Ayhan Gürkan: ܐܝ ܡܫܝܚܳܝܘܬ݂ܐ ܕܰܪܒܐ ܕܘ ܫܰܝܢܐ ܝܐ / I Mšiḥoyuṯo darbo du šayno yo

I Mšiḥoyuṯo darbo du šayno yo

ܐܘ ܥܰܡܐ ܣܘܪܝܳܝܐ ܡܶܩܷܡ، ܒܘ ܙܰܒܢܐ ܕܠܳܐܕ݂ܰܥܘܰܐ ܠܰܐܠܳܗܐ ܘܕܣܳܓ݂ܰܕܘܰܐ ܠܰܨ ܨܰܠܡܶܐ، ܟܷܬܘܰܝܠܶܗ ܡܰܪܕܘܬ݂ܐ ܡܫܰܚܠܰܦܬܐ ܕܒܰܡ ܡܳܐ ܬܷܫܥܝ ܕܟܷܬܘܰܐ ܪܰܚܷܩܬܐ ܡܝ ܬܰܪܒܝـܝܰܐ ܡܫܝܚܰܝܬܐ. ܘܥܰܠ ܕܟܷܬܘܰܐ ܡܶܐ ܙܰܒܢܐ ܝܰܪܝܟ݂ܐ ܒܕܘܟܳܬ݂ܶܐ ܓ݂ܱܠܱܒܶܐ ܒܝ ܓܪܶܥܘܬ݂ܐ ܘܒܝ ܥܷܬܡܰܐ ܕܰܨ ܨܰܠܡܶܐ. ܐܝܢܰܩܩܰܐ ܕܡܰܒܗܰܪܠܶܗ ܐܘ ܢܘܗܪܐ ܕܷܡܫܝܚܐ ܐܰܥܠܶܗ ܟ݂ܰܝـܝܦܐ ܦܬܷܚܠܶܗ ܐܰܬ ܬܰܪܥܰܝܕ݂ܶܗ ܘܡܰܩܒܶܠܶܗ ܘܗܰܘܝ ܐܘ ܥܰܡܐ ܩܰܡܳܝܐ ܕܷܡܗܰܝܡܰܢܠܶܗ ܒܷܡܫܝܚܐ. ܘܚܰܬܬܰܐ ܡܶܩܷܡ ܕܢܷܦܩܝ ܐܰܫ ܫܠܝܚܶܐ ܠܝ ܟܳܪܘܙܘܬ݂ܐ ܒܝ ܘܰܣܝܛܰܐ ܕܰܡ ܡܰܠܟܶܐ ܕܐܰܬ݂ܷܢ ܡܘ ܡܰܕܷܢܚܐ ܠܘ ܣܓ݂ܳܕܐ ܕܷܡܫܝܚܐ ܘܕܘ ܡܰܠܟܐ ܕܐܘܪܗܳܝ ܐܰܒܓܰܪ ܕܟܷܬܘܰܝܠܶܗ ܟܶܘܐ ܕܘ ܓܰܪܘܐ ܘܕܫܰܡܷܥ ܥܰܠ ܡܫܝܚܐ ܕܟܳܡܰܢܷܚ ܐܰܟ ܟܶܘܶܐ ܕܠܐ ܕܰܪܡܳܢܐ. ܕܠܐ ܚܙܳܝܐ ܡܗܰܝܡܰܢܠܶܗ ܘܡܷܪܠܶܗ: ܠܐ ܟܳܩܳܕܷܪ ܢܳܫܐ ܕܣܳܝܰܡ ܐܘ ܡܶܕܶܐ ܕܟܳܣܳܝܰܡ ܗܰܢܐ، ܕܠܳܐܘܶܐ ܐܰܠܳܗܐ. ܡܫܰܕܰܪܠܶܗ ܓܪܶܥܶܐ ܡܶܐ ܕܝܕ݂ܶܗ ܠܓܰܒ ܡܫܝܚܐ ܒܐܶܓܰܪܬ݂ܐ ܠܰܫܰܢ ܕܡܰܢܷܚܠܶܗ ܘܛܠܷܒܠܶܗ ܡܝܢܶܗ ܕܐܳܬ݂ܶܐ ܕܥܳܝܰܫ ܐܰܥܡܶܗ ܒܐܘܪܗܳܝ ܐܝ ܘܱܠܰܝܶܐ. ܐܶܠܐ ܡܫܝܚܐ ܡܰܕܥܰܪܠܶܗ ܥܰܡ ܐܰܓ ܓܪܶܥܶܐ ܡܰܢܕܶܠܐ ܕܟܝܬ ܐܰܥܠܰܗ ܐܝ ܨܘܪܬܰܝܕ݂ܶܗ ܘܗܘܠܶܠܶܗ ܘܰܥܕܐ ܕܓܷܕ ܡܫܰܕܰܪ ܚܰܐ ܡܰܬ ܬܰܠܡܝܕ݂ܰܝܕ݂ܶܗ ܠܰܫܰܢ ܕܡܰܢܷܚܠܶܗ. ܒܷܬ݂ܷܪ ܐܰܫ ܫܠܝܚܶܐ ܠܰܫܰܢ ܕܷܡܟܰܡܠܝ ܐܘ ܘܰܥܕܐ ܕܗܘܠܶܗ ܡܫܝܚܐ ܠܰܐܒܓܰܪ ܐܘ ܡܰܠܟܐ، ܡܫܰܕܰܪܪܶܗ ܐܰܕܰܝ ܐܘ ܡܣܰܒܪܳܢܐ ܕܟܷܬܘܰܐ ܐܘ ܐܰܚܘܢܐ ܕܬܘܡܰܐ ܐܘ ܫܠܝܚܐ ܠܐܘܪܗܳܝ. ܐܘ ܡܰܠܟܐ ܣܬܶܐ ܢܰܝܷܚܠܶܗ ܡܘ ܟܶܘܰܝܕ݂ܶܗ ܘܡܰܩܒܶܠܶܗ ܐܝ ܡܫܝܚܳܝܘܬ݂ܐ ܘܗܘܠܶܗ ܕܰܤܛܷܪ ܠܰܐܕܰܝ ܕܟܳܪܰܙ ܒܐܘܪܗܳܝ ܘܚܶܕ݂ܳܪܰܗ. ܘܡܶܐ ܐܘܪܗܳܝ ܦܪܝܣܐ ܐܝ ܡܫܝܚܳܝܘܬ݂ܐ ܠܐܳܡܝܕ݂ ܘܒܷܬ݂ܷܪ ܡܰܛܝܐ ܠܛܘܪܥܰܒܕܝܢ. ܡܰܘܟ݂ܰܐ ܐܘ ܥܰܡܐ ܣܘܪܝܳـܝܐ ܗܰܘܝܠܶܗ ܫܰܢܨ ܪܰܒܐ ܕܒܝ ܘܰܣܝܛܰܐ ܕܰܡ ܡܰܠܟܰܝܕ݂ܶܗ ܘܕܰܫ ܫܠܝܚܶܐ ܕܷܡܫܝܚܐ ܕܫܳܡܰܥ ܐܷܫܡܶܗ ܕܷܡܫܝܚܐ ܡܶܩܷܡ ܕܡܷܦܪܰܣ ܒܷܒܪܝܬ݂ܐ ܚܰܬܬܰܐ ܒܘ ܩܘܕܘܣ. ܟܳܩܳܪܝܢܰܐ ܥܰܠ ܩܘܤܛܰܢܛܝܢܳܘܣ ܐܘ ܡܰܠܟܐ ܡܗܰܝܡܢܐ. ܒܝ ܫܰܬܐ ܕܰܬ ܬܠܰܬ݂ܡܐ ܘܚܕ݂ܰܥܣܰܪ ܡܰܩܒܶܠܶܗ ܐܝ ܡܫܝܚܳܝܘܬ݂ܐ ܬܰܘܕܝܬ݂ܐ ܪܘܫܡܰܝܬܐ. ܘܒܝ ܫܰܬܐ ܕܰܬ ܬܠܰܬ݂ܡܐ ܘܚܰܡܡܷܫ ܘܥܷܣܪܝ ܒܝ ܘܱܠܰܝܶܐ ܕܢܝܩܝـܝܰܐ، ܕܟܷܐܡܡܝܠܰܗ ܐܰܕܝܰܘܡܰܐ ܒܘ ܬܷܪܟܝ ܐܝܙܢܝܟ، ܡܰܠܬܰܡܠܶܗ ܬܠܰܬ݂ܡܐ ܘܬܡܳܢܰܥܣܰܪ ܚܰܣܝܶܐ. ܘܒܝ ܣܘܢܢܶܕܘܣ ܕܢܝܩܝـܝܰܐ ܡܰܚܰܬܬܶܗ ܐܘ ܬܚܘܡܐ ܕܝ ܗܰܝܡܳܢܘܬ݂ܐ ܝܰܢܝ ܐܝ ܐܰܒܐ ܐܰܚܝܕ݂. ܒܷܬ݂ܷܪ ܡܶܐ ܕܢܰܦܝܩܝ ܐܰܬ ܬܰܠܡܝܕ݂ܶܐ ܕܷܡܫܝܚܐ ܠܝ ܒܷܫܪܰܐ، ܒܐܘܪܗܳܝ ܘܒܳܒܶܝܠ ܥܰܠ ܕܰܡ ܡܰܠܟܶܐ ܘܐܘ ܥܰܡܐ ܟܷܬܘܰܠܠܶܗ ܟ݂ܰܒܪܐ ܡܶܐ ܡܫܝܚܐ ܕܡܰܘܠܷܕ݂، ܡܰܩܒܰܠܠܶܗ ܟ݂ܰܝـܝܦܐ ܐܝ ܡܫܝܚܳܝܘܬ݂ܐ. ܒܷܬ݂ܷܪ ܡܶܐ ܕܷܡܗܰܝܡܰܢܠܶܗ ܐܘ ܥܰܡܐ ܒܷܡܫܝܚܐ ܡܰܪܟܰܘܠܶܠܶܗ ܡܰܪܕܘܬ݂ܐ ܘܬܰܪܒܝـܝܰܐ ܚܰܬ݂ܬܐ ܡܘ ܝܘܠܦܳܢܐ ܕܷܡܫܝܚܐ. ܐܰܡ ܡܫܝܚܳܝܶܐ ܡܰܩܒܰܠܠܶܗ ܐܝ ܗܰܝܡܳܢܘܬ݂ܐ ܡܫܝܚܰܝܬܐ، ܠܐ ܒܝ ܙܳܪܝـܝܶܐ، ܐܶܠܐ ܒܝ ܚܘܒܐ ܘܒܝ ܗܰܝܡܳܢܘܬ݂ܐ. ܟ݂ܘܕ ܡܫܝܚܐ ܕܡܷܪܠܶܗ ܒܘ ܐܶܘܰܢܓܰܠܝܘܢ ܕܡܰܬܰܝ ܒܘ ܨܚܳܚܐ ܕܰܚ ܚܰܡܫܐ (ܗ: ܝܗ‐ܝܙ 5:15 17): ܠܐ ܟܡܰܢܗܪܝ ܐܝ ܫܪܳܓ݂ܐ ܘܡܰܚܬܝܠܰܗ ܬܰܚܬܶܗ ܣܰܬܐ ܐܘ ܬܰܚܬܶܗ ܣܶܦܳܩܐ، ܐܶܠܐ ܒܕܘܟܬ݂ܐ ܥܶܠܰܝܬܐ ܠܰܫܰܢ ܕܡܰܢܗܪܐ ܠܟܘܠ ܕܟܷܬܢܶܐ ܒܘ ܒܰܝܬܐ. ܗܰܘܟ݂ܰܐ ܟܠܳܙܰܡ ܕܡܰܢܗܰܪ ܐܘ ܢܘܗܪܰܬ݂ܟ݂ܘ ܩܘܡ ܐܰܢ ܢܳܫܶܐ ܘܕܷܡܫܰܒܚܝ ܠܘ ܒܰܒܰܬ݂ܟ݂ܘ ܕܒܝ ܫܡܰܝܐ܀ ܡܝ ܡܷܠܬ݂ܰܬ݂ܶܐ ܐܝܢܰܩܩܰܐ ܕܢܷܦܩܝܢܰܐ ܠܘ ܕܰܪܒܐ، ܐܰܣ ܣܘܪܝܳܝܶܐ ܩܰܕܝܪܝ ܕܷܡܛܰܒܩܝܠܰܗ ܒܰܚ ܚܰܝܶܐ. ܘܠܐ ܡܟܰܣܰܠܠܶܗ ܐܘ ܒܰܗܪܐ ܕܷܡܫܝܚܐ ܐܶܠܐ ܦܪܷܣܣܶܗ ܥܰܠ ܐܰܢ ܢܳܫܶܐ ܐܰܔ ܔܝܪܰܐܢ ܕܷܬ݂ܬ݂ܶܗ ܘܩܰܕܝܪܝ ܕܡܰܢܗܪܝ ܠܰܪ ܪܰܚܘܩܶܐ ܣܬܶܐ ܒܘ ܒܰܗܪܐ ܕܷܡܫܝܚܐ. ܡܰܪܟܰܘܘܰܢܢܶܗ ܚܰܝܶܐ ܘܥܝܶܫܶܐ ܚܰܬ݂ܬܐ ܘܚܰܝܶܐ ܕܟܷܬܢܶܐ ܡܰܠܝܶܐ ܚܘܒܐ ܘܫܰܝܢܐ ܘܢܝܚܘܬ݂ܐ. ܡܝ ܟ݂ܰܨܪܰܐ ܚܪܶܬܐ ܡܬܰܒܩܐ ܐܝ ܡܶܠܬ݂ܐ ܕܷܡܫܝܚܐ ܕܡܷܪܠܶܗ ܒܡܰܬܝ (ܗ.