Ayhan Gürkan: ܐܰܣ ܣܘܪܝܳܝܶܐ ܘܣܛܰܡܒܷܠ /As Suryoye w Sṭambël
As Suryoye w Sṭambël
ܐܘ ܡܰܟܬܰܒܙܰܒܢܐ ܕܘ ܥܰܡܐ ܣܘܪܝܳܝܐ ܥܰܬܝܩܐ ܝܐ ܐܰܠܦܰܝܐ ܕܷܐܫܢܶܐ ܒܛܘܪܥܰܒܕܝܢ. ܒܰܣ ܡܰܫ ܫܶܒܝܶܐ ܘܡܰܐ ܬܰܗܠܝܟܰܬ ܕܰܐܬ݂ܝ ܐܰܥܠܶܗ ܡܒܰܪܒܷܙ ܒܰܢ ܐܰܪܒܰܥ ܟ݂ܰܨܰܘܷܪ ܕܝ ܐܰܪܥܐ. ܐܰܕܝܳܡܰܐ ܟܳܚܳܙܝܢܰܐ ܟ݂ܘܕ ܟܷܬܠܰܢ ܥܰܡܐ ܓ݂ܰܠܰܒܶܐ ܒܐܘܪܝܦܝ، ܒܰܐܡܶܪܝܟܰܐ ܘܒܰܐܘܣܛܘܪܰܠܝܰܐ ܗܰܘܟ݂ܰܐ ܟܷܬܠܰܢ ܥܰܡܐ ܣܘܪܝܳܝܐ ܕܟܳܥܳܝܷܫ ܒܷܐܣܛܰܢܒܷܠ ܒܷܚܕ݂ܳܝܘܬ݂ܐ ܘܬܰܚܬܝ ܪܳܥܝܘܬ݂ܐ ܕܝ ܚܰܣܝܘܬ݂ܐ ܣܘܪܝܰܝܬܐ ܕܟܳܡܝܕܰܒܪܐ ܡܶܐ ܚܰܣܝܐ ܡܳܪܝ̱ ܦܝܠܠܘܟܣܝܢܘܣ ܝܰܘܣܷܦ ܫ̰ܶܬܝܢ ܒܘ ܫܷܪܫܐ ܟܦܰܪܒܘܪܰܢܳܝܐ ܘܛܘܪܥܰܒܕܝܢܳܝܐ. ܒܝ ܩܰܡܰܝܬܐ ܟܳܠܳܙܰܡ ܚܰܝܪܝܢܰܐ ܘܕܷܐܕ݂ܥܝܢܰܐ ܐܷܫܡܐ ܐܘ ܡܰܟܬܰܒܙܰܒܢܐ ܕܷܐܣܛܰܢܒܷܠ ܘܒܷܬܷܪܟ݂ܶܐ ܐܝ ܐܰܝܟܰܢܳܝܘܬ݂ܶܕ݂ܰܗ. ܘܒܘ ܫܷܟܷܠܰܢܐ ܚܰܐ ܟܝܒܶܐ ܦܳܗܷܡ ܛܰܘ ܐܰܕܝܳܡܰܐ ܐܝ ܥܝܬܐ ܣܘܪܝܰܝܬܐ ܕܷܐܣܛܰܢܒܷܠ ܐܰܝܕܰܪܒܐ ܘܡܷܢ ܫܷܟܷܠ ܥܰܡܝܪܐ. ܐܝ ܘܰܠܰܝܶܐ ܕܷܐܣܛܰܢܒܷܠ ܟܳܦܰܝܫܐ ܒܰܝܢ ܐܰܬ ܬܰܪܬܶܐ ܩܷܛܥܰܬ ܕܰܐܣܝܰܐ ܘܕܰܐܘܪܘܦ̇ܰܐ. ܟܳܡܷܙܠܳܩܝ ܒܷܚܕ݂ܳܕ݂ܶܐ ܒܰܐ ܟܳܦ݁ܪܝܝܶܐ ܝܰܪܝܟܼܶܐ ܘܥܶܠܳܝܶܐ. ܐܘ ܡܶܕܰܢܐ ܒܘ ܬܰܪܝܟ݂ ܛܪܶܠܶܗ ܘܰܐܕܝܳܡܰܐ ܣܬܶܐ ܟܳܛܳܪܶܐ ܕܗܳܘܶܠܰܗ ܚܰܝܠܐ ܘܰܐܝܟܰܢܳܝܘܬ݂ܐ ܓ݂ܰܠܰܒܶܐ ܛܰܘܬܐ ܡܶܐ ܓܰܒܳܢܶܐ ܓ݂ܰܠܰܒܶܐ. ܘܡܝܪ ܠܷܐܣܛܰܢܒܷܠ ܡܝ ܔܳܓܼܪܰܦܝܰܐ ܕܟܷܬܠܰܗ ܐܘ ܡܰܪܟܰܙ ܕܷܒܪܝܬ݂ܐ ܒܓ݂ܰܠܰܒܶܐ ܙܰܒܢܶܐ. ܘܟܳܡܷܪ ܐܘ ܡܰܠܟܐ ܪܰܒܐ ܢܰܦ݁ܳܠܝܳܘܢ: ܐܝܕ݂ܰܐ ܕܷܒܪܝܬ݂ܐ ܟܘܠܰܗ ܗܘܝܳܘܰܐ ܚܕ݂ܐ ܕܰܘܠܰܐ، ܒܰܡܡܐ ܡܐ ܐܝ ܐܰܪܷܫܟܳܝܬܶܕ݂ܰܗ ܟܬܘܝܳܘܰܐ ܐܷܣܛܰܢܒܷܠ. ܐܝܢܰܩܠܰܐ ܕܟܳܚܰܝܪܝܢܰܐ ܐܷܫܡܐ ܒܘ ܡܰܟܬܰܒ ܙܰܒܢܐ ܕܷܐܣܛܰܢܒܷܠ ܟܳܚܳܙܝܢܰܐ ܗܘܠ ܡܶܩܷܡ ܠܐ ܒܓ݂ܰܠܰܒܶܐ ܐܷܫܢܶܐ ܐܷܣܛܰܢܒܷܠ ܘܰܠܰܝܶܐ ܕܪܰܟܷܘܬܐ ܥܰܠ ܦܶܡܶܗ ܕܘ ܒܰܚܰܪ. ܕܟܷܬܝܐ ܢܛܷܪܛܐ ܡܰܫ ܫܘܪܳܢܶܐ ܪܰܒܶܐ، ܥܶܠܳܝܶܐ ܘܩܰܘܝܶܐ. ܐܶܠܐ ܐܷܣܛܰܢܒܷܠ ܐܝܢܰܩܠܰܐ ܕܷܒܕܰܠܠܶܗ ܕܡܰܥܰܡܪܝܠܰܗ ܐܰܪ ܪܘܡܳܝܶܐ، ܡܰܪܟܘܐ ܥܰܠ ܪܝܫܶܐ ܕܫܰܘܥܐ ܛܘܪܳܢܶܐ. ܘܡܘ ܡܶܕܰܢܐ ܒܓ݂ܰܠܰܒܶܐ ܟܬ݂ܳܘܶܐ ܘܗܘܠ ܐܰܕܝܳܡܰܐ ܟܳܡܝܬܰܘܡܰܪܠܰܗ ܐܝ ܘܰܠܰܝܶܐ ܕܰܫ ܫܰܘܥܐ ܛܘܪܳܢܶܐ. ܕܝܠܳܢܳܐܝܬ݂ ܐܰܕܝܳܡܰܐ ܒܷܬܷ݂ܪ ܡܷܕ ܪܰܟܝܘܐ ܐܝ ܕܰܘܠܰܐ ܕܬܘܪܟܝـܝܰܐ ܒܘ ܕܳܪܰܢܐ ܐܘ ܚܰܪܳܝܐ، ܡܫܰܘܫܷܛ ܐܘ ܬܶܟܢܳܠܳܙ̰ܝ، ܟܘܠ ܫܷܟܷܠ ܕܡܝܟܰܢܰܬ ܡܬܰܝܬܶܐ. ܐܘ ܥܰܡܐ ܕܥܳܝܰܫܘܰܐ ܒܰܩ ܩܷܪܝܰܘܳܬ݂ܶܐ ܡܓܰܠܘܶܠܶܗ ܠܰܐ ܘܰܠܰܝܰܬ ܪܰܒܶܐ ܠܰܫܰܢ ܐܘ ܫܘܓܼܠܐ ܘܷܕܣܳܝܰܡ ܐܝ ܐܝܕܰܪܰܐ ܕܐܝ ܐܝܩܰܪܬܼܰܝܕܼܶܗ. ܡܰܘܟܼܰܐ ܓ݂ܰܠܰܒܶܐ ܢܳܫܶܐ ܣܬܶܐ ܡܓܰܠܘܰܠܠܶܗ ܠܷܐܣܛܰܢܒܷܠ. ܟܝܬ ܟ݂ܰܒܪܐ ܒܘ ܬܘܪܟܳܝܐ ܟܳܐܡܰܪ: ܐܘ ܥܰܦܪܐ ܘܰܐܟ ܟܶܦܶܐ ܕܷܐܤܛܰܢܒܷܠ ܕܰܗܘܐ ܢܶܐ. ܡܰܘܟ݂ܰܐ ܘܐܘ ܝܰܘܡܐ ܒܘ ܝܰܘܡܐ ܙܰܝܷܕ ܐܘ ܥܰܡܐ ܐܶܒܰܗ، ܐܝ ܫܰܬܐ ܒܝ ܫܰܬܐ ܙܰܝܷܕ ܐܘ ܡܶܢܝܳܢܐ ܕܰܥ ܥܳܡܘܪܰܝܕ݂ܰܗ. ܘܰܐܥܡܶܗ ܐܰܥ ܥܡܰܪܰܬ ܘܐܰܫ ܫܘܓ݂ܠܳܢܶܐ ܙܰܝܝܕܝ. ܗܰܘܟ݂ܰܐ ܡܬܰܪܟܰܘ ܫܷܪܟܰܬ ܓ݂ܰܠܰܒܶܐ ܪܰܒܶܐ ܥܰܬܝܪܶܐ ܐܰܥܡܰܝܶܗ. ܡܘ ܓܰܒܐ ܕܘ ܝܘܠܦܢܐ ܣܬܶܐ ܡܬܰܪܟܰܘ ܒܶܝܬ݂ܨܰܘܒܶܐ ܪܰܒܶܐ ܘܛܰܘܘܶܐ ܕܬܘܪܟܺܝܰܐ. ܐܰܒ ܒܶܝܬ݂ ܐܰܪܟܶܐ ܘܰܒ ܒܶܝܬ݂ ܥܰܬܝܩܳܬ݂ܐ ܕܟܝܬ ܒܷܐܣܛܰܢܒܷܠ ܕܟܝܬ ܐܶܒܰܝܶܐ ܐܰܠܦܰܝܐ ܕܷܟܬ݂ܳܘܶܐ ܘܡܶܕܳܢܶܐ ܡܰܟܬܰܒܙܰܒܢܳܝܶܐ ܘܥܰܬܝܩܶܐ ܕܠܰܝܬ ܠܐ ܒܕܘܟܬ݂ܐ ܚܪܶܬܐ ܡܶܐ ܕܷܒܪܝܬ݂ܐ. ܡܫܰܘܫܛܐ ܐܝ ܘܰܠܰܝܰܬ݂ܶܗ ܡܘ ܓܰܒܐ ܕܘ ܡܰܫܩܠܐ ܘܕܘ ܡܰܙܠܐ ܘܡܰܬ݂ܝܐ ܕܰܪ ܪܰܕ݂ܳܝܳܬ݂ܐ ܕܰܩܛܳܪܶܐ ܕܟܷܙܷܢ ܘܟܳܐܬ݂ܷܢ ܬܰܚܬܘ ܝܰܡܐ ܕܟܳܡܳܨܰܪ ܐܰܣܝܰܐ ܠܰܐܘܪܘܦܰ̇ܐ. ܓ݂ܰܠܰܒܶܐ ܡܰܢ ܢܳܫܶܐ ܒܰܓ ܓܰܡܝܝܰܬ ܟܳܡܷܣܬܰܥܷܡܠܝ ܐܘ ܕܰܪܒܐ ܕܘ ܒܰܚܰܪ. ܐܰܡ ܡܶܕܳܢܰܢܝ ܟܘܠܠܶܗ ܐܝܢܰܩܠܰܐ ܟܳܡܰܠܬܡܝܢܰܢܶܗ ܟܳܚܳܙܝܢܰܐ ܐܷܣܛܰܢܒܷܠ ܟܳܡܷܒܢܳܝܐ ܒܰܝܢ ܕܰܘ ܘܰܠܰܝܰܬ ܪܰܒܶܐ ܘܥܰܬܝܪܶܐ ܡܶܐ ܕܷܒܪܝܬ݂ܐ ܟܘܠܰܗ. ܐܝܢܰܩܠܰܐ ܕܰܐܬܰܬܘܪܟ ܡܷܕܠܶܗ ܐܝ ܘܰܠܰܝܶܐ ܕܷܐܣܛܰܢܒܷܠ ܡܝ ܕܰܘܠܰܐ ܕܰܥ ܥܘܬ݂ܡܰܢܳܝܶܐ ܟܷܬܘܰܐ ܐܶܒܰܗ ܫܘܰܥܡܐ ܐܰܠܦܐ ܢܳܫܶܐ. ܘܰܐܕܝܳܡܰܐ ܟܝܬܐ ܐܶܒܰܗ ܙܷܬ ܡܶܐ ܐܷܫܬܰܥܣܰܪ ܡܷܠܝܘܢܶܐ ܕܥܰܡܐ. ܒܘ ܡܶܢܝܳܢܐ ܕܘ ܥܰܡܐ ܕܟܝܬܐ ܐܶܒܰܗ ܟܳܫܷܦܥܐ ܚܰܡܷܫ ܘܰܐܪܒܥܝ ܕܰܘܠܰܬ ܡܶܐ ܕܷܒܪܝܬ݂ܐ. ܐܰܟܬ݂ܳܘܶܐ ܣܘܪܝܳܝܶܐ ܟܳܚܳܙܝܢܰܐ ܒܘ ܡܰܟܬܰܒܙܰܒܢܐ ܐܝܢܰܩܠܰܐ ܕܷܡ ܡܒܰܚܣܝܘܰܐ ܡܶܐ ܐܷܣܛܰܢܒܷܠ ܐܷܡܝܘܰܝܠܰܗ ܐܝ ܘܰܠܰܝܶܐ ܕܰܡ ܡܰܠܟܶܐ. ܐܘ ܫܚܝܡܐ ܕܟܳܡܝܨܰܠܶܗ ܒܰܫ ܫܰܪܝܶܐ ܐܶܒܶܗ، ܝܰܘܡܶܗ ܕܷܥܪܘܬܐ ܟܳܡܰܚܟܶܐ ܐܰܝܕܰܪܒܐ ܐܝ ܐܶܡܐ ܕܩܘܣܛܰܢܬܝܢ ܐܘ ܡܰܠܟܐ ܕܟܷܬܝܐ ܐܷܫܡܰܐ ܗܶܠܶܢܝ ܐܰܙܙܰܝܐ ܠܐܝܣܪܳܐܝܶܠ ܘܡܰܝܬܶܠܰܗ ܐܘ ܨܠܝܒܐ ܕܷܡܫܝܚܐ ܕܷܨܠܝܘ ܐܰܥܠܶܗ ܠܷܐܣܛܰܢܒܷܠ. ܘܟܳܡܝܬܰܘܡܷܪ ܗܘܠ ܐܰܕܝܳܡܰܐ ܐܘ ܨܠܝܒܐ ܬܠܶܗ ܬܰܚܬܶܗ ܕܷܐܣܛܰܢܒܷܠ. ܐܷܣܛܰܢܒܷܠ ܡܷܢ ܕܷܒܥܰܬ ܟܝܬ ܐܶܒܰܗ. ܚܰܐ ܕܳܒܰܥ ܕܟܳܪܰܟܼ ܐܷܣܛܰܢܒܷܠ ܟܳܠܳܙܰܡܠܶܗ ܝܰܪܚܶܐ. ܥܰܠ ܕܟܝܬ ܐܶܒܰܗ ܕܘܟܳܬܼܶܐ ܓ݂ܰܠܰܒܶܐ ܥܰܬܝܩܶܐ، ܒܰܚܰܪܶܐ ܪܘܝܚܶܐ، ܛܘܪܳܢܶܐ، ܒܶܝܬ݂ ܥܰܬܝܩܳܬ݂ܐ، ܒܶܝܬ݂ ܐܰܪܟܶܐ ܘܔܓ݂ܰܝܪ. ܒܘ ܡܰܟܬܰܒܙܰܒܢܐ ܕܷܐܣܛܰܢܒܷܠ ܟܝܬܐ ܓ݂ܰܠܰܒܶܐ ܡܰܠܟܶܐ ܘܡܰܠܟܳܬܼܐ ܕܚܰܐ ܟܝܒܶܐ ܡܰܚܟܶܐ ܒܰܢ ܐܰܠܦܰܝܐ ܕܰܘ ܘܰܪܩܶܐ ܐܰܥܠܰܝܝܶܗ. ܐܶܠܐ ܬܶܐܘܕܳܪܰܐ ܕܟܷܬܘܰܐ ܒܰܪܬ݂ܐ ܣܘܪܝܰܝܬܐ ܟܳܠܳܙܰܡ ܚܰܐ ܕܡܰܚܟܶܐ ܐܰܥܠܰܗ ܥܰܠ ܕܣܷܡܠܰܗ ܡܶܕܳܢܶܐ ܓ݂ܰܠܰܒܶܐ ܒܘ ܡܰܟܬܰܒܙܰܒܢܐ ܕܝ ܥܝܬܐ ܣܘܪܝܰܝܬܐ ܘܒܘ ܡܰܟܬܰܒܙܰܒܢܐ ܕܰܒ ܒܝܙܰܢܛܳܝܶܐ. ܡܰܠܟܬ݂ܐ ܬܶܐܘܳܕܳܪܰܐ ܘܡܪܝ ܝܰܥܩܘܒ ܒܘܪܕܥܳܢܐ ܒܝ ܫܰܬܐ ܕܚܰܡܷܫܡܐ ܘܬܡܳܢܰܥܣܰܪ ܒܷܬ݂ܷܪ ܡܶܐ ܡܫܝܚܐ، ܐܘ ܡܰܠܟܐ ܕܰܒ ܒܝܙܰܢܛܳܝܶܐ ܝܘܣܛܝܢܝܰܢܘܣ ܚܟܷܡܠܶܗ ܕܐܘ ܦܰܛܷܪܝܰܪܟ݂ܐ ܕܝ ܥܝܬܐ ܣܘܪܝܰܝܬܐ ܘܕܟܘܠܶܗ ܐܘ ܡܰܕܷܢܚܐ ܡܪܝ ܣܶܘܶܪܝܳܘܣ ܐܘ ܬܳܓ݂ܐ ܕܰܣ ܣܘܪܝܳܝܶܐ ܕܒܝ ܙܳܪܝـܝܶܐ ܡܝܫܰܕܷܪ ܠܡܷܨܷܪ. ܥܷܣܪܝ ܐܷܫܢܶܐ ܟ݂ܘܕ ܚܰܐ ܣܰܝܳܡܐ ܕܣܘܔ. ܘܐܘ ܡܰܠܟܰܢܐ ܡܰܚܰܬܠܶܗ ܒܕܘܟܬ݂ܶܗ ܕܡܳܪܝ̱ ܣܶܘܶܪܝܳܘܣ، ܚܰܐ ܐܶܦܛܪܘܦܐ ܕܟܷܬܝܐ ܐܷܫܡܶܗ ܐܰܦܪܝܶܡ ܕܟܳܡܰܛܷܥ ܠܟܘܠ ܡܶܕܶܐ ܕܟܳܐܡܷܪ ܐܘ ܡܰܠܟܐ، ܬܪܝܨܐ ܐܰܘ ܦܰܘܕܐ ܕܠܐ ܫܶܝܳܠܐ. ܐܘ ܡܶܕܰܢܐ ܕܗܰܘܝ ܒܰܐܢܬܰܟܝܰܐ ܣܷܡܠܶܗ ܫܓ݂ܘܫܝܐ ܒܰܐܝܢ ܕܐܘ ܥܰܡܐ ܣܘܪܝܳܝܐ ܘܒܝܙ ܐܰܕܡܐ ܕܓ݂ܰܠܰܒܶܐ ܣܳܗܕܶܐ ܒܪܝܪܶܐ ܕܠܐ ܚܛܝܬ݂ܐ. ܘܐܝ ܥܝܬܐ ܣܘܪܝܰܝܬܐ ܡܣܰܟܰܪܠܰܗ ܐܘ ܒܰܐܒܶܕ݂ܰܗ ܐܘ ܪܘܚܳܢܳܝܐ ܘܦܰܐܝܫܐ ܕܠܐ ܪܝܫܐ ܘܕܠܐ ܡܳܪܐ. ܒܘ ܙܰܒܢܐ ܕܰܥ ܥܰܣܩܳܬ݂ܰܢܝ ܐܰܠܳܗܐ ܡܫܰܕܰܪܠܗ ܬܶܐܘܕܳܪܰܐ ܐܝ ܡܰܠܟܬ݂ܐ ܕܟܷܬܝܐ ܐܝ ܒܰܪܬ݂ܐ ܕܩܰܫܝܫܐ ܝܘܚܰܢܢ ܕܡܰܒܘܓ݂ ܕܡܰܒܗܰܪܠܰܗ ܟ݂ܘܕ ܟܘܟܘܐ ܒܝ ܫܡܰܝܐ ܥܰܬܷܡܬܐ ܕܝ ܥܝܬܐ ܣܘܪܝܰܝܬܐ. ܘܗܰܘܝܐ ܟ݂ܘܕ ܡܰܝܶܐ ܩܰܐܝܪܶܐ ܠܘ ܨܰܗܘܐ ܕܐܘ ܥܰܡܐ ܣܘܪܝܳܝܐ ܕܷܡܒܰܠܒܰܠܘܰܐ ܘܕܷܡܒܰܪܒܰܙܘܰܐ ܘܕܥܳܝܰܫܘܰܐ ܒܝ ܙܘܥܬ݂ܐ. ܐܝܢܰܩܠܰܗ ܕܡܰܠܟܐ ܝܘܣܛܝܢܝܰܢܘܣ ܚܙܶܠܶܗ ܬܐܘܕܳܪܰܐ ܓ݂ܰܠܰܒܶܐ ܡܕܰܘܡܷܪ ܘܦܨܝܚ ܒܘ ܫܘܦܪܐ ܕܟܷܬܠܰܗ ܘܒܘ ܝܘܠܦܳܢܶܕ݂ܰܗ ܐܘ ܥܶܠܳܝܐ ܘܒܘ ܗܰܘܢܶܕ݂ܰܐ ܐܘ ܢܰܗܝܪܐ. ܗܰܘܝܐ ܒܙܰܒܢܐ ܟܰܪܝܐ ܐܰܬܬ݂ܐ ܠܘ ܡܰܠܟܐ، ܘܡܰܠܷܟܬ݂ܐ ܠܝ ܡܰܠܟܘܬ݂ܐ ܕܒܝܙܰܢܛܝܢ. ܬܶܐܘܕܳܪܰܐ ܐܝܢܰܩܠܰܐ ܕܗܰܘܝܐ ܡܰܠܷܟܬ݂ܐ ܠܐ ܛܰܥܝܐ ܐܘ ܥܰܡܶܕ݂ܰܐ ܘܐܝ ܥܝܬܶܕ݂ܰܐ. ܥܰܠ ܕܝܰܪܝܘܳܘܰܐ ܩܷܡ ܐܝܕ݂ܶܗ ܕܚܰܐ ܐܰܒܐ ܐܘܡܬ݂ܳܢܳܝܐ ܘܬܰܘܕܝܬ݂ܳܢܳܝܐ ܓ݂ܰܠܰܒܶܐ ܩܰܘܝܐ ܒܘ ܝܘܠܦܳܢܰܝܕ݂ܰܗ. ܘܟܘܠ ܢܰܩܠܰܐ ܡܷܬܦܰܟܪܳܘܰܐ ܘܟܘܪܟ݂ܳܘܰܐ ܥܰܠ ܕܰܪܒܐ ܕܷܡܥܰܘܢܳܐ ܐܘ ܥܰܡܐ ܣܘܪܝܳܝܐ ܕܟ݂ܳܠܷܨ ܡܰܩ ܩܷܛܪܶܐ ܘܡܰܥ ܥܰܣܩܘܳܬ݂ܐ ܕܟܝܬ ܐܰܥܠܶܗ. ܒܷܬܷ݂ܪ ܠܐ ܒܙܰܒܢܐ ܓ݂ܰܠܰܒܶܐ ܛܪܶܠܰܐ ܕܰܝܪܳܝܐ ܝܰܥܩܘܒ ܘܕܰܝܪܳܝܐ ܬܶܐܘܕܳܪܳܘܣ ܡܝܬܰܣܷܪܚܝ ܐܶܦܶܛܪܘܦܶܐ ܒܷܐܣܛܰܢܒܷܠ، ܒܐܝܕܶܗ ܕܰܬܪܶܐ ܦܰܛܷܪܝܰܪܟܶܐ ܚܰܐ ܕܟܷܬܘܰܗ ܡܳܪܝ̱ ܬܶܐܘܳܕܳܣܝܘܣ ܐܘ ܦܰܛܷܪܝܰܪܟ݂ܐ ܕܰܐ ܩܘܦ̇ܬܳܝܶܐ، ܘܐܘ ܦܰܛܷܪܝܰܪܟ݂ܐ ܕܒܝܙܰܢܛܝܢ ܡܳܪܝ̱ ܐܰܢܛܝܡܘܣ ܒܝ ܫܰܬܐ ܕܚܰܡܷܫܡܐ ܐܰܪܒܰܥ ܘܰܐܪܒܥܝ. ܡܳܪܝ̱ ܝܰܥܩܘܒ ܒܘܪܕܥܳܢܐ ܒܷܬ݂ܷܪ ܡܝ ܡܶܬܬܰܣܷܪܚܳܢܘܬ݂ܰܬ݂ܶܗ ܒܕܘܒܳܪܶܐ ܕܝ ܥܳܢܘܳܝܘܬ݂ܐ ܒܓ݂ܝܪܰܐ ܪܰܒܬ݂ܐ ܘܒܬܘܟ݂ܠܳܢܐ ܕܥܰܠ ܐܰܠܗܐ ܒܥܰܣܩܘܬ݂ܐ ܓ݂ܰܠܰܒܶܐ ܡܫܰܪܶܠܶܗ ܡܘ ܫܰܡ ܘܟܘܠܰܗ ܒܶܝܬ݂ ܢܰܗܪܝܢ، ܐܰܣܝܰܐ ܐܝ ܙܥܘܪܬܐ، ܐܘ ܐܰܬ݂ܪܐ ܕܰܦ ܦܳܪܣܳܝܶܐ ܘܗܘܠ ܡܷܨܷܪ ܟܰܪܷܟ݂ ܟܘܠܠܶܗ. ܒܟܘܠ ܘܰܠܰܝܶܐ ܕܰܐܙܙܶܝܐ ܦܪܷܣܠܶܗ ܘܟܪܷܙܠܶܗ ܫܰܝܢܐ ܘܚܕ݂ܳܝܘܬ݂ܐ ܕܝ ܥܝܬܐ ܘܕܘ ܥܰܡܐ، ܡܰܣܪܰܚܠܶܗ ܒܰܢ ܐܰܠܦܰܝܐ ܕܫܰܡܳܫܶܐ ܘܕܰܝܪܳܝܶܐ ܘܚܰܣܝܶܐ، ܘܷܐܫܡܐ ܒܷܐܫܡܐ ܗܘܠܶܗ ܕܝܣܰܐ ܪܘܚܐ ܠܝ ܥܝܬܐ ܣܘܪܝܰܝܬܐ ܘܡܰܩܝܡܳܠܶܗ ܡܝ ܫܰܢܬ݂ܐ ܕܟܷܬܘܰܗ ܕܰܡܷܟ݂ܬܐ ܐܶܒܰܐ. ܐܘ ܡܶܕܰܢܐ ܟܘܠܶܗ ܗܰܘܝ ܒܘ ܥܶܘܳܢܐ ܕܬܶܐܘܕܳܪܰܐ ܐܝ ܡܰܠܷܟܬ݂ܐ، ܘܗܝـܝܰܐ ܒܰܚ ܚܰܝܶܐ ܚܙܶܠܰܐ ܕܢܰܩܠܰܐ ܚܪܶܬܐ ܐܝ ܥܝܬܐ ܣܘܪܝܰܝܬܐ ܟܰܠܰܗ ܪܰܟܘܬܐ ܘܩܘܝܬ݂ܐ ܡܶܐ ܟܘܠ ܓܰܒܐ. ܘܒܘ ܡܶܕܰܢܐ ܕܣܷܡܠܰܗ ܬܶܐܘܕܳܪܰܐ ܐܝ ܡܰܠܟܬ݂ܐ ܛܪܶܠܰܗ ܐܷܫܡܰܐ ܒܰܢ ܐܳܬ݂ܘܳܬ݂ܐ ܕܘ ܕܰܗܘܐ ܕܡܷܟܬ݂ܷܘ ܒܘ ܡܰܟܬܰܒܙܰܒܢܐ ܕܝ ܥܝܬܐ ܣܘܪܝܰܝܬܐ. ܐܘ ܫܘܬܳܐܣܐ ܕܝ ܥܝܬܐ ܣܘܪܝܰܝܬܐ ܒܷܐܣܛܰܢܒܷܠ. ܐܰܢ ܐܰܒܳܗܳܬ݂ܐ ܕܝ ܥܝܬܐ ܣܘܪܝܰܝܬܐ ܒܰܢ ܢܷܫܢܶܐ 325،381،431 ܐܰܙܙܷܢܘܰܐ ܠܣ ܣܘܢܢܶܕܘܣ ܪܰܒܶܐ ܘܬܝܒܶܠܳܝܶܐ ܕܝ ܡܫܝܚܳܝܘܬ݂ܐ. ܐܶܠܐ ܥܰܡ ܗܰܬܼܶܐ ܟܘܠܰܐ ܠܰܘܷܠܶܗ ܦܬܰܟܰܪ ܒܘ ܙܰܒܢܰܘܐ ܕܡܰܚܬܝ ܚܰܣܝܘܬ݂ܐ ܒܷܐܣܛܰܢܒܷܠ. ܬܶܐܘܳܕܳܪܰܐ ܐܝ ܡܰܠܟܬ݂ܐ ܐܝܢܰܩܠܰܐ ܕܡܰܝܬܶܠܰܐ ܡܳܪܝ̱ ܝܰܥܩܘܒ ܒܘܪܕܥܳܢܐ ܠܷܐܣܛܰܢܒܷܠ ܠܐ ܡܰܚܰܬܬܶܗ ܚܰܣܝܘܬ݂ܐ ܒܷܐܣܛܰܢܒܷܠ. ܒܘ ܐܰܬ݂ܪܰܢܐ ܟܳܡܰܚܘܶܐ ܕܠܰܬܘܰܐ ܣܘܪܝܳܝܶܐ ܡܰܘܟ݂ܰܐ ܐܰܣ ܣܘܪܝܳܝܶܐ ܡܰܚܰܬܘܰܠܠܶܗ ܐܘ ܚܰܝܠܰܬ݂ܬ݂ܶܗ ܘܐܘ ܝܘܠܦܳܢܰܬ݂ܬ݂ܶܗ ܐܝ ܬܷܔܰܪܰܬ݂ܬ݂ܶܗ ܐܝ ܙܰܢܓܰܢܰܬ݂ܬ݂ܶܗ ܘܝ ܥܝܬܰܬ݂ܬ݂ܶܗ ܒܰܕ ܕܷܟܳܬ݂ܬ݂ܶܐ ܕܟܳܥܰܝܫܝܘܰܐ. ܠܰܬܘܰܠܠܶܗ ܦܬܰܟܰܪ ܠܰܪܘܰܠ ܡܘ ܐܰܬ݂ܪܐ ܡܒܰܪܟ݂ܐ ܕܰܢ ܐܰܒܳܗܳܬ݂ܐ ܕܥܰܝܫܝ. ܫܰܬܐ ܒܷܬ݂ܪܶܗ ܕܫܰܬܐ ܘܕܳܪܐ ܒܷܬ݂ܪܶܗ ܕܕܳܪܐ ܫܰܦܝܥܝ. ܘܐܘ ܥܰܡܐ ܒܕܶܠܶܗ ܐܷܫܡܐ ܒܷܐܫܡܐ ܕܷܐܙܙܶܝܐ ܠܘ ܡܰܥܷܪܒܐ ܕܬܘܪܟܺܝܰܐ ܒܝ ܘܰܨܝܛܰܐ ܕܝ ܬܷܔܰܪܰܐ. ܐܘ ܡܶܕܰܢܐ ܡܰܠܬܰܡܠܶܗ ܥܰܡܐ ܣܘܪܝܳܝܐ ܒܷܐܣܛܰܢܒܷܠ. ܒܝ ܫܰܬܐ ܕܰܐܢ ܐܰܠܦܐ ܘܬܡܳܢܶܡܐ ܘܚܕ݂ܐ ܘܐܰܪܒܥܝ، ܦܰܛܷܪܝܰܪܟ݂ܐ ܐܰܠܝܰܣ ܗܶܢܕܝ ܡܷܕܠܶܗ ܦܘܣܩܳܢܐ ܥܰܠ ܕܷܚܙܶܠܶܗ ܣܢܝܩܘܬ݂ܐ ܕܡܝܬܰܪܟܷܘ ܟܘܪܣܝܐ ܕܝ ܚܰܣܝܘܬ݂ܐ ܒܷܐܣܛܰܢܒܷܠ. ܥܰܠ ܕܐܘ ܥܰܡܐ ܠܳܙܰܡܘܰܝܠܶܗ ܪܳܥܝܶܐ ܘܡܟܰܗܢܳܢܶܐ ܕܝ ܥܝܬܐ، ܘܕܠܐ ܡܷܩܛܷܥ ܡܝ ܥܝܬܰܝܕ݂ܶܗ ܘܕܷܐܙܶܙܶܝܐ ܡܷܟ݂ܠܷܛ ܒܰܝܢ ܕܰܥ ܥܰܡܶܐ ܚܪܶܢܶܐ. ܦܰܛܷܪܝܰܪܟ݂ܐ ܐܰܠܝܰܣ ܗܶܢܕܝ ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܰܐܪܒܰܥ ܐܰܪܒܥܝ ܡܫܰܕܰܪܠܶܗ ܐܘ ܚܰܣܝܐ ܕܝ ܕܰܝܪܐ ܕܟܘܪܟܡܐ ܘܕܘ ܩܘܕܷܣ ܩܘܪܝܠܳܘܣ ܝܰܥܩܘܒ ܥܰܡ ܘܰܪܩܶܐ ܒܷܐܫܡܶܐ ܕܝ ܦܰܛܷܪܝܰܪܟ݂ܘܬ݂ܐ ܠܰܫܰܢ ܕܝܳܬܰܘ ܥܰܡ ܐܰܪ ܪܝܫܳܢܶܐ ܕܰܥ ܥܘܬ݂ܡܰܢܳܝܶܐ ܘܕܡܳܝܷܕ ܦܣܳܣܐ ܠܟܘܠ ܡܶܕܶܐ ܕܟܳܠܳܙܰܡ ܠܰܫܰܢ ܥܝܬܐ ܪܘܫܡܰܝܬܐ. ܐܝܢܰܩܠܰܐ ܕܷܚܙܶܠܶܗ ܐܘ ܦܰܛܷܪܝܰܪܟ݂ܐ ܟܘܠ ܡܶܕܶܐ ܓ݂ܰܠܰܒܶܐ ܛܰܘܐ ܟܷܡܗܰܠܷܟ݂ ܘܐܘ ܥܰܡܐ ܦܨܝܚܳܝܐ ܝܐ ܒܚܰܣܝܐ ܩܘܪܝܠܣ ܝܰܥܩܘܒ ܗܘܠܶܗ ܦܘܩܕܢܐ ܕܗܳܘܶܐ ܐܶܦܶܛܪܘܦܐ ܦܰܛܷܪܝܰܪܟ݂ܳܝܐ ܠܷܐܣܛܰܢܒܷܠ. ܒܘ ܦܘܩܕܳܢܰܐ ܢܐ ܐܘ ܚܰܣܝܐ ܩܰܡܳܝܐ ܒܷܐܫܡܶܐ ܕܝ ܥܝܬܐ ܣܘܪܝܰܝܬܐ ܗܰܘܝ ܩܘܪܝܠܳܘܣ ܝܰܥܩܘܒ. ܚܰܣܝܐ ܝܰܥܩܘܒ ܡܰܠܝܳܘܰܐ ܒܪܘܚܐ ܕܝ ܐܘܡܬ݂ܳܢܳܝܘܬ݂ܐ ܘܒܝ ܚܘܒܐ ܕܝ ܡܫܝܚܳܝܘܬ݂ܐ، ܒܷܬܷ݂ܪܟܶܗ ܐܘ ܚܰܣܝܰܐ ܢܐ ܟܳܘܶܐ ܦܰܛܷܪܝܰܪܟ݂ܐ ܠܝ ܥܝܬܐ ܣܘܪܝܰܝܬܐ ܒܘ ܐܷܫܡܐ ܕܦܰܛܷܪܝܰܪܟ݂ܐ ܝܰܥܩܘܒ ܬܪܰܝܢܐ. ܩܘܪܝܠܘܣ ܝܰܥܩܘܒ ܡܷܬܦܰܟܰܪܘܰܐ ܒܘ ܙܰܒܢܐ ܕܳܐܬ݂ܶܐ ܓܬܳܘܶܗ ܣܘܪܝܳܝܶܐ ܓ݂ܰܠܰܒܶܐ ܒܷܐܣܛܰܢܒܷܠ ܡܰܘܟ݂ܰܐ ܡܔܰܪܰܒܠܶܗ ܕܣܳܝܷܡ ܡܶܕܳܢܶܐ ܠܰܔܰܢܰܝܶܗ ܘܠܝ ܦܰܝܕܰܐ ܕܝ ܥܝܬܐ ܣܘܪܝܰܝܬܐ. ܒܝ ܦܷܪܨܰܐ ܩܰܡܰܝܬܐ ܙܘܷܢܠܶܗ ܒܰܝܬܐ ܚܰܐ ܒܝ ܡܕ݂ܝܬܐ ܕܒܶܝܐܳܓ݂ܠܘ ܬܰܪܠܰܒܰܫܝ. ܒܷܬ݂ܷܪ ܡܶܐ ܕܟܳܢܳܦܷܩ ܢܘܪܐ ܘܟܳܝܳܩܷܕ݂ ܐܘ ܒܰܝܬܰܢܐ، ܚܰܣܝܐ ܩܘܪܝܠܳܘܣ ܝܰܥܩܘܒ ܒܘ ܦܣܳܣܐ ܕܝ ܕܰܘܠܰܐ ܕܝ ܐܳܨܡܰܢܠܝܝܶܐ ܟܳܣܳܝܰܡܠܶܗ ܥܝܬܐ ܕܝܳܠܕܰܬ݂ ܐܰܠܗܐ ܡܰܪܝܰܡ. ܘܗܰܬ݂ܶܐ ܗܰܘܝܐ ܐܝ ܥܝܬܐ ܩܰܡܰܝܬܐ ܕܟܷܬܝܐ ܕܰܣ ܣܘܪܝܳܝܶܐ ܒܷܐܣܛܰܢܒܷܠ. ܒܷܬ݂ܷܪ ܡܝ ܥܡܰܪܰܐ ܕܝ ܥܝܬܐ ܐܘ ܚܰܣܝܐ ܡܰܣܷܡܠܶܗ ܒܶܢܝܳܢܶܐ ܚܪܶܢܶܐ ܓܰܒ ܐܝ ܥܝܬܐ ܕܩܳܕܷܪ ܚܰܐ ܕܦܳܝܷܫ ܐܶܒܰܗ ܘܒܷܬܷ݂ܪ ܡܰܬ݂ܶܗ ܙܘܷܢܠܶܗ ܡܰܛܒܰܥܬ݂ܐ ܚܕ݂ܐ ܕܩܳܕܷܪ ܛܳܒܷܥ ܐܰܟ ܟܬ݂ܳܘܶܐ ܕܝ ܥܝܬܐ ܒܘ ܠܶܫܳܢܐ ܣܘܪܝܳܝܐ ܘܓܰܪܫܘܢܝ، ܘܰܐܟ ܟܬ݂ܳܘܰܢܝ ܗܘܠ ܐܰܕܝܳܡܰܐ ܟܰܠܷܢܢܶܗ ܢܛܝܪܶܐ ܒܐܝܕ݂ܶܗ ܕܝ ܚܰܣܝܘܬ݂ܐ ܕܷܐܣܛܰܢܒܷܠ. ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܐ ܡܐ ܘܫܘܰܥ ܐܰܪܒܥܝ ܐܝܢܰܩܠܰܐ ܕܷܡܫܰܢܶܠܶܗ ܦܰܛܷܪܝܰܪܟ݂ܐ ܐܰܠܝܰܣ ܗܶܢܕܝ ܠܰܬܷܡ ܐܘ ܣܘܢܶܕܘܣ ܕܰܚ ܚܰܣܝܶܐ ܣܘܪܝܳܝܶܐ ܒܝ ܕܰܝܪܐ ܕܟܘܪܟܡܐ. ܘܒܘ ܦܘܣܩܳܢܐ ܓܰܘܳܢܳܝܐ ܕܰܚ ܚܰܣܝܶܐ ܡܬܰܩܒܷܠ ܕܚܰܣܝܐ ܩܘܪܝܠܳܘܣ ܝܰܥܩܘܒ ܕܗܳܘܶܐ ܦܰܛܷܪܝܰܪܟ݂ܐ ܚܰܬ݂ܐ ܠܝ ܥܝܬܐ ܣܘܪܝܰܝܬܐ، ܘܡܬܰܣܪܷܚ ܒܝ ܕܰܝܪܐ ܕܟܘܪܟܡܐ ܒܷܐܫܡܶܗ ܕܝܰܥܩܘܒ ܬܪܰܝܳܢܐ. ܒܰܢ ܢܷܫܢܰܢܷܟ ܐܰܣ ܣܘܪܝܳܝܶܐ ܕܷܐܣܛܰܢܒܷܠ ܐܰܓ݂ܠܰܒ ܥܰܡܐ ܕܰܐܬ݂ܝܘܰܐ ܡܶܐ ܒܶܕܠܝܣ ܘܡܶܐ ܘܰܪܬܐ ܘܡܶܐ ܣܝܡܗܳܪܘܰܝܢܶܗ. ܘܥܰܠ ܕܠܰܬܘܰܝܢܶܗ ܒܡܶܢܝܳܢܐ ܓ݂ܰܠܰܒܶܐ، ܐܷܫܡܐ ܒܷܐܫܡܐ ܐܰܙܙܷܢܘܰܗ ܠܰܥ ܥܝܬܳܬ݂ܶܐ ܚܪܶܢܶܐ. ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܫܰܘܥܝ، ܢܰܦܷܩ ܢܘܪܐ ܪܰܒܬ݂ܐ ܒܒܶܝܐܳܓ݂ܠܘ ܘܝܰܩܝܕ݂ܐ ܐܝ ܥܝܬܐ ܕܰܣ ܣܘܪܝܳܝܶܐ ܕܟܷܬܘܰܐ ܣܷܡܬܐ ܡܰܩ ܩܰܝܣܶܐ. ܐܰܕܝܳܡܰܐ ܟܝܬܐ ܟܬ݂ܰܘܬܐ ܥܰܠ ܟܶܦܐ ܕܡܰܛܝܐ ܠܐܝܕ݂ܰܢ ܟܬ݂ܝܘܳܝܐ ܐܰܥܠܰܐ، ܕܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܬܡܳܢܶܐ ܫܰܘܥܝ ܣܝܡ ܬܰܥܡܝܪ ܓ݂ܰܠܰܒܶܐ ܪܰܒܐ ܒܝ ܥܝܬܐ. ܕܰܝܪܝܐ ܐܰܒܕܘܢܢܘܪ ܕܟܷܬܘܰܐ ܡܶܐ ܐܘܪܦܰܐ ܘܐܘ ܪܝܫܐ ܕܘ ܡܰܘܬܒܐ ܕܰܐ ܣܘܪܝܳܝܶܐ ܕܷܐܣܛܰܢܒܷܠ ܓܰܒܪܐ ܚܰܐ ܕܷܐܫܡܶܐ ܙܰܪܝܦ ܡܶܐ ܣܺܝܡܗܳܪ ܡܔܰܪܰܒܒܶܗ ܕܣܰܝܡܝ ܐܝ ܥܝܬܐ ܐܰܢܢܰܩܠܰܐ ܠܐ ܡܰܩ ܩܰܝܣܶܐ ܐܶܠܐ ܡܰܟ ܟܶܦܶܐ ܕܗܷܘܝܐ ܩܘܝܬ݂ܐ ܘܕܠܐ ܝܘܩܕ݂ܐ ܢܰܩܠܰܐ ܚܪܶܬܐ. ܐܝ ܥܝܬܐ ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܬܡܳܢܝ ܟܰܡܝܠܐ ܒܘ ܥܶܘܳܢܐ ܕܘ ܦܰܛܷܪܝܰܪܟ݂ܐ ܕܝ ܥܝܬܐ ܕܰܐܢ ܐܰܪܡܢܳܝܶܐ، ܘܦܬܝܚ ܐܘ ܬܰܪܥܶܕ݂ܰܗ ܢܰܩܠܰܐ ܚܪܶܬܐ ܠܘ ܥܰܡܐ ܡܗܰܝܡܢܐ ܘܠܝ ܨܠܘܬ݂ܐ. ܒܰܫ ܫܷܪܫܶܐ ܕܝ ܥܝܬܐ ܕܝ ܝܳܠܕܰܬ݂ ܐܰܠܳܗܐ ܡܰܪܝܰܡ، ܟܝܬܐ ܐܰܙ ܙܘܙܶܐ ܘܝ ܬܰܥܒܶܗ ܕܘ ܥܰܡܐ ܣܘܪܝܳܝܐ ܘܕܝ ܚܳܬ݂ܐ ܥܝܬܐ ܕܰܐܢ ܐܰܪܡܢܳܝܶܐ. ܐܘ ܥܰܡܐ ܐܰܪܡܢܳܝܐ ܡܰܕ ܕܳܪܶܐ ܥܰܬܝܩܶܐ ܟܳܥܳܝܷܫ ܒܷܐܣܛܰܢܒܷܠ ܘܒܘ ܙܰܒܢܰܘܐ ܒܰܐܚܘܬ݂ܐ ܓ݂ܰܠܰܒܶܐ ܡܠܝܬ݂ܐ ܚܘܒܐ ܡܩܰܕܰܡܡܶܗ ܠܰܣ ܣܘܪܝܳܝܶܐ ܘܡܰܩܷܒܠܷܢܢܶܗ ܥܰܡ ܪܘܚܰܝܶܗ ܕܠܐ ܦܘܪܫܳܢܐ. ܒܘ ܙܰܒܢܐ ܕܝ ܐܳܨܡܰܢܠܝܝܶܐ ܟܷܬܘܰܗ ܒܷܐܣܛܰܢܒܷܠ ܬܪܶܐ ܦܰܛܷܪܝܰܪܟ݂ܶܐ ܐܘ ܦܰܛܷܪܝܰܪܟ݂ܐ ܕܰܪ ܪܘܡ ܘܐܘ ܦܰܛܷܪܝܰܪܟ݂ܐ ܕܰܐܢ ܐܰܪܡܢܳܝܶܐ. ܐܝ ܕܰܘܠܰܐ ܕܝ ܐܳܨܡܰܢܠܝܝܶܐ ܡܰܩܰܒܠܳܘܰܐ ܐܰܬܪܶܐ ܦܰܛܷܪܝܰܪܟ݂ܰܢܝ ܐܰܪ ܪܝܫܳܢܶܐ ܕܰܐܡ ܡܫܝܚܳܝܶܐ. ܐܰܥ ܥܰܡܶܐ ܚܪܶܢܶܐ ܕܟܷܬܘܰܝܢܶܗ ܒܓܰܘܰܗ ܟܘܠܠܶܗ ܡܝܬܰܩܰܒܠܝܘܰܐ ܬܰܚܬܝ ܡܕܰܒܪܢܘܬ݂ܐ ܕܰܐܬܪܶܐ ܦܰܛܷܪܝܰܪܟ݂ܰܢܝ. ܡܰܘܟ݂ܰܐ ܟܳܚܳܙܝܢܰܐ ܓ݂ܰܠܰܒܶܐ ܡܰܣ ܣܘܪܝܳܝܶܐ ܟܬ݂ܝܘܶܢܶܐ ܒܰܘ ܘܰܪܩܶܐ ܕܝ ܪܷܫܡܳܝܘܬ݂ܐ ܒܷܫܡܶܐ ܕܰܐܢ ܐܰܪܡܢܳܝܶܐ. ܐܘ ܥܰܡܐ ܕܰܐܢ ܐܰܪܡܢܳܝܶܐ ܒܓ݂ܰܠܰܒܶܐ ܡܶܕܳܢܶܐ ܡܥܰܘܰܢܠܶܗ ܐܘ ܥܰܡܐ ܣܘܪܝܳܝܐ ܒܰܐܢ ܐܷܫܢܶܐ ܩܰܡܳܝܶܐ ܕܰܐܬ݂ܝ ܠܷܐܣܛܰܢܒܷܠ. ܒܘ ܦܘܬܳܚܐ ܕܝ ܥܝܬܐ ܕܰܣ ܣܘܪܝܳܝܶܐ ܐܘ ܦܰܛܷܪܝܰܪܟ݂ܐ ܕܰܐܢ ܐܰܪܡܢܳܝܶܐ ܐܰܬ݂ܝ ܗܝـܝܶܐ ܣܬܶܐ ܠܘ ܦܘܬܳܚܐ، ܘܗܰܘܟ݂ܰܐ ܡܶܕܳܢܶܐ ܓ݂ܰܠܰܒܶܐ ܟܳܩܘܕܪܝܢܰܐ ܕܚܳܙܝܢܰܐ ܕܡܰܢ ܐܰܪܡܢܳܝܶܐ ܐܰܬ݂ܝܠܰܢ ܥܶܘܳܢܐ ܒܢܝܝܰܐ ܕܝ ܐܰܚܘܢܘܬ݂ܐ. ܐܰܬ ܬܰܥܡܝܪܰܬ ܕܝ ܥܡܰܪܰܐ ܕܝ ܥܝܬܐ ܕܝܳܠܕܰܬ݂ ܐܰܠܗܐ ܡܰܪܝܡ ܒܒܶܝܐܳܓ݂ܠܘ ܕܷܐܣܛܰܢܒܷܠ. ܐܝ ܥܝܬܐ ܕܝܳܠܕܰܬ݂ ܐܰܠܗܐ ܡܰܪܝܰܡ ܕܟܷܬܝܐ ܒܒܶܝܐܳܓ݂ܠܘ ܕܷܐܣܛܰܢܒܷܠ ܕܟܷܬܝܐ ܐܝ ܥܝܬܐ ܩܰܡܰܝܬܐ ܕܰܣ ܣܘܪܝܳܝܶܐ ܕܡܰܥܡܰܪܪܶܗ ܒܷܐܣܛܰܢܒܷܠ، ܐܰܕܝܳܡܰܐ ܟܷܬܠܰܗ ܒܶܢܝܳܢܶܐ ܪܰܒܶܐ ܥܶܠܳܝܶܐ ܘܫܰܦܝܪܶܐ ܓ݂ܰܠܰܒܶܐ، ܐܝ ܥܡܰܪܰܬ݂ܶܗ ܡܰܫܦܰܥܠܰܗ ܬܰܥܡܝܪܰܬ ܪܰܒܶܐ ܗܘܠ ܕܡܰܛܝܐ ܠܘ ܙܰܒܢܰܢܐ ܒܘ ܫܘܦܪܰܢܐ. ܒܝ ܩܰܡܰܝܬܐ، ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܰܐܪܒܰܥ ܘܰܐܪܒܥܝ ܦܰܛܷܪܝܰܪܟ݂ܐ ܝܰܥܩܘܒ ܬܪܰܝܢܐ ܡܰܥܡܰܪܠܶܗ ܐܝ ܥܡܰܪܰܗ ܩܰܡܰܝܬܐ ܕܟܷܬܘܰܐ ܡܰܩ ܩܰܝܣܶܐ. ܕܰܐ ܬܰܪܬܶܐ ܐܝ ܥܡܰܪܰܗ ܕܝܰܩܝܕ݂ܐ ܕܟܷܬܘܰܗ ܟܘܠܰܗ ܩܰܝܣܶܐ ܣܝܡܐ ܡܶܐ ܚܰܬ݂ܐ ܟܶܦܶܐ ܚܶܘܳܪܶܐ ܕܡܷܕ݂ܝܰܕ݂. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܕ݂ܐ ܘܶܐܫܬܝ ܐܘ ܡܕܰܒܪܳܢܐ ܕܘ ܡܰܘܬܒܐ ܕܰܣ ܣܘܪܝܳܝܶܐ ܕܷܐܣܛܰܢܒܷܠ ܘܰܐܚ ܚܰܘܪܳܢܶܕ݂ܶܗ ܐܰܚ ܚܪܶܢܶܐ ܕܟܷܬܘܰܝܢܶܗ ܡܥܰܘܢܳܢܶܐ. ܒܷܬܷ݂ܪ ܡܷܕ ܡܷܕܕܶܗ ܐܰܦ ܦܣܳܣܶܐ ܡܝ ܕܰܘܠܰܗ، ܒܕܰܠܘܰܠܶܗ ܡܶܐ ܚܰܬ݂ܐ ܒܝ ܥܡܰܪܰܗ ܕܝ ܥܝܬܐ. ܒܘ ܙܰܒܢܰܢܐ ܓܰܒܪܐ ܚܰܐ ܡܶܐ ܕܷܝܰܪܒܰܟܷܪ ܐܷܫܡܶܗ ܚܰܢܢܰܐ ܗܷܕܷܪܫܰܗ ܦܳܗܰܡܘܰܐ ܡܰܐ ܥܡܰܪܰܬ ܓ݂ܰܠܰܒܶܐ ܗܝܝܶܐ ܥܰܠ ܪܝܫܶܗ ܕܰܫ ܫܰܓ݂ܳܠܶܘܰܐ. ܡܬܰܝܬܷܢ ܐܰܟ ܟܶܦܶܐ ܕܝ ܥܡܰܪܰܐ ܡܶܐ ܡܷܕܝܰܕ ܘܡܢܰܩܫܝܠܶܗ ܚܰܒܝܒ ܐܰܩܛܰܫ ܕܟܷܬܘܰܗ ܗܝܝܶܐ ܣܬܶܐ ܓܰܒܪܐ ܚܰܐ ܡܷܕ݂ܝܳܝܐ ܕܦܳܗܰܡܘܰܐ ܡܶܐ ܠܝܫܳܢܶܐ ܕܰܟ ܟܶܦܶܐ ܓ݂ܰܠܰܒܶܐ ܛܰܘܐ. ܘܡܥܰܘܢܝܘܰܐ ܠܚܰܒܝܒ ܐܘ ܡܷܕ݂ܝܳܝܐ ܬܪܶܐ ܓܰܒܪܶܐ ܡܷܪܕܢܳܝܶܐ ܣܰܥܝܕ ܡܝܡܰܪܒܰܫܝ ܘܐܰܠܝܰܣ ܬܰܫܫ̰ܝ. ܐܝ ܥܝܬܰܬ݂ܶܗ ܦܬܝܚܐ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܚܕ݂ܐ ܘܷܐܫܬܝ ܒܐܝܕ݂ܶܗ ܕܦܰܛܷܪܝܰܪܟ݂ܐ ܝܰܥܩܘܒ ܬܠܝܬ݂ܳܝܐ ܘܥܰܡ ܚܰܣܝܐ ܡܪܝ ܦܝܠܘܟܣܝܢܘܣ ܝܘܚܢܢ ܕܘܠܰܒܰܢܝ. ܘܒܕܰܠܶܗ ܕܷܡܨܰܠܷܢ ܐܶܒܰܗ ܡܶܐ ܚܰܬ݂ܐ. ܐܘ ܬܰܥܡܝܪ ܕܰܬܠܳܬ݂ܐ. ܒܝ ܡܕܰܒܪܳܢܘܬ݂ܐ ܕܔܰܡܝܠ ܬܰܚܷܢܔܝܐܳܓ݂ܠܘ ܘܒܘ ܥܶܘܳܢܐ ܕܰܡܕܰܒܪܳܢܶܐ ܕܘ ܡܰܘܬܒܐ، ܣܝܡ ܫܘܚܠܳܦܶܐ ܒܝ ܥܡܰܪܰܐ. ܣܝܡܝ ܐܰܩ ܩܶܠܳܝܳܬ݂ܐ ܕܰܕ݂ ܕ݂ܰܝܦܶܐ ܐܘ ܒܶܝܬ݂ ܒܘܫܳܠܐ ܘܐܘ ܦܳܬ݂ܘܪܐ ܕܘ ܡܘܟܠܐ ܡܶܐ ܚܰܬ݂ܐ. ܘܥܰܡ ܗܰܢܝ ܫܘܚܠܳܦܶܐ ܘܚܘܬ݂ܳܬ݂ܶܗ ܚܪܶܢܶܐ ܣܝܡ. ܐܘ ܬܰܥܡܝܪ ܕܰܐܢ ܐܰܪܒܥܐ ܒܝ ܡܕܰܒܪܳܢܘܬܐ ܕܝܰܥܩܘܒ ܬܰܚܷܢܔܝܐܳܓ݂ܠܘ ܘܒܘ ܥܶܘܳܢܐ ܕܘ ܡܰܘܬܒܐ ܘܒܝ ܓ݂ܝܪܰܐ ܘܒܝ ܡܗܰܕܝܳܢܘܬ݂ܐ ܕܡܳܪܝ ܦܝܠܝܟܣܝܢܳܘܣ ܝܰܘܣܶܦ ܔܰܬܝܢ. ܡܫܰܪܰܠܠܶܗ ܒܬܰܥܡܝܪ ܪܰܒܐ ܕܣܰܝܡܝ ܒܝ ܥܡܰܪܰܗ ܘܚܶܕ݂ܳܪܰܗ. ܙܘܝܢܝ ܒܘ ܙܰܒܢܰܢܐ ܐܰܒ ܒܳܬܶܐ ܥܰܬܝܩܶܐ ܕܟܷܬܘܰܝܢܶܗ ܚܶܕܷ݂ܪ ܐܝ ܥܝܬܐ. ܡܰܕܪܰܢܢܶܗ ܘܡܶܐ ܚܰܬ݂ܐ ܡܬܰܥܷܡܪܝ ܘܡܬܰܣܪܝ ܒܘ ܒܶܢܝܢܐ ܕܝ ܥܝܬܐ. ܐܘ ܒܶܝܬ݂ ܟ݂ܢܘܫܝܐ ܕܝ ܚܰܣܝܘܬ݂ܐ ܒܘ ܙܰܒܢܰܢܐ ܡܶܐ ܚܰܬ݂ܐ ܡܬܰܢܕܷ݂ܦ ܘܣܝܡ ܒܫܷܟܷܠ ܡܳܕܶܪܢ ܕܟܳܫܳܘܶܐ ܠܘ ܐܷܫܡܐ ܕܝ ܚܰܣܝܘܬ݂ܐ. ܐܰܬ ܬܰܥܡܝܪܰܢܝ ܐܰܪ ܪܰܒܶܐ ܬܰܪܬܶܐ ܐܷܫܢܶܐ ܡܕܰܘܰܡܡܶܗ، ܒܐܝ ܫܰܬܐ ܕܰܬܪܰܠܦܐ ܘܫܶܬ ܟܰܡܝܠܝ ܟܘܠܠܶܗ. ܐܰܬ݂ܝ ܦܰܛܷܪܝܰܪܟ݂ܐ ܙܰܟܰܝ ܩܰܕ݂ܡܳܝܐ ܠܘ ܦܘܬܳܚܰܢܐ ܥܰܡ ܚܰܣܝܶܐ ܘܰܡܕܰܒܪܳܢܶܐ ܓ݂ܰܠܰܒܶܐ. ܘܒܷܦܨܝܚܘܬ݂ܐ ܪܰܒܬ݂ܐ ܣܝܡ ܐܘ ܦܘܬܳܚܐ ܕܝ ܥܝܬܐ. ܒܘ ܦܘܬܳܚܰܢܐ ܐܘ ܡܰܟܬܰܒܙܰܒܢܳܝܐ ܚܰܕ݂ܝܪܝ، ܐܘ ܦܰܛܷܪܝܰܪܟܐ ܕܰܐܢ ܐܰܪܡܢܳܝܶܐ ܕܟܷܬܝܐ ܒܬܘܪܟܝܰܐ ܐܘ ܦܰܛܷܪܝܰܪܟ݂ܐ ܓܰܘܢܝܐ ܕܰܪ ܪܘܡ ܒܰܪܬܶܠܶܡܰܐܘܳܣ. ܐܘ ܡܫܰܠܐ ܕܝ ܥܝܬܐ ܩܰܛܘܠܝܩܳܝܬܐ ܕܟܷܬܘܰܗ ܒܷܐܣܛܰܢܒܷܠ ܓܶܘܰܪܓܝܣ ܡܰܪܳܘܝܫ̰. ܘܥܰܡܰܢܝ ܚܰܣܝܶܐ ܕܝ ܥܝܬܐ ܣܘܪܝܰܝܬܐ ܡܕܰܒܪܳܢܶܐ ܓܰܘܳܢܳܝܶܐ ܕܰܡ ܡܰܘܬܒܶܐ ܕܰܥ ܥܝܕܳܬ݂ܐ ܓ݂ܰܠܰܒܶܐ. ܘܰܐܠܦܰܝܐ ܕܥܰܡܐ ܡܗܰܝܡܢܐ. ܣܝܡ ܡܘܟܠܐ ܒܘ ܒܶܝܬ݂ ܟ݂ܢܘܫܝܐ ܚܰܬ݂ܐ ܠܘ ܐܝܩܳܪܐ ܕܘ ܦܰܛܷܪܝܰܪܟ݂ܐ، ܚܰܕܷ݂ܪ ܒܘ ܡܘܟܠܰܢܐ ܓ݂ܰܠܰܒܶܐ ܡܕܰܒܪܳܢܶܐ ܩܳܝܘܡܶܐ ܘܦܳܠܚܶܐ ܡܝ ܕܰܘܠܰܗ ܕܬܘܪܟܺܝܰܐ، ܥܰܡ ܐܝܙܓܰܕܶܐ ܕܡܶܐ ܕܘܘܰܠ ܡܫܰܚܷܠܦܶܐ. ܐܰܟ ܟܳܗܢܶܐ ܕܷܟ݂ܕܷܡܡܶܗ ܘܕܟܳܟ݂ܷܕܡܝ ܒܝ ܥܝܬܐ ܕܷܐܣܛܰܢܒܷܠ ܐܶܦܷܛܪܘܦܐ ܦܰܛܷܪܝܰܪܟ݂ܳܝܐ ܛܝܡܳܬܶܐܘܣ ܒܘܠܘܣ ܐܶܪܶܢܘܪ ܛܝܡܳܬܶܐܘܳܣ ܒܘܠܘܣ ܡܬܰܘܠܷܕ݂ ܒܝ ܩܪܝܬ݂ܐ ܕܒܰܗܫ̰ܶܔܝܟ ܕܟܷܬܝܐ ܡܰܣܷܪܬܐ ܒܣܝܘܶܪܶܟ ܕܐܘܪܗܳܝ. ܐܶܠܐ ܠܰܬܝܐ ܐܝܕ݂ܝܥܬܐ ܐܝ ܫܰܬܐ ܕܷܡܬܰܘܠܷܕ݂. ܚܰܣܝܐ ܒܘܠܘܣ ܥܰܡ ܐܘ ܒܰܒܐ ܡܰܛܥܰܢܠܶܗ ܠܐܘܪܗܳܝ ܘܬܰܡܐ ܡܟܰܡܶܠܶܗ ܐܝ ܡܰܕܪܰܫܬܶܕ݂ܶܗ ܘܓܰܘܷܪ. ܐܝ ܐܰܬܬ݂ܐ ܒܷܬܷ݂ܪ ܡܘ ܡܰܘܠܕ݂ܐ ܕܰܢ ܢܰܥܝܡܶܕ݂ܰܗ ܡܶܐ ܕܷܡܚܰܣܝܐ، ܢܰܩܠܰܐ ܚܪܶܬܐ ܗܰܘ ܓܰܘܷܪ. ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܐ ܡܐ ܘܬܰܪܬܶܐ ܘܐܷܫܬܝ ܐܘ ܥܰܡܐ ܕܐܘܪܗܳܝ ܐܰܒܷܥ ܡܝܢܶܗ ܕܗܳܘܶܐ ܩܰܫܐ ܘܟ݂ܳܕܷܡ ܐܝ ܥܝܬܐ ܘܐܝ ܔܰܡܰܥܰܐ ܕܬܰܡܐ. ܘܡܬܰܣܪܷܚ ܒܝ ܫܰܬܰܝܐ ܩܰܫܝܫܐ ܒܐܘܪܗܳܝ ܒܐܝܕ݂ܶܗ ܕܚܰܣܝܐ ܔܷܒܪܰܐܝܶܠ ܕܟܷܬܘܰܐ ܒܝ ܡܰܪܥܝܬ݂ܐ ܕܐܘܪܗܳܝ. ܐܘ ܩܰܫܝܫܐ ܟ݂ܳܕܰܡܘܰܐ ܥܰܡ ܐܘܪܗܳܝ ܢܰܩܠܰܘܰܬ ܐܘ ܥܰܡܐ ܕܰܐܕܰܢܰܐ ܣܬܶܐ. ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܬܠܰܬ݂ ܘܬܡܳܢܝ ܒܐܝܕ݂ܶܗ ܕܦܰܛܷܪܝܰܪܟ݂ܐ ܦܶܛܪܘܣ ܬܠܝܬ݂ܳܝܐ ܡܬܰܣܪܷܚ ܠܘ ܕܰܪܓ݂ܐ ܕܝ ܚܰܣܝܘܬ݂ܐ ܒܘ ܐܷܫܡܐ ܕܛܝܡܳܬ݂ܶܐܘܳܣ. ܘܒܷܬܷ݂ܪ ܡܶܐ ܙܰܒܢܐ ܟܰܪܝܐ ܡܫܰܕܷܪ ܠܝ ܕܰܒܰܪܰܐ ܕܝ ܡܰܪܥܝܬ݂ܐ ܕܷܐܣܛܰܢܒܷܠ ܘܗܰܘܝ ܐܘ ܐܶܦܷܛܪܘܦܐ ܦܰܛܷܪܝܰܪܟ݂ܳܝܐ ܕܷܐܣܛܰܢܒܷܠ. ܟ݂ܕܷܡܠܶܗ ܐܝ ܡܰܪܥܝܬ݂ܐ ܘܐܘ ܥܰܡܐ ܣܘܪܝܳܝܐ ܕܷܐܣܛܰܢܒܷܠ ܚܰܡܷܫ ܘܥܷܣܪܝ ܐܷܫܢܶܐ ܒܰܡܕܰܒܪܳܢܘܬ݂ܐ ܕܟܷܬܘܰܐ ܡܠܝܬ݂ܐ ܓ݂ܝܪܰܐ ܘܚܘܒܐ ܕܝ ܥܝܬܐ، ܥܰܡ ܗܰܬ݂ܶܐ ܟܘܠܰܗ ܣܷܡܠܶܗ ܒܘ ܙܰܒܢܐ ܕܝ ܡܕܰܒܪܳܢܘܬ݂ܶܕ݂ܶܗ ܓ݂ܰܠܰܒܶܐ ܡܶܕܳܢܶܐ ܠܰܔܰܢ ܐܘ ܥܰܡܐ ܘܝ ܥܝܬܐ ܣܘܪܝܰܝܬܐ. ܬܷܫܥܐ ܒܷܫܘܷܛ ܒܝ ܫܰܬܐ ܕܰܠܦܐ ܫ̰ܰܥܡܐ ܘܰܐܪܒܰܥܣܰܪ ܡܫܰܢܶܠܶܗ ܒܷܐܣܛܰܢܒܷܠ. ܬܠܶܗ ܐܘ ܦܰܓ݂ܪܶܕ݂ܶܗ ܒܓܰܘܶܗ ܕܝ ܥܝܬܐ ܣܘܪܝܰܝܬܐ ܕܝܳܠܕܰܬ݂ ܐܰܠܳܗܐ ܡܰܪܝܰܡ ܕܟܷܬܝܐ ܒܒܶܝܐܳܓ݂ܠܘ ܘܐܘ ܩܰܒܪܶܕ݂ܶܗ ܒܬܷ݂ܪܶܗ ܕܘ ܡܰܕܷܒܚܳܐ ܝܐ. ܐܘ ܐܰܒܪܐ ܕܷܐܦܷܣܩܘܦܐ ܒܘܠܘܣ ܘܐܘ ܡܰܠܟܐ ܕܷܐܣܛܰܢܒܷܠ ܐܶܦܷܣܩܘܦܐ ܒܘܠܘܣ ܡܕܰܒܰܪܘܰܐ ܘܡܬܰܥܩܰܒܘܰܐ ܐܰܡ ܡܰܚܟܰܡܰܬ ܕܝ ܦܰܛܷܪܝܰܪܟ݂ܘܬ݂ܐ ܣܘܪܝܰܝܬܐ ܒܷܐܣܛܰܢܒܷܠ، ܒܘ ܙܰܒܢܰܢܐ ܐܷܙܙܶܐ ܘܳܐܬ݂ܶܘܰܐ ܓ݂ܰܠܰܒܶܐ ܢܰܩܠܰܬ ܓܰܒ ܐܘ ܡܰܠܟܐ ܕܷܐܣܛܰܢܒܷܠ ܕܟܷܬܘܰܐ ܒܘ ܙܰܒܢܰܘܐ ܣܘܠܛܰܢ ܘܰܗܕܶܬܬܝܢ. ܒܚܰܐ ܡܰܝ ܝܰܘܡܶܐ ܕܐܝܣܰܐ ܐܰܙܳܠܐ ܐܘ ܐܶܦܷܣܩܘܦܐ ܓܰܒ ܐܘ ܡܰܠܟܐ ܘܡܒܶܠܶܗ ܐܘ ܐܰܒܪܐ ܕܟܷܬܘܰܗ ܐܷܫܡܶܗ ܦܷܛܪܘܣ ܥܰܡ ܪܘܚܶܗ ܠܘ ܩܘܨܪܐ، ܒܷܬ݂ܷܪ ܡܶܐ ܕܷܔܓ݂ܝܠܝ ܥܰܠ ܐܰܡ ܡܰܚܟܰܡܰܬ ܘܥܰܠ ܐܰܩ ܩܷܛܪܶܐ ܕܝ ܥܝܬܐ ܐܘ ܡܰܠܟܐ ܡܫܰܝܶܠܶܗ ܠܘ ܥܠܰܝܡܐ ܡܷܢܝܐ ܐܷܫܡܘܟ݂، ܡܰܕܥܰܪܠܶܗ ܘܡܷܪܠܶܗ ܦܶܛܪܘܣ؛ ܐܘ ܡܰܠܟܐ ܕܝ ܐܳܨܡܰܢܠܝـܝܶܐ ܓ݂ܰܠܰܒܶܐ ܡܥܰܔܰܒܠܶܗ ܐܝ ܛܰܒܝܥܰܐ ܐܝ ܔܓ݂ܰܠܝـܝܶܐ ܘܐܝ ܬܰܪܒܝـܝܰܐ ܕܦܶܛܪܘܣ، ܘܡܷܪܠܶܗ ܐܘ ܡܰܠܟܐ ܠܘ ܐܶܦܷܣܩܘܦܐ، ܒܷܬܷ݂ܪ ܡܘܥܕܐ ܐܷܫܡܶܗ ܕܐܘ ܐܰܒܪܶܕ݂ܘܟ݂ ܠܰܬܝܐ ܦܶܛܪܘܣ ܐܶܠܐ ܦܰܗܝܡ ܝܐ ܕܟܳܐܬ݂ܶܗ ܠܝ ܡܰܥܢܰܐ ܕܦܳܗܘܡܐ. ܘܡܕܰܘܰܡܠܶܗ ܐܘ ܡܰܠܟܐ ܘܡܷܪܠܶܗ ܟܳܒܰܥܢܐ ܕܡܰܣܰܠܡܰܬܠܝ ܐܘ ܢܰܥܝܡܰܢܐ ܕܡܰܩܪܶܢܶܗ݂. ܡܷܕܠܶܗ ܐܘ ܡܰܠܟܐ ܠܦܶܛܪܘܣ ܘܡܰܟܬܰܘ݂ܠܶܗ ܒܘ ܡܰܟܬܰܒ ܕܓܰܠܰܬܰܨܰܪܰܝ. ܘܒܷܬ݂ܷܪ ܡܶܐ ܬܰܡܐ ܡܫܰܕܰܪܠܶܗ ܠܷܦܪܰܢܣܰܐ ܕܡܰܥܠܶܗ ܘܕܡܰܩܘܶܗ ܐܘ ܝܘܠܦܳܢܶܕܶܗ ܘܝܳܠܷܦ ܠܶܫܳܢܶܐ ܚܪܶܢܶܐ. ܒܷܬ݂ܷܪ ܡܶܐ ܕܕܰܥܷܪ ܦܶܛܪܘܣ ܠܷܐܣܛܰܢܒܷܠ ܒܕܶܠܶܗ ܕܦܳܠܷܚ ܘܕܫܳܓܷ݂ܠ ܓܰܒ ܐܘ ܡܰܠܟܐ ܒܕܰܪܓ݂ܶܐ ܥܶܠܳܝܶܐ ܕܝ ܡܕܰܒܪܳܢܘܬ݂ܐ ܕܰܕ݂ ܕ݂ܰܝܦܶܐ. ܐܘ ܡܰܠܟܐ ܪܳܚܰܡܘܰܐ ܘܡܥܰܔܰܒܘܰܐ ܐܘ ܫܘܓ݂ܠܐ ܕܦܶܛܪܘܣ ܓ݂ܰܠܰܒܶܐ ܘܡܰܘܟ݂ܰܐ ܟܷܬܘܰܝܠܶܗ ܬܘܟ݂ܠܳܢܐ ܪܰܒܐ ܐܰܥܠܶܗ، ܒܷܬ݂ܷܪ ܡܶܐ ܙܰܒܢܐ ܐܘ ܡܰܠܟܐ ܡܰܐܥܠܶܠܶܗ ܦܶܛܪܘܣ ܠܘ ܕܰܪܓ݂ܐ ܕܝ ܐܝܙܓܰܕܘܬ݂ܐ ܠܚܰܒܰܫܝܣܛܰܢ، ܘܒܘ ܙܰܒܢܰܢܐ ܦܶܛܪܘܣ ܡܥܰܘܰܢܠܶܗ ܒܓ݂ܰܠܰܒܶܐ ܡܶܕܳܢܶܐ ܠܘ ܥܰܡܐ ܣܘܪܝܳܝܐ ܘܠܝ ܥܝܬܐ ܣܘܪܝܰܝܬܐ ܕܷܐܣܛܰܢܒܷܠ ܘܒܚܰܒܰܫܝܣܬܰܢ. ܒܘ ܙܰܒܢܐ ܕܶܐܦܷܣܩܘܦܐ ܛܝܡܳܬ݂ܶܐܘܳܣ ܒܘܠܘܣ ܟܷܬܘܰܐ ܩܰܫܝܫܐ ܥܰܙܝܙ ܫܶܢܣܝ ܕܟ݂ܳܕܰܡܘܰܐ ܐܘ ܕܰܪܓ݂ܐ ܕܝ ܟܳܗܢܘܬ݂ܐ ܒܷܐܣܛܰܢܒܷܠ. ܩܰܫܝܫܐ ܥܰܙܝܙ ܟ݂ܕܷܡܠܶܗ ܐܘ ܥܰܡܐ ܕܷܐܣܛܰܢܒܷܠ ܐܰܪܒܰܥ ܘܥܷܣܪܝ ܐܷܫܢܶܐ. ܐܘ ܩܰܫܝܫܰܐ ܢܐ ܐܝܕ݂ܝܥܳܘܰܐ ܒܘ ܩܳܠܶܕ݂ܶܗ ܐܘ ܒܰܣܝܡܐ ܘܒܝ ܟܬ݂ܰܘܬܶܕ݂ܶܗ ܐܝ ܫܰܦܷܪܬܐ. ܘܡܫܰܢܶܠܶܗ ܩܰܫܝܫܐ ܥܰܙܝܙ ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܚܕ݂ܐ ܥܷܣܪܝ ܒܷܐܣܛܰܢܒܷܠ، ܘܬܠܶܗ ܐܘ ܦܰܓ݂ܪܶܕ݂ܶܗ ܒܓܰܘܶܗ ܕܝ ܥܝܬܐ ܕܝܳܠܕܰܬ݂ ܐܰܠܗܐ ܡܰܪܝܰܡ ܒܒܶܝܐܳܓ݂ܠܘ. ܐܶܦܷܛܪܘܦܐ ܦܰܛܷܪܝܰܪܟ݂ܝܐ ܥܰܒܕܷܠܐܰܚܰܕ ܓܰܒܘܫ ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܬܡܳܢܰܥܣܰܪ ܒܷܬ݂ܷܪ ܡܶܐ ܕܙܷܪܠܶܗ ܦܰܛܷܪܝܰܪܟ݂ܐ ܐܰܠܝܰܣ ܫܰܟܝܪ ܐܘ ܡܰܠܟܐ ܚܰܪܳܝܐ ܕܝ ܐܳܨܡܰܢܠܝـܝܶܐ ܡܰܣܪܰܚܠܶܗ ܠܝ ܡܕܰܒܪܳܢܘܬ݂ܐ ܕܷܐܣܛܰܢܒܷܠ. ܐܶܦܷܛܪܘܦܐ ܥܰܒܕܷܠܐܰܚܰܕ ܓܰܒܘܫ ܟ݂ܕܷܡܠܶܗ ܐܝ ܡܰܪܥܝܬ݂ܐ ܕܷܐܣܛܰܢܒܷܠ ܩܰܪܝܘܐ ܠܥܷܣܪܝ ܐܷܫܢܶܐ. ܐܘ ܐܶܦܷܛܪܘܦܰܢܐ ܡܶܩܷܡ ܡܶܕ ܗܳܘܶܐ ܐܶܦܷܛܪܘܦܐ ܡܫܰܢܶܘܰܝܠܰܗ ܐܝ ܐܰܬܬ݂ܐ. ܘܟܷܬܘܰܝܠܶܗ ܬܰܪܬܶܐ ܒܢܳܬ݂ܶܐ ܘܚܰܐ ܐܰܒܪܐ. ܒܘ ܙܰܒܢܶܕܶܗ ܐܘ ܥܰܡܐ ܕܷܐܣܛܰܢܒܷܠ ܡܫܰܝܢܳܘܰܐ ܥܰܡ ܚܕ݂ܳܕ݂ܶܐ ܒܷܚܕ݂ܳܝܘܬ݂ܐ، ܐܝܕܝܥܳܘܰܐ ܣܬܶܐ ܒܘ ܟܬ݂ܳܘܐ ܕܰܐ ܟܬܳܘܶܐ. ܐܶܦܶܣܩܘܦܐ ܐܝܘܰܢܢܝܣ ܐܰܦܪܶܝܡ ܒܝܠܓܝܫ̰ ܒܳܬܳܝܐ ܐܶܦܶܣܩܘܦܐ ܐܰܦܪܶܝܡ ܒܝܠܓܝܫ̰ ܡܬܰܘܠܷܕ݂ ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܚܕ݂ܐ ܘܬܡܳܢܝ ܒܝ ܩܪܝܬ݂ܐ ܕܒܳܬܶܐ ܕܟܷܬܝܐ ܩܰܪܷܘܬܐ ܠܡܷܕ݂ܝܰܕ݂. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܥܣܰܪ ܡܬܰܣܪܷܚ ܩܰܫܝܫܐ. ܒܷܬܷ݂ܪ ܡܶܐ ܕܷܩܛܝܠܐ ܐܝ ܐܰܬܬ݂ܐ ܒܘ ܣܰܝܦܐ ܡܬܰܣܪܷܚ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܚܰܡܫܝ ܠܘ ܕܰܪܓ݂ܐ ܕܐܝ ܐܶܦܷܣܩܘܦܘܬ݂ܐ ܠܰܫܰܢ ܛܘܪܥܰܒܕܝܢ. ܐܠܐ ܡܶܐ ܙܰܒܢܐ ܠܙܰܒܢܐ ܥܰܠ ܕܟܷܬܘܰܐ ܣܢܝܩܘܬ݂ܐ، ܟ݂ܳܕܰܡܘܰܐ ܐܝ ܡܰܪܥܝܬ݂ܐ ܕܷܐܣܛܰܢܒܷܠ ܣܬܶܐ. ܐܶܦܶܣܩܘܦܐ ܐܰܦܪܶܝܡ ܡܫܰܢܶܠܶܗ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܰܐܪܒܰܥ ܬܡܳܢܝ ܒܝ ܕܰܝܪܐ ܕܡܳܪܝ ܓܰܒܪܐܝܶܠ ܘܬܠܶܗ ܐܘ ܦܰܓ݂ܪܶܕܶܗ ܒܰܒ ܒܶܝܬ݂ ܩܒܘܪܶܐ ܕܝ ܕܰܝܪܐ. ܚܰܣܝܐ ܦܝܠܠܘܟܣܝܢܘܣ ܐܰܠܝܰܣ ܫ̰ܰܢܩܰܝܰܐ ܚܰܒܣܳܝܐ ܡܬܰܘܠܷܕ ܚܰܣܝܐ ܐܰܠܝܰܣ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܠܰܬ݂ ܥܶܣܪܝ ܒܝ ܩܪܝܬ݂ܐ ܕܚܰܒܣܷܣ ܕܛܘܪܥܰܒܕܝܢ. ܗܰܘܝ ܕܰܝܪܳܝܐ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܠܰܬ݂ ܘܚܰܡܫܝ. ܘܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܘܬܡܳܢܝ ܡܬܰܣܪܷܚ ܚܰܣܝܐ ܠܝ ܡܰܪܥܝܬ݂ܐ ܕܛܘܪܥܰܒܕܝܢ ܒܐܝܕ݂ܶܗ ܕܦܰܛܷܪܝܰܪܟ݂ܐ ܙܰܟܰܝ ܩܰܕ݂ܡܝܐ. ܗܝـܝܶܐ ܣܬܶܐ ܟ݂ܘܕ ܐܰܚ ܚܰܣܝܶܐ ܕܡܶܩܷܡ ܡܝܢܶܗ ܐܷܙܙܶܐ ܘܳܐܬܶܘܰܐ ܠܝ ܡܰܪܥܝܬ݂ܐ ܕܷܐܣܛܰܢܒܷܠ ܐܝܢܰܩܠܰܐ ܕܗܳܘܶܘܰܐ ܣܢܝܩܘܬ݂ܐ ܡܟܰܡܰܠܘܰܐ ܐܝ ܬܷܫܡܷܫܬܰܬ݂ܶܗ. ܡܫܰܢܶܠܶܗ ܐܘ ܚܰܣܝܰܐ ܢܐ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܰܐܪܒܰܥ ܘܬܡܳܢܝ. ܐܰܙܙܷܝܐ ܠܰܫܰܢ ܐܘ ܦܘܬܳܚܐ ܘܐܘ ܩܘܕܳܫܐ ܕܝ ܕܰܝܪܐ ܕܡܳܪܝ̱ ܐܰܦܪܝܡ ܕܗܘܠܰܢܕܰܐ، ܒܓܶܕܫܳܐ ܕܡܰܥܒܰܪܠܶܗ ܒܝ ܪܰܕ݂ܝܬܐ ܒܗܳܘܠܰܢܕܰܐ ܢܩܝܠ ܡܰܚ ܚܰܝܰܢܝ ܠܓܰܒ ܐܘ ܡܳܪܰܝܕ݂ܶܗ، ܬܠܶܗ ܐܘ ܦܰܓ݂ܪܶܕܶܗ ܒܝ ܕܰܝܪܐ ܕܡܳܪܝ̱ ܐܰܦܪܶܝܡ ܕܗܳܠܰܢܕܰܐ. ܕܰܝܪܳܝܐ ܔܷܒܪܰܐܝܶܠ ܐܳܓܘܬܫ̰ܘ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܘܰܥ ܘܬܠܶܬ݂ܝ ܡܫܰܕܷܪ ܕܰܝܪܝܐ ܔܷܒܪܰܐܝܶܠ ܒܘ ܐܰܡܪܐ ܕܦܰܛܷܪܝܰܪܟ݂ܐ ܐܰܦܪܶܝܡ ܩܰܕܡܝܐ ܕܟ݂ܳܕܷܡ ܐܝ ܡܰܪܥܝܬ݂ܐ ܕܷܐܣܛܰܢܒܷܠ ܒܘ ܐܷܫܡܐ ܕܝ ܘܰܟܝܠܘܬܐ ܕܝ ܦܰܛܷܪܝܰܪܟ݂ܘܬ݂ܐ. ܬܪܰܥܣܰܪ ܐܷܫܢܶܐ ܟ݂ܕܷܡܠܶܗ ܒܘ ܐܷܫܡܰܢܐ ܐܝ ܡܰܪܥܝܬ݂ܐ ܕܷܐܣܛܰܢܒܷܠ، ܐܘ ܕܰܝܪܳܝܐ، ܒܓ݂ܝܪܰܐ ܪܰܒܬ݂ܐ ܟ݂ܕܷܡܠܶܗ ܐܘ ܥܰܡܐ ܕܷܐܣܛܰܢܒܷܠ ܘܛܪܶܠܶܗ ܐܷܫܡܐ ܛܰܘܐ ܡܶܐ ܒܷܬ݂ܪܶܗ ܒܝ ܡܰܪܥܝܬ݂ܐ ܕܷܐܣܛܰܢܒܷܠ. ܡܳܪܝ̱ ܦܝܠܘܟܣܝܢܘܣ ܚܰܢܢܰܐ ܕܘܠܰܒܰܢܝ ܚܰܣܝܶܐ ܓ݂ܰܠܰܒܶܐ ܐܰܙܙܶܐ ܘܰܐܬ݂ܝ ܒܘ ܡܰܟܬ݂ܰܒܙܰܒܢܐ ܕܝ ܥܝܬܐ ܣܘܪܝܰܝܬܐ ܘܒܝ ܡܕܰܒܪܳܢܘܬ݂ܐ ܕܝ ܥܝܬܐ ܣܘܪܝܰܝܬܐ ܘܗܰܡ ܒܝ ܥܝܬܐ ܕܷܐܣܛܰܢܒܷܠ. ܐܶܠܐ ܒܰܝܢ ܕܰܚ ܚܰܣܝܰܢܝ ܟܝܬܐ ܚܰܐ ܕܷܛܪܶܠܶܗ ܐܷܫܡܐ ܪܰܒܐ ܓ݂ܰܠܰܒܶܐ ܡܶܐ ܒܷܬ݂ܪܶܗ ܕܪܘܚܶܗ. ܗܝܝܶܝܳܐ ܚܰܣܝܐ ܚܰܢܢܰܐ ܕܘܠܰܒܰܢܝ ܐܘ ܡܰܠܦܳܢܐ ܪܰܒܐ ܕܘ ܕܳܪܐ ܚܰܪܳܝܐ. ܒܰܠܟܝ ܐܘ ܥܰܡܐ ܟܳܕ݂ܰܥ ܚܰܣܝܐ ܚܰܢܢܰܐ ܒܝ ܕܰܝܪܐ ܕܘ ܙܰܥܦܰܪܰܢ ܐܘ ܚܰܣܝܐ ܕܡܷܪܕܶܐ، ܐܶܠܐ ܚܰܣܝܐ ܚܰܢܢܰܐ ܡܕܰܒܰܪܠܶܗ ܐܷܣܛܰܢܒܷܠ ܘܗܰܡ ܛܘܪܥܰܒܕܝܢ ܣܬܶܐ ܟ݂ܘܕ ܚܰܣܝܐ. ܟܝܒܰܢ ܕܷܡܡܝܢܰܐ ܚܰܣܝܐ ܚܰܢܢܰܐ ܒܙܰܒܢܐ ܡܕܰܒܰܪܠܶܗ ܐܘ ܥܰܡܐ ܣܘܪܝܳܝܐ ܕܟܷܬܝܐ ܒܬܷܪܟܝܝܰܐ ܟܘܠܰܐ ܒܰܡܕܰܒܪܳܢܘܬ݂ܐ ܓ݂ܰܠܰܒܶܐ ܛܰܘܬܐ. ܡܰܘܟ݂ܰܐ ܐܰܒܝܥܝܢܰܐ ܕܡܰܕ݂ܷܟܪܝܢܰܐ ܐܷܫܡܶܗ ܒܘ ܬܰܪܝܟ݂ ܕܝ ܥܝܬܐ ܣܘܪܝܰܝܬܐ ܕܷܐܣܛܰܢܒܷܠ. ܒܰܣ ܣܳܥܷܪܘܳܬ݂ܐ ܕܣܰܡܘܰܐ ܠܝ ܥܝܬܐ ܕܷܐܣܛܰܢܒܷܠ، ܒܘ ܙܰܒܢܶܕ݂ܶܗ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܕ݂ܐ ܘܷܐܫܬܝ ܗܝܝܶܐ ܚܰܕܷ݂ܪܘܰܐ ܒܘ ܫܘܪܳܝܐ ܕܝ ܥܡܰܪܰܐ ܕܝ ܥܝܬܐ ܘܒܘ ܦܘܬܳܚܰܝܕ݂ܰܗ. ܗܘܠ ܐܰܕܝܳܡܰܐ ܟܘܠ ܢܳܫܐ ܒܐܝܩܳܪܐ ܪܰܒܐ ܟܳܕ݂ܳܟܷܪ ܐܷܫܡܶܗ ܕܚܰܣܝܐ ܚܢܢܰܐܕܘܠܰܒܰܢܝ، ܒܰܟܬ݂ܳܘܶܐ ܕܷܟܬ݂ܷܘܠܶܗ ܘܕܷܡܬܰܪܓܰܡ ܠܶܗ ܡܰܐ ܠܝܫܳܢܶܐ ܚܪܶܢܶܐ ܠܘ ܣܘܪܝܳܝܐ ܛܪܶܠܶܗ ܟ݂ܷܙܢܰܐ ܪܰܒܬ݂ܐ ܠܝ ܥܝܬܐ ܣܘܪܝܰܝܬܐ ܘܠܷܒܪܝܬ݂ܐ. ܐܷܫܡܶܗ ܟܬ݂ܝܘ ܒܰܚ ܚܰܪܦܰܬ ܕܘ ܕܰܗܘܐ ܒܘ ܡܰܟܬ݂ܰܒܙܰܒܢܐ ܕܝ ܥܝܬܐ ܣܘܪܝܰܝܬܐ. ܚܰܣܝܐ ܚܰܢܢܰܐ ܕܘܠܰܒܰܢܝ ܡܬܰܘܠܷܕ ܒܝ ܫܰܬܐ ܕܰܐܢ ܐܰܠܦܐ ܬܡܳܢܶܡܐ ܘܚܰܡܷܫ ܬܡܳܢܝ ܒܡܷܪܕܶܐ. ܐܘ ܒܰܒܐ ܩܰܫܝܫܐ ܝܰܘܣܶܦ ܘܝ ܐܶܡܐ ܡܘܩܣܝܝܶܐ ܢܝܡܶܬ ܕܘܠܰܒܰܢܝ. ܡܬܰܥܡܷܕ݂ ܒܐܝܕ݂ܶܗ ܕܕܰܝܪܳܝܐ ܐܶܠܝܰܣ ܫܰܟܷܪ ܕܒܷܬܷ݂ܪ ܗܰܘܝ ܐܘ ܦܰܛܷܪܝܰܪܟ݂ܐ ܕܝ ܥܝܬܐ ܣܘܪܝܰܝܬܐ. ܥܷܡܪܶܗ ܫܶܬ ܐܷܫܢܶܐ ܒܕܶܠܶܗ ܕܷܐܙܙܶܝܐ ܠܝ ܥܝܬܐ ܕܰܐܢ ܐܰܪܒܥܝ ܕܟܷܬܝܐ ܒܡܷܪܕܶܐ ܕܝܳܠܷܦ ܐܘ ܠܝܫܳܢܐ ܣܘܪܝܳܝܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܥܰܒܷܪ ܠܘ ܒܶܝܬ݂ ܣܶܦܪܐ ܕܰܠ ܠܰܬܝܢ ܕܝܳܠܷܦ ܘܡܳܙܱܕ ܐܘ ܝܘܠܦܳܢܶܕ݂ܶܗ. ܒܘ ܙܰܒܢܐ ܕܝ ܥܠܰܝܡܘܬ݂ܐ ܪܳܚܰܡܘܰܐ ܐܝ ܥܝܬܐ ܘܐܘ ܝܘܠܦܳܢܐ ܓ݂ܰܠܰܒܶܐ. ܦܰܛܷܪܝܰܪܟ݂ܐ ܐܶܠܝܰܣ ܡܰܣܪܰܚܠܶܗ ܡܫܰܡܫܳܢܐ ܐܶܘܰܢܓܶܠܳܝܐ. ܘܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܬܡܳܢܰܥܣܰܪ ܡܰܣܪܰܚܠܶܗ ܠܘ ܕܰܪܓ݂ܐ ܕܝ ܟܳܗܢܘܬ݂ܐ ܘܡܫܰܪܷܠܶܗ ܒܘ ܕܰܪܒܐ ܕܝ ܕܰܝܪܳܝܘܬ݂ܐ ܟ݂ܘܕ ܟܳܗܢܐ. ܒܘ ܙܰܒܢܰܢܐ ܣܰܡܘܰܗ ܬܘܪܓܳܡܶܐ ܕܡܘ ܠܶܫܳܢܐ ܣܘܪܝܳܝܐ ܠܘ ܥܰܪܰܒܳܝܐ. ܘܦܘܠܚܳܢܶܐ ܪܘܚܳܢܳܝܶܐ ܣܰܡܘܰܐ ܠܝ ܥܝܬܐ ܣܘܪܝܰܝܬܐ. ܐܘ ܥܰܡܐ ܣܘܪܝܳܝܐ ܕܟܷܬܘܰܐ ܒܡܰܪܕܶܐ ܡܝܰܩܰܪܘܰܐ ܘܪܳܚܰܡܘܰܐ ܠܕܰܝܪܳܝܐ ܚܰܢܢܰܐ ܓ݂ܰܠܰܒܶܐ. ܡܰܘܟ݂ܰܐ ܐܰܒܝܥܝ ܡܘ ܦܰܛܷܪܝܰܪܟ݂ܐ ܕܡܝܬܰܣܪܷܚ ܐܰܠܠܶܗ ܚܰܣܝܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܘܰܥ ܐܰܪܒܥܝ ܦܰܛܷܪܝܰܪܟ݂ܐ ܐܰܦܪܶܝܡ ܒܰܪܨܘܡ ܩܰܕ݂ܡܳܝܐ ܡܰܣܪܰܚܠܶܗ ܒܘ ܟܘܢܳܝܐ ܕܦܝܠܘܟܣܝܢܳܘܣ ܚܰܣܝܐ ܒܚܰܠܰܒ ܠܝ ܡܕܰܒܪܳܢܘܬ݂ܐ ܕܡܰܪܕܶܐ ܘܬܷܪܟܝܝܰܐ ܟܘܠܰܗ. ܒܷܬ݂ܷܪ ܡܘ ܙܰܒܢܰܢܐ ܒܓ݂ܝܪܰܐ ܪܰܒܬ݂ܐ ܡܶܐ ܐܰܬ݂ܪܐ ܠܰܐܬ݂ܪܐ ܪܳܗܰܛܘܰܐ ܠܝ ܟܷ݂ܕܡܰܗ ܕܘ ܥܰܡܐ ܣܘܪܝܳܝܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܰܐܪܒܰܥ ܘܚܰܡܫܝ ܒܘ ܣܘܢܢܶܕܳܘܣ ܕܣܝܡ ܡܥܰܙܰܡܠܶܗ ܠܦܰܛܷܪܝܰܪܟ݂ܐ ܝܰܥܩܘܒ ܬܠܝܬ݂ܳܝܐ ܠܬܷܪܟܝܝܰܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܫܝ ܘܷܐܫܬܝ ܐܰܬ݂ܝ ܦܰܛܷܪܝܰܪܟ݂ܐ ܝܰܥܩܘܒ ܬܠܝܬ݂ܳܝܐ ܠܝ ܕܰܝܪܐ ܕܡܳܪܝ̱ ܓܰܒܪܐܝܶܠ ܕܷܡܩܰܕܷܫ ܐܘ ܡܘܪܘܢ ܩܰܕܝܫܐ. ܚܰܣܝܐ ܚܰܢܢܰܐ ܕܘܠܰܒܰܢܝ ܒܘ ܙܰܒܢܰܢܐ ܐܷܙܙܶܐ ܘܳܐܬ݂ܶܘܰܐ ܠܷܐܣܛܰܢܒܷܠ ܠܝ ܟܷ݂ܕܡܰܗ ܕܘ ܥܰܡܐ. ܐܘ ܝܰܘܡܐ ܕܷܡܚܰܠܷܩ ܐܘ ܫܷܪܫܐ ܕܝ ܥܝܬܐ ܒܷܐܣܛܰܢܒܷܠ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܕ݂ܐ ܐܴܫܬܝ ܬܰܡܳܘܰܐ ܗܝܝܶܐ ܣܬܶܐ ܘܡܨܰܠܶܠܶܗ ܠܝ ܒܪܘܟܬ݂ܐ ܕܝ ܥܝܬܐ. ܘܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܠܰܬ݂ ܐܷܫܬܝ ܐܰܬ݂ܝ ܦܰܛܷܪܝܰܪܟ݂ܐ ܝܰܥܩܘܒ ܬܠܝܬ݂ܝܐ ܠܘ ܦܘܬܳܚܰܢܐ ܐܰܥܡܶܗ ܚܰܣܝܐ ܕܘܠܰܒܰܢܝ ܥܰܡ ܐܰܝ ܝܳܠܘܦܶܕ݂ܶܗ ܕܝ ܕܰܝܪܐ ܕܟܘܪܟܡܐ ܚܰܕܷ݂ܪ ܬܰܡܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܰܥ ܐܷܫܬܝ ܡܫܰܢܶܠܶܗ ܚܰܣܝܐ ܚܰܢܢܰܐ ܕܘܠܰܒܰܢܝ ܡܰܚ ܚܰܝܰܢܝ ܐܰܥ ܥܳܒܘܪܶܐ ܠܝ ܡܰܠܟܘܬ݂ܐ ܫܡܰܝܳܢܝܬ݂ܐ ܠܓܰܒ ܐܘ ܡܳܪܰܝܕ݂ܶܗ. ܛܪܶܠܶܗ ܡܶܐ ܒܷܬ݂ܪܶܗ ܕܪܘܚܶܗ ܥܰܡܐ ܡܗܰܝܡܢܐ ܥܝܬܐ ܘܡܰܪܥܝܬ݂ܐ ܕܷܡܠܝܬ݂ܐ ܟܳܗܢܶܐ ܝܳܠܘܦܶܐ ܡܫܰܡܫܳܢܶܐ ܘܕܰܝܪܳܝܶܐ ܘܥܰܡ ܡܰܠܦܳܢܶܐ ܝܰܠܝܦܶܐ. ܐܝ ܟܷ݂ܙܢܰܐ ܪܰܒܬ݂ܐ ܕܷܛܪܶܠܶܗ ܠܝ ܥܝܬܐ ܣܘܪܝܰܝܬܐ ܐܰܟ ܟܬ݂ܳܘܶܐ ܕܷܟܬ݂ܷܘܠܶܗ ܐܘ ܕܷܛܒܷܥܠܗ ܘܐܘ ܕܷܡܬܰܪܓܰܡܠܶܗ ܢܶܐ. ܐܰܣ ܣܝܳܡܰܢܝ ܕܶܛܪܶܠܶܗ ܗܘܠ ܐܰܕܝܳܡܰܐ ܒܰܗܪܳܢܶܐ ܒܰܡ ܡܰܕܷܪܫܳܬ݂ܐ ܕܟܳܩܳܝܷܡ ܝܳܠܘܦܶܐ ܘܡܰܠܦܳܢܶܐ ܢܰܗܝܪܶܐ. ܒܘ ܫܘܢܳܝܶܕ݂ܶܗ ܐܝ ܥܝܬܐ ܣܘܪܝܰܝܬܐ ܡܣܰܟܰܪܠܰܗ ܐܘ ܟܘܟܒܐ ܢܰܗܝܪܐ ܕܡܰܒܗܰܪܘܰܝܠܶܗ ܡܶܐ ܚܰܬ݂ܐ ܒܘ ܡܰܕܷܢܚܐ. ܡܬܰܚܷܬ ܐܘ ܦܰܓ݂ܪܶܕ݂ܶܗ ܒܰܒ ܒܶܝܬ݂ ܩܰܕܝܫܶܐ ܕܝ ܕܰܝܪܐ ܕܟܘܪܟܡܐ ܕܟܷܬܘܰܐ ܐܘ ܡܰܘܬܒܶܕ݂ܶܗ ܬܰܡܐ ܨܠܘܬ݂ܶܗ ܥܰܡܰܢ ܐܰܡܝܢ. ܚܰܣܝܐ ܦܝܠܘܟܣܝܢܳܘܣ ܝܰܘܣܶܦ ܫ̰ܶܬܝܢ ܚܰܣܝܐ ܝܰܘܣܶܦ ܡܰܘܠܷܕ݂ ܒܝ ܫܰܬܐ ܕܐܰܠܦܐ ܬܫ̰ܰܥܡܐ ܘܰܐܪܒܰܥ ܚܰܡܫܝ ܒܟܰܪܒܳܪܰܢ ܕܟܷܬܝܐ ܡܰܣܷܪܛܐ ܒܝ ܘܰܠܰܝܶܗ ܕܡܷܪܕܶܐ ܕܩܰܪܘܬܐ ܠܡܷܕ݂ܝܰܕ݂ ܒܛܘܪܥܰܒܕܝܢ. ܒܷܬܷܪ ܡܶܐ ܕܷܡܟܰܡܶܠܶܗ ܐܰܚ ܚܰܡܷܫ ܐܶܫܢܷܐ ܩܰܡܳܝܶܐ ܕܘ ܠܶܫܳܢܐ ܬܘܪܟܳܝܐ، ܒܕܶܠܶܗ ܕܩܳܪܶܐ ܒܝ ܥܝܬܐ ܕܝ ܩܪܝܬ݂ܐ ܐܘ ܠܝܫܳܢܐ ܣܘܪܝܳܝܐ ܣܬܶܐ. ܗܰܘܝܠܶܗ ܚܘܒܐ ܠܘ ܝܘܠܦܳܢܐ ܡܫܝܚܳܝܐ ܠܝ ܡܰܪܕܘܬ݂ܐ ܣܘܪܝܰܝܬܐ ܘܠܘ ܠܶܫܳܢܐ ܣܘܪܝܳܝܐ. ܘܠܰܫܰܢ ܕܷܡܫܰܘܫܷܛ ܪܘܚܶܗ، ܒܷܬܷܪ ܡܶܐ ܕܡܰܛܝ ܠܥܷܡܪܐ ܕܝ ܥܠܰܝܡܘܬܐ ܐܰܙܙܶܗ ܠܝ ܕܰܝܪܐ ܕܡܳܪܝ ܓܰܒܪܺܐܝܶܠ ܘܥܰܒܷܪ ܠܝ ܡܰܕܪܰܫܬܐ ܟܳܗܢܳܝܬܐ ܕܐܘ ܥܘܡܪܐ ܩܰܕܝܫܐ. ܗܰܪܟܶܐ ܒܝ ܕܰܝܪܐ ܗܰܘܝܠܶܗ ܡܟܳܢܐ ܩܷܡ ܐܝܕ݂ܶܗ ܕܕܰܝܪܳܝܶܐ ܝܰܩܝܪܶܐ ܘܡܰܠܦܳܢܶܐ ܪܚܝܡܶܐ ܡܫܰܘܫܷܛ ܪܘܚܶܗ. ܟܘܠ ܕܝܰܠܷܦ ܙܷܬ ܪܚܷܡܠܶܗ ܐܘ ܝܘܠܦܳܢܐ ܡܫܝܚܳܝܐ ܘܐܘ ܠܶܫܳܢܐ ܣܘܪܝܳܝܐ، ܘܒܘ ܙܰܒܢܰܘܐ ܐܝ ܚܘܒܐ ܕܐܝ ܕܰܝܪܳܝܘܬ݂ܐ ܝܰܘܡܐ ܒܝܰܘܡܐ ܥܷܒܪܳܘܰܗ ܘܩܘܝܳܘܰܗ ܒܠܶܒܶܗ. ܒܝ ܫܰܬܐ ܕܐܰܠܦܐ ܬܫ̰ܰܥܡܐ ܘܚܕ݂ܐ ܫܰܘܥܝ ܠܘܷܫܠܶܗ ܐܘ ܐܶܣܟܝܡܐ ܕܝ ܕܰܝܪܳܝܘܬ݂ܐ ܒܕܰܪܓ݂ܐ ܕܫܰܪܘܳܝܘܬ݂ܐ. ܒܘ ܙܰܒܢܰܢܐ ܒܝܰܨܝܦܘܬ݂ܐ ܪܰܒܬ݂ܐ ܙܷܬ ܡܫܰܘܫܰܛܘܰܐ ܪܘܚܶܗ ܘܪܳܗܰܛܘܰܐ ܠܟܠ ܫܘܓ݂ܠܐ ܕܝ ܕܰܝܪܳܐ ܣܬܶܐ. ܘܒܕܶܘܰܝܠܶܗ ܕܣܳܝܷܡ ܡܷܠܦܳܢܘܬ݂ܐ ܒܝ ܕܰܝܪܐ ܕܡܳܪܝ ܓܰܒܪܺܐܝܶܠ. ܒܝ ܫܰܬܐ ܕܐܰܠܦܐ ܬܫ̰ܰܥܡܐ ܘܫܘܰܥ ܫܰܘܥܝ ܪܫܝܡ ܟܳܗܢܐ ܒܝ ܕܰܝܪܐ ܕܡܳܪܝ ܓܰܒܪܐܝܶܠ. ܙܰܒܢܐ ܝܰܪܝܟ݂ܐ ܒܷܬܷܪ ܡܐܶ ܕܟ݂ܕܷܡܠܶܗ ܒܘ ܥܘܡܪܐ ܩܰܕܝܫܐ ܕܡܳܪܝ ܓܰܒܪܺܐܝܶܠ ܟ݂ܘܕ ܟܳܗܢܐ ܘܡܰܠܦܳܢܐ، ܒܝ ܫܰܬܐ ܕܐܰܠܦܐ ܬܫ̰ܰܥܡܐ ܘܬܠܰܬ ܘܬܡܳܢܝ ܐܝ ܩܰܕܝܫܘܬ݂ܐ ܕܡܳܪܰܢ ܡܳܪܝ ܐܝܓ݂ܢܰܐܛܝܳܘܣ ܙܰܟܰܝ ܩܰܡܳܝܐ ܕܒܶܝܬ݂ ܥܝܘܰܨ ܩܪܶܠܶܠܶܗ ܠܝ ܦܰܛܷܪܝܰܪܟ݂ܘܬ݂ܐ ܠܘ ܫܰܡ. ܕܝܳܠܷܦ ܘܩܳܘܶܐ ܘܥܳܠܶܐ ܒܘ ܕܰܪܓ݂ܐ ܕܘ ܝܘܠܦܳܢܐ ܬ݂ܶܐܘܳܠܳܓ݂ܳܝܐ. ܬܠܰܬ݂ ܐܷܫܢܶܐ ܡܷܕܠܶܗ ܝܘܠܦܳܢܐ ܒܝ ܡܰܕܪܰܫܬܐ ܬܶܐܘܳܠܳܓ݂ܳܝܬܐ ܕܡܳܪܝ ܐܰܦܪܝܶܡ ܕܘ ܫܰܡ. ܘܒܘ ܙܰܒܢܰܢܐ ܡܰܩܘܶܠܶܗ ܐܘ ܠܝܫܳܢܐ ܥܰܪܰܒܳܝܐ ܣܬܶܐ. ܒܷܬܷܪ ܡܶܐ ܕܷܡܟܰܡܶܠܶܗ ܐܝ ܡܰܕܪܰܫܬܐ ܕܡܳܪܝ ܐܰܦܪܶܝܡ ܒܣܳܗܕܘܬ݂ܐ ܥܶܠܰܝܬܐ. ܥܰܒܷܪ ܠܝ ܡܕܰܒܪܳܢܘܬ݂ܐ ܕܝ ܡܰܕܪܰܫܬܐ ܘܗܰܘܝ ܡܰܠܦܳܢܐ ܬܰܡܐ ܣܬܶܐ. ܒܝ ܫܰܬܐ ܕܐܰܠܦܐ ܬܫ̰ܰܥܡܐ ܘܫܶܬ݂ ܘܬܡܳܢܝ ܐܘ ܥܰܡܐ ܕܷܐܣܛܰܢܒܷܠ ܐܝ ܢܰܩܠܰܐ ܕܰܐܒܷܥܠܶܗ ܟ݂ܘܕ ܚܰܣܝܐ، ܐܝ ܩܰܕܝܫܘܬ݂ܐ ܕܐܘ ܦܰܛܷܪܝܰܪܟܐ ܪܫܷܡܠܶܗ ܒܘ ܟܘܢܳܝܐ ܕܦܝܠܘܟܣܝܢܳܘܣ. ܗܰܘܝ ܚܰܣܝܐ ܠܷܐܣܛܰܢܒܷܠ ܠܰܐܢܩܰܪܰܐ ܘܠܐܝܙܡܝܪ ܘܰܐܬ݂ܝ ܠܝ ܡܰܪܥܝܬܐ ܕܷܐܣܛܰܢܒܷܠ. ܐܝ ܡܥܰܠܝܘܬ݂ܐ ܕܘ ܚܰܣܝܐ ܝܰܘܣܶܦ، ܒܷܬ݂ܷܪ ܡܶܐ ܕܝܰܬܘ ܥܰܠ ܐܘ ܟܘܪܣܝܐ ܕܝ ܚܰܣܝܘܬ݂ܐ ܒܷܐܣܛܰܢܒܷܠ ܠܐ ܡܰܪܦܶܠܶܗ ܐܘ ܝܘܠܦܳܢܐ. ܐܶܠܐ ܒܕܶܠܶܗ ܕܦܳܠܷܚ ܒܰܟܬ݂ܳܘܶܐ ܥܰܠ ܐܘ ܠܝܫܳܢܐ ܣܘܪܝܳܝܐ. ܘܒܝܰܨܝܦܘܬ݂ܐ ܪܰܒܬ݂ܐ ܘܒܓ݂ܝܪܰܐ ܗܘܠ ܐܰܕܝܳܡܰܐ ܪܘܚܳܢܳܐܝܬ ܘܦܰܓ݂ܪܳܢܳܐܝܬ ܟܳܡܫܰܡܰܫ ܐܝ ܡܰܪܥܝܬ݂ܐ ܘܐܘ ܥܰܡܐ ܣܘܪܝܳܝܐ ܕܷܐܣܛܰܢܒܷܠ. ܟ݂ܘܪܐܶܦܷܣܩܘܦܐ ܨܰܡܘܐܝܶܠ ܐܶܙܒܶܪ ܨܰܡܘܐܶܝܠ ܐܶܙܒܶܪ ܡܰܘܠܷܕ݂ ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܐܰܪܒܰܥ ܘܥܶܣܪܝ ܒܡܷܪܕܶܐ. ܐܘ ܒܰܒܐ ܐܷܫܡܶܗ ܐܰܠܝܰܣ ܘܐܝ ܐܶܡܐ ܡܰܢܨܘܪܰܐ ܐܶܙܒܶܪ. ܟ݂ܘܪܝ ܨܰܡܘܐܶܝܠ ܒܝ ܥܝܬܐ ܕܰܐܢ ܐܰܪܒܥܝ ܕܡܰܪܕܶܐ ܝܰܠܷܦ ܐܘ ܠܝܫܳܢܐ ܣܘܪܝܳܝܐ ܐܘ ܬܘܪܟܳܝܐ ܘܐܘ ܥܰܪܰܒܝܐ. ܥܰܡ ܗܰܬ݂ܶܐ ܟܷܬܘܰܝܠܶܗ ܚܘܒܐ ܠܝ ܥܝܬܐ ܘܠܰܩ ܩܳܠܶܐ ܘܠܰܙܡܝܪܳܬ݂ܐ ܕܘ ܣܘܪܝܳܝܐ. ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫ̰ܰܥ ܘܰܐܪܒܥܝ ܚܰܣܝܐ ܕܘܠܰܒܰܢܝ ܡܰܣܪܰܚܠܶܗ ܩܰܫܝܫܐ ܠܝ ܥܝܬܐ ܕܷܐܣܛܰܢܒܷܠ. ܒܝ ܫܰܬܐ ܕܰܐܠܦܐ ܫ̰ܥܡܐ ܘܬܡܳܢܶܐ ܘܚܰܡܫܝ ܗܰܘܝ ܟ݂ܘܪܳܝܐ. ܒܘ ܙܰܒܢܐ ܕܟ݂ܘܪܳܝܐ ܨܰܡܘܐܶܝܠ ܐܶܙܒܶܪ ܟܷܬܘܰܐ ܡܰܬ݂ܶܐ ܝܰܩܪܳܬ݂ܐ ܣܘܪܝܳܝܶܐ ܒܷܐܣܛܰܢܒܷܠ ܕܗܳܘܷܢܘܰܐ ܙܷܬ ܡܶܐ ܬܪܰܠܦܐ ܢܰܦܫܳܬ݂ܐ. ܐܘ ܥܰܡܰܢܐ ܓܰܘܳܢܳܐܝܬ݂ ܡܶܐ ܓܰܘܶܗ ܕܬܘܪܟܝـܝܰܐ ܟܘܠܰܗ ܡܓܰܠܘܶܘܰܝܠܶܗ ܠܷܐܣܛܰܢܒܷܠ. ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫ̰ܰܥ ܘܶܫܬܝ ܚܰܣܝܐ ܚܰܢܢܰܐ ܕܘܠܰܒܰܢܝ ܡܝ ܣܰܝܒܘܬܐ ܗܰܘ ܩܳܕܰܪܘܰܐ ܕܷܐܙܙܶܐ ܘܳܐܬ݂ܶܐ ܠܷܐܣܛܰܢܒܷܠ ܡܰܘܟ݂ܰܐ ܦܰܛܷܪܝܰܪܟ݂ܐ ܝܰܥܩܘܒ ܬܠܝܬ݂ܳܝܐ ܣܷܡܠܶܗ ܐܘ ݂ܟܘܪܝ ܘܰܟܝܠܐ ܦܰܛܷܪܝܰܪܟ݂ܳܝܐ ܠܷܐܣܛܰܢܒܷܠ. ܟ݂ܘܪܝ ܨܰܡܘܐܶܝܠ ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܚܰܡܷܫ ܫܰܘܥܝ ܡܫܰܢܶܠܶܗ ܒܷܐܣܛܰܢܒܷܠ. ܟ݂ܘܪܳܝܐ ܨܰܡܘܐܶܝܠ ܐܰܩܕܶܡܝܪ ܙܰܐܙܳܝܐ ܡܰܘܠܷܕ ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܚܰܡܷܫ ܥܷܣܪܝ ܒܝ ܩܪܝܬ݂ܐ ܡܒܰܪܰܟ݂ܬܐ ܕܙܰܐܙ ܛܘܪܥܰܒܕܝܢ. ܡܶܐ ܐܰܒܳܗܶܐ ܡܗܰܝܡܢܶܐ ܐܰܒܪܳܗܳܡ ܘܚܰܢܰܐ. ܒܐܝ ܫܰܬܐ ܕܰܐܠܦܐ ܫ̰ܰܥܡܐ ܘܫ̰ܰܥ ܘܰܐܪܒܥܝ ܡܚܰܘܰܠ ܥܰܡ ܐܝ ܡܝܰܩܰܪܬܐ ܚܰܢܐ. ܘܡܘ ܙܘܘܳܓ݂ܰܢܐ ܗܰܘܝܠܷܢ ܬܰܪܬܶܐ ܒܢܳܬ݂ܐ ܘܰܐܪܒܥܐ ܐܰܒܢܶܐ. ܘܒܝ ܫܰܬܐ ܕܰܐܠܦܐ ܫ̰ܰܥܡܐ ܘܚܰܡܫܝ ܩܪܶܠܶܠܶܗ ܡܢܳܚܐ ܚܰܣܝܐ ܚܰܢܢܰܐ ܕܘܠܰܒܰܢܝ ܠܝ ܕܰܝܪܐ ܕܘ ܙܰܥܦܰܪܰܢ ܠܰܫܰܢ ܕܗܳܘܶܐ ܡܰܠܦܳܢܐ ܒܝ ܕܰܝܪܐ. ܒܘ ܙܰܒܢܐ ܕܝ ܡܰܠܦܳܢܘܬ݂ܰܝܕ݂ܶܗ ܗܰܘܝܠܶܗ ܫܰܢܨ ܩܘܡ ܐܝܕ݂ܶܗ ܕܚܰܣܝܐ ܚܰܢܢܰܐ ܕܷܡܫܰܘܫܰܛ ܐܘ ܝܘܠܦܳܢܰܝܕ݂ܶܗ ܓ݂ܰܠܰܒܶܐ. ܘܒܝ ܫܰܬܐ ܕܰܐܠܦܐ ܫ̰ܰܥܡܐ ܘܷܚܕܐ ܘܚܰܡܫܝ ܡܰܣܪܰܚ ܡܫܰܡܫܳܢܐ ܐܶܘܰܢܓܶܠܳܝܐ ܘܒܷܬ݂ܷܪ ܡܰܣܪܰܚ ܟܳܗܢܐ ܠܝ ܥܝܬܐ ܕܡܳܪܝ̱ ܦܶܛܪܘܣ ܘܦܰܘܠܘܣ ܕܡܷܪܕܶܐ. ܘܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫܶܬ ܘܚܰܡܫܝ ܠܰܫܰܢ ܕܡܰܩܘܶܐ ܐܘ ܠܝܫܳܢܐ ܥܰܪܰܒܝ ܘܗܰܡ ܠܰܫܰܢ ܐܘ ܝܘܠܦܳܢܐ ܐܰܠܳܗܳܝܐ ܐܰܙܙܶܐ ܚܕ݂ܐ ܫܰܬܐ ܠܝ ܡܰܕܪܰܫܬܐ ܟܳܗܢܝܬܐ ܕܝ ܕܰܝܪܐ ܕܡܳܪܝ̱ ܐܰܦܪܶܝܡ ܕܡܰܘܨܰܠ. ܒܷܬ݂ܷܪ ܡܶܐ ܕܷܡܟܰܡܷܠܶܗ ܐܘ ܝܘܠܦܳܢܰܝܕ݂ܶܗ ܬܪܰܥܣܰܪ ܐܷܫܢܶܐ ܣܷܡܠܶܗ ܟܳܗܢܘܬ݂ܐ ܒܡܷܪܕܶܐ. ܘܒܷܬ݂ܷܪ ܥܰܠ ܐܘ ܛܰܠܰܒ ܕܗܰܘܝ ܡܷܐܣܛܰܢܒܷܠ ܡܫܰܕܰܪ ܕܟ݂ܳܕܰܡ ܐܝ ܥܝܬܐ ܕܷܐܣܛܰܢܒܷܠ ܟ݂ܘܕ ܩܰܫܐ. ܒܝ ܫ̰ܰܬܐ ܕܰܐܠܦܐ ܫ̰ܰܥܡܐ ܘܫܷܬ ܫܰܘܥܝ ܡܰܣܪܰܚ ܟ݂ܘܪܳܝܐ ܘܒܥܰܝܢܝ ܫܰܬܐ ܡܶܐ ܐܝܕ݂ܶܗ ܕܦܰܛܷܪܝܰܪܟ݂ܐ ܝܰܥܩܘܒ ܬܠܝܬ݂ܳܝܐ ܣܝܡ ܘܰܟܝܠܐ ܕܘ ܦܰܛܷܪܝܰܪܟ݂ܐ ܗܘܠ ܠܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܷܬ ܘܬܡܳܢܝ ܕܡܰܣܪܰܚ ܡܳܪܝ̱ ܦܝܠܘܟܣܝܢܳܘܣ ܚܰܣܝܐ ܝܰܘܣܶܦ ܔܶܬܝܢ ܠܷܐܣܛܰܢܒܷܠ. ܐܘ ܡܢܳܚܐ ܕܟ݂ܘܪܝ ܨܰܡܘܐܶܝܠ ܟܷܬܘܰܝܠܶܗ ܝܘܠܦܳܢܐ ܩܰܘܝܐ، ܪܘܚܐ ܡܰܟܝܟ݂ܬܐ ܘܡܶܠܬ݂ܐ ܚܠܝܬ݂ܐ. ܒܝ ܡܕܰܒܪܳܢܘܬ݂ܰܝܕ݂ܶܗ ܐܝ ܡܗܝܪܬܐ، ܩܰܕܷܪ ܕܷܡܐܰܬ݂ܰܠ ܐܝ ܥܝܬܰܝܕ݂ܰܢ ܒܰܐܝ ܝܬܰܘܝܳܬ݂ܶܐ ܕܗܰܘܝܠܶܗ. ܘܒܰܐܢ ܐܷܫܢܰܢܷܟ ܓ݂ܰܠܰܒܶܐ ܥܰܡܐ ܡܘ ܐܰܬ݂ܪܐ ܡܓܰܠܘܶܘܰܝܠܶܗ ܠܷܐܣܛܰܢܒܷܠ. ܒܘ ܙܰܒܢܰܢܐ ܡܥܰܘܰܢܠܶܗ ܓ݂ܰܠܰܒܶܐ ܐܘ ܥܰܡܐ ܒܰܫ ܫܘܘܳܠܶܗ ܕܠܳܩܶܘܰܐ ܘܒܐܘ ܩܶܦܳܝܐ ܕܰܒ ܒܳܬܶܐ ܘܕܰܫ ܫܘܓ݂ܠܳܢܶܐ. ܘܗܰܘܝܠܶܗ ܬܰܥܒܐ ܓ݂ܰܠܰܒܶܐ ܒܰܝ ܝܬܰܘܝܳܬ݂ܶܐ ܕܥܰܡ ܐܰܥ ܥܝܕܳܬ݂ܐ ܐܰܚܘܳܬ݂ܐ ܕܗܘܘܰܠܠܰܢ ܐܰܥ ܥܝܕܳܬ݂ܐ ܕܟܳܡܷܣܬܰܥܷܡܠܝܢܰܠܷܢ ܐܰܕܝܰܘܡܰܐ. ܟܬܷ݂ܘܠܶܗ ܓ݂ܰܠܰܒܶܐ ܟܬ݂ܳܘܶܐ ܕܚܰܐ ܡܰܢܢܶܗ ܐܘ ܬܰܪܝܟ݂ ܕܝ ܥܝܬܐ ܕܷܐܣܛܰܢܒܷܠ ܝܐ. ܐܰܕܝܰܘܡܰܐ ܒܘ ܟܬ݂ܳܘܰܢܐ ܝܰܠܝܦܝܢܰܐ ܥܰܠ ܐܘ ܬܰܪܝܟ݂ ܕܝ ܥܝܬܰܝܕ݂ܰܢ ܐܝ ܣܘܪܝܰܝܬܐ. ܟ݂ܘܪܳܝܐ ܨܰܐܡܘܐܶܝܠ ܐܰܩܕܶܡܝܪ ܫܰܘܥܐ ܒܘ ܝܰܪܚܐ ܕܬܶܫܪܝܢ ܐܘ ܩܰܡܳܝܐ ܒܝ ܫܰܬܐ ܕܰܬܪܰܠܦܐ ܘܚܕ݂ܰܥܣܰܪ ܢܩܝܠ ܡܶܐ ܒܰܝܢܳܬ݂ܰܝܢܰܐ ܠܓܰܒ ܐܘ ܡܳܪܰܝܕ݂ܶܗ ܒܣܰܝܒܘܬ݂ܐ ܛܰܘܬܐ. ܣܝܡ ܐܘ ܥܘܦܳܝܰܝܕ݂ܶܗ ܒܝ ܡܷܬ݂ܛܰܝܒܳܢܘܬ݂ܐ ܕܓ݂ܰܠܰܒܶܐ ܚܣܰܝܐ، ܟܳܗܢܶܐ، ܕܰܝܪܳܝܶܐ ܘܟܳܗܢܶܐ ܘܡܶܫܬܰܝܠܳܢܶܐ ܕܰܥ ܥܝܬܳܬܐ ܐܰܚܘܳܬ݂ܐ ܕܟܝܬ ܒܷܐܣܛܰܢܒܷܠ ܥܰܡ ܡܷܢܝܳܢܐ ܕܥܰܡܐ ܡܗܰܝܡܢܐ ܓ݂ܰܠܰܒܶܐ. ܡܰܚܷܬ ܐܘ ܦܰܓ݂ܪܰܝܕ݂ܶܗ ܒܰܒ ܒܶܝܬ݂ ܩܒܘܪܶܐ ܕܰܣ ܣܘܪܝܳܝܶܐ ܕܷܐܣܛܰܢܒܷܠ. ܐܰܠܳܗܐ ܡܚܰܣܶܐ ܠܶܗ ܘܡܰܚܷܬ ܐܘ ܣܰܗܡܰܝܕ݂ܶܗ ܒܰܝܢ ܕܰܟ ܟܝܢܶܐ ܘܙܰܕܝܩܶܐ. ܟ݂ܘܪܳܝܐ ܓܰܒܪܐܝܶܠ ܐܰܝܕܝܢ ܟܦܰܪܙܳܝܐ ܓܰܒܪܐܶܝܠ ܐܰܝܕܝܢ ܡܰܘܠܷܕ݂ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܶܬ݂ ܥܶܣܪܝ ܒܡܷܕ݂ܝܰܕ݂ ܡܶܐ ܐܰܒܳܗܶܐ ܩܰܫܐ ܔܷܪܔܐ ܘܦܰܪܝܕܰܐ ܡܝ ܐܝܩܰܪܬ݂ܐ ܕܒܶܗ ܝܰܘܢܐ ܒܷܟܦܰܪܙܶܐ. ܐܘ ܐܰܚܘܢܐ ܕܟ݂ܘܪܝ ܢܷܥܡܰܐܢ ܘܐܘ ܒܰܒܐ ܕܟ݂ܘܪܝ ܥܰܡܰܢܘܐܶܝܠ ܐܰܝܕܝܢ ܝܐ. ܐܘ ܝܘܠܦܳܢܶܕ݂ܶܗ ܐܘ ܩܰܡܝܐ ܒܡܷܕ݂ܝܰܕ݂ ܝܰܠܷܦܠܶܗ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܷܫ ܘܐܰܪܒܥܝ ܗܰܘܝ ܡܰܠܦܳܢܐ ܠܝ ܡܰܕܪܰܫܬܐ ܕܡܳܪܝ ܒܰܪܨܰܘܡܐ ܕܡܷܕ݂ܝܕ݂. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܷܫ ܚܰܡܫܝ ܡܫܰܡܫܳܢܐ ܐܶܘܰܢܓܰܠܳܝܐ، ܘܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܶܬ݂ ܚܰܡܫܝ ܒܐܝܕ݂ܶܗ ܕܶܐܦܶܣܩܘܦܐ ܐܰܦܪܝܶܡ ܒܝܠܓܝܫ̰ ܡܬܰܣܪܷܚ ܩܰܫܐ ܠܝ ܥܝܬܐ ܕܰܐܕܝܰܡܰܢ. ܦܰܝܷܫ ܬܠܰܬ݂ ܐܷܫܢܶܐ ܒܰܐܕܝܰܡܰܢ ܒܘ ܙܰܒܢܰܢܐ ܣܷܡܠܶܗ ܐܘ ܬܰܥܡܝܪ ܕܝ ܥܝܬܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫ̰ܰܥ ܘܚܰܡܫܝ ܚܰܣܝܐ ܚܰܢܢܰܐ ܕܘܠܰܒܰܢܝ ܩܪܶܠܶܠܶܗ ܠܡܷܪܕܶܐ ܘܗܰܘܝ ܐܘ ܟܳܗܢܐ ܕܝ ܥܝܬܐ ܕܡܳܪܬܝ̱ ܫܡܘܢܝ ܕܡܷܪܕܶܐ. ܒܘ ܙܰܒܢܰܘܐ ܒܘ ܒܶܝܬ݂ ܣܶܦܪܐ ܬ݂ܶܘܳܠܳܓ݂ܳܝܐ ܕܷܡܫܰܬܰܣܘܰܐ ܒܝ ܕܰܝܪܐ ܕܟܘܪܟܡܐ ܣܷܡܠܶܗ ܡܷܠܦܳܢܘܬ݂ܐ. ܘܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܘܰܥ ܐܷܫܬܝ ܚܰܣܝܐ ܚܰܢܢܰܐ ܕܘܠܰܒܰܢܝ ܡܫܰܕܰܪܠܶܗ ܠܷܣܛܰܢܒܷܠ ܟ݂ܘܕ ܟܳܗܢܐ ܕܟ݂ܳܕܷܡ. ܟ݂ܘܪܳܝܐ ܓܰܒܪܐܝܶܠ ܐܰܝܕܝܢ ܟܷܬܘܰܝܠܶܗ ܠܶܫܳܢܐ ܣܘܪܝܳܝܐ ܥܰܪܰܒܳܝܐ ܘܬܘܪܟܳܝܐ. ܘܕܝܠܳܢܳܐܝܬ݂ ܒܘ ܝܘܠܦܳܢܶܕ݂ܶܗ ܕܘ ܠܝܫܳܢܐ ܣܘܪܝܳܝܐ ܣܷܡܠܶܗ ܟܷ݂ܕܡܰܐ ܪܰܒܬ݂ܐ ܠܘ ܥܰܡܐ ܠܝ ܥܝܬܐ ܘܠܝ ܡܰܕܪܰܫܬܐ. ܟܘܪܝܐ ܓܰܒܪܐܝܶܠ ܟܷܬܠܶܗ ܟܬ݂ܳܘܶܐ ܓ݂ܰܠܰܒܶܗ ܕܷܟܬܝܘܝܠܶܗ. ܕܝܠܳܢܳܐܝܬ݂ ܐܰܟܬ݂ܳܘܶܕ݂ܶܗ ܥܰܠ ܐܘ ܡܰܟܬܰܒܙܰܒܢܐ ܕܝ ܥܝܬܐ ܢܶܐ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫܶܬ݂ ܬܡܳܢܝ ܡܰܐ ܩܶܛܪܶܐ ܕܝ ܐܝܩܰܪܬ݂ܐ ܔܒܝܪ ܕܷܡܓܰܠܘܶܐ ܠܘ ܣܘܶܕ. ܘܬܰܡܐ ܡܕܰܘܰܡܠܶܗ ܐܝ ܟܷ݂ܕܡܶܕ݂ܶܗ ܠܝ ܥܝܬܐ. ܐܘ ܒܰܒܐ ܕܟ݂ܘܪܳܝܐ ܥܰܡܰܢܘܐܝܶܠ ܐܰܝܕܝܢ ܕܟܳܟ݂ܳܕܰܡ ܒܢܰܡܣܰܐ ܝܐ. ܡܶܩܷܡ ܒܷܟܡܐ ܐܷܫܢܶܐ ܢܩܝܠ ܡܰܚ ܚܰܝܰܢܝ ܠܰܒ ܒܘܣܳܡܶܐ ܫܡܰܝܳܢܶܐ ܓܰܒ ܐܘ ܡܳܪܰܝܕ݂ܶܗ ܒܷܣܘܝܕ. ܟ݂ܘܪܳܝܐ ܬܘܡܰܐ ܒܝܠܶܢ ܬܘܡܰܐ ܒܝܠܶܢ ܡܰܘܠܷܕ݂ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܰܐܪܒܰܥ ܘܬܠܶܬ݂ܝ ܒܒܶܝܬ݂ ܙܰܒܕܰܝ (ܐܰܙܰܟ݂). ܐܘ ܒܰܒܐ ܟ݂ܘܪܝܐ ܝܰܘܣܶܦ ܒܝܠܶܢ ܝܐ. ܐܘ ܟܳܗܢܐ ܕܒܶܝܬ݂ ܙܰܒܕܰܝ ܘܰܐ. ܬܘܡܰܐ ܒܝܠܶܢ ܩܪܶܠܶܗ ܒܘ ܒܶܝܬ݂ ܣܶܦܪܐ ܬܘܪܟܳܝܐ ܐܰܚ ܚܰܡܫܐ ܣܷܕܪܶܐ ܩܰܡܳܝܶܐ ܒܰܣ. ܘܩܘܡ ܐܝܕ݂ܶܗ ܕܘ ܒܰܒܐ ܝܰܠܷܦ ܐܘ ܠܶܫܳܢܐ ܣܘܪܝܳܝܐ ܘܐܘ ܥܰܪܰܒܳܝܐ. ܡܶܐ ܢܰܥܡܘܬ݂ܶܗ ܟܷܬܘܰܝܠܶܗ ܚܘܒܐ ܠܝ ܥܝܬܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܐܶܫܬܝ ܐܶܦܷܣܩܘܦܐ ܐܰܦܪܶܝܡ ܒܝܠܓܝܫ̰ ܡܰܣܪܰܚܠܶܗ ܬܘܡܰܐ ܒܝܠܶܢ ܩܰܫܝܫܐ ܠܰܐܕܝܰܡܰܢ. ܒܘ ܙܰܒܢܐ ܕܟܷܬܘܰܐ ܒܰܐܕܝܰܡܰܢ ܓ݂ܰܠܰܒܶܐ ܡܘ ܥܰܡܐ ܡܓܰܠܘܶܠܶܗ ܠܷܣܛܰܢܒܷܠ. ܚܰܣܝܐ ܚܰܢܢܰܐ ܕܘܠܰܒܰܢܝ ܩܪܶܠܶܗ ܠܟ݂ܘܪܳܝܐ ܬܘܡܰܐ ܕܳܐܬ݂ܶܐ ܘܟ݂ܳܕܷܡ ܒܡܷܪܕܶܐ. ܒܷܬ݂ܷܪ ܡܶܐ ܙܰܒܢܐ ܠܐ ܓ݂ܰܠܰܒܶܐ ܥܰܠ ܐܝ ܣܢܝܩܘܬ݂ܐ ܕܗܰܘܝ، ܚܰܣܝܐ ܚܰܢܢܰܐ ܕܘܠܰܒܰܢܝ ܡܫܰܕܰܪܠܶܗ ܟ݂ܘܪܝܐ ܬܘܡܰܐ ܡܶܐ ܡܷܪܕܶܐ ܠܷܣܛܰܢܒܷܠ ܕܟ݂ܳܕܷܡ ܐܘ ܥܰܡܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܝ ܡܓܰܠܘܶܠܶܗ ܠܰܐܠܡܰܢܝܰܐ ܬܰܡܐ ܡܕܰܘܰܡܠܶܗ ܐܝ ܬܷܫܡܷܫܬܶܕ݂ܶܗ ܒܝ ܢܘܟ݂ܪܳܝܘܬ݂ܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܰܥ ܬܷܫܥܝ ܦܰܛܪܝܰܪܟ݂ܐ ܙܰܟܰܝ ܡܰܣܠܰܩܠܶܗ ܠܘ ܕܰܪܓ݂ܐ ܕܝ ܟ݂ܘܪܳܝܘܬ݂ܐ. ܟ݂ܘܪܳܝܐ ܥܰܙܝܙ ܓܘܢܶܠ ܟܦܰܪܙܳܝܐ ܟ݂ܘܪܳܝܐ ܥܰܙܝܙ ܓܘܢܶܠ ܡܬܰܘܠܷܕ݂ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫ̰ܰܥܣܰܪ ܒܝ ܩܪܝܬ݂ܐ ܕܷܟܦܰܪܙܶܐ ܕܛܘܪܥܰܒܕܝܢ. ܡܶܐ ܐܝܩܰܪܬ݂ܐ ܡܫܰܡܰܗܬܐ ܐܘ ܐܰܒܪܐ ܕܐܘ ܣܟܰܢܕܰܪ ܕܒܶܐ ܟ݂ܳܘܔܰܐ ܝܐ. ܩܪܶܠܶܗ ܐܘ ܒܶܝܬ݂ ܣܶܦܪܐ ܬܘܪܟܳܝܐ ܒܡܷܕ݂ܝܰܕ݂ ܐܶܠܐ ܐܘ ܝܘܠܦܳܢܶܕ݂ܶܗ ܐܘ ܣܘܪܝܳܝܐ ܒܝ ܡܰܕܪܰܫܬܐ ܕܝ ܩܪܝܬ݂ܐ ܩܷܡ ܐܝܕ݂ܶܗ ܕܡܰܠܦܳܢܐ ܓܶܘܰܪܓܝܣ ܐܘ ܬܰܡܰܪܙܝ ܡܷܕܠܶܗ. ܒܷܬ݂ܷܪ ܡܝ ܥܰܣܟܰܪܝـܝܶܐ ܕܰܥܷܪ ܠܝ ܩܪܝܬ݂ܐ ܘܦܬܷܚܠܶܗ ܒܶܝܬ݂ ܣܶܦܪܐ ܕܝ ܥܝܬܐ ܒܷܟܦܰܪܙܶܐ، ܘܬܠܰܬ݂ ܐܷܫܢܶܐ ܗܰܪܟܶܐ ܡܳܠܰܦܠܶܗ ܐܰܢ ܢܰܥܝܡܶܐ ܘܰܥܠܰܝܡܶܐ ܕܝ ܩܪܝܬ݂ܐ. ܒܘ ܙܰܒܢܰܘܐ ܟܬ݂ܘܠܶܗ ܒܐܝܕ݂ܶܗ ܐܘ ܐܶܘܰܢܓܶܠܝܘܢ ܘܗܷܢ ܡܰܟܬ݂ܳܘܶܐ ܕܰܚ ܚܰܝܶܐ ܕܰܩ ܩܰܕܝܫܶܐ ܒܝ ܐܝܕ݂ܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܶܐ ܘܬܠܶܬ݂ܝ ܗܰܘܝ ܡܘܟ݂ܬܰܪ ܒܝ ܩܪܝܬܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܫܝ ܚܰܣܝܐ ܚܰܢܢܰܐ ܕܘܠܰܒܰܢܝ ܡܰܣܪܰܚܠܶܗ ܡܫܰܡܫܳܢܐ ܐܶܘܰܢܓܶܠܳܝܐ ܠܝ ܥܝܬܐ ܕܡܳܪܝ ܦܶܛܪܘܣ ܘܦܰܘܠܘܣ. ܘܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܘܚܰܡܫܝ ܚܰܣܝܐ ܐܰܦܪܶܝܡ ܕܡܷܕ݂ܝܰܕ݂ ܡܰܣܪܰܚܠܶܗ ܟ݂ܘܕ ܩܰܫܐ ܠܷܟܦܰܪܙܶܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܘܰܥ ܘܚܰܡܫܝ ܚܰܣܝܐ ܚܰܢܢܰܐ ܕܘܠܰܒܰܢܝ ܡܫܰܕܰܪܠܶܗ ܩܰܫܐ ܥܰܙܝܙ ܠܝ ܥܝܬܐ ܕܝܳܠܕܰܬ݂ ܐܰܠܗܐ ܡܰܪܝܰܡ ܠܳܐܡܝܕ݂. ܩܰܫܝܫܐ ܥܰܙܝܙ ܒܓ݂ܝܪܰܐ ܪܰܒܬ݂ܐ ܟ݂ܕܷܡܠܶܗ ܒܳܐܡܝܕ݂ ܫܘܰܥܣܰܪ ܐܷܫܢܶܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܰܪܬܶܐ ܫܰܘܥܝ ܐܘ ܚܰܣܝܐ ܕܘ ܩܘܕܷܣ ܕܝܳܘܣܩܳܪܘܣ ܠܘܩܰܐ ܒܝ ܙܝܝܰܪܶܕ݂ܶܗ ܕܠܝ ܕܰܝܪܐ ܕܟܘܪܟܡܐ ܡܰܣܪܰܚܠܶܗ ܩܰܫܝܫܐ ܥܰܙܝܙ ܠܘ ܕܰܪܓ݂ܐ ܕܝ ܟ݂ܘܪܳܝܘܬ݂ܐ. ܥܰܠ ܐܝ ܣܢܝܩܘܬ݂ܐ ܕܚܰܙܝܐ ܡܫܰܕܷܪ ܠܷܣܛܰܢܒܷܠ ܕܟ݂ܳܕܷܡ ܐܘ ܥܰܡܐ، ܒܷܬ݂ܷܪ ܡܝ ܬܷܫܡܷܫܬܐ ܕܷܐܣܛܰܢܒܷܠ ܐܰܙܙܶܝܐ ܠܒܶܠܫ̰ܝܩܰܐ ܘܡܫܰܢܶܠܶܗ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܫܘܰܥ ܘܬܶܫܥܝ ܘܡܬܰܚܷܬ ܐܘ ܦܰܓ݂ܪܶܕ݂ܶܗ ܒܝ ܕܰܝܪܐ ܕܡܳܪܝ ܐܰܦܪܝܶܡ ܕܗܘܠܰܢܕܰܐ. ܩܰܫܐ ܥܰܙܝܙ ܓܘܢܶܠ ܡܰܫܦܰܥܠܶܗ ܥܷܡܪܐ ܒܝ ܟܷ݂ܕܡܰܗ ܕܝ ܥܝܬܐ ܘܛܪܶܠܶܗ ܡܶܐ ܒܷܬ݂ܪܶܗ ܐܷܫܡܐ ܛܰܘܐ ܘܫܘܒܗܳܪܐ ܒܰܟܬ݂ܰܘܝܳܬ݂ܶܕ݂ܶܗ ܕܒܝ ܐܝܕ݂ܐ ܕܷܟܬ݂ܝܘܝܠܶܗ. ܡܶܩܷܡ ܡܘ ܫܘܢܳܝܶܕ݂ܶܗ ܡܕܰܫܰܢܠܶܗ ܐܰܟܬ݂ܳܘܶܐ ܕܷܟܬܷ݂ܘܠܶܗ ܟܘܠܠܶܗ ܠܰܒ ܒܶܝܬ݂ ܐܰܪܟܶܐ ܕܝ ܥܝܬܐ ܕܝܳܠܕܰܬ݂ ܐܰܠܳܗܐ ܡܰܪܝܰܡ ܕܷܐܣܛܰܢܒܷܠ ܠܰܔܰܢ ܕܡܝܢܛܳܪܝ ܘܕܗܳܘܰܠܠܶܗ ܦܰܝܕܰܐ ܐܰܢ ܢܳܫܶܐ ܡܰܢܢܶܐ. ܡܶܐܣܛܰܢܒܷܠ ܡܶܐ ܣܰܒܰܒܶܐ ܕܐܝ ܣܢܝܩܘܬ݂ܐ ܡܳܡܘܢܳܝܬܐ ܐܰܙܙܶܐ ܠܒܰܠܫ̰ܝܩܰܐ ܘܡܫܰܢܶܐ ܠܶܗ ܬܰܡܐ ܘܡܰܚܷܬ ܐܘ ܦܰܓ݂ܪܰܝܕ݂ܶܗ ܒܝ ܕܰܝܪܐ ܕܡܳܪܝ ܐܰܦܪܶܝܡ ܒܗܘܠܰܢܕܰܐ. ܟ݂ܘܪܳܝܐ ܚܰܢܢܰܐ ܐܰܝܩܘܪܛ ܙܰܐܙܳܝܐ ܟ݂ܘܪܳܝܐ ܚܰܢܢܳܐ ܐܰܝܩܘܪܬ ܡܰܘܠܷܕ݂ ܒܐܝ ܫܰܬܐ ܕܰܐܠܦܐ ܫ̰ܰܥܡܐ ܘܚܰܡܷܫ ܘܚܰܡܫܝ ܒܐܝ ܩܪܝܬ݂ܐ ܡܒܰܪܰܟ݂ܬܐ ܕܙܰܐܙ ܕܛܘܪܥܰܒܕܝܢ. ܡܶܐ ܐܰܒܳܗܶܐ ܡܗܰܝܡܢܶܐ. ܐܘ ܒܰܐܒܐ ܩܰܫܐ ܥܝܣܰܐ ܘܐܝ ܐܶܡܐ ܣܰܝܕܶܐ. ܩܪܶܠܶܗ ܘܡܰܬܷܡܠܶܗ ܐܰܚ ܚܰܡܷܫ ܐܷܫܢܶܐ ܩܰܡܳܝܶܐ ܕܐܘ ܒܶܝܬ݂ܣܶܦܪܐ ܬܘܪܟܳܝܐ ܒܐܝ ܩܪܝܬ݂ܐ. ܘܡܶܐ ܥܷܡܪܶܐ ܢܰܥܝܡܐ ܒܕܶܠܶܗ ܒܐܝ ܡܰܕܪܰܫܬܐ ܣܘܪܝܰܝܬܐ ܕܐܝ ܩܪܝܬ݂ܐ. ܘܛܥܷܡܠܶܗ ܐܘ ܛܰܥܡܐ ܚܰܠܝܐ ܕܐܘ ܝܘܠܦܳܢܐ ܣܘܪܝܳܝܐ ܘܝܰܪܷܘ ܘܡܫܰܘܫܷܛ ܒܐܝ ܩܪܝܬܐ. ܘܡܳܠܰܦܘܰܐ ܒܐܝ ܡܰܕܪܰܫܬܐ ܕܐܝ ܩܪܝܬ݂ܐ. ܒܐܝ ܫܰܬܐ ܕܰܐܠܦܐ ܫ̰ܰܥܡܐ ܘܫܘܰܥ ܘܶܐܫܬܝ ܐܶܦܷܣܩܘܦܐ ܐܰܦܪܶܝܡ ܒܝܠܓܝܫ̰ ܕܛܘܪܥܰܒܕܝܢ ܪܫܷܡܠܶܗ ܩܳܪܘܝܐ. ܒܐܝ ܫܰܬܐ ܕܰܐܠܦܐ ܫ̰ܰܥܡܐ ܘܬܰܪܬܶܐ ܘܬܡܳܢܝ ܐܝ ܩܰܕܝܫܘܬܐ ܕܦܰܛܷܪܝܰܪܟ݂ܐ ܙܰܟܰܝ ܪܫܷܡܠܶܗ ܐܘܦܷܕܝܰܩܢܐ. ܒܐܝ ܫܰܬܐ ܕܰܐܠܦܐ ܫ̰ܰܥܡܐ ܘܬܰܪܬܶܐ ܘܬܡܳܢܝ ܐܘ ܚܰܣܝܐ ܕܛܘܪܥܰܒܕܝܢ ܡܳܪܝ̱ ܦܝܠܘܟܣܝܢܳܘܣ ܐܰܠܝܰܣ ܫ̰ܰܢܩܰܝܰܐ ܡܫܰܕܰܪܠܶܗ ܟ݂ܘܕ ܡܰܠܦܳܢܐ ܠܝ ܥܝܬܐ ܩܰܕܝܫܬܐ ܘܡܰܟܬ݂ܰܒܙܰܒܢܰܝܬܐ ܕܝܳܠܕܰܬ ܐܰܠܗܐ ܡܰܪܝܰܡ ܕܐܡܝܕ ܕܷܝܰܪܒܰܟܷܪ. ܒܷܬ݂ܷܪ ܐܘ ܚܰܣܝܐ ܕܛܘܪܥܰܒܕܝܢ ܘܐܘ ܪܝܫ ܕܰܝܪܐ ܕܐܘ ܥܘܡܪܐ ܩܰܕܝܫܐ ܕܡܳܪܝ̱ ܓܰܒܪܐܝܶܠ ܡܳܪܝ̱ ܛܝܡܳܬܶܐܘܳܣ ܫܡܘܐܝܶܠ ܐܰܩܛܰܫ ܒܝ ܩܰܡܰܝܬܐ ܪܫܷܡܠܶܗ ܡܫܰܡܫܳܢܐ ܐܶܘܰܢܓܶܠܳܝܐ ܘܒܝ ܫܰܬܐ ܕܰܐܠܦܐ ܫ̰ܰܥܡܐ ܘܚܰܡܷܫ ܬܡܳܢܝ ܪܫܷܡܠܶܗ ܟܳܗܢܐ ܠܝ ܥܝܬܐ ܕܝܳܠܕܰܬ ܐܰܠܗܐ ܡܰܪܝܰܡ ܕܳܐܡܝܕ ܝܰܢܝ ܕܷܝܰܪܒܰܟܷܪ ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܬܠܰܬ݂ ܘܬܷܫܥܝ ܐܰܬ݂ܝ ܠܝ ܡܰܪܥܝܬ݂ܐ ܕܷܐܣܛܰܢܒܷܠ ܘܒܕܶܠܶܗ ܕܟܳܕܷܡ ܟ݂ܘܕ ܟܳܗܢܐ ܐܝ ܔܰܡܰܥܰܐ ܘܐܝ ܥܝܬܐ. ܘܒܝ ܫܰܬܐ ܕܰܬܪܶܐ ܐܰܠܦܐ ܘܬܡܳܢܶܐ ܚܰܣܝܐ ܝܰܘܣܶܦ ܫ̰ܶܬܝܢ ܡܰܥܠܶܠܶܗ ܠܘ ܕܰܪܓ݂ܐ ܕܝ ܟ݂ܘܪܳܝܘܬ݂ܐ. ܘܗܘܠ ܐܰܕܝܳܡܰܐ ܒܝܰܨܝܦܘܬ݂ܐ ܪܰܒܬ݂ܐ ܟܳܟ݂ܳܕܰܡ ܐܘ ܥܰܡܐ ܘܐܝ ܥܝܬܐ. ܘܟܳܡܷܪܚܷܡ ܡܶܐ ܟܘܠ ܢܳܫܐ ܟ݂ܘܕ ܐܰܒܐ ܪܘܚܳܢܳܝܐ. ܟ݂ܘܪܳܝܐ ܡܰܠܟܶܐ ܐܰܩܝܘܙ ܩܘܣܢܳܝܐ ܟ݂ܘܪܳܝܐ ܡܰܠܟܶܐ ܐܰܩܝܘܙ ܡܰܘܠܷܕ݂ ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫܰܘܥܝ ܒܝ ܩܪܝܬ݂ܐ ܕܒܳܩܘܣܝܳܢܶܐ ܡܶܐ ܐܰܒܳܗܶܐ ܡܗܰܝܡܢܶܐ ܕܷܐܫܡܰܝܝܶܗ ܠܰܚܕܳܐ ܘܥܰܙܙܶܐ ܕܟܷܬܢܶܐ ܡܝ ܐܝܩܰܪܬ݂ܐ ܕܒܶܗ ܡܷܪܔܐ. ܡܟܰܡܶܠܶܗ ܐܘ ܝܘܠܦܳܢܐ ܕܐܘ ܒܶܝܬ݂ ܣܶܦܪܐ ܬܘܪܟܳܝܐ ܗܘܠ ܠܰܚ ܚܰܡܷܫ ܐܷܫܢܶܐ ܩܰܡܳܝܶܐ ܒܝ ܩܪܝܬ݂ܐ ܕܝ ܓܘܢܕܷܟܶܐ. ܒܥܷܡܪܐ ܢܰܥܝܡܐ ܐܰܙܙܶܝܐ ܠܝ ܕܰܝܪܐ ܕܡܳܪܝ ܓܰܒܪܐܝܶܠ ܠܰܔܰܢ ܕܷܡܫܰܘܫܷܛ ܪܘܚܶܗ ܒܐܘ ܝܘܠܦܳܢܐ ܡܫܝܚܳܝܐ ܘܒܘ ܠܶܫܳܢܐ ܣܘܪܝܳܝܐ. ܒܐܘ ܙܰܒܢܰܢܐ ܡܟܰܡܶܠܶܗ ܐܘ ܒܶܝܬ݂ ܣܶܦܪܐ ܬܘܪܟܝܐ ܡܶܨܥܳܝܐ ܣܬܶܐ. ܐܝܢܰܩܠܰܐ ܕܡܰܛܝ ܠܘ ܥܘܡܪܐ ܕܐܘ ܠܝܣܰܐ ܐܰܙܙܶܝܐ ܠܡܷܪܕܶܐ ܘܬܰܡܐ ܩܪܶܠܶܗ ܐܰܬ ܬܠܰܬ݂ ܐܷܫܢܶܐ ܕܐܘ ܠܝܣܰܐ. ܒܷܬ݂ܷܪܟܶܐ ܡܓܰܠܘܶܠܶܗ ܠܷܐܣܛܰܢܒܷܠ ܘܒܕܶܠܶܗ ܕܣܳܝܷܡ ܡܷܠܦܳܢܘܬ݂ܐ ܗܰܪܟܶܐ. ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܬܠܰܬ݂ ܘܬܷܫܥܝ ܐܝ ܩܰܕܝܫܘܬ݂ܐ ܕܐܘ ܦܰܛܷܪܝܰܪܟ݂ܐ ܪܫܷܡܠܶܗ ܟܳܗܢܐ ܠܝ ܡܰܪܥܝܬܐ ܕܷܐܣܛܰܢܒܷܠ ܒܥܷܡܪܐ ܕܷܬܠܰܬ݂ ܘܥܷܣܪܝ ܐܷܫܢܶܐ. ܒܝ ܫܰܬܐ ܕܰܬܪܶܐ ܐܰܠܦܐ ܘܚܰܡܫܰܥܣܪ ܚܰܣܝܐ ܝܰܘܣܶܦ ܪܣܷܡܠܶܗ ܘܡܰܥܠܶܠܶܗ ܠܘ ܕܰܪܓ݂ܐ ܕܝ ܟ݂ܘܪܳܝܘܬ݂ܐ. ܘܗܘܠ ܐܰܕܝܳܡܰܐ ܟܳܟ݂ܳܕܷܡ ܒܝ ܡܰܪܥܝܬ݂ܐ ܕܷܐܣܛܰܢܒܷܠ. ܟ݂ܘܪܳܝܐ ܚܰܢܢܰܐ ܐܰܩܓܘܫ̰ ܙܰܐܙܳܝܐ ܟ݂ܘܪܳܝܐ ܚܰܢܢܰܐ ܡܰܘܠܷܕ݂ ܒܝ ܩܪܝܬܐ ܕܙܰܐܙ ܕܛܘܪܥܰܒܕܝܢ ܡܶܐ ܐܰܒܳܗܶܐ ܡܗܰܝܡܢܶܐ ܝܰܘܣܶܦ ܘܡܰܪܝܰܡ. ܡܷܕܠܶܗ ܐܘ ܝܘܠܦܳܢܐ ܕܐܘ ܒܶܝܬ݂ ܣܶܦܪܐ ܐܰܚ ܚܰܡܷܫ ܐܷܫܢܶܐ ܩܰܡܳܝܶܐ ܒܝ ܩܪܝܬ݂ܐ. ܘܒܐܘ ܙܰܒܢܰܢܐ ܥܰܒܷܪ ܠܝ ܡܰܕܪܰܫܬܐ ܕܝ ܩܪܝܬ݂ܐ ܩܪܶܠܶܗ ܘܪܚܷܡܠܶܗ ܐܘ ܝܘܠܦܳܢܐ ܣܘܪܝܳܝܐ. ܒܷܬ݂ܷܪ ܡܶܐ ܙܰܒܢܐ ܟܰܪܝܐ ܥܰܠ ܕܟܷܬܘܰܝܠܶܗ ܠܶܒܐ ܠܝ ܡܷܠܦܳܢܘܬ݂ܐ، ܥܷܡܪܶܗ ܐܷܫܬܰܥܣܰܪ ܐܷܫܢܶܐ ܒܕܶܠܶܗ ܕܣܳܝܰܡ ܡܷܠܦܳܢܘܬ݂ܐ ܒܝ ܡܰܕܪܰܫܬܐ ܕܝ ܩܪܝܬܐ. ܒܷܬ݂ܷܪܟܗ ܣܷܡܠܶܗ ܡܷܠܦܳܢܘܬ݂ܐ ܒܝ ܕܰܝܪܐ ܕܝܳܠܕܰܬ ܐܰܠܗܐ ܡܰܪܝܰܡ ܒܝ ܩܪܝܬ݂ܐ ܕܚܰܐܚ. ܗܘܠ ܕܰܐܙܙܶܝܐ ܠܝ ܦܳܠܚܘܬ݂ܐ. ܒܷܬ݂ܷܪ ܡܝ ܦܳܠܚܘܬ݂ܐ ܒܝ ܩܰܡܰܝܬܐ ܕܰܐܥܷܪ ܠܛܘܪܥܰܒܕܝܢ ܐܶܠܐ ܒܙܰܒܢܐ ܟܰܪܝܐ ܡܓܰܠܘܶܠܶܗ ܠܷܐܣܛܰܢܒܷܠ ܟ݂ܘܕ ܐܰܠܦܰܝܐ ܕܘ ܥܰܡܐ. ܘܗܰܪܟܶܐ ܒܕܶܠܶܗ ܕܣܳܝܰܡ ܡܷܠܦܳܢܘܬ݂ܐ ܒܝ ܪܝܫܳܢܘܬ݂ܐ ܕܟ݂ܘܪܳܝܐ ܨܰܡܘܐܝܶܠ ܐܰܩܕܶܡܝܪ ܕܟܷܬܘܰܐ ܗܝܝܶܐ ܐܘ ܘܰܟܝܠܐ ܕܘ ܦܰܛܷܪܝܰܪܟ݂ܐ ܒܷܐܣـܛܰܢܒܷܠ. ܚܰܡܷܫ ܘܥܷܣܪܝ ܐܷܫܢܶܐ ܣܷܡܠܶܗ ܡܷܠܦܳܢܘܬ݂ܐ ܒܷܐܣܛܰܢܒܷܠ. ܒܝ ܫܰܬܐ ܕܰܬܪܶܐ ܐܰܠܦܐ ܘܬܰܪܬܶܐ ܪܣܝܡ ܟܳܗܢܐ ܠܝ ܡܰܪܥܝܬ݂ܐ ܕܷܐܣܛܰܢܒܷܠ. ܘܒܝ ܫܰܬܐ ܕܰܬܪܶܐ ܐܰܠܦܐ ܘܚܰܡܫܰܥܣܰܪ ܡܬܰܣܠܷܩ ܠܘ ܕܰܪܓ݂ܐ ܕܝ ܟ݂ܘܪܳܝܘܬ݂ܐ. ܘܗܘܠ ܐܰܕܝܳܡܰܐ ܟܳܟ݂ܳܕܰܡ ܐܝ ܡܰܪܥܝܬ݂ܐ ܕܷܐܣܛܰܢܒܷܠ. ܩܰܫܐ ܦܶܛܪܘܣ ܓܘܠܫ̰ܶܐ ܡܷܕܝܳܝܐ ܩܰܫܐ ܦܶܛܪܘܣ ܡܬܰܘܠܷܕ݂ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܷܫ ܐܷܫܬܝ ܒܝ ܥܝܬܐ ܕܡܳܪܝ ܦܶܛܪܘܣ ܘܦܰܘܠܘܣ ܒܰܐܕܝܰܡܰܢ ܡܶܐ ܐܰܒܳܗܶܐ ܡܗܰܝܡܢܶܐ ܕܟܷܬܘܰܐ ܐܘ ܒܰܒܐ ܩܰܫܐ ܝܰܘܣܶܦ ܐܝ ܐܶܡܐ ܡܰܩܷܕܫܳܝܬܐ ܣܰܝܕܶܐ. ܘܐܘ ܣܳܒܶܕ݂ܶܗ ܣܬܶܐ ܟ݂ܘܪܳܝܐ ܓܰܘܪܺܝܶܐ ܕܟܷܬܢܶܐ ܡܷܕܝܳܝܶܐ. ܡܝ ܐܝܩܰܪܬ݂ܰܬ݂ܶܗ ܓ݂ܰܠܰܒܶܐ ܢܰܦܷܩ ܟ݂ܘܪܳܝܶܐ، ܩܰܫܶܐ ܘܰܡܫܰܡܫܳܢܶܐ. ܘܐܘ ܝܘܠܦܳܢܐ ܕܰܚ ܚܰܡܷܫ ܐܷܫܢܶܐ ܩܰܡܳܝܶܐ ܒܰܐܠܥܰܙܝܙ ܡܷܕܠܶܐ. ܘܒܷܬ݂ܷܪܟܶܐ ܐܰܬ݂ܷܢ ܠܡܷܕ݂ܝܰܕ݂ ܘܗܶܫ ܗܝܝܶܐ ܒܥܷܡܪܐ ܢܰܥܝܡܐ ܡܓܰܠܘܰܠܠܶܗ ܠܷܐܣܛܰܢܒܷܠ. ܝܰܪܘ ܒܰܝܢ ܕܘ ܥܰܡܐ ܕܷܐܣܛܰܢܒܷܠ ܒܡܰܪܕܘܬܐ ܣܘܪܝܰܝܬܐ. ܒܝ ܩܰܡܰܝܬܐ ܒܕܶܠܶܗ ܕܟ݂ܳܕܰܡ ܒܰܦ ܦܘܠܚܳܢܶܐ ܕܰܥܠܰܝܡܶܐ. ܘܒܟܘܠ ܝܰܨܝܦܘܬ݂ܐ ܡܔܰܪܰܒܠܶܗ ܕܨܳܝܰܕ ܐܰܥ ܥܠܰܝܡܶܐ ܥܰܡ ܚܕ݂ܳܕ݂ܶܐ. ܐܰܙܙܶܝܐ ܠܘ ܫܰܡ ܘܬܰܡܐ ܡܷܕܠܶܗ ܝܘܠܦܳܢܐ ܣܘܪܝܳܝܐ. ܘܡܫܰܘܫܰܛܠܶܗ ܘܡܰܩܘܶܠܶܗ ܐܘ ܝܘܠܦܳܢܶܕ݂ܶܗ. ܐܝܢܰܩܠܰܐ ܕܘ ܚܰܣܝܐ ܕܝ ܡܰܪܥܝܬ݂ܐ ܕܷܚܙܶܠܶܗ ܐܝ ܚܘܒܶܕ݂ܶܗ ܘܝ ܓ݂ܝܪܰܐ ܕܟܷܬܠܶܗ. ܡܫܰܕܰܪܠܶܗ ܠܝ ܕܰܝܪܐ ܕܡܳܪܝ ܐܰܘܓܝܢ ܕܷܣܘܝܫ̰ܪܰܐ ܬܠܳܬ݂ܐ ܝܰܪܚܶܐ ܕܡܰܩܘܶ ܐܘ ܝܘܠܦܳܢܐ ܬܶܐܘܳܠܳܓ݂ܳܝܐ. ܘܒܷܬ݂ܷܪ ܡܶܕ ܕܰܥܷܪ ܠܷܐܣܛܰܢܒܷܠ ܪܣܝܡ ܩܰܫܐ ܒܝ ܫܰܬܐ ܕܰܬܪܶܐ ܐܰܠܦܐ ܘܬܡܳܢܶܐ. ܘܗܘܠ ܐܕܝܳܡܰܐ ܟܳܟ݂ܳܕܰܡ ܒܝ ܡܰܪܥܝܬܐ ܕܷܐܣܛܰܢܒܷܠ. ܩܰܫܝܫܐ ܡܝܟ݂ܳܐܝܶܠ ܬܳܪܶܐ ܕܒܶܐ ܩܰܘܫܶܐ ܡܷܕܗܳܝܐ ܩܰܫܐ ܡܝܟ݂ܳܐܝܶܠ ܬܳܪܶܐ ܡܰܘܠܷܕ݂ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܶܐ ܘܬܡܳܢܝ ܒܝ ܩܪܝܬ݂ܐ ܡܒܰܪܰܟ݂ܬܐ ܕܡܝܕܷܢ ܕܛܘܪܥܰܒܕܝܢ. ܡܶܐ ܐܰܒܳܗܶܐ ܡܗܰܝܡܢܶܐ ܒܰܪܨܰܘܡܐ ܘܡܰܪܝܰܡ ܐܘ ܣܳܒܶܕ݂ܶܗ ܡܫܰܡܫܳܢܐ ܥܝܣܰܐ ܘܐܘ ܒܰܐܒܶܕ݂ܗ ܩܰܫܐ ܓܰܘܪܝܝܶܐ. ܩܰܫܐ ܡܝܟ݂ܳܐܝܶܠ ܡܰܘܠܷܕ݂ ܒܝܩܰܪܬ݂ܐ ܕܝܕ݂ܷܥܬܳܝܐ ܒܰܩ ܩܰܫܶܐ ܕܢܰܦܷܩ ܡܝܢܰܗ. ܩܰܫܐ ܡܝܟ݂ܳܐܶܝܠ ܡܷܕܠܶܗ ܐܘ ܝܘܠܦܳܢܐ ܕܘ ܒܶܝܬ݂ ܣܶܦܪܐ ܒܝ ܩܪܝܬ݂ܐ ܕܡܝܕܷܢ. ܘܒܘ ܙܰܒܢܰܢܐ ܩܘܡ ܐܝܕ݂ܶܗ ܕܡܰܠܦܳܢܐ ܘܰܡܫܰܡܫܳܢܐ ܠܰܚܕܐ ܒܰܪܷܢܔ ܥܰܒܷܪ ܠܝ ܡܰܕܪܰܫܬܐ ܕܝ ܩܪܝܬ݂ܐ. ܘܛܥܷܡܠܶܗ ܐܘ ܛܰܥܡܐ ܚܰܠܝܐ ܕܘ ܝܘܠܦܳܢܐ ܣܘܪܝܳܝܐ. ܐܝܢܰܩܠܰܐ ܕܷܡܟܰܡܶܠܶܗ ܐܘ ܒܶܝܬ݂ ܣܶܦܪܐ ܕܝ ܩܪܝܬ݂ܐ، ܐܰܙܙܶܝܐ ܠܝ ܕܰܝܪܐ ܕܡܳܪܝ ܝܰܥܩܘܒ ܐܘ ܚܒܝܫܝܐ ܕܟܷܬܝܐ ܒܝ ܩܪܝܬ݂ܐ ܕܨܰܠܷܚ. ܗܰܪܟܶܐ ܡܫܰܘܫܰܛܠܶܗ ܐܘ ܝܘܠܦܳܢܐ ܣܘܪܝܳܝܐ ܘܡܟܰܡܶܠܶܗ ܗܘܠ ܠܘ ܠܝܣܰܐ. ܒܝ ܫܰܬܐ ܕܰܬܪܶܐ ܐܰܠܦܐ ܘܥܣܰܪ ܩܪܰܠܰܠܶܗ ܠܷܐܣܛܰܢܒܷܠ ܕܟ݂ܳܕܷܡ ܘܫܳܓܷ݂ܠ ܒܝ ܥܝܬܐ ܕܒܰܩܷܪܟܳܝ. ܒܝ ܫܰܬܐ ܕܰܬܪܶܐ ܐܰܠܦܐ ܘܬܪܰܥܣܰܪ ܪܣܝܡ ܡܫܰܡܫܳܢܐ ܐܶܘܰܢܓܶܠܳܝܐ. ܒܷܬܷܪܟܗ ܐܰܙܙܶܝܐ ܠܝ ܕܰܝܪܐ ܕܡܳܪܝ ܐܰܘܓܝܢ ܒܷܣܘܝܫ̰ܪܰܐ ܕܡܰܥܠܶܗ ܐܘ ܝܘܠܦܳܢܐ ܡܫܝܚܳܝܐ ܘܝܳܠܷܦ ܐܝ ܬ݂ܶܐܘܳܠܳܓ݂ܝܝܰܐ. ܒܷܬ݂ܷܪ ܡܶܐ ܙܰܒܢܐ ܕܰܐܥܷܪ ܕܝܣܰܐ ܠܷܐܣܛܰܢܒܷܠ ܘܪܫܝܡ ܟܳܗܢܐ ܒܐܝܕܶܗ ܕܘ ܚܰܣܝܐ ܕܝ ܡܰܪܥܝܬ݂ܐ ܡܳܪܝ ܦܝܠܘܟܣܝܢܳܘܣ ܝܰܘܣܶܦ ܔܰܬܝܢ ܥܰܡ ܡܶܢܝܢܐ ܕܚܰܣܝܶܐ ܚܪܶܢܶܐ ܕܟܷܬܘܰܝܢܶܗ ܚܰܕ݂ܝܪܶܐ. ܩܰܫܐ ܡܝܟ݂ܳܐܝܶܠ ܒܥܷܡܪܐ ܕܷܥܠܰܝܡܘܬ݂ܐ ܪܣܝܡ ܘܥܰܠܝ ܠܘ ܕܰܪܓ݂ܐ ܕܝ ܟܳܗܢܘܬ݂ܐ. ܐܰܕܝܳܡܰܐ ܟܷܬܠܶܗ ܦܘܠܚܳܢܶܐ ܪܰܒܶܐ ܕܟܳܣܳܝܰܡ ܠܝ ܥܝܬܐ ܣܘܪܝܰܝܬܐ ܘܠܝ ܡܰܪܥܝܬ݂ܐ ܕܷܐܣܛܰܢܒܷܠ. ܒܰܡ ܡܝܡܪܶܐ ܕܟܳܟܳܬ݂ܰܘ ܒܰܦ ܦܘܫܳܩܶܐ ܕܰܟܬܳܘܶܐ ܕܰܐܢ ܐܰܒܳܗܳܬ݂ܐ ܕܟܳܣܳܝܰܡ. ܕܝܣܰܐ ܗܝܝܶܝܳܐ ܕܥܰܒܷܪ ܠܝ ܣܝܥܬܐ ܕܰܥ ܥܝܬܳܬ݂ܐ ܕܟܝܬܐ ܒܷܐܣܛܰܢܒܷܠ ܒܷܐܫܡܶܐ ܕܝ ܥܝܬܐ ܣܘܪܝܰܝܬܐ. ܕܟܷܡܦܰܫܩܝ ܐܘ ܐܶܘܰܢܓܶܠܝܳܘܢ ܩܰܕܝܫܐ ܡܶܐ ܚܰܬ݂ܐ ܠܘ ܬܘܪܟܳܝܐ. ܘܗܰܘܟ݂ܰܐ ܐܘܥܕܐ ܫܰܓ݂ܳܠܳܝܐ ܥܰܠ ܟܡܐ ܟܬ݂ܳܘܶܐ ܚܪܶܢܶܐ ܕܚܘܕܪܝ ܠܘ ܛܒܳܥܐ. ܘܗܘܠ ܐܰܕܝܳܡܰܐ ܟܳܦܳܠܰܚ ܒܓ݂ܝܪܰܐ ܒܝ ܡܰܪܥܝܬܐ ܕܷܐܣܛܰܢܒܷܠ. ܒܙܰܒܢܐ ܟܰܪܝܐ ܣܷܡܠܶܗ ܫܘܓ݂ܠܳܢܶܐ ܓ݂ܰܠܰܒܶܐ ܪܰܒܶܐ ܠܘ ܥܰܡܐ ܣܘܪܝܳܝܐ ܕܷܐܣܛܰܢܒܷܠ، ܐܰܕܝܳܡܰܐ ܐܝ ܡܰܪܥܝܬ݂ܐ ܕܷܐܣܛܰܢܒܷܠ ܚܕ݂ܐ ܡܰܐ ܡܰܪܷܥܝܳܬ݂ܐ ܩܘܝܬ݂ܐ ܕܝ ܥܝܬܐ ܣܘܪܝܰܝܬܐ ܝܐ. ܐܰܕܝܳܡܰܐ ܚܰܣܝܐ ܝܰܘܣܶܦ ܗܶܫ ܟܳܟ݂ܳܕܷܡ ܐܝ ܡܰܪܥܝܬ݂ܐ ܕܷܐܣܛܰܢܒܷܠ، ܟܷܡܔܰܗܷܕ ܠܝ ܦܰܝܕܰܐ ܕܘ ܥܰܡܐ، ܦܬܷܚܠܶܗ ܒܷܐܣܛܰܢܒܷܠ ܓܰܢܰܬ݂ ܫܰܒܪܶܐ ܕܰܢ ܢܰܥܝܡܶܐ ܕܘ ܥܰܡܐ ܣܘܪܝܳܝܐ ܒܷܐܫܡܶܐ ܕܡܳܪܝ ܐܰܦܪܶܝܡ ܕܝܷܪܘܝ ܥܰܡ ܚܕ݂ܳܕ݂ܶܐ ܩܘܡ ܐܝܕ݂ܶܗ ܕܰܡ ܡܰܠܦܳܢܶܐ ܣܘܪܝܳܝܶܐ ܒܘ ܝܘܠܦܳܢܐ ܣܘܪܝܳܝܐ. ܘܟܷܡܔܰܪܷܒ ܕܦܳܬܷܚ ܒܶܝܬ݂ ܣܶܦܪܐ ܣܘܪܝܳܝܐ ܠܰܥܠܰܝܡܶܐ ܣܘܪܝܳܝܶܐ ܣܬܶܐ. ܟܷܬܠܶܗ ܥܰܡܐ ܩܰܪܝܘܐ ܠܥܷܣܪܐ ܐܰܠܦܐ ܒܝ ܡܰܪܥܝܬ݂ܐ، ܥܰܡ ܚܰܡܫܐ ܟܳܗܢܶܐ ܟܷܡܕܰܒܷܪ ܐܝ ܣܢܝܩܘܬܐ ܪܘܚܳܢܳܝܬܐ ܕܘ ܥܰܡܐ. ܚܰܣܝܐ ܝܰܘܣܶܦ ܟܷܬܠܶܗ ܐܶܣܳܪܶܐ ܓ݂ܰܠܰܒܶܐ ܛܳܘܶܐ ܥܰܡ ܐܝ ܕܰܘܠܰܗ ܕܬܘܪܟܝـܝܰܐ ܥܰܡ ܐܰܡ ܡܕܰܒܪܳܢܶܐ ܕܷܐܣܛܰܢܒܷܠ، ܘܒܰܐܚܘܢܘܬ݂ܐ ܟܷܬܠܶܗ ܐܶܣܳܪܶܐ ܥܰܡ ܐܰܥ ܥܝܕܳܬ݂ܳܐ ܐܰܚܘܳܬ݂ܐ ܚܪܶܢܶܐ ܕܟܷܬܢܶܗ ܒܷܐܣܛܰܢܒܷܠ. ܡܶܐ ܙܰܒܢܐ ܠܙܰܒܢܐ ܟܳܘܶܠܶܗ ܣܳܥܘܪܘܬ݂ܐ ܠܰܡ ܡܰܪܷܥܝܳܬ݂ܐ ܚܪܶܢܶܐ ܕܝ ܥܝܬܐ ܣܘܪܝܰܝܬܐ ܥܰܡ ܐܰܥ ܥܠܰܝܡܶܐ ܐܰܘ ܥܰܡ ܐܰܢ ܢܶܫܶܐ ܕܝ ܡܰܪܥܝܬܐ ܕܷܐܣܛܰܢܒܷܠ. ܐܘ ܕܘܪܘܡ ܕܝ ܥܝܬܐ ܣܘܪܝܰܝܬܐ ܕܷܐܣܛܰܢܒܷܠ ܐܰܕܝܰܘܡܰܐ ܐܰܕܝܰܘܡܰܐ ܟܷܬܠܰܢ ܒܷܐܣܛܰܢܒܷܠ ܥܰܝܝܬ ܕܝ ܥܝܬܰܝܕ݂ܰܢ ܬܪܶܐ ܐܰܠܦܐ ܝܰܩܪܳܬ݂ܐ ܕܟܳܡܳܛܶܐ ܐܘ ܡܷܢܝܳܢܰܬ݂ܬ݂ܶܗ ܩܰܪܝܘܐ ܠܥܷܣܪܐ ܐܰܠܦܐ ܕܢܰܦܫܳܬ݂ܐ ܔܓ݂ܰܝܪ ܡܰܟ ܟܰܠܕܳܝܶܐ ܘܡܰܣ ܣܘܪܝܳܝܶܐ ܩܰܬܘܠܝܩܳܝܶܐ. ܟܳܬ݂ܝܢܰܐ ܒܷܬ݂ܷܪ ܡܰܐ ܐܰܪܡܢܳܝܶܐ ܐܰܡ ܡܫܝܚܳܝܶܐ ܙܝܘܕܶܐ ܒܬܷܪܟܝܝܰܐ. ܟܳܡܝܕܰܒܪܐ ܐܝ ܥܝܬܰܝܕ݂ܰܢ ܒܝ ܪܝܫܳܢܘܬ݂ܐ ܕܡܳܪܝ̱ ܦܝܠܘܟܣܝܢܳܘܣ ܝܰܘܣܶܦ ܔܶܬܝܢ ܥܰܡ ܬܠܳܬ݂ܐ ܟ݂ܘܪܳܝܶܐ ܘܬܪܶܐ ܩܰܫܶܐ ܘܷܚܕ݂ܐ ܕܰܝܪܰܝܬܐ. ܘܟܷܬܠܢ ܬܡܳܢܶܐ ܥܝܬܳܬ݂ܐ ܕܟܳܡܷܣܬܰܥܷܡܠܝܢܰܠܷܢ. ܐܝ ܥܝܬܐ ܕܝܳܠܕ݂ܰܬ ܐܰܠܳܗܐ ܕܒܶܝܐܳܓ݂ܠܘ ܘܥܰܡ ܥܝܬܐ ܢܰܥܷܡܬܐ ܕܰܒ ܒܶܝܬ݂ ܩܒܘܪܶܐ ܗܰܢܝ ܡܰܠ ܕܝܕ݂ܰܢ ܢܶܐ. ܐܝ ܥܝܬܐ ܕܩܰܐܕܷܟܳܝ ܠܝ ܕܰܘܠܰܐ ܗܘܠܰܠܰܢܝܐ ܗܘܠ ܫ̰ܰܥ ܬܷܫܥܝ ܐܷܫܢܶܐ ܕܡܷܣܬܰܥܷܡܠܝܢܰܠܰܗ. ܐܰܥ ܥܝܬܳܬ݂ܐ ܚܪܶܢܶܐ ܠܰܥ ܥܝܬܳܬ݂ܐ ܐܰܚܘܳܬ݂ܐ ܕܰܪ ܪܘܡ ܘܕܰܢ ܐܰܪܡܢܳܝܶܐ ܗܝܘܷܢܢܶܗ ܐܶܠܰܢ ܕܷܡܨܰܠܝܢܰܐ ܐܰܦ݁ܦ݁ܶܗ ܐܶܠܐ ܡܰܠ ܕܷܬ݂ܬ݂ܷܢܶܐ. ܒܝ ܫܰܬܐ ܕܰܬܪܰܠܦܐ ܚܙܶܐ ܣܢܝܩܘܬ݂ܐ ܠܥܝܬܐ ܚܰܕ݂ܬܐ ܥܰܠ ܕܟܷܬܠܰܢ ܥܰܡܐ ܓ݂ܰܠܰܒܶܐ ܒܒܰܩܷܪܟܳܝ ܘܚܝܕ݂ܳܪܰܐ. ܡܘܰܦܰܩ ܐܘ ܥܰܡܐ ܥܰܠ ܕܘܟܬ݂ܐ ܕܟܷܬܝܐ ܒܝܶܫܝܠܟܳܝ. ܡܶܐ ܬܡܳܢܶܐ ܐܷܫܢܶܐ ܗܝܘ ܬܰܥܒܐ ܓ݂ܰܠܰܒܶܐ ܥܰܠ ܐܝ ܕܘܟܬ݂ܰܬ݂ܶܗ ܥܰܠ ܕܟܷܬܘܰܐ ܗܷܢ ܡܝܢܰܐ ܩܰܘܪܶܐ ܥܰܬܝܩܶܐ ܕܰܠ ܠܰܬܝܢܳܝܶܐ. ܡܰܘܟ݂ܰܐ ܒܰܡ ܡܰܚܟܰܡܰܬ ܕܬܷܪܟܝܝܰܐ ܗܷܫ ܠܐ ܨܰܦܝܳܘܰܐ ܐܝ ܕܘܟܬ݂ܐ. ܒܷܬ݂ܷܪ ܡܶܐ ܕܗܰܘܝ ܝܬܰܘܝܳܬ݂ܶܐ ܓ݂ܰܠܰܒܶܐ ܥܰܡ ܐܝ ܥܝܬܐ ܕܰܟ ܟܰܬܘܠܝܟ ܘܒܰܢ ܐܶܣܳܪܶܐ ܛܳܘܶܐ ܕܥܰܡ ܐܝ ܕܰܘܠܰܗ ܘܒܝ ܓ݂ܝܪܰܐ ܕܰܡܕܰܒܪܳܢܶܐ ܚܪܶܢܶܐ ܕܝ ܥܝܬܰܝܕ݂ܰܢ ܕܷܐܣܛܰܢܒܷܠ. ܡܷܕܠܷܢ ܦܣܳܣܐ ܕܡܝܬܰܥܡܷܪ ܥܝܬܐ ܣܘܪܝܰܝܬܐ ܒܷܐܣܛܰܢܒܷܠ، ܐܝ ܥܝܬܰܬ݂ܶܗ ܟܬܷܘܝܐ ܪܘܫܡܳܐܝܬ݂ ܐܝ ܥܝܬܐ ܩܰܡܰܝܬܐ ܕܥܰܡܝܪܐ ܒܝ ܕܰܘܠܰܗ ܕܬܷܪܟܝـܝܰܐ ܡܶܐ ܙܰܒܢܐ ܕܡܐ ܐܷܫܢܶܐ. ܥܰܠ ܕܠܰܬܘܰܗ ܦܣܳܣܐ ܕܡܝܬܰܥܡܷܪ ܥܝܕܳܬ݂ܐ ܒܓܰܘܶܐ ܕܘ ܥܰܦܪܐ ܕܬܷܪܟܝܝܰܐ. ܒܷܬ݂ܷܪ ܡܶܐ ܕܷܡܫܰܕܰܪ ܙܡܝܢܘܬ݂ܐ ܠܰܪ ܪܝܫܳܢܶܐ ܕܝ ܕܰܘܠܰܐ، ܬܠܳܬ݂ܐ ܒܘ ܝܰܪܚܐ ܕܰܬܡܰܢܝܐ ܕܰܬܪܰܠܦܐ ܘܫ̰ܰܥܣܰܪ ܐܰܬ݂ܝ ܚܰܕ݂ܷܪ ܐܘ ܪܝܫܳܢܐ ܕܝ ܕܰܘܠܶܗ ܕܬܷܪܟܝܝܰܐ ܪܶܔܶܒ ܛܰܐܝܦ݁ ܐܰܪܕܳܓ݂ܰܐܢ ܥܰܡ ܐܰܡܥܰܕܪܳܢܰܝܕ݂ܶܗ ܘܰܡܫܰܘܪܳܢܰܝܕ݂ܶܗ. ܐܘ ܘܰܙܝܪܐ ܕܰܫ ܫܘܓ݂ܠܳܢܶܐ ܓܰܘܳܝܶܐ ܘܐܘ ܘܰܙܝܪܐ ܕܝ ܡܰܪܕܘܬ݂ܐ. ܘܚܰܕ݂ܝܪܝ ܒܘ ܚܶܠܳܩܐ ܕܘ ܬܰܡܰܠ ܕܝ ܥܝܬܐ ܐܰܬܪܶܐ ܦܰܛܷܪܝܰܪܟ݂ܶܐ ܕܟܷܬܢܶܐ ܒܷܐܣܛܰܢܒܷܠ ܕܰܪ ܪܘܡ ܘܕܰܐܢ ܐܰܪܡܢܳܝܶܐ. ܘܐܘ ܘܰܟܝܠܐ ܕܘ ܦ݁ܰܦ݁ܰܐ ܕܪܘܡܰܐ. ܥܰܡ ܐܰܚ ܚܰܣܝܶܐ ܕܝ ܥܝܬܰܝܕ݂ܰܢ ܕܟܷܬܢܶܐ ܒܬܷܪܟܝܝܰܐ ܘܡܷܢܝܳܢܐ ܪܰܒܐ ܕܰܟ ܟܳܗܢܶܐ ܥܰܡ ܥܰܡܐ ܡܫܝܚܳܝܐ. ܐܝ ܣܰܥܰܝܝܶܐ ܒܰܬܠܰܬ݂ ܒܷܬ݂ܷܪ ܡܘ ܡܰܡܠܐ ܕܘ ܪܝܫܐ ܕܝ ܕܰܘܠܶܗ ܘܕܘ ܚܰܣܝܐ ܡܰܚܬܐ ܐܝ ܟܶܦܐ ܩܰܡܰܝܬܐ ܕܝ ܥܝܬܐ ܥܰܠ ܐܷܫܡܶܐ ܕܡܳܪܝ ܐܰܦܪܶܝܡ ܐܘ ܡܰܠܦܳܢܐ. ܟܳܡܷܬܝܰܩܢܝܢܰܐ ܗܘܠ ܠܝ ܚܰܪܰܝܬܐ ܕܝ ܫܰܬܐ ܕܰܬܪܰܠܦܐ ܘܚܕ݂ܐ ܘܥܷܣܪܝ ܟܬܰܝܡܐ ܐܝ ܥܝܬܐ ܓܡܝܩܰܕܫܐ ܘܓܡܷܦܬܳܚܐ. ܒܘ ܚܰܝܠܐ ܕܰܐܠܳܗܐ ܘܓܕܷܘܝܐ ܠܘ ܫܘܒܚܐ ܘܠܘ ܢܶܨܚܳܢܐ ܕܷܐܫܡܶܐ ܕܰܐܠܳܗܐ ܘܕܝ ܣܘܪܝܳܝܘܬ݂ܐ. ܓܰܢܰܬ݂ ܫܰܒܪܶܐ ܕܡܳܪܝ ܐܰܦܪܶܝܡ ܣܘܪܝܳܝܐ ܒܷܐܣܛܰܢܒܷܠ ܟ݂ܘܕ ܕܟܷܬܝܐ ܐܝܕ݂ܝܥܐ ܐܝ ܡܰܕܪܰܫܬܰܝܕ݂ܰܢ ܕܡܷܪܕܶܐ ܐܝ ܚܰܪܰܝܬܐ ܕܟܷܬܘܰܐ ܪܘܫܡܰܝܬܐ ܒܬܷܪܟܝܝܰܐ، ܒܝ ܫܰܬܐ ܕܰܐܢ ܐܰܠܦܐ ܫ̣ܰܥܡܐ ܬܡܳܢܶܐ ܘܥܷܣܪܝ ܣܟ݂ܝܪܐ ܡܶܐ ܣܰܒܰܒܶܗ ܕܠܰܬܢܶܐ ܐܝܕ݂ܝܥܶܐ ܗܘܠ ܠܰܕܝܰܘܡܰܐ. ܡܪܰܔܰܥܠܶܗ ܐܘ ܥܰܡܐ ܟܡܐ ܢܰܩܩܰܬ ܠܝ ܕܰܘܠܶܗ ܐܶܠܐ ܥܰܡ ܚܒܳܠ ܠܐ ܗܘܠܰܗ ܕܰܣܛܷܪ ܕܡܷܦܬܰܚ ܡܰܕܪܰܫܬܐ ܪܘܫܡܳܝܬܐ. ܐܝ ܥܝܬܐ ܕܷܐܣܛܰܢܒܷܠ ܒܷܬ݂ܷܪ ܡܷܕ ܗܰܘܝܠܰܗ ܝܬܰܘܝܳܬ݂ܶܐ ܥܰܡ ܐܰܪ ܪܝܫܳܢܶܐ ܕܝ ܕܰܘܠܶܗ ܒܰܬܪܰܠܦܐ ܘܐܰܪܒܰܥܣܰܪ ܡܷܕܠܷܢ ܕܰܣܛܷܪ ܘܦܬܷܚܠܷܢ ܪܘܫܡܳܝܐ ܓܰܢܰܬ݂ ܫܰܒܪܶܐ ܥܰܠ ܐܷܫܡܶܐ ܕܘ ܩܰܕܝܫܐ ܡܳܪܝ ܐܰܦܪܶܝܡ ܣܘܪܝܳܝܐ ܒܝܶܫܝܠܟܳܝ ܕܷܐܣܛܰܢܒܷܠ. ܗܰܢܝ ܟܡܐ ܐܷܫܢܶܐ ܟܳܡܝܚܰܝܕ݂ܷܪ ܟܬ݂ܳܘܶܐ ܣܬܶܐ ܠܰܫܰܢ ܐܰܢ ܐܰܪܒܥܐ ܣܶܕܪܶܐ ܩܰܡܳܝܶܐ ܕܝ ܡܰܕܪܰܫܬܐ. ܒܘ ܚܰܝܠܐ ܕܰܐܠܳܗܐ ܥܰܠ ܩܰܪܝܘܐ ܓܩܘܕܪܝ ܕܦܷܬܚܝ ܐܝ ܡܰܕܪܰܫܬܐ ܩܰܡܰܝܬܐ ܪܘܫܡܰܝܬܐ ܒܬܷܪܟܝܝܰܐ ܠܰܣ ܣܘܪܝܳܝܶܐ. ܘܰܐܕܝܳܡܰܐ ܟܷܬܠܰܗ ܐܝ ܚܰܣܝܘܬ݂ܐ ܡܓ݂ܰܠܬ݂ܐ ܕܟܘܠ ܝܰܪܚܐ ܟܳܡܷܛܒܳܥܐ ܒܘ ܐܷܫܡܐ ܐܝܕܶܡ ܝܰܥܢܝ ܪܶܥܝܳܢܐ. ܡܓܰܠܬܐ ܡܰܪܕܘܬ݂ܳܢܳܝܬܐ ܕܟܳܦܷܪܣܐ ܐܰܛ ܛܶܒܶܐ ܘܰܐܫ ܫܘܫܳܛܶܐ ܕܟܳܘܷܢ ܒܝ ܡܰܪܥܝܬܐ ܒܝ ܚܰܩܠܐ ܕܝ ܥܝܬܐ ܘܕܝ ܡܰܪܕܘܬ݂ܐ. ܘܟܷܬܠܷܢ ܟ݂ܘܕ ܥܰܡܐ ܣܘܪܝܳܝܐ ܓܘܕܐ ܕܘ ܐܷܣܦܝܪ ܪܶܓ݂ܠܐ ܒܘ ܐܷܫܡܐ ܕܩܰܕܝܡ ܣܦ݁ܳܪ ܕܟܳܡܷܫܬܰܥܝܐ ܒܘ ܕܰܪܓ݂ܐ ܬܰܚܬܳܝܐ ܒܬܷܪܟܝܝܰܐ. ܐܝ ܥܝܬܰܝܕ݂ܰܢ ܕܷܐܣܛܰܢܒܷܠ ܗܘܠ ܠܰܕܝܰܘܡܰܐ ܠܐ ܩܰܕܝܪܐ ܕܡܰܪܷܟܘܐ ܡܰܕܷܪܫܳܬ݂ܐ ܒܷܚܕ݂ܐ ܡܰܐ ܥܝܬܳܬ݂ܐ ܒܘ ܫܷܟܷܠ ܕܟܝܬ ܒܛܘܪܥܰܒܕܝܢ. ܟܡܐ ܢܰܩܩܰܬ ܡܰܪܟܰܘܘܶܐ ܡܰܕܪܰܫܬܐ ܐܶܠܐ ܡܶܐ ܣܰܒܰܒܶܐ ܕܠܰܬܢܶܐ ܐܝܕ݂ܝܥܶܐ ܣܟ݂ܝܪܐ. ܐܰܕܝܰܘܡܰܐ ܒܰܥ ܥܝܬܳܬ݂ܐ ܕܟܷܬܠܰܢ ܟܘܠ ܝܰܘܡܶܐ ܕܫܰܒܬ݂ܐ ܟܳܡܝܬܰܘܠܷܦ ܠܝܫܳܢܐ ܣܘܪܝܳܝܐ ܥܰܡ ܨܠܰܘܳܬ݂ܐ ܟܡܳܐ ܣܰܥܰܝܰܬ. ܐܶܠܐ ܥܰܡ ܚܒܳܠ ܠܰܬܝܐ ܡܰܟܷܦܝܳܢܐ. ܡܰܘܟ݂ܰܐ ܒܰܝܢ ܕܰܥ ܥܰܣܪܐ ܐܰܠܦܐ ܢܰܦܫܳܬ݂ܐ ܒܰܣ ܗܰܢܝ ܕܰܐܙܙܷܢ ܡܘ ܛܘܪܐ ܟܳܡܷܔܓ݂ܳܠܝ ܣܘܪܝܳܝܐ ܕܟܳܡܳܛܶܐ ܐܘ ܡܷܢܝܳܢܰܬ݂ܬ݂ܶܗ ܠܚܰܡܷܫ ܡܳܐ ܢܰܦܫܳܬ݂ܐ. ܐܰܚܪܶܢܶܐ ܡܰܥܠܰܣܰܦ ܠܐ ܟܳܩܘܕܪܝ ܕܡܷܔܓ݂ܳܠܝ ܣܘܪܝܳܝܐ. ܥܰܠ ܕܝ ܐܰܓ݂ܠܰܒܝܝܶܐ ܕܰܣ ܣܘܪܝܳܝܶܐ ܕܟܷܬܢܶܐ ܒܷܐܣܛܰܢܒܷܠ ܐܰܬ݂ܷܢ ܡܶܐ ܡܰܪܕܶܐ، ܕܝܝܰܪܒܰܟܷܪ، ܐܘܪܦܰܐ، ܐܰܠܥܰܙܝܙ، ܐܰܕܷܝܰܡܰܢ ܘܡܰܠܰܛܝܰܐ. ܒܘ ܙܳܝܘܕܐ ܒܰܐ ܒܳܬܐ ܠܝܫܳܢܐ ܬܷܪܟܝ ܘܗܷܢ ܥܰܪܰܒܝ ܟܳܡܷܔܓ݂ܳܠܝ. ܡܰܘܟ݂ܰܐ ܗܷܢ ܡܰܐ ܨܠܰܘܳܬ݂ܐ ܟܳܡܝܬܰܘܡܪܝ ܒܘ ܬܘܪܟܳܝܐ ܘܒܘ ܥܰܪܰܒܳܝܐ. ܐܘ ܥܰܡܐ ܣܘܪܝܳܝܐ ܟ݂ܘܕ ܟܷܬܝܐ ܒܷܒܪܝܬ݂ܐ ܟܘܠܰܗ ܒܷܐܣܛܰܢܒܷܠ ܣܬܶܐ ܠܐ ܪܚܷܡܠܶܗ ܐܘ ܝܬܳܘܐ ܐܶܠܐ ܡܕܰܘܰܡܠܶܗ ܐܰܣ ܨܷܢܥܰܬ ܕܟܷܬܘܰܝܠܶܗ ܒܘ ܐܰܬ݂ܪܰܝܕ݂ܶܗ. ܡܰܘܟ݂ܰܐ ܐܰܓ݂ܠܰܒ ܕܘ ܥܰܡܰܝܕ݂ܰܢ ܐܘ ܣܘܪܝܳܝܐ ܕܟܳܥܳܝܰܫ ܒܷܐܣܛܰܢܒܷܠ ܟܷܬܠܶܗ ܕܘܟܰܢܶܐ ܕܘ ܕܰܗܘܐ ܘܕܘ ܣܶܡܐ ܘܕܝ ܦܷ݁ܪܠܰܢܛܰܐ. ܘܡܰܩܪܶܐ ܠܶܗ ܐܰܢ ܢܰܥܝܡܰܝܕ݂ܶܗ ܣܬܶܐ ܒܰܒ ܒܶܝܬܨܰܘܒܶܐ. ܘܢܰܦܷܩ ܠܰܢ ܓ݂ܰܠܰܒܶܐ ܩܰܪܳܝܶܐ ܒܕܰܪܓ݂ܶܐ ܥܶܠܳܝܶܐ ܒܟܘܠ ܦܷܪܥܐ. ܓܰܘܳܢܳܝܐ ܐܘ ܕܘܪܘܡ ܕܘ ܥܰܡܰܝܕ݂ܰܢ ܐܘ ܣܘܪܝܳܝܐ ܕܟܳܥܳܝܰܫ ܒܷܐܣܛܰܢܒܷܠ ܡܝ ܟ݂ܰܨܪܰܐ ܕܘ ܐܶܟܳܢܳܡܝ ܛܰܘܳܝܐ. ܐܶܠܐ ܡܰܥܠܰܣܰܦ ܡܝ ܟ݂ܰܨܪܰܐ ܕܘ ܠܝܫܳܢܐ ܘܕܝ ܐܘܡܬ݂ܐ ܐܘ ܕܘܪܘܡ ܕܝܕ݂ܶܗ ܠܰܬܝܐ ܛܰܘܘܐ. ܡܰܠܦܳܢܐ ܐܰܝܗܰܐܢ ܓܘܪܩܰܐܢ ܥܰܡ ܒܷܢܝܳܡܝܢ ܬܳܪܶܐ 6102 ܡܶܠܶܐ
