ ܕܰܢ ܢܳܫܶܐ ܘܒܘ ܬܰܥܒܰܬ݂ܬ݂ܶܗ. ܐܝܢܰܩܠܰܐ ܕܷܚܙܶܠܝ ܕܟܘܠܠܶܗ ܐܰܢ ܢܳܫܶܐ ܟܳܪܘܗܛܝ ܘܟܳܫܘܓ݂ܠܝ ܕܠܐ ܟܠܳܝܐ܆ ܦܰܗܷܡܢܐ ܕܰܚ ܚܰܝܰܬ݂ܬ݂ܶܗ ܟܘܠܠܶܗ ܬܰܥܒܐ ܘܣܬܪܶܣ ܢܶܐ. ܒܷܬ݂ܷܪ ܡܷܪܠܝ ܠܪܘܚܝ: ܡܐܘܥܕܐ ܘܰܐܙܳܠܐ ܠܰܘ ܓܡܷܦܬܰܟܰܪܢܐ ܒܰܚ ܚܰܝܶܐ ܕܰܢ ܢܳܫܶܐ ܘܒܰܫ ܫܘܓ݂ܠܳܢܰܬ݂ܬ݂ܶܗ. ܡܰܕܥܰܪܠܝ ܦܳܬ݂ܝ ܠܘ ܓܰܒܐ ܚܪܶܢܐ ܕܝ ܕܰܝܪܐ܆ ܚܙܶܠܝ ܐܝ ܡܷܩܒܰܪܰܐ ܘܰܩ ܩܰܘܪܶܐ ܕܟܷܬܢܶܐ ܣܝܡܶܐ ܡܘ ܡܰܪܡܰܪ ܫܰܦܝܪܐ ܘܡܰܟ ܟܶܦܶܐ ܢܚܝܬܶܐ ܕܷܢܩܝܫܝ ܒܺܐܝܕ݂ܶܗ ܕܰܢ ܢܰܚܳܬܶܐ ܣܘܪܝܳܝܶܐ. ܟܝܬܐ ܘܰܪܕܶܐ ܘܐܝܠܳܢܶܐ ܙܪܝܥܶܐ ܚܶܕ݂ܳܪܰܝܝܶܗ. ܠܰܠܥܰܠ ܡܷܢܢܶܗ ܨܠܝܒܐ ܘܷܐܫܡܶܗ ܕܘ ܥܰܢܝܕ݂ܐ. ܘܐܘ ܝܰܘܡܐ ܕܘ ܡܰܘܠܳܕ݂ܰܝܕ݂ܶܗ ܘܕܘ ܡܰܘܬܰܝܕ݂ܶܗ. ܘܟܝܬܐ ܣܬܶܐ ܦܶܬ݂ܓ݂ܳܡܐ ܡܘ ܟܬ݂ܳܘܐ ܩܰܕܝܫܐ ܕܟܳܐܡܰܪ: ܐܳܢܐ ܢܐ ܐܘ ܢܘܚܳܡܐ ܘܰܚ ܚܰܝܶܐ܆ ܡܰܢ ܕܷܡܗܰܝܡܰܢ ܐܶܒܝ ܘܰܠܰܘ ܕܡܳܝܰܬ݂ ܐܶܠܐ ܓܷܕܥܳܝܰܫ. ܬܰܡܐ ܒܘ ܒܘܣܬܳܢܐ܆ ܡܷܦܬܰܟܰܪܠܝ ܘܒܕܶܠܝ ܕܕܳܪܰܫܢܐ ܥܰܡ ܪܘܚܝ ܥܰܠ ܐܝ ܕܘܟܬ݂ܐ ܕܰܣ ܣܰܓ݂ ܘܥܰܠ ܐܝ ܕܘܟܬ݂ܐ ܕܰܡ ܡܝܬ݂ܶܐ ܘܕܘܟܬ݂ܶܗ ܕܰܦ ܦܰܩܝܪܶܐ. ܥܰܠ ܐܘ ܪܰܗܛܐ ܘܐܘ ܒܰܛܠܐ ܘܐܘ ܩܳܠܐ ܕܒܝ ܘܰܠܰܝܶܐ ܕܰܣ ܣܰܓ݂. ܘܥܰܠ ܐܘ ܟܠܳܝܐ ܘܐܝ ܬ݂ܢܰܚܬܐ ܕܒܝ ܡܷܩܒܰܪܰܐ ܕܰܡ ܡܝܬ݂ܶܐ. ܡܶܐ ܚܰܐ ܓܰܒܐ ܣܰܒܪܐ ܘܫܘܓ݂ܠܐ ܘܙܘܥܬ݂ܐ. ܚܘܒܐ ܘܥܰܢܬܶܐ. ܦܷܩܪܝܝܶܐ ܘܙܰܢܓܰܢܰܐ. ܐܶܠܐ ܡܶܐ ܓܰܒܐ ܚܪܶܢܐ ܢܳܫܶܐ ܦܰܩܝܪܶܐ ܕܠܷܐܓܣܰܘܥܝ ܡܘܟܠܐ ܘܰܚܪܶܢܶܐ ܕܷܡܚܰܣܷܢ ܘܡܰܣܰܠܡܝ ܠܘ ܥܰܦܪܐ ܘܢܩܝܠܝ ܠܷܒܪܝܬ݂ܐ ܚܪܶܬܐ. ܟܳܘܷܢ ܥܰܦܪܐ ܘܟܳܝܳܥܶܐ ܓܶܠܐ ܒܘ ܥܰܦܪܰܘܳܐ. ܐܝܢܰܩܠܰܐ ܕܳܐܢܐ ܥܰܡܷܩܢܐ ܒܘ ܦܬܰܟܰܪܰܢܐ܆ ܚܙܶܠܝ ܢܳܫܶܐ ܓ݂ܰܠܰܒܶܐ ܗܶܕܝ ܗܶܕܝ ܟܳܐܬ݂ܷܢ ܠܰܦ ܐܝ ܕܰܝܪܐ. ܗܷܢ ܡܷܢܢܶܗ ܒܘ ܗܰܠܟ݂ܐ ܘܗܷܢ ܡܷܢܢܶܗ ܒܰܪ ܪܰܕ݂ܳܝܳܬ݂ܶܐ. ܢܰܥܝܡܶܐ ܘܪܰܒܶܐ. ܓܰܘܪܶܐ ܘܢܝܫܶܐ. ܒܝ ܕܷܪܬܐ ܕܝ ܕܰܝܪܐ ܣܬܶܐ ܟܳܡܷܫܡܳܥܝ ܩܳܠܶܐ ܘܙܡܝܪܳܬ݂ܶܐ ܕܘ ܥܘܦܳܝܐ ܕܰܥ ܥܰܢܝܕ݂ܶܐ. ܡܶܐ ܕܠܰܬܝܡܝ ܒܘ ܙܰܒܢܐ ܕܘ ܥܘܦܳܝܐ ܠܝ ܕܰܝܪܐ ܚܙܶܠܝ ܕܟܝܬܐ ܫܰܡܳܫܶܐ ܘܩܰܫܶܐ ܘܕܰܝܪܳܝܶܐ ܘܚܰܣܝܶܐ. ܟܝܬܐ ܣܬܶܐ ܡܷܢܝܳܢܐ ܪܰܒܐ ܕܛܰܝܶܐ ܘܫ̰ܰܠܟܳܝܶܐ ܒܝ ܕܷܪܬܐ ܕܝ ܕܰܝܪܐ. ܦܰܗܷܡܢܐ ܕܟܷܬܝܐ ܔܰܢܰܙܰܐ ܕܚܰܐ ܥܠܰܝܡܐ ܪܚܝܡܐ ܘܡܰܠܦܳܢܐ. ܐܳܢܐ ܣܬܶܐ ܒܰܟ݂ܝܢܐ ܘܡܕܰܡܰܥܠܝ ܘܡܷܪܠܝ: ܚܰܝܦ ܘܓ݂ܒܝܢܶܗ ܕܘ ܡܰܠܦܳܢܐ ܐܘ ܚܰܘܪܰܝܕ݂ܝ. ܕܒܘ ܙܰܒܢܐ ܕܝ ܥܠܰܝܡܘܬ݂ܰܝܕ݂ܶܗ ܢܩܝܠ ܡܘ ܥܳܠܡܰܢܐ ܠܘ ܥܳܠܡܐ ܕܰܚ ܚܰܝܶܐ ܘܕܰܒ ܒܘܣܳܡܶܐ. ܛܪܶܠܶܗ ܐܝ ܐܰܬܬ݂ܰܝܕ݂ܶܗ ܘܰܒ ܒܢܳܬ݂ܰܝܕ݂ܶܗ܆ ܘܦܰܐܝܪ ܟ݂ܕܘ ܡܰܠܰܐܟ݂ܐ ܠܝ ܫܡܰܝܐ. ܐܰܙܙܝ ܠܝ ܥܝܬܐ ܚܙܶܠܝ ܕܡܰܚܰܬܬܶܗ ܐܘ ܬܰܒܘܬܰܝܕ݂ܶܗ ܒܦܰܠܓܶܗ ܕܝ ܥܝܬܐ. ܐܰܫ ܫܰܡܳܫܶܐ ܠܘܷܫܫܶܗ ܐܰܩ ܩܶܡܷܣܝܳܬ݂ܶܐ ܘܰܗ ܗܳܪܘܪܰܬ݂ܬ݂ܶܗ. ܐܳܢܐ ܣܬܶܐ ܡܫܰܡܶܠܝ. ܒܕܰܠܠܶܗ ܐܘ ܚܰܣܝܐ ܘܰܟ ܟܳܗܢܶܐ ܒܝ ܨܠܘܬ݂ܐ ܕܘ ܥܘܦܳܝܐ. ܐܝܢܰܩܠܰܐ ܕܬܰܝܝܡܐ ܐܝ ܨܠܘܬ݂ܐ ܕܘ ܥܘܦܳܝܐ܆ ܩܰܡܰܝܬܐ ܐܘ ܚܰܣܝܐ ܔܓ݂ܝܠ. ܘܒܡܶܠܶܐ ܒܰܣܝܡܶܐ ܡܰܚܟܶܠܶܗ ܟܰܪܝܳܐܝܬ݂ ܥܰܠ ܐܘ ܡܰܠܦܳܢܐ ܘܥܰܠ ܐܝ ܬܷܫܡܷܫܬܰܝܕ݂ܶܗ ܕܝ ܥܝܬܐ. ܒܷܬ݂ܷܪܟܶܐ ܐܰܒܢܳܬ݂ܶܗ ܕܘ ܡܚܰܣܝܐ ܩܪܰܠܠܶܗ ܡܺܝܡܪܐ ܒܰܣܝܡܐ. ܡܷܪܪܶܗ ܙܘܟ݂ ܒܷܫܠܳܡܐ ܒܰܒܰܐ. ܐܰܕܟ݂ܶܬܷܪ ܕܝ ܒܪܝܬ݂ܰܬ݂ܶܗ ܠܳܐ ܩܰܕܝܪܝ ܕܡܰܢܝܚܝܠܘܟ݂. ܐܘ ܒܰܒܰܐ ܐܰܠܳܗܐ ܡܰܢܷܚܠܶܠܳܘܟ݂ ܡܘ ܟܶܘܰܝܕ݂ܳܘܟ ܘܡܳܒܶܠܶܠܳܘܟ݂ ܠܝ ܡܰܠܟܘܬ݂ܰܝܕ݂ܶܗ ܕܝ ܫܡܰܝܐ. ܒܷܬ݂ܷܪ ܡܶܐ ܕܟܰܡܝܠܐ ܐܝ ܨܠܘܬ݂ܐ܆ ܐܰܥ ܥܠܰܝܡܶܐ ܘܐܘ ܐܰܗܠܰܝܕ݂ܶܗ ܛܥܷܢܢܶܗ ܐܘ ܬܰܒܘܬܰܝܕ݂ܶܗ ܗܘܠ ܠܘ ܩܰܘܪܳܐ. ܐܰܫ ܫܰܡܳܫܶܐ ܙܡܷܪܪܶܗ ܙܡܝܪܳܬ݂ܶܐ ܘܰܟ ܟܳܗܢܶܐ ܡܷܪܪܶܗ ܬܶܫܡܫܳܬ݂ܶܐ ܕܰܥ ܥܰܢܝܕ݂ܶܐ ܥܰܠ ܐܘ ܩܰܘܪܐ. ܟܘܠ ܢܳܫܐ ܛܠܷܒܠܶܗ ܒܰܣܝܡܘܬ݂ܐ ܕܪܝܫܐ ܠܘ ܒܰܒܐ ܘܠܘ ܐܰܗܠܰܝܕ݂ܶܗ. ܐܝܢܰܩܠܰܐ ܕܟܘܠ ܢܳܫܐ ܡܒܰܪܒܰܙ܆ ܚܙܶܠܝ ܐܘ ܫܘܦܪܐ ܘܐܝ ܪܰܒܘܬ݂ܐ ܕܘ ܩܰܘܪܐ. ܕܡܰܚܰܬܬܶܗ ܐܰܢ ܢܰܚܳܬܶܐ ܐܝ ܨܷܢܥܰܬ݂ܬ݂ܶܗ ܟܘܠܰܗ ܥܰܠ ܐܘ ܫܘܦܪܰܝܕ݂ܶܗ ܘܢܩܷܫܫܶܗ. ܒܷܬ݂ܷܪ ܡܶܐ ܕܬܰܝܝܡܐ ܐܝ ܔܰܢܰܙܰܐ ܕܘ ܡܰܠܦܳܢܐ܆ ܠܰܦ ܛܘܳܥܶܗ ܕܝܰܘܡܐ ܐܳܢܐ ܝܰܬܘܢܐ ܒܘ ܒܘܣܬܳܢܐ ܘܟܳܡܷܦܬܰܟܰܪܢܐ ܒܰܟ ܟܳܗܢܶܐ ܘܒܘ ܥܰܡܐ ܕܡܶܐ ܟܘܠܠܶܗ ܐܰܩ ܩܷܪܝܰܘܳܬ݂ܶܐ ܚܰܕ݂ܝܪܝ ܒܘ ܠܶܘܳܝܐ ܕܘ ܡܰܠܦܳܢܐ. ܐܘ ܝܰܘܡܐ ܒܕܶܠܶܗ ܕܛܳܘܰܥ ܘܐܘ ܛܶܠܳܠܐ ܕܰܢ ܐܝܠܳܢܶܐ ܘܕܰܒ ܒܳܬܶܐ ܝܰܪܷܟ݂ܘܰܐ. ܒܪܝܬ݂ܐ ܗܶܕܝ ܗܶܕܝ ܟܳܥܘܬܡܐ. ܚܷܪܠܝ ܘܚܙܶܠܝ ܟܰܠܷܢ ܬܪܶܐ ܓܰܘܪܶܐ ܟܳܛܘܥܢܝ ܬܰܒܘܬ ܕܘ ܩܰܝܣܐ ܘܟܳܣܷܠܩܝ ܠܰܦ ܐܝ ܕܰܝܪܐ. ܐܘ ܩܰܫܐ ܩܰܡܘܬ݂ܰܝܝܶܗ ܟܳܡܰܠܰܟ݂. ܟܝܬܐ ܒܷܬ݂ܪܰܝܝܶܗ ܣܬܶܐ ܚܕ݂ܳܐ ܐܰܬܬ݂ܐ ܠܘܷܫܬܐ ܔܘܠܶܐ ܟܳܡܶܐ ܘܥܰܬܝܩܶܐ. ܘܟܳܛܘܥܢܐ ܐܘ ܐܰܒܪܰܝܕ݂ܰܗ ܥܰܠ ܨܰܕܪܰܗ. ܐܰܕ݂ܷܥܢܐ ܐܝ ܔܰܢܰܙܰܐ ܕܚܰܐ ܦܰܩܝܪܳܐ ܘܕܠܐ ܡܳܪܶܐ ܝܐ. ܐܝ ܐܰܬܬ݂ܐ ܟܳܒܘܟ݂ܝܐ ܐܰܥܠܶܗ ܘܟܳܡܰܟ݂ܝܪܐ ܕܰܡܥܶܐ. ܐܘ ܐܰܒܪܰܝܕ݂ܰܗ ܣܬܶܐ ܟܳܒܳܟ݂ܶܐ ܥܰܠ ܐܘ ܒܰܟ݂ܝܐ ܕܝ ܐܶܡܰܝܕ݂ܶܗ. ܡܰܛܷܢ ܠܝ ܡܷܩܒܰܪܰܐ ܘܕܠܐ ܩܳܠܐ ܬܠܰܠܠܶܗ ܘܩܘܷܪܪܶܗ ܒܚܰܐ ܩܰܘܪܐ ܕܘ ܥܰܦܪܐ ܪܰܚܘܩܐ ܡܰܩ ܩܰܘܪܶܐ ܫܰܦܝܪܶܐ ܕܘ ܡܰܪܡܰܪ ܘܕܰܟ ܟܶܦܶܐ. ܒܷܬ݂ܷܪ ܕܰܥܝܪܝ ܒܰܟ݂ܳܝܶܐ ܘܚܙܝܢܳܝܶܐ ܠܘ ܒܰܝܬܰܬ݂ܬ݂ܶܗ. ܐܳܢܐ ܣܬܶܐ ܐܝܢܰܩܠܰܐ ܕܷܚܙܶܠܝ ܗܰܢܝ ܟܘܠܠܶܗ ܒܚܰܐ ܝܰܘܡܐ܆ ܡܰܕܥܰܪܠܝ ܦܳܬ݂ܝ ܠܰܦ ܡܷܕ݂ܝܰܕ݂ ܘܡܷܪܠܝ: ܐܝ ܡܕ݂ܝܬܰܬ݂ܶܗ ܕܰܥ ܥܰܬܝܪܶܐ ܘܕܰܩ ܩܰܘܝܶܐ. ܘܒܷܬ݂ܷܪ ܚܷܪܠܝ ܒܝ ܡܷܩܒܰܪܰܐ ܘܒܰܩ ܩܰܘܪܶܐ ܫܰܦܝܪܶܐ ܕܰܥ ܥܰܬܝܪܶܐ ܘܡܷܪܠܝ ܠܪܘܚܝ: ܐܝ ܡܷܩܒܰܪܰܐ ܣܬܶܐ ܕܰܥ ܥܰܬܝܪܶܐ ܘܕܰܩ ܩܰܘܝܶܐ. ܡܰܥܠܶܠܝ ܥܰܝܢܝ ܠܝ ܫܡܰܝܐ ܘܚܷܪܠܝ ܒܘ ܝܰܘܡܐ ܕܫܰܥܷܬ݂ܘܰܐ ܘܛܳܘܰܥܘܰܐ. ܐܶܕܝ ܡܫܰܝܶܠܝ ܘܡܷܪܠܝ: ܝܰܐ ܡܳܪܝ ܕܘܟܬ݂ܶܗ ܕܰܦ ܦܰܩܝܪܶܐ ܐܰܝܟܳܐ ܝܐ؟ ܡܶܐ ܕܷܡܫܰܝܶܠܝ ܗܰܘܟ݂ܰܐ܆ ܫܰܡܷܥܢܐ ܩܳܠܐ ܬܰܚܬܳܝܐ ܡܰܥ ܥܘܡܩܶܐ ܕܠܶܒܝ ܕܟܷܬܝܐ ܡܰܠܝܐ ܣܰܒܪܐ ܘܬܘܟ݂ܠܳܢܐ ܕܟܳܐܡܰܪ: ܐܰܦ ܦܰܩܝܪܶܐ ܒܝ ܒܪܝܬ݂ܰܬ݂ܶܐ ܠܰܬܬܶܗ ܕܘܟܬ݂ܐ. ܕܘܟܬ݂ܰܝܝܶܗ ܐܝ ܡܰܠܟܘܬ݂ܐ ܫܡܰܝܳܢܝܬ݂ܳܐ ܝܐ. ܐܝܢܰܩܠܰܐ ܕܫܰܡܷܥܢܐ ܐܘ ܩܳܠܰܢܐ܆ ܕܰܥܷܪܢܐ ܠܘ ܒܰܝܬܐ ܒܠܶܒܐ ܦܨܝܚܳܝܐ ܘܡܰܠܝܐ ܣܰܒܪܐ ܘܗܰܝܡܳܢܘܬ݂ܐ. ܡܠܦܢܐ ܫܟܪܝ ܐܩܛܫ 706 ܡܶܠܶܐ.
