Benjamin Toere: ܒܥܰܝܢܶܗ ܕܘ ܥܠܰܝܡܐ ܛܘܪܥܰܒܕܝܢܝܐ ܐܰܘܪܘܦܰ݁ܐ / B cayne du claymo Ṭurcabdinoyo Awrupa
B cayne du claymo Ṭurcabdinoyo Awrupa
ܐܳܢܐ ܥܠܰܝܡܐ ܣܘܪܝܳܝܐ ܕܗܰܘܝܢܐ ܒܛܘܪܥܰܒܕܝܢ ܒܡܝܕܷܢ ܐܝ ܩܪܝܬ݂ܐ ܕܟܷܬܝܐ ܚܕ݂ܐ ܡܰܩ ܩܷܪܝܰܘܳܬ݂ܶܐ ܪܰܒܶܐ ܕܰܐܕܝܰܘܡܰܐ ܒܛܘܪܥܰܒܕܝܢ. ܡܠܝܬ݂ܐ ܣܘܪܝܳܝܶܐ ܘܟܳܡܝܬܰܔܓܷ݂ܠ ܐܶܒܰܗ ܠܝܫܳܢܐ ܣܘܪܝܳܝܐ. ܟܳܡܷܬܝܰܩܰܢܢܐ ܓ݂ܰܠܰܒܶܐ ܢܳܫܶܐ ܟܳܚܰܝܪܝ ܒܘ ܡܶܕܰܢܐ ܟ݂ܘܕ ܟܷܬܝܐ ܡܶܕܶܐ ܓ݂ܰܠܰܒܶܐ ܪܰܒܐ. ܟܘܠ ܢܰܩܠܰܐ ܕܟܳܬ݂ܶܐ ܥܰܡܐ ܡܰܕ ܕܰܘܠܰܬ ܕܰܐܘܪܘܦܰ݁ܐ ܠܘ ܟܪܳܟ݂ܐ ܠܝ ܩܪܝܬ݂ܐ ܟܷܡܝ ܠܰܢ؛ ܐܰܢ ܢܳܫܶܐ ܕܦܰܝـܝܫܝ ܒܛܘܪܥܰܒܕܝܢ ܗܰܬܘ ܡܟܰܝܰܦܟ݂ܘ ܗܰܪܟܶܐ. ܐܰܩ ܩܷܪܝܰܘܳܬ݂ܶܐ ܒܰܣܷܡ ܡܰܐܘܪܘܦܰ݁ܐ ܢܶܐ ܟ݂ܘܙܝ ܐܰܚܢܰܐ ܣܬܶܐ ܠܳܐ ܐܷܙܰܘܰܝܢܰܐ. ܒܷܬ݂ܷܪ ܡܶܐ ܥܷܣܪܝ ܐܷܫܢܶܐ ܕܦܰܝܷܫܢܳܐ ܒܛܘܪܥܰܒܕܝܢ ܚܳܬ݂ܝ ܕܟܷܬܝܐ ܒܰܐܠܡܰܢܝܰܐ ܡܷܪܠܰܠܝ؛ ܟܷܒܥܳܢܐ ܣܰܝܡܰܠܘܟ݂ ܘܝܙܰܐ ܕܳܐܬܷ݂ܬ ܙܝܰܪܰܐ ܓܰܒܝ ܕܚܳܙܷܬ ܐܰܕ ܕܷܟܳܬ݂ܰܢܝ. ܒܷܬ݂ܷܪ ܡܶܕ ܡܪܰܔܰܥܠܰܢ ܠܝ ܘܝܙܰܐ ܩܰܝܷܬ݂ܠܝ ܬܪܶܐ ܝܰܪܚܶܐ ܕܷܐܙܙܝܢܐ ܠܰܐܘܪܘܦܰ݁ܐ. ܐܰܢܰܩܠܰܐ ܟܳܒܰܥܢܐ ܒܥܰܝܢܶܐ ܕܷܥܠܰܝܡܐ ܕܗܰܘܝ ܘܕܝܰܪܷܘ ܒܛܘܪܥܰܒܕܝܢ ܡܰܚܟܶܢܐ ܐܝ ܚܙܰܝܬܰܝܕ݂ܝ ܥܰܠ ܐܘ ܥܰܡܰܝܕ݂ܰܢ ܕܟܷܬܝܐ ܒܰܐܘܪܘܦܰ݁ܐ. ܐܰܪܒܰܥܣܰܪ ܒܷܫܘܷܛ ܝܰܘܡܶܐ ܕܫܰܒܬ݂ܐ ܐܝܢܰܩܠܰܐ ܕܥܰܣܷܪܝܶܐ ܢܰܚܷܬܢܐ ܠܘ ܗܰܘܰܐ ܐܰܠܰܢܝ ܕܷܐܫܬܘܕܓܰܪܬ ܐܰܬ݂ܝ ܐܘ ܚܰܬ݂ܢܶܕ݂ܢ ܐܰܥܡܶܗ ܚܳܬ݂ܝ ܕܡܰܝܕܝܠܝ ܕܦܰܝܬܝܢܰܐ ܠܘ ܒܰܝܬܐ ܕܟܷܬܝܐ ܒܓܳܦ݁ܝܢܓܶܢ. ܒܘ ܕܰܪܒܐ ܐܝܢܰܩܠܰܐ ܕܗܰܘܟ݂ܰܐ ܐܷܫܡܐ ܔܓ݂ܝܠܝܢܰܐ ܣܰܡܘܰܝܢܐ ܕܷܩܩܰܐ ܥܰܠ ܐܝ ܢܰܕ݂ܰܦܰܐ ܕܚܶܕܷ݂ܪ ܐܰܕ ܕܰܪܒܳܢܶܐ ܥܰܠ ܕܚܰܐ ܙܷܒܠܐ ܠܐ ܚܳܙܶܘܰܝܢܐ. ܐܘ ܡܶܕܶܐ ܩܰܡܳܝܐ ܕܷܓܪܷܫܠܶܗ ܐܝ ܕܷܩܶܕ݂ܝ ܗܰܢܳܘܰܐ . ܒܘ ܕܰܪܒܐ ܦܰܝـܝܬܝܢܰܐ ܒܕܘܟܬ݂ܐ ܟܷܡܡܝܠܰܐ ܦܰܢܕܰܘ ܐܘ ܚܰܬ݂ܢܶܕ݂ܰܢ ܡܷܪܠܶܠܝ؛ ܗܰܪܟܶܐ ܟܷܡܡܝܠܶܗ ܝܰܗܪܷܢܕܰܘ ܥܰܠ ܕܟܝܬܐ ܓ݂ܰܠܰܒܶܐ ܝܰܗܪܷܢܟܳܝܶܐ ܡܷܕܗܳܝܶܐ ܗܰܪܟܶܐ. ܒܷܬ݂ܷܪ ܡܶܕ ܡܰܛܝܢܰܐ ܠܘ ܒܰܝܬܐ ܡܰܚܫܰܡܠܰܢ ܘܣܷܡܠܰܢ ܔܷܒ݁ܰܬܶܐ ܥܰܠ ܛܘܪܥܰܒܕܝܢ ܥܰܠ ܐܝ ܩܪܝܬ݂ܐ ܘܥܰܠ ܐܘ ܥܰܡܶܕ݂ܰܢ. ܨܰܦܪܰܝܬܐ ܐܝ ܫܷܥܬ݂ܐ ܒܰܐ ܫܰܥ ܟܷܬܘܰܐ ܥܝܬܐ ܘܩܘܪܒܐ ܐܰܠܳܗܳܝܐ ܩܰܝܡܝܢܰܐ ܕܙܰܢܐ ܠܝ ܥܝܬܐ. ܐܝ ܥܝܬܐ ܕܡܪܝ ܝܰܥܩܘܒ ܕܰܣܪܘܓ ܐܰܣ ܣܘܪܝܳܝܶܐ ܕܓܳܦ݁ܝܢܓܶܢ ܚܰܬ݂ܳܐ ܙܘܝܢܰܠܠܶܗ ܡܝ ܥܝܬܐ ܦ݁ܪܳܬܶܣܬܰܢܳܝܬܐ ܟܷܡܟܰܗܷܢ ܐܶܒܰܐ ܐܰܒܘܢ ܟ݂ܘܪܳܝܐ ܡܰܠܟܶܐ ܬܶܒܶܪ ܐܘ ܐܰܒܪܐ ܕܟ݂ܘܪܝ ܚܰܢܢܰܐ ܬܰܒܰܪ ܐܘ ܡܚܰܣܝܐ. ܐܝ ܔܰܡܰܥܰܐ ܕܝ ܥܝܬܰܬ݂ܶܗ ܐܰܓ݂ܠܰܒܰܐ ܡܰܐ ܡܷܕܗܳܝܶܐ ܝܐ ܘܟܝܬܐ ܐܷܫܡܐ ܕܟܰܦܪܳܝܶܐ ܘܰܐܥܡܰܝܶܗ ܥܰܡܐ ܡܰܐ ܩܷܪܝܰܘܳܬ݂ܶܐ ܕܟܷܬܢܶܗ ܡܝ ܟ݂ܰܣܪܰܐ ܕܷܓܙܝܪܐ. ܐܝܢܰܩܠܰܐ ܕܥܰܒܝܪܢܰܐ ܠܝ ܥܝܬܐ ܟܷܬܘܰܐ ܐܷܫܡܐ ܕܥܰܡܐ ܘܟܡܐ ܫܰܡܳܫܶܐ ܐܳܢܐ ܣܬܶܐ ܒܪܘܚܝ ܟܳܡܷܬܦܰܟܰܪܢܐ ܟܰܠܰܐ ܐܝ ܥܝܬܐ ܟ݂ܠܝܬ݂ܐ ܠܡܷܢ ܟܷܬܘܰܐ ܣܢܝܩܘܬ݂ܐ ܕܡܷܙܘܳܢܐ ܐܝ ܥܝܬܐ. ܨܠܘܬ݂ܐ ܠܐ ܝܰܪܷܟ݂ܬܐ ܕܟܳܡܝܨܰܠܝܐ ܒܝ ܦܰܢܩܝܬ݂ܐ ܡܟܰܡܠܳܠܰܢ ܐܶܕܝ ܡܫܰܪܶܠܶܗ ܐܘ ܩܘܪܳܒܐ ܐܰܠܳܗܳܝܐ ܟܘܠ ܕܷܡܩܰܕܰܡܠܰܐ ܐܝ ܥܝܬܐ ܠܷܬܝܳܡܐ ܐܘ ܥܰܡܐ ܙܷܬ ܐܳܬ݂ܶܘܰܐ ܐܝܢܰܩܠܰܐ ܕܰܐܬ݂ܝ ܐܘ ܙܰܒܢܐ ܕܐܘ ܟܳܗܢܐ ܕܡܰܥܠܶܗ ܐܘ ܦܰܓ݂ܪܐ ܘܐܘ ܐܰܕܡܐ ܕܷܡܫܝܚܐ ܡܰܒܪܰܡܠܝ ܪܘܚܝ ܕܚܳܝܰܪܢܐ ܒܝ ܥܝܬܐ ܚܙܶܠܝ ܕܟܰܠܰܝܐ ܡܠܝܬ݂ܐ ܒܰܫܪܪܐ ܦܨܷܚܢܐ ܓ݂ܰܠܰܒܶܐ ܕܷܚܙܶܠܝ ܥܰܡܐ ܣܘܪܝܳܝܐ ܗܰܘܟ݂ܰܐ ܓ݂ܰܠܰܒܶܐ ܥܰܡ ܚܕ݂ܳܕ݂ܶܐ. ܒܷܬ݂ܷܪ ܡܝ ܥܝܬܐ ܐܷܫܡܐ ܔܷܓ݂ܝܠܝܢܰܐ ܥܰܡ ܐܘ ܩܰܫܐ ܓ݂ܰܠܰܒܶܐ ܦܨܝܚ ܥܰܠ ܕܔܝܪܰܢܶܗ ܡܝ ܩܪܝܬ݂ܳܘܰܝܢܰܐ. ܒܘ ܬܰܪܥܐ ܕܐܝ ܥܝܬܐ ܐܘ ܥܰܡܐ ܣܰܡܘܰܐ ܔܷܒ݁ܰܬܶܐ ܐܘ ܚܰܐ ܕܳܐܕ݂ܰܥܘܰܝܠܝ ܡܶܐ ܛܘܪܥܰܒܕܝܢ ܐܳܬ݂ܶܘܰܐ ܐܳܡܰܪܘܰܐ ܒܫܰܝܢܐ ܐܰܬܷ݂ܬ. ܡܫܰܝܠܝܘܰܐ ܐܶܠܝ ܐܰܝܕܰܪܒܳܝܐ ܘܡܷܢܝܐ ܐܘ ܕܘܪܡ ܒܛܘܪܥܰܒܕܝܢ. ܐܘ ܐܰܗܷܠ ܕܟܷܬܘܰܝܠܝ ܬܰܡܐ ܐܳܬܷ݂ܢܘܰܐ ܓܰܒܝ ܟܷܬܘܰܐ ܓ݂ܰܠܰܒܶܐ ܢܳܫܶܐ ܕܩܘܪܘܝܘܰܝܠܝ ܒܰܣ ܐܳܢܐ ܠܳܐ ܐܳܕ݂ܰܥܘܰܝܢܰܢܶܗ ܥܰܠ ܕܗܰܢܝ ܙܰܒܢܐ ܝܰܪܝܟ݂ܐ ܠܰܬ݂ܷܢ ܠܛܘܪܥܰܒܕܝܢ. ܐܰܙܙܰܢܐ ܠܝ ܩܪܳܬܷܢ ܒܷܬ݂ܷܪܟܶܐ ܟ݂ܘܕ ܟܷܬܝܐ ܥܰܕܶܐ ܐܰܙܙܰܢܐ ܓܰܒ ܐܘ ܐܰܗܷܠ ܠܘ ܫܬܳܝܐ ܕܐܝ ܩܰܚܘܰܐ. ܐܰܢ ܢܳܫܶܐ ܟܘܠܠܶܗ ܠܰܝܡܝܘܰܐ ܠܝ ܔܷܒ݁ܰܬܶܐ ܐܷܒܥܝܘܰܐ ܡܝܢܝ ܕܡܰܚܟܶܢܰܢܶܗ ܐܰܚ ܚܰܝܶܐ ܕܛܘܪܥܰܒܕܝܢ، ܘܐܰܚ ܚܰܝܶܐ ܕܝ ܕܰܝܪܐ ܘܥܰܠ ܐܝ ܣܷܚܚܰܐ ܕܐܘ ܚܰܣܝܐ ܥܰܠ ܐܰܕ ܕܰܝܪܳܝܶܐ ܘܕܰܝܪܳܝܳܬ݂ܐ. ܒܘ ܫܷܟܷܠܰܢܐ ܡܰܫܦܰܥܠܝ ܚܰܡܫܰܥܣܰܪ ܝܰܘܡܶܐ ܓܰܒ ܚܳܬ݂ܝ، ܐܘ ܥܰܡܐ ܕܬܰܡܐ ܓ݂ܰܠܰܒܶܐ ܠܗܝܩܳܝܳܘܰܐ ܕܫܳܡܷܥ ܡܶܕܳܢܶܐ ܕܛܘܪܥܰܒܕܝܢ. ܒܷܬ݂ܷܪ ܡܶܐ ܬܰܡܐ ܐܰܙܝܢܐ ܓܰܒ ܚܳܠܳܢܝ ܠܒܰܪܠܝܢ ܬܰܡܐ ܟܘܠ ܠܰܠܝܐ ܐܳܬܷ݂ܢܘܰܐ ܐܘ ܐܰܗܷܠ ܕܬܰܚܳܠܝ ܐܳܬܷ݂ܢܘܰܐ ܠܝ ܔܷܒ݁ܰܬܶܐ ܟܘܠ ܠܰܠܝܐ، ܒܒܰܪܠܝܢ ܐܘ ܥܰܡܐ ܓ݂ܰܠܰܒܶܐ ܫܓ݂ܝܫܳܝܳܘܰܐ ܡܘ ܓܰܒܐ ܕܝ ܥܝܬܐ ܥܰܠ ܕܟܝܬܐ ܬܠܳܬ݂ܐ ܩܰܫܶܐ ܐܝ ܔܰܡܰܥܰܐ ܡܒܰܪܒܰܙܬܳܘܰܐ ܟܘܠ ܚܰܐ ܡܷܢܶܗ ܟܳܡܷܪ؛ ܐܝ ܩܪܝܬ݂ܶܕ݂ܝ ܐܰܡ ܡܷܕܗܳܝܶܐ ܐܰܣ ܣܪܝܢܳܝܶܐ ܘܰܐܟ ܟܦܰܪܙܳܝܶܐ ܬܰܡܐ ܠܐ ܩܘܕܪܝܘܰܐ ܥܰܡ ܚܕ݂ܳܕ݂ܶܐ ܕܷܡܡܝ ܛܘܪܥܰܒܕܝܢܳܝܶܐ. ܐܝ ܥܝܬܐ ܕܩܰܫܝܫܐ ܐܰܠܝܰܣ ܟܳܟܘܪܟܷ݂ܢܶܗ ܥܰܠ ܟܳܗܢܐ ܕܡܝܣܷܡ ܒܕܘܟܬ݂ܶܗ ܥܰܠ ܕܡܰܣܘܠܶܗ ܓ݂ܰܠܰܒܶܐ، ܐܶܠܐ ܠܰܝܬ ܢܳܫܐ ܕܡܝܣܷܡ ܒܕܘܟܬ݂ܶܗ. ܐܘ ܥܰܡܐ ܓ݂ܰܠܰܒܶܐ ܡܰܫܟܶܘܰܐ ܕܗܰܢܝ ܐܰܪܒܥܝ ܐܷܫܢܶܐ ܠܐ ܡܬܰܪܟܰܘ ܬܰܡܐ ܡܰܕܪܰܫܬܐ. ܐܘ ܥܰܡܐ ܕܒܰܪܠܝܢ ܓ݂ܰܠܰܒܶܐ ܠܗܝܩܳܝܶܘܰܝܢܶܐ ܕܫܷܡܥܝ ܡܰܐ ܚܰܝܶܐ ܕܛܘܪܥܰܒܕܝܢ ܟܡܐ ܡܰܬ݂ܠܶܐ ܕܐܘ ܐܶܘܶܢܓܰܠܝܘܢ ܘܡܶܕܳܢܶܐ ܕܐܘ ܐܰܬ݂ܪܐ. ܐܘ ܥܰܡܶܕ݂ܰܢ ܬܰܡܐ ܫܪܳܪܐ ܟܷܬܘܰܠܠܶܗ ܚܰܝܶܐ ܓ݂ܰܠܰܒܶܐ ܒܰܣܝܡܶܐ ܒܪܰܚܰܐ ܐܶܠܐ ܬܘܝܪܳܝܶܢܶܐ ܥܰܠ ܕܰܐܢ ܢܰܥܝܡܰܬ݂ܬ݂ܶܗ ܟܷܙܷܢ ܡܶܐ ܐܝܕ݂ܰܝܶܗ ܘܠܐ ܟܳܝܷܠܦܝ ܐܘ ܠܝܫܳܢܐ ܣܘܪܝܳܝܐ ܐܰܘ ܕܟܳܡܳܛܷܢ ܠܰܢ ܢܳܫܶܐ ܕܠܰܬܢܶܐ ܡܘ ܥܰܡܶܕ݂ܰܢ ܘܡܝ ܬܰܘܕܝܬ݂ܶܕ݂ܰܢ ܬܰܡܐ ܚܙܶܠܝ ܓ݂ܰܠܰܒܶܐ ܢܳܫܶܐ ܕܟܷܬܢܶܐ ܡܰܢܕܡܳܢܶܐ ܷܕܛܪܰܠܠܶܗ ܐܘ ܐܰܬ݂ܪܐ. ܒܠܰܠܝܐ ܝܳܬܷܘܰܝܢܐ ܥܰܡ ܐܰܥ ܥܠܰܝܡܶܐ ܡܰܚܟܶܘܰܝܢܰܢܶܗ ܡܶܕܳܢܶܐ ܕܟܳܡܝܣܳܡܝ ܒܛܘܪܥܰܒܕܝܢ ܘܥܰܠ ܐܰܚ ܚܰܝܶܐ ܕܐܘ ܐܰܬ݂ܪܐ، ܐܶܠܐ ܠܐ ܚܙܶܠܝ ܚܘܒܐ ܕܰܐܬ݂ܪܐ ܐܰܘ ܕܥܰܦܪܐ ܕܰܐ ܐܰܒܳܗܳܬ݂ܶܐ ܐܶܒܰܝܶܐ. ܒܰܐ ܕܷܟܳܬ݂ܶܐ ܕܰܐܙܝܢܐ ܕܰܐܘܪܘܦܰ݁ܐ ܟܘܠܰܐ ܐܰܢ ܢܳܫܶܐ ܕܟܷܬܘܰܝܢܶܐ ܪܰܒܶܐ ܒܘ ܥܷܡܪܐ ܕܟܷܬܘܰܐ ܚܘܒܐ ܕܰܐܬ݂ܪܐ ܕܷܩܪܝܬ݂ܐ ܐܰܦ݁ܦܶ݁ܐ ܬܰܡܳܘܰܝܢܶܗ ܐܶܠܐ ܠܐ ܩܰܕܝܪܝ ܕܳܒܷܢ ܐܝ ܪܘܚܰܝܐ ܠܰܢ ܢܰܥܝܡܰܬ݂ܶܗ.ܐܝܢܰܩܠܰܐ ܕܟܰܡܝܠܐ ܫܰܒܬܐ ܒܷܬ݂ܷܪ ܡܶܐ ܬܰܡܐ ܐܰܙܝܢܐ ܓܰܒ ܡܰܠܦܳܢܐ ܡܝܰܩܪܐ ܦܝܠܝܦܘܣ ܟܳܪ ܕܟܷܬܝܐ ܒܶܒܪܰܐ ܟܳܣܳܝܷܡ ܡܰܠܦܢܘܬܐ ܕܐܝ ܬܰܘܕܝܬ݂ܐ ܒܰܐ ܒܶܝܬ݂ܨܶܦܪܶܐ ܕܐܝ ܩܳܛܢܘܬ݂ܐ. ܬܰܡܐ ܟܷܬܘܰܐ ܣܝܣܬܰܡ ܫܰܦܝܪܐ ܕܝ ܥܝܬܐ ܘܕܝ ܡܰܕܪܰܫܬܐ. ܐܘ ܟܳܗܢܰܬ݂ܬ݂ܶܗ ܟܳܬܳܥܷܦ݁ ܓ݂ܰܠܰܒܶܐ ܩܘܡ ܕܐܘ ܥܰܡܐ ܘܕܝ ܥܝܬܐ، ܐܶܠܐ ܥܰܠ ܕܟܳܪܰܙܘܰܐ ܒܷܬܷ݂ܪ ܡܘ ܣܘܪܝܳܝܐ ܒܘ ܥܰܪܰܒܝ ܣܬܶܐ ܐܝ ܔܰܡܰܥܰܐ ܐܷܫܡܐ ܣܰܝܡܳܘܰܐ ܓܰܙܷܢ ܡܝܢܶܗ. ܟܷܬܘܰܐ ܡܰܐ ܫܰܡܳܫܶܐ ܐܷܒܥܝܘܰܐ ܐܷܫܡܐ ܕܡܰܟܪܶܐ ܐܘ ܛܘܟܣܐ ܕܐܝ ܥܝܬܐ ܥܰܠ ܕܟܷܡܨܰܠܶܗ ܐܰܨ ܨܠܰܘܳܬ݂ܐ ܟ݂ܘܕ ܟܷܬܝܐ ܒܛܘܪܥܰܒܕܝܢ. ܬܰܡܐ ܒܒܶܒܪܰܐ ܐܘ ܥܰܡܐ ܓ݂ܰܠܰܒܶܐ ܡܝܢܶܐ ܟܘܠ ܩܰܝܛܐ ܟܳܬ݂ܶܐ ܠܛܘܪܥܰܒܕܝܢ ܘܗܶܫ ܟܷܬܬܶܗ ܐܶܣܳܪܶܐ ܥܰܡ ܐܘ ܐܰܬ݂ܪܐ ܓ݂ܰܠܰܒܶܐ ܕܝܠܳܢܳܝܬ݂ ܕܟܷܬܢܶܐ ܡܝ ܩܪܝܬ݂ܐ ܕܝ ܣܰܪܶܐ. ܥܰܡ ܐܘ ܡܰܠܦܳܢܐ ܦܝܠܝܦܘܣ ܐܰܙܰܢܐ ܓܰܒ ܣܰܝܷܕܢܰܐ ܡܰܬܝܰܣ ܢܰܝܫ ܠܘܰܪܒܘܪܓ ܥܰܠ ܕܳܐܒܰܥܘܰܝܢܐ ܕܚܳܙܶܢܐ ܐܰܚ ܚܰܝܶܐ ܕܐܝ ܕܰܝܪܳܝܘܬ݂ܐ ܕܬܰܡܐ، ܐܰܝܕܰܪܒܐ ܟܳܥܰܝܫܝ ܘܕܝܳܬܰܘܢܐ ܥܰܡܘ ܐܘ ܚܰܣܝܐ. ܒܠܰܠܝܐ ܡܰܛܝܢܰܐ ܠܝ ܕܰܝܪܐ ܕܡܪܝ ܝܰܥܩܘܒ ܕܘܰܪܒܘܪܓ ܝܰܬܝܘܢܰܐ ܒܝ ܩܰܡܰܝܬܐ ܥܰܡ ܣܰܝܷܕܢܰܐ ܐܘ ܚܰܣܝܐ ܚܙܶܠܝ ܓ݂ܰܠܰܒܶܐ ܡܰܟܝܟ݂ܐ ܘܡܰܠܝܐ ܚܘܒܳܘܰܐ. ܒܷܬܷ݂ܪ ܢܰܚܝܬܝܢܰܐ ܐܰܥܡܶܗ ܠܘ ܦܳܬ݂ܘܪܐ ܡܰܚܫܰܡܠܰܢ. ܐܶܕܝ ܦܝܠܝܦܘܣ ܕܰܥܷܪ ܠܘ ܒܰܝܬܐ ܘܳܐܢܐ ܦܰܝܷܫܢܐ ܒܝ ܕܰܝܪܐ. ܝܰܬܝܘܝܢܰܐ ܥܰܡ ܐܘ ܚܰܣܝܐ ܡܫܰܝܰܠܘܰܐ ܥܰܠ ܐܰܚ ܚܰܝܶܐ ܕܐܝ ܕܰܝܪܐ ܕܡܳܪܝ ܓܰܒܪܐܝܶܠ. ܐܘ ܚܰܣܝܐ ܥܠܰܝܡܳܝܐ ܟܷܬܠܶܗ ܠܶܒܐ ܪܘܝܚܐ ܘܒܓ݂ܝܪܰܝܐ. ܒܠܰܠܝܐ ܘܒܝܡܳܡܐ ܡܔܰܪܰܒܘܰܐ ܕܣܳܝܷܡ ܬܷܫܡܷܫܬܐ ܠܘ ܥܰܡܐ. ܕܝܠܳܢܳܝܬ݂ ܟܷܡܔܰܪܷܒ ܕܷܡܩܰܝܙܷܢ ܐܰܥ ܥܠܰܝܡܶܐ ܠܝ ܥܝܬܐ. ܬܰܡܐ ܣܷܡܘܰܝܠܶܗ ܚܦܝܛܘܬ݂ܐ ܕܐܝ ܥܠܰܝܡܘܬ݂ܐ ܒܟܳܠܢ ܐܝ ܘܰܐܠܰܝܶܐ. ܒܰܚ ܚܰܝܶܕ݂ܝ ܠܐ ܚܙܶܘܰܝܠܝ ܗܰܘܟ݂ܰܐ ܥܠܰܝܡܶܐ ܣܘܪܝܳܝܶܐ ܥܰܡ ܚܕ݂ܳܕܶܐ. ܐܘ ܚܰܣܝܐ ܣܷܡܘܰܝܠܶܗ ܡܰܡܠܐ ܒܰܣܝܡܐ ܥܰܠ ܐܝ ܬܰܘܕܝܬ݂ܐ ܥܰܠ ܐܝ ܥܝܬܐ ܘܒܷܬ݂ܷܪ ܡܦܰܠܰܓ݂ܘܰܝܠܶܗ ܐܶܘܰܢܓܶܠܝܘܢ ܒܘ ܠܶܫܢܐ ܐܰܠܡܰܢܳܝܐ. ܒܷܬ݂ܷܪ ܡܶܕ ܦܰܝܷܫܢܐ ܐܰܪܒܥܐ ܝܰܘܡܶܐ ܬܰܡܐ ܦܰܝܷܬܢܐ ܠܰܗܠܶܢ ܓܰܒܰܐ ܡܟ݂ܰܠܰܬܝܶܐ ܕܒܰܒܝ ܬܰܡܐ ܣܬܶܐ ܟ݂ܘܕ ܟܘܠ ܕܘܟܬ݂ܐ ܕܰܐܠܡܰܢܰܝܐ ܟܷܬܘܰܠܠܶܗ ܩܷܛܪܶܐ ܕܰܩ ܩܰܫܶܐ ܥܰܠ ܕܡܰܣܷܘܠܶܗ. ܬܰܡܐ ܟܷܬܘܰܐ ܥܰܡܐ ܓ݂ܰܠܰܒܶܐ ܣܘܪܝܳܝܐ ܗܶܫ ܥܰܝܫܝܘܰܐ ܟ݂ܘܕ ܐܝ ܩܪܝܬ݂ܐ ܟܘܠ ܠܰܠܝܐ ܗܳܘܶܘܰܐ ܔܷܒ݁ܰܬܰܬ. ܒܷܬܷ݂ܪ ܡܶܐ ܬܰܡܐ ܐܰܙܝܢܐ ܠܷܣܘܝܫ̰ܪܰܐ ܓܰܒ ܥܰܡܡܝ. ܬܰܡܐ ܕܘܟܬ݂ܰܝܶܗ ܓ݂ܰܠܰܒܶܐ ܒܰܣܝܡܳܘܰܐ ܥܰܠ ܕܟܷܬܘܰܠܶܗ ܛܘܪܳܢܶܐ، ܡܰܝܶܐ ܘܝܰܪܘܩܘܬ݂ܐ ܓ݂ܰܠܰܒܶܐ. ܐܶܠܐ ܡܣܰܟܰܪܶܗ ܬܰܡܐ ܓ݂ܰܠܰܒܶܐ ܐܝ ܗܝܘܬ݂ܐ ܣܘܪܝܰܝܬܐ ܙܷܬ ܡܶܐ ܟܘܠ ܕܘܟܬ݂ܐ ܥܰܠ ܕܰܒ ܒܳܬܶܐ ܪܰܚܘܩܶܢܶܐ ܡܶܐ ܚܕ݂ܳܕ݂ܶܐ ܠܰܬܬܶܗ ܡܰܕܪܰܫܬܐ ܡܶܕܶܐ. ܘܐܝ ܥܠܰܝܡܘܬ݂ܐ ܓ݂ܰܠܰܒܶܐ ܪܰܚܷܩܬܳܝܐ ܡܶܐ ܡܶܕܳܢܶܐ ܡܰܪܕܘܬ݂ܳܢܳܝܶܐ ܘܬܰܘܕܝܬ݂ܳܢܳܝܶܐ. ܘܙܷܬ ܡܶܐ ܟܘܠ ܕܘܟܬ݂ܐ ܬܰܡܐ ܟܳܡܰܝܬܷܢ ܢܘܟ݂ܪܳܝܶܐ. ܒܷܬ݂ܷܪ ܡܶܐ ܬܰܡܐ ܣܬܶܐ ܕܰܥܷܪܢܐ ܕܝܣܰܐ ܠܓܳܦ݁ܦ݁ܝܢܶܓܢ ܥܰܠ ܕܦܰܝܷܫܘܰܝܠܝ ܒܰܣ ܫܰܒܬ݂ܐ ܕܟܷܡܠܐ ܐܝ ܘܝܙܰܝܕ݂ܝ. ܒܠܰܠܝܐ ܐܳܬܷ݂ܢܘܰܐ ܓܰܒܝ ܐܘ ܐܰܗܷܠ. ܒܟܘܠ ܔܷܒ݁ܰܬܶܐ ܕܟܘܠ ܕܘܟܬ݂ܐ ܗܳܘܶܘܰܐ ܡܰܡܠܐ ܥܰܠ ܐܝ ܐܳܪܳܡܳܝܘܬ݂ܐ ܥܰܠ ܐܝ ܐܳܬ݂ܘܪܳܝܘܬ݂ܐ ܘܥܰܠ ܐܘ ܓܰܒܐ ܕܰܐ ܕܰܘܪܳܢܳܝܶܐ. ܐܘ ܥܰܡܐ ܐܰܙܳܠܐ ܠܷܦܫܳܪܐ ܐܶܠܐ ܟܘܟ݂ܠܝ ܚܕ݂ܳܕ݂ܶܐ ܥܰܠ ܐܰܡ ܡܶܕܳܢܶܐ ܒܰܛܝܠܶܐ ܕܠܰܬܬܶܗ ܦܰܝܕܰܐ. ܟܘܠ ܢܳܫܐ ܗܰܝܟܐ ܕܟܳܝܷܬܘܝ ܟܳܡܷܔܓ݂ܳܠܝ ܥܰܠ ܐܰܟ ܟܳܗܢܶܐ ܥܰܠ ܐܰܚ ܚܰܣܝܶܐ. ܐܶܠܐ ܟܳܛܳܥܷܢ ܕܰܟ ܟܳܗܢܰܢܷܟ ܟܘܠܠܶܗ ܐܘ ܥܰܡܐ ܗܝܶܐ ܡܢܰܩܝܠܶܗ ܐܶܠܐ ܐܝܢܰܩܠܰܐ ܕܠܐ ܟܳܬ݂ܶܐ ܠܫܘܓ݂ܠܰܝܶܗ ܟܳܡܳܚܷܢ ܐܰܦ݁ܦܶ݁ܐ. ܟܘܠ ܢܰܩܠܰܐ ܐܳܡܰܪܘܰܝܢܐ ܠܰܢ ܢܳܫܶܐ ܕܝܷܬܘܝܘܰܐ ܓܰܒܝ ܒܰܐ ܔܷܒ݁ܰܬܰܬ، ܟܳܠܳܙܷܡ ܐܘ ܢܳܫܐ ܒܝ ܩܰܡܰܝܬܐ ܡܥܰܕܷܠ ܐܘ ܒܰܝܬܐ ܕܪܘܚܶܐ ܐܰܢ ܢܰܥܝܡܶܐ ܕܪܘܚܶܐ ܒܷܬ݂ܷܪ ܕܳܡܷܪ ܩܰܝ ܗܰܢܐ ܠܰܬܝܐ ܡܥܰܕܠܐ ܐܘ ܩܰܝ ܗܰܢܐ ܗܰܘܟ݂ܰܐ ܟܳܣܳܝܷܡ. ܒܷܬ݂ܷܪ ܡܶܕ ܟܰܪܷܟ݂ܢܐ ܐܰܕ ܕܷܟܳܬ݂ܰܢܷܟ ܟܘܠܠܶܗ ܐܰܕܷ݂ܥܢܐ ܕܐܘ ܥܰܡܐ ܕܷܡܓܰܠܘܶܠܶܗ ܟܳܥܳܝܷܫ ܚܰܝܶܐ ܓ݂ܰܠܰܒܶܐ ܒܰܣܝܡܶܐ ