Ayhan Gürkan: ܐܝ ܩܪܝܬ݂ܐ ܕܷܟܦܰܪܙܶܐ / I qriṯo dë Kfarze

I qriṯo dë Kfarze

ܟܦܰܪܙܶܐ ܐܝ ܩܪܝܬ݂ܐ، ܚܕ݂ܐ ܡܰܩ ܩܷܪܝܰܘܳܬ݂ܶܐ ܥܰܬܝܩܶܐ ܕܛܘܪܥܰܒܕܝܢ ܝܐ. ܟܳܡܝܣܷܡ ܬܰܟ݂ܡܝܢ ܕܡܶܩܷܡ ܡܘ ܕܳܪܐ ܕܰܚ ܚܰܡܫܐ ܡܰܩܒܶܠܰܗ ܐܝ ܡܫܝܚܳܝܘܬ݂ܐ. ܡܘܣܱܒܰܒ ܕܐܝ ܥܝܬܐ ܪܰܒܬ݂ܐ ܕܡܳܪܝ ܥܙܳܙܳܐܶܝܠ ܡܝ ܫܰܬܐ ܕܰܢ ܐܰܪܒܰܥܡܐ ܘܬܷܫܥܝ (490) ܥܰܡܝܪܐ ܡܘ ܛܱܪܰܦ ܕܰܐܢܰܣܛܰܐܣ ܐܘ ܡܰܠܟܐ ܕܰܒ ܒܝܙܰܢܛܳܝܶܐ. ܐܷܫܡܰܗ ܕܝ ܩܪܝܬ݂ܐ ܬܰܐܡ ܢܳܫܐ ܠܳܐ ܟܳܐܕ݂ܰܥ ܡܷܢ ܡܰܥܢܰܐ ܟܷܬܠܶܗ. ܟܦܰܪ ܒܘ ܠܶܫܳܢܐ ܣܘܪܝܳܝܐ ܝܐ. ܐܶܠܐ ܙܶܐ ܐܝܚܬܝܡܰܠ ܟ݂ܰܒܪܐ ܦܷܪܣܳܝܐ ܝܐ. ܐܰܥ ܥܝܬܳܬ݂ܶܐ ܘܐܰܕ ܕܰܝܪܶܐ ܕܟܝܬ ܐܶܒܰܗ ܗܰܢܝ ܢܶܐ: ܐܝ ܥܝܬܐ ܪܰܒܬ݂ܐ ܡܳܪܝ ܥܙܳܙܳܐܶܝܠ ܒܓܰܘܰܗ ܟܝܬ ܡܳܪܝ ܫܰܠܝܛܐ، ܡܳܪܝ ܝܘܚܢܷܢ ܡܰܥܷܡܕ݂ܳܢܐ (ܐܝ ܡܰܩܒܰܪܰܐ ܒܝ ܕܷܪܬܰܝܕ݂ܰܗ ܝܐ)، ܐܝ ܥܝܬܐ ܕܝܳܠܕܰܬ݂ ܐܠܗܐ، ܡܳܪܝ ܓܶܘܰܪܓܝܣ، ܡܳܪܝ ܐܒܪܳܗܷܡ ܘܡܳܪܬܝ ܦܰܒܪܘܢܝܰܐ، ܗܰܢܝ ܥܝܬܳܬ݂ܶܐ ܢܰܥܝܡܶܐ ܢܶܐ. ܔܓ݂ܰܝܪ ܡܶܐ ܡܪܝ ܥܙܳܙܳܐܶܝܠ ܐܘ ܬܰܪܝܟ̣݂ ܕܷܬ݂ܬ݂ܶܗ ܠܰܬܝܐ ܐܝܕ݂ܝܥܐ ܡܷܩܩܰܐ ܥܰܬܝܩܶܐ ܢܶܐ. ܗܰܢܝ ܒܝ ܫܰܬܐ ܕܰܬ ܬܪܰܠܦܐ ܡܘ ܛܱܪܰܦ ܕܘ ܥܰܡܐ ܣܘܪܝܳܝܐ ܕܟܳܥܳܝܰܫ ܒܰܐܘܪܘܦ݁ܰܐ ܡܥܰܕܠܷܢܢܶܗ. ܟܝܬ ܚܝܕ݂ܳܪܰܗ ܕܝ ܩܪܝܬ݂ܐ ܕܰܝܪܐ ܕܡܳܪܝ ܡܘܫܶܐ ܟܦܰܪܙܳܝܐ، ܘܡܳܪܝ ܐܶܠܝـܝܐ ܗܰܢܝ ܐܰܬ ܬܰܪܬܶܐ ܣܬܶܐ ܗܶܫ ܚܰܪܝܘܶܐ ܢܶܐ. ܒܰܡ ܡܷܩܩܰܐ ܐܘ ܬܰܪܝܟ݂ ܟܳܡܰܚܘܶܠܰܗ ܕܘܟܬ݂ܐ ܣܘܪܝܰܝܬܐ. ܐܶܠܐ ܟܝܬ ܐܶܒܰܗ ܕܘܟܳܬ݂ܶܐ ܐܷܫܡܰܝܝܶܗ ܠܰܬܢܶܐ ܣܘܪܝܳܝܐ ܕܰܐܕܝܰܘܡܰܐ ܟܳܡܷܔܓ݂ܳܠܝܢܰܐ ܠܶܗ. ܒܰܠܟܝ ܒܘ ܠܝܫܳܢܐ ܦܷܪܣܳܝܐ ܢܶܐ ܐܰܘ ܐܳܪܳܡܳܝܐ ܥܰܬܝܩܐ ܢܶܐ. ܐܷܫܡܶܗ ܕܰܕ ܕܘܟܳܬ݂ܶܐ ܘܕܰܛ ܛܘܪܳܢܶܐ ܕܟܝܬ ܗܰܢܝ ܢܶܐ: ܒܝ ܩܰܡܰܝܬܐ ܐܰܕ ܕܘܟܳܬ݂ܶܐ ܕܚܶܕ݂ܳܪܰܗ ܕܝ ܩܪܝܬ݂ܐ ܟ݂ܘܕ ܐܰܪ ܪܳܓ݂ܘܠܶܐ ܟܝܬ ܐܶܒܶܗ ܟܶܦܶܐ ܪܰܒܶܐ ܕܰܥ ܥܡܰܪܰܬ ܥܰܬܝܩܶܐ ܒܰܠܟܝ ܗܰܪܟܶܐ ܡܶܩܷܡ ܡܶܐ ܡܫܝܚܳܐ ܝܐ. ܐܝ ܬܩܘܙܐ، ܐܘ ܫ̰ܰܡܷܢ ܢܙܶܪ، ܐܘ ܣܰܪܶܢܙܶܪ، ܐܝ ܫ̰ܰܠܷܢܓܝܢܶܐ، ܐܝ ܘܰܛܰܐ، ܐܝ ܒܶܫܘܪܝ، ܐܘ ܒܷܬ݂ܪܰܗ ܟܽܘܪܟܰܬ، ܐܝ ܒܳܪܝܟ݂ܶܐ، ܐܘ ܡܰܠܘܚܐ، ܐܝ ܒܷܨܰܪܝ، ܐܘ ܨܰܠܠܝܒܐ، ܐܝ ܒܰܢܢܶܐ ܕܘܟܶܠ، ܐܘ ܨܘܦܢܳܝܐ، ܟܰܗܢܝܝܰܐ ܡܷܣܛܐ، ܐܝ ܩܘܢܝـܝܶܐ، ܐܝ ܥܰܝܢܐ، ܐܝ ܚܪܰܦ݁ܬ݂ܐ، ܐܝ ܚܠܶܒܳܢܐ، ܐܘ ܚܶܒܝܣ، ܫ̰ܰܠܰܐ ܫ̰ܘܟܰܐ، ܐܝ ܓܘܗܰܪܪܶܐ، ܓܘܗܰܪܰܐ ܫܶܟܷܪ، ܓܘܗܰܪܰܐ ܚܰܘܫܰܒܶܐ، ܐܘ ܒܰܪܳܙ̰ ܕܘ ܚܰܝܕܰܪܝ، ܐܝ ܫܶܢܐ ܕܘ ܩܰܫܐ، ܐܝ ܡܰܩܛܱܠܶܐ، ܐܝ ܟܘܪܟܶܐ ܕܘ ܐܰܣܡܰܪ، ܐܘ ܫܰܠܘܐ، ܐܰܚ ܚܰܘܩܶܐ، ܐܘ ܒܷܣܬܰܝܠܳܢܐ. ܐܝ ܐܰܕܪܐ ܕܝ ܡܷܠܠܶܐ، ܐܘ ܩܱܠܰܐܫ̰، ܐܝ ܐܰܕܪܐ ܕܒܶܐ ܓܰܒܪܶܐ، ܐܝ ܐܰܕܪܐ ܕܒܶܐ ܩܰܫ̰ܐ ܡܶܩܷܡ ܕܰܝܩܝܘܰܐ ܐܰܒ ܒܷܪܶܓ݂ܷܠ ܐܶܒܰܗ، ܐܝ ܐܰܕܪܐ ܕܝ ܥܝܬܐ ܒܘ ܩܰܝܛܐ ܐܝܬܳܘܐ ܒܷܬ݂ܪܰܗ ܕܝ ܥܝܬܐ ܓ݂ܱܠܱܒܶܐ ܒܰܣܝܡܐ ܘܦܰܝܘܚܐ ܝܐ، ܐܝ ܙܝܰܪܰܬܟܶܐ ܟܝܬ ܐܷܒܰܗ ܩܰܘܪܶܐ ܥܰܬܝܩܶܐ ܘܐܰܔ ܔܷܒ݂ܰܬܰܬ ܕܝ ܫܰܘܬ݂ܐ ܐܶܒܰܗ ܣܰܝܡܝܘܰܢܢܶܗ، ܐܘ ܫܩܳܩܐ ܕܡܷܪܥܐ، ܐܝ ܩܰܠܬܐ ܕܒܶܐ ܟ݂ܘܰܔܰܐ ܠܰܝܡܝܘܰܐ ܐܶܒܰܗ ܐܝ ܫܘܝܬ݂ܐ ܕܰܟ݂ ܟ݂ܘܰܔܷܟܝـܝܶܐ، ܐܝ ܓܳܪܐ ܕܝ ܟܰܠܳܟܶܐ ܡܷܫܬܰܥܷܢܘܰܐ ܐܰܥܠܰܗ ܒܰܓ݂ ܓ݂ܰܪܰܬ ܘܒܰܟ ܟܰܥܒܶܐ، ܐܝ ܡܰܕ݂ܪܰܒܒܶܐ ܕܝ ܗܰܘܘܶܐ ܓܘܒܐ ܓ݂ܱܠܱܒܶܐ ܥܰܡܘܩܐ ܘܪܘܝـܚܐ ܝܐ. ܟܳܚܳܙܝܢܰܐ ܐܷܫܡܳܢܶܐ ܢܘܟ݂ܪܳܝܶܐ ܟܝܬܐ. ܐܘ ܡܶܕܰܢܐ ܟܳܡܰܚܘܶܐ ܒܰܙ ܙܰܒܢܶܐ ܥܰܬܝܩܶܐ ܐܝ ܕ݂ܷܠܡܝܝܶܐ ܕܗܰܘܝ ܥܰܠ ܐܘ ܬܰܪܝܟ݂ ܥܰܠ ܐܘ ܥܰܡܐ ܥܰܠ ܐܝ ܐܘܡܬ݂ܐ ܥܠ ܐܝ ܥܝܬܐ ܣܘܪܝܰܝܬܐ ܕܷܡܫܰܚܠܰܦܦܶܗ ܐܰܢ ܐܷܫܡܳܢܰܬ݂ܬ݂ܶܗ ܟ݂ܘܕ ܐܰܕܝܰܘܡܰܐ ܟܳܚܳܙܝܢܰܐ ܘܟܳܥܰܝܫܝܢܰܠܠܶܗ. ܐܝ ܩܪܝܬ݂ܐ ܕܷܟܦܰܪܙܶܐ ܥܰܡܷܪܬܐ ܝܐ ܥܰܠ ܛܘܪܐ ܥܶܠܳܝܐ. ܟܳܦܰܝܫܐ ܒܰܝܢ ܐܰܩ ܩܷܪܝܰܘܳܬ݂ܶܐ ܕܷܐܫܡܰܝܝܶܗ ܟܰܡܡܶܐ، ܟܰܦܣܰܢܓܶܐ، ܗܰܠܠܰܟܶܐ، ܟܰܦܣܘܪܶܐ ܘܕܷܒܰܢܶܐ. ܚܰܬܬܰܐ ܟܷܐܡܡܝ ܟܳܡܰܚܘܐ ܐܝ ܩܰܠܥܐ ܕܡܰܪܕܶܐ ܡܝ ܩܪܝܬ݂ܐ. ܟܦܰܪܙܶܐ ܙܰܢܓܝܢ ܘܰܐ ܒܰܟ ܟܰܪܡܶܐ ܒܰܢ ܐܰܪܥܳܬ݂ܶܐ ܓ݂ܱܠܱܒܶܐ ܐܘܥܕܐ ܢܰܩܝܨܝ ܐܰܟ ܟܰܪܡܶܐ ܐܶܒܰܗ. ܐܝ ܥܝܶܫܶܐ ܕܘ ܥܰܡܐ ܗܷܢ ܡܰܢܢܶܗ ܥܰܠ ܐܝ ܙܰܪܝܥܰܐ ܐܰܘ ܥܰܠ ܐܰܚ ܚܷܝܶܘܷܢ ܘܰܐ ܘܓ݂ܱܠܱܒܶܐ ܡܰܢܢܶܗ ܡܳܪܶܗ ܕܨܷܢܥܰܬ ܘܰܐ. ܐܰܟ ܟܦܰܪܙܳܝܶܐ ܕܰܝـܝܡܰܐ ܟܰܪܳܟ݂ܶܐ ܘܰܝܢܶܐ ܒܰܘ ܘܱܠܰܝܰܬ ܘܒܰܩ ܩܷܪܝܰܘܳܬ݂ܶܐ ܕܘ ܐܰܬ݂ܪܐ. ܟܶܬܘܰܐ ܒܐܝܕܳܬ݂ܰܝـܝܶܗ ܨܷܢܥܰܬ ܓ݂ܱܠܱܒܶܐ ܟ݂ܘܕ ܡܰܥܷܡܪܳܢܶܐ ܕܰܒ ܒܳܬܶܐ، ܡܒܰܝܕ݂ܳܢܶܐ، ܣܰܝܳܡܶܐ ܕܰܪ ܪܷܫܘܳܢܶܐ، ܙܰܩܳܪܶܐ، ܣܰܝܳܡܶܐ ܕܰܨ ܨܳܒܰܬ، ܣܰܝܳܡܶܐ ܕܰܥ ܥܰܪܫܶܐ، ܩܰܨܳܒܶܐ، ܘܬܷܔܔܰܐܪ ܕܘ ܡܷܫܚܐ، ܕܰܓ ܓܰܠܕܶܐ ܕܘ ܡܰܪܥܶܙܶܐ ܕܝ ܩܰܪܰܕ݂ܰܐ. ܡܰܘܟ݂ܰܐ ܡܶܐ ܟܘܠ ܕܘܟܬ݂ܐ ܐܷܙܙܶܗ ܐܳܬ݂ܶܘܰܐ ܥܰܡܐ ܠܝ ܬܰܔܰܪܰܐ ܠܺܝ ܩܪܺܝܬ݂ܐ. ܡܰܬ݂ܠܐ ܐܘ ܒܰܨܪܐ ܕܡܷܕ݂ܝܰܕ݂ ܒܘ ܙܳܝܘܕܐ ܡܷܐ ܟܦܰܪܙܶܐ ܐܳܬ݂ܶܘܰܐ. ܗܷܢܓܝ ܐܘ ܥܰܡܐ ܕܷܟܦܰܪܙܶܐ ܟܳܪܰܟ݂ܘܰܐ ܠܰܫܰܢ ܐܝ ܨܷܢܥܰܐ ܚܳܙܶܘܰܐ ܕܷܟܳܬ݂ܶܐ ܘܫܳܡܰܥܘܰܐ ܬܰܫܷܥܝܳܬ݂ܶܐ ܘܟ݂ܰܒܪܶܐ ܡܚܰܠܦܶܐ. ܘܐܳܬܼܶܘܰܐ ܢܳܫܶܐ ܓܼܰܠܰܒܶܐ ܠܷܟܦܰܪܙܶܐ ܠܰܫܰܢ ܐܝ ܬܷܔܔܰܪܰܐ ܡܰܘܟ݂ܰܐ ܐܘ ܥܰܡܰܝܕ݂ܰܗ ܝܰܠܝܦܘܰܐ ܠܝ ܫܬܰܓܼܰܠܺܝܝܶܐ ܠܰܚ ܚܰܢܰܟܶܐ. ܣܰܪܒܰܣܬܘܰܐ ܒܰܝܢܘ ܥܰܡܐ ܠܘ ܓܳܪܰܢ ܕܰܩ ܩܷܪܝܰܘܳܬ݂ܶܐ ܚܪܶܢܶܐ܀ ܟܷܪܟ݂ܝܘܰܐ ܗܘܠ ܓܙܝܪܐ܆ ܣܥܷܪܬ܆ ܡܽܘܫ܆ ܕܝܝܰܪܒܰܟܷܪ ܐܰܩ ܩܷܪܝܰܘܳܬ݂ܰܬ݂ܶܗ. ܗܶܫ ܐܰܡ ܡܰܣܝܘܶܐ ܐܝܢܰܩܰܐ ܕܟܳܡܰܚܟܷܢ ܐܘ ܡܷܕܶܐ ܕܰܐܬ݂ܝܘܰܐ ܒܩܰܪܥܰܝܝܶܗ ܒܰܕܰܪܒܳܢܶܐ ܒܰܩ ܩܷܪܝܰܘܳܬ݂ܶܐ. ܟܳܒܳܢܷܢ ܐܷܫܡܶܐ ܕܰܩ ܩܷܪܝܰܘܳܬ݂ܳܐ ܕܷܫܓܼܷܠܠܶܗ ܐܰܦ݁ܦ݁ܶܗ ܚܕ݂ܐ ܒܷܚܕܐ ܡܰܝܢܰܐ ܩܪܝܬ݂ܐ ܠܰܝܢܰܐ ܩܪܝܬ݂ܐ ܐܷܙܙܷܢܘܰܐ ܐܷܫܡܶܐ ܕܰܢ ܢܳܫܶܐ ܕܰܢ ܐܰܓܼܰܘܰܬ ܕܰܡ ܡܘܟܼܬܰܪܶܐ ܕܰܕ ܕܷܟܳܬ݂ܰܢܷܟ ܡܷܩܩܰܐ ܪܰܚܘܩܶܐ ܢܶܐ ܡܶܐ ܚܕ݂ܳܕ݂ܶܐ܀ ܟܠ ܗܳܣܬܰܐ ܕܨܷܢܥܰܐ ܟܷܬܘܰܝܠܶܗ ܡܷܢܬܷܩܰܐ ܠܪܘܚܗ. ܡܳܪܶܐ ܕܰܨ ܨܷܢܥܰܬ ܡܷܐ ܕܟ݂ܳܠܰܨܘܰܐ ܥܶܕܐ ܪܰܒܐ ܢܷܦܩܝܘܰܐ ܠܘ ܥܘܳܕܐ ܠܰܪܘܰܠ ܡܝ ܩܪܝܬ݂ܐ ܗܷܢ ܡܰܢܢܶܐ ܒܰܝ ܝܰܪܚܶܐ ܠܐ ܕܷܥܪܝܘܰܐ ܠܘ ܒܰܝܬܐ. ܒܘ ܣܰܬ݂ܘܐ ܡܳܪܶܐ ܕܝ ܨܷܢܥܰܐ ܠܐ ܢܳܦܰܩܘܰܐ ܡܝ ܩܪܝܬ݂ܐ ܡܘ ܣܰܒܰܒ ܡܶܩܷܡ ܐܳܬ݂ܶܘܰܐ ܬܰܠܓܐ ܓ݂ܰܠܰܒܶܐ ܡܷܣܟ݂ܳܪܝܘܰܐ ܐܰܕ ܕܰܪܒܳܢܶܐ ܡܝܟܰܣܷܢܘܰܐ ܐܰܒ ܒܳܬܶܐ ܦܰܝܫܝܘܰܐ ܚܒܝܣܳܝܶܐ ܒܰܝ ܝܰܘܡܶܐ ܒܘ ܒܰܝܬܐ. ܡܰܘܟ݂ܰܐ ܡܶܐ ܡܶܩܷܡ ܡܘ ܣܰܬ݂ܘܐ ܟܳܠܳܙܰܡ ܕܘܥܪܝ ܘܙܰܘܢܝ ܐܝ ܣܢܝܩܘܬ݂ܐ ܕܘ ܣܰܬ݂ܘܐ ܐܘ ܙܰܕ ܕܡܰܟܦܶܐ ܠܘ ܣܰܘܰܠܰܬ݂ܬ݂ܶܗ܀ ܟܝܬ ܒܛܘܪܥܰܒܕܝܢ ܟ݂ܰܒܪܐ ܕܟܷܬܝܐ ܓ݂ܰܠܰܒܶܐ ܐܝܕ݂ܝܥܐ ܟܷܐܡܡܝ ܗܰܡܰܐ ܕܐܘܟ݂ܠܝܢܰܐ ܐܝ ܒܷܥܬܐ ܣܶܡܰܩܬܐ. ܚܰܐ ܡܰܣ ܣܰܒܰܒܶܐ ܕܘ ܟ݂ܰܒܪܰܢܐ ܗܰܬ݂ܶܐ ܝܐ ܥܰܠ ܕܳܐܬ݂ܶܘܰܐ ܣܰܬ݂ܘܶܐ ܝܰܩܘܪܶܐ ܢܳܚܰܬܘܰܐ ܬܰܠܓܐ ܒܰܡ ܡܷܬܪܳܘܰܬ ܐܰܢ ܢܳܫܶܐ ܥܡܘ ܣܰܘܰܠ ܕܷܬ݂ܬ݂ܶܗ ܦܰܝܫܝܘܰܐ ܚܒܝܣܳܝܶܐ ܒܓܰܘܶܐ ܕܰܒ ܒܳܬܶܐ܀ ܟܦܰܪܙܶܐ ܟܷܬܠܰܗ ܡܥܰܪܬ݂ܐ ܪܰܒܬ݂ܐ ܓ݂ܰܠܰܒܶܐ ܝܕ݂ܝܥܬܐ ܒܰܝܢܘ ܥܰܡܐ ܟܷܐܡܡܺܝܠܰܗ ܐܝ ܫܟܰܦܬܶܐ ܕܝܰܒܳܐ. ܐܘ ܥܡܐ ܕܝ ܩܪܝܬ݂ܐ ܣܘܪܳܝܶܐ ܛܰܝܶܐ ܒܘ ܙܳܝܘܕܐ ܒܘ ܩܰܝܛܐ ܥܰܠ ܕܟܳܘܶܐ ܚܶܡܐ ܓ݂ܰܠܰܒܶܐ ܓܰܘܰܗ ܦܰܝܘܚܐ ܝܐ. ܒܐܝܡܳܡܐ ܝܷܬܘܝܘܰܐ ܦܷܪܣܝܘܰܐ ܡܰܪܫܰܬ ܕܷܘܶܫܷܟ ܒܓܰܘܰܗ ܡܷܙ̰ܕܝܘܰܐ ܪܘܚܰܝܝܶܗ܆ ܕܷܡܟ݂ܝܘܰܐ܆ ܗܷܢ ܣܰܝܡܝܘܰܐ ܐܰܔ ܔܷܒ݂ܰܬܰܬ ܕܷܬ݂ܬ݂ܶܗ ܐܷܒܰܗ. ܐܘ ܡܶܕܶܐ ܕܫܷܡܥܝ ܕܚܳܙܷܢܘܰܐ ܡܰܚܟܝܘܰܝܠܶܗ ܠܷܚܕ݂ܳܕ݂ܶܐ. ܗܷܢ ܡܷܫܬܰܥܶܢܘܰܐ ܒܽܘ ܣܟܰܡܒܺܝܠ ܒܰܟ ܟܰܥܒܶܐ. ܡܶܩܷܡ ܐܝܢܰܩܰܐ ܕܟܷܬܘܰܐ ܐܝ ܩܪܝܬ݂ܐ ܡܠܝܬ݂ܐ ܒܐܝܡܳܡܐ ܐܰܔ ܔܷܒ݂ܰܬܰܬ ܐܰܓ݂ܠܰܒ ܓܰܘܪܶܐ ܢܺܝܫܶܐ ܐܶܒܰܗ ܣܰܝܡܺܝܘܰܢܢܶܗ. ܐܰܢ ܢܺܝܫܶܐ ܣܬܶܐ ܥܶܙܠܝܘܰܐ ܥܰܙܠܐ ܒܝ ܬܰܫܫܺܝܝܶܐ ܘܣܷܪܩܝܘܰܐ ܐܘ ܡܰܪܥܶܙܶܐ ܒܘ ܡܣܰܪܩܐ ܠܰܫܰܢ ܐܝ ܓܘܡܬ݂ܐ܆ ܗܷܢ ܡܰܢܢܶܗ ܡܰܡܛܷܢܘܰܐ ܐܘ ܠܰܝܫܐ ܣܰܝܡܝܘܰܐ ܐܝ ܫܥܝܪܰܝܶܐ ܐܶܒܰܗ. ܚܰܬܬܰܐ ܐܰܓ݂ܠܰܒ ܡܰܥ ܥܠܰܝܡܶܐ ܥܠܰܝܡܳܬ݂ܐ ܒܝ ܚܷܔܔܶܐ ܕܘ ܡܰܪܥܶܙܶܐ ܘܕܝ ܬܰܫܫܝܝܶܐ ܐܳܬ݂ܷܢܘܰܐ ܠܝ ܫܟܰܦܬܶܐ ܕܝܰܒܐ. ܐܷܒܰܗ ܚܳܙܶܢܘܰܐ ܚܕ݂ܳܕ݂ܶܐ ܢܳܦܰܠܘܰܐ ܠܶܒܰܝܝܶܗ ܒܷܚܕ݂ܳܕ݂ܶܐ ܐܘ ܡܷܛܠܳܒܝܘܰܐ. ܡܝ ܢܰܩܩܰܐ ܕܢܰܩܝܨܝ ܐܰܡ ܡܫܝܚܳܝܶܐ ܠܐ ܨܷܢܥܰܐ ܦܰܝܶܫ ܠܐ ܚܰܢܰܟܶܐ ܦܰܝܷܫ ܒܝ ܩܪܝܬ݂ܐ. ܐܰܟ ܟܦܰܪܙܳܝܶܐ ܩܰܕܝܪܝ ܕܡܰܘܒܠܝ ܐܰܚ ܚܰܢܰܟܶܐ ܐܰܥܡܰܝܝܶܗ ܠܰܕ ܕܷܟܳܬ݂ܶܐ ܕܰܐܙܙܷܢ܆ ܐܶܠܐ ܐܰܨܨܷܢܥܰܬ ܕܟܷܬܘܰܠܠܶܗ ܡܰܥܠܰܣܰܦ ܠܳܐ ܩܰܕܝܪܝ ܕܡܰܘܒܠܷܢܢܶܗ ܠܰܕ ܕܷܟܳܬ݂ܶܐ ܕܰܐܙܙܷܢ. ܠܐ ܦܰܝܷܫ ܘܠܐ ܚܕ݂ܐ ܨܷܢܥܰܐ ܡܶܐ ܕܷܬ݂ܬ݂ܶܗ ܒܝ ܩܪܝܬ݂ܐ ܣܬܶܐ. ܐܝ ܫܟܰܦܬܶܐ ܕܝܰܒܐ ܣܬܶܐ ܒܝܚܰܪܰܝܬܰܬ݂ܶܐ ܡܰܚܬܝܘܰܐ ܐܘ ܣܰܘܰܠ ܕܷܬ݂ܬ݂ܶܗ ܐܷܒܰܗ ܡܰܠܝܳܘܰܐ ܣܰܪܘܐ. ܐܶܠܐ ܠܰܣ ܣܘܪܳܝܶܐ ܕܦܰܝـܝܫܝ ܡܰܢܕܷܦܰܠܠܶܗ ܗܷܫ ܒܘ ܩܰܝܛܐ ܟܷܐܙܙܷܢ ܟܳܝܷܬܘܝ ܟܳܡܷܙ̰ܕܝ ܪܘܚܰܝܝܶܗ ܒܓܰܘܰܗ ܟܳܡܷܫܬܰܥܷܢ ܒܘ ܣܟܰܡܒܝܠ ܟܳܣܰܝܡܝ ܔܷܒ݁ܰܬܰܬ ܐܶܒܰܗ. ܐܰܕ ܝܰܘܡܰܐ ܣܬܶܐ ܟܠ ܣܘܪܝܳܝܐ ܕܟܷܐܙܙܷܗ ܠܝ ܩܪܝܬܼܐ ܠܰܫܰܢ ܐܘ ܟܪܳܟ݂ܐ ܐܰܘ ܠܝ ܙܝܰܪܰܐ ܕܰܩ ܩܰܕܝܫܶܐ ܡܘ ܚܰܩܰܩ ܟܳܐܒܰܥ ܕܚܳܙܶܠܰܗ܀ ܐܘ ܥܰܡܐ ܕܝ ܩܪܝܬ݂ܐ ܕܷܟܦܰܪܙܶܐ ܠܰܐܪܒܰܥܣܰܪ ܒܰܒ݂ܷܟܰܬ (ܩܰܒܰܝܷܠ) ܦܠܝܓ݂ܳܝܐ ܝܐ. ܟܘܠ ܒܰܒ݂ܷܟ ܟܷܬܘܰܝܠܶܗ ܚܰܐ ܪܝܫܐ ܐܝܢܰܩܰܐ ܕܠܳܙܰܡܘܰܐ ܒܶܫ ܘܶܪܓܝ ܕܝ ܩܪܝܬ݂ܐ ܐܰܘ ܙܝܰܪܰܐ ܠܕܘܟܬ݂ܐ ܐܰܘ ܟ݂ܢܘܫܝܐ ܠܷܬܡܝܘܰܐ ܐܰܪ ܪܝܫܳܢܶܐ ܐܳܒܷܢܘܰܐ ܩܰܪܰܪ. ܫܰܘܥܐ ܡܰܢܝ ܣܘܪܳܝܶܐ ܫܰܘܥܐ ܛܰܝܶܐ ܢܐ. ܒܪܰܗܝܡܟܝܝܶܐ܆ ܣܰܪܷܟܝܝܶܐ܆ ܩܘܙܘܠܝܝܶܐ܆ ܕܘܚܘܟܝܝܶܐ܆ ܫ̰ܷܠܛܷܪܝܝܶܐ܆ ܟܰܪܡܰܟ݂ܰܢܝܝܶܐ܆ ܘܟ݂ܘܰܫ̰ܷܟܝܝܶܐ ܗܰܢܝ ܣܘܪܳܝܶܐ ܢܶܐ. ܒܓܰܘܶܐ ܕܰܒ ܒܰܒܷ݁ܟܰܬܰܢܝ ܣܬܶܐ ܡܰܚܷܬ ܐܷܫܡܳܢܶܐ ܥܰܠܰ ܥܰܝـܝܠܰܬ ܒܘ ܙܳܝܘܕܐ ܟܘܕ ܟܷܬܝܐ ܝܕܝܥܐ ܐܰܟ ܟܦܰܪܙܳܝܶܐ ܡܰܚܰܬܬܶܗ ܥܰܠ ܚܕ݂ܳܕ݂ܶܐ ܐܷܫܡܳܢܶܐ ܕܰܚ ܚܷܝܶܘܷܢ ܕܰܡ ܡܘܟܠܳܢܶܐ. ܟ݂ܘܕ ܒܶܐ ܬܰܥܠܐ܆ ܒܶܐ ܓ݂ܷܙܰܠܐ܆ ܒܶܐ ܩܰܛܘܢܟܐ܆ ܒܶܐ ܒܰܓ݂ܠܐ܆ ܒܶܐ ܕܶܘܐ܆ ܒܶܐ ܓܰܒܪܶܐ܆ ܒܶܐ ܡܰܪܪܶܐ܆ ܒܶܐ ܒܷܣܣܝ܆ ܒܶܐ ܫ̰ܘܦܰ݁ܢܐ܆ ܒܶܐ ܝܰܘܢܷܟܐ܆ ܒܶܐ ܓܰܠܠܶܐ ܚܰܘܷܟܶܐ ܒܶܐ ܡܘܪܶܐ܆ ܒܶܐ ܐܰܦܪܶܡܟܐ܆ ܒܶܐ ܡܰܕܐ܆ ܒܶܐ ܟܘܬܠܐ܆ ܒܶܐ ܔܰܢܓܐ܆ ܒܶܐ ܓ݂ܰܘܰܙ܆ ܒܶܐ ܦܷܪܡܐ܆ ܒܶܐ ܣܛܝܦܐ܆ ܒܶܐ ܟܳܔܰܪܐ܆ ܒܶܐ ܩܰܙܝ܆ ܒܶܐ ܡܷܫܫܝ܆ ܒܶܐ ܓܘܠܕܝ܆ ܒܶܐ ܫܰܡܐ܆ ܒܶܐ ܦ݁ܰܪܷܬܬܝ܆ ܒܶܐ ܒܷܪܪܐ܆ ܒܶܐ ܒܰܪܨܷܟܶܐ܆ ܒܶܐ ܗܷܕܕܐ܆ ܒܶܐ ܟܰܕܐ܆ ܒܐ ܒܰܔܝܝܶܐ܀ ܐܰܫ ܫܰܘܥܐ ܒܰܒ݂ܷܟܰܬ ܕܰܛ ܛܰܝܝܶܐ ܒܶܐ ܚܰܡܟܶܐ܆ ܣܡܰܥܝܠܐ܆ܓܘܪܝ܆ ܟ݂ܰܬܶܐ܆ ܥܰܪܷܦܐ܆ ܟ݂ܰܠܝܠܟܶܐ܆ ܡܘܪܰܬܟܝܝܶܐ ܢܶܐ܀ ܐܰܔ ܬܰܫܷܥܝܳܬ݂ܶܐ ܕܰܟ ܟܦܰܪܙܳܝܶܐ ܓܷܡ ܔܰܪܒܝܢܰܐ ܕܟܷܬ݂ܘܝܢܰܐ ܟܡܐ ܡܰܢܢܶܗ. ܕܷܚܕ݂ܐ ܡܷܢܢܶܗ ܕܟܷܬܝܐ ܓ݂ܰܠܰܒܶܐ ܡܰܫܗܘܪ ܕܰܟ ܟܦܰܪܙܳܝܶܐ ܕܶܡܩܰܬܰܠܠܶܗ ܥܰܡ ܐܘ ܫܺܝܕ݂ܐ. ܟܷܐܡܡܝ ܐܰܬܝ ܒܘܰܟ݂ܬ ܐܘ ܫܝܕܐ ܠܷܟܦܰܪܙܶܐ. ܐܰܟ ܟܦܰܪܙܳܝܶܐ ܡܰܥܒܰܪܪܶܗ ܠܓܰܘܰܗ ܕܝ ܫܟܰܦܬܶܐ ܕܝܰܒܳܐ ܗܘܘܶܗ ܒܐܝܕ݂ܶܗ ܐܘ ܡܰܣܳܣܳܐ ܗܷܢܢܶܐ ܡܷܕܕܶܗ ܠܘ ܕܳܩܘܩܐ ܡܩܰܬܰܠܠܶܗ ܥܰܡ ܚܕܳܕ݂ܶܐ. ܐܝ ܢܰܩܰܐ ܕܰܐܒܷܥ ܕܡܳܚܶܐ ܒܘ ܡܰܣܳܣܳܐ ܡܝܕܰܩܘܰܐ ܒܘ ܩܛܳܪܐ. ܗܷܢܢܶܐ ܡܳܚܝܘܰܝܠܶܗ ܥܠ ܪܝܫܶܗ ܒܘ ܕܳܩܘܩܐ. ܚܷܪܠܶܗ ܡܷܦܬܰܟܰܪܠܶܗ ܐܘ ܫܝܕܐ ܗܰܘܟ݂ܰܐ ܠܐ ܟܳܘܶܐ ܐܰܝܕܰܪܒܐ ܔܷܕ ܩܳܕܰܪܢܐ ܥܰܠܰܢܝ. ܡܷܪܠܶܠܷܢ ܟܝܬ ܚܝܠܰܐ ܒܝ ܩܰܠܰܬ݂ܶܐ ܬܳܟ݂ܘ ܢܷܦܩܝܢܰܐ ܠܰܪܘܰܠ ܡܩܰܬܠܝܢܰܐ. ܐܰܟ ܟܦܰܪܙܳܝܶܐ ܡܰܩܒܰܠܠܶܗ ܡܷܪܰܠܠܶܗ ܒܰܣ ܒܚܰܐ ܫܰܪܬ. ܗܰܘܠܰܢ ܐܘ ܡܰܣܳܣܳܐ ܡܶܕܠܳܟ݂ ܐܘ ܕܳܩܘܩܐ. ܗܝܝܶܐ ܣܬܶܐ ܡܰܩܒܶܠܶܗ. ܢܰܦܝܩܝ ܠܰܪܘܰܠ ܕܶܡܩܰܬܠܝ. ܡܷܕܕܶܗ ܐܘ ܡܰܣܳܣܐ ܗܘܘܰܠܠܶܗ ܐܘ ܕܳܩܘܩܐ ܐܰܒܷܥ ܕܡܳܚܶܐ ܒܘ ܕܳܩܘܩܐ ܗܷܢܢܶܐ ܡܶܐ ܪܘܚܩܐ ܕܘܩܪܝܘܰܝܠܶܗ ܘܡܳܚܷܢܘܰܝܠܶܗ ܒܘ ܡܰܣܳܣܳܐ. ܚܷܪܠܶܗ ܠܷܐܩܰܕܷܪ ܐܰܥܠܰܝܝܶܗ ܛܪܶܠܶܗ ܡܷܢܢܶܗ ܘܰܐܙܙܶܗ܀ ܡܰܘܟܼܰܐ ܐܝܢܰܩܰܐ ܕܢܳܫܐ ܣܘܪܳܝܐ ܕܠܷܐܩܳܕܰܪ ܥܰܠ ܐܰܟ ܟܦܰܪܙܳܝܶܐ ܒܝ ܫܬܰܓ݂ܰܠܝܝܶܐ ܐܰܘ ܒܡܶܕܶܐ ܚܪܶܢܐ ܟܳܐܡܰܪ ܐܘ ܫܝܕܐ ܠܷܐܩܰܕܷܪ ܐܰܥܠܰܝܟ݂ܘ ܡܰܐ ܐܳܢܐ ܓܷܕ ܩܳܕܰܪܢܐ ܐܰܥܠܰܝܟ݂ܘ܀ ܡܰܣܰܠܶܐ ܚܪܶܬܐ: ܟܦܰܪܙܶܐ ܟ݂ܘܕ ܕܡܷܪܠܰܢ ܕܘܟܬ݂ܰܐ ܥܶܠܰܝܬܐ ܝܐ. ܚܰܐ ܝܰܘܡܐ ܚܙܰܠܠܶܗ ܕܟܳܐܬ݂ܶܐ ܚܰܐ ܛܰܝܳܐ ܡܶܐ ܗܰܠܰܟ݂ܶܐ ܐܝ ܩܪܝܬ݂ܐ ܔܝܪܰܢ ܕܷܟܦܰܪܙܶܐ ܟܝܬ ܐܰܥܡܶܗ ܐܰܪܘܳܢܐ. ܡܷܪܪܶܗ ܒܰܝܢ ܚܕ݂ܳܕܶܐ ܬܳܟ݂ܘ ܣܰܝܡܝܢܰܐ ܬܶܫܬܥܶܢܝܐ ܐܶܒܶܗ. ܪܰܕ݂ܷܢ ܥܰܡ ܚܕ݂ܳܕ݂ܶܐ ܐܰܙܙܷܢ ܡܷܪܪܷܗ ܠܘ ܐܰܓ݂ܰܐ ܕܝ ܩܪܝܬ݂ܐ ܫܶܟ݂ܡܽܘܣܳܐ ܕܒܶܐ ܣܡܰܥܝܠܐ ܓܡܰܡܛܝܢܰܐ ܚܰܐ ܠܓܰܒܳܘܟ ܟܣܰܝܡܝܢܰܐ ܗܰܘܟ݂ܰܐ ܡܶܕܶܐ ܐܶܒܶܗ ܕܗܳܘܶܐ ܠܳܟ ܗܰܙ̰ ܐܳܡܰܪ ܬܰܡܰܡ. ܡܩܰܕܰܡܠܶܗ ܐܘ ܙܠܰܡ ܕܪܶܠܶܗ ܫܠܳܡܐ ܐܰܥܠܰܝܝܶܗ ܡܷܪܪܶܗ ܒܫܰܝܢܐ. ܐܳܡܰܪ ܡܰܐ ܠܷܐ ܟܳܫܷܩܠܝܬܽܘ ܐܘ ܐܰܪܘܳܢܰܢܐ ܕܝܕ݂ܝ. ܟܘܠܠܶܗ ܥܰܡ ܚܕ݂ܳܕ݂ܶܐ ܚܷܪܪܶܗ ܐܶܒܶܗ ܡܷܪܰܠܠܶܗ ܟܳܣܰܝܡܰܬ ܚܰܢܰܟ ܕܝܕ݂ܳܘܟ ܐܶܒܰܢ. ܐܳܡܰܪ ܚܰܫܫܰܐ ܕܷܬ݂ܟ݂ܘ ܩܰܝ ܗܰܘܟ݂ܰܐ ܟܷܐܡܡܝܬܘ. ܡܷܪܰܠܠܶܗ ܡܰܡܬܶܠܳܘܟ ܥܝܠܐ ܟܳܓܷܚܟ݂ܰܬ ܐܰܥܠܰܝܢܰܐ ܟܷܐܒܥܰܬ ܕܷܡܙܰܒܢܰܬܠܰܢ ܝܳܐ ܒܕܘܟܬ݂ܶܗ ܕܘ ܐܰܪܘܳܢܐ. ܚܷܪܠܶܗ ܐܘ ܙܠܰܡ ܒܘ ܐܰܪܘܳܢܐ ܦܪܷܟ݂ܠܶܗ ܥܰܝܢܶܐ ܟܳܚܳܝܰܪ ܐܶܒܶܗ ܟܳܐܡܰܪ ܠܪܘܚܶܗ ܗܰܝܡܶܢ ܐܰܪܘܳܢܐ ܝܐ ܒܰܣ ܗܰܢܝ ܟܘܠܠܶܗ ܩܰܝ ܟܷܐܡܡܝ ܥܝܠܐ ܝܐ. ܟܰܠܝ ܡܷܦܬܰܟܰܪܠܶܗ ܐܷܫܡܳܐ ܟܳܐܡܰܪܠܷܢ ܠܐ ܣܰܝܡܝܬܘ ܗܰܘܟ݂ܰܐ ܐܰܚܘܢܳܢܶܐ ܡܝܚܰܣܶܐ ܒܰܒܰܝܟ݂ܘ ܡܰܬܪܶܟܘ ܐܰܦܢܰܣܟܰܬܰܢܝ ܕܷܬ݂ܟ݂ܘ ܡܰܐ ܠܷܐ ܟܳܚܳܙܝܬܘ ܐܰܪܘܳܢܐ ܝܐ ܠܰܬܝܐ ܥܝܠܐ. ܕܝܣܰܐ ܟܘܠܠܶܗ ܡܰܕܥܰܪܪܶܗ ܟܷܐܡܡܝܠܶܗ ܗܰܬ ܬܰܢܶܐ ܟܷܐܡܡܰܬ ܐܘ ܫܪܳܪܐ ܐܰܚܢܰܐ ܟܘܠܰܢ ܟܷܡܕܰܓܠܝܢܰܐ܆ ܠܐ. ܐܝܕ݂ܰܐ ܠܷܐ ܟܳܡܷܬܝܰܩܢܰܬܠܰܢ ܕܟܷܬܝܐ ܥܝܠܐ ܬܳܘܟ݂ ܕܷܐܙܙܰܢ ܠܓܰܒܘ ܐܰܓ݂ܰܐ ܡܫܰܝܠܝܢܰܐ ܠܶܗ ܚܰܝܪܝܢܰܐ ܒܶܐ ܡܷܢ ܓܕܳܐܡܰܪ ܚܳܙܝܢܰܐ ܒܶܐ ܥܝܠܐ ܝܐ ܐܰܘ ܐܰܪܘܳܢܐ ܝܐ. ܐܘ ܦܰܩܝܪܐ ܡܫܰܘܰܫܫܶܗ ܐܰܙܙܶܗ ܐܰܥܡܰܝܝܶܗ ܡܰܛܷܢ ܠܓܰܒܘ ܐܰܓ݂ܰܐ ܡܷܪܪܶܗ ܫܠܳܡܐ ܝܰܐ ܐܘ ܐܰܓ݂ܰܝܕ݂ܰܢ܇ ܡܰܕܥܰܪܠܶܗ ܒܫܰܝܢܐ ܐܘ ܐܰܓ݂ܰܐ܆ ܐܳܡܰܪ ܟ݂ܶܪܝܐ ܗܰܘܟ݂ܰܐ ܐܰܬ݂ܝܬܘ. ܡܰܕܥܰܪܪܶܗ ܟ݂ܶܪܝܐ ܕܗܳܘܰܬܠܰܢ ܣܰܓ݂ ܗܰܝܡܶܢ ܐܘ ܙܠܰܡܰܢܐ ܡܰܡܛܶܠܶܗ ܥܝܠܐ ܕܷܡܙܰܒܰܢܠܶܗ ܐܶܠܰܢ ܘܟܳܐܡܰܪܠܰܢ ܐܰܪܘܳܢܐ ܝܐ ܡܷܩܩܰܐ ܕܡܷܪܠܰܢܠܶܗ ܥܝܠܐ ܝܐ ܠܐ ܡܷܬܝܰܩܰܢܠܶܗ ܠܰܢ ܡܰܘܟ݂ܰܐ ܐܰܒܝܥܝܢܰܐ ܕܳܐܬ݂ܝܢܰܐ ܠܓܰܒܳܘܟ ܠܝ ܫܰܪܝܥܰܐ. ܚܷܪܠܶܗ ܐܰܦ݁ܦ݁ܶܗ ܩܚܷܪܠܶܗ ܪܘܚܶܗ ܐܳܡܰܪ ܠܰܫܰܢ ܗܰܘܟ݂ܰܐ ܐܰܬ݂ܝܬܘ ܠܓܰܒܝ ܗܶܫ ܠܐ ܟܳܩܘܕܪܝܬܘ ܕܦܷܪܫܝܬܘ ܐܘ ܐܰܪܘܳܢܐ ܡܘ ܥܝܠܐ. ܡܷܪܰܠܠܶܗ: ܝܰܐ ܐܰܓ݂ܰܐ ܐܰܚܢܰܐ ܣܬܶܐ ܟܷܐܡܡܝܢܰܠܶܗ ܥܝܠܐ ܝܐ ܒܰܣ ܐܘ ܙܠܰܡ ܠܷܐ ܟܳܡܷܬܝܰܩܰܢ ܟܳܐܡܰܪ ܠܐ ܐܰܪܘܳܢܐ ܝܐ. ܐܘ ܐܰܓ݂ܰܐ ܣܬܶܐ ܡܷܪܠܶܗ ܐܘ ܟ݂ܰܒܪܰܬ݂ܬ݂ܶܗ ܡܷܪܠܶܗ ܠܶܗ ܦܠܰܢܟܰܣ ܡܷܕ ܐܘ ܥܝܠܰܝܕ݂ܘܟ ܙܳܘܟ ܠܘ ܒܰܝܬܰܝܕܘܟ݂. ܐܘ ܙܠܰܡ ܡܫܰܘܰܫ ܒܷܚܕܐ ܢܰܩܰܐ ܒܷܬ݂ܷܪ ܡܶܐ ܕܘ ܐܰܓ݂ܰܐ ܣܬܶܐ ܕܟܳܐܡܰܪ ܥܝܠܐ ܝܐ ܡܰܩܒܶܠܶܗ ܕܟܷܬܝܳܐ ܥܝܠܐ. ܡܷܪܠܶܗ ܐܳܢܐ ܡܷܪܠܝܠܰܗ ܠܝ ܐܰܬ݂ܬܰܝܕ݂ܝ ܡܳܦܰܩ ܐܘ ܐܰܪܘܳܢܐ ܗܝܝܰܐ ܡܳܦܰܩܠܰܠܝ ܐܘ ܥܝܠܐ. ܗܘܠ ܕܷܐܙܙܝܢܐ ܠܘ ܒܰܝܬܐ ܕܳܐܡܰܪܢܐ ܠܰܗ . ܐܰܙܙܶܗ ܐܘ ܦܰܩܝܪܐ ܠܘ ܒܰܝܬܐ ܡܫܰܘܫܐ ܩܚܝܪܳܝܐ ܘܟ݂ܰܠܝܐ. ܟܷܐܡܡܝ ܡܚܶܠܶܗ ܠܝ ܐܰܬ݂ܬܐ ܡܷܪܠܶܠܰܗ ܐܳܢܐ ܡܷܪܠܝܠܰܟ ܡܳܦܰܩ ܐܘ ܐܰܪܘܳܢܐ ܗܰܬ ܗܽܘܠܰܟ ܠܝ ܐܘ ܥܝܠܐ. ܗܘܠ ܕܡܰܦܗܰܡܠܰܗ ܐܝ ܦܰܩܷܪܬܐ ܕܝ ܐܰܬ݂ܬܐ ܕܰܐܪܘܳܢܐ ܝܐ ܠܰܬܝܐ ܥܝܠܐ ܐܰܟ݂ܝܠܰܗ ܐܘ ܡܰܚܝܰܝܕܰܗ ܛܰܘܘܐ܀ ܒܝ ܩܪܝܬ݂ܐ ܕܷܟܦܰܪܙܶܐ ܗܘܠ ܐܝ ܫܰܬܐ ̇1600 ܠܰܬܘܰܐ ܐܶܒܰܗ ܛܰܝܶܐ ܟܘܠܰܗ ܡܠܝܬ݂ܐ ܡܘ ܥܰܡܐ ܣܘܪܝܳܝܐ ܘܰܐ. ܒܷܬ݂ܷܪ ܡܰܢ ܐܷܫܢܰܢܝ ܟܡܳܐ ܥܰܝܺܝܠܰܬ ܛܰܝܝܶܐ ܐܰܬܼܷܢ ܥܰܒܝܪܝ ܦܰܝܺܝܫܝ ܒܝ ܩܪܝܬ݂ܐ. ܒܝ ܫܰܬܐ 1870 ܬܪܶܐ ܕܰܝܪܳܝܶܐ ܕܡܰܠܬܰܡܶܘܰܐ ܐܝ ܠܰܡܡܶܐ ܕܝ ܦܰܛܷܪܝܰܪܟ݂ܘܬ݂ܐ ܡܰܚܘܰܠܠܶܗ. 45 ܒܳܬܶܐ ܣܘܪܝܳܝܶܐ ܕܗܘܘܶܗ ܠܰܡܡܶܐ ܠܝ ܦܰܛܷܪܝܰܪܟ݂ܘܬ݂ܐ. ܗܘܠ ܠܝ ܫܰܬܳܐ ܕܘ ܣܰܝܦܐ ܐܝ ܩܪܝܬ݂ܐ ܒܘ ܙܳܝܘܕܰܝܕ݂ܰܗ ܣܘܪܝܳܝܶܐ ܡܫܝܚܳܝܶܐ ܘܰܝܢܶܐ. ܐܰܣ ܣܰܒܰܒܶܐ ܕܰܐܕܝܰܘܡܰܐ ܕܢܰܩܺܝܨܺܝ ܐܶܒܰܗ ܐܰܣ ܣܘܪܝܳܝܶܐ ܐܘ ܣܰܝܦܐ ܝܐ. ܐܰܩ ܩܰܛܠܶܐ ܕܗܰܘܷܢ ܒܷܬ݂ܷܪ ܡܘ ܣܰܝܦܐ ܢܶܐ. ܡܷܩܩܰܐ ܕܗܰܘܝ ܩܰܛܠܐ ܐܰܘ ܗܔܳܡܐ ܐܶܒܰܗ ܢܰܦܷܩ ܟܡܐ ܥܰܝܺܝܠܰܬ ܡܝܢܰܗ. ܐܘܥܕܐ ܓܷܕ ܟܷܬ݂ܘܝܢܰܐ ܟܡܐ ܡܷܢܢܶܗ. ܡܶܩܷܡ ܡܘ ܣܰܝܦܐ ܐܝ ܫܰܬܐ 1901 ܝܘܡܶܗ ܕܚܘܫܰܒܐ ܒܨܰܦܪܐ ܗܶܫ ܐܘ ܥܰܡܐ ܒܓܰܘܰܗ ܕܝ ܨܠܘܬܐ ܡܨܰܠܶܘܰܐ ܗܰܔܝܡܝ ܐܰܛ ܛܰܝܝܶܐ ܕܒܶܐ ܣܡܰܥܝܠܐ ܥܰܠ ܐܝ ܥܝܬܐ ܕܡܳܪܝ ܥܙܳܙܳܐܝܠ. ܠܘ ܥܰܡܐ ܣܟ݂ܷܪܠܶܗ ܐܰܬ ܬܰܪܥܶܐ ܕܝ ܥܝܬܐ. ܒܶܐ ܣܡܰܥܝܠܐ ܬܘܷܪܪܶܗ ܐܰܬ ܬܰܪܥܶܐ. ܒܘ ܙܳܪ ܡܰܘܒܰܠܶܗ ܐܘ ܡܰܕܳܐ ܐܘ ܡܰܪܰܘܓܶܐ ܥܰܡܡܐ ܒܪܰܙܝ ܡܝ ܥܰܝܺܝܠܰܐ ܕܒܶܐ ܟ݂ܘܰܔܰܐ. ܠܢܰܘܰܠܰܐ ܒܰܩܶܐ ܕܟܷܬܝܐ ܩܰܪܷܘܬܐ ܠܟ݂ܰܢܷܟܰܐ ܐܝ ܩܪܝܬ݂ܐ. ܬܰܡܐ ܩܛܷܠܠܶܗ ܐܘ ܡܰܕܐ. ܒܰܣ ܐܘ ܡܰܪܰܘܓܶܐ ܒܫܷܟܷܠ ܡܶܕܶܐ ܡܰܟ݂ܠܰܨܠܶܗ ܡܶܐ ܐܝܕ݂ܰܝܝܶܗ. ܥܰܠ ܕܟܷܬܘܰܐ ܥܠܰܝܡܐ ܡܰܗܙܰܡܠܶܗ ܠܟ݂ܰܢܷܟܰܐ ܐܝ ܩܪܝܬܐ ܥܰܒܷܪ ܠܒܰܝܬܐ ܚܰܐ ܫ̰ܝܟ ܒܘ ܒܰܟ݂ܬܐ ܕܝ ܕܰܪܓܷܫܬܰܬ݂ܶܐ ܒܘ ܫܷܟܷܠܰܢܳܐ ܡܰܟ݂ܠܰܨܠܶܗ ܡܶܐ ܐܝܕ݂ܰܝܝܶܗ܀ܐܝ ܫܰܬܐ ܕܘ ܣܰܝܦܐ ܐܝ ܩܪܝܬ݂ܐ ܟ݂ܰܠܝܐ ܡܰܡ ܡܫܝܚܳܝܶܐ. ܗܷܢ ܡܘ ܥܰܡܐ ܐܰܙܙܷܢ ܠܥܝܘܰܪܕܳܐ ܘܗܷܢ ܡܷܢܢܶܗ ܐܰܙܙܷܢ ܠܰܩ ܩܷܪܝܰܘܳܬ݂ܶܐ ܕܚܶܕ݂ܳܪܰܝܝܶܗ. ܠܟܰܡܡܶܐ܆ ܠܗܰܠܰܟ݂ܶܐ ܓܰܒܰܐ ܟܪܝܒ݂ܝܢ ܕܷܬ݂ܬ݂ܶܗ ܐܛ ܛܰܝܝܶܐ. ܐܘ ܒܰܒܳܐ ܕܔܷܕܕܝ ܐܘ ܔܷܪܔܐ ܕܒܶܐ ܕܰܘܳܐ ܗܝܝܶܐ ܣܬܶܐ ܐܰܙܙܶܘܰܐ ܠܗܰܠܰܟ݂ܶܐ ܓܰܒܰܐ ܟܪܝܒ݂ܝܢ ܕܝܕ݂ܶܗ ܕܟܷܐܡܡܷܢܢܶܗ ܡܰܠܰܐ ܣܝܢܐ܀ ܬܪܶܐ ܡܷܕܳܢܶܐ ܓܶܕܫܶܐ ܕܔܰܪܷܢ ܒܘ ܣܰܝܦܐ ܒܝ ܩܪܝܬ݂ܐ ܕܷܟܦܰܪܙܶܐ ܫܰܡܷܥܘܰܝܢܷܢܶܗ ܡܰܣ ܣܳܘܶܐ ܐܘܥܕܐ ܡܫܰܝܠܝܠܝ ܡܶܐ ܚܰܢܢܰܐ ܕܶܘܐ܀ ܐܝ ܢܰܩܰܐ ܕܷܒܕܷܠܶܗ ܐܘ ܣܰܝܦܐ ܒܝ ܩܪܝܬ݂ܐ ܕܷܟܦܰܪܙܶܐ ܨܷܕܕܶܗ 72 ܢܰܦܫܳܬ݂ܶܐ ܕܰܟܦܰܪܙܳܝܶܐ ܪܰܒܶܐ ܢܰܥܝܡܶܐ ܢܝܫܶܐ ܓܰܘܪܶܐ ܒܝ ܩܪܝܬ݂ܐ ܡܰܘܒܠܢܷܢܶܗ ܠܝ ܫܟܰܦܬܶܐ ܕܘ ܚܶܒܝܣ ܚܰܐ ܡܷܢܢܶܗ ܕܟܷܬܘܰܐ ܩܰܫܐ ܨܰܦܰܪ. ܡܷܐ ܕܫܰܡܝܥܝ ܒܥܝܘܰܪܕܐ ܐܘ ܡܶܕܰܢܐ ܠܰܓ ܓܰܘܪܶܐ ܕܒܶܐ ܟܘܰܔܰܐ ܘܗܷܢ ܡܰܣ ܣܘܪܝܳܝܶܐ ܕܟܷܬܘܰܝܢܶܐ ܒܥܝܘܰܪܕܐ ܡܚܰܠܰܩܩܶܗ ܥܰܠ ܕܶܪ ܡܘܣܟܶܐ ( ܕܰܝܪܐ ܕܡܳܪܝ ܡܘܫܶܐ ) ܡܷܕܕܶܗ ܐܘ ܛܰܪܫ ܕܷܬ݂ܬ݂ܶܗ ܟܘܠܶܗ ܩܛܷܠܠܶܗ ܬܪܶܐ ܣܰܝܝܕܝܢ ܬܰܡܐ. ܡܰܘܒܰܠܠܶܗ ܐܰܥܡܰܝܝܶܗ ܠܣܰܝܺܝܕ ܥܰܒܕܐ ܐܘ ܐܰܡܳܟܶܐ ܐܝ ܚܳܬ݂ܳܐ ܕܥܰܒܕܷܠܪܰܚܡܰܢ ܕܒܶܐ ܟ݂ܰܠܳܐ ܟܦܰܪܙܳܝܐ ܠܥܝܘܰܪܕܐ. ܡܫܰܕܰܪܰܠܠܶܗ ܟ݂ܰܒܪܐ ܡܷܪܰܠܠܶܗ ܕܳܐܬ݂ܶܐ ܐܰܡ ܡܫܝܚܳܝܶܐ ܕܟܷܬܢܶܐ ܐܶܣܝܪ ܓܰܒܰܝܟ݂ܘ ܕܡܷܩܛܳܠܝ܆ ܐܰܚܢܰܐ ܣܬܶܐ ܓܷܕ ܩܷܛܠܝܢܰܐ ܚܳܬ݂ܳܘܟ ܘܟ݂ܘܰܪܙܰܝܕ݂ܳܟ. ܩܰܝܷܡ ܥܰܒܕܷܠܪܰܚܡܰܢ ܡܷܕܠܷܗ ܐܝ ܬܦܷܢܓܰܝܕ݂ܶܗ ܐܰܙܙܶܗ ܠܘ ܚܶܒܝܣ ܚܷܪܠܶܗ ܟܶܠܶܗ ܐܘܣܘܦܟܶܐ ܙܳܪܶܟ ܟܷܡܔܰܪܰܒ ܒܶܐ ܐܝ ܬܦܷܢܓܰܝܕ݂ܶܗ ܟܡܐ ܓܟ݂ܷܪܡܐ. ܥܰܒܕܷܠܪܰܚܡܰܢ ܕܒܶܐ ܟ݂ܰܠܐ ܡܰܚܰܬܠܶܗ ܐܝ ܬܦܷܢܓܶܐ ܒܩܰܪܥܶܗ ܡܷܪܠܶܠܶܗ ܕܷܡܫ̰ܰܠܦܰ݁ܬ ܐܝ ܬܦܷܢܓܰܝܕ݂ܳܘܟ ܓܷܕ ܩܳܛܰܠܢܳܘܟ݂. ܡܷܕܠܶܗ ܐܰܬ ܬܰܪܬܶܐ ܫܰܘܥܝ ܢܰܦܫܳܬ݂ܰܢܷܟ ܡܰܘܒܠܝܠܶܗ ܠܥܝܘܰܪܕܐ ܡܰܣܷܠܡܝܠܶܗ ܠܰܡ ܡܫܝܚܳܝܶܐ ܕܥܝܘܰܪܕܳܐ ܗܷܢܢܶܐ ܣܬܶܐ ܡܰܣܠܰܡܰܠܠܶܗ ܐܝ ܚܳܬ݂ܐ ܐܘ ܟ݂ܘܰܪܙܰܝܕ݂ܶܗ. ܩܰܫܬܝ ܡܰܩܣܝܝܶܐ ܣܰܝܕܶܐ ܟܘܠ ܢܰܩܩܰܐ ܐܷܡܳܘܰܝܠܰܢ ܐܘܣܘܦܟܶܐ ܙܳܪܷܟ ܩܛܝܠܶܗ ܒܰܒܝ. ܗܰܢܐ ܩܛܝܠܶܗ ܓ݂ܰܠܰܒܶܐ ܡܫܝܚܳܝܶܐ ܒܘ ܣܰܝܦܐ ܒܷܬ݂ܷܪ ܡܘ ܣܰܝܦܐ ܣܬܶܐ. ܗܰܢܐ ܥܰܒܕܷܠܪܰܚܡܰܢ ܕܒܶܐ ܟ݂ܰܠܐ ܙܠܰܡ ܡܳܪܷܗ ܕܣܳܙܘܰܐ ܡܰܟ݂ܠܰܨܘܰܝܠܶܗ ܒܘ ܣܰܝܦܐ ܟܡܐ ܢܰܥܝܡܶܐ ܕܰܣ ܣܘܪܝܳܝܶܐ ܬܠܝܘܰܝܠܶܗ ܓܰܒ ܪܘܚܶܗ ܗܰܘܝܠܶܢ ܡܳܪܐ ܗܘܠ ܕܬܰܝܶܡ ܐܘ ܣܰܝܦܐ ܡܰܣܷܠܡܝܠܶܗ ܠܰܡ ܡܳܪܰܬ݂ܬ݂ܶܗ. ܐܰܢ ܢܰܥܝܡܶܐ ܕܒܶܐ ܡܷܪܙܰܟܶܐ ܘܰܝܢܶܐ܀ ܡܰܣܰܠܶܐ ܚܪܶܬܐ ܕܔܰܪܝܐ ܒܘ ܣܰܝܦܐ ܒܷܟܦܰܪܙܶܐ. ܐܘ ܕܰܢܚܐ ܕܒܶܐ ܫ̰ܘܦܰ݁ܢܐ ܐܘ ܟܷܪܝܒ݂ ܕܒܶܐ ܣܡܰܥܝܠܳܐ ܘܰܐ ܟ݂ܰܝܷܦܘܰܐ ܐܷܫܡܐ ܐܘ ܣܰܝܦܐ ܡܫܰܕܰܪܰܠܠܶܗ ܟ݂ܰܒܪܐ ܕܳܐܬ݂ܶܐ ܠܝ ܩܪܝܬ݂ܐ ܗܝܝܶܐ ܣܬܶܐ ܡܷܬܝܰܩܰܢܠܶܠܷܢ ܠܐܝܡܰܢܰܬ ܕܝܡܰܠܰܠܶܗ ܠܝ ܩܰܪܝܘܽܘܬ݂ܐ ܕܟܷܬܘܰܐ ܒܰܝܢܳܬ݂ܰܝܝܶܗ ܐܰܬ݂ܝ ܠܝ ܩܪܝܬ݂ܐ ܐܰܟ ܟܪܝܒ݂ܝܢ ܕܝܕ݂ܶܗ ܐܰܬ݂ܶܢ ܠܶܗ ܒܝ ܚܝܠܶܐ ܥܰܒܝܪܝ ܠܓܰܘܶܗ ܕܘ ܒܰܝܬܐ ܒܝ ܚܰܘܪܘܬ݂ܐ ܒܝ ܟܷܪܒ݂ܰܬܝܝܶܐ ܕܟܷܬܘܰܝܠܷܢ ܥܰܡ ܚܕ݂ܳܕ݂ܶܐ ܗܘܠ ܕܡܰܡܛܰܠܠܶܗ ܐܰܥܠܶܗ ܕ݂ܰܪܒܐ ܒܝ ܟ݂ܝܶܢܶܐ ܩܛܷܠܠܶܗ ܗܝܝܶܐ ܘܐܝ ܐܰܬ݂ܬܐ. ܐܰܢ ܢܰܥܝܡܰܝܕ݂ܶܗ ܒܥܝܔܷܢܢܶܗ ܒܝ ܟܰܗܕܝܢܶܐ ܕܘ ܬܰܘܢܐ. 23 ܢܰܦܫܳܬ݂ܶܐ ܩܛܝܠܷܢܢܶܗ ܡܚܰܠܩܷܢܢܶܗ ܠܘ ܓܘܒܐ ܕܒܶܐ ܓܘܠܕܝ܀ ܐܝ ܡܰܣܰܠܰܬ݂ܶܐ ܫܰܡܷܥܢܳܠܰܗ ܡܰܣ ܣܳܘܶܐ ܐܘܥܕܐ ܡܫܰܝܠܳܠܝ ܡܶܐ ܚܰܢܢܰܐ ܕܶܘܐ. ܒܘ ܣܰܝܦܐ ܐܘ ܚܰܐ ܕܩܰܕܷܪ ܡܰܗܙܰܡܠܶܗ ܠܥܝܘܰܪܕܐ. ܒܰܣ ܓ݂ܰܠܰܒܶܐ ܢܳܫܶܐ ܠܷܐܩܰܕܝܪܝ ܕܡܰܗܷܙܡܝ ܡܣܝܟܝ ܒܐܝܕܳܬ݂ܶܗ ܕܰܛ ܛܰܝܶܐ. ܚܕ݂ܳܐ ܡܰܢܝ ܕܠܐ ܩܰܕܝܪܐ ܕܡܰܗܷܙܡܐ ܐܝ ܡܶܪܰܡܶܐ ܕܒܶܐ ܗܷܢܕܳܟܶܐ ܝܐ. ܒܘ ܣܰܝܦܐ ܩܛܷܠܠܶܗ ܐܰܬ ܬܪܶܐ ܐܰܚܘܢܳܢܰܝܕ݂ܰܗ ܐܘ ܚܰܢܢܰܐ ܐܘ ܫ̰ܰܠܐ ܥܰܠ ܐܝ ܩܰܠܬܐ ܕܒܶܐ ܟ݂ܘܰܔܰܐ. ܛܰܝܽܘܒܟܳܐ ܕܒܶܐ ܣܡܰܥܝܠܐ ܨܷܕܠܶܗ ܗܰܬ݂ܶܐ ܥܰܠ ܕܟܷܬܘܰܐ ܓ݂ܰܠܰܒܶܐ ܫܰܦܷܪܬܐ ܠܐ ܩܛܝܠܳܠܶܗ ܘܟܷܬܘܰܝܠܰܗ ܒܰܪܬ݂ܐ ܕܬܰܪܬܶܐ ܐܷܫܢܶܐ ܣܬܶܐ ܐܰܥܡܰܗ. ܦܰܝܝܫܐ ܟܝܒܶܐ ܥܶܣܪܝ ܝܰܘܡܶܐ ܓܰܒܶܗ. ܚܰܐ ܝܰܘܡܐ ܐܝ ܐܰܬ݂ܬܳܐ ܕܛܰܝܘܒܟܐ ܐܝ ܛܰܝܰܝܬܐ ܡܷܪܠܰܗ ܠܝ ܡܶܪܰܡܶܐ ܟܰܠܶܐ ܐܰܙܙܶܗ ܢܰܦܷܩ ܠܝ ܨܠܘܬ݂ܐ ܡܷܕ ܐܝ ܟܰܕܘܢܶܐ ܕܰܡ ܡܰܝܶܐ ܙܰܟ ܕܡܰܡܛܰܬ ܡܰܝܶܐ ܡܘ ܓܘܒܐ ܕܠܰܪܘܰܠ ܡܝ ܩܪܝܬ݂ܐ ܡܷܐ ܬܰܡܐ ܙܰܟ ܡܰܗܙܰܡ ܠܥܝܘܰܪܕܐ ܗܰܬ ܘܐܘ ܫܰܢܨܰܝܕܰܟ݂. ܢܰܦܝܩܐ ܡܘ ܒܰܝܬܐ ܒܷܬ݂ܷܪ ܒܠܐ ܡܶܕܶܐ ܐܰܬ݂ܝ ܐܘ ܙܠܰܡ ܠܘ ܒܰܝܬܐ ܡܫܰܝܶܠܶܗ ܠܝ ܐܰܬ݂ܬܐ ܐܰܝܟܳܐ ܝܐ ܐܝ ܡܶܪܰܡܶܐ ܡܰܕܥܰܪܠܰܗ ܩܰܝ ܐܝ ܢܳܛܷܪܬܐ ܕܝ ܡܶܪܰܡܶܐ ܢܐ. ܐܰܙܙܰܗ ܕܡܰܡܛܐ ܡܰܝܶܐ. ܦܰܗܷܡ ܕܡܰܗܙܰܡܠܰܗ ܡܷܕܠܶܗ ܐܝ ܟ݂ܰܢܔܰܪܰܝܕ݂ܶܗ ܐܰܙܙܶܗ ܒܷܬ݂ܪܰܗ. ܡܰܛܝ ܠܘ ܛܘܪܐ ܕܘ ܗܰܣ݁ܜܰܡ ܚܷܙܝܳܠܶܗ ܟܰܠܟܐ ܢܰܚܝܬܐ ܠܘ ܫܰܠܘܐ ܪܰܗܷܛ ܒܷܬ݂ܪܰܗ ܟܡܰܚܘܶܐ ܒܛܰܥܢܳܘܰܐ ܐܝ ܦܰܩܷܪܬܐ ܥܰܠ ܕܟܷܬܘܰܐ ܩܰܝܛܐ ܚܶܡܐ ܒܰܛܝܠܐ ܠܰܘ ܩܰܕܝܪܐ ܥܰܠ ܐܝ ܒܰܪܬ݂ܐ ܕܛܷܥܢܳܠܰܗ ܛܪܝܳܠܰܗ ܬܰܡܐ ܪܰܗܝܛܐ. ܡܰܛܝ ܠܝ ܒܰܪܬ݂ܐ ܩܪܶܠܶܠܰܗ ܡܶܪܰܡܶܐ ܕܥܰܪܝܐ ܣܳܙ ܐܰܥܡܰܟ̣ ܥܰܡ ܐܰܠܳܗܐ ܠܷܐܓܩܳܛܰܠܢܐ ܐܝ ܒܰܪܬ݂ܰܝܕ݂ܰܟ݂. ܡܷܪܠܰܠܶܗ ܩܛܰܠܰܗ ܓܷܐܙܙܰܗ ܓܰܒ ܡܫܝܚܐ. ܫ̰ܷܟܠܶܗ ܐܘ ܣܰܝܦܐ ܒܓܰܘܰܗ ܡܰܥܠܳܠܶܗ ܠܝ ܗܰܘܰܐ ܡܗܰܘܰܪܠܶܗ ܡܶܪܰܡܶܐ ܕܥܰܪܝܐ ܟܳܝܳܡܶܢܐ ܠܰܟ݂̣ ܠܷܐܟܣܳܡܢܐ ܡܶܕܶܐ ܐܶܒܰܟ݂̣. ܠܷܐܡܰܨܬ݂ܠܰܗ ܐܰܥܠܶܗ ܡܩܰܪܰܘܠܰܗ ܠܥܝܘܰܪܕܐ ܕܪܶܠܰܗ ܗܰܘܰܪ ܥܰܠܰ ܐܰܣ ܣܘܪܳܝܶܐ. ܐܰܢܰ ܐܰܚܘܢܳܢܰܝܕ݂ܰܗ ܐܷܡܡܝ ܗܰܢܐ ܐܘ ܚܷܣ ܕܝ ܡܶܪܰܡܶܐ ܝܐ. ܢܰܦܝܩܝ ܠܩܰܡܘܬ݂ܰܗ ܡܝܕܰܠܠܶܗ ܡܰܟ݂ܠܨܠܶܗ ܡܶܐ ܐܝܕܳܬ݂ܶܗ ܕܘ ܛܰܝܐ܀ ܒܷܬ݂ܷܪ ܡܶܐ ܕܬܰܝܷܡ ܐܘ ܣܝܦܐ ܒܕܶܠܶܗ ܗܷܢ ܡܘ ܥܰܡܐ ܕܕܳܥܰܪ ܠܝ ܩܪܝܬܼܐ. ܘܗܷܢ ܡܷܢܢܶܗ ܦܰܝܷܫܝ ܒܡܷܕܝܰܕ ܘܒܰܩ ܩܷܪܝܰܘܳܬ݂ܳܐ ܚܪܶܢܶܐ. ܐܘ ܥܡܐ ܣܘܪܝܳܝܐ ܕܕܰܥܷܪ ܠܝ ܩܪܝܬ݂ܐ ܒܕܶܠܶܗ ܢܰܩܩܰܐ ܚܪܶܬܐ ܕܡܰܪܟܰܘܠܶܗ ܚܰܝܶܐ ܚܰܬ݂ܶܐ. ܕܡܰܥܡܰܪ ܐܰܕ ܕܷܟܳܬ݂ܶܐ ܕܚܰܪܝܘܝ ܟ݂ܕܰܐ ܥܝܬܳܬ݂ܶܐ ܘܐܰܒ ܒܳܬܰܝܕ݂ܶܗ. ܐܝ ܥܝܬܐ ܕܡܳܪܝ ܥܙܳܙܳܐܺܝܠ ܥܰܡ ܓܰܒܰܗ ܡܳܪܝ ܫܰܠܝܛܐ ܥܝܬܐ ܪܰܒܬ݂ܐ ܘܥܰܬܷܩܬܐ ܕܥܰܡܝܪܐ ܒܘ ܕܳܪܐ ܕܰܚ ܚܰܡܫܐ. ܒܝ ܫܰܬܐ ܕܘ ܣܰܝܦܐ ܡܰܕܪܰܠܠܶܗ ܐܘ ܩܛܳܪܰܝܕ݂ܰܗ ܘܡܰܢܗܰܒܒܶܗ ܐܘ ܡܶܕܶܐ ܕܟܝܬܘܰܐ ܒܓܰܘܰܗ ܡܰܘܩܰܕ݂ܕ݂ܶܗ ܐܰܟ ܟܬ݂ܳܘܰܝܕ݂ܰܗ. ܐܘ ܡܶܕܶܐ ܕܦܰܝܶܫ ܥܰܬܝܩܐ ܒܐܝܕ݂ܰܝܢܰܐ ܐܘ ܡܓܰܠܝܘܢ܆ ܘܐܝ ܝܰܡܝܢܐ ܕܡܳܪܝ ܥܙܳܙܳܐܺܝܠ ܢܶܐ. ܐܘ ܡܓܰܠܝܘܢ ܕܡܪܝ ܥܙܳܙܳܐܝܠ ܣܬܶܐ ܐܘ ܔܝܪܰܢ ܕܝ ܥܝܬܐ ܚܰܐ ܡܰܛ ܛܰܝܶܐ ܕܝ ܩܪܝܬܼܐ ܡܝ ܥܰܝܺܝܠܰܐ ܕܰܡ ܡܘܪܰܬܟܝܝܶܐ ܐܝ ܢܰܩܠܰܐ ܕܷܒܕܶܠܶܗ ܐܘ ܣܰܝܦܐ ܒܫܷܟܷܠ ܡܶܕܶܐ ܡܷܕܠܶܗ ܡܶܐ ܓܰܘܰܗ ܕܝ ܥܝܬܐ ܐܘ ܬܠܶܠܶܗ ܒܘ ܒܰܝܬܐ ܓܰܒܶܗ ܗܘܠ ܕܕܰܥܷܪ ܐܘ ܥܰܡܐ ܠܝ ܩܪܝܬܼܐ ܡܰܣܠܰܡܠܶܠܷܢ ܝܐ. ܒܷܬ݂ܷܪ ܡܘ ܣܰܝܦܐ ܐܝ ܫܱܬܐ ܕܰܢ ܘ1936 ܢܰܩܩܰܐ ܚܪܶܬܐ ܠܘ ܥܰܡܐ ܕܝ ܩܪܝܬ݂ܐ ܩܛܷܪܠܗ ܐܘ ܩܛܳܪܰܝܕ݂ܰܗ ܡܶܐ ܚܰܬ݂ܐ. ܘܒܝ ܫܰܬܐ ܕܰܢ 1998 ܡܰܥܡܰܪܪܶܗ ܐܰܫ ܫܘܪܳܢܶܐ ܕܝ ܕܷܪܬܰܝܕ݂ܰܗ ܘܚܶܕ݂ܳܪܰܗ ܕܝ ܥܝܬܐ ܡܶܐ ܠܰܪܘܰܠ. ܒܰ 2007 ܩܠܷܦܦܶܗ ܐܝ ܨܝܘܰܐ ܕܠܰܘܓ݂ܷܠ ܕܝܕ݂ܰܗ ܡܚܰܕܰܬ݂ܬ݂ܶܗ ܐܰܫ ܫܘܪܳܢܶܐ ܐܘ ܔܰܪܝܰܢ ܘܓܰܘܰܗ ܟܘܠܶܗ. ܒܘ ܣܰܝܦܐ ܟܷܬܘܰܐ ܐܶܒܰܗ ܬܠܳܬ݂ܐ ܟܳܗܢܶܐ ܩܰܫܐ ܓܰܘܪܝܶܐ ܩܛܝܠ ܒܘ ܣܰܝܦܐ ܒܝ ܩܪܝܬ݂ܐ܀ ܘܩܰܫܐ ܓܶܘܰܪܓܝܣ ܐܘ ܒܰܒܐ ܕܟ݂ܘܪܝ ܢܶܥܡܰܢ ܐܰܝܕܝܢ ܒܷܬ݂ܪ ܡܘ ܣܰܝܦܐ ܥܰܡ ܐܝ ܐܝܩܰܪܬ݂ܐ ܐܰܙܙܶܗ ܦܰܝܷܫ ܒܡܶܕ݂ܝܰܕ܀ ܘܩܰܫܐ ܝܘܚܰܢܷܢ ܡܫܰܡܰܫܠܶܗ ܒܝ ܩܪܝܬ݂ܐ ܗܘܠ ܠܝ ܫܰܬܐ ܕܢ 1951܀ ܒܰܢ 1952 ܣܷܡܡܶܗ ܟ݂ܘܪܝ ܥܰܙܝܙ ܩܰܫܐ ܟ݂ܕܷܡܠܶܗ ܚܰܡܡܶܫ ܐܷܫܢܶܐ ܟܳܗܢܘܬ݂ܐ ܐܰܙܙܶܗ ܡܫܰܡܰܫ ܠܶܗ ܒܕܝܝܰܪܒܰܟܷܪ ܘܡܶܐ ܬܰܡܳܐ ܠܶܣܛܰܡܒܷܠ ܘܰܡܫܰܢܶܠܶܗ 1997 ܒܒܰܠܫ̰ܝܩܰܐ܀ ܩܰܫܐ ܡܰܠܟܶܐ ܓܘܡܘܫܨܝ ܡܰܣܪܰܚ ܟܳܗܢܐ ܒܰܢ 1959 ܠܝ ܩܪܝܬ݂ܐ ܡܝ ܣܷܒܒܶܐ ܕܝ ܣܰܝܒܘܬܼܐ ܐܰܙܙܶܗ ܠܒܰܠܫ̰ܝܩܰܐ ܗܶܫ ܒܰܚ ܚܰܝܶܐ ܝܐ ܓܰܒ ܐܘ ܐܰܒܪܐ. ܐܘܥܕܐ ܕܰܝܪܳܝܐ ܡܘܫܶܐ ܓܘܪܒܘܙ ܟܳܡܫܱܡܰܫ ܟܳܗܢܘܬܼܐ ܒܝ ܩܪܝܬ݂ܐ܀ ܡܘܩܣܝ ܔܷܪܔܐ ܐܘ ܡܘܟ݂ܬܰܪ ܕܷܟܦܰܪܙܶܐ ܒܘ ܬܰܪܝܟ̣݂ ܕܬܷܪܟܝܝܰܐ ܢܳܫܶܐ ܠܷܐܟ݂ܕܷܡܠܶܗ ܡܘܟ݂ܬܰܪܝܝܶܐ ܟ݂ܳܬ݂ܶܗ. ܡܰܘܠܰܕ ܒܝ ܫܰܬܐ 1885 . ܡܝ ܫܰܬܐ ܆1928ܗܘܠ ܠܝ ܫܰܬܐ ܆1992 ܣܷܡܠܶܗ ܡܘܟ݂ܬܰܪܝܝܶܐ ܒܝ ܩܪܝܬ݂ܐ ܆ 64 ܐܷܫܢܶܐ. ܢܰܩܩܰܐ ܡܫܰܝܰܠܠܶܗ ܡܝܢܶܗ ܐܰܝܕܰܪܒܳܐ ܗܰܩܩܰܐ ܐܷܫܢܶܐ ܓ݂ܰܠܰܒܶܐ ܡܕܰܒܰܪܠܘܟ ܐܝ ܩܪܝܬ݂ܐ. ܡܰܕܥܰܪܠܶܗ ܡܷܪܠܶܠܷܢ: ܠܐ ܚܙܶܠܝ ܠܐ ܫܰܡܷܥܢܐ ܘܠܐ ܟܐܳܕ݂ܰܥܢܐ. ܥܰܠ ܕܟܷܬܘܰܐ ܩܰܠܶܐ ܕܰܝܝܡܰܐ ܒܰܝܢܰܐ ܛܰܝܶܐ ܐܳܒܝܘܰܝܠܶܗ ܐܝ ܡܘܟ݂ܬܰܪܝܝܶܐ ܐܶܠܶܗ ܠܰܫܰܢ ܕܠܐ ܗܳܘܶܐ ܡܰܡܪܐ ܬܶܢܳܝܐ ܒܝ ܩܪܝܬ݂ܐ 23/01/1999 ܢܩܝܠ ܡܰܚ ܚܰܝܰܢܝ ܡܰܚܷܬ ܒܓܰܘܰܗ ܕܝ ܥܝܬܐ ܕܡܳܪܝ ܥܙܳܙܳܐܝܠ܀ ܐܝ ܫܰܬܐ ܆1926 ܐܘ ܪܝܫܳܢܐ ܕܝ ܩܪܝܬܼܐ ܐܘ ܥܒܕܐ ܕܒܶܐ ܟܘܰܔܰܐ ܡܰܡܛܶܠܶܗ ܚܰܐ ܡܰܠܦܳܢܐ ܓܶܘܰܪܓܝܣ ܡܘ ܬܰܡܰܪܙ ܕܟܷܬܝܳܐ ܩܰܪܷܘܬܐ ܠܡܝܕܷܢ ܐܝ ܩܪܝܬܼܐ ܡܰܪܟܰܘܠܶܗ ܐܝ ܡܰܕܪܰܫܬܐ ܒܝ ܩܪܝܬܐ. ܒܝ ܡܰܕܪܰܫܬܰܬܼܶܐ ܡܰܩܶܡܠܗ ܝܳܠܘܦܶܐ ܡܗܝܪܶܐ ܗܷܢ ܡܷܢܢܶܗ ܕܟܷܬܢܶܐ ܐܝܕܝܥܶܐ. ܐ.ܟܘܪܝ ܥܰܙܝܙ ܓܘܢܰܠ ܕܒܶܐ ܟܼܘܰܔܰܐ. ܒ ܟܘܪܝ ܨܰܡܘܝܶܠ ܐܰܩܕܶܡܝܪ ܙܰܙܳܝܐ ܓ ܩܰܫܝܫܐ ܝܰܥܩܘܒ ܓܘܢܶܝ ܕ. ܩܰܫܐ ܓܶܘܰܪܓܝܣ ܩܰܦ̇ܠܰܢ ܕܒܶܐ ܓܰܒܪܶܐ ܘܡܰܠܦܳܢܶܐ ܘܫܰܡܳܫܶܐ ܓܼܰܠܰܒܶܐ. ܟܝܒܰܢ ܕܷܐܡܡܝܢܰܐ ܐܝ ܡܰܕܪܰܫܬܐ ܩܰܡܰܝܬܐ ܕܛܘܪܥܰܒܕܝܢ ܝܐ܀ ܒܝ ܩܪܝܬܼܐ ܕܷܟܦܰܪܙܶܐ ܠܐ ܟܰܠܝ ܐܘ ܩܰܛܠܐ ܐܘ ܕܼܷܠܷܡ ܕܥܰܠ ܐܘ ܥܰܡܐ ܠܷܐܬܰܝܷܡ. ܒܷܬܼܷܪ ܡܘ ܣܰܝܦܐ ܢܳܦܰܩܘܰܐ ܐܘ ܥܰܡܐ ܠܘ ܩܛܳܥܐ ܕܰܩ ܩܰܝܣܶܐ ܘܠܘ ܕܘܳܪܐ ܘܠܘ ܟܣܳܚܐ. ܐܰܛ ܛܰܝܶܐ ܗܶܫ ܐܘ ܚܣܳܡܐ ܐܘ ܥܰܢܬܝܝܶܐ ܕܓܰܘܰܝܝܶܗ ܕܟܷܬܘܰܠܠܶܗ ܡܩܰܒܷܠ ܕܰܡ ܡܫܝܚܳܝܶܐ ܠܐ ܬܰܝܝܡܳܘܰܐ܆ ܐܘ ܚܰܐ ܕܡܰܡܛܷܢܘܰܐ ܐܝ ܕ݂ܰܪܒܐ ܐܰܥܠܶܗ ܩܳܛܠܝܘܰܝܠܶܗ. ܡܰܘܟܼܰܐ ܐܝ ܢܰܩܠܰܐ ܕܢܷܦܩܝܘܰܐ ܠܘ ܛܘܪܐ ܬܪܶܐ ܐܰܘ ܬܠܳܬܼܐ ܢܳܫܐ ܐܷܙܙܷܢܘܰܐ܀ ܒܰܢ ܆1928 ܩܛܝܠ ܐܘ ܡܘܟ݂ܬܰܪ ܐܘ ܪܝܫܐ ܕܝ ܩܪܝܬ݂ܐ ܥܰܒܕܐ ܓܘܢܶܠ ܕܒܶܐ ܟ݂ܘܰܔܰܐ ܕܟܷܬܘܰܐ ܩܰܘܝܐ ܒܝ ܕܰܘܠܶܐ ܐܝܡܶܘܰܝܠܶܗ ܕܠܐ ܛܳܪܶܐ ܚܰܐ ܛܰܝܳܐ ܒܝ ܩܪܝܬ݂ܐ. ܗܝܝܶܐ ܐܰܬ݂ܳܝܐ ܡܶܐ ܡܶܕ݂ܝܰܕ ܒܘ ܕܰܪܒܐ ܒܰܝܢ ܠܗܰܠܰܟ݂ܶܐ ܠܷܟܦܰܪܙܶܐ ܝܰܬܝܘܝ ܒܩܰܡܘܬ݂ܶܗ ܒܘ ܟܰܡܝܳܢ ܘܩܛܷܠܠܶܗ ܒܷܬ݂ܪ ܡܘ ܩܰܛܠܰܝܕ݂ܶܗ ܗܰܘܝ ܙܘܥܬ݂ܐ ܒܘܠܒܳܠܐ ܒܝ ܩܪܝܬ݂ܐ ܗܷܢ ܡܰܢ ܢܳܫܶܐ ܕܝ ܩܪܝܬ݂ܐ ܢܰܦܝܩܝ ܡܰܗܙܰܡܡܶܗ ܐܰܙܙܷܢ ܠܡܶܕ݂ܝܰܕ܀ ܐܝ ܫܰܬܐ ܕܰܢ 1944 ܩܛܷܠܠܶܗ ܚܰܐ ܡܰܐ ܪܝܫܳܢܶܐ ܛܰܝܶܐ ܕܝ ܩܪܝܬܼܐ ܐܷܫܡܶܗ ܡܰܔܝܕܐ ܕܒܶܐ ܣܡܰܥܝܠܐ ܡܫܰܪܰܟܘܰܐ ܒܘ ܩܰܛܠܰܢܐ ܢܳܫܶܐ ܣܘܪܝܳܝܶܐ ܒܷܬܼܷܪ ܡܘ ܩܰܛܠܰܝܕܼܶܗ ܢܰܦܝܩܝ ܢܳܫܶܐ ܐܰܙܙܷܢ ܠܡܶܕܝܰܕ ܘܠܷܣܛܰܡܒܷܠ܀ ܒܝ ܫܬܐ ܕܝ ܓ݂ܰܠܰܐ ܕܘ ܐܷܚܬܝܝܰܬ ܣܬܶܐ ܗܰܘܝܘܰܐ ܟܰܦܢܐ ܨܰܗܘܐ ܪܰܒܐ ܒܘ ܛܘܪܐ ܡܷܚܬܶܔܝܝܶܐ ܕܰܡ ܡܰܝܶܐ ܗܷܢ ܡܘ ܟܰܦܢܐ ܢܰܚܝܬܝ ܠܰܩ ܩܷܪܝܰܘܳܬ݂ܶܐ ܕܷܢܨܝܘܝܢ ܘܠܣܘܪܝܰܐ. ܗܷܢ ܡܷܢܢܷܗ ܡܰܗܙܰܡܡܶܗ ܡܝ ܥܰܣܟܰܪܝܝܶܐ ܢܰܚܝܬܝ ܠܣܘܪܝܐ ܦܰܝܫܝ ܬܰܡܐ. ܐܷܙܙܷܢܘܰܐ ܡܶܐ ܟܦܰܪܙܶܐ ܗܘܠ ܠܚܰܣܢܐ ܕܟܝܦܐ ܘܠܝ ܐܰܪܕܐ ܛܷܥܢܝܘܰܐ ܡܰܡܛܶܢܘܰܐ ܡܰܝܶܐ ܒܰܓ ܓܰܘܕܶܐ ܘܒܰܬ ܬܰܢܰܟܰܬ. ܩܰܫܬܝ ܡܰܚܟܶܠܰܗ ܠܝ ܡܷܪܠܰܗ ܐܰܡ ܡܰܝܶܐ ܕܣܳܚܝܘܰܝܢܰܐ ܐܰܦ݁ܦ݁ܶܗ ܡܰܪܬ݂ܚܝܘܰܝܢܰܠܷܢ ܒܘ ܩܰܛܡܐ ܘܫܳܬܝܘܰܝܢܰܠܷܢ. ܒܷܬ݂ܷܪ ܡܷܐ ܕܩܰܘܝ ܐܘ ܟܰܦܢܐ ܢܰܚܝܬܝܢܰܐ ܠܰܩ ܩܷܪܝܰܘܳܬ݂ܐ ܕܘ ܔܳܠ ܠܣܘܪܝܝܰܐ ܟܷܪܟ݂ܝܘܰܝܢܰܐ ܒܰܢ ܐܰܪܥܳܬ݂ܐ ܕܷܡܟܰܡܠܝܘܰܐ ܐܘ ܚܨܳܕܰܬ݂ܬ݂ܶܗ ܡܢܰܩܝܘܰܝܢܰܐ ܐܰܙ ܙܰܪܥܶܐ ܡܰܢ ܐܰܪܥܳܬ݂ܐ ܟܕ݂ܰܐ ܨܰܦܪܘܢܶܐ ܗܘܠ ܕܡܰܠܬܡܝܘܰܝܢܰܐ ܠܰܦ݁ܦ݁ܶܐ ܫܷܠܩܝܘܰܝܢܰܐ ܐܘܟ݂ܠܝܘܰܝܢܰܠܷܢ. ܠܷܐܟܛܷܥܝܳܢܐ ܢܰܩܩܰܬ ܐܳܬ݂ܷܢܘܰܐ ܐܰܡ ܡܳܪܶܐ ܕܝ ܐܰܪܥܐ ܡܰܝܕܝܘܰܐ ܡܝܢܰܢ ܐܘ ܡܶܕܶܐ ܕܡܰܠܬܡܝܘܰܝܢܰܠܶܗ. ܒܷܬ݂ܷܪ ܡܷܐ ܕܟ݂ܰܠܝܨܐ ܐܝ ܓ݂ܰܠܰܐ ܗܷܢ ܡܘ ܥܰܡܐ ܦܰܝܶܫ ܬܰܡܐ ܗܷܢ ܡܰܢܢܶܗ ܕܰܥܷܪ ܠܝ ܩܪܝܬ݂ܐ܀ ܘܒܝ ܫܬܐ 1959 ܐܘ ܫܡܥܘܢ ܕܘ ܐܝܫܟܐ ܩܛܝܠܶܗ ܐܳܣܡܰܢ ܘܚܷܣܰܝܢܐ ܕܒܶܐ ܟ݂ܰܬܶܐ ܒܰܒܐ ܘܰܒܪܐ ܒܷܬ݂ܷܪ ܡܘ ܩܰܛܠܰܝܕܶܗ ܗܰܘܝ ܒܘܠܒܳܠܐ܆ ܘܕ݂ܷܠܡܝܝܶܐ܆ ܡܰܚܝܐ܆ ܚܰܩܰܪܰܐ ܓ݂ܰܠܰܒܶܐ܆ ܘܡܚܰܠܰܩܶܗ ܒܶܫ ܥܰܠܰ ܐܰܣ ܣܘܪܳܝܶܐ ܕܝ ܩܪܝܬ݂ܐ ܘܓ݂ܰܠܰܒܶܐ ܢܳܫܶܐ ܡܰܗܙܰܡܡܶܗ ܡܝ ܩܪܝܬ݂ܐ. ܐܘ ܫܡܥܘܢ ܡܰܗܙܰܡܠܶܗ ܐܰܙܙܶܗ ܠܥܝܘܰܪܕܳܐ ܡܶܐ ܬܰܡܐ ܠܝ ܩܰܡܷܫܠܐ ܘܠܠܶܒܢܰܢ ܡܶܐ ܬܰܡܐ ܡܰܗܙܰܡܠܶܗ ܠܰܐܘܷܣܬܪܰܠܝܰܐ܀ ܒܝ ܫܬܐ 1960 ܝܰܘܡܶܗ ܕܷܥܪܷܘܬܐ ܕܝ ܙܩܝܦܘܬ݂ܐ ܚܰܐ ܥܠܰܝܡܐ ܣܘܪܝܳܝܐ ܐܷܫܡܶܗ ܝܘܣܦ ܓܘܠܬܶܟܝܢ ܐܰܙܙܶܗ ܠܘ ܛܘܪܐ ܕܩܳܛܰܥܠܶܗ ܩܰܝܣܶܐ ܐܝ ܢܰܩܩܰܐ ܕܥܰܨܪܝܝܶܐ ܠܰܐܬ݂ܝ ܠܘ ܒܰܝܬܐ ܒܠܰܠܝܐ ܢܰܦܝܩܝ ܟܰܪܝܟ݂ܝ ܐܰܥܠܶܗ ܒܘ ܛܘܪܐ ܚܙܰܠܠܶܗ ܩܛܝܠܐ܀ ܒܰܢ ܐܷܫܢܰܢܝ ܒܕܶܠܶܗ ܕܢܳܦܰܩ ܠܝ ܓܳܠܘܬ݂ܐ ܐܘ ܥܰܡܐ. ܗܷܢ ܐܰܙܙܷܢ ܠܷܣܛܰܡܒܷܠ ܠܰܫܰܢ ܐܘ ܫܘܓ݂ܠܐ ܒܷܬ݂ܷܪ ܡܶܐ ܬܰܡܳܐ ܠܰܐܘܪܘܦ݁ܰܐ. ܗܷܢ ܐܰܙܙܷܢ ܠܡܶܕ݂ܝܰܕ ܒܕܰܠܠܶܗ ܒܘ ܫܘܓ݂ܠܐ ܟܷܕ ܣܰܝܳܡܶܐ ܕܰܥ ܥܰܪܫܶܐ܆ ܪܷܫܘܳܢܶܐ܆ ܣܰܝܳܡܶܐ ܕܰܨ ܨܳܒܰܬ܆ ܘܦܳܥܠܶܐ ܓ݂ܰܠܰܒܶܐ ܡܷܢܢܶܗ ܒܘ ܚܰܪܒ ܒܰܝܢ ܠܝ ܕܰܘܠܶܐ ܘܠܰܟܘܪܕܳܝܶܐ ܡܰܗܙܰܡܡܶܗ ܡܶܐ ܡܶܕ݂ܝܰܕ ܣܬܶܐ ܡܓܰܠܘܰܠܠܶܗ ܠܰܐܘܪܘܦ݁ܰܐ܀ ܒܝ ܫܰܬܐ ܕܰܢ ܐܫܬܝ ܟܷܬܘܰܐ ܒܝ ܩܪܝܬ݂ܐ ܆150 ܒܳܬܶܐ ܡܫܝܚܳܝܶܐ 123 ܒܳܬܶܐ ܛܰܝܶܐ. ܐܰܛ ܛܰܝܶܐ ܕܝ ܩܪܝܬ݂ܐ ܬܪܶܐ ܦ݁ܰܪܬܝܝܰܬ ܪܰܒܶܐ ܕܟܷܬܢܶܐ ܐܰܥ ܥܰܝܝܠܰܬ ܕܒܶܐ ܣܡܰܥܝܠܐ ܐܝ ܥܰܝܝܠܰܐ ܕܒܶܐ ܚܰܡܟܶܐ. ܡܘ ܝܰܘܡܐ ܩܰܡܳܝܐ ܗܘܠ ܠܝ ܫܬܐ ܆1990 ܐܝ ܩܰܠܶܐ ܐܘ ܩܰܛܠܐ ܐܝ ܒܰܪܒܰܪܝܝܶܐ ܡܶܐ ܒܰܝܢܳܬ݂ܰܝܝܶܗ ܠܐ ܬܰܝܺܝܡܐ. ܐܰܣ ܣܘܪܳܝܶܐ ܣܬܶܐ ܡܷܔܒܳܪܝܘܰܐ ܓ݂ܰܠܰܒܶܐ ܢܰܩܠܰܬ ܕܡܝܔܳܟܝ ܕܡܷܟ݂ܠܳܛܝ ܒܰܩ ܩܰܠܰܬ ܘ ܒܰܩ ܩܰܛܠܶܐ. ܗܷܢ ܡܰܢܢܶܗ ܥܰܡ ܒܶܐ ܣܡܰܥܝܠܐ ܗܷܢ ܥܰܡ ܒܶܐ ܚܰܡܟܶܐ. ܐܝ ܢܰܩܩܰܐ ܕܩܰܘܝ ܐܘ ܚܰܪܦ݁ ܒܰܝܢ ܠܝ ܕܰܘܠܶܐ ܘܠܰܟܘܪܕܳܝܶܐ ܔܒܝܪܝ ܕܢܷܦܩܝ ܒܶܐ ܣܡܰܥܝܠܐ ܡܝ ܩܪܝܬ݂ܐ. ܓ݂ܰܠܰܒܶܐ ܡܘ ܥܰܡܐ ܣܘܪܝܳܝܐ ܡܰܗܙܰܡܠܶܗ ܡܶܐ ܛܘܪܥܰܒܕܝܢ ܘܓ݂ܰܠܰܒܶܐ ܩܷܪܝܰܘܳܬ݂ܶܐ ܟ݂ܰܠܷܢ ܡܘ ܥܰܡܐ. ܐܘ ܥܰܡܐ ܕܷܟܦܰܪܙܶܐ ܣܬܶܐ ܡܝ ܙܘܥܬ݂ܐ ܡܰܗܙܰܡܠܶܗ ܡܝܢܰܗ. ܐܰܕ ܝܰܘܡܰܐ ܟܳܥܳܝܰܫ ܒܝ ܩܪܝܬ݂ܐ ܆ 12 ܒܳܬܶܐ ܣܘܪܳܝܶܐ ܒܝ ܩܪܝܬ݂ܐ.܆ 18 ܒܳܬܶܐ ܟܷܬܠܰܢ ܒܡܶܕܝܰܕ ܟܡܐ ܒܳܬܶܐ ܒܷܣܛܰܡܒܷܠ.܆ 20 ܒܳܬܶܐ ܛܰܝܶܐ. ܐܰܟ ܟܦܰܪܙܳܝܶܐ ܣܘܪܝܳܝܶܐ ܕܰܡܓܰܠܘܰܠܠܶܗ ܠܰܪܘܰܠ ܡܘ ܐܰܬ݂ܪܐ ܟܷܬܠܰܢ ܒܝ ܕܰܘܠܰܐ ܕܒܰܠܔܝܩܰܐ. ܆580 ܒܳܬܶܐ. ܒܰܐܠܡܰܢܝܰܐ܆ ܒܗܳܠܰܢܕܰܐ܆ ܒܷܣܘܝܣܪܰܐ܆ ܒܷܣܘܶܕ܆ ܒܰܐܡܶܪܝܟܰܐ܆ ܒܰܐܘܣܬܪܰܠܝܰܐ܆ ܒܣܘܪܝܰܐ. ܐܰܛ ܛܰܝܶܐ ܕܢܰܦܝܩܝ ܡܝ ܩܪܝܬ݂ܐ ܐܰܓ݂ܠܰܒ݁ ܕܷܬ݂ܬ݂ܶܗ ܒܷܣܛܰܡܒܷܠ ܥܰܝܳܫܶܐ ܢܶܐ܀ ܡܠܦܢܐ ܐܝܗܐܢ ܓܘܪܩܐܢ3223 ܡܶܠܶܐ