Cäziz Aydin : ܐܰܡ ܡܰܠܦܳܢܶܐ ܕܡܳܠܰܦܦܶܗ ܒܰܐܪܟܰܚ ܐܝ ܩܪܝܬ݂ܐ ܒܘ ܙܰܒܢܰܢܳܐ / Am malfone d molaffe b Arkaḥ i qriṯo bu zabnano

Am malfone d molaffe b Arkaḥ i qriṯo bu zabnano

ܟܳܡܷܠܦܝ ܠܶܫܳܢܐ ܣܘܪܝܳܝܳܐ، ܨܠܘܬܐ، ܩܳܠܶܐ ܕܝ ܥܝܬܐ ܘܰܐ ܛܷܟܣܳܝܳܬ݂ܐ ܚܪܶܢܶܐ ܒܝ ܡܰܕܪܰܫܬܐ ܣܘܪܝܳܝܬܐ ܕܝ ܩܪܝܬ݂ܐ ܒܰܐܪܟܰܚ ܒܷܬ݂ܷܪ ܡܘ ܣܰܝܦܐ ܗܘܠ ܐܰܕ ܝܰܘܡܰܐ ܐܷܫܡܰܝـܝܶܗ ܗܰܢܝܢܶܐ. ܡܰܠܦܳܢܐ ܓܰܒܪܐܝܶܠ، ܡܰܠܦܳܢܐ ܕܰܘܝܕ، ܡܰܠܦܳܢܐ ܦܰܘܠܘܣ، ܡܰܠܦܳܢܐ ܡܰܪܰܘܓܶܐ، ܡܰܠܦܳܢܐ ܫܰܒܐ، ܡܰܠܦܳܢܐ ܡܘܫܶܐ، ܡܰܠܦܳܢܐ ܐܝܣܚܳܩ، ܡܰܠܦܳܢܐ ܫܠܶܡܘܢ، ܡܰܠܦܳܢܝܬ݂ܐ ܡܰܪܝܰܡ ܘܡܰܠܦܳܢܐ ܐܷܢܕܪܰܐܘܳܣ ܔܰܬܝ ܕܐܰܕܝܰܘܡܰܐ ܟܳܚܳܝܰܪ ܥܰܠ ܐܝ ܡܰܕܪܰܫܬܐ. ܡܰܠܦܳܢܝܬ݂ܐ ܡܰܪܝܰܡ ܗܰܘܝܠܰܐ ܫ̰ܰܥ ܐܷܫܢܶܐ ܕܟܳܡܷܠܦܐ ܒܝ ܡܰܕܪܰܫܬܐ، ܝܰܬܝܘܐ ܡܰܠܦܳܢܝܬ݂ܐ ܒܝ ܫܰܬܐ ܕܰܬܪܰܠܦܐ ܘܥܣܰܪ، ܘܟܝܒܰܢ ܕܷܡܡܝܢܰܐ ܗܝـܝܰܐ ܐܝ ܐܰܬ݂ܬܐ ܩܰܡܰܝܬܐ ܕܗܰܘܝܐ ܡܰܠܦܳܢܝܬ݂ܐ ܒܝ ܥܝܬܐ ܣܘܪܝܰܝܬܐ ܒܘ ܙܳܝܘܕܐ ܒܘ ܕܳܪܰܐܢܳܐ ܐܘ ܚܰܪܳܝܐ. ܒܝ ܫܰܬܰܬ݂ܶܗ ܓܰܘܝܪܐ ܥܰܡ ܚܰܐ ܠܰܪܘܰܪ ܡܝ ܩܪܝܬ݂ܐ ܘܡܰܚܰܬ ܒܕܘܟܬ݂ܰܐ ܡܰܠܦܳܢܐ ܐܷܢܕܪܰܐܘܳܣ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܕ݂ܳܐ ܘܷܐܫܬܝ ܒܕܶܠܰܗ ܐܝ ܒܶܝܬ݂ ܣܶܦܪܐ ܐܰܬ݂ܪܳܝܐ ܒܝ ܩܪܝܬ݂ܐ. ܡܝ ܫܰܬܰܝܐ ܗܘܠ ܐܰܕܝܰܘܡܰܐ ܟܳܡܝܬܰܩܪܶܐ ܐܶܒܰܐ ܠܶܫܳܢܐ ܬܘܪܟܳܝܐ. ܘܝܘܠܦܳܢܐ ܥܳܠܡܳܝܐ ܓܰܘܳܢܳܝܐ ܠܘ ܓܳܪܰܢ ܕܝ ܬܰܚܪܷܙܬܐ ܕܝ ܘܰܙܝܪܘܬܐ ܕܘ ܝܘܠܦܳܢܐ ܕܒܘ ܐܰܬ݂ܪܐ. ܡܶܩܷܡ ܡܷܠܦܝܘܰܐ ܐܶܒܰܐ ܗܘܠ ܠܘ ܣܷܕܪܐ ܕܰܐ ܚܰܡܫܐ. ܐܶܠܐ ܐܘܥܕܐ ܒܘ ܛܘܟܳܣܐ ܚܰܬ݂ܐ ܕܰܐܕܝܰܘܡܰܐ ܟܳܡܷܠܦܝ ܗܘܠ ܐܘ ܣܷܕܪܐ ܕܰܐܢ ܐܰܪܒܥܐ. ܟܝܬܐ ܬܠܳܬ݂ܐ ܡܰܠܦܳܢܶܐ ܐܘܥܕܐ ܕܟܳܡܰܩܪܷܢ ܐܰܢ ܢܰܥܝܡܶܐ ܒܘ ܒܶܝܬ݂ ܣܶܦܪܐ. ܘܒܷܬܷ݂ܪ ܡܘ ܣܶܕܪܐ ܕܰܐܢ ܐܰܪܒܥܐ ܐܰܝ ܝܳܠܘܦܶܐ ܟܘܙܙܷܢ ܠܝ ܩܪܝܬ݂ܐ ܕܕܰܠܝܢܶܐ ܘܬܰܡܐ ܟܳܩܳܪܷܢ ܗܘܠ ܠܘ ܣܶܕܪܐ ܕܰܬܡܰܢܝܐ.