Toni Ergin: ܐܝ ܕܰܝܪܐ ܕܡܳܪܝ ܐܰܘܓܝܢ / I dayro d mor Awgin

I dayro d mor Awgin

ܐܝ ܕܰܝܪܐ ܕܡܳܪܝ ܐܰܘܓܝܢ؛ ܚܕ݂ܳܐ ܡܰܕ ܕܰܝܪܶܐ ܪܰܒܶܐ ܘܥܰܬܝܩܶܐ ܕܷܒܪܝܬ݂ܐ ܝܐ. ܒܛܘܪܥܰܒܕܝܢ ܣܬܶܐ ܐܝ ܕܰܝܪܐ ܩܰܡܰܝܬܐ ܕܡܰܥܷܡܪܐ ܝܐ. ܐܝ ܕܝܪܐ ܕܡܳܪܝ ܐܰܘܓܝܢ؛ ܥܰܡܷܪܬܐ ܝܐ ܥܰܠ ܛܘܪܐ ܒܕܘܟܬ݂ܐ ܓ݂ܰܠܰܒܶܐ ܥܶܠܰܝܬܐ. ܐܝ ܪܰܕ݂ܰܝܬܐ ܠܐ ܟܳܣܷܠܩܐ ܠܝ ܕܰܝܪܐ ܒܷܬ݂ܷܪ ܡܶܐ ܕܘܟܬ݂ܐ ܟܳܠܳܙܰܡ ܚܰܐ ܡܗܰܠܟ݂ܳܢܐ ܕܣܳܠܰܩܠܰܗ. ܐܝܢܰܩܰܐ ܚܰܐ ܕܟܳܡܳܛܶܐ ܠܝ ܕܰܝܪܐ ܘܟܳܝܳܬܰܘ ܟܳܚܳܙܶܐ ܠܰܠܥܰܠ ܟܘܠܰܗ ܡܥܰܪܶܐ ܕܘܟܳܬ݂ܶܐ ܕܰܥ ܥܰܒܳܕܶܐ ܘܫܶܢܶܐ ܘܩܰܬܳܳܪܶܐ، ܠܰܠܬܰܚ ܕܘܟܬ݂ܐ ܥܰܡܷܩܬܐ ܐܰܪܥܐ ܓ݂ܰܠܰܒܶܐ ܪܘܷܚܬܐ، ܝܰܪܷܟ݂ܬܐ. ܒܠܰܠܝܐ ܡܝ ܕܰܝܪܐ ܟܳܡܰܚܘܷܢ ܐܰܒ ܒܰܗܪܶܐ ( ܕܩܰܒܪܶܐ ܚܶܘܳܪܶܐ ) ܕܣܘܪܝܝܰܐ. ܡܶܩܷܡ ܟܷܬܘܰܐ ܐܶܒܰܗ ܒܰܡ ܡܳܐܘܰܬ ܕܰܝܪܳܝܶܐ ܘܝܳܠܘܦܶܐ. ܔܓ݂ܰܝܪ ܡܰܩ ܩܰܛܠܶܐ ܘܡܰܛ ܛܪܳܕ݂ܶܐ ܥܰܬܝܩܶܐ ܡܝ ܫܰܬܐ ܕܰܢ ܐܰܠܦܐ ܫ̰ܰܥܡܐ ܗܘܠ ܠܰܬ ܬܪܶܐ ܐܰܠܦܐ ܦܰܝـܝܫܐ ܟ݂ܠܝܬ݂ܐ. ܐܘܥܕܐ ܟܝܬ ܐܶܒܰܐ ܬܪܶܐ ܕܰܝܪܳܝܶܐ ܘܟܡܐ ܝܳܠܘܦܶܐ. ܚܰܐ ܡܷܢܢܶܗ ܕܰܝܪܳܝܐ ܝܳܩܷܢ ܐܘܢܘܰܠ ܡܝ ܩܪܝܬ݂ܐ ܕܥܷܪܢܷܣ ܝܐ. ܐܘܚܪܶܢܐ ܕܰܝܪܳܝܐ ܕܰܘܝܕ ܩܰܪܠܝ ܡܝ ܩܪܝܬ݂ܐ ܕܷܡܙܝܙܰܚ ܝܐ. ܐܳܢܐ ܣܬܶܐ ܚܰܐ ܡܰܝ ܝܳܠܘܦܶܐ ܕܗܰܘܝ ܠܝ ܫܰܢܨ ܕܩܳܪܶܢܐ ܣܘܪܝܳܝܐ ܬܰܡܐ. ܐܝ ܕܰܝܪܐ ܕܡܳܪܝ ܐܰܘܓܝܢ ܥܰܠ ܕܦܰܝـܝܫܐ ܟ݂ܠܝܬ݂ܐ ܘܠܰܝܬ ܕܘܟܳܬ݂ܶܐ ܓ݂ܰܠܰܒܶܐ ܕܘ ܕܡܳܟ݂ܐ ܐܶܒܰܗ . ܒܽܘ ܩܰܝܛܐ ܟܳܘܷܢ ܗܘܠ ܥܰܣܪܐ ܝܳܠܘܦܶܐ ܐܠܐ ܒܽܘ ܣܰܬ݂ܘܐ ܟܳܢܷܩܨܝ. ܐܘܥܕܐ ܟܳܡܝܚܰܝܕ݂ܰܪ ܕܘܟܳܬ݂ܶܐ ܠܰܫܰܢ ܐܘ ܕܡܳܟ݂ܐ ܕܰܝ ܝܳܠܘܦܶܐ ܘܕܰܕ݂ ܕ݂ܰܝܦܶܐ. ܕܰܝܪܳܝܐ ܝܳܩܷܢ ܓ݂ܰܠܰܒܶܐ ܟܷܬܠܶܗ ܝܽܘܠܦܳܢܐ ܛܰܘܐ . ܟܽܘܠ ܨܰܦܪܐ ܐܝ ܣܰܥܰܐ ܒܰܚ ܚܰܡܡܷܫ ܦܰܠܓܶܗ ܟܳܩܰܝܡܝܢܰܐ ܟܘܠܰܝܢܰܐ ܠܝ ܨܠܘܬܼܐ ܕܨܰܦܪܐ ܟܳܚܷܕ݂ܪܝܢܰܐ ܒܝ ܥܝܬܐ. ܒܷܬ݂ܷܪ ܡܝ ܨܠܘܬ݂ܐ ܕܨܰܦܪܐ ܦܰܠܓܶܗ ܕܣܰܥܰܐ ܟܝܬܐ ܗܷܪܓܐ. ܒܷܬܼܷܪ ܡܘ ܗܷܪܓܐ ܟܳܚܷܕ݂ܪܐ ܐܝ ܩܪܳܛܷܢ ܐܰܥ ܥܳܡܘܪܶܐ ܕܝ ܕܰܝܪܐ ܟܘܠܠܶܗ ܟܳܠܷܬܡܝܢܰܐ ܥܰܠ ܐܝ ܨܷܦܪܐ. ܐܘ ܪܝܫ ܕܰܝܪܐ ܟܳܒܳܕܶܐ ܒܝ ܨܠܘܬܼܐ ܕܝ ܐܰܒܘܢ ܒܰܫܡܰܝܐ ܡܶܐ ܕܟܰܡܝܠܐ ܐܝ ܨܠܘܬ݂ܐ ܟܐܘܟ݂ܠܝܢܐ ܐܘ ܡܘܟܠܐ. ܒܷܬܼܷܪ ܡܷܐ ܕܟܳܡܟܰܡܠܝܢܰܐ ܐܘ ܡܘܟܠܳܐ ܢܰܩܩܰܐ ܚܪܶܬܐ ܐܘ ܪܝܫ ܕܰܝܪܐ ܟܳܡܨܰܠܶܐ ܘܒܷܬܷ̥ܪ ܟܳܡܰܠܬܡܝܢܰܐ ܐܝ ܨܷܦܪܐ. ܐܘ ܬܷܠܬܝܡܐ ܕܝ ܨܷܦܪܐ ܟܘܠ ܢܰܩܠܰܐ ܬܪܶܐ ܡܰܝ ܝܳܠܘܦܶܐ ܟܳܘܷܢ ܦܳܬ݂ܘܪܳܝܶܐ ܗܷܢܢܶܐ ܟܳܡܰܠܬܡܝ ܐܰܣ ܣܶܦܳܩܶܐ ܘܟܡܰܫܝܓ݂ܝ، ܟܳܡܟܰܦܪܝܠܰܗ. ܒܷܬܪ ܡܝ ܩܪܳܛܷܢ ܟܳܡܫܰܪܷܢ ܐܰܗ ܗܷܪܓܶܐ ܐܰܝ ܝܳܠܘܦܶܐ ܟܳܠܷܬܡܝ ܠܝ ܡܰܕܪܰܫܬܐ. ܟܘܠ ܝܳܠܘܦܐ ܠܘ ܓܳܪܰܢ ܕܝ ܬܰܚܪܰܙܬܐ ܕܟܷܬܠܶܗ ܟܳܩܳܪܶܐ ܒܰܗ ܗܷܪܓܰܝܕ݂ܶܗ ܗܘܠ ܠܘ ܘܰܟ݂ܬ ܕܝ ܥܪܰܝܬܐ. ܒܷܬ݂ܷܪ ܡܝ ܥܪܰܝܬܐ ܢܰܩܠܰܐ ܚܪܶܬܐ ܟܝܬܐ ܗܶܪܓܶܐ ܗܘܠ ܠܝ ܨܠܘܬܐ ܕܪܰܡܫܐ. ܒܷܬ݂ܷܪ ܡܝ ܨܠܘܬܐ ܕܪܰܡܫܐ ܐܰܝ ܝܳܠܘܦܶܐ ܟܘܠܠܶܗ ܟܳܘܷܢ ܚܝܪܶܐ ܗܘܠ ܠܘ ܙܰܒܢܐ ܕܝ ܚܫܷܡܬܐ. ܒܷܬܷ݂ܪ ܡܝ ܚܫܷܡܬܐ ܐܰܗ ܗܶܪܓܶܐ ܟܳܟܷܡܠܝ ܟܘܠ ܚܰܐ ܐܘ ܡܶܕܶܐ ܕܟܳܐܒܰܥ ܟܳܩܳܕܰܪ ܕܣܳܝܷܡ. ܒܝ ܫܳܥܬ݂ܐ ܕܰܬܡܳܢܶܐ ܕܰܝܪܳܝܐ ܝܳܩܷܢ ܟܳܡܰܠܬܰܡܠܰܢ ܟܳܐܒܶܐ ܠܰܢ ܗܶܪܓܐ ܡܘ ܐܶܘܰܢܓܰܠܝܘܢ ܘܟܳܫܳܪܰܚܠܰܢ ܝܐ. ܐܶܠܐ ܐܝܢܰܩܰܐ ܕܟܳܘܶܐ ܐܘ ܕܘܟ݂ܪܳܢܐ ܕܩܰܕܝܫܐ ܟܳܩܳܪܶܐ ܠܰܢ ܐܰܚ ܚܰܝܶܐ ܕܘ ܩܰܕܝܫܐ، ܘܐܰܫ ܫܽܘܓ݂ܠܳܢܶܐ ܕܣܷܡܠܶܗ. ܡܷܐ ܕܝ ܫܳܥܬ݂ܐ ܟܷܘܝܐ ܥܣܰܪ ܟܳܡܨܰܠܶܢܰܐ ܐܝ ܨܠܘܬ݂ܐ ܕܘ ܕܡܳܟ݂ܐ. ܒܷܬܷ݂ܪ ܡܝ ܨܠܘܬ݂ܐ ܐܰܝ ܝܳܠܘܦܶܐ ܟܷܐܙܙܷܢ ܠܘ ܕܡܳܟ݂ܐ. ܟܘܠ ܝܰܘܡܐ ܨܰܦܪܐ، ܦܰܠܓܶܗ ܕܝܰܘܡܐ ܘܥܰܣܪܝـܝܶܐ ܟܷܡܨܰܠܝܢܰܐ. ܝܰܘܡܶܗ ܕܰܐܪܒܥܐ ܘܝܰܘܡܶܗ ܕܷܥܪܷܘܬܐ ܘܝܰܘܡܶܗ ܕܚܘܫܰܒܐ ܟܳܘܶܐ ܩܘܪܳܒܐ ܐܰܠܳܗܳܝܐ. ܟܘܠ ܬܪܶܐ ܝܰܘܡܶܐ ܟܷܡܨܰܠܶܢܰܐ ܨܠܘܬ݂ܐ ܕܝܠܳܢܳܝܬܐ ܠܰܫܰܢ ܐܰܟ ܟܰܝܝܘܶܐ. ܟܳܛܷܠܒܝܢܰܐ ܡܘ ܡܳܪܰܝܕ݂ܰܢ ܝܶܫܘܥ ܡܫܝܚܐ ܒܝ ܘܰܨܝܬܰܐ ܕܝ ܒܬ݂ܘܠܬܐ ܝܳܠܕܰܬ݂ ܐܰܠܳܗܐ ܡܰܪܝܰܡ، ܘܕܰܩ ܩܰܕܝܫܶܐ ܕܟܝܬ ܒܝ ܕܰܝܪܐ ܚܘܠܡܳܢܐ ܠܰܟ ܟܰܝܝܘܶܐ ܕܟܝܬ ܒܷܒܪܝܬܐ ܟܘܠܰܗ. ܢܰܩܰܐ ܡܫܰܝܶܠܝ ܡܘ ܕܰܝܪܳܝܐ ܡܷܪܠܝܠܶܗ؛ ܐܰܒܘܢܰܐ ܕܰܝܪܳܝܐ ܗܰܬ݂ܶܐ ܡܷܢ ܨܠܘܬ݂ܳܐ ܝܐ ܗܰܘܟ݂ܰܐ، ܒܘ ܫܚܝܡܐ ܘܒܝ ܦܰܢܩܝܬ݂ܐ ܠܰܝܬ ܗܰܘܟ݂ܰܐ ܡܶܕܶܐ. ܡܷܪܠܶܠܝ؛ ܟܳܚܳܙܰܬ ܐܰܡ ܡܗܰܝܡܢܶܐ ܡܶܐ ܟܘܠ ܟ݂ܰܨܪܰܐ ܕܷܒܪܝܬ݂ܐ ܟܳܡܫܰܕܪܝ ܠܰܢ ܡܥܰܕܪܳܢܘܬ݂ܐ ܠܝ ܕܰܝܪܐ. ܐܰܒ ܒܷܢܝܳܢܰܢܝ ܟܘܠܠܶܗ ܒܝ ܘܰܨܝܬܰܐ ܕܰܐܠܳܗܐ ܘܒܷܬ݂ܷܪ ܕܰܡܗܰܝܡܢܶܐ ܗܰܘܷܢ، ܐܰܚܢܰܐ ܣܬܶܐ ܡܰܔܒܘܪ ܢܰܐ ܕܷܡܨܰܠܝܢܰܐ ܘܕܛܷܠܒܝܢܰܐ ܕܰܐܠܳܗܐ ܡܰܢܷܚ ܐܰܟ ܟܰܝܝܘܰܬ݂ܬ݂ܶܗ ܘܕܷܡܟܰܡܷܠ ܐܰܥܡܰܝܝܶܗ ܟܘܠ ܡܶܕܶܐ ܛܰܘܘܐ. ܐܰܨ ܨܠܰܘܳܬ݂ܶܐ ܕܟܳܡܝܨܰܠܷܢ ܒܡܳܪܝ ܐܰܘܓܝܢ ܓ݂ܰܠܰܒܶܐ ܒܰܣܝܡܶܐ ܢܶܐ. ܥܰܠ ܕܷܒܗܰܝܡܳܢܘܬ݂ܐ، ܒܡܰܟܝܟ݂ܘܬ݂ܐ ܘܡܘ ܠܶܒܐ ܟܘܠܶܗ ܟܳܡܝܨܰܠܷܢ. ܐܰܕ ܕܰܝܪܳܝܶܐ ܓ݂ܰܠܰܒܶܐ ܫܰܦܝܪܐ ܟܳܣܰܝܡܝ ܐܝ ܬܷܫܡܷܫܬܰܬ݂ܶܗ. ܡܰܢ ܕܟܷܐܙܙܶܗ ܠܝ ܕܰܝܪܐ ܕܡܳܪܝ ܐܰܘܓܝܢ ܓ݂ܰܠܰܒܶܐ ܟܳܡܝܐܰܬܷܪ ܡܝܢܰܗ. ܓ݂ܰܠܰܒܶܐ ܕܘܟܬ݂ܐ ܒܰܣܷܡܬܳܐ ܝܐ ܐܘ ܚܷܙܘܶܝܕ݂ܰܗܓ݂ܰܠܰܒܶܐ ܫܰܦܝܪܳܐ ܝܐ. ܒܕܘܟܬ݂ܐ ܒܰܐܠܦܐ ܡܷܬܪܳܘܰܬ ܥܷܠܰܝܬܳܝܐ ܡܝ ܐܰܪܥܐ. ܡܝ ܢܰܩܰܐ ܕܷܦܬܝܚܐ ܐܝ ܕܰܝܪܐ ܘܡܥܰܕܷܠ ܐܘ ܕܰܪܒܰܝܕ݂ܰܗ ܓ݂ܰܠܰܒܶܐ ܢܳܫܶܐ ܟܳܐܬܷܹܢ ܠܰܫܰܢ ܕܟܷܪܟ݂ܝܠܰܗ. ܒܘ ܙܳܝܘܕܐ ܡܘ ܥܰܡܰܝܕ݂ܰܢ ܕܰܐܘܪܘܦ݁ܰܐ ܟܳܐܬ݂ܶܐ ܠܰܫܰܢ ܕܡܰܝܕܝ ܒܘܪܟܬ݂ܐ ܡܘ ܩܰܕܝܫܐ ܡܳܪܝ ܐܰܘܓܝܢ. ܐܰܕ ܕܰܝܪܳܝܶܐ ܘܰܐܥ ܥܳܡܘܪܶܐ ܟܘܠܠܶܗ ܟܳܡܷܠܒܳܟܝ ܥܰܡ ܐܰܕ ܕ݂ܰܝܦܶܐ. ܐܰܕ ܕ݂ܰܝܦܶܐ ܕܟܳܐܬ݂ܷܢ ܠܝ ܕܰܝܪܐ ܥܰܠ ܕܟܳܣܷܠܩܝ ܒܝ ܟܰܫܶܐ ܘܟܳܒܷܛܠܝ ܒܝ ܩܰܡܰܝܬܐ ܟܳܡܷܬܘܝܢܰܠܷܢ ܘܟܳܒܝܢܰܠܷܢ ܡܰܝܶܐ ܕܫܳܬܷܢ ܗܘܠ ܕܡܷܬܢܳܚܝ. ܒܷܬܷ݂ܪ ܡܷܐ ܕܟܳܒܝܢܰܠܷܢ ܫ̰ܰܝܶܐ ܘܩܰܚܘܶܐ ܘܦܶܟܝـܝܶܐ ܒܷܬ݂ܷܪ ܟܳܡܝܬܰܟܷܪܟ݂ܝ ܐܝ ܕܰܝܪܐ ܟܘܠܰܗ ܫܰܦܝܪܐ ܘܳܡܨܰܠܷܢ ܟܡܰܩܝܬ݂ܝ ܫܰܡܥܐ ܟܳܛܷܠܒܝ ܐܰܒ ܒܘܪܟܳܬ݂ܶܐ ܕܡܳܪܝ ܐܰܘܓܝܢ. ܒܷܬܷ̥ܪ ܟܳܛܷܠܒܝ ܟ݂ܰܛܷܪ ܡܰܕ ܕܰܝܪܳܝܶܐ ܘܡܰܐ ܥܳܡܘܪܶܐ ܕܝ ܕܰܝܪܐ ܒܷܬܷ݂ܪ ܟܷܐܙܙܷܢ ܒܫܰܝܢܐ ܘܒܷܫܠܳܡܐ ܠܰܒ ܒܳܬܰܬ݂ܬܶܗ ܡܰܠܦܳܢܐ ܬܳܐܢܝ ܐܶܪܓܝܢ 622 ܡܶܠܶܐ