Cäziz Aydin : ܐܰܡ ܡܷܨܥܳܝܶܐ ܕܰܐ ܐܶܣܳܪܶܐ ܟܢܽܘܫܝܳܝܶܐ ܐܰܘ ܐܝ ܡܶܕܝܰܐ / Am mëṣcoye dan esore knušyoye aw i medya

Am mëṣcoye dan esore knušyoye aw i medya

ܐܰܡ ܡܷܨܥܳܝܶܐ ܕܰܐ ܐܶܣܳܪܶܐ ܟܢܘܫܝܳܝܶܐ ܝܰܥܢܝ ܐܝ ܡܶܕܝܰܐ ܟ݂ܘܕ ܟܳܡܝ̣ܕܳܥܐ ܒܰܠ ܠܶܫܳܢܶܐ ܚܪܶܢܶܐ، ܟܳܡܷܫܬܰܥܝܐ ܕܰܘܪܐ ܪܰܒܐ ܒܰܚ ܚܰܝܶܐ ܕܘ ܒܰܪܢܳܫܐ. ܐܰܚ ܚܰܝܶܐ ܕܘ ܟ݂ܢܘܫܝܐ ܟܳܔܷܒܪܝ ܐܰܢ ܢܳܫܶܐ ܠܰܢ ܐܶܣܳܪܶܐ ܕܥܰܡ ܚܕܳܕܶܐ. ܐܝܕ݂ܰܐ ܒܘ ܨܷܒܝܳܢܰܬ݂ܬ݂ܶܗ ܘܐܝܕ݂ܰܐ ܕܠܐ ܒܘ ܨܷܒܝܳܢܰܬ݂ܬ݂ܶܗ. ܘܰܐܢ ܐܶܣܳܪܶܐ ܟܷܦ݁ܦ݁ܶܗ ܕܗܳܘܷܢ ܒܰܝܢ ܬܪܶܐ ܢܳܫܶܐ ܐܰܘ ܒܰܝܢ ܢܳܫܶܐ ܓ݂ܰܠܰܒܶܐ ܐܰܘ ܒܰܝܢ ܥܰܡܶܐ. ܘܗܰܢܝ ܦܰܠܩܐ ܢܶܐ ܡܰܐ ܚܰܝܶܐ ܕܘ ܒܰܪܢܳܫܐ، ܕܟܘܠ ܝܰܘܡܐ ܟܳܠܷܙܡܝܠܶܢܶܗ ܒܰܚ ܚܰܝܰܝܕ݂ܶܐ. ܐܘ ܒܰܪܢܳܫܐ ܡܝ ܣܢܝܩܘܬ݂ܐ ܟܳܠܳܙܰܡܠܶܗ ܐܶܣܳܪܶܐ ܥܰܡ ܐܰܢ ܢܳܫܶܐ ܚܪܶܢܶܐ ܕܰܐܦ̇ܦ̇ܶܗ ܩܳܕܷܪ ܡܰܠܚܷܩ ܐܰܛ ܛܶܒܰܝܕܶܗ ܐܰܝ ܝܰܘܡܳܝܶܐ ܐܰܘ ܐܰܪ ܪܷܓ݂ܫܰܝܕܶܗ ܘܰܐܪ ܪܷܥܝܳܢܰܝܕܶܗ ܐܰܝ ܝܘܠܦܳܢܳܝܶܐ ܐܰܘ ܐܰܦ̇ ܦ̇ܳܘܠܝܛܝܩܳܝܶܐ ܐܰܘ ܣܬܶܐ ܐܰܬ ܬܶܓܘܪܬܳܢܳܝܶܐ ܘܐܳܘ ܐܰܚ ܚܪܶܢܶܐ ܠܷܕ ܚܶܕܳܪܶܗ. ܠܰܫܰܢ ܕܩܳܕܷܪ ܣܳܝܷܡ ܐܰܢ ܐܶܣܳܪܰܢܝ ܐܰܟ ܟ݂ܢܘܫܝܳܝܶܐ ܓܠܳܙܰܡܠܶܗ ܡܷܨܥܳܝܶܐ ܠܘ ܡܶܕܰܢܐ، ܘܗܰܢܝ ܣܬܶܐ ܟܷܦ̇ܦ̇ܶܗ ܕܗܳܘܷܢ ܒܘ ܕܰܪܒܐ ܕܝ ܡܶܕܝܰܐ. ܡܷܢܝܐ ܐܝ ܡܶܕܝܰܐ؟ ܐܘ ܟ̣ܰܒܪܐ ܕܡܶܕܝܰܐ ܟܳܬ݂ܶܗ ܡܘ ܟ̣ܰܒܪܐ ܕ«ܡܶܕܝܘܡ» ܝܰܥܢܝ ܡܷܨܥܳܝܐ. ܟ݂ܰܒܪܐ ܝܐ ܐܷܢܓܠܝܫܳܝܐ ܕܟܳܬ݂ܶܗ ܒܘ ܫܷܪܫܐ ܡܶܐ ܟ݂ܰܒܪܐ ܠܰܛܝܢܳܝܐ. ܐܰܕܝܰܘܡܰܐ ܕܪܝ̣ܫܐ ܝܐ ܒܠܶܫܳܢܶܐ ܓ݂ܰܠܰܒܶܐ ܕܝ ܒܪܝܬ݂ܐ ܕܟܷܬܢܶܐ ܬܰܚܬܝ ܡܰܥܷܒܕ݂ܳܢܘܬܐ ܕܐܘ ܠܶܫܳܢܐ ܐܷܢܓܠܝܫܳܝܐ. ܐܘ ܣܘܟܳܠܰܝܕܶܗ ܗܰܢܐ ܝܐ، ܟܘܠܠܶܗ ܐܰܡ ܡܶܕܳܢܶܐ ܕܟܳܘܶܝܢ ܡܷܨܥܳܝܶܐ ܠܰܐ ܐܶܣܳܪܶܐ ܕܒܰܝܢ ܐܰܢ ܢܳܫܶܐ، ܗܰܢܝ ܟܝܒܷܢ ܕܗܳܘܷܢ ܐܘ ܬܰܠܰܘܷܙܝܘܢ، ܐܘ ܪܰܕܝܐ، ܐܰܣ ܣܦܰܪܝܰܘܡܶܐ ܘܐܘ ܢܰܘܠܐ ܘܐܰܡ ܡܶܕܳܢܶܐ ܕܟ݂ܰܢܝ̣. ܐܘ ܢܝ̣ܫܐ ܩܰܡܳܝܐ ܕܝ ܡܶܕܝܰܐ ܢܳܪܡܰܠ ܓܠܳܙܷܡ ܗܳܘܶܐ ܡܰܘܕ݂ܥܳܢܘܬ݂ܐ، ܡܫܰܒܠܳܢܘܬ݂ܐ، ܡܰܠܦܳܢܘܬ݂ܐ، ܡܰܩܷܪܚܳܢܘܬ݂ܐ ܠܘ ܥܰܡܐ. ܐܘ ܣܝܳܡܐ ܕܰܐ ܐܶܣܳܪܶܐ ܥܰܡ ܐܘ ܟ݂ܢܘܫܝܐ ܘܐܘ ܕܡܰܚܷܘܝܐ ܐܰܪ ܪܶܓ݂ܫܶܐ ܕܰܢ ܢܳܫܶܐ ܠܷܚܕ݂ܳܕ݂ܶܐ ܘܕܡܰܦܷܨܚܷܠܠܶܗ ܥܰܡ ܚܕ݂ܳܕ݂ܶܐ. ܐܶܠܳܐ ܥܰܡ ܟܘܠ ܚܒܳܠ ܐܰܕܝܰܘܡܰܐ ܐܝ ܡܶܕܝܰܐ ܐܰܓ݂ܠܰܒ ܟܳܡܝܬܷܣܬܰܥܷܡܠܐ ܟ݂ܘܕ ܐܰܠܶܐ ܠܝ ܦ݁ܳܘܠܝܛܝܩܰܐ. ܓܠܳܙܷܡܘܰܐ ܢܳܪܡܰܠ ܐܘ ܫܘܓ݂ܠܰܝܕ݂ܰܐ ܕܗܳܘܶܐ ܣܝܳܡܐ ܕܰܐܢ ܐܶܣܳܪܶܐ ܬܪܝܨܶܐ ܒܰܝܢ ܐܘ ܥܰܡܐ ܘܠܝ ܫܘܠܛܳܢܘܬ݂ܐ، ܐܰܘܟܝܬ ܕܡܰܚܷܘܝܐ ܐܘ ܫܪܳܪܳܐ ܕܘ ܡܶܕܶܐ ܕܟܳܘܶܐ ܠܘ ܥܰܡܐ، ܕܡܷܕ݂ܥܳܐ ܐܰܛ ܛܶܒܶܐ ܟ݂ܘܕ ܟܷܬܢܶܐ ܠܘ ܥܰܡܐ. ܐܶܠܐ ܐܰܫ ܫܘܠܛܳܢܘܳܬ݂ܐ ܟܷܡܔܰܪܒܝ ܕܡܷܣܬܰܥܷܡܠܝ ܐܝ ܡܶܕܝܰܐ ܠܘ ܝܘܬ݂ܪܳܢܐ ܕܪܘܚܰܝܝܶܗ ܘܟܳܡܰܚܘܷܢ ܒܰܣ ܐܰܛ ܛܶܒܶܐ ܕܟܳܡܰܢܦܥܝ ܠܢ ܢܝܫܰܬܬܶܗ ܐܰܦ݁ ܦ݁ܳܘܠܝܛܝܩܳܝܶܐ. ܘܗܰܬ݂ܶܐ ܠܰܬܝܳܐ، ܠܐ ܠܘ ܝܘܬ݂ܪܳܢܐ ܕܘ ܐܰܬ݂ܪܐ ܘܠܐ ܕܘ ܥܰܡܐ. ܥܰܠ ܕܝ ܡܶܕܝܰܐ ܐܝܢܰܩܰܐ ܕܠܷܘܝܐ ܚܝܪܬܐ، ܠܐ ܩܘܕܪܐ ܡܥܰܘܢܐ ܟ݂ܘܕܷܓܠܳܙܷܡ. ܐܝ ܡܶܕܝܰܐ ܚܝܪܬܐ ܕܦܷܪܣܐ ܐܘ ܫܪܳܪܐ، ܟܷܘܝܐ ܒܰܗܪܐ ܠܘ ܥܰܡܐ. ܘܗܝܝܶܐ ܣܬܶܐ ܓܩܳܕܷܪ ܕܷܡܥܰܘܷܢ ܠܰܪ ܪܝܫܳܢܶܐ ܕܝ ܫܘܠܛܳܢܘܬ݂ܐ ܕܷܡܗܰܠܟܝ ܒܘ ܕܰܪܒܐ ܕܷܓܠܳܙܷܡ ܡܗܰܠܟ݂ܝ ܘܕܷܡܢܰܩܷܢ ܐܘ ܕܰܪܒܐ ܬܪܝܨܐ ܕܟܷܡܥܰܘܷܢ ܠܘ ܥܰܡܐ. ܟ݂ܘܕ ܡܷܪܠܝ ܟܳܢܳܦܷܠ ܛܰܥܢܐ ܪܰܒܐ ܥܰܠ ܐܝ ܡܶܕܝܰܐ. ܐܝܢܰܩܰܐ ܕܰܟ ܟܰܬ݂ܳܘܶܐ ܟܘܬܘܝ ܦܬܝܚܐ ܥܠ ܐܰܢܝ ܕܟܷܒܥܝ ܗܳܘܷܢ ܪܝܫܳܢܶܐ، ܘܡܰܚܘܷܢ ܐܰܦ ܦܰܘܕܶܐ ܘܐܘ ܡܶܕܶܐ ܬܪܝܨܐ ܕܟܳܣܰܝܡܝ ܠܘ ܥܰܡܐ، ܐܘ ܥܰܡܐ ܣܬܶܐ ܓܬܳܘܶܠܶܗ ܪܷܶܥܝܳܢܳܐ ܐܰܥܠܰܝܝܶܗ. ܘܗܰܘܟ݂ܰܐ ܓܷܡܢܰܩܶܐ ܟ݂ܘܕ ܪܝܫܐ ܕܘ ܐܰܬܪܰܝܕ݂ܶܗ ܠܘ ܚܰܐ ܕܚܳܙܶܐ ܕܟܳܫܳܘܶܐ ܘܐܘ ܕܷܓܬܳܘܶܐ ܛܳܘܐ ܠܘ ܐܰܬ݂ܪܐ ܘܠܘ ܥܰܡܰܝܕܶܗ ܒܝܕ݂ܰܥܬܐ ܘܒܓܘܒܳܝܐ ܫܰܪܝܪܐ ܘܬܪܝܨܐ. ܐܶܠܐ ܥܰܡ ܟܘܠ ܚܒܳܠ ܐܰܓ݂ܠܰܒ ܠܳܐ ܗܰܘܟ݂ܰܐ ܟܳܘܶܐ. ܗܰܢܝ ܕܟܷܒܥܝ ܐܳܬ݂ܷܢ ܠܘ ܪܝܫܐ ܟܳܡܷܣܬܰܥܷܡܠܝ ܐܝ ܡܷܕܝܰܐ ܠܘ ܢܝܫܰܬ݂ܬ݂ܶܗ. ܗܰܟܰܐ ܒܘ ܚܰܝܠܳܐ ܕܟܷܬܬܶܐ ܘܗܰܟܰܐ ܣܬܶܐ ܒܘ ܓܰܚܟܳܐ ܕܥܰܠ ܐܘ ܥܰܡܳܐ، ܐܰܘܟܝܬ݂ ܒܕܰܪܒܐ ܠܳܐ ܡܣܰܘܝܳܐ ܘܠܳܐ ܟܝܢܳܐ ܟܳܡܷܣܬܰܥܷܡܠܝ ܐܝ ܡܶܕܝܰܐ ܟ݂ܘܕ ܐܰܠܶܐ ܠܘ ܢܝܫܰܬ݂ܬ݂ܶܗ ܕܰܐܩܰܢܰܐ ܐܘ ܥܰܡܐ ܡܢܰܩܰܠܠܶܗ ܪܝܫܳܢܶܐ. ܐܝܢܰܩܰܐ ܕܚܰܐ ܟܳܡܷܪ ܡܶܕܝܰܐ؛ ܒܝ ܩܰܡܰܝܬܐ ܟܳܬ݂ܶܐ ܠܒܳܠܶܗ ܕܚܰܐ ܐܘ ܦܳܪܶܣܚܶܙܘܳܐ ܘܰܐܣ ܣܦܰܪܝܰܘܡܶܐ. ܐܶܠܳܐ ܐܝ ܡܶܕܝܰܐ ܠܳܐ ܒܰܣ ܡܰܢܝ ܟܷܘܝܐ، ܐܶܠܐ ܡܶܐ ܓ݂ܰܠܱܒܶܐ ܡܷܨܥܳܝܶܐ ܚܪܶܢܶܐ ܕܐܰܢ ܐܶܣܳܪܶܐ ܢܳܫܳܝܶܐ، ܐܝܕ݂ܰܐ ܕܒܝ ܟܬ݂ܰܘܬܐ ܘܐܝܕܰܐ ܣܬܶܐ ܕܝ ܚܙܰܝܬܐ. ܐܰܕܝܰܘܡܰܐ ܐܰܓ݂ܠܰܒ ܡܰܢ ܢܳܫܶܐ ܟܳܣܰܝܡܝ ܐܶܣܳܪܶܐ ܥܰܡ ܚܕ݂ܳܕ݂ܶܐ ܒܘ ܕܰܪܒܳܐ ܕܘ ܢܰܘܠܐ. ܡܰܘܟ݂ܰܐ ܐܘ ܢܰܘܠܐ ܟܳܡܷܫܬܰܥܶܐ ܕܰܘܪܐ ܪܰܒܐ ܒܰܚ ܚܰܝܶܐ ܕܘ ܒܰܪܢܳܫܐ. ܐܘ ܢܰܘܠܐ ܟܳܒܶܐ ܦܷܪܣܰܐ ܠܰܐܢ ܢܳܫܶܐ ܕܳܐܒܝ ܘܫܘܩܠܝ ܥܰܡ ܚܕ݂ܳܕ݂ܶܐ ܒܙܰܒܢܐ ܟܰܪܝܐ ܐܘ ܟ݂ܰܝـܝܦܐ ܐܝܢܰܩܰܐ ܕܟܷܒܥܝ. ܥܰܠ ܕܰܐܢ ܢܳܫܶܐ ܕܰܐܝـܝܡܰܐ ܟܷܒܥܝ ܕܣܰܝܡܝ ܐܶܣܳܪܶܐ ܥܰܡ ܚܕ݂ܳܕ݂ܶܐ ܒܰܚ ܚܰܝܰܬ݂ܬ݂ܶܗ ܐܰܝ ܝܰܘܡܳܝܶܐ. ܘܟܘܬ݂ܘܝ ܐܘ ܡܶܕܶܐ ܕܟܷܒܥܝ ܒܥܰܝܢܝ ܙܰܒܢܐ ܠܷܚܕ݂ܳܕ݂ܶܐ ܐܘ ܡܷܔܓ݂ܳܠܝ ܥܰܡ ܚܕ݂ܳܕ݂ܶܐ ܒܥܰܝܢܝ ܙܰܒܢܐ ܘܡܰܫܷܡܥܝ ܐܰܛ ܛܶܒܰܬ݂ܬ݂ܶܗ ܠܷܚܕ݂ܳܕ݂ܶܐ. ܐܘ ܕܳܐܒܷܢ ܪܷܥܝܳܢܐ ܦܬܰܟܰܪ ܠܷܚܕ݂ܳܕ݂ܶܐ ܘܡܰܫܷܡܥܝ ܐܰܪ ܪܷܓ݂ܫܰܬ݂ܬ݂ܶܗ ܠܷܚܕ݂ܳܕ݂ܶܐ، ܐܘ ܒܰܣ ܕܣܰܝܡܝ ܥܷܢܝܳܢܐ (ܔܷܒ݁ܰܬܶܐ) ܥܰܡ ܚܕ݂ܳܕ݂ܶܐ. ܐܘ ܟܝܒܰܐ ܕܗܷܘܝܐ ܠܘ ܫܘܓ݂ܠܐ ܕܝ ܬܰܓܳܪܘܬܐ ܐܰܘ ܕܡܶܕܶܐ ܚܪܶܢܐ ܣܬܶܐ. ܡܶܕܝܰܐ ܒܷܬ݂ܷܪ ܡܷܕ ܢܰܦܝܩܝ ܐܰܬ ܬܰܠܝܦܳܢܶܐ ܡܗܰܘܢܶܐ، ܐܘ ܢܰܘܠܐ ܗܰܘܝܠܗ ܝܘܩܪܐ ܪܰܒܐ ܒܰܚ ܚܰܝܶܐ ܝܰܘܡܰܝܶܐ ܕܰܐܢ ܢܳܫܶܐ، ܘܛܪܶܠܶܗ ܕܝܠܳܢܳܐܝܬ݂ ܐܰܥ ܥܠܰܝܡܶܐ ܕܗܳܘܷܢ ܐܰܣܝܪܶܐ ܕܝܕ݂ܶܗ. ܥܰܠ ܕܟܳܒܶܐ ܦܷܪܣܰܐ ܠܰܥܠܰܝܡܶܐ ܕܟܘܬ݂ܘܝ ܒܘ ܬܶܠܝܦܳܘܢ ܘܚܳܙܷܢ ܚܕ݂ܳܕ݂ܶܐ ܒܝ ܨܷܪܛܐ. ܐܘ ܢܰܦܝܩܝ ܬܰܚܷܪܙܳܬ݂ܐ ܟ݂ܘܕ ܕܘ ܦܰܝܣܒܘܟ ܐܘ ܘܰܛܣܐܰܦ̇ ܐܘ ܐܝܢܣܬܰܓܪܰܡ ܘܐܘ ܬܘܝܬܬܷܪ ܕܟܳܩܘܕܪܝ ܐܰܢ ܢܳܫܶܐ ܟܘܬ݂ܘܝ ܠܷܚܕ݂ܳܕ݂ܶܐ ܘܚܳܙܷܢ ܚܕ݂ܳܕ݂ܶܐ ܒܥܰܝܢܝ ܙܰܒܢܐ. ܐܰܥ ܥܠܰܝܡܶܐ ܒܘ ܙܰܒܢܰܬ݂ܬ݂ܶܗ ܐܘ ܟ݂ܰܠܝܳܐ ܟܷܡܔܰܪܒܝ ܟܘܬ݂ܘܝ ܐܘ ܡܷܔܓ݂ܳܠܝ ܥܰܡ ܚܕ݂ܳܕ݂ܶܐ ܟ݂ܘܕ ܕܟܷܬܢܶܐ ܓܰܒ ܚܕ݂ܳܕ݂ܶܐ ܐܘ ܣܰܝܡܝ ܥܷܢܝܳܢܐ (ܔܒ݁ܰܬܶܐ) ܥܰܡ ܚܰܐ ܐܘ ܙܷܕ ܡܶܐ ܚܰܐ ܡܰܐ ܚܰܘܪܳܢܰܬ݂ܬ݂ܶܗ ܕܟܷܬܢܶܐ ܒܕܷܟܟܳܬ݂ܶܐ ܡܚܰܠܦܶܐ ܒܥܰܝܢܝ ܙܰܒܢܐ. ܘܗܰܢܝ ܣܬܶܐ ܐܰܓ݂ܠܰܒ ܓܣܰܝܡܷܢܢܶܗ ܒܘ ܕܰܪܒܐ ܕܘ ܦܰܝܣܒܘܟ ܘܕܘ ܘܰܛܣܐܰܦ̇ ܘܕܘ ܐܝܢܣܬܰܓܪܰܡ ܘܐܘ ܕܘ ܬܘܝܬܬܷܪ. ܐܘܥܕܐ ܟܳܒܰܥܢܐ ܕܝܠܳܢܳܐܝܬ݂ ܟܳܬ݂ܰܘܢܐ ܥܰܠܠܰܢܝ. ܥܰܠ ܕܗܰܘܷܢ ܡܢܳܬ݂ܐ ܡܰܐ ܚܰܝܶܐ ܕܘ ܒܰܪܢܳܫܐ ܐܘ ܫܷܟܷܠ ܕܰܚ ܚܰܝܶܐ ܕܰܢ ܢܳܫܶܐ ܕܟܳܥܰܝܫܝ ܐܰܕܝܰܘܡܰܐ، ܒܘ ܙܳܝܘܕܐ ܒܰܝܢ ܐܰܥ ܥܠܰܝܡܶܐ. ܦܰܝܣܒܘܟ ܐܘ ܦܰܝܣܒܘܟ؛ ܦܰܬ݂ܐ ܝܐ ܕܘ ܢܰܘܠܐ ܐܰܝܟܐ ܕܚܰܐ ܟܝܒܶܐ ܣܳܝܷܡ ܐܶܣܳܪܶܐ ܥܰܡ ܐܰܢ ܢܳܫܶܐ ܕܟܳܒܷܥ ܒܘ ܫܶܕܳܪܐ ܕܰܨ ܨܷܪܬܳܬ݂ܶܐ، ܕܰܟ ܟܬ݂ܰܘܝܳܬ݂ܶܐ، ܕܰܡ ܡܰܡܠܶܐ ܚܰܝܶܐ ܐܰܘ ܛܶܒܶܐ ܐܰܘ ܩܶܝܳܕܐ ܐܰܘ ܣܬܶܐ ܘܝܕܝܳܘܰܬ ܟܰܪܝܶܐ. ܘܟܝܒܶܐ ܚܰܐ ܛܳܠܷܒ ܗܘܠ ܠܘ ܡܘܟܠܐ ܒܘ ܦܰܝܣܒܘܟ. ܗܰܢܐ ܕܟܷܬܠܶܗ ܚܫܳܘܐ ܒܘ ܦܰܝܣܒܘܟ ܟܝܒܶܐ ܛܳܪܶܐ ܐܰܟ ܟܬ݂ܰܘܝܳܬ݂ܶܐ ܐܰܘ ܐܰܨ ܨܷܪܬܳܬ݂ܶܐ ܕܟܳܡܰܚܷܬ ܘܕܟܳܡܝܫܰܕܪܝ ܒܘ ܦܰܝܣܒܘܟ ܦܬܝܚܶܐ ܠܟܘܠ ܚܰܐ ܕܗܝܝܶܐ ܟܳܒܷܥ، ܘܟܝܒܶܐ ܣܬܶܐ ܣܳܟ݂ܰܪܪܶܐ ܩܘܡ ܚܰܐ ܕܠܳܒܷܥ ܚܳܙܰܠܠܶܗ. ܘܟܝܒܶܐ ܣܬܶܐ ܡܢܰܩܶܐ ܐܰܢ ܢܳܫܶܐ ܐܰܘ ܐܝ ܓܘܕܐ ܕܰܐܢ ܢܳܫܶܐ ܐܰܘ ܣܬܶܐ ܐܝ ܐܝܩܰܪܬ݂ܐ ܕܟܳܒܷܥ ܕܚܳܙܷܢ ܐܰܟ ܟܬ݂ܰܘܝܳܬ݂ܶܐ ܐܰܘ ܐܰܨ ܨܷܪܬܳܬ݂ܰܢܝ. ܟܰܪܝܳܐ ܚܰܐ ܕܳܐܡܷܪ؛ ܐܘ ܦܰܝܣܒܘܟ ܕܘܟܬ݂ܐ ܝܐ ܕܚܰܐ ܩܳܕܷܰܪ ܣܳܝܷܡ ܐܶܣܳܪܶܐ ܥܰܡ ܐܰܚ ܚܪܶܢܶܐ ܐܰܘ ܕܳܒܶܐ ܘܫܳܩܷܠ ܝܕ݂ܰܥܬܐ ܒܘ ܕܰܪܒܐ ܕܘ ܢܰܘܠܐ. ܐܘ ܦܰܝܣܒܘܟ ܡܫܰܬܷܣ ܡܶܐ ܬܪܶܐ ܕܟܷܬܝܐ ܐܷܫܡܰܝܝܶܗ ܡܰܪܟ ܙܘܟܰܪܒܶܪܓ ܘܰܐܕܘܰܪܕ ܣܰܒܶܪܝܢ ܐܝܢܰܩܰܐ ܕܟܷܬܘܰܝܢܶܐ ܝܳܠܘܦܶܐ ܒܘ ܒܶܝܬ݂ ܨܰܘܒܐ ܕܗܰܪܘܰܪܕ، ܐܰܪܒܥܐ ܒܘ ܝܰܪܚܐ ܕܷܫܘܷܛ ܕܝ ܫܰܬܐ ܕܰܬܪܰܠܦܐ ܘܰܐܪܒܰܥ. ܒܘ ܫܘܪܳܝܐ ܐܘ ܦܰܝܣܒܘܟ ܣܷܡܘܰܠܠܶܗ ܠܰܐ ܝܳܠܘܦܶܐ ܕܘ ܒܶܝܬ݂ܨܰܘܒܐ ܕܗܰܪܘܰܪܕ ܘܒܷܬ݂ܷܪ ܒܝ ܫܰܬܐ ܕܰܬܪܰܠܦܐ ܘܫܶܬ݂ ܦܬܷܚܚܶܐ ܠܟܘܠ ܢܳܫܶܐ. ܘܒܙܰܒܢܐ ܟܰܪܝܐ ܦܪܝܣ ܒܷܒܪܝܬ݂ܐ ܟܘܠܰܗ. ܐܘ ܣܬܷܥܡܰܠ ܕܝܕ݂ܶܗ ܓ݂ܰܠܱܒܶܐ ܦܫܝܩܳܝܐ، ܘܡܰܘܟ݂ܰܐ ܟܘܠ ܢܳܫܐ ܟܝܒܶܐ ܡܷܣܬܰܥܡܶܠܶܗ ܕܠܐ ܥܰܣܩܘܬ݂ܐ. ܗܝܝܶܐ ܒܝ ܩܰܡܰܝܬܐ ܒܕܶܠܶܗ ܟ݂ܘܕ ܐܶܣܳܪܶܐ ܒܰܝܢ ܐܰܚ ܚܰܘܪܳܢܶܐ، ܐܶܠܐ ܒܷܬ݂ܷܪ ܒܙܰܒܢܐ ܟܰܪܝܐ ܗܰܘܝ ܕܰܪܒܐ ܦܫܝܩܐ ܐܘ ܟܰܪܝܐ ܠܘ ܚܰܐ ܕܰܐܒܷܥ ܡܳܛܶܐ ܠܰܢ ܢܳܫܶܐ ܒܰܢ ܐܶܣܳܪܶܐ ܕܘ ܢܰܘܠܐ ܘܕܣܳܝܷܡ ܐܘ ܪܶܟܠܰܡܰܝܕ݂ܶܗ ܘܕܷܡܙܰܒܷܢ ܐܘ ܡܰܠܝܕܶܗ ܒܘ ܫܷܟܷܠܰܢܐ. ܟܝܒܶܐ ܚܰܐ ܡܫܰܕܷܪ ܨܷܪܬܳܬ݂ܶܐ، ܟܬ݂ܰܘܝܳܬ݂ܶܐ، ܘܝܕܝܳܘܰܬ ܘܟܳܬ݂ܰܘ ܐܰܪ ܪܷܓ݂ܫܰܝܕܶܗ ܘܡܫܰܕܰܪܪܶܗ ܠܰܚ ܚܰܘܪܳܢܶܐ ܒܕܰܪܒܐ ܓ݂ܰܠܱܒܶܐ ܦܫܝܩܐ. ܐܰܕܝܰܘܡܰܐ ܟܝܬܐ ܚܶܕ݂ܷܪ ܬܪܶܐ ܡܷܠܝܰܪܶܐ ܕܢܳܫܶܐ ܕܟܳܡܷܣܬܰܥܷܡܠܝ ܐܘ ܦܰܝܣܒܘܟ. ܐܘ ܦܰܝܣܒܘܟ ܟܳܡܷܪܚܷܡ ܘܦܪܝܣܳܝܐ ܓ݂ܰܠܱܒܶܐ، ܥܰܠ ܕܟܝܒܶܐ ܚܰܐ ܣܳܝܷܡ ܠܝܣܬܰܐ ܕܰܢ ܢܳܫܶܐ ܕܟܳܒܷܥ ܘܛܳܪܶܐ ܚܳܙܷܢ ܐܘ ܡܶܕܶܐ ܕܟܳܡܰܚܷܬ ܒܘ ܚܘܫܒܳܢܰܝܕ݂ܶܗ ܕܘ ܦܰܝܣܒܘܟ. ܟܝܒܶܐ ܡܰܚܷܬ ܨܷܪܬܳܬ݂ܶܐ ܘܢܳܛܷܰܪܪܶܗ ܬܰܡܐ ܕܡܰܚܘܰܠܠܶܗ ܠܰܚ ܚܰܘܪܳܢܶܐ ܘܠܘ ܚܰܐ ܕܟܳܒܷܥ. ܟܝܒܶܐ ܡܷܔܓ݂ܷܠ ܒܘ ܕܰܪܒܐ ܕܘ ܦܰܝܣܒܘܟ ܥܰܡ ܐܰܚ ܚܰܘܪܳܢܶܐ ܘܟܳܬ݂ܰܘܘܶܗ ܐܘ ܡܶܕܶܐ ܕܪܳܚܷܡ. ܘܟܝܒܶܐ ܕܳܪܶܐ ܫܠܳܡܐ ܥܰܠ ܐܘ ܚܰܐ ܕܳܐܒܷܥ ܘܕܟܳܬ݂ܰܘ ܐܘ ܪܷܥܝܳܢܰܝܕ݂ܶܗ ܐܰܥܠܰܝܝܶܗ. ܐܘ ܦܰܝܣܒܘܟ ܟܳܒܶܐ ܦܷܪܣܰܐ ܠܰܢ ܢܳܫܶܐ ܕܣܰܝܡܝ ܦܳܬ݂ܳܬ݂ܶܐ ܕܘ ܢܰܘܠܐ ܠܪܘܚܰܝܝܶܗ ܐܰܘ ܠܰܚ ܚܰܘܪܳܢܰܬ݂̇ܬ݂̇ܶܗ ܐܰܘ ܣܬܶܐ ܠܘ ܫܘܓ݂ܠܰܬ݂̇ܬ݂̇ܶܗ. ܐܘ ܦܰܝܣܒܘܟ ܟܝܒܶܐ ܕܗܳܘܶܐ ܡܷܨܥܳܝܳܐ ܠܝ ܬܰܓܳܪܘܬ݂ܐ ܕܒܘ ܢܰܘܠܐ. ܘܟܝܒܶܐ ܚܰܐ ܓܳܪܷܫ ܘܡܫܰܕܷܰܪ ܘܝܕܝܳܘܰܬ ܚܰܝܶܐ ܒܘ ܦܰܝܣܒܘܟ. ܐܘ ܦܰܝܣܒܘܟ ܠܷܓܡܰܩܒܷܠ ܚܰܐ ܕܡܰܚܷܬ ܨܷܪܬܳܬ݂ܶܐ ܒܝܫܶܐ ܟ݂ܘܕ ܐܰܦ ܦܰܬܶܐ ܢܰܘܠܳܝܶܐ ܚܪܶܢܶܐ. ܐܘ ܟܳܡܰܟܠܶܐ ܗܰܢܝ ܕܟܳܡܰܚܬܝ ܨܷܪܬܳܬ݂ܶܐ ܐܘ ܡܶܕܳܢܶܐ ܚܪܶܢܶܐ ܕܠܰܬܢܶܐ ܠܘ ܕܰܪܒܐ. ܘܰܛܣܰܐܦ̇ ܐܘ ܘܰܛܣܰܐܦ̇؛ ܐܰܦ̇ ܝܐ ܕܘ ܬܶܠܝܦܳܘܢ ܡܗܰܘܢܐ ܕܟܝܒܶܐ ܚܰܐ ܟܳܬ݂ܰܘ ܐܶܒܶܗ ܠܰܚ ܚܰܘܪܳܢܶܐ ܘܠܘ ܚܰܐ ܕܟܳܒܷܥ ܐܰܘ ܕܡܷܔܓ݂ܷܠ ܐܰܥܡܰܝܝܶܗ ܒܘ ܕܰܪܒܐ ܕܘ ܢܰܘܠܐ ܐܘ ܕܷܡܫܰܕܷܰܪ ܘܝܕܝܳܘܰܬ، ܨܷܪܬܳܬ݂ܶܐ ܘܩܳܠܐ ܡܩܰܝܕܐ ܐܰܘ ܚܰܝܐ. ܐܰܨ ܨܷܪܬܳܬ݂ܶܐ ܐܰܘ ܐܰܡ ܡܶܕܳܢܶܐ ܚܪܶܢܶܐ ܥܰܠ ܕܟܳܡܝܫܰܕܪܝ ܒܘ ܕܰܪܒܐ ܕܘ ܢܰܘܠܐ ܠܐ ܟܳܬ݂ܷܢ ܒܛܝܡܐ ܥܰܠ ܗܰܘ ܕܟܳܡܷܣܬܰܥܡܷܠ ܐܘ ܘܰܛܣܰܐܦ̇. ܟܝܒܶܐ ܚܰܐ ܡܰܢܚܷܬ ܐܘ ܘܰܛܣܰܐܦ̇ ܠܝ ܚܳܫܘܒܬܐ ܣܬܶܐ ܐܶܠܐ ܐܰܥ ܥܠܰܝܡܶܐ ܐܰܓ݂ܠܰܒ ܟܳܪܘܚܡܝ ܕܡܷܣܬܰܥܷܡܠܝ ܐܘ ܬܶܠܝܦܳܘܢ ܡܗܰܘܢܐ ܒܘ ܘܰܛܣܰܐܦ̇. ܐܘ ܟܷܦ݁ܦ݁ܶܗ ܕܣܰܝܡܝ ܓܘܕܐ ܕܰܚ ܚܰܘܪܳܢܶܐ ܐܘ ܡܷܔܓ̣ܳܠܝ ܥܰܡ ܚܕ݂ܳܕ݂ܶܐ. ܐܘ ܘܰܛܣܰܐܦ̇ ܩܰܡܰܝܬܐ ܢܰܦܷܩ ܒܰܝܢ ܐܰܫ ܫܰܓ݂ܳܠܶܐ ܕܝܰܗܘ ܒܝ ܫܰܬܐ ܕܰܬܪܰܠܦܐ ܘܫ̰ܰܥ. ܡܶܐ ܓܘܕܐ ܢܰܥܷܡܬܐ ܕܢܳܫܶܐ ܡܰܛܝ ܐܘ ܡܷܢܝܳܢܐ ܕܬܰܢܝ ܕܟܳܡܷܣܬܰܥܷܡܠܝܠܗ ܠܡܰܬܶܐ ܘܚܰܡܫܝ ܐܰܠܦܐ ܒܓܰܘܶܐ ܕܷܟܡܐ ܝܰܪܚܶܐ. ܒܝ ܫܰܬܐ ܕܰܬܪܰܠܦܐ ܘܰܐܪܒܰܥܣܰܪ ܠܘ ܦܰܝܣܒܘܟ ܫܩܝܠܶܗ ܘܒܝ ܫܰܬܐ ܕܰܬܪܰܠܦܐ ܘܫܘܰܥܣܰܪ ܡܰܛܝ ܐܘ ܡܷܢܝܳܢܐ ܕܬܰܢܝ ܕܟܳܡܷܣܬܰܥܷܡܠܝܠܶܗ ܠܡܷܠܝܰܪ ܕܢܳܫܶܐ. ܐܘ ܘܰܛܣܰܐܦ̇ ܣܬܶܐ ܟ݂ܕܘ ܦܰܝܣܒܘܟ ܟܳܡܷܪܚܷܡ ܓ݂ܰܠܱܒܶܐ ܘܦܪܝܣܳܝܐ ܒܰܝܢ ܐܰܢ ܢܳܫܶܐ ܘܒܘ ܙܳܝܘܕܐ ܒܰܝܢ ܐܰܥ ܥܠܰܝܡܶܐ. ܥܰܠ ܕܟܷܦ݁ܦ݁ܶܗ ܣܰܝܡܝ ܠܝܣܬܰܐ ܕܰܢ ܢܳܫܶܐ ܕܟܷܒܥܝ ܘܦܷܪܫܝ ܐܘ ܚܰܐ ܕܐܷܒܥܝ ܡܷܔܓ݂ܳܠܝ ܐܰܥܡܶܗ ܘܟܘܬ݂ܘܝܠܶܗ ܘܡܫܰܕܪܝܠܶܗ ܨܷܪܬܳܬ݂ܶܐ ܐܰܘ ܩܳܠܳܐ ܕܐܷܒܥܝ. ܘܕܷܐܒܥܝ ܣܬܶܐ ܟܷܦ݁ܦ݁ܶܗ ܣܰܝܡܝ ܓܘܕܐ ܡܘ ܚܰܐ ܕܟܷܒܥܝ ܘܟܘܬ݂ܘܝ ܘܡܫܰܕܪܷܢܢܶܗ ܐܰܨ ܨܷܪܬܳܬ݂ܶܐ ܘܐܘ ܩܳܠܐ ܠܟܘܠܠܶܗ ܥܰܡ ܚܕ݂ܳܕ݂ܶܐ. ܐܘ ܡܷܔܓ݂ܳܠܝ ܥܰܡ ܐܰܚ ܚܰܘܪܳܢܶܐ ܘܟܘܬ݂ܘܷܢܢܶܐ ܐܘ ܡܶܕܶܐ ܕܪܘܚܡܝ. ܐܝܡܟܰܢ ܓ݂ܰܠܱܒܶܐ ܛܳܘܐ ܝܐ ܠܰܢܝ ܕܟܷܬܢܶܐ ܪܰܚܘܩܶܐ ܒܰܐܬ݂ܪܐ ܚܪܶܢܐ ܕܚܰܐ ܡܷܔܓ݂ܷܠ ܘܟܳܬ݂ܰܘܘܶܗ ܕܠܳܐ ܙܘܙܶܐ ܐܰܘ ܒܛܝܡܶܐ ܓ݂ܰܠܱܒܶܐ ܐܷܫܡܐ. ܐܘ ܘܰܛܣܰܐܦ̇ ܟܳܒܶܐ ܐܝܡܟܰܢ ܠܰܢܝ ܕܟܳܡܰܚܬܝ ܘܡܫܰܕܪܝ ܐܰܨ ܨܷܪܬܳܬ݂ܶܐ ܘܰܐܒ̣ ܘܝܕܝܳܘܰܬ ܕܢܷܛܪܷܢܢܶܗ، ܘܐܝܕ݂ܰܐ ܕܪܘܚܡܝ ܣܬܶܐ ܟܷܦ݁ܦ݁ܶܗ ܠܳܚܷܢܢܶܗ. ܐܝܢܣܬܰܓܪܰܡ ܐܘ ܐܝܢܣܬܰܓܪܰܡ ܐܰܦ݁ ܝܐ ܕܘ ܬܶܠܝܦܳܘܢ ܡܗܰܘܢܐ ܕܶܐܒܶܗ ܟܝܒܶܐ ܚܰܐ ܡܫܰܕܷܰܪ ܨܷܪܬܳܬ݂ܶܐ ܘܘܝܕܝܳܘܰܬ ܠܰܚ ܚܰܘܪܳܢܶܐ ܘܠܘ ܚܰܐ ܕܟܳܪܳܚܷܡ. ܗܰܘܝ ܠܶܗ ܟܡܐ ܐܷܫܢܶܐ ܕܢܰܦܷܩ، ܘܟ݂ܰܝܝܦܐ ܙܒܝܛ ܘܡܒܰܪܒܷܙ. ܗܝܝܶܐ ܣܬܶܐ ܟ݂ܕܘ ܦܰܝܣܒܘܟ ܟܳܠܳܙܷܡ ܚܰܐ ܡܩܰܝܷܕ ܪܘܚܶܗ ܒܝ ܩܰܡܰܝܬܐ ܘܦܳܬܰܚܠܶܗ ܚܫܳܘܐ. ܘܰܐܨ ܨܷܪܬܳܬ݂ܶܐ ܘܰܐ ܘܝܕܝܳܘܰܬ ܕܟܳܡܝܫܰܕܪܝ ܠܘ ܐܝܢܣܬܰܓܪܰܡ، ܓܡܰܚܘܷܢ ܥܰܠ ܐܘ ܚܘܫܒܳܢܐ ܕܘ ܦܰܬܳܚܐ ܘܡܶܐ ܬܰܡܐ ܐܰܚ ܚܪܶܢܶܐ ܗܰܢܝ ܕܟܳܡܥܰܩܒܝܠܶܗ ܓܚܳܙܷܢܢܶܗ ܒܘ ܚܫܰܘܰܬ݂ܬ̣ܶܗ. ܘܦܰܬܳܚܐ ܕܘ ܚܫܳܘܐ ܣܬܶܐ ܟܝܒܶܐ ܚܳܙܶܐ ܐܘ ܡܶܕܶܐ ܕܰܐ ܚܪܶܢܶܐ ܟܷܡܫܰܕܪܝ. ܦܬܷܚܘܰܐ ܒܝ ܩܰܡܰܝܬܐ ܒܝ ܫܰܬܐ ܕܰܬܪܰܠܦܐ ܘܥܣܰܪ. ܟܝܒܶܐ ܚܰܐ ܡܚܰܠܷܦ ܐܘ ܩܳܝܷܨ ܐܝ ܨܷܪܬܳܐ ܐܰܘ ܐܘ ܘܝܕܝܐ ܟ݂ܘܕ ܕܟܳܒܷܥ ܡܶܩܷܡ ܡܷܕ ܡܫܰܕܰܪܠܶܗ. ܘܒܷܬ݂ܷܪ ܡܷܕ ܡܫܰܕܰܪܠܶܗ، ܗܰܢܝ ܕܟܷܡܥܰܩܒܝܠܗ ܟܷܦ݁ܦ݁ܶܗ ܡܰܚܘܷܢ ܐܘ ܪܷܥܝܳܢܰܬ݂ܬ݂ܶܗ ܥܰܠ ܐܝ ܨܷܪܬܳܐ ܐܰܘ ܘܝܕܝܐ ܐܰܘ ܣܬܶܐ ܟܷܦ݁ܦ̇݁ܶܗ ܠܳܚܷܢ ܐܝ ܨܷܪܬܳܐ ܐܰܘ ܘܝܕܝܳܐ ܕܠܐ ܟܳܪܘܚܡܷܢܢܶܗ ܐܝܢܰܩܰܐ ܕܷܐܒܥܝ. ܟܷܦ݁ܦ݁ܶܗ ܡܫܰܕܪܝ ܨܷܪܬܳܬ݂ܶܐ ܘܘܝܕܝܳܘܰܬ ܠܘ ܦܰܝܣܒܘܟ ܐܰܘ ܬܘܝܬܬܷܪ ܐܰܘ ܦܠܝܟܷܪ. ܟܝܒܶܐ ܚܰܐ ܣܳܝܷܡ ܐܝ ܬܷܫܥܝܬ݂ܰܝܕ݂ܶܗ ܣܬܶܐ ܡܰܨ ܨܷܪܬܳܬ݂ܶܐ ܒܘ ܐܝܢܣܬܰܓܪܰܡ. ܬܘܝܬܬܷܪ ܦܳܬ݂ܐ ܝܐ ܩܢܘܡܳܝܬܐ ܕܘ ܢܰܘܠܐ ܕܶܐܒܰܐ ܟܳܟܘܬ݂ܘܝ ܥܰܠ ܐܘ ܡܶܕܶܐ ܕܟܷܒܥܝ ܐܝܕ݂ܰܐ ܦ݁ܳܘܠܝܛܝܩܰܐ ܐܰܘ ܥܰܠ ܐܘ ܡܘܟܠܐ ܐܰܘ ܥܰܠ ܡܷܢ ܕܶܐܒܥܝ. ܐܰܢ ܢܳܫܶܐ ܕܟܷܒܥܝ ܚܳܙܷܢܢܶܐ ܟܷܦ݁ܦ݁ܶܗ ܡܣܰܓܠܝ ܪܘܚܰܝܝܶܗ ܐܰܘܟܝܬ ܦܷܬܚܷܢܢܶܗ ܚܫܳܘܐ ܒܘ ܬܘܝܬܬܷܪ ܘܡܬܰܚܩܒܝ ܐܘ ܚܰܐ ܕܟܷܒܥܝ ܡܰܐ ܚܪܶܢܶܐ ܕܟܷܬܬܶܐ ܚܫܳܘܐ. ܐܰܟ ܟܬ݂ܰܘܝܳܬ݂ܶܐ ܕܟܳܡܝܫܰܕܪܝ ܡܰܢ ܢܳܫܶܐ ܐܰܘ ܡܶܐ ܫܘܬܳܣܐ ܓܡܰܚܘܷܢ ܥܰܠ ܐܘ ܬܘܝܬܬܷܪ ܕܬܰܢܝ ܕܟܳܡܬܰܚܩܒܷܢܢܶܗ. ܐܘ ܬܘܝܬ ܟܘܙܙܶܐ ܒܘ ܙܰܒܢܐ ܕܟܳܡܝܫܰܕܷܪ ܒܓܰܘܶܗ ܕܷܟܡܐ ܪܦܳܦܶܐ، ܘܗܰܘܟ݂ܰܐ ܟܝܒܶܐ ܚܰܐ ܚܳܙܶܐ ܡܷܢ ܟܳܘܶܐ ܒܷܒܪܝܬ݂ܐ. ܐܘ ܬܘܝܬܬܷܪ ܫܷܟܷܠ ܝܐ ܕܰܢ ܐܶܣܳܪܶܐ ܕܒܘ ܢܰܘܠܐ ܕܟܳܘܶܐ ܐܶܒܶܗ ܒܰܣ ܫܶܕܳܪܐ ܕܝ ܟܬ݂ܰܘܬܐ. ܟܝܬܐ ܐܰܕܝܰܘܡܰܐ ܒܝ ܒܪܝܬ݂ܐ ܚܶܕ݂ܷܪ ܚܰܡܷܫܡܳܐܐ ܡܷܠܝܘܢܶܐ ܕܢܳܫܶܐ ܕܟܳܡܷܣܬܰܥܷܡܠܝ ܐܘ ܬܘܝܬܬܷܪ. ܐܝܢܰܩܰܐ ܕܢܰܦܷܩ ܐܘ ܬܘܝܬܬܷܪ ܚܰܬ݂ܐ ܒܝ ܩܰܡܰܝܬܐ ܐܰܢ ܢܳܫܶܐ ܪܰܒܶܐ ܘܡܫܰܡܗܶܐ ܣܬܶܐ ܡܰܚܘܷܢܘܰܐ ܟ݂ܘܕ ܢܳܪܡܰܠ ܢܳܫܶܐ. ܐܶܠܐ ܒܷܬ݂ܷܪ ܐܷܫܡܐ ܒܷܐܫܡܐ ܗܰܢܝ ܕܟܷܬܘܰܝܢܶܗ ܡܫܰܡܗܶܐ ܡܰܚܘܰܠܠܶܗ ܥܰܠ ܐܝ ܦܳܬ݂ܐ، ܘܐܘܥܕܐ ܐܰܓ݂ܠܰܒ ܡܰܢܝ ܕܟܳܡܷܣܬܰܥܷܡܠܝ ܐܘ ܬܘܝܬܬܷܪ ܢܳܫܶܐ ܢܶܐ ܪܰܒܶܐ ܘܕܢܰܦܷܩ ܐܷܫܡܰܝܝܶܗ. ܐܘ ܬܘܝܬܬܷܪ ܟܳܒܶܐ ܦܷܪܣܰܐ ܠܰܢ ܢܳܫܶܐ ܕܡܰܚܘܷܢ ܪܘܚܰܝܝܶܗ ܘܕܷܡܡܝ ܐܘ ܡܶܕܶܐ ܕܟܷܒܥܝ ܐܘ ܡܶܕܶܐ ܕܟܳܣܰܝܡܝ. ܐܰܥ ܥܠܰܝܡܶܐ ܟܳܪܘܚܡܝ ܐܘ ܬܘܝܬܬܷܪ ܥܰܠ ܕܟܳܒܰܠܠܶܗ ܦܷܪܣܰܐ ܕܫܷܡܥܝ ܘܚܳܙܷܢ ܐܘ ܡܶܕܶܐ ܕܟܳܘܶܐ ܒܷܒܪܝܬ݂ܐ ܓ݂ܰܠܱܒܶܐ ܟ݂ܰܝܝܦܐ ܐܰܝܟܐ ܕܟܷܬܢܶܐ. ܐܘ ܟܳܡܷܪܚܷܡ ܣܬܶܐ ܐܘ ܬܘܝܬܬܷܪ ܥܰܠ ܕܟܷܬܝܐ ܐܘ ܣܬܷܥܡܰܠ ܕܝܕ݂ܶܗ ܓ݂ܰܠܱܒܶܐ ܦܫܝܩܐ. ܥܰܡ ܗܰܝܐ ܕܟܝܒܶܐ ܗܳܘܶܐ ܚܰܐ ܐܰܣܝܪܐ ܕܝܕ݂ܶܗ ܐܘ ܬܘܝܬܬܷܪ، ܟܝܒܶܐ ܕܗܳܘܶܐ ܣܬܶܐ ܟ݂ܷܙܢܰܐ ܛܰܘܬܳܐ ܠܰܥ ܥܠܰܝܡܶܐ ܕܷܐܒܥܝ ܡܰܠܬܡܝ ܝܕܰܥܬܐ ܚܰܬܬܳܐ ܥܰܠ ܐܘ ܡܶܕܶܐ ܕܟܳܘܶܐ ܒܷܒܪܝܬ݂ܐ ܘܕܝܷܠܦܝ ܡܶܕܳܢܶܐ ܚܰܬ݂ܶܐ، ܘܕܡܰܚܘܷܢ ܐܰܪ ܪܷܥܝܳܢܰܬ݂ܬ݂ܶܗ ܠܰܢ ܢܳܫܶܐ ܚܪܶܢܶܐ. ܐܘ ܬܘܝܬܬܷܪ ܟܳܡܷܪܚܷܡ ܟ݂ܘܕ ܐܰܦ ܦܰܬ݂ܶܐ ܚܪܶܢܶܐ ܕܘ ܢܰܘܠܐ، ܐܶܠܐ ܟܝܒܶܐ ܕܗܳܘܶܐ ܣܬܶܐ ܩܷܢܛܐ ܬܰܗܠܝܟܰܐ ܡܶܢܶܗ ܠܰܥ ܥܠܰܝܡܶܐ. ܥܰܠ ܕܘ ܬܘܝܬܬܷܪ، ܦܳܬ݂ܐ ܝܐ ܦܬܷܚܬܐ ܕܶܐܒܰܐ ܟܝܒܶܐ ܚܰܐ ܡܦܰܠܷܓ݂ ܐܰܪ ܪܷܥܝܳܢܰܝܕ݂ܶܗ، ܘܟܘܠ ܚܰܐ ܕܟܷܬܝܐ ܡܣܰܓܠܐ ܟܝܒܶܐ ܚܳܙܶܐ. ܘܐܰܥ ܥܠܰܝܡܶܐ ܥܰܠ ܕܟܷܬܝܐ ܐܘ ܐܰܕܡܰܬ݂ܬ݂ܶܗ ܫܰܚܝܢܐ، ܠܷܓܡܷܦܬܰܟܪܝ ܒܘ ܡܶܕܶܐ ܓ݂ܰܠܱܒܶܐ ܐܘ ܟܷܡܡܝ ܐܘ ܡܶܕܶܐ ܕܟܳܬ݂ܶܐ ܩܷܡ ܦܶܡܰܝܝܶܗ، ܡܰܘܟ݂ܰܐ ܟܷܦ݁ܦ̇݁ܶܗ ܕܷܐܡܡܝ ܡܶܕܳܢܶܐ ܠܐ ܛܳܘܶܐ ܥܰܠ ܐܝ ܕܘܟܬ݂ܐ ܕܘ ܦܘܠܚܳܢܰܬ݂ܬ݂ܶܗ ܐܘ ܥܰܠ ܡܶܕܳܢܶܐ ܚܪܶܢܶܐ ܘܒܷܬ݂ܷܪ ܡܳܪܶܐ ܕܘ ܦܘܠܚܳܢܐ ܟܝܒܶܐ ܚܳܙܶܐ ܘܡܳܦܰܩܩܶܐ ܡܘ ܫܘܓ݂ܠܐ. ܘܗܰܬ݂ܶܐ ܟܝܒܰܐ ܟ݂ܘܠܩܐ ܩܷܛܪܐ ܠܰܥ ܥܠܰܝܡܶܐ ܥܰܡ ܡܳܪܶܐ ܕܘ ܦܘܠܚܳܢܐ. ܡܷܢ ܝܘܬ݂ܪܳܢܐ ܘܡܷܢ ܚܘܣܪܳܢܐ ܟܷܬܠܰܐ ܠܝ ܡܶܕܝܰܐ؟ ܗܰܪܟܶܐ ܟܳܒܰܥܢܐ ܟܳܬ݂ܰܘܢܐ ܟܰܪܝܐ ܥܰܠ ܐܰܝ ܝܘܬ݂ܪܳܢܶܐ ܘܥܰܠ ܐܰܚ ܚܘܣܪܳܢܶܐ ܕܟܳܬ݂ܷܢ ܒܝ ܡܷܨܥܳܝܘܬ݂ܐ ܕܰܐܢ ܐܶܣܳܪܶܐ ܢܰܘܠܳܝܶܐ ܐܰܘܟܝܬ݂ ܕܝ ܡܶܕܝܰܐ، ܘܕܝܠܳܢܳܐܝܬ݂ ܒܘ ܕܰܪܒܐ ܕܘ ܦܰܝܣܒܘܟ، ܕܘ ܘܰܛܣܰܐܦ̇، ܕܘ ܐܝܢܣܬܰܓܪܰܡ ܘܕܘ ܬܘܝܬܬܷܪ ܕܰܐܕܝܰܘܡܰܐ ܓ݂ܰܠܱܒܶܐ ܟܳܡܝܬܷܣܬܰܥܷܡܠܝ ܒܰܝܢ ܐܰܥ ܥܠܰܝܡܶܐ ܒܷܒܪܝܬ݂ܐ. ܟܷܦ݁ܦ݁ܶܗ ܐܰܢ ܢܳܫܶܐ ܡܷܣܬܰܥܷܡܠܝ ܐܘ ܦܰܝܣܒܘܟ، ܐܘ ܘܰܛܣܰܐܦ̇، ܐܘ ܐܝܢܣܬܰܓܪܰܡ ܘܐܘ ܬܘܝܬܬܷܪ ܒܕܰܪܒܐ ܛܳܘܐ ܘܒܕܰܪܒܐ ܣܬܶܐ ܒܝܫܐ. ܓܦܰܝܫܐ ܥܰܠ ܐܰܢ ܢܳܫܶܐ ܒܶܐ ܐܰܝܕܰܪܒܐ ܟܷܒܥܝ ܡܷܣܬܰܥܷܡܠܷܢܢܶܗ. ܟܳܒܷܢ ܦܷܪܣܰܐ ܛܰܘܬܐ ܠܰܢ ܢܳܫܶܐ ܕܡܝܬܰܨܪܝ ܒܷܚܕ݂ܳܕ݂ܶܐ. ܒܰܐ ܐܶܣܳܪܶܐ ܕܟܳܣܰܝܡܝ ܥܰܡ ܚܕ݂ܳܕ݂ܶܐ ܐܰܢ ܢܳܫܶܐ ܛܰܘ ܟܘܕ݂ܥܝ ܚܕ݂ܳܕ݂ܶܐ ܘܟܳܝܷܠܦܝ ܗܰܡ ܥܰܠ ܪܘܚܰܝܝܶܗ ܡܶܕܶܐ ܚܰܬ݂ܐ ܘܗܰܡ ܣܬܶܐ ܥܰܠ ܐܰܢ ܢܳܫܶܐ ܕܟܳܣܰܝܡܝ ܐܶܣܳܪܶܐ ܐܰܥܡܰܝܝܶܗ. ܛܰܘ ܟܳܫܳܪܷܢ ܐܰܩ ܩܷܛܪܶܐ ܕܥܰܡ ܚܕ݂ܳܕ݂ܶܐ ܘܟܳܦܷܪܩܝ ܒܪܘܚܰܝܝܶܗ ܐܘ ܒܰܪ ܪܷܓ݂ܫܰܬ݂ܬ݂ܶܗ ܘܒܰܪ ܪܷܥܝܳܢܰܬ݂ܬ݂ܶܗ. ܐܘ ܟܳܡܝܐܰܬ݂ܪܝ ܡܰܪ ܪܷܥܝܳܢܶܐ ܘܡܰܪ ܪܷܓ݂ܫܶܐ ܕܰܚ ܚܪܶܢܶܐ ܘܟܳܝܷܠܦܝ ܡܶܕܳܢܶܐ ܡܷܚܕ݂ܳܕ݂ܶܐ. ܐܰܢ ܢܳܫܶܐ ܕܟܳܣܰܝܡܝ ܐܶܣܳܪܶܐ ܥܰܡ ܚܕ݂ܳܕ݂ܶܐ ܒܘ ܕܰܪܒܰܢܐ ܕܘ ܢܰܘܠܐ، ܟܷܦ݁ܦ̇݁ܶܗ ܕܗܳܘܷܢ ܐܘ ܩܳܠܐ، ܐܝ ܥܰܝܢܐ ܘܐܝ ܐܰܕ݂ܢܐ ܕܘ ܥܰܡܐ، ܘܡܚܰܠܦܝ ܒܪܝܬ݂ܐ ܘܣܰܝܡܝܠܰܐ ܡܰܠܟܘܬ݂ܐ ܕܝ ܐܰܪܥܰܬ݂ܶܐ. ܐܶܠܐ ܥܰܠܡܰܩܠܷܒ ܣܬܶܐ ܟܷܦ݁ܦ̇݁ܶܗ ܕܗܳܘܷܢ ܐܘ ܩܳܠܐ، ܐܝ ܥܰܝܢܐ ܘܐܝ ܐܰܕ݂ܢܐ ܕܘ ܥܰܫܝܢܐ ܘܕܘ ܛܳܠܘܡܐ ܘܡܰܡܝܪܝ ܐܰܚ ܚܰܝܶܐ ܕܰܢ ܢܳܫܶܐ ܘܣܰܝܡܝ ܒܪܝܬ݂ܐ ܓܝܗܰܢܐ ܐܰܠܠܶܗ. ܐܰܢ ܐܶܣܳܪܶܐ ܢܰܘܠܳܝܶܐ ܕܒܰܝܢ ܐܰܢ ܢܳܫܶܐ ܕܟܳܘܷܢ ܒܘ ܕܰܪܒܐ ܕܰܬ ܬܰܚܷܪܙܳܬ݂ܐ ܟ݂ܘܕ ܕܘ ܦܰܝܣܒܘܟ ܐܘ ܘܰܛܣܰܐܦ̇ ܐܘ ܐܝܢܣܬܰܓܪܰܡ ܘܐܘ ܬܘܝܬܬܷܪ، ܟܷܦ݁ܦ݁ܶܗ ܡܷܫܬܰܥܷܢ ܕܰܘܪܐ ܡܰܐ ܬܪܶܐ ܓܰܒܶܐ ܒܰܚ ܚܰܝܶܐ ܕܝ ܢܳܫܘܬ݂ܐ. ܐܝܢܰܩܰܐ ܕܗܳܘܷܢ ܡܷܨܥܳܝܶܐ ܠܘ ܡܶܕܶܐ ܛܳܘܐ ܕܟܳܡܰܢܦܷܥ ܠܘ ܥܰܡܐ، ܟܷܦ݁ܦ݁ܶܗ ܕܗܳܘܷܢ ܚܰܝܠܐ ܝܨܝܦܐ ܘܳܐܠܨܳܝܐ ܠܘ ܥܰܡܐ. ܒܘ ܣܝܳܡܐ ܕܰܐܢ ܐܶܣܳܪܶܐ ܬܪܝܨܶܐ ܒܰܝܢ ܐܘ ܥܰܡܐ ܘܠܝ ܫܘܠܛܳܢܘܬ݂ܐ، ܟܷܦ݁ܦ݁ܶܗ ܣܰܝܡܝ ܐܘ ܐܰܬ݂ܪܐ ܡܰܠܟܘܬ݂ܐ. ܥܰܠ ܕܐܝܢܰܩܰܐ ܕܡܰܚܘܷܢ ܐܘ ܫܪܳܪܐ ܕܘ ܡܶܕܶܐ ܕܟܳܘܶܐ ܟ݂ܘܕ ܕܟܷܬܝܐ ܠܘ ܥܰܡܐ ܟܝܒܶܐ ܐܘ ܥܰܡܐ ܡܢܰܩܶܐ ܐܘ ܪܝܫܐ ܕܗܝܝܶܐ ܟܳܒܷܥ ܘܡܰܣܷܡ ܐܶܒܶܗ ܐܘ ܡܶܕܶܐ ܕܟܷܬܝܐ ܛܳܘܐ ܠܘ ܥܰܡܐ. ܟܷܦ݁ܦ݁ܶܗ ܐܰܢ ܐܶܣܳܪܶܐ ܢܰܘܠܳܝܰܢܝ ܕܥܰܡ ܐܘ ܟ݂ܢܘܫܝܐ، ܗܳܘܷܢ ܠܘ ܝܘܠܦܳܢܐ ܘܠܝ ܡܰܢܗܪܳܢܘܬ݂ܐ ܕܷܚܕ݂ܳܕ݂ܶܐ. ܟܳܒܷܢ ܦܷܪܣܰܐ ܠܰܥܠܰܝܡܶܐ ܕܟܘܬ݂ܘܝ ܘܝܷܠܦܝ ܡܷܚ ܚܕ݂ܳܕ݂ܶܐ. ܐܰܥ ܥܠܰܝܡܶܐ ܕܠܰܬܬܶܐ ܚܰܘܪܳܢܶܐ ܐܰܘ ܡܟܳܢܘܳܬ݂ܐ ܕܡܷܔܓ݂ܳܠܝ ܥܰܡ ܚܕ݂ܳܕ݂ܶܐ ܒܕܰܪܒܐ ܚܪܶܢܐ ܟܳܩܰܬ݂ܬ݂ܶܐ ܦܷܪܣܰܐ ܕܣܰܝܡܝ ܚܰܘܪܘܬ݂ܐ ܥܰܡ ܚܕ݂ܳܕ݂ܶܐ، ܕܟܘܬ݂ܘܝ ܘܡܦܰܠܓ݂ܝ ܐܰܪ ܪܶܓ݂ܫܰܬ݂ܬ݂ܶܗ ܥܰܡ ܚܕ݂ܳܕ݂ܶܐ، ܘܡܷܔܓ݂ܳܠܝ ܘܕܳܐܒܷܢ ܪܷܥܝܳܢܐ ܠܷܚܕ݂ܳܕ݂ܶܐ ܘܡܰܫܷܡܥܝ ܐܰܛ ܛܶܒܰܬ݂ܬ݂ܶܐ ܠܷܕ ܚܶܕ݂ܳܪܰܝܝܶܗ ܘܕܡܷܦܨܳܚܝ ܒܝ ܚܰܘܪܘܬ݂ܐ ܕܥܰܡ ܚܕ݂ܳܕ݂ܶܐ. ܐܝ ܒܪܝܬ݂ܐ ܟܷܘܝܐ ܩܪܝܬ݂ܐ، ܘܐܘ ܐܝ ܩܪܝܬ݂ܐ ܒܪܝܬ݂ܐ ܟܷܘܝܐ ܠܟܘܠܠܶܗ، ܠܰܐ ܦܰܩܝܪܶܐ ܘܠܰܐ ܥܰܬܝܪܶܐ ܕܠܐ ܦܘܪܫܳܢܐ ܪܰܒܐ. ܠܷܓ ܦܳܝܷܫ ܬܚܘܡܶܐ ܠܘ ܝܘܠܦܳܢܐ. ܟܝܒܶܐ ܚܰܐ ܡܷܣܬܰܥܡܷܠ ܐܰܢ ܐܶܣܳܪܶܐ ܢܰܘܠܳܝܰܢܝ ܠܘ ܫܘܓ݂ܠܐ ܣܬܶܐ ܕܝ ܬܰܓܳܪܘܬ݂ܐ ܐܘ ܕܡܶܕܶܐ ܚܪܶܢܳܐ ܒܕܰܪܒܐ ܛܳܘܐ. ܟ݂ܘܕ ܟܬ݂ܘܠܝ ܠܰܠܥܰܠ ܐܰܢ ܐܶܣܳܪܶܐ ܢܰܘܠܳܝܰܢܝ ܟܷܦ݁ܦ݁ܶܗ ܡܝܬܷܣܬܰܥܷܡܠܝ ܒܢܝܫܐ ܒܝܫܐ ܣܬܶܐ ܥܰܡ ܟܘܠ ܚܒܳܠ. ܗܰܢܝ ܕܟܷܒܥܝ ܡܰܝܕܝ ܐܘ ܫܘܠܛܳܢܐ ܒܝܕ݂ܰܝܝܶܗ ܟܳܡܷܣܬܰܥܷܡܠܷܢܢܶܗ ܟ݂ܘܕ ܐܰܠܶܐ ܠܘ ܝܘܬ݂ܪܳܢܐ ܕܪܘܚܰܝܝܶܗ ܘܠܘ ܢܝܫܰܬ݂ܬ݂ܶܗ ܐܘ ܦܳܘܠܝܛܝܩܳܝܐ. ܟܳܡܷܣܬܰܥܷܡܠܝ ܐܘ ܚܰܝܠܐ ܕܟܷܬܬܶܗ ܘܒܘ ܓܰܚܟܳܐ ܕܥܰܠ ܐܘ ܥܰܡܐ ܒܘ ܦܪܳܣܐ ܕܰܐܛ ܛܶܒܶܐ ܕܟܳܡܰܢܦܥܝ ܠܘ ܢܝܫܰܬ݂ܬ݂ܶܗ ܐܘ ܦܳܘܠܝܛܝܩܳܝܐ، ܟܳܬ݂ܷܢ ܠܘ ܪܝܫܐ ܠܐ ܒܕܰܪܒܐ ܡܣܰܘܝܐ ܘܠܳܐ ܟܝܢܐ. ܐܘ ܢܰܘܠܐ ܟܝܒܶܐ ܡܫܰܡܷܫ ܠܰܢ ܢܳܫܶܐ ܛܳܠܘܡܶܐ ܘܠܳܐ ܫܰܪܝܪܶܐ ܣܬܶܐ. ܟܝܬܐ ܢܳܫܶܐ ܠܳܐ ܡܣܰܘܝܶܐ ܘܡܝ ܬܰܪܒܝܬ݂ܐ ܡܰܫܝܓܶܐ ܟܷܦ݁ܦ݁ܶܗ ܡܷܠܦܝ ܡܶܕܳܢܶܐ ܒܝܫܶܐ ܠܰܥܠܰܝܡܶܐ ܘܡܰܝܠܷܢܢܶܗ ܡܘ ܕܰܪܒܐ ܛܳܘܐ. ܐܰܬ ܬܰܠܝܦܳܢܰܢܝ ܐܰܡ ܡܗܰܘܢܶܐ ܗܰܘܷܢ ܡܢܳܬ݂ܐ ܡܰܐ ܚܰܝܶܐ ܝܰܘܡܳܝܶܐ ܕܰܐܢ ܢܳܫܶܐ، ܘܕܝܠܳܢܳܐܝܬ ܕܰܐܥ ܥܠܰܝܡܶܐ، ܘܣܷܡܡܶܗ ܢܳܫܶܐ ܓ݂ܰܠܱܒܶܐ ܐܰܣܝܪܶܐ ܕܷܬ݂ܬ݂ܗ ܗܘܠ ܠܰܝܐ ܕܗܷܢ ܡܰܐ ܥܠܰܝܡܰܢܝ ܟܳܡܝܣܰܟܪܝ ܥܰܠ ܕܟܳܛܳܥܷܢ ܐܘ ܫܪܳܪܳܐ ܕܰܚ ܚܰܝܶܐ. ܥܙܝܙ ܐܝܕܝܢ 2175