Šëkri Aqtaš: ܡܷܢ ܝܐ ܐܝ ܐܘܡܬ݂ܐ؟ /Mën yo i Umṯo?
Mën yo i Umṯo?
ܐܝ ܐܘܡܬ݂ܐ ܝܰܢܝ ܐܘ ܥܰܡܐ، ܟܶܢܫܐ ܪܰܒܐ ܕܟܳܐܬ݂ܶܐ ܐܘ ܫܶܪܫܰܝܕ݂ܶܗ ܡܶܐ ܚܰܐ ܓܶܢܣܐ ܝܐ. ܘܟܳܡܷܔܓ݂ܳܠܝ ܒܚܰܐ ܠܶܫܳܢܐ ܕܟܳܡܚܰܝܰܕ݂ܠܶܗ ܘܟܳܡܳܣܰܪܠܶܗ ܒܷܚܕ݂ܳܕ݂ܶܐ. ܘܚܰܐ ܡܰܟܬܰܒܙܰܒܢܐ ܕܟܳܣܳܗܰܕ ܒܷܫܪܳܪܐ ܐܰܥܠܶܗ. ܘܒܚܰܐ ܐܰܬ݂ܪܐ ܥܰܡ ܚܕ݂ܳܕ݂ܶܐ ܟܳܥܳܝܰܫ. ܘܥܰܝܢܝ ܥܰܕܰܕ ܘܡܰܫܠܡܳܢܘܳܬ݂ܐ ܟܷܬܠܶܗ. ܟܘܠ ܥܰܡܐ ܠܰܫܰܢ ܕܡܳܝܰܕ ܕܘܟܬ݂ܐ ܒܘ ܡܰܟܬܰܒܙܰܒܢܐ ܘܡܝܬܰܩܒܰܠ ܥܰܡܐ ܒܷܒܪܝܬ݂ܐ، ܟܳܠܳܙܰܡ ܕܗܳܘܶܠܶܗ ܬܠܰܬ݂ ܕܝܠܳܝܳܬ݂ܶܐ ܪܰܒܐ ܕܟܷܬܢܶܐ، ܓܶܢܣܐ. ܝܘܒܳܠܐ ܝܰܢܝ ܡܰܟܬܰܒܙܰܒܢܐ ܘܠܶܫܳܢܐ. ܟܘܠ ܚܕ݂ܐ ܡܰܕ ܕܝܠܳܝܳܬ݂ܰܢܝ ܕܰܘܪܐ ܪܰܒܐ ܟܷܬܠܰܗ ܒܰܚ ܚܰܝܶܐ ܕܘ ܥܰܡܐ. ܐܝܕ݂ܰܐ ܕܷܚܕ݂ܐ ܡܷܢܢܶܗ ܕܗܘܝܐ ܢܳܩܘܨܬܐ، ܐܘ ܥܰܡܐ ܓܦܳܝܰܫ ܢܳܩܘܨܐ ܡܩܰܒܷܠ ܕܰܥ ܥܰܡܶܐ ܚܪܶܢܶܐ. ܐܘܥܕܐ ܚܕ݂ܐ ܒܷܚܕ݂ܐ ܚܳܙܝܢܰܐ ܐܘ ܕܰܘܪܐ ܘܐܝ ܐܳܠܨܳܝܘܬ݂ܐ ܕܟܷܬܬܶܗ ܒܰܚ ܚܰܝܶܐ ܕܘ ܥܰܡܐ. ܓܶܢܣܐ܆ ܐܰܝܕܰܪܒܐ ܕܷܠܟܘܠ ܐܝܩܰܪܬ݂ܐ ܟܷܬܠܰܗ ܒܰܐܒܐ ܘܶܐܡܐ ܘܩܰܡܳܝܶܐ ܕܡܷܢܢܶܗ ܡܰܘܠܕܐ، ܗܰܘܟ݂ܰܐ ܣܬܶܐ ܟܘܠ ܥܰܡܐ ܟܷܬܠܶܗ ܐܰܒܳܗܶܐ ܩܰܡܳܝܶܐ ܕܡܷܢܢܶܗ ܟܳܐܬ݂ܶܐ ܐܘ ܫܶܪܫܰܝܕ݂ܶܗ. ܡܰܘܟ݂ܰܐ ܐܝܕ݂ܰܐ ܕܷܐܡܡܝܢܰܐ ܐܘ ܥܰܡܐ ܐܝܩܰܪܬ݂ܐ ܪܰܒܬ݂ܐ ܝܐ، ܠܰܬܝܐ ܦܰܘܕܐ. ܘܰܐܢ ܢܳܫܶܐ ܣܬܶܐ ܟܳܡܰܚܝܣܝ ܒܪܘܚܰܝܝܶܗ ܕܟܷܬܢܶܗ ܐܰܚܘܢܳܢܶܐ ܘܰܐܗܷܠ ܕܷܚܕ݂ܳܕ݂ܶܐ. ܘܐܘ ܦܬܰܟܰܪܰܐ ܢܐ، ܟܳܡܰܩܘܶܐ ܐܝ ܚܕ݂ܳܝܘܬܐ ܘܰܐܢ ܐܶܣܳܪܶܐ ܘܐܝ ܚܘܒܐ ܒܰܝܢܳܬ݂ܰܝܝܶܗ. ܘܥܰܡ ܐܘ ܙܰܒܢܐ ܟܳܟ݂ܳܠܰܩ ܡܷܢܢܶܗ ܥܰܡܐ ܢܰܨܝܚܐ ܘܡܝܰܩܪܐ. ܝܘܒܳܠܐ ܝܰܢܝ ܡܰܟܬܰܒܙܰܒܢܐ܆ ܐܰܟܬ݂ܳܘܶܐ ܕܘ ܡܰܟܬܰܒܙܰܒܢܐ، ܟ݂ܘܕ ܐܝ ܡܰܚܙܝܬ݂ܐ (ܥܰܝܢܰܐ) ܢܶܐ ܠܘ ܥܰܡܐ. ܐܰܝܕܰܪܒܐ ܕܐܘ ܒܰܪܢܳܫܐ ܟܳܚܳܝܰܪ ܒܝ ܡܰܚܙܝܬ݂ܐ ܘܟܳܚܳܙܶܗ ܪܘܚܶܗ، ܗܰܘܟ݂ܰܐ ܣܬܶܐ ܐܝܢܰܩܠܰܐ ܕܚܳܝܰܪ ܒܰܟܬ݂ܳܘܶܐ ܕܘ ܡܰܟܬܰܒܙܰܒܢܐ ܟܳܚܳܙܶܐ ܘܟܳܝܳܠܰܦ ܥܰܠ ܐܘ ܫܶܪܫܰܝܕ݂ܶܗ ܘܥܰܠ ܐܝ ܓܰܒܳܪܘܬ݂ܰܝܕ݂ܶܗ ܘܥܰܠ ܐܝ ܪܰܒܘܬ݂ܰܝܕ݂ܶܗ ܕܒܘ ܙܰܒܢܐ ܕܫܰܦܷܥ. ܘܒܷܬ݂ܷܪ ܟܳܡܰܕܥܰܪ ܦܳܐܬ݂ܶܗ ܘܟܳܚܳܝܰܪ ܘܟܳܡܷܦܬܰܟܰܪ ܒܐܝ ܐܰܝܟܰܢܳܝܘܬ݂ܰܝܕ݂ܶܗ ܕܰܐܕܝܰܘܡܐ. ܐܝܢܰܩܠܰܐ ܕܟܳܚܳܙܶܐ ܐܘ ܫܘܒܚܐ ܘܐܘ ܢܶܨܚܳܢܐ ܘܐܝ ܪܰܒܘܬ݂ܰܝܕ݂ܶܗ ܕܒܘ ܙܰܒܢܐ ܕܫܰܦܷܥ، ܡܶܐ ܚܰܬ݂ܐ ܟܳܡܰܚܝܣܝ ܐܰܪ ܪܶܓ݂ܫܰܝܕ݂ܶܗ ܕܘ ܫܘܒܗܳܪܐ ܘܕܝ ܪܰܒܘܬ݂ܐ. ܘܟܳܦܳܠܰܚ ܕܢܰܩܠܰܐ ܚܪܶܬܐ ܡܰܕܥܰܪ ܐܘ ܫܘܒܚܐ ܘܐܘ ܢܶܨܚܳܢܐ ܕܟܷܬܘܰܠܠܶܗ ܐܰܢ ܐܰܒܳܗܳܬ݂ܰܝܕ݂ܶܗ ܒܘ ܡܰܟܬܰܒܙܰܒܢܐ. ܒܷܬ݂ܷܪ ܡܶܐ ܕܟܳܩܳܪܶܐ ܒܰܟܬ݂ܳܘܶܐ ܘܕܟܳܐܬ݂ܷܢ ܠܒܳܠܶܗ ܐܰܢ ܢܶܣܝܘܢܶܐ ܘܰܥ ܥܰܣܩܳܬ݂ܐ ܕܷܓܪܷܫܫܶܗ ܐܰܢ ܐܳܒܳܗܳܬ݂ܰܝܕ݂ܶܗ، ܟܳܥܳܔܰܙ ܘܟܳܥܰܝܩܐ ܐܝ ܪܘܚܰܝܕ݂ܶܗ. ܘܟܳܡܔܰܪܰܒ ܕܛܳܠܰܒ ܚܫܳܘܐ ܡܰܗ ܗܰܔܳܡܶܐ ܘܡܰܩ ܩܰܛܳܠܶܐ ܕܰܐܢ ܐܰܒܳܗܳܬ݂ܰܝܕ݂ܶܗ ܘܕܘ ܓܷܢܣܰܝܕ݂ܶܗ. ܘܠܐ ܟܳܟܳܠܶܗ ܗܘܠ ܕܡܰܥܠܶܐ ܐܘ ܐܝܩܳܪܐ ܘܐܘ ܢܶܨܚܳܢܐ ܕܘ ܥܰܡܰܝܕ݂ܶܗ ܕܕܷܫܫܶܗ ܐܰܥ ܥܰܡܶܐ ܛܳܠܘܡܶܐ. ܠܶܫܳܢܐ܆ ܐܘ ܠܶܫܳܢܐ ܠܰܬܝܐ ܒܰܣ ܗܰܕܳܡܐ ܕܘ ܡܰܡܠܐ ܘܕܘ ܙܡܳܪܐ. ܐܶܠܐ ܒܥܰܝܢܝ ܙܰܒܢܐ ܐܶܣܳܪܐ ܕܟܳܡܚܰܝܰܕ݂ ܐܰܦܬܰܟܰܪܰܬ ܘܰܐܗ ܗܰܘܢܶܐ ܕܥܰܝܢܝ ܥܰܡܐ ܝܐ ܣܬܶܐ. ܒܘ ܫܷܟܠܰܢܐ ܐܘ ܠܶܫܳܢܐ ܟܷܬܠܶܗ ܕܰܘܪܐ ܪܰܒܐ ܒܝ ܚܕ݂ܳܝܘܬ݂ܐ ܕܘ ܥܰܡܐ ܘܕܝ ܐܘܡܬ݂ܐ. ܥܰܠ ܗܰܬ݂ܶܐ ܣܬܶܐ ܟܳܠܳܙܰܡ ܕܟܘܠ ܐܝܩܰܪܬ݂ܐ ܕܡܷܠܦܐ ܐܰܢ ܢܰܥܝܡܰܝܕ݂ܰܗ ܡܶܐ ܢܰܥܡܘܬ݂ܰܝܝܶܗ ܐܘ ܠܶܫܳܢܐ ܕܐܝ ܐܶܡܰܬ݂ܬ݂ܶܗ ܠܰܫܰܢ ܕܡܷܦܪܰܣ ܒܰܝܢ ܕܘ ܥܰܡܐ ܘܩܳܘܷܢ ܐܰܢ ܐܶܣܳܪܶܐ ܕܥܰܡ ܚܕ݂ܳܕ݂ܶܐ. ܟܘܠ ܥܰܡܐ ܒܝ ܘܰܨܝܛܰܐ ܕܘ ܠܶܫܳܢܰܝܕ݂ܶܗ ܟܳܝܳܠܰܦ ܐܘ ܡܰܟܬܰܒܙܰܒܢܰܝܕ݂ܶܗ ܘܐܝ ܡܰܪܕܘܬ݂ܰܝܕ݂ܶܗ ܘܥܰܠ ܟܘܠ ܡܶܕܶܐ ܕܣܷܡܡܶܗ ܐܰܢ ܐܰܒܳܗܳܬ݂ܰܝܕ݂ܶܗ ܒܘ ܙܰܒܢܐ ܕܥܰܒܷܪ. ܐܘ ܠܶܫܳܢܐ ܟܳܘܶܐ ܓܝܫܪܐ ܒܰܝܢ ܕܘ ܙܰܒܢܐ ܕܥܰܒܷܪ ܠܘ ܙܰܒܢܐ ܕܐܘܥܕܐ. ܒܘ ܫܷܟܷܠ ܕܟܳܡܷܣܪܝ ܐܰܘ ܘܰܪܝܕ݂ܶܐ ܐܰܗ ܗܰܕܳܡܶܐ ܕܘ ܓܘܫܡܐ ܒܷܚܕ݂ܳܕ݂ܶܐ، ܗܰܘܟ݂ܰܐ ܣܬܶܐ ܐܘ ܠܶܫܳܢܐ ܟܳܡܳܣܰܪ ܐܰܢ ܐܰܒܢܶܐ ܕܘ ܥܰܡܐ ܒܷܚܕ݂ܳܕ݂ܶܐ ܘܟܳܡܚܰܝܰܕ݂ܕ݂ܶܗ. ܐܰܚ ܚܰܝܶܐ ܕܘ ܥܰܡܐ ܡܰܣܪܶܐ ܢܶܐ ܒܘ ܠܶܫܳܢܰܝܕ݂ܶܗ. ܐܝܕ݂ܰܐ ܕܛܳܥܶܐ ܐܘ ܠܶܫܳܢܰܝܕ݂ܶܗ، ܓܷܡܣܰܟܰܪ ܟܘܠ ܡܶܕܶܐ ܕܟܷܬܠܶܗ. ܠܰܘ ܟܳܦܳܝܰܫܠܶܗ ܠܐ ܚܝܪܘܬ݂ܐ ܘܠܐ ܡܰܟܬܰܒܙܰܒܢܐ ܘܠܐ ܡܰܫܠܡܳܢܘܳܬ݂ܐ. ܘܓܷܕܥܳܝܰܫ ܟܘܠܢܰܩܩܰܐ ܬܰܚܬܘ ܫܘܠܛܳܢܐ ܕܰܥ ܥܰܡܶܐ ܢܘܟܪܳܝܶܐ. ܠܐ ܗܰܘܟ݂ܰܐ ܣܬܶܐ ܐܘ ܥܰܡܐ ܕܢܳܛܰܪ ܐܘ ܠܶܫܳܢܰܝܕ݂ܶܗ، ܗܘܠ ܕܟܷܬܠܶܗ ܠܶܫܳܢܐ، ܟܳܡܷܚܫܰܘ ܣܰܓ݂ ܘܠܐ ܡܝܬ݂ܐ. ܫܰܦܝܪܳܐ ܝܐ ܐܘ ܡܰܬ݂ܠܐ ܕܟܳܐܡܰܪ: ܟܘܠ ܥܰܡܐ ܕܟܷܬܝܐ ܬܰܚܬܶܐ ܕܘ ܫܘܠܛܳܢܐ ܘܕܘ ܦܘܩܕܳܢܐ ܕܰܢ ܢܘܟ݂ܪܳܝܶܐ ܐܝܕ݂ܰܐ ܕܩܳܕܰܪ ܢܳܛܰܪ ܐܘ ܠܶܫܳܢܰܝܕ݂ܶܗ، ܟܳܫܳܒܰܗ ܠܘ ܐܰܣܝܪܐ ܕܟܷܬܝܐ ܐܘ ܩܠܝܕ݂ܐ ܕܰܒ ܒܶܝܬ݂ ܐܰܣܝܪܶܐ ܒܷܐܝܕ݂ܶܗ. ܘܟܘܠ ܢܰܩܩܰܐ ܚܰܕ݂ܝܪܐ ܝܐ ܠܝ ܚܝܪܘܬ݂ܐ. ܒܡܰܬ݂ܠܐ ܚܪܶܢܐ ܣܬܶܐ ܗܰܘܟ݂ܰܐ ܟܳܐܡܰܪ: ܟܘܠ ܥܰܡܐ ܕܢܳܛܰܪ ܐܘ ܠܶܫܳܢܰܝܕ݂ܶܗ ܘܛܳܥܶܐ ܐܘ ܡܰܟܬܰܒܙܰܒܢܰܝܕ݂ܶܗ، ܟܳܫܳܒܰܗ ܠܢܳܫܐ ܕܛܰܘܷܥ ܒܝ ܫܰܢܬ݂ܐ ܘܕܰܡܷܟ݂. ܘܰܠܰܘ ܣܰܓ݂ ܝܐ ܘܠܰܬܝܐ ܡܝܬ݂ܐ، ܐܶܠܐ ܠܰܝܬܐ ܛܰܥܡܐ ܒܰܚ ܚܰܝܰܝܕ݂ܶܗ. ܐܘ ܡܰܟܬܰܒܙܰܒܢܐ ܟܳܡܳܠܰܦܠܰܢ، ܒܶܐ ܟܡܐ ܥܰܡܶܐ ܩܫܝܥܝ ܘܦܰܫܝܪܝ ܒܷܒܪܝܬ݂ܐ. ܐܶܠܐ ܐܰܝܢܰܐ ܕܷܢܛܪܷܪܶܗ ܐܘ ܠܶܫܳܢܰܬ݂ܬ݂ܶܗ ܩܰܕܝܪܝ ܕܦܰܝܫܝ ܩܰܘܝܶܐ ܘܕܠܐ ܡܷܩܫܳܥܝ. ܡܠܦܢܐ ܫܟܪܝ ܐܩܛܫ 526 ܡ̈ܠܐ.
