Benjamin Toere: ܠܰܚܕܐ ܒܘ ܕܰܪܒܐ ܕܘܝܪܰܐܢܫܱܗܝܪ / Laḥdo bu darbo d Wiranšähir
Laḥdo bu darbo d Wiranšähir
ܠܰܚܕܐ ܕܒܶܐ ܡܰܠܟܶܐ ܡܰܣܥܷܬ ܟܳܡܰܚܟܶܐ ܒܝܰܘܡܶܐ ܕܰܬܠܳܬ݂ܐ ܕܝ ܩܝܰܡܬܐ ܒܝ ܕܷܪܬܐ ܕܘ ܒܰܝܬܶܕ݂ܶܐ ܡܰܣܰܠܶܗ ܕܰܐܬ݂ܝܐ ܒܪܝܫܶܗ. ܟܳܡܷܪ ܚܳܠܐ ܠܰܚܕܐ ܐܘ ܐܰܒܪܐ ܕܡܰܠܟܶܐ ܕܒܶܡ ܡܰܣܥܷܬ: ܒܝ ܫܰܬܐ ܕܰܐܠܦܐ ܫ̰ܰܥܡܐ ܘܫܰܘܥܝ ܒܝ ܩܪܝܬ݂ܐ ܫܳܓ݂ܰܠܘܰܝܢܐ ܣܳܝܰܡܘܰܝܢܐ ܐܰܟ ܟܰܪܡܶܐ ܘܣܰܘܰܠ ܓ݂ܰܠܰܒܶܐ، ܥܷܡܪܝ ܚܰܡܫܐ ܘܥܷܣܪܝܘܰܐ ܣܷܡܘܰܝܠܝ ܐܝ ܥܰܣܟܰܪܝـܝܶܐ. ܒܘ ܙܰܒܢܰܘܐ ܐܘ ܥܰܡܐ ܗܶܫ ܠܷܙܙܶܘܰܐ ܠܰܘܪܘܦܰ݁ܐ ܐܶܠܐ ܙܷܢܘܰܐ ܠܘ ܫܘܓ݂ܠܐ ܠܘܝܪܰܢܫܰܗܝܪ ܠܥܷܢܬܰܦ݁ ܠܘܪܦܰܐ ܫܘܓ݂ܠܝܘܰܐ ܒܰܕ ܕܰܪܒܳܢܶܐ ܕܰܬ ܬܪܶܢܰܬ ܐܰܘ ܚܘܦܪܝܘܰܐ ܩܰܢܰܠܰܬ ܠܰܡ ܡܰܝܶܐ. ܟܷܬܘܰܐ ܒܘ ܙܰܒܢܰܘܐ ܒܝ ܩܪܝܬ݂ܐ ܚܰܐ ܐܷܫܡܶܐ ܨܰܘܡܶܐ ܗܰܢܐ ܟܘܠ ܫܰܬܐ ܙܶܘܰܐ ܠܘܝܪܰܢܫܰܗܝܪ ܫܳܓ݂ܰܠܘܰܐ ܬܷܫܥܐ ܝܰܪܚܶܐ ܘܐܳܬ݂ܶܘܰܐ ܘܥܰܠ ܕܓ݂ܰܠܰܒܶܐ ܙܰܒܢܐ ܬܰܡܳܘܰܐ ܡܷܕܘܰܝܠܶܗ ܕܰܪܓ݂ܐ ܘܗܰܘܝܘܰܐ ܟ݂ܘܕ ܫ̰ܰܘܷܫ ܥܰܠ ܪܝܫܶܗ ܕܰܫ ܫܰܓ݂ܳܠܶܐ. ܒܝ ܚܰܪܰܝܬܐ ܕܘ ܩܰܝܛܐ ܨܰܘܡܶܐ ܡܷܪܠܶܠܝ ܬܘܟ݂ ܐܰܥܡܝ ܐܰܫ̰ ܫ̰ܰܬܐ ܠܘ ܫܘܓ݂ܠܐ ܠܘܝܪܰܢܫܰܗܝܪ ܥܰܠ ܕܟܳܠܳܙܰܡܠܝ ܟܰܬ݂ܳܘܐ ܘܗܰܬ ܩܪܶܠܘܟ݂ ܡܰܟܬܰܦ݁ ܘܟܘܕ݂ܥܷܬ ܩܪܰܝܬܐ ܟܬ݂ܰܘܬܐ. ܒܷܬ݂ܷܪ ܡܶܕ ܔܓܷ݂ܠܢܐ ܥܰܡ ܒܰܒܝ ܗܘܠܶܠܝ ܕܰܣܬܷܪ ܪܰܘܷܟ݂ܢܰܐ ܒܘ ܩܰܡܝܳܢ ܐܳܢܐ ܘܨܰܘܡܶܐ ܘܐܰܥܡܰܢ ܙܷܬ ܡܶܐ ܥܷܣܪܝ ܫܰܓ݂ܳܠܶܐ ܚܪܶܢܶܐ ܡܰܩ ܩܷܪܝܰܘܳܬ݂ܶܐ ܕܚܶܕܷ݂ܪ ܡܝܕܷܢ ܕܟܷܬܘܰܐ ܒܰܝܢܰܬ݂ܬ݂ܶܗ ܥܪܰܘܢܳܝܶܐ، ܣܚܘܩܳܝܶܐ، ܟܰܦܣܘܪܝܝܶܐ، ܘܐܰܓ݂ܪܝܬܳܝܶܐ ܒܝ ܩܰܣܰܐ ܕܘ ܩܰܡܝܳܢ ܕܙܰܢܐ ܠܘܝܪܰܢܫܰܗܝܪ. ܡܶܩܷܡ ܡܶܕ ܡܳܛܝܢܰܐ ܠܡܰܪܕܶܐ ܟܷܬܘܰܐ ܚܰܐ ܓܰܒܪܐ ܠܪܘܚܶܗ ܒܘ ܕܰܪܒܐ ܡܰܥܠܶܠܶܗ ܐܝܕ݂ܶܗ ܠܘ ܩܰܡܝܳܢ ܘܐܘ ܫܘܦܶܪ ܟܰܠܝ ܗܝـܝܶܐ ܣܬܶܐ ܪܰܘܷܟ݂ ܓܰܒܰܢ ܒܝ ܩܰܣܰܐ ܕܘ ܩܰܡܝܳܢ ܥܰܠ ܕܓ݂ܰܠܰܒܶܘܰܝܢܰܐ ܟܘܠܰܢ ܙܠܝܩܝܘܰܝܢܰܐ ܒܷܚܕ݂ܳܕ݂ܶܐ، ܒܘ ܕܰܪܒܐ ܡܷܔܓ݂ܳܠܝܘܰܐ ܡܶܐ ܡܶܕܳܢܶܐ ܡܫܰܚܷܠܦܶܐ ܗܘܠ ܕܝ ܡܰܣܰܠܶܐ ܐܰܬ݂ܝܐ ܠܝ ܬܰܘܕܝܬ݂ܐ. ܐܘ ܓܰܒܪܐ ܚܰܪܳܝܐ ܕܪܰܘܷܟ݂ ܒܘ ܩܰܡܝܳܢ ܒܕܶܠܶܗ ܕܷܡܣܰܥܷܪ ܠܰܡ ܡܫܝܚܳܝܶܐ ܐܝܢܰܩܠܰܐ ܕܷܦܬܷܚܠܶܗ ܦܶܡܶܗ ܡܚܶܠܝ ܚܕ݂ܐ ܥܰܠ ܦܳܬ݂ܶܐ ܡܷܪܠܝ ܠܷܓܡܝܢܰܟܦܷܬ ܕܷܡ ܡܣܰܥܪܷܬ. ܩܰܝܷܡ ܕܡܰܕܥܷܪ ܐܰܥܠܝ ܐܰܓ ܓܰܘܪܶܐ ܕܟܷܬܘܰܝܢܶܗ ܒܘ ܩܰܡܝܳܢ ܙܒܷܬܶܗ ܗܰܘܝ ܩܰܪܰܒܰܠܷܓ݂ ܒܘ ܩܰܡܝܳܢ. ܐܶܕܝ ܨܰܘܡܶܐ ܡܚܶܠܶܗ ܐܝܕ݂ܶܗ ܥܰܠ ܚܰܨܶܗ ܕܘ ܩܰܡܝܳܢ ܐܘ ܫܘܦܶܪ ܟܰܠܝ ܡܰܢܚܰܬܶܗ ܐܘ ܓܰܒܪܰܘܐ ܒܦܷܠܓܶܗ ܕܘ ܕܰܪܒܐ. ܡܷܪܠܶܗ ܨܰܘܡܶܐ؛ ܠܰܫ ܫܰܓ݂ܳܠܶܐ ܐܘ ܚܰܐ ܕܟܳܒܷܥ ܒܰܪܒܰܪܝـܝܶܐ ܛܪܐ ܢܳܚܷܬ. ܕܠܐ؛ ܟܘܠ ܚܰܐ ܛܪܐ ܡܝܰܩܷܪ ܐܘ ܚܪܶܢܐ. ܒܘ ܫܷܟܷܠܰܢܐ ܡܰܛܝܢܰܐ ܠܝ ܕܘܟܬ݂ܐ ܕܘ ܫܘܓ݂ܠܐ. ܟܘܠ ܡܶܕܶܐ ܓ݂ܰܠܰܒܶܐ ܒܰܣܝܡܐ ܡܗܰܠܰܟ݂ܘܰܐ. ܐܳܢܐ ܟܳܬ݂ܰܘܰܝܢܐ ܐܘ ܐܶܪܙܰܩ ܕܟܳܥܳܒܷܪ ܢܳܦܷܩ ܠܝ ܫܰܢܬܝـܝܶܐ ܕܘ ܫܘܓ݂ܠܐ. ܒܘ ܫܷܟܷܠܰܢܐ ܡܰܫܦܰܥܠܰܢ ܟܡܐ ܝܰܪܚܶܐ. ܝܰܘܡܐ ܐܰܬ݂ܝ ܬܰܠܰܦܘܢ ܠܨܰܘܡܶܐ ܡܷܪܰܠܶܗ؛ ܒܝ ܩܪܝܬ݂ܐ ܕܝܫ ܒܘ ܬܪܰܟܬܳܪ ܚܰܐ ܡܰܢ ܢܰܥܝܡܶܐ ܘܩܳܪܰܘܘܰܐ ܠܨܰܘܡܶܐ، ܐܘ ܢܰܥܝܡܐ ܟܰܝܘܠܶܗ ܓ݂ܰܠܰܒܶܐ ܡܰܩܷܡܘܰܠܶܗ ܠܝ ܩܷܣܬܰܟ݂ܰܢܰܐ. ܒܷܬܷ݂ܪܟܶܐ ܡܫܰܕܰܪܪܶܗ ܠܕܷܝܰܪܒܰܟܷܪ ܠܳܙܰܡܘܰܐ ܕܨܰܘܡܶܐ ܐܳܬ݂ܶܐ ܓܰܒܶܗ ܘܗܳܘܶܐ ܡܳܪܐ ܠܘ ܢܰܥܝܡܐ. ܨܰܘܡܶܐ ܡܷܕܠܶܗ ܐܷܙܷܢ ܡܘ ܡܘܬܰܗܝܬ ܘܐܰܙܙܶܝܐ. ܫܰܦܷܥ ܙܰܒܢܐ ܒܰܫ ܒܝ ܚܳܠܐ ܨܰܘܡܶܐ ܠܐ ܕܰܥܷܪ. ܟܷܬܘܰܐ ܗܷܢ ܡܰܐ ܫܰܓ݂ܳܠܶܐ ܥܪܰܘܢܳܝܶܐ ܘܐܰܓ݂ܪܝܬܳܝܶܐ ܐܰܬ݂ܝܘܰܐ ܐܘ ܙܰܒܢܐ ܕܝ ܥܰܣܟܰܪܝܰܬ݂ܬ݂ܶܗ ܡܰܘܟ݂ܰܐ ܠܳܙܰܡܘܰܐ ܕܡܝܬܰܗܘܰܠܠܶܗ ܐܘ ܡܥܰܫܰܬ݂ܬ݂ܶܗ ܕܙܷܢ ܠܰܒ ܒܳܬܰܬ݂ܶܗ ܕܒܷܬܷ݂ܪܟܶܗ ܙܷܢ ܠܝ ܥܰܣܟܰܪܝـܝܶܐ. ܟܡܐ ܢܰܩܠܰܬ ܡܷܪܠܰܢ ܠܘ ܡܘܬܰܗܝܬ ܐܶܠܐ ܐܳܡܰܪܘܰܐ ܗܘܠ ܕܨܰܘܡܶܐ ܕܠܳܐ ܐܳܬ݂ܶܐ ܣܳܝܷܡ ܐܘ ܚܫܳܘܐ ܠܰܝܒܝ ܕܳܒܶܢܰܢܟ݂ܘ ܙܘܙܶܐ. ܐܰܢܢܰܩܠܰܐ ܐܰܫ ܫܰܓ݂ܳܠܶܐ ܐܰܬܷ݂ܢܘܰܐ ܐܷܡܝܘܰܐ ܐܶܠܝ ܓܠܳܙܷܡ ܗܰܬ ܕܳܒܷܬ ܐܰܙ ܙܘܙܶܕ݂ܰܢ. ܡܷܪܠܝ ܐܰܠܶܗ ܟܳܚܳܙܘܬܘ ܐܳܢܳܐ ܣܬܶܐ ܟ݂ܘܕ ܗܰܬܘ. ܠܰܬܠܝ ܙܘܙܶܐ ܘܐܘ ܡܥܰܫܶܕ݂ܝ ܠܐ ܩܰܝܷܬ݂ܠܝ ܡܰܝܟܐ ܓܕܳܒܶܢܰܢܟ݂ܘ ܙܘܙܶܐ. ܐܰ ܐܰܓ݂ܪܝܬܝـ݀ܝܶܐ ܦܰܗܝܡܝܠܝ ܐܶܠܐ ܐܰܥ ܥܪܰܘܢܳܝܶܐ ܩܰܪܥܰܝܶܐ ܢܰܫܝܦܳܘܰܐ ܠܐ ܦܷܗܡܝܘܰܐ ܐܷܡܡܝ ܘܰܝܠܝ؛ ܕܠܳܐ ܐܳܒܷܬ ܠܰܢ ܐܰܙ ܙܘܙܶܐ ܓܡܰܚܬܝܢܰܐ ܐܰܥܠܘܟ݂ ܒܘ ܡܰܚܝܐ. ܐܳܢܐ ܣܬܶܐ ܐܰܙܝܢܐ ܡܷܪ ܠܝ ܠܰܐ ܣܚܘܩܳܝܶܐ؛ ܟܳܒܰܥ ܢܐ ܕܷܡܥܰܘܢܘܬܘܠܝ ܟܳܚܙܘܬܘ ܡܷܢܝܐ ܐܝ ܨܒܘܬ݂ܐ. ܗܷܢܷܟ ܣܬܶܐ ܡܷܪܰܠܠܝ ܠܐ ܙܰܝܥܷܬ ܐܰܚܢܰܐ ܓܷܡܨܰܦܝܢܰܐ ܠܰܗ. ܘܕܷܡܔܰܪܒܝ ܪܘܚܰܝܶܐ ܐܰܥܠܘܟ݂ ܐܰܚܢܰܐ ܓܷܡܥܰܘܢܝܢܰܠܘܟ݂ ܐܝܢܰܩܠܰܐ ܕܷܚܙܰܠܠܶܗ ܐܰܥ ܥܪܰܘܢܳܝܶܐ ܟܰܠܷܢܢܶܐ ܐܰܓ݂ܠܰܒܰܐ ܡܰܐ ܫܰܓ݂ܳܠܶܐ ܒܚܰܨܝ ܙܰܝـܝܥܝ ܠܐ ܡܰܔܪܰܠܠܶܗ ܕܣܰܝܡܝ ܡܶܕܶܐ. ܟܰܠܝܢܰܐ ܠܨܰܘܡܶܐ ܙܷܬ ܡܶܐ ܝܰܪܚܐ ܠܐ ܐܰܬ݂ܝ. ܗܷܢ ܡܰܐ ܫܰܓ݂ܳܠܶܐ ܦܰܝـܝܫܝ ܡܰܔܒܘܪ ܘܕܰܥܝܪܝ ܠܳܐ ܒܳܬܰܬ݂ܶܐ ܕܠܐ ܡܥܰܫ ܐܘ ܡܘܬܰܗܝܬ ܡܷܪܘܰܝܠܶܗ ܓܷܡܫܰܕܰܪܢܐ ܐܰܙ ܙܘܙܶܐ ܠܰܒ ܒܳܬܰܬ݂ܟ݂ܘ. ܡܫܰܕܰܪܪܶܗ ܐܳܢܐ ܒܷܬ݂ܪܶܗ ܕܨܰܘܡܶܐ ܕܩܳܪܶܢܶܗ ܐܰܙܙܝܢܐ ܒܝ ܩܰܡܰܝܬܐ ܠܕܷܝܰܪܒܰܟܷܪ ܠܝ ܩܷܣܬܰܟ݂ܰܢܰܐ ܡܫܰܝܶܠܝ ܐܰܥܠܶܗ ܡܷܪܰܠܝ؛ ܕܕܰܥܷܪ ܠܘ ܒܰܝܬܐ ܐܳܢܐ ܣܬܶܐ ܪܰܘܷܟ݂ܢܐ ܒܘ ܩܰܡܝܳܢ ܗܘܠ ܕܡܰܛܝܢܐ ܠܘ ܒܰܝܬܐ ܡܫܰܝܶܠܝ ܥܰܠ ܨܰܘܡܶܐ ܘܥܰܠ ܐܘ ܢܰܥܝܡܐ ܟܰܝـܝܘܐ، ܡܷܪܠܝ ܠܨܰܘܡܶܐ ܟܳܩܳܪܷܠܘܟ݂ ܥܰܠ ܕܟܳܠܳܙܰܡ ܣܰܝܡܷܬ ܐܰܚ ܚܷܫܘܶܐ ܕܰܐ ܫܰܓ݂ܳܠܶܐ ܟܘܠ ܢܳܫܐ ܠܝ ܗܶܘ݁ܝܶܝܕܘܟ݂ ܝܐ. ܐܰܫ ܫܰܓ݂ܳܠܶܐ ܟܘܠܠܶܗ ܕܠܐ ܙܘܙܶܢܶܐ ܟܳܡܫܰܝܠܝ ܐܰܥܠܘܟ݂. ܨܰܘܡܶܐ ܡܷܪܠܶܠܝ؛ ܐܳܢܐ ܠܐ ܟܳܕܳܥܰܪܢܐ ܠܬܰܡܐ ܟܳܕ݂ܰܥܢܐ ܕܳܐܬ݂ܶܐ ܢܐ ܓܬܳܘܶܐ ܒܰܠܰܘܰܬ ܙܘܟ݂ ܕܥܰܪ ܡܰܪ ܠܐ ܚܙܶܠܝ ܨܰܘܡܶܐ. ܐܳܢܐ ܣܬܶܐ ܒܷܬ݂ܷܪ ܒܷܟܡܐ ܝܰܘܡܶܐ ܢܰܩܠܰܐ ܚܪܶܬܐ ܢܰܦܷܩ ܢܐ ܠܘ ܕܰܪܒܐ ܐܰܙܙܝܢܐ ܡܷܪܠܝ ܐܝ ܨܒܘܬ݂ܐ ܠܘ ܡܘܬܰܗܝܬ ܩܰܝܷܡ ܐܳܢܐ ܘܐܘ ܡܘܬܰܗܝܬ ܥܰܡ ܚܕ݂ܳܕ݂ܶܐ ܣܷܡܠܰܢ ܐܰܚ ܚܷܫܘܶܐ ܕܰܐ ܫܰܓ݂ܳܠܶܐ ܘܡܦܰܠܰܓ݂ ܠܰܢ ܐܰܙ ܙܘܙܶܐ ܕܰܐ ܫܰܓ݂ܳܠܶܐ ܕܟܷܬܘܰܝܢܶܗ ܬܰܡܐ. ܘܗܘܘܶܐ ܐܰܙ ܙܘܙܶܐ ܕܰܐ ܫܰܓ݂ܳܠܶܐ ܕܕܰܐܥܝܪܝܘܰܐ ܠܰܐ ܒܳܬܰܬ݂ܶܗ ܐܶܠܝ ܥܰܠ ܕܰܩ ܩܷܪܝܰܘܳܬ݂ܰܬ݂ܶܗ ܩܰܪܝܘܶܐ ܘܰܝܢܶܐ ܐܶܠܝ. ܐܳܢܐ ܣܬܶܐ ܡܰܚܰܬܠܝ ܐܰܙ ܙܘܙܶܐ ܒܥܶܒܝ ܘܡܷܬܦܰܟܰܪ ܠܝ ܕܔܳܪܶܐ ܡܶܕܶܐ ܠܰܙ ܙܘܙܰܢܝ ܓܕܷܡܡܝ ܗܰܢܐ ܓܢܝܘܝ ܠܶܗ ܘܠܐ ܟܳܛܳܪܷܠܝ ܣܰܓ݂، ܡܰܘܟ݂ܰܐ ܓܠܳܙܰܡ ܗܳܘܶܢܰܢܶܐ ܡܳܪܐ ܓ݂ܰܠܰܒܶܐ ܒܘ ܕܰܪܒܐ ܕܝܠܳܢܳܝܬ݂ ܒܰܐ ܩܰܡܝܳܢܶܐ. ܐܝܢܰܩܠܰܐ ܕܕܰܥܷܪ ܢܐ ܠܘ ܒܰܝܬܐ. ܐܰܙܙܝ ܢܐ ܠܝ ܕܘܟܬ݂ܐ ܕܰܐ ܩܰܡܝܳܢܶܐ ܕܪܳܘܰܟ݂ܢܐ ܕܳܐܬ݂ܶܢܐ ܠܘ ܒܰܝܬܐ ܬܰܡܐ ܡܰܟܠܰܠܰܠܝ ܟܡܐ ܝܰܘܡܶܐ ܥܰܠ ܕܟܳܠܷܢܘܰܐ ܕܟܳܡܷܠ ܟܳܡܘܳܝ ܕܰܐ ܩܰܡܝܳܢܶܐ ܕܳܐܬ݂ܶܐ ܐܰܥܡܰܝܶܐ ܥܰܣܶܟܷܪ ܢܘܛܪܝ ܐܰܩ ܩܰܡܝܳܢܶܐ ܡܰܐ ܡܰܫܰܠܚܳܢܶܐ. ܐܰܩ ܩܰܡܝܳܢܶܐ ܕܘ ܦܰܚܡܐ ܘܰܝܢܶܐ ܟ݂ܰܠܝܶܐ ܙܷܢܘܰܐ ܗܘܠ ܫܷܪܢܰܩ. ܐܶܕܝ ܡܳܠܷܢܘܰܐ ܦܰܚܡܐ ܘܙܷܢܘܰܐ ܠܓܰܘܶܐ ܕܬܘܪܟܝـܝܰܐ ܟܘܠܰܐ. ܒܷܬ݂ܷܪ ܡܘ ܟܠܳܝܐ ܕܷܟܡܐ ܝܰܘܡܶܐ ܡܷܪܰܠܝ ܐܰܩ ܩܰܡܝܳܢܶܐ ܡܰܠܝܶܢܶܐ ܐܶܠܐ ܕܪܷܚܡܷܬ ܣܠܰܩ ܠܝ ܩܰܣܰܐ ܗܘܰܝ ܬܰܡܐ ܚܰܩ ܕܰܪܒܐ ܠܐ ܟܳܡܰܝܕܝܢܰܐ ܡܝܢܘܟ݂. ܐܝ ܗܰܘܰܐ ܪܰܒܷܥܘܰܐ ܐܶܠܐ ܗܶܫ ܩܘܪܳܘܰܐ ܡܰܘܟ݂ܰܐ ܒܝ ܩܰܡܰܝܬܐ ܠܰܒܷܥܢܐ ܕܪܳܘܰܟ݂ܢܐ ܐܶܠܐ ܒܷܬ݂ܷܪ ܡܷܬܦܰܟܰܪܠܝ ܒܰܙ ܙܘܙܰܢܝ ܒܰܣ ܟܝܒܝ ܟܳܠܶܢܐ ܗܰܪܟܶܐ ܘܠܰܬܝܐ ܐܝܕ݂ܝܥܐ ܐܶܡܰܐ ܢܰܩܠܰܐ ܚܪܶܬܐ ܓܠܳܝܷܡ ܐܘ ܟܳܡܘܝ ܕܰܐ ܩܰܡܝܳܢܶܐ ܡܰܘܟ݂ܰܐ ܐܳܢܐ ܣܬܶܐ ܪܰܘܷܟ݂ܢܐ. ܐܝܢܰܩܠܰܐ ܕܡܰܛܝܢܰܐ ܒܰܝܢ ܡܙܝܙܰܚ ܘܠܡܷܕ݂ܝܰܕ݂ ܒܝܛܐ ܚܕ݂ܐ ܡܰܬ ܬܰܟܰܪܰܬ ܕܘ ܩܰܡܝܳܢ ܡܰܘܟ݂ܰܐ ܟܘܠܠܶܗ ܐܰܩ ܩܰܡܝܳܢܶܐ ܟܰܠܷܢ. ܘܐܘ ܝܰܘܡܐ ܡܩܰܕܰܡܘܰܝܠܶܗ ܠܷܓ݂ܝܳܛܐ. ܢܰܚܝܬܝ ܐܰܫ ܫܘܦܶܪܰܬ ܘܰܐܢ ܢܳܫܶܐ ܕܟܷܬܢܶܐ ܐܰܥܡܰܝܶܐ ܣܷܡܡܶܗ ܢܘܪܐ ܘܠܰܝـܝܡܝ ܚܶܕ݂ܳܪܰܗ ܘܟܷܬܘܰܐ ܗܷܢ ܡܫܰܚܷܠܦܝܘܰܐ ܐܝ ܬܰܟܰܪܶܐ. ܐܳܢܐ ܣܬܶܐ ܒܝ ܩܰܣܰܐ ܩܳܪܰܫܘܰܝܠܝ ܐܶܠܐ ܠܳܒܰܥܘܰܝܢܐ ܕܢܳܚܰܬܢܐ ܓܰܒ ܐܝ ܢܘܪܐ ܥܰܠ ܕܳܐܕ݂ܰܥܘܰܝܢܐ ܕܢܳܚܰܬܢܐ ܓܷܡܫܰܝܠܝ ܡܰܢܗܷܬ ܘܡܰܝܟܳܗܷܬ. ܐܝܢܰܩܠܰܐ ܕܷܐܕ݂ܥܝ ܣܘܪܝܳـܝܐ ܢܐ ܟܝܬܐ ܕܠܐ ܒܳܣܰܡܶܗ ܐܰܘ ܡܰܫܰܠܚܝ ܠܝ ܒܪܝܫܶܐ ܕܘ ܛܘܪܰܢܐ ܘܢܳܫܐ ܠܐ ܟܳܫܳܡܷܥ ܐܶܒܝ ܥܰܠ ܕܢܳܫܐ ܠܐ ܟܳܕܷ݂ܥ ܐܰܥܡܰܝܶܐ ܢܐ. ܐܝܢܰܩܠܰܐ ܕܚܷܪܠܝ ܐܝ ܡܰܣܰܠܶܐ ܕܝ ܬܰܟܰܪܰܐ ܝܰܪܝܟ݂ܐ ܦܰܝܷܫ ܢܐ ܡܰܔܒܘܪ ܡܘ ܩܘܪܐ ܘܢܰܚܷܬ ܢܐ ܠܓܰܒܰܝܶܗ. ܐܝܢܰܩܠܰܐ ܕܷܡܫܰܚܰܢܘܰܝܢܐ ܒܕܰܠܠܶܗ ܕܷܡܫܰܝܠܝ ܡܰܢܗܷܬ ܡܰܝܟܳܗܷܬ ܐܳܢܐ ܣܬܶܐ ܡܷܪܠܝ؛ ܡܷܕܗܳܝܐ ܢܐ. ܐܝܢܰܩܠܰܐ ܕܡܷܪܠܝ ܗܰܘܟ݂ܰܐ ܗܷܢ ܡܷܢܢܶܗ ܠܐ ܒܰܣܷܡܡܶܗ ܚܷܪܠܝ ܟܳܡܷܔܓ݂ܳܠܝ ܒܰܝܢ ܚܕ݂ܳܕ݂ܶܐ ܡܶܕܳܢܶܐ ܠܐ ܫܳܡܰܥܘܰܝܢܐ ܡܷܢ ܟܷܡܡܝ. ܐܝܢܰܩܠܰܐ ܕܝ ܬܰܟܰܪܶܐ ܟ݂ܰܠܝܨܐ ܩܰܝܷܡ ܐܘ ܫܘܦܶܪ ܕܘ ܩܰܡܝܳܢ ܚܰܪܳܝܐ ܐܰܙܙܶܝܐ ܒܝ ܩܰܡܰܝܬܐ ܘܪܰܘܷܟ݂. ܐܳܢܐ ܣܬܶܐ ܐܰܙܙܝܢܐ ܕܪܳܘܰܟ݂ܢܐ ܒܘ ܩܰܡܝܳܢ ܕܟܷܬܘܰܝܢܐ ܐܶܒܶܗ. ܡܷܪܰܠܝ؛ ܙܘܟ݂ ܠܘ ܩܰܡܝܳܢ ܚܰܪܳܝܐ ܓܰܒ ܐܘ ܩܰܠܳܥܐ ܟܝܬܐ ܕܰܪܒܐ ܪܘܰܟ݂ ܬܰܡܐ ܕܠܐ ܩܳܪܰܫܠܘܟ݂. ܐܳܢܐ ܣܬܶܐ ܡܗܰܠܰܟ݂ܠܝ ܕܷܐܙܝܢܐ ܟܘܠܠܶܗ ܪܰܘܝܟ݂ܝ ܘܩܠܷܥܶܗ ܐܰܩ ܩܰܡܝܳܢܶܐ ܘܛܪܰܠܰܠܝ ܬܰܡܐ ܒܘ ܠܰܠܝܰܘܐ ܘܥܰܠ ܕܰܐ ܥܰܣܶܟܷܪ ܒܝ ܩܰܡܰܝܬܐ ܡܗܰܠܟ݂ܝܘܰܐ ܠܐ ܚܙܰܠܰܠܝ. ܐܝ ܗܰܘܰܐ ܥܰܬܷܡܬܐ ܐܘ ܠܰܠܝܐ ܩܘܪܐ ܘܙܘܙܶܐ ܓ݂ܰܠܰܒܶܐ ܐܰܥܡܝ ܒܕܶܠܝ ܕܡܷܬܦܰܟܰܪܢܐ ܕܷܓܕܳܬ݂ܶܐ ܡܶܕܶܐ ܒܪܝܫܝ ܢܰܩܠܰܐ ܚܪܶܬܐ ܗܘ ܟܝܒܝ ܕܳܥܰܪܢܐ ܠܘ ܒܰܝܬܐ. ܐܳܢܐ ܣܬܶܐ ܗܘܠܝ ܦܳܬ݂ܝ ܠܡܷܕ݂ܝܰܕ݂ ܕܕܳܥܰܪܢܐ ܬܰܡܐ ܦܳܝܰܫܢܐ ܗܘܠ ܨܰܦܪܰܝܬܐ. ܘܒܕܶܠܝ ܕܷܡܗܰܠܰܟ݂ܢܐ ܒܘ ܕܰܪܒܐ ܘܙܳܝܰܥܘܰܝܢܐ ܓ݂ܰܠܰܒܶܐ. ܢܰܩܠܰܐ ܚܙܶܠܝ ܟܰܠܰܐ ܪܰܕ݂ܝܬܐ ܐܰܬ݂ܰܝܬܐ ܡܶܐ ܓܰܒ ܡܷܕ݂ܝܰܕ݂ ܐܳܢܐ ܠܐ ܡܰܥܠܶܠܝ ܐܝܕ݂ܝ ܥܰܠ ܕܠܳܕ݂ܰܥܘܰܝܢܐ ܡܰܢܢܶܐ ܡܷܬܦܰܟܰܪܠܝ ܕܟܝܬܐ ܣܰܝܡܝ ܡܶܕܶܐ ܐܶܒܝ ܐܶܠܐ ܐܝ ܪܰܕ݂ܰܝܬܐ ܗܝـܝܰܐ ܟܰܠܝܐ ܢܰܩܠܐ ܚܷܪܠܝ ܢܰܚܷܬ ܬܪܶܐ ܥܰܣܶܟܷܪ ܡܝܢܰܐ ܡܳܪܰܟ݂ܶܐ ܐܰܬ ܬܦܷܢܓܰܬ݂ܬ݂ܶܗ ܐܰܥܠܝ ܐܝܢܰܩܠܰܐ ܕܷܚܙܰܠܠܶܗ ܠܰܝܬ ܬܦܷܢܓܶܐ ܡܶܕܶܐ ܐܰܥܠܝ ܢܰܦܷܩ ܚܰܐ ܚܪܶܢܐ ܕܟܷܬܘܰܐ ܐܘ ܪܝܫܰܬ݂ܬ݂ܶܗ ܡܝ ܪܰܕ݂ܰܝܬܐ ܡܫܰܝܠܶܠܝ ܡܷܢ ܟܳܣܰܝܡܷܬ ܒܘ ܠܰܠܝܰܢܐ ܗܰܪܟܶܐ ܕܰܝܘܳܢܳܗܷܬ ܠܐ ܟܘܕ݂ܥܷܬ ܡܷܩܩܰܐ ܟܝܬܐ ܡܶܕܳܢܶܐ ܒܰܕ ܕܰܪܒܳܢܰܢܝ ܐܳܢܐ ܣܬܶܐ ܡܷܪܠܝܠܰܠܶܗ ܐܝ ܡܰܣܰܠܶܗ ܟܘܠܰܗ ܐܰܝܕܰܪܒܐ ܐܰܫ ܫܘܦܶܪܰܬ ܛܪܰܠܰܠܝ ܒܘ ܕܰܪܒܐ. ܠܶܒܶܗ ܝܰܩܷܕ݂ ܐܰܥܠܝ ܐܳܡܷܪ ܬܘܟ݂ ܪܘܰܟ݂ ܐܰܙܳܠܶܢܰܐ ܠܗܰܙܰܟ݂ ܐܰܚܢܰܐ ܓܡܰܪܦܝܢܰܠܘܟ݂ ܠܝ ܩܪܝܬ݂ܐ ܐܳܢܐ ܣܬܶܐ ܪܰܘܷܟ݂ܢܐ ܒܘ ܕܰܪܒܐ ܡܫܰܝܰܠܘܰܐ ܥܰܠ ܐܰܣ ܣܘܪܝܳܝܶܐ ܘܥܰܠ ܡܫܝܚܐ ܡܶܕܳܢܶܐ ܗܘܠ ܕܡܰܛܝܢܰܐ ܠܘ ܒܰܝܬܐ. ܒܦܶܡܶܗ ܕܝ ܩܪܝܬܐ ܡܷܪܠܝܠܶܗ ܬܰܘܕܝ ܘܢܰܚܷܬܢܐ ܕܷܐܙܝܢܐ ܠܘ ܒܰܝܬܐ ܒܰܫ ܫܘܩܳܢܶܐ ܕܡܝܕܷܢ ܟܳܡܷܬܦܰܟܰܪܢܐ ܒܪܘܚܝ ܐܘܩܰܐ ܕܰܪܒܰܢܐ ܐܰܩܩܰܐ ܡܶܕܳܢܰܢܝ ܐܰܬܷ݂ܢ ܒܪܝܫܝ ܐܶܠܐ ܠܰܘܝ ܡܶܕܶܐ ܒܰܙ ܙܘܙܰܢܝ ܐܰܢܰܩܠܰܐ ܒܘ ܒܰܝܬܐ ܥܳܒܷܪ ܒܠܰܠܝܐ ܚܰܪܰܡܝـܝܶܐ ܓܰܒܰܢ ܡܷܒܠܷܢܶܗ ܬܘܟ݂ ܠܝ ܒܰܣܷܡܬܐ. ܡܰܛܝܢܐ ܠܘ ܒܰܝܬܐ ܥܰܒܷܪܢܐ ܟܘܠ ܢܳܫܐ ܡܕܰܘܡܷܪ ܥܰܠ ܕܠܐ ܟܳܠܷܢܘܰܝܠܝ ܐܳܢܐ ܣܬܶܐ ܠܰܒܷܥܢܐ ܕܢܳܫܐ ܚܳܙܶܐ ܐܰܙ ܙܘܙܶܐ ܕܰܐܥܡܝ. ܡܷܪܠܝ؛ ܒܰܛܝܠܳܢܐ ܓ݂ܰܠܰܒܶܐ ܓܠܳܙܰܡ ܙܝ ܕܳܡܰܟ݂ܢܐ ܐܰܙ ܙܘܙܶܐ ܒܥܶܒܝ ܬܰܠܝܶܗ ܕܰܡܷܟ݂ܢܐ. ܨܰܦܪܰܝܬܐ ܟ݂ܰܝـܝܦܐ ܩܰܝܷܡܢܐ ܐܰܙܙܝܢܐ ܡܦܰܠܰܓ݂ܠܝ ܐܰܙ ܙܘܙܶܐ ܠܰܡ ܡܳܪܰܬ݂ܬ݂ܶܐ ܡܶܩܷܡ ܡܶܕ ܗܳܘܶܐ ܒܰܠܰܐ ܒܪܝܫܝ ܒܘ ܫܷܟܷܠܰܢܐ ܬ݂ܢܝܚܳܝܐ ܕܰܥܷܪܢܐ ܠܘ ܒܰܝܬܐ. ܘܒܷܬܷ݂ܪ ܡܘ ܝܰܘܡܰܘܐ ܡܷܢ ܕܣܷܡܡܶܗ ܠܰܙܙܝܢܐ ܠܕܘܟܬ݂ܐ ܪܰܚܘܩܬܐ ܠܘ ܫܘܓ݂ܠܐ ܥܰܠ ܕܳܐܕ݂ܰܥܘܰܝܢܐ ܐܰܝܕܰܪܒܐ ܕܗܳܘܶܐ ܓܡܳܛܶܠܝ ܐܘ ܒܰܠܰܐ. ܒܢܝܡܝܢ ܬܳܪܶܐ 1172 ܡ̈ܠܐ.
