Ayhan Gürkan: ܐܰܚ ܚܰܝܶܐ ܕܰܐܪܟ݂ܷܕܝܰܩܘܢ ܓܰܘܪܝـܝܶܐ ܓܘܪܩܰܐܢ /Aḥ ḥaye d Arxëdyaqun Gawriye Gurqan

Aḥ ḥaye d Arxëdyaqun Gawriye Gurqan

ܐܰܪܟ݂ܷܕܝܰܩܳܘܢ ܓܰܘܪܝـܝܶܐ ܡܰܘܠܷܕ ܒܝ ܫܰܬܐ ܕܰܐܠܦܐ ܫ̰ܰܥܡܐ ܬܡܳܢܶܐ ܬܠܶܬ݂ܝ ܒܝ ܩܪܝܬ݂ܐ ܡܒܰܪܰܟ݂ܬܐ ܕܷܟܦܰܪܙܶܐ. ܡܶܐ ܐܰܒܳܗܶܐ ܡܗܰܝܡܢܶܐ ܕܰܘܝܕ ܘܣܰܝܕܶܐ. ܟܷܬܘܰܝܠܶܗ ܚܕ݂ܐ ܚܳܬ݂ܐ ܐܷܫܡܰܐ ܡܰܪܝܰܡ ܡܚܰܣܝܐ، ܘܬܠܳܬ݂ܐ ܐܰܚܘܢܳܢܶܐ ܒܪܰܗܝܡ ܡܚܰܣܶܐ،ܔܷܪܔܐ ܟܷܬܝܐ ܒܰܒܝ، ܘܫܰܦܝܩ. ܒܝ ܫܰܬܐ ܕܰܐ ܐܰܪܒܥܝـܝܰܬ ܗܰܘܝ ܟܰܦܢܐ ܪܰܒܐ ܒܛܘܪܥܰܒܕܝܢ ܟܘܠܰܐ ܟܷܡܡܝܠܰܐ ܒܘ ܛܘܪܐ ܐܝ ܫܰܬܐ ܕܝ ܓ݂ܰܠܰܐ، ܔܷܕܕܝ ܝܰܥܢܝ ܐܘ ܒܰܒܐ ܕܐܘ ܫܰܡܳܫܐ ܥܰܠ ܕܟܷܬܘܰܐ ܒܝ ܥܰܣܟܰܪܝـܝܶܐ ܡܰܘܟ݂ܰܐ ܩܰܫܬܝ ܡܷܕܠܰܐ ܐܰܢ ܢܰܥܝܡܰܝܕ݂ܰܐ ܢܰܚܝܬܐ ܠܣܘܪܝـܝܰܐ ܠܩܰܒܪܶܐ ܚܶܘܳܪܶܐ. ܒܘ ܙܰܒܢܰܘܐ ܩܰܡܰܝܬܐ ܡܘ ܣܰܒܰܒ ܕܘ ܚܰܪܒ ܕܰܬܪܶܐ ܕܷܒܪܝܬ݂ܐ ܡܫܰܪܷܘܰܝܠܶܗ. ܕܰܬܪܶܐ ܒܬܷܪܟܝـܝܰܐ ܠܝ ܕܰܘܠܶܗ ܡܰܚܷܬܘܰܝܠܰܐ ܐܝܕ݂ܐ ܥܰܠ ܐܘ ܙܰܕ ܕܐܘ ܥܰܡܐ ܠܰܫܰܢ ܐܝ ܣܢܝܩܘܬ݂ܐ ܕܝ ܥܰܣܟܰܪܝـܝܶܐ ܘܠܝ ܚܰܕ݂ܷܪܝـܝܶܐ ܕܘ ܚܰܪܒ. ܕܰܬܠܳܬ݂ܐ ܡܰܚܷܬܘܰܝܠܰܐ ܐܝܕ݂ܐ ܥܰܠ ܐܰܥ ܥܠܰܝܡܶܐ ܕܩܷܕܪܝܘܰܐ ܕܨܰܝܕܝ ܙܰܝܢܐ ܕܝܠܳܢܳܐܝܬ݂ ܐܰܡ ܡܫܝـܚܳـܝܶܐ ܟܷܡܡܝܠܰܐ ܒܘ ܛܘܪܐ ܐܘ ܐܝـܚܬܝـܝܰܬ. ܐܰܪܒܰܥ ܒܥܰܝܢܝ ܙܰܒܢܐ ܡܳܦܰܩܘܰܝܠܰܐ ܦܘܣܩܳܢܐ ܕܘ ܘܶܪܓܝ ܕܘ ܡܰܠ ܕܠܐ ܥܰܕܰܠܰܐ ܔܒܝܪܝ ܓ݂ܰܠܰܒܶܐ ܡܰܐ ܡܫܝـܚܳـܝܶܐ ܕܟܳܥܰܝܫܝ ܒܬܷܪܟܝـܝܰܐ ܕܷܡܙܰܒܢܝ ܐܘ ܡܰܠܕܷܬ݂ܬ݂ܶܗ ܟܘܠܶܗ ܐܘ ܕܳܒܷܢ ܐܘ ܘܰܪܓܝ ܕܢܰܦܷܠ ܐܰܥܠܰܝـܝܶܗ. ܐܘ ܚܰܐ ܕܠܐ ܩܰܕܷܪ ܕܳܐܒܶܗ ܐܘ ܘܶܪܓܝ، ܠܝ ܕܰܘܠܶܗ ܡܳܒܷܘܰܝܠܰܐ ܠܝ ܟ݂ܰܨܪܰܐ ܕܰܐܪܙܘܪܘܡ. ܟܝܬ ܓ݂ܰܠܰܒܶܐ ܟܷܡܡܝ ܓܡܰܩܝܡܳܘܰܐ ܣܰܝܦܐ ܚܪܶܢܐ ܥܰܠ ܐܰܡ ܡܫܝـܚܳـܝܶܐ ܐܶܠܐ ܪܘܣܝܰܐ ܡܕܰܟ݂ܷܠܰܐ ܒܝ ܡܰܣܰܠܶܗ ܐܝ ܕܰܘܠܶܐ ܠܐ ܩܰܕܝܪܐ ܕܣܰܝܡܐ ܡܶܕܶܐ ܐܶܠܐ ܡܰܫܷܓ݂ܠܝܠܰܐ ܒܚܰܩ ܓ݂ܰܠܰܒܶܐ ܢܳܩܘܨܐ ܗܘܠ ܕܡܰܝܬ݂ܝ ܣܬܶܐ ܕܠܐ ܩܘܕܪܝ ܕܳܒܷܢ ܐܘ ܘܶܪܓܝ ܕܰܥܠܰܝـܝܶܗ ܘܡܰܦܬܰܚܠܰܐ ܐܰܕ ܕܰܪܒܳܢܶܐ ܕܘ ܬܪܶܢ ܐܰܦ݁ܦ݁ܶܗ. ܣܝܡ ܦܠܝܡ ܕܝ ܣܝܢܰܡܰܐ ܥܰܠ ܐܘ ܘܶܪܓܝـܝܰܢܐ ܒܬܷܪܟܝـܝܰܐ ܕܷܐܫܡܶܗ ܣܰܠܩܷܡ ܗܰܢܷܡܷܢ ܬܰܢܶܠܶܪܝ. ܡܰܘܟ݂ܰܐ ܓ݂ܰܠܰܒܶܐ ܡܘ ܥܰܡܐ ܡܰܗܙܰܡܘܰܝܠܶܗ ܢܰܚܷܬ ܘܰܐ ܠܣܘܪܝـܝܰܐ ܕܟ݂ܳܠܰܨ ܡܘ ܐܷܚܬܝـܝܰܬ. ܓ݂ܰܠܰܒܶܐ ܢܳܫܶܐ ܢܰܚـܝܬܝ ܠܰܫܰܢ ܐܘ ܫܘܓ݂ܠܐ ܕܷܡܕܰܒܪܝ ܐܰܢ ܢܰܥܝܡܰܬ݂ܬ݂ܶܗ. ܗܝـܝܰܐ ܣܬܶܐ ܢܰܚـܝܬܐ ܡܰܠܬܡܳܐ ܘܰܐ ܐܰܚ ܚܶܛܶܐ ܣܥܳܪܶܐ ܕܢܷܬ݂ܪܝ ܘܰܐ ܡܰܐ ܫܷܒܠܶܐ ܥܰܠ ܐܝ ܐܰܪܥܐ ܒܘ ܫܷܟܷܠܰܢܐ ܩܰܕܝܪܐ ܕܷܡܕܰܒܪܐ ܐܰܢ ܢܰܥܝܡܰܝܕ݂ܰܐ ܒܰܐ ܝܰܘܡܳܬ݂ܶܐ ܕܘ ܟܰܦܢܐ ܡܰܪܝܪܐ. ܒܚܰܐ ܡܰܐ ܝܰܘܡܳܬ݂ܶܐ ܐܝܢܰܩܰܐ ܕܡܰܠܬܡܳܐ ܘܰܐ ܙܰܕ ܥܰܡܡܝ ܐܘ ܫܰܡܳܫܐ ܢܰܦܷܠ ܒܘ ܓܘܒܐ ܕܝ ܢܘܪܐ ܕܟܷܬܘܰܐ ܩܰܪܝܘܐ ܠܬܰܡܐ ܕܟܷܡܡܝ ܠܶܗ ܐܰܬܘܢܐ، ܕܡܰܘܩܕ݂ܝ ܘܰܐ ܐܶܒܶܗ ܟܰܠܫܐ. ܐܰܢ ܢܳܫܶܐ ܕܟܷܬܘܰܝܢܶܐ ܬܰܡܐ ܡܷܕܕܶܐ ܡܳܦܰܩܩܶܐ ܐܰܬ݂ܷܢ ܡܷܪܰܠܠܰܗ ܐܘ ܐܰܒܪܰܝܕ݂ܰܟ ܢܰܦܷܠ ܒܘ ܐܰܬܘܢܐ ܕܝ ܢܘܪܐ. ܪܰܗܝܛܐ ܦܰܩܷܪܬܐ ܗܰܘ ܟܘܕܥܐ ܡܷܢ ܣܰܝܡܐ ܡܷܕܠܰܐ ܡܰܘܒܶܠܰܐ ܥܰܠ ܦܶܡܶܗ ܕܰܡ ܡܰܝܶܐ ܕܟ݂ܰܝܪܝ ܘܰܐ ܬܰܡܐ ܒܕܷܠܰܐ ܟܳܫܷܡܛܐ ܐܘ ܓܰܠܕܐ ܚܰܪܝܘܐ ܕܝܰܩܷܕ ܡܝ ܠܰܫܰܝܕ݂ܶܗ. ܗܘܠ ܕܡܰܡܛܷܠܰܐ ܠܝ ܩܪܝܬ݂ܐ ܩܰܒܪܶܐ ܚܶܘܳܪܶܐ ܬܰܡܐ ܡܕܰܪܡܰܢܠܷܢ ܒܰܕ ܕܰܪܡܳܢܶܐ ܕܝ ܟܘܪܡܰܢܔܝـܝܶܐ ܗܘܠ ܕܢܰܝܷܚܠܶܗ. ܟܘܠ ܢܰܩܩܰܐ ܐܝ ܡܚܰܣܰܝܬܐ ܕܩܰܫܬܰܝܢܰܐ ܡܰܚܟܳܘܰܝܠܰܢ ܐܘ ܡܶܕܰܢܐ. ܒܷܬ݂ܷܪ ܡܷܕ ܒܰܣܝܡܐ ܒܪܝܬ݂ܐ ܡܰܣܠܰܩܠܰܐ ܐܰܢ ܢܰܥܝܡܰܝܕ݂ܰܐ ܕܰܥܝܪܝ ܠܝ ܩܪܝܬ݂ܐ ܕܷܟܦܰܪܙܶܐ. ܥܰܡܡܝ ܐܘ ܫܰܡܳܫܐ ܥܰܡ ܐܘ ܐܰܚܘܢܐ ܕܪܰܒ ܡܝܢܶܗ ܒܪܰܗܝܡ ܐܰܙܙܷܢ ܠܝ ܡܰܕܪܰܫܬܐ ܕܝ ܥܝܬܐ ܕܡܳܪܝ̱ ܥܙܳܙܳܐܝܠ ܩܘܡ ܐܝܕ݂ܶܐ ܕܰܡܢܳܚ ܢܰܦܫܐ ܟ݂ܘܪܝ ܥܰܙܝܙ ܓܘܢܰܠ. ܟܷܬܘܰܐ ܒܝ ܡܰܕܪܰܫܬܐ ܚܰܡܫܐ ܘܰܐܪܒܥܝ ܝܳܠܘܦܶܐ ܕܓ݂ܰܠܰܒܶܐ ܡܰܢܢܶܗ ܢܰܦܝܩܝ ܟܳܗܢܶܐ ܡܫܰܡܫܳܢܶܐ ܐܘ ܡܰܠܦܳܢܶܐ. ܒܷܬ݂ܷܪ ܡܷܕ ܡܟܰܡܶܠܶܗ ܐܝ ܥܰܣܟܰܪܝـܝܶܐ، ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫܶܬ݂ ܚܰܡܫܝ ܡܚܰـܝܰܕ݂ܠܶܗ ܐܰܚ ܚܰܝܰـܝܕܶܐ ܥܰܡ ܕܰܕܝ ܢܶܔܡܶܐ ܐܝ ܒܰܪܬ݂ܐ ܬܘܡܰܐ ܕܒܶܗ ܥܝܣܰܐ. ܡܘ ܙܘܘܳܓ݂ܰܢܐ ܗܰܘܝܠܷܢ ܬܠܳܬ݂ܳܐ ܐܰܒܢܶܐ ܝܰܘܣܶܐ، ܚܰܢܢܰܐ، ܐܰܢܕܪܰܐܘܣ، ܘܰܐܪܒܰܥ ܒܢܳܬ݂ܶܐ ܐܰܡܶܠܝܢ، ܣܷܬܬܝـܝܶܐ، ܔܰܢܶܐ، ܐܰܠܝܙܰܒܶܬ. ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܚܕ݂ܐ ܫܰܘܥܝ ܟ݂ܘܕ ܐܘ ܥܰܡܐ ܟܘܠܠܶܗ ܗܝـܝܶܐ ܣܬܶܐ ܡܓܰܠܘܶܠܶܗ ܠܰܘܪܘܦ̇ܦ݁ܰܐ ܠܰܫܫܰܢ ܕܫܳܓ݂ܰܠ ܕܣܳܝܰܡ ܐܝ ܐܝܕܰܪܰܐ ܕܰܐܢ ܢܰܥܝܡܰܝܕ݂ܶܗ. ܐܰܙܙܶܐ ܠܝ ܘܰܠܰܝܶܐ ܕܡܰܡܝܢܓܶܢ ܦܰܝܷܫ ܬܰܡܐ ܟܡܳܐ ܐܷܫܢܶܐ ܫܓ݂ܝܠܶܗ، ܒܷܬ݂ܷܪ ܡܶܐ ܬܰܡܐ ܢܩܝܠܶܗ ܐܘ ܒܰܝܬܰܝܕ݂ܶܗ ܠܝ ܘܰܠܰܝܶܐ ܕܒܶܪܠܝܢ ܡܰܫܦܰܥܠܶܗ ܐܰܚ ܚܰܝܰـܝܕ݂ܶܐ ܟܘܠܠܶܗ ܐܶܒܰܗ ܗܘܠ ܕܷܡܚܰܣܶܐ. ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫܶܬ݂ ܫܰܘܥܝ ܡܰܣܪܰܚ ܡܫܰܡܫܳܢܐ ܡܝ ܩܰܕܝܫܘܬ݂ܐ ܕܘ ܦܰܛܷܪܝܰܪܟ݂ܐ ܬܠܝܬ݂ܳܝ ܛܘܒܶܐ ܡܳܪܝ̱ ܐܝܓ݂ܢܰܐܛܝܘܣ ܝܰܥܩܘܒ ܬܠܝܬ݂ܳܝܐ ܒܝ ܥܝܬܐ ܕܡܳܪܝ̱ ܝܰܥܩܘܒ ܕܰܣܪܘܓ݂ ܒܝ ܘܰܠܰܝܶܐ ܕܒܶܪܠܝܢ ܠܰܫܰܢ ܐܝ ܥܝܬܰܬ݂ܶܗ. ܘܒܝ ܫܰܬܐ ܕܰܐ ܬܰܪܬܶܐ ܬܡܳܢܝ ܐܰܙܙܶܐ ܠܘ ܩܘܕܘܣ ܥܰܡ ܐܝ ܒܰܪܬ ܙܰܘܓܰܝܕ݂ܶܗ ܠܰܫܰܢ ܕܡܝܒܰܪܰܟ݂ ܡܰܕ ܕܘܟܳܬ݂ܐ ܡܩܰܕܫܶܐ. ܐܰܪܒܥܐ ܥܷܣܪܝ ܒܘ ܝܰܪܚܐ ܕܰܐܢ ܐܰܪܒܥܐ ܕܝ ܕܰܬ ܬܪܰܠܦܐ ܚܰܡܷܫ ܒܘ ܥܶܕ݂ܐ ܕܐܘ ܐܘܫܰܥܢܐ ܒܝ ܥܝܬܐ ܕܡܳܪܝ̱ ܝܰܥܩܘܒ ܕܰܣܪܘܓ݂ ܒܒܶܪܠܝܢ ܡܰܣܪܰܚ ܡܶܐ ܐܝܕܳܬ݂ܶܐ ܕܡܳܪܝ̱ ܕܝܘܢܢܳܣܝܘܣ ܥܝܣܰܐ ܓܘܪܒܘܙ ܒܘ ܙܰܒܢܰܘܐ ܐܘ ܚܰܣܝܐ ܕܰܐܠܡܰܢܝܰܐ، ܐܘܥܕܐ ܕܷܣܘܝܣܪܰܐ ܕܢܰܡܣܰܐ ܝܐ ܡܰܣܪܰܚ ܐܰܪܟ݂ܷܕܝܰܩܘܢ ܠܰܠܡܰܢܝܰܐ ܟܘܠܰܐ. ܐܘ ܫܰܡܳܫܐ ܓܰܒܪܐ ܫܓ݂ܝܠܶܐ ܒܰܐ ܒܶܝܬ݂ ܟܪܝܗܶܐ ܗܘܠ ܕܗܰܘܝ ܐܰܡܰܟܠܝ. ܥܰܡ ܐܘ ܫܘܓ݂ܠܰܝܕ݂ܶܗ، ܗܶܫ ܒܝ ܥܝܬܐ ܕܡܳܪܝ̱ ܝܰܥܩܘܒ ܒܷܬ݂ܷܪ ܒܝ ܥܝܬܐ ܕܡܳܪܝ̱ ܥܙܳܙܳܐܝܠ ܣܬܶܐ ܕܰܐܝܡܰܐ ܡܳܠܰܦ ܘܰܐ ܠܘ ܓܳܪܰܢ ܕܘ ܚܰܝܠܰܝܕ݂ܶܗ ܐܰܝ ܝܳܠܘܦܶܐ. ܥܰܡ ܐܘ ܫܘܓ݂ܠܐ ܐܘ ܬܶܩܪܝـܝܐ ܕܰܐ ܝܳܠܘܦܶܐ ܣܬܶܐ ܐܰܠܳܗܐ ܗܘܘܰܝܠܶܠܶܗ ܡܰܘܗܰܒܬ݂ܐ ܕܝ ܟܬ݂ܰܘܬܐ. ܡܰܘܟ݂ܰܐ ܟܬ݂ܘܠܶܗ ܟܬ݂ܳܘܶܐ ܓ݂ܰܠܰܒܶܐ ܠܰܥ ܥܝܕܳܬ݂ܐ ܟ݂ܘܕ ܦܰܢܩܝܳܬ݂ܶܐ ܘܚܘܣܳܝܶܐ ܔܓ݂ܰܝܪ ܟܬ݂ܳܘܶܐ. ܒܝ ܫܰܬܐ ܕܰܬܪܰܠܦܐ ܘܫܘܰܥ ܚܙܶܐ ܣܢܝܩܘܬ݂ܐ ܕܫܘܩܠܷܢܢܶܗ ܥܝܬܐ ܚܪܶܬܐ ܒܒܶܪܠܝܢ. ܫܩܷܠܠܰܢܶܗ ܥܝܬܐ ܘܡܥܰܕܠܰܠܶܗ ܘܡܚܰܬ݂ܬܰܠܠܶܗ. ܬܡܳܢܰܥܣܰܪ ܒܘ ܝܰܪܚܐ ܕܰܬܡܰܢܝܐ ܒܰܬ ܬܪܰܠܦܐ ܫ̰ܰܥܣܰܪ ܡܩܰܕܫܰܠܠܶܗ. ܒܘ ܩܘܪܳܒܐ ܐܰܠܳܗܳܝܐ ܕܷܡܪܰܝܫܰܢܠܶܠܶܗ ܐܘ ܦܰܛܷܪܝܰܪܟ݂ܰܝܕ݂ܰܢ ܡܳܪܝ̱ ܐܝܓ݂ܢܰܐܛܝܘܣ ܐܰܦܪܶܝܡ ܬܪܰܝܳܢܐ ܥܰܡ ܚܣܰܝܐ ܘܥܰܡܐ ܡܗܰܝܡܢܐ ܕܚܰܕ݂ܶܪ ܘܰܐ ܡܶܐ ܟܘܠ ܕܘܟܬ݂ܐ ܕܝܠܳܢܳܐܝܬ݂ ܐܰܟ ܟܦܰܪܙܳܝܶܐ ܕܟܳܥܰܝܫܝ ܒܰܐܘܪܘܦ݁ܰܐ. ܒܷܬ݂ܷܪ ܡܷܕ ܕܗܰܘܝ ܐܰܡܰܟܠܝ ܐܰܢ ܢܰܥܝܡܰܝܕ݂ܶܗ ܫܩܷܠܰܠܶܗ ܒܰܝܬܐ ܒܷܐܤܛܰܢܒܷܠ ܥܰܠ ܦܶܡܶܗ ܕܘ ܒܰܚܰܪ ܐܳܬ݂ܶܐ ܘܰܐ ܒܘ ܩܰܝܛܐ ܠܰܫܰܢ ܕܡܷܬ݂ܢܰܚ ܐܶܒܶܗ ܥܰܡ ܐܝ ܒܰܪܬ݂ ܙܰܘܓܰܝܕ݂ܶܗ. ܒܝ ܫܰܬܐ ܕܰܬܪܰܠܦܐ ܘܫ̰ܰܥܣܰܪ ܟ݂ܘܕ ܟܘܠ ܫܰܬܐ ܐܰܬ݂ܝ ܠܷܤܛܰܢܒܷܠ ܠܰܫܰܢ ܕܡܰܫܦܰܥ ܐܘ ܒܰܛܠܳܢܐ ܩܰܝܛܳܝܐ ܬܰܡܐ. ܗܰܘܝ ܐܘ ܩܶܕܳܫܐ ܕܝ ܥܝܬܐ ܕܡܳܪܝ̱ ܥܙܳܙܳܐܝܠ ܕܒܶܪܠܝܢ ܥܰܡ ܕܗܰܘܝܠܶܗ ܬܰܥܒܐ ܒܘ ܫܩܳܠܐ ܘܒܘ ܥܶܕܳܠܰܝܕ݂ܰܗ ܣܬܶܐ ܠܐ ܐܰܙܙܶܐ ܝܐ. ܥܰܠ ܡܶܩܷܡ ܚܰܡܷܫ ܐܷܫܢܶܐ ܐܘ ܚܰܘܪܰܝܕ݂ܶܗ ܕܘ ܫܘܓ݂ܠܐ ܫܰܡܥܘܢ ܐܝܫܠܶܝܶܢ ܐܘ ܝܰܘܡܐ ܕܷܓܕܘܥܪܝ ܠܰܠܡܰܢܝܰܐ ܟܰܠܝ ܠܶܒܶܗ ܒܘ ܒܶܝܬ݂ ܛܰܘܣܐ. ܗܝـܝܶܐ ܣܬܶܐ ܠܩܝܬ ܘܰܐ ܒܠܶܒܶܗ ܘܳܐܡܰܪ ܘܰܐ ܐܳܢܐ ܣܬܶܐ ܓܡܳܝܰܬ݂ ܢܐ ܟ݂ܕܘ ܫܰܡܥܘܢ ܒܘ ܒܶܝܬ݂ ܛܰܘܣܐ ܡܰܘܟ݂ܰܐ ܣܬܶܐ ܠܰܙܙܶܐ ܠܘ ܩܶܕܳܫܐ ܕܝ ܥܝܬܐ. ܗܰܘܝ ܐܷܫܬܰܥܣܰܪ ܒܘ ܝܰܪܚܐ ܕܰܬ ܬܷܫܥܐ ܕܰܬ ܬܪܰܠܦܐ ܫ̰ܰܥܣܰܪ ܐܘ ܝܰܘܡܐ ܕܟܳܠܳܙܰܡ ܕܘܥܪܝ ܠܰܠܡܰܢܝܰܐ ܗܝـܝܶܐ ܐܝ ܐܰܬ݂ܬܐ ܐܰܬܪܶܐ ܐܰܒܢܶܐ ܘܐܝ ܟܰܠܐ ܡܰܩܪܰܛܛܶܗ ܨܰܦܪܐ ܥܰܡ ܚܕ݂ܳܕ݂ܶܐ. ܠܰܦ ܦܰܠܓܶܗ ܕܝܰܘܡܐ ܐܰܟ݂ܷܠܠܶܗ ܐܰܒܝܥܝ ܕܢܷܦܩܝ ܕܪܰܘܟ݂ܝ ܒܝ ܪܰܕ݂ܳܝܬܐ. ܦܪܷܩܩܶܗ ܐܶܒܶܗ ܕܠܰܬܝܐ ܪܰܚܰܐ، ܩܪܰܠܠܶܗ ܠܘ ܐܰܡܒܘܠܰܢܨ ܐܰܬ݂ܝ ܟܰܝـܝܦܐ ܡܰܪܘܰܟ݂ܟ݂ܶܐ، ܐܘ ܐܰܒܪܐ ܪܰܒܐ ܡܷܪܠܶܠܷܢ ܙܳܟ݂ܘ ܗܰܬܘ ܪܘܰܟ݂ܘ، ܐܳܢܐ ܓܡܰܘܒܰܠܢܶܗ ܠܰܒ ܒܶܝܬ݂ ܟܪܝܗܶܐ ܬܪܶܐ ܬܠܳܬ݂ܐ ܝܰܘܡܶܐ ܗܘܠ ܕܡܝܚܰܨ ܐܷܫܡܐ ܓܕܳܬ݂ܝܢܰܐ ܥܰܡ ܚܕ݂ܳܕ݂ܶܐ. ܗܷܢܢܶܗ ܪܰܘܝܟ݂ܝ ܐܰܙܙܷܢ ܠܘ ܒܶܝܬ݂ ܛܰܘܣܐ ܗܝـܝܶܐ ܐܰܙܙܶܐ ܐܰܥܡܶܗ ܠܰܒ ܒܶܝܬ݂ ܟܪܝܗܶܐ. ܗܶܫ ܒܘ ܐܰܡܒܘܠܰܢܨ ܟܰܠܝ ܠܶܒܶܗ ܐܶܠܐ ܩܰܕܝܪܝ ܐܰܕ ܕܷܟ݂ܶܬܷܪ ܕܡܰܕܷܥܪܝܠܶܗ ܠܰܚ ܚܰܝܶܐ. ܡܰܛܷܢ ܠܝ ܒܶܝܬ݂ ܟܪܝܗܶܐ ܠܰܬܝܡܝ ܐܰܕ ܕܷܟ݂ܶܬܷܪ ܡܷܪܠܷܢ ܠܰܘ ܐܰܒܪܐ ܝܰܘܣܶܐ؛ ܟܝܬ ܘܰܪܝܕ݂ܐ ܡܷܕ ܠܶܒܶܗ ܣܟ݂ܝܪܐ ܟܳܠܳܙܰܡ ܕܡܷܦܬܰܚ ܟܷܡܚܰܝܕ݂ܪܝܢܰܐ ܪܘܚܰܝܢܰܐ ܕܦܷܬܚܝܢܰܐ ܠܶܗ ܐܶܠܐ ܠܶܒܶܗ ܓ݂ܰܠܰܒܶܐ ܙܰܥܝܦ ܟܳܡܳܚܶܐ ܟܳܠܳܙܰܡ ܕܗܳܘܝܬܘ ܚܰܕ݂ܝܪܶܐ ܠܟܘܠ ܡܶܕܶܐ. ܗܶܫ ܗܷܢܢܶܗ ܗܰܘܟ݂ܰܐ ܟܳܡܚܰܝܕ݂ܪܝ ܪܘܚܰܝـܝܶܗ ܕܷܡܕܰܟ݂ܠܝ ܕܩܘܕܪܝ ܦܷܬܚܝ ܐܘ ܘܰܪܝܕ݂ܳܐ ܕܟܷܬܘܰܐ ܣܟ݂ܝܪܐ، ܐܰܬ݂ܝ ܐܘ ܟ݂ܰܒܪܐ ܡܰܝـܝܪܐ ܡܷܪܠܷܢ؛ ܥܰܡܚܒܳܠ ܟܰܠܝ ܠܶܒܶܗ ܘܡܚܰܣܶܐ، ܪܝܫܰܝܟ݂ܘ ܒܰܣܝܡܐ. ܕܰܕܝ ܐܰܢ ܢܳܫܶܐ ܚܪܶܢܶܐ ܪܰܘܝܟ݂ܝ ܘܰܐ ܒܝ ܛܰܝܳܣܬܐ ܡܰܘܟ݂ܰܐ ܢܰܛܷܪ ܐܘ ܐܰܒܪܰܝܕ݂ܶܗ ܗܘܠ ܕܢܘܚܬܝ ܡܝ ܛܰܝܳܣܬܐ ܡܷܕ ܕܢܰܚܝܬܝ ܡܰܫܡܰܥܠܷܠܷܢ ܐܘ ܛܷܒܐ ܕܘ ܫܘܢܳܝܐ ܕܘ ܒܰܒܐ. ܒܷܬ݂ܷܪ ܡܰܛܝ ܐܘ ܟ݂ܰܒܪܐ ܐܶܠܰܢ ܣܬܶܐ ܩܰܝܷܡ ܡܫܰܝܷܠܝ ܥܰܠ ܛܰܝܳܣܬܐ ܠܷܤܛܰܢܒܷܠ ܠܐ ܩܰܝܷܬ݂ܠܝ ܦܷܬܩܐ ܗܷܢܓܝ ܟܝܬ ܢܳܫܶܐ ܐܰܙܳܠܶܗ ܘܰܐܬ݂ܳܝܶܐ ܠܛܘܪܥܰܒܕܝܢ. ܠܐ ܡܶܐ ܡܰܪܕܶܐ ܘܠܐ ܡܶܐ ܒܰܛܡܰܢ ܘܠܐ ܡܶܐ ܗܰܙܰܟ، ܟܘܠܠܶܗ ܡܰܠܝܶܘܰܝܢܶܗ. ܡܰܘܟ݂ܰܐ ܕܶܪ ܕܘ ܝܰܘܡܐ ܩܛܷܥ ܠܝ ܒܷܠܶܛ ܒܘ ܒܰܨܐ ܐܰܙܙܝ ܠܷܤܛܰܢܒܷܠ ܓܪܷܫܠܶܗ ܐܘ ܕܰܪܒܐ ܐܰܥܡܝ ܬܰܪܬܶܐ ܘܥܷܣܪܝ ܣܰܥܰܝܰܬ. ܕܶܪ ܕܘ ܝܰܘܡܐ ܝܰܥܢܝ ܬܡܳܢܰܥܣܰܪ ܒܘ ܝܰܪܚܐ ܡܰܛܝ ܢܐ ܠܘ ܐܰܒܪܐ ܕܥܰܡܝ ܐܘ ܝܰܘܣܶܐ. ܐܳܢܐ ܥܰܠ ܕܟܷܬܘܰܝܠܝ ܘܝܙܰܐ ܚܰܕ݂ܷܪܬܐ ܩܰܕܷܪܢܐ ܒܥܰܝܢܝ ܝܰܘܡܐ ܕܩܳܛܰܥ ܢܐ ܒܷܠܶܛ ܘܕܷܐܙܙܝ ܐܰܥܡܶܗ. ܪܰܘܝܟ݂ܝ ܢܰܐ ܒܝ ܛܰܝܳܣܬܐ ܥܰܡ ܚܕ݂ܳܕ݂ܶܐ ܘܡܷܕ ܠܰܢ ܐܘ ܦܰܓ݂ܪܐ ܕܥܰܡܡܝ ܐܘ ܫܰܡܳܫܐ ܣܬܶܐ ܦܰܝـܝܪܝܢܰܐ ܠܒܰܪܠܝܢ. ܥܰܡܡܝ ܐܘ ܫܰܡܳܫܐ ܗܶܫ ܗܝـܝܶܐ ܒܰܚ ܚܰـܝܶܐ ܛܠܷܒܘܰܝܠܶܗ ܕܡܝܬܰܚܷܬ ܐܘ ܦܰܓ݂ܪܰܝܕ݂ܶܗ ܒܝ ܩܪܝܬ݂ܐ ܕܷܟܦܰܪܙܶܐ. ܐܶܠܐ ܐܰܢ ܢܰܥܝܡܰܝܕ݂ܶܗ ܟܘܠܠܶܗ ܒܒܶܪܠܝܢ ܟܳܥܰܝܫܝ ܘܒܷܬ݂ܷܪ ܐܘ ܐܰܒܪܐ ܕܥܰܡܡܝ ܛܪܶܠܷܗ ܐܘ ܩܰܪܰܪ ܠܰܢ ܢܷܒܓ݂ܰܝܕܶܗ ܥܰܠ ܕܟܘܠܠܶܗ ܛܠܷܒܠܷܢ ܕܡܝܬܰܚܷܬ ܒܒܶܪܠܝܢ ܡܰܘܟ݂ܰܐ ܡܰܘܒܶܠܰܢ ܠܰܠܡܰܢܝܰܐ. ܢܰܚܝܬܝܢܰܐ ܡܝ ܛܰܝܳܣܬܐ ܐܰܬ݂ܷܢܘܰܐ ܠܩܰܡܘܬ݂ܰܝܢܰܐ ܐܰܗܷܠ ܓ݂ܰܠܰܒܶܐ ܪܰܘܝܟ݂ܝܢܰܐ ܥܰܡ ܚܕ݂ܳܕ݂ܶܐ ܐܰܙܙܰܢ ܠܘ ܒܰܝܬܐ ܕܥܰܡܡܝ ܫܰܡܳܫܐ، ܐܝ ܐܝܩܰܪܬ݂ܐ ܟܘܠܰܐ ܠܰܬܝܡܳܘܰܐ ܬܰܡܐ ܒܚܰܫܐ. ܥܰܒܝܪܝܢܰܐ ܚܕ݂ܷܢܠܰܢ ܘܢܫܷܩܠܰܢ ܚܕ݂ܳܕ݂ܶܐ ܟܘܠܰܝܢܰܐ ܒܳܟ݂ܝܘܰܝܢܰܐ ܥܰܠ ܥܰܡܡܝ ܕܷܦܪܝܫ ܡܶܐ ܒܰܝܢܳܬ݂ܰܝܢܰܐ. ܠܐ ܒܰܣ ܐܘ ܐܰܗܷܠ ܟܘܠ ܡܰܢ ܕܫܰܡܷܥ ܗܰܘܝܘܰܐ ܫܳܩ ܘܠܐ ܡܷܬܝܰܩܢܝܘܰܐ، ܡܰܘܟ݂ܰܐ ܐܘ ܐܰܒܪܐ ܕܥܰܡܡܝ ܐܘ ܝܰܘܣܶܐ؛ ܡܰܚܟܶܐ ܠܶܗ ܠܟܘܠܠܶܗ ܐܰܝܕܰܪܒܐ ܘܡܷܢ ܫܷܟܷܠ ܗܰܘܝ ܐܘ ܡܰܘܬܐ ܕܥܰܡܡܝ، ܟܘܠܠܶܗ ܒܳܟ݂ܷܢܘܰܐ. ܕܶܪ ܕܘ ܝܰܘܡܐ ܗܘܠ ܥܰܣܪܝـܝܶܐ ܡܰܢ ܕܫܰܡܷܥ ܐܳܬ݂ܶܐ ܘܰܐ ܠܘ ܒܰܝܬܐ. ܒܷܬ݂ܷܪ ܒܥܰܣܪܝـܝܶܐ ܟܘܠ ܢܳܫܐ ܐܷܙܙܶܐ ܘܰܐ ܠܘ ܨܰܠܳܢ. ܒܰܐܘܪܘܦ݁ܦ݁ܰܐ ܥܰܠ ܕܰܐܢ ܢܳܫܶܐ ܟܘܠܠܶܗ ܫܰܓ݂ܳܠܶܐ ܢܶܐ ܡܰܘܟ݂ܰܐ ܐܰܡ ܡܥܰܙܝـܝܰܬ ܥܰܣܪܝـܝܶܐ ܟܳܣܰܝܡܷܢܢܶܗ ܒܘ ܨܰܠܳܢ ܕܰܐ ܥܝܬܳܬ݂ܶܐ. ܡܰܘܟ݂ܰܐ ܐܝ ܡܥܰܙܝـܝܶܐ ܕܥܰܡܡܝ ܡܰܚܬܰܠܠܶܗ ܒܘ ܨܰܠܳܢ ܕܝ ܥܝܬܐ ܕܡܳܪܝ̱ ܥܙܳܙܳܐܝܠ. ܟܘܠ ܥܰܣܪܝـܝܶܐ ܐܷܙܙܰܐܢ ܘܰܐ ܠܘ ܨܰܠܳܢ ܐܘ ܥܰܡܐ ܕܒܶܪܠܝܢ ܟܘܠܶܗ ܣܘܪܝܳܝܶܐ، ܐܰܠܡܰܢ، ܬܷܪܟܳܝܶܐ ܥܰܡ ܐܰܛ ܛܰܝܶܐ ܕܷܟܦܰܪܙܶܐ ܕܟܳܥܰܝܫܝ ܒܒܶܪܠܝܢ ܐܳܬ݂ܷܢ ܘܰܐ ܠܝ ܡܥܰܙܝـܝܶܐ. ܐܰܟ ܟܳܗܢܶܐ ܟܳܟܘܪܙܝ ܥܰܠ ܐܘ ܥܰܡܐ ܐܝ ܡܶܠܬ݂ܐ ܕܰܐܠܳܗܐ، ܐܰܥ ܥܠܰܝܡܶܐ ܕܰܐܢ ܐܰܪܒܰܥ ܥܝܬܳܬ݂ܐ ܥܰܡ ܐܰܡ ܡܰܘܬܒܰܬ݂ܬ݂ܶܗ ܟܳܟ݂ܘܕܡܝ ܒܘ ܨܰܠܳܢ ܟܳܡܰܡܛܷܢ ܩܰܚܘܶܐ ܘܫ̰ܰܝܶܐ ܗܘܠ ܠܘ ܝܰܘܡܐ ܕܘ ܬܠܳܝܐ. ܚܰܐ ܥܶܣܪܝ ܒܘ ܝܰܪܚܐ ܕܟܷܬܝܐ ܝܰܘܡܶܐ ܕܫܰܒܬܐ ܒܝ ܫܳܥܬ݂ܐ ܚܕܰܥܣܰܪ ܡܩܰܪܰܘ ܩܘܪܳܒܐ ܐܰܠܳܗܳܝܐ ܒܝ ܥܝܬܐ ܕܡܳܪܝ̱ ܥܙܳܙܳܐܝܠ ܒܝ ܪܝܫܳܢܘܬ݂ܐ ܕܡܳܪܝ̱ ܦܝܠܠܘܟܣܝܢܘܣ ܡܰܬܝܰܐܣ ܢܰܐܝܫ ܐܘ ܚܰܣܝܐ ܕܰܐܠܡܰܢܝܰܐ ܘܥܰܡ ܡܳܪܝ̱ ܝܘܠܝܘܣ ܐܘ ܚܰܣܝܐ ܕܰܐܢ ܐܶܣܳܪܶܐ ܒܰܪܳܝܶܐ ܕܰܐܠܡܰܢܝܰܐ. ܘܡܡܰܬ݂ܠܳܢܐ ܕܝ ܥܝܬܐ ܕܰܐ ܩܘܦ݁ܛܳܝܶܐ ܘܥܰܡ ܟܳܗܢܶܐ، ܡܫܰܡܫܳܢܶܐ ܘܥܰܡܐ ܓ݂ܰܠܰܒܶܐ ܕܰܐܬ݂ܝ ܡܶܐ ܟܘܠ ܕܘܟܬ݂ܐ ܕܚܘܕ݂ܪܝ ܒܘ ܠܘܘܳܝܐ ܕܐܘ ܐܰܪܟ݂ܷܕܝܰܩܘܢ ܓܰܒܪܐ ܓܘܪܩܰܐܢ. ܒ݂ܷܬ݂ܷܪ ܡܘ ܩܘܪܳܒܐ ܐܰܠܳܗܳܝܐ ܒܕܰܠܠܶܗ ܒܘ ܛܷܟܣܐ ܕܘ ܥܘܦܳܝܐ ܕܰܡ ܡܫܰܡܫܳܢܶܐ. ܒ݂ܷܬ݂ܷܪ ܡܝ ܨܠܘܬ݂ܐ ܕܘ ܥܘܦܳܝܐ ܒܝ ܩܰܡܰܝܬܐ ܩܰܪܝܐ ܐܝ ܐܶܓܰܪܬ݂ܐ ܕܐܘ ܦܰܛܷܪܝܰܪܟ݂ܐ ܕܷܡܫܰܕܪܐ ܠܘ ܚܰܣܝܐ ܕܘ ܡܰܪܥܝܬ݂ܐ ܒ݂ܷܬ݂ܷܪ ܚܰܣܝܐ ܡܰܬܝܰܐܣ ܟܪܷܙܠܶܗ ܟܳܪܘܙܘܬ݂ܐ ܒܰܣܷܡܬܐ ܡܘ ܟܬ݂ܳܘܐ ܩܰܕܝܫܐ ܘܡܰܚܟܶܠܶܗ ܐܷܫܡܐ ܥܰܠ ܐܰܕ ܕܝܠܳܝܳܬ݂ܐ ܕܘ ܡܢܳܚ ܢܰܦܫܐ. ܒ݂ܷܬ݂ܷܪ ܐܘ ܟܳܗܢܐ ܕܝ ܥܝܬܐ ܩܰܫܝܫܐ ܢܷܥܡܰܐܢ ܓܘܢܶܝ ܘܩܰܫܝܫܐ ܡܘܪܰܕ ܡܷܕܗܳܝܐ ܟܪܷܙܠܷܢ ܥܰܠ ܐܰܚ ܚܰـܝܰـܝܕ݂ܶܗ. ܒ݂ܷܬ݂ܷܪ ܐܳܢܐ ܡܩܰܕܰܡܠܝ ܬܰܘܕܝܳܬ݂ܐ ܒܷܫܡܶܐ ܕܝ ܐܝܩܰܪܬ݂ܐ ܠܟܘܠܠܶܗ ܐܰܚ ܚܰܕ݂ܝܪܶܐ ܘܰܠܟܘܠ ܡܰܢ ܕܗܰܘܝܠܶܗ ܬܰܥܒܐ. ܒܷܬ݂ܷܪ ܡܶܢܝ ܐܝ ܢܰܦܝܟܰܝܕ݂ܶܗ ܡܰܕܠܝܢ ܐܝ ܒܰܪܬ݂ܐ ܕܘ ܝܰܘܣܶܐ ܔܓ݂ܝܠܐ ܒܘ ܐܰܠܡܰܢܝ ܟܰܪܝܐ ܥܰܠ ܐܰܚ ܚܰـܝܰـܝܕ݂ܶܗ ܘܗܰܘܟ݂ܰܐ ܟܰܡܝܠܐ ܐܝ ܬܰܚܪܰܣܬܐ ܕܘ ܠܶܘܳܝܐ. ܒܷܬ݂ܷܪ ܡܷܕ ܕܟܰܡܷܠ ܐܘ ܛܷܟܣܐ ܕܘ ܥܘܦܳܝܐ، ܐܰܫ ܫܰܡܳܫܶܐ ܐܰܟ ܟܳܗܢܶܐ ܥܰܡ ܐܰܚ ܚܰܣܝܶܐ ܒܝ ܩܰܡܰܝܬܐ ܡܗܰܠܰܟ݂ܟ݂ܶܗ ܘܙܷܡܪܝܘܰܐ ܩܳܠܶܗ، ܐܰܢ ܐܰܒܢܶܐ ܕܘ ܡܚܰܣܝܐ ܛܥܷܢܢܶܗ ܐܘ ܬܰܒܘܬ ܘܡܳܦܰܩܩܶܗ ܡܝ ܥܝܬܐ ܗܘܠ ܠܝ ܪܰܕ݂ܰܝܬܐ ܠܰܫܰܢ ܕܡܝܬܰܘܒܰܠ ܠܰܒ ܒܶܝܬ݂ ܩܒܘܪܶܐ ܕܰܐ ܣܘܪܝܳܝܶܐ ܕܟܷܬܠܰܢ ܒܒܶܪܠܝܢ. ܐܘ ܥܰܡܐ ܟܘܠܶܗ ܪܰܘܷܟ݂ ܒܰܐ ܪܰܕ݂ܳܝܳܬ݂ܐ ܐܰܙܙܰܐܢ ܐܰܚܢܰܐ ܣܬܶܐ ܐܰܥܡܰܝـܝܶܗ. ܒܷܬ݂ܷܪ ܡܷܕ ܚܰܕ݂ܷܪ ܟܘܠ ܢܳܫܐ ܡܫܰܪܷܠܶܗ ܐܘ ܚܰܣܝܐ ܒܝ ܨܠܘܬ݂ܐ ܗܝܘ ܐܘ ܦܰܓ݂ܪܰܝܕ݂ܶܗ ܠܘ ܥܰܦܪܐ ܥܰܠ ܐܘ ܣܰܒܪܐ ܕܝ ܩܝܰܡܬܐ. ܒܷܬ݂ܷܪ ܡܘ ܬܠܳܝܐ ܕܰܥܝܪܝܢܰܐ ܠܝ ܥܝܬܐ ܡܚܰܝܕ݂ܰܪ ܡܘܟܠܐ ܠܰܢ ܢܳܫܶܐ ܟܘܠܠܶܗ ܒܘ ܨܰܠܳܢ ܥܰܠ ܐܝ ܪܘܚܰܝܕ݂ܶܗ ܒܷܬ݂ܷܪ ܡܷܕ ܕܰܟ݂ܠܠܶܗ ܟܘܠܠܶܗ، ܓ݂ܰܠܰܒܶܐ ܡܰܢ ܢܳܫܶܐ ܕܰܐܬ݂ܷܢ ܡܰܐ ܕܘܟܟܳܬ݂ܶܐ ܪܰܚܘܩܶܐ ܛܠܷܒܠܷܢ ܟ݂ܰܛܷܪ ܘܕܰܥܝܪܝ ܠܰܒ ܒܳܬܳܬ݂ܶܐ. ܝܰܘܡܶܐ ܕܚܘܫܰܒܐ ܣܬܶܐ ܠܘ ܕܘܟ݂ܪܳܢܐ ܕܰܬܠܳܬ݂ܐ ܝܰܘܡܶܐ ܡܩܰܪܰܘ ܩܘܪܳܒܐ ܐܰܠܳܗܳܝܐ ܥܰܠ ܐܝ ܪܘܚܰܝܕ݂ܶܗ ܒܐܝܕ݂ܶܗ ܕܟ݂ܘܪܝ ܥܰܒܕܐ ܓܘܢܶܠ، ܥܰܡ ܐܘ ܩܰܫܐ ܚܰܬ݂ܐ ܕܡܳܪܝ̱ ܥܙܳܙܳܐܝܠ ܕܒܰܠܫ̰ܝܩܰܐ ܩܰܫܝܫܐ ܔܳܪܔ ܓܘܠܶܔ ܘܡܬܰܗܘܶܐ ܩܪܳܛܷܢ ܥܰܠ ܐܝ ܪܘܚܰܝܕ݂ܶܗ ܘܦܰܝـܝܫܝܢܰܐ ܒܘ ܨܰܠܳܢ ܗܘܠ ܠܝ ܨܠܘܬܐ ܕܥܰܣܪܝـܝܶܐ ܘܒܷܬ݂ܷܪ ܡܒܰܪܒܙܝ ܐܰܢ ܢܳܫܶܐ ܠܰܒ ܒܳܬܶܐ. ܝܰܘܡܶܐ ܕܚܘܫܰܒܐ ܕܒܷܬ݂ܷܪ ܣܬܶܐ، ܣܷܡܠܰܢ ܐܘ ܕܘܟ݂ܪܳܢܐ ܕܰܬ ܬܷܫܥܐ ܝܰܘܡܰܝܕ݂ܶܗ. ܕܷܪ ܕܘ ܝܰܘܡܐ ܕܟܷܬܝܐ ܬܠܷܬ݂ܝ ܒܘ ܝܰܪܚܐ ܪܰܘܷܟ݂ܢܐ ܒܝ ܛܰܝܳܣܬܐ ܠܷܤܛܰܢܒܷܠ ܘܡܶܐ ܬܰܡܐ ܠܡܰܪܕܶܐ ܘܰܐܬ݂ܝ ܢܐ ܠܘ ܒܰܝܬܐ ܠܡܶܕ݂ܝܰܕ݂. ܐܷܫܬܐ ܒܐܘ ܝܰܪܚܐ ܕܰܐ ܥܰܣܪܐ ܡܰܪܟܰܘ ܠܰܢ ܡܥܰܙܝـܝܶܐ ܒܡܷܕ݂ܝܰܕ݂ ܣܬܶܐ، ܘܫܰܘܥܐ ܥܶܣܪܝ ܒܐܘ ܝܰܪܚܐ ܒܟܘܠ ܕܘܟܬ݂ܐ ܕܟܝܬ ܐܰܗܷܠ ܣܷܡܠܰܢ ܐܘ ܕܘܟ݂ܪܳܢܐ ܕܰܐܢ ܐܰܪܒܥܝ ܝܰܘܡܰܝܕ݂ܶܗ. ܒܰܐܠܡܰܢܝܰܐ، ܒܒܰܠܫ̰ܝܩܰܐ، ܒܷܣܘܝܪܰܐ، ܒܗܘܠܰܢܕܰܐ، ܒܰܐܘܣܬܪܰܠܝܐ ܘܗܰܡ ܗܰܪܟܶܐ ܒܛܘܪܥܰܒܕܝܢ ܣܬܶܐ. ܫܰܡܳܫܐ ܓܰܒܪܐ ܒܝ ܕܘܟܬ݂ܐ ܕܗܳܘܶܐ ܘܰܐ ܝܰܬܝܘܐ ܕܰܐܝܡܰܐ ܣܳܝܰܡܘܰܐ ܚܰܢܰܟܶܐ ܡܰܓܚܰܟܘܰܐ ܐܰܢ ܢܳܫܶܐ. ܡܰܘܟ݂ܰܐ ܟܳܡܷܬܝܰܩܰܢܢܐ ܟܘܠ ܒܰܪܢܳܫܐ ܕܥܰܝܷܫ ܐܰܥܡܶܗ ܡܘܚܰܩܰܩ ܟܷܬܠܶܗ ܡܶܕܶܐ ܕܡܰܚܟܶܐ ܥܰܠ ܐܘ ܫܰܡܳܫܐ ܒܝ ܛܰܘܬܐ. ܫܰܡܳܫܐ ܓܰܒܪܐ ܥܰܠ ܕܟܷܬܝܐ ܚܰܐ ܡܰܐ ܩܰܡܳܝܶܐ ܕܰܐܙܙܶܐ ܠܰܠܡܰܢܝܰܐ ܓ݂ܰܠܰܒܶܐ ܡܰܐ ܣܘܪܝܳܝܶܐ ܕܷܡܓܰܠܘܷܠܷܢ ܤܰܛܝܪܝ ܓܰܒܶܐ ܒܘ ܒܰܝܬܐ ܒܰܝ ܝܰܘܡܶܐ ܒܘ ܡܘܟܠܐ ܒܘ ܫܬܳܝܐ ܗܘܠ ܕܷܡܩܰܦܶܘܰܠܠܶܗ ܒܳܬܶܐ. ܘܓ݂ܰܠܰܒܶܐ ܢܳܫܶܐ ܕܡܝܨܳܕܝ ܘܰܐ ܒܰܐ ܚܘܕܘܕܰܬ ܐܷܙܙܶܐ ܘܰܐ ܕܠܐ ܟܰܣܰܠܶܐ ܟܳܦܰܠܘܰܝܠܷܢ ܡܰܡܛܷܘܰܝܠܷܢ ܠܓܰܒܶܐ ܠܘ ܒܰܝܬܐ. ܕܝܠܳܢܳܐܝܬ݂ ܐܘ ܐܰܒܪܐ ܐܘ ܝܰܘܣܶܐ ܒܘ ܣܝܳܡܐ ܕܰܐ ܘܰܪܩܰܬ݂ܬ݂ܶܗ ܘܗܰܡ ܥܰܠ ܕܟܷܬܘܰܐ ܡܬܰܪܓܡܳܢܐ ܡܰܘܡܝܐ ܒܝ ܕܰܘܠܶܗ ܡܥܰܘܰܢ ܠܶܗ ܠܓ݂ܰܠܰܒܶܐ ܢܳܫܶܐ ܒܘ ܩܶܦܳܝܐ ܕܰܒ ܒܳܬܶܐ ܘܕܘ ܫܘܓ݂ܠܐ ܗܰܬ݂ܶܐ ܫܰܡܷܥܢܳܠܰܐ ܡܶܐ ܓ݂ܰܠܰܒܶܐ ܢܳܫܶܐ ܕܟܳܥܰܝܫܝ ܐܘܥܕܐ ܒܒܶܪܠܝܢ. ܫܰܡܳܫܐ ܓܰܒܪܐ ܐܝܕ݂ܶܗ ܦܬܷܚܬܐ ܘܰܐ ܓ݂ܰܠܰܒܶܐ ܠܝ ܡܥܰܕܪܳܢܘܬ݂ܐ ܕܰܡ ܡܷܣܟܝܢܶܐ، ܟܡܐ ܢܰܩܩܰܬ ܕܰܐܙܙܝ ܢܐ ܐܳܢܐ ܠܒܶܪܠܝܢ ܟܘܪܟ݂ܝܘܰܝܢܰܐ ܥܰܡ ܚܕ݂ܳܕ݂ܶܐ ܒܝ ܫܘܩܐ ܡܰܢ ܕܚܳܙܶܐ ܘܰܐ ܦܰܩܝܪܐ، ܣܢܝܩܳܝܐ ܘܚܰܬܬܰܐ ܫܰܬܳܝܶܐ ܐܳܒܷܘܰܝܠܷܢ ܙܘܙܶܐ، ܐܳܡܰܪܘܰܐ ܫܩܰܠܳܟ݂ ܡܶܕܶܐ ܐܰܦ݁ܦ݁ܶܗ. ܘܪܳܚܰܡܘܰܐ ܐܝ ܥܝܬܐ ܘܐܝ ܨܠܘܬ݂ܐ ܓ݂ܰܠܰܒܶܐ ܡܰܘܟ݂ܰܐ ܒܟܘܠ ܫܩܳܠܐ ܕܥܝܬܐ ܡܫܰܪܰܟܠܶܗ ܠܘ ܓܳܪܰܢ ܕܘ ܚܰܝܠܰܝܕ݂ܶܗ. ܘܠܐ ܛܪܶܐ ܠܶܗ ܡܝ ܥܝܬܰܝܕ݂ܶܗ ܗܘܠ ܠܰܝ ܝܰܘܡܰܝܕ݂ܶܗ ܐܰܚ ܚܰܪܳܝܶܐ. ܫܰܡܳܫܐ ܓܰܒܪܐ ܚܳܝܰܪ ܘܰܐ ܒܘ ܡܶܕܶܐ ܕܰܐܝܡܰܐ ܡܣܝܡܳܢܐ ܡܰܘܟ݂ܰܐ ܕܰܐܝܡܰܐ ܠܝ ܥܡܰܪܰܐ ܡܷܔܓ݂ܰܠ ܘܰܐ ܘܠܐ ܛܳܪܶܐ ܘܰܐ ܠܶܒܶܗ ܕܢܳܫܶܐ. ܒܷܫܪܳܪܐ ܐܘ ܫܰܡܳܫܐ ܓܰܒܪܐ ܒܰܪܢܳܫܐ ܘܰܐ ܚܰܐ ܕܟܳܠܳܙܰܡ ܕܡܳܕܠܶܝܐ ܛܘܦܣܐ ܘܕܷܡܗܰܠܷܟ݂ ܘܕܚܳܐܰܪ ܒܝ ܚܙܰܝܬܰܝܕ݂ܶܗ ܒܰܚ ܚܰـܝܰܢܝ ܕܟܷܬܢܶܗ ܡܰܠܝܶܐ ܡܪܳܪܶܐ ܘܕܰܪܬܰܬ. ܡܠܦܢܐ ܐܝܗܐܢ ܓܘܪܩܐܢ 1783 ܡܠܐ