Benjamin Toere: ܐܘ ܬܰܠܰܢ ܕܡܝܕܷܢ / U talan d Midën

U talan d Midën

ܐܝܕ݂ܝܥܳܝܐ ܠܟܘܠ ܐܰܒܪܐ ܣܘܪܝܳܝܐ ܕܐܘ ܣܰܝܦܐ ܛܪܶܠܶܗ ܙܘܥܬ݂ܐ ܒܠܶܒܶܗ ܕܐܘ ܥܰܡܐ ܣܘܪܝܳܝܐ ܗܘܠ ܐܰܕܝܰܘܡܰܐ، ܒܷܬ݂ܷܪ ܡܶܕ ܐܘ ܣܰܝܦܐ ܫܰܦܷܥ ܐܘ ܥܰܡܐ ܣܘܪܝܳܝܐ ܐܷܫܡܐ ܒܷܐܫܡܐ ܒܕܶܠܶܗ ܕܡܰܠܬܷܡ ܕܝܣܰܐ ܪܘܚܶܗ. ܗܰܘܝ ܟܰܦܢܶܐ ܪܰܒܶܐ ܐܰܥܠܰܝـܝܶܗ ܠܐ ܚܳܙܷܢܘܰܐ ܐܷܫܡܐ ܕܠܰܚܡܐ ܠܘ ܡܘܟܠܐ. ܡܰܘܟ݂ܰܐ ܐܘܟ݂ܠܝܘܰܐ ܠܰܚܡܐ ܕܰܒ ܒܰܠܘܛܶܐ ܐܰܘ ܕܰܟ ܟܘܫܢܶܐ ܗܰܘܳܐ ܣܬܶܐ ܠܐ ܡܰܣܘܰܥܘܰܐ. ܐܝܢܰܩܠܰܐ ܕܰܐܢ ܢܷܫܢܶܐ ܡܰܛܷܢ ܠܰܚ ܚܰܡܫܝـܝܰܬ ܐܷܫܡܐ ܐܘ ܥܰܡܐ ܡܰܠܬܰܡܘܰܝܠܶܗ ܪܘܚܶܗ. ܒܰܩ ܩܷܪܝܰܘܳܬ݂ܶܐ ܐܶܠܐ ܗܶܫ ܗܳܘܶܘܰܐ ܬܰܢܗܳܒܶܐ، ܡܰܩ ܩܷܪܝܰܘܳܬ݂ܶܐ ܕܚܶܕ݂ܷܪ ܐܰܣ ܣܘܪܝܳܝܶܐ ܠܐ ܒܰܣ ܓܢܳܘܶܐ ܕܚܰܝܘܳܬ݂ܶܐ ܐܰܘ ܣܶܦܳܩܶܐ ܐܶܠܐ ܗܘܠ ܩܰܛܠܐ ܕܓܰܘܪܶܐ ܗܳܘܶܘܰܐ ܓ݂ܰܠܰܒܶܐ. ܚܳܠܐ ܚܰܢܢܐ ܐܘܢܶܫ ܟܳܡܰܚܟܶܐ ܒܠܰܠܝܐ ܐܘ ܬܰܠܰܢ ܕܰܐܬ݂ܝ ܥܰܠ ܡܝܕܷܢ ܒܝ ܫܰܬܐ ܕܰܐܠܦܐ ܫ̰ܰܥܡܐ ܬܡܳܢܶܐ ܘܚܰܡܫܝ. ܟܳܡܷܪ؛ ܡܝܕܷܢ ܓ݂ܰܠܰܒܶܐ ܩܪܝܬ݂ܐ ܒܰܣܷܡܬܳܝܐ ܡܰܢ ܐܰܪܥܳܬܶܐ ܕܟܷܬܠܰܗ ܡܰܟ ܟܰܪܡܶܐ ܘܡܰܐ ܛܘܪܳܢܶܐ ܓ݂ܰܠܰܒܶܐ ܥܰܡܷܪܬܳܝܐ. ܒܘ ܙܰܒܢܰܘܐ ܐܝ ܩܪܝܬ݂ܐ ܕܡܝܕܷܢ ܟܝܒܰܘܰܐ ܗܘܠ ܡܐ ܒܳܬܶܐ ܣܘܪܝܳܝܶܐ ܐܘ ܥܰܡܰܢܐ ܟܘܠܶܗ ܣܰܡܘܰܐ ܐܝ ܐܝܕܰܪܶܕ݂ܶܗ ܥܰܠ ܐܰܢ ܐܰܪܥܳܬ݂ܶܐ ܘܥܰܠ ܐܰܟ ܟܰܪܡܶܐ ܘܚܰܝܘܳܬ݂ܶܐ ܕܟܷܬܠܶܗ. ܒܘ ܙܰܒܢܰܘܐ ܐܰܡ ܡܐ ܒܳܬܰܢܝ ܟܷܬܘܰܠܠܶܗ ܐܰܪܒܰܥܣܰܪ ܩܰܛܥܶܐ ܕܷܥܘܳܢܶܐ ܘܕܥܶܙܶܐ، ܐܰܥܡܰܝܶܐ ܬܰܪܬܶܐ ܒܰܩܪܶܐ ܕܰܬ ܬܰܘܪܳܬ݂ܶܐ. ܟܘܠ ܒܰܩܪܐ ܙܷܬ ܡܶܐ ܡܰܐܬ݂ܶܐ ܬܰܘܪܳܬ݂ܶܐ ܟܝܒܰܘܰܐ. ܚܶܕܷ݂ܪ ܡܝܕܷܢ ܡܶܩܷܡ ܡܰܠܝܐ ܩܷܪܝܰܘܳܬ݂ܶܐ ܕܰܐ ܣܘܪܝܳܝܶܘܰܐ ܐܶܠܐ ܒܷܬ݂ܷܪ ܡܘ ܣܰܝܦܐ ܟܘܠܠܶܗ ܟ݂ܰܠܷܢܘܰܐ. ܒܷܣܠܳܩܶܗ ܕܝܰܘܡܐ ܕܡܝܕܷܢ ܟܝܬܐ ܟܰܦܫܷܢܶܐ، ܡܷܪܶܐ، ܣܰܠܰܟܘܢ، ܪܝܫܶܗ ܕܘ ܓܷܪ، ܘܰܐܓ݂ܪܝܬܶܐ. ܒܷܓ݂ܝܳܬܶܗ ܕܝܰܘܡܐ ܟܝܬܐ ܬܰܡܰܪܙܶܐ، ܥܪܳܘܷܢ، ܘܒܶܙܷܟܪܶܐ، ܘܒܝ ܟ݂ܰܣܪܰܐ ܚܪܶܬܳܐ ܟܝܬܐ ܟܰܦܣܘܪܶܐ ܐܰܕ ܕܶܪܰܐ، ܘܚܶܕܷܠܠ. ܒܘ ܫܷܟܷܠܰܢܳܐ ܚܶܕܷ݂ܪ ܡܝܕܷܢ ܡܰܠܝܐ ܥܰܡܐ ܟܘܪܕܳܝܳܝܐ ܐܰܡ ܡܷܕܗܳܝܶܐ ܟܳܦܰܝܫܝ ܒܰܝܢܶܗ ܟܘܠܠܶܗ. ܒܰܢ ܢܷܫܢܰܢܷܟ ܟܷܬܘܰܐ ܚܰܐ ܪܰܒܐ ܕܰܐ ܛܰܝܶܐ ܐܷܡܝܘܰܝܠܶܗ ܫܶܟ݂ ܣܰܝܕܰܐ ܗܳܘܶܘܰܐ ܒܣܰܪܕܰܚܠܶܐ ܐܝ ܩܪܝܬ݂ܐ. ܗܰܢܐ ܐܰܙܳܠܐ ܠܡܰܪܕܶܐ ܠܷܫܪܳܝܐ ܕܫܰܪܝܥܰܐ ܒܰܝܢ ܬܰܪܬܶܐ ܩܷܪܝܰܘܳܬ݂ܶܐ ܠܘ ܫܰܝܢܐ، ܘܟܷܬܘܰܐ ܐܰܥܡܶܗ ܥܰܡܐ ܓ݂ܰܠܰܒܶܐ. ܐܘ ܕܰܪܒܐ ܐܷܙܶܘܰܐ ܒܰܝܢ ܕܰܟ ܟܰܪܡܶܐ ܕܰܡ ܡܷܕܗܳܝܶܐ، ܗܰܢܝ ܕܚܶܕ݂ܳܪܶܗ ܡܷܪܪܶܐ ܠܘ ܫܶܟ݂ ܗܰܬ݂ܶܐ ܩܪܝܬ݂ܐ ܕܣܷܪܝܳܝܶܐ ܝܐ ܘܐܰܟ ܟܰܪܡܰܢܝ ܘܰܐܢ ܐܰܪܥܳܬ݂ܰܢܝ ܟܘܠܠܶܗ ܕܷܬ݂ܬ݂ܶܢܶܗ. ܡܰܕܥܰܪܠܶܗ ܐܘ ܫܶܟ݂ ܘܡܷܪܠܶܠܶܗ ܡܰܚܰܬܢܐ ܩܰܛܡܐ ܒܪܝܫܶܐ ܕܟܘܠܟ݂ܘ ܗܰܩܩܰܐ ܥܰܫܷܪܝܳܬ݂ܶܐ ܗܰܪܟܶܐ ܘܠܐ ܟܳܩܘܕܪܘܬܘ ܕܡܷܦܩܘܬܘܢܶܗ ܡܝ ܩܪܝܬ݂ܐ ܘܡܰܝܕܘܬܘ ܐܘ ܡܷܠܟܰܢܐ. ܒܷܬ݂ܷܖ ܒܷܟܡܐ ܝܰܘܡܶܐ ܐܝ ܒܰܩܪܐ ܕܰܐܡ ܡܷܕܗܳܝܶܐ ܐܰܙܙܰܝܐ ܒܷܬ݂ܪܶܗ ܕܰܐܟ ܟܰܪܡܶܐ ܕܟܷܡܷܢܶܐ ܐܰܙ ܙܘܪ ܫܰܥܒܰܬ ܒܰܝܢ ܠܐܰܓ݂ܪܝܬܶܐ ܘܠܰܟ ܟܰܪܡܶܐ. ܐܝ ܕܘܟܬ݂ܐ ܕܡܰܪܥܶܘܰܐ ܐܘ ܒܰܩܳܪܐ ܐܘ ܡܷܠܟ ܕܰܡ ܡܷܕܗܳܝܶܘܰܐ. ܐܰܬ݂ܷܢ ܐܰܢ ܐܰܓ݂ܪܝܬܳܝܶܐ ܓܰܒ ܐܘ ܒܰܩܳܪܐ، ܐܘ ܒܰܩܳܪܐ ܐܘ ܡܚܰܣܝܐ ܕܫܰܒܐ ܝܘܚܶܘܰܐ ܘܝܰܥܩܘܒ ܒܶܐ ܒܰܪܣܷܟܶܐ ܘܚܰܝܕܐ ܥܰܡ ܚܕ݂ܳܕܶܘܰܝܢܶܐ. ܬܰܡܐ ܗܰܘܝ ܡܷܪܠܝ ܘܡܷܪܠܘܟ݂ ܒܰܝܢ ܠܰܐ ܒܰܩܳܪܶܐ ܘܠܰܢ ܐܰܓ݂ܪܝܬܳܝܶܐ. ܘܡܚܰܠܶܗ ܠܰܐ ܒܰܩܳܪܶܐ ܘܡܰܟܝܘܷܢܢܶܐ ܓ݂ܰܠܰܒܶܐ. ܟܷܬܘܰܐ ܚܰܐ ܥܠܰܝܡܐ ܐܰܓܪܝܬܝ ܡܰܚܰܬܠܶܗ ܔܷܦܬܰܐ ܥܰܠ ܐܘ ܒܰܩܳܪܐ ܘܡܚܰܝܣܶܠܶܗ ܩܕܳܠܶܗ ܕܫܰܒܐ ܐܶܠܐ ܠܐ ܡܰܟܘܠܶܗ ܒܰܣ ܔܪܷܚܠܶܗ ܐܘ ܓܰܠܕܐ. ܗܰܘܝ ܒܷܬ݂ܷܪ ܗܰܘܰܪ ܐܰܡ ܡܷܕܗܳܝܶܐ ܟܘܠܠܶܗ ܪܰܗܝܛܝ ܓܰܒ ܐܰܒ ܒܰܩܳܪܶܐ. ܒܘ ܝܰܘܡܰܘܐ ܟܰܠܶܝܐ ܐܘ ܡܘܕܷܪ ܕܒܷܣܳܪܝܢܐ ܒܝ ܩܰܪܰܩܳܠܶܐ ܕܡܝܕܷܢ ܗܝـܝܶܐ ܘܐܘ ܔܰܘܷܫ ܕܒܷܣܳܪܝܢܐ ܐܰܥܡܶܝܐ. ܐܘ ܡܘܟ݂ܬܰܪ ܕܡܝܕܷܢ ܚܳܠܰܢ ܐܘܣܷܦ ܐܘܢܶܫ ܘܰܐ. ܐܘ ܔܰܘܷܫ ܕܒܷܣܳܪܝܢܐ ܐܷܫܡܶܐ ܡܶܗܡܶܬ ܓܳܠܓܶܠܝ ܘܰܐ ܠܐ ܪܳܚܰܡܘܰܐ ܐܰܣ ܣܘܪܝܳܝܶܐ. ܗܰܢܐ ܐܘ ܡܘܕܷܪ ܕܒܣܳܪܝܢܳܐ ܣܬܶܐ ܡܷܕܝܳܝܐ ܘܰܐ ܝܰܠܷܦܘܰܐ ܣܘܪܝܳܝܐ ܛܰܘܐ. ܐܝܢܰܩܠܰܐ ܕܫܰܡܝܥܝ ܐܘ ܗܰܘܰܪ ܗܷܢܷܟ ܣܬܶܐ ܥܰܡ ܐܘ ܡܘܟ݂ܬܰܪ ܐܰܙܙܷܢܢܶܐ ܠܘ ܗܰܘܰܪ. ܐܝܢܰܩܠܰܐ ܕܡܰܛܷܢ ܠܬܰܡܐ ܐܰܥ ܥܠܰܝܡܶܐ ܡܷܕܗܳܝܶܐ ܗܔܷܡܶܐ ܒܰܝܢ ܐܝ ܩܪܝܬ݂ܐ ܕܰܐܓ݂ܪܝܬܶܗ ܐܰܓ ܓܰܘܪܶܐ ܟܘܠܠܶܗ ܥܰܪܝܩܝ ܡܝ ܩܪܝܬ݂ܐ ܒܰܣ ܦܰܝܫܝ ܐܰܦ݁ ܦ݁ܝܪܰܬ ܘܰܐܢ ܢܰܥܝܡܶܐ. ܐܰܦ݁ ܦ݁ܝܪܰܬ ܡܣܰܥܪܝܘܰܐ ܣܘܥܪܶܐ ܝܰܩܘܪܶܐ ܠܰܡ ܡܷܕܗܳܝܶܐ ܠܷܡܫܝܚܐ ܘܠܘ ܨܠܝܒܐ. ܐܰܡ ܡܷܕܗܳܝܶܐ ܣܬܶܐ ܡܰܕܰܥܪܝܘܰܐ ܐܰܥܠܰܝܶܗ. ܐܰܢ ܢܰܩܠܰܐ ܐܘ ܡܘܕܷܪ ܟܳܫܳܡܷܥ ܐܰܣ ܣܘܥܪܶܐ ܠܐ ܟܳܒܳܣܰܡܠܶܗ ܟܳܡܷܪ ܠܘ ܡܘܟ݂ܬܰܪ؛ ܩܰܝ ܟܳܡܣܰܥܪܝ ܐܰܡ ܡܷܕܗܳܝܶܐ ܠܰܝܟܐ ܐܰܙܳܠܶܗܰܬܘ ܗܰܘܟ݂ܰܐ. ܐܘ ܡܘܟ݂ܬܰܪ ܡܷܪܠܶܗ؛ ܠܐ ܠܝ ܛܰܝܘܬ݂ܐ ܐܶܠܐ ܠܰܫ ܫܰܟ݂ܣܰܬ ܟܳܡܣܰܥܪܝ. ܐܰܡ ܡܷܕܗܳܝܶܐ ܕܰܥܝܪܝ ܠܰܐ ܒܳܬܰܬ݂ܶܗ. ܟܷܬܘܰܐ ܒܰܐܓ݂ܪܝܬܶܗ ܚܰܐ ܓܰܘܪܐ ܣܳܘܐ ܐܷܡܝܘܰܝܠܶܗ ܐܘܣܷܦܟܶܐ ܐܷܠܐ. ܐܰܢ ܢܰܓ݂ܪܝܬܳܝܶܐ ܒܷܬ݂ܷܪ ܡܘ ܝܰܘܡܰܘܐ ܐܰܙܙܷܢܶܐ ܓܰܒ ܐܘ ܡܘܕܷܪ ܕܒܷܣܳܪܝܢܐ ܘܓܰܒ ܐܘ ܔܰܘܷܫ ܘܰܐܬܷ݂ܢ ܠܷܚܕ݂ܳܕ݂ܶܐ ܡܷܪܪܶܐ؛ ܓܡܰܠܬܡܝܢܰܐ ܐܝ ܬܰܝܘܬ݂ܐ ܕܚܶܕ݂ܳܪܰܢ ܘܓܡܷܦܩܝܢܰܐ ܐܰܡ ܡܷܕܗܳܝܶܐ ܟܘܠܠܶܗ ܡܝ ܩܪܝܬ݂ܐ ܘܓܡܰܝܕܝܢܰܐ ܟܘܠ ܡܶܕܶܐ ܕܟܷܬܬܶܐ. ܐܘ ܡܘܕܷܪ ܡܷܪܠܰܠܶܗ ܐܘ ܬܰܢܗܳܒܐ ܐܰܥܠܶܟ݂ܘ ܐܝ ܟ݂ܰܣܪܰܐ ܕܝ ܕܰܘܠܰܐ ܐܰܥܠܝ. ܐܘ ܡܘܕܷܪ ܡܳܕ݂ܰܥܠܶܗ ܐܝ ܡܰܣܰܠܶܐ ܠܘ ܘܰܐܠܝ ܘܡܷܕܠܶܗ ܕܰܣܛܷܪ ܡܝܢܶܐ ܣܬܶܐ. ܗܰܢܐ ܐܘܣܷܦܶܐ ܐܶܠܐ؛ ܩܪܝܬ݂ܐ ܒܷܩܪܝܬ݂ܐ ܟܰܪܷܟ݂ ܐܰܙܙܶܝܐ ܓܰܒ ܐܰܫ ܫܶܟ݂ܰܬ ܘܪܝܫܳܢܶܐ ܕܰܐ ܥܰܫܷܪܝܳܬ݂ܶܐ ܟܘܠܠܶܗ ܘܡܰܠܬܰܡܠܶܗ ܐܝ ܛܰܝܘܬ݂ܐ ܕܚܶܕܷܪ ܡܝܕܷܢ ܟܘܠܰܐ ܠܷܚܕ݂ܳܕܶܐ݂ ܘܡܷܪܪܶܐ؛ ܓܡܳܚܝܢܰܐ ܥܰܠ ܡܝܕܷܢ ܒܘ ܝܰܘܡܐ ܕܘ ܥܶܕ݂ܐ ܪܰܒܐ ܘܰܐܬܷ݂ܢ ܠܷܚܕ݂ܳܕ݂ܶܐ. ܟܷܬܘܰܐ ܗܷܢ ܡܰܐ ܩܷܪܝܰܘܳܬ݂ܶܐ ܫܰܡܝܥܝܘܰܐ ܐܘ ܡܶܕܶܐ ܕܷܓܬܳܘܶܐ ܐܳܬܷ݂ܢܘܰܐ ܐܷܡܝܘܰܐ ܠܰܡ ܡܷܕܗܳܝܶܐ ܟ݂ܘܕ ܐܘ ܡܘܟ݂ܬܰܪ ܐܰܘ ܩܰܫܝܫܐ ܝܘܚܰܢܷܢ ܕܐܘ ܙܰܒܢܰܘܐ ܐܰܘ ܓܰܒ ܡܫܰܡܫܳܢܐ ܥܝܣܰܐ ܒܶܐ ܩܰܘܫܐ، ܗܰܢܝ ܟܷܬܘܰܠܠܶܗ ܢܳܫܶܐ ܠܰܪܘܰܠ ܒܰܩ ܩܷܪܝܰܘܳܬ݂ܶܐ ܘܫܰܡܝܥܝ ܒܘ ܗܔܳܡܐ ܕܷܓܬܳܘܶܐ. ܠܐ ܡܷܬܝܰܩܢܝܘܰܐ ܕܷܓܬܳܘܶܐ ܗܰܘܟ݂ܰܐ ܡܶܕܶܐ ܐܷܡܝܘܰܐ ܡܰܐ ܠܰܝܬ ܕܰܘܠܰܐ ܡܰܐ ܠܰܝܬ ܚܟܘܡܶܐ ܟܰܠܰܝܐ ܐܝ ܥܰܣܟܰܪܝܶܐ ܘܠܐ ܡܷܬܝܰܩܢܝܘܰܐ. ܟܷܬܘܰܐ ܚܰܐ ܪܷܥܝܐ ܐܷܡܝܘܰܝܠܶܗ ܡܰܗܡܰܬܶܐ ܔܷܒܷܠ ܗܳܘܶܘܰܐ ܩܘܡ ܐܘ ܩܰܛܥܐ ܕܘ ܡܘܟ݂ܬܰܪ. ܐܰܙܙܶܝܐ ܓܰܒ ܡܫܰܡܫܳܢܐ ܥܝܣܰܐ ܒܶܐ ܩܰܘܫܐ ܡܷܪܠܶܠܶܗ ܕܗܳܘܶܐ ܗܔܳܡܐ ܡܶܕܶܐ ܗܰܬ ܡܷܢ ܓܣܰܝܡܷܬ؟ ܓܙܷܒܛܷܬ ܐܝܕ݂ܶܐ ܕܰܐ ܓܰܢܳܘܶܐ ܐܰܢ ܓܬܳܘܷܬ ܐܰܥܡܰܢ؟ ܡܷܪܠܶܠܶܗ ܐܘ ܪܷܥܝܐ ܠܥܝܣܰܐ ܐܝܢܰܩܠܰܐ ܕܐܷܬ݂ܝܐ ܐܝ ܣܰܥܰܝܰܝܐ ܓܚܳܙܷܬ ܡܷܢ ܓܣܰܡܢܐ. ܐܰܡ ܡܷܕܗܳܝܶܐ ܒܕܰܠܘܰܠܶܗ ܕܗܷܢ ܡܷܢܢܶܗ ܡܷܬܝܰܩܢܝ ܕܷܓܬܳܘܶܐ ܗܔܳܡܐ ܡܰܘܟܰܐ݂ ܙܰܝܥܝܘܰܐ. ܐܰܬ݂ܝ ܨܰܦܪܶܐ ܕܘ ܥܶܕ݂ܐ ܐܰܡ ܡܷܕܗܳܝܶܐ ܡܟܰܡܰܠܠܶܗ ܐܝ ܨܠܘܬ݂ܐ ܕܨܰܦܪܐ ܗܶܫ ܟ݂ܰܝܦܐ ܘܢܰܦܝܩܝ ܡܰܪܦܰܠܠܶܗ ܐܰܣ ܣܰܘܰܠܰܬ݂ܶܗ ܠܘ ܛܘܪܐ. ܐܰܥ ܥܶܙܶܐ ܐܰܙܙܷܢܘܰܐ ܠܝ ܒܷܙܳܟܶܐ ܘܐܝ ܒܰܩܪܐ ܕܝܣܰܐ ܐܰܙܙܶܘܰܐ ܠܘ ܓܰܒܐ ܕܰܐܓ݂ܪܝܬܶܐ. ܘܗܰܘܝܪ ܕܡܝܕܷܢ ܙܒܝܬܳܘܰܐ ܡܶܐ ܥܰܡܐ ܓ݂ܰܠܰܒܶܐ ܕܰܐܬܷ݂ܢܘܰܐ ܠܘ ܬܰܢܗܳܒܐ. ܐܘ ܡܘܕܷܪ ܘܐܘ ܔܰܘܷܫ ܐܰܙܙܷܢܶܗ ܓܰܒ ܐܰܪ ܪܝܫܳܢܶܐ ܕܰܐ ܥܰܫܷܪܝܳܬ݂ܶܐ ܘܡܷܪܰܢܢܶܗ ܗܔܰܡ ܐܘ ܐܰܥܠܰܝܶܗ. ܐܝ ܩܪܝܬ݂ܐ ܟܘܠܰܗ ܫܰܡܝܥܐ ܕܚܶܕ݂ܳܪܰܝܶܗ ܙܒܝܬ، ܠܰܝܡܝ ܐܰܡ ܡܷܕܗܳܝܶܐ ܟܘܠܠܶܗ ܒܝ ܕܘܟܬ݂ܐ ܕܟܷܡܝܠܰܗ ܐܝ ܒܶܪܷܡܟܶܐ ܐܘ ܡܘܟ݂ܬܰܪ ܥܰܡ ܐܰܪ ܪܝܫܳܢܶܐ ܕܐܝ ܩܪܝܬ݂ܐ ܡܔܰܕܠܝܘܰܐ ܒܶܐ ܡܷܢ ܓܠܳܙܷܡ ܡܝܣܷܡ. ܗܷܢ ܡܷܢܢܶܗ ܐܷܡܝܘܰܐ ܡܰܝܕܝܢܰܐ ܐܰܔ ܔܷܦܬܰܬ ܙܰܢܐ ܐܰܚܢܰܐ ܗܷܔܡܝܢܰܐ ܐܰܥܠܰܝܶܐ ܐܰܦ݁ ܦ݁ܝܪܰܬ ܙܷܒܛܝܘܰܐ ܐܝܕ݂ܰܝܶܗ ܠܐ ܛܳܪܷܢܘܰܐ ܕܙܷܢ ܥܰܠ ܕܙܰܝܥܝܘܰܐ ܕܡܷܩܛܳܠܝ. ܐܘ ܡܘܟ݂ܬܰܪ ܐܰܙܙܶܝܐ ܓܰܒ ܐܘ ܔܰܘܷܫ ܕܡܝܕܷܢ ܡܷܪܠܶܠܶܗ ܗܰܘܝ ܗܔܳܡܐ ܥܰܠ ܐܰܚ ܚܰܝܘܳܬ݂ܶܐ ܕܐܝ ܩܪܝܬ݂ܐ ܩܰܝ ܠܐ ܟܳܣܰܝܡܘܬܘ ܡܶܕܶܐ. ܡܷܪܠܶܠܶܗ ܐܘ ܔܰܘܷܫ ܟܳܕ݂ܰܥܢܐ ܒܰܣ ܠܰܝܒܝ ܣܰܡܢܐ ܡܶܕܶܐ؛ ܐܘ ܐܰܡܪܐ ܡܶܐ ܠܰܠܥܰܠܝܐ. ܐܰܡ ܡܷܕܗܳܝܶܐ ܗܰܘܷܢ ܓܘܕܐ ܓܘܕܐ ܟܘܠ ܚܕ݂ܐ ܡܰܐ ܓܘܕܶܐ ܐܰܙܙܰܝܐ ܒܓܰܒܐ ܡܶܐ ܕܐܝ ܩܪܝܬ݂ܐ ܕܡܰܕܰܥܪܝ ܐܘ ܡܶܕܶܐ ܕܩܘܕܪܝ. ܡܩܰܦܰܠܠܶܗ ܟܡܐ ܬܰܘܪܳܬ݂ܶܐ ܕܷܦܪܝܫܝܘܰܐ ܡܝ ܒܰܩܪܐ ܘܟܡܐ ܥܶܙܶܐ ܗܰܘܟ݂ܰܐ ܐܶܠܐ ܡܒܰܠܶܘܰܐ ܟܘܠ ܡܶܕܶܐ. ܒܘ ܛܘܪܐ ܩܰܝܣܝܘܰܐ ܐܘ ܥܰܡܪܐ ܕܰܐ ܥܘܳܢܶܐ ܥܰܠ ܕܷܐܡܡܝܘܰܐ ܕܢܳܫܶܐ ܕܡܰܕܥܷܪ ܐܰܥ ܥܘܳܢܶܐ ܣܬܶܐ ܐܘ ܥܰܡܪܐ ܕܦܳܝܰܫܠܰܢܝܐ. ܐܰܓ ܓܰܢܳܘܶܐ ܡܔܰܪܒܝܘܰܐ ܕܓܘܢܘܝ ܡܶܐ ܚܕ݂ܳܕ݂ܶܐ. ܢܘܚܪܝܘܰܐ ܐܰܢ ܢܰܪܘܳܢܶܐ ܘܰܐ ܥܶܙܶܐ ܗܶܫ ܒܘ ܛܘܪܐ. ܐܘܣܷܦ ܐܘ ܡܘܟ݂ܬܰܪ ܟܷܬܘܰܝܠܶܐ ܣܘܣܬܐ ܛܰܘܬܐ ܩܪܶܠܶܐ ܠܘ ܪܷܥܝܐ ܡܰܗܡܰܬܶܗ ܔܷܒܷܠ ܡܷܪܠܶܠܶܗ ܡܷܕ ܐܝ ܣܘܣܬܐ ܙܘܟ݂ ܠܗܰܙܰܟ݂ ܡܛܰܝ ܠܘ ܝܘܙܒܰܫܝ ܒܶܐ ܠܐ ܟܳܬ݂ܶܐ ܠܘ ܥܶܘܳܢܐ. ܟܷܬܘܰܐ ܚܶܕ݂ܷܪ ܐܝ ܩܪܝܬ݂ܐ ܗܷܢ ܬܰܠܝܶܐ ܟܳܠܷܢܘܰܐ ܕܳܐܬ݂ܶܐ ܐܘ ܡܘܟ݂ܬܰܪ ܥܰܠ ܕܐܷܕ݂ܥܝܘܰܐ ܐܝ ܣܘܣܬܷܕ݂ܶܐ ܐܷܒܥܝܘܰܐ ܕܩܘܛܠܝܠܶܗ. ܐܝܢܰܩܠܰܐ ܕܷܚܙܰܠܶܗ ܠܰܬܝܐ ܗܝܶܐ ܐܶܠܐ ܚܰܐ ܛܰܝܳܝܐ ܠܐ ܣܷܡܡܶܗ ܡܶܕܶܐ ܛܪܰܠܶܗ ܕܫܳܦܷܥ. ܒܘ ܙܰܒܢܰܘܐ ܐܘ ܒܰܠܰܕܝܰܐ ܒܰܫܩܰܢܝ ܚܰܢܐ ܣܰܠܘܰܐ ܗܝـܝܶܐ ܘܡܰܗܡܰܬܶܗ ܔܷܒܷܠ ܐܰܙܙܷܢܶܐ ܓܰܒ ܐܘ ܝܘܙܒܰܫܝ. ܒܷܬ݂ܷܪ ܒܫܳܥܬ݂ܐ ܐܘ ܝܘܙܒܰܫܝ ܐܰܥܡܶܗ ܙܷܬ ܡܶܐ ܡܐ ܥܰܣܟܰܪ ܐܰܬܷ݂ܢ ܠܡܝܕܷܢ. ܐܘ ܥܰܣܟܰܪ ܘܐܰܡ ܡܷܕܗܳܝܶܐ ܒܕܰܠܠܶܗ ܩܪܝܬ݂ܐ ܒܩܪܝܬ݂ܐ ܒܰܝܬܐ ܒܒܰܝܬܐ ܕܟܘܪܟ݂ܝ ܥܰܠ ܐܘ ܣܰܘܰܠ ܐܘ ܡܶܕܶܐ ܕܷܚܙܰܠܠܶܗ ܡܰܕܥܰܪܪܶܗ ܐܶܠܐ ܐܰܙܙܶܘܰܐ ܓ݂ܰܠܰܒܶܐ ܡܝܢܶܗ ܠܐ ܚܙܰܢܶܗ. ܐܰܬܷ݂ܢ ܐܘ ܡܘܕܷܪ ܕܒܷܣܳܪܝܢܐ ܘܐܘ ܔܰܘܷܫ ܕܒܷܣܳܪܝܢܐ ܠܡܝܕܷܢ ܐܰܙܙܷܢܶܗ ܐܘ ܡܘܟ݂ܬܰܪ ܘܰܐܢ ܥܰܙܰܘܰܬ ܟܘܠܠܶܗ ܠܝ ܩܰܪܰܩܳܠܶܐ. ܝܰܬܝܘܶܘܰܝܢܶܗ ܬܰܡܐ ܐܘ ܡܘܕܷܪ ܟܳܡܷܪ ܠܘ ܡܘܟ݂ܬܰܪ؛ ܘܰܐ ܐܘܣܷܦ ܐܝ ܛܰܝܘܬ݂ܐ ܟܘܠܰܐ ܗܰܘܝܐ ܚܕ݂ܐ ܐܰܥܠܶܟ݂ܘ ܘܣܷܡܡܶܗ ܐܘ ܬܰܢܗܳܒܰܢܐ ܘܠܰܝܒܰܢ ܐܰܚܢܰܐ ܣܰܝܡܝܢܰܐ ܡܶܕܶܐ. ܐܘ ܡܘܟ݂ܬܰܪ ܩܰܝܷܡ ܡܷܪܠܶܠܶܗ؛ ܟܳܕ݂ܰܥܢܐ ܕܗܰܬ ܒܐܝܕ݂ܶܐ ܕܪܘܚܘܟ݂ ܡܰܣܠܰܡܠܘܟ݂ ܐܘ ܡܶܕܰܢܐ ܠܰܐ ܓܰܢܳܘܶܐ، ܗܰܘܟ݂ܰܐ ܡܔܰܕܰܠܠܶܗ ܬܰܡܐ. ܩܰܝܷܡ ܒܕܶܠܶܗ ܕܡܳܚܶܐ ܠܘ ܡܘܕܷܪ ܘܐܰܢ ܥܰܙܰܘܰܬ ܣܬܶܐ ܡܥܰܘܰܢܢܶܗ ܐܘ ܡܘܟ݂ܬܰܪ. ܐܝܢܰܩܠܰܐ ܕܷܚܙܶܠܶܗ ܐܘ ܡܶܕܶܐ ܕܗܰܘܝ ܐܘ ܔܰܘܷܫ ܙܰܝܷܥ ܕܳܐܬܷ݂ܢ ܐܶܠܶܐ ܣܬܶܐ ܐܰܙܙܶܝܐ ܥܰܒܷܪ ܠܝ ܩܶܠܰܝܬܶܕ݂ܶܗ ܘܣܟܷ݂ܪܠܶܗ ܐܘ ܬܰܪܥܐ. ܒܷܬܷܪ ܡܶܕ ܢܰܦܝܩܝ ܡܶܐ ܬܰܡܐ ܐܰܕ݂ܝܥܝ ܕܐܘ ܡܘܕܷܪ ܟܷܙܶܝܐ ܓܰܒ ܐܘ ܩܰܝܡܰܩܰܡ ܠܡܷܕ݂ܝܰܕ݂ ܕܡܰܫܟܶܐ ܐܰܥܠܰܝܶܗ. ܐܰܙܙܶܝܐ ܐܘ ܡܘܟ݂ܬܰܪ ܡܶܩܷܡ ܡܘ ܡܘܕܷܪ ܥܰܠ ܐܘ ܕܰܪܒܐ ܡܰܟܠܶܠܶܗ ܐܝ ܥܰܪܒܰܐ ܩܰܡܰܝܬܐ ܘܰܐܙܙܶܝܐ ܓܰܒ ܐܘ ܩܰܝܡܰܩܰܡ ܘܡܷܪܠܶܠܶܗ ܐܝ ܡܰܣܰܠܶܐ ܟܘܠܰܗ ܘܗܘܠܶܠܶܗ ܐܷܫܡܐ ܕܒܰܪܛܷܠ ܕܠܐ ܙܳܒܷܛ ܐܝܕ݂ܶܐ ܕܐܘ ܡܘܕܷܪ. ܒܷܬܷ݂ܪ ܠܐ ܒܓ݂ܰܠܰܒܶܐ ܐܘ ܡܘܕܷܪ ܐܰܙܙܶܝܐ ܓܰܒ ܐܘ ܩܰܝܡܰܩܰܡ. ܡܷܪܠܶܠܶܗ ܐܘ ܩܰܝܡܰܩܰܡ؛ ܠܰܬܝܐ ܫܰܦܝܪܐ ܐܘ ܡܶܕܶܐ ܕܗܰܘܝ ܓܠܳܙܰܡ ܡܝܣܷܡ ܫܰܝܢܐ ܠܐ ܡܰܬ݂ܢܰܚܠܶܗ ܠܶܒܶܗ ܕܐܘ ܡܘܕܷܪ ܔܷܙܰܐ ܡܶܕܶܐ ܠܘܠܶܗ ܠܰܡ ܡܷܕܗܳܝܶܐ. ܩܰܝܷܡ ܐܘ ܡܘܟ݂ܬܰܪ ܡܷܕܠܶܗ ܚܰܐ ܛܰܝܐ ܐܝܕ݂ܝܥܐ ܥܰܡ ܪܘܚܶܐ ܐܰܙܙܶܝܐ ܠܥܰܢܩܰܪܰܐ ܕܡܰܫܟܶܐ ܥܰܠ ܐܘ ܡܶܕܶܐ ܕܗܰܘܝ، ܡܫܰܝܶܠܶܗ ܥܰܠ ܐܝܣܡܶܬ ܐܝܢܳܐܢܘ ܐܶܠܐ ܠܐ ܝܰܬܷܘ ܐܰܥܡܰܝܶܐ، ܡܰܩܰܒܠܝܠܶܗ ܐܘ ܘܰܙܝܪܐ ܓܰܘܳܝܐ ܕܟܳܚܳܝܷܪ ܥܰܠ ܐܰܡ ܡܶܕܳܢܶܐ ܓܰܘܳܝܶܐ ܕܬܘܪܟܰܝܐ. ܇ܐܘ ܒܰܩܰܢ ܡܷܪܠܶܠܶܗ ܙܳܟ݂ܘ ܕܥܰܪܘ ܠܰܐ ܒܳܬܰܬ݂ܟ݂ܘ ܐܳܢܐ ܓܷܡܫܰܝܰܠܢܐ ܥܰܠ ܐܘ ܡܰܣܰܠܰܬ݂ܶܐ. ܩܰܝܷܡ ܕܰܥܝܪܝ ܠܡܝܕܷܢ. ܒܷܬ݂ܷܪ ܠܐ ܒܓ݂ܰܠܰܒܶܐ ܐܰܬ݂ܝ ܘܰܪܩܐ ܠܘ ܘܰܐܠܝ ܡܫܰܝܰܠܶܗ ܥܰܠ ܐܝ ܨܒܘܬ݂ܐ. ܐܘ ܘܰܠܝ ܐܝܢܰܩܠܰܐ ܕܷܚܙܶܠܶܗ ܕܐܝ ܡܰܣܰܠܶܗ ܝܰܪܝܘܐ ܙܰܝܷܥ، ܡܫܰܕܰܪܠܶܗ ܟ݂ܰܒܪܐ ܠܘ ܡܘܟ݂ܬܰܪ ܡܷܪܠܶܗ؛ ܓܕܳܬ݂ܶܢܐ ܠܡܝܕܷܢ ܓܰܒܶܟ݂ܘ ܚܳܙܝܢܰܐ ܡܷܢܝܐ ܐܝ ܡܰܣܰܠܶܐ ܡܷܢ ܟܷܒܥܷܬܷܢܟ݂ܘ. ܒܘ ܝܰܘܡܐ ܕܷܓܕܳܬ݂ܶܐ ܐܘ ܘܰܠܝ ܐܰܡ ܡܷܕܗܳܝܶܐ ܡܰܠܬܰܡܡܶܐ ܐܰܨ ܨܰܦܘܪܶܐ ܕܦܰܝܷܫܶܗ ܘܰܐ ܐܶܡܪܶܐ ܐܰܢ ܢܝܪܶܐ ܕܘ ܕܘܪܐ ܐܰܙܙܷܢܢܶܐ ܥܰܠ ܦܶܡܶܗ ܕܘ ܕܰܪܒܐ ܕܡܝܕܷܢ ܕܷܡܡܝ ܚܙܰܝ ܡܒܰܠܠܶܗ ܐܰܥ ܥܶܙܶܐ؛ ܐܰܨ ܨܰܦܘܪܶܐ ܦܰܝܫܝ ܗܰܘܟ݂ܰܐ. ܡܒܰܠܠܶܗ ܐܰܥ ܥܘܳܢܶܐ؛ ܐܰܢ ܐܶܡܪܶܐ ܦܰܝܫܝ ܗܰܘܟ݂ܰܐ. ܘܡܒܰܠܠܶܗ ܐܰܬ ܬܰܘܪܶܐ؛ ܐܰܢ ܢܝܪܶܐ ܦܰܝܫܝ. ܐܝܢܰܩܠܰܐ ܕܰܐܬ݂ܝ ܐܘ ܘܰܠܝ ܐܘ ܡܘܟ݂ܬܰܪ ܡܚܰܕܰܪܘܰܝܠܶܗ ܕܝܠܰܟܔܰܐ ܕܟܳܡܰܚܟܐ ܐܝ ܨܒܘܬ݂ܐ. ܚܙܶܠܶܗ ܐܘ ܩܰܪܰܒܰܠܷܟ݂ ܕܗܰܘܝ ܬܰܡܐ ܐܘ ܘܰܠܝ ܡܫܰܝܶܠܗ ܡܷܢܝܐ ܗܰܬ݂ܶܐ ܘܠܡܷܢ ܡܰܝܬܰܠܟ݂ܘ ܐܰܡ ܡܶܕܳܢܰܢܝ ܠܰܪܟܶܐ؟ ܐܰܡ ܡܷܕܗܳܝܶܐ ܡܷܪܪܶܗ ܡܒܰܠܠܶܗ ܟܘܠ ܡܶܕܶܐ ܕܟܷܬܠܰܢ ܗܰܢܝ ܬܰܢܶܐ ܦܰܝܫܝ. ܐܘ ܡܘܟ݂ܬܰܪ ܗܘܠܶܗ ܐܝ ܕܝܠܰܟܔܰܐ ܠܘ ܘܰܠܝ، ܚܷܪܠܶܗ ܐܶܒܰܐ ܘܡܚܰܠܩܳܠܶܗ ܥܰܠ ܐܝ ܐܰܪܥܐ ܡܷܪܠܶܗ ܠܰܡ ܡܷܕܗܳܝܶܐ؛ ܡܰܐ ܗܰܬܘ ܠܰܬܟ݂ܘ ܚܛܝܬ݂ܐ ܗܰܘܟ݂ܰܐ ܟܳܣܰܝܡܬܘ؟ ܐܘ ܡܘܟ݂ܬܰܪ ܟܷܦܠܶܗ ܥܰܠ ܐܝ ܕܝܠܰܟܔܰܐ ܘܡܝܕܳܠܶܗ ܡܰܥܠܝ ܐܰܪܥܐ ܘܡܷܪܠܶܗ ܠܘ ܘܰܠܝ؛ ܡܰܐ ܔܓ݂ܰܝܪ ܡܝܢܘܟ݂ ܚܟܘܡܰܬ ܠܰܝܬ ܟܷܙܰܢܐ ܓܰܒ ܚܪܶܢܶܐ ܕܷܡܫܰܝܠܝܢܰܐ ܥܰܠ ܐܘ ܚܰܩܶܕ݂ܰܢ. ܪܰܘܷܟ݂ ܐܘ ܘܰܐܠܝ ܒܩܰܚܷܪ ܒܝ ܥܰܪܰܒܰܐ ܘܰܐܙܙܶܝܐ ܦܰܝܷܬ ܠܗܰܙܰܟ݂. ܐܰܡ ܡܷܕܗܳܝܶܐ ܡܰܫܟܰܠܠܶܗ ܒܕܷܟܳܬ݂ܶܐ ܓ݂ܰܠܰܒܶܐ ܥܰܠ ܐܘ ܡܶܕܶܐ ܕܗܰܘܝ ܛܪܰܠܶܗ ܕܡܝܡܳܕܝ ܐܘ ܡܘܕܷܪ ܘܐܘ ܔܰܘܷܫ ܕܒܷܣܳܪܝܢܐ ܠܕܷܟܳܬ݂ܶܐ ܚܪܶܢܶܐ ܘܡܰܙܒܰܛܛܶܐ ܙܷܬ ܡܶܐ ܥܷܣܪܝ ܪܝܫܳܢܶܐ ܕܰܩ ܩܷܪܝܰܘܳܬ݂ܶܐ ܘܡܰܚܬܷܢܢܶܗ ܒܘ ܚܰܦܷ݁ܣ. ܐܰܡ ܡܷܕܗܳܝܶܐ ܐܷܫܡܐ ܠܶܒܰܝܶܐ ܬ݂ܢܷܚܘܰܐ ܐܝܢܰܩܠܰܐ ܕܗܰܢܷܟ ܙܒܝܛܝ. ܩܰܝܷܡ ܐܘ ܥܰܡܐ ܐܰܙܙܶܝܐ ܓܰܒ ܐܘ ܫܶܟ݂ ܣܰܝܕܰܐ ܡܷܪܰܠܠܶܗ ܙܘܟ݂ ܓܰܒ ܐܘ ܘܰܠܝ ܡܰܪܠܶܗ ܩܰܝ ܗܰܘܟ݂ܰܐ ܣܷܡܠܶܗ. ܘܐܘ ܥܰܡܐ ܒܕܶܘܰܝܠܶܐ ܕܙܳܝܷܥ ܕܗܷܢܷܟ ܣܬܶܐ ܕܡܷܙܒܳܛܝ. ܩܰܝܷܡ ܐܰܙܙܶܝܐ ܫܶܟ݂ ܣܰܝܕܰܐ ܓܰܒ ܐܘ ܘܰܠܝ ܡܷܪܠܶܠܶܗ ܩܫܷܥܠܘܟ݂ ܐܝ ܛܰܝܘܬ݂ܐ ܩܰܝ ܗܰܘܟ݂ܰܐ ܣܷܡܠܘܟ݂؟ ܐܘ ܘܰܐܠܝ ܡܷܪܠܶܠܶܗ ܠܐ ܙܰܝܥܷܬ ܠܐ ܙܰܒܢܐ ܝܰܪܝܟ݂ܐ ܓܛܳܪܶܢܰܢܶܗ ܠܰܘܓܷ݂ܠ. ܐܳܬܷ݂ܢܘܰܐ ܡܰܐ ܩܷܪܝܰܘܬ݂ܐ ܕܚܶܕ݂ܳܪܰܢ ܓܰܒ ܐ݂ܰܡ ܡܷܕܗܳܝܶܐ ܐܷܡܡܝܘܰܐ ܬܳܟ݂ܘ ܐܳܬ݂ܝܢܰܐ ܠܷܚܕܳܕܶܐ ܐܘ ܡܶܕܶܐ ܕܣܷܡܠܰܢ ܦܰܘܕܳܘܰܐ. ܐܷܫܡܐ ܒܷܫܡܐ ܐܰܡ ܡܷܕܗܳܝܶܐ ܒܕܰܠܘܰܠܶܗ ܕܛܳܥܷܢ ܐܘܐ ܡܶܕܶܐ ܕܗܰܘܝ. ܒܷܬ݂ܷܪ ܒܫܰܬܐ ܘܦܷܠܓܶܐ ܡܰܪܦܰܠܠܶܗ ܐܰܙ ܙܒܝܬܳܝܶܐ ܟܘܠܠܶܗ ܘܒܘ ܝܰܘܡܶܕ݂ܰܐ ܐܰܬܷ݂ܢ ܒܘ ܩܰܡܝܳܢ ܡܩܰܒܷܠ ܕܡܝܕܷܢ ܘܡܚܰܠܠܶܗ ܔܷܦܬܰܬ ܓ݂ܰܠܰܒܶܐ ܒܝ ܗܰܘܰܐ ܕܕܷܡܡܝ ܠܰܡ ܡܷܕܗܳܝܶܐ ܟܰܠܰܢܐ ܗܰܪܟܶܢܰܐ. ܒܷܬ݂ܷܪ ܡܘ ܙܰܒܢܰܘܐ ܠܰܘܝ ܗܰܘܟ݂ܰܐ ܬܰܠܰܢ ܪܰܒܐ ܐܶܠܐ ܡܕܰܘܡܝܘܰܐ ܒܰܐ ܓܢܳܘܶܐ ܕܰܡ ܡܶܕܳܢܶܐ. ܗܘܠ ܕܐܷܫܡܐ ܒܷܫܡܐ ܐܘ ܥܰܡܐ ܣܰܘܷܥ. ܐܰܕܝܳܡܰܐ ܐܘ ܣܰܘܰܠ ܕܰܡ ܡܷܕܗܳܝܶܐ ܕܡܝܣܰܟܷܪ ܐܰܘ ܕܙܶܝܐ ܒܦܰܘܕܐ ܒܰܝܢ ܩܰܛܥܐ ܕܩܷܪܝܰܘܳܬ݂ܶܐ ܡܷܕܕܷܬ݂ܶܐ ܗܷܢܷܟ ܟܳܒܷܢ ܟ݂ܰܒܪܐ ܠܰܡ ܡܷܕܗܳܝܶܐ ܟܷܡܡܝ ܬܳܟ݂ܘ ܟܰܠܷܢܶܐ ܡܘܕܘܢܶܐ. ܒܢܝܡܝܢ ܬܪܐ 1540 ܡ̈ܠܐ.