ܝܐ 11:5): ܛܘܒܐ ܐܰܠܟ݂ܘ ܐܝܢܰܩܩܰܐ ܕܷܡܚܰܩܪܷܢܟ݂ܘ، ܕܛܷܪܕܷ݂ܢܟ݂ܘ ܘܕܷܐܡܡܝ ܐܰܥܠܰܝܟ݂ܘ ܟܘܠ ܡܶܠܬ݂ܐ ܚܰܪܒܐ ܠܰܫܰܢ ܐܷܫܡܝ ܒܕܘܓܠܶܐ. ܗܶܕܝ ܡܷܦܨܶܚܘ ܛܪܳܐܬ݂ܶܐ ܟܶܦ ܕܷܬ݂ܟ݂ܘ ܚܰܩ ܕܷܬ݂ܟ݂ܘ ܓ݂ܱܠܱܒܶܐ ܝܐ ܒܝ ܫܡܰܝܐ. ܗܰܬ݂ܶܐ ܣܬܶܐ ܡܬܰܒܩܐ ܒܰܚ ܚܰܝܶܐ ܕܰܣ ܣܘܪܝܳܝܶܐ ܡܰܢܝ ܕܠܐ ܟܐܘܕ݂ܥܝ ܡܫܝܚܐ. ܐܘ ܥܰܡܐ ܣܘܪܝܳܝܐ ܗܘܠ ܠܰܐܕܝܰܘܡܰܐ ܟܳܡܝܕܰܫ ܟܳܡܝܣܰܡ ܢܱܚܱܩܝـܝܶܐ ܐܰܥܠܶܗ ܥܰܠ ܕܟܷܬܝܐ ܡܫܝܚܳܝܐ. ܟܡܝܬܰܘܦܰܩ ܡܘ ܒܰܝܬܐ ܘܡܘ ܥܰܦܪܰܝܕ݂ܶܗ ܗܰܢܐ ܕܒܰܢ ܐܰܠܦܰܘܰܬ ܐܷܫܢܶܐ ܬܰܥܷܒ ܘܙܪܷܥܠܶܗ ܘܡܰܥܡܰܪܠܶܗ. ܒܝ ܫܰܬܐ ܕܘ ܣܰܝܦܐ ܒܬܷܪܟܝـܝܰܐ ܘܒܷܬ݂ܷܪ ܒܠܷܒܢܰܐܢ ܘܐܰܕܝܰܘܡܰܐ ܕܟܳܚܳܙܝܢܰܐ ܒܥܰܝܢܰܝܢܰܐ ܐܘ ܡܶܕܶܐ ܕܟܳܘܶܐ ܒܣܘܪܝـܝܰܐ ܘܒܘ ܥܷܪܰܐܩ. ܐܘ ܥܰܡܐ ܣܘܪܝܳܝܐ ܕܟܷܬܘܰܐ ܡܳܪܶܗ ܕܘ ܥܰܦܪܐ ܐܰܕܝܰܘܡܰܐ ܡܒܰܪܒܰܙ ܒܷܒܪܝܬ݂ܐ ܘܗܰܘܝ ܢܘܟ݂ܪܳܝܐ ܠܘ ܥܰܦܪܰܝܕ݂ܶܗ ܘܠܝ ܝܳܪܬܘܬ݂ܰܝܕ݂ܶܗ. ܐܘ ܡܶܕܶܐ ܕܦܰܝܷܫ ܒܘ ܐܰܬ݂ܪܐ ܕܰܢ ܐܰܒܳܗܳܬ݂ܐ ܣܬܶܐ ܗܰܘܝ ܢܘܟ݂ܪܳܝܐ ܒܘ ܒܰܝܬܰܝܕ݂ܶܗ ܘܒܝ ܩܪܝܬ݂ܰܝܕ݂ܶܗ܀ ܡܠܦܢܐ ܐܝܗܐܢ ܓܘܪܩܐܢ 500 ܡ̈ܠܶܐ.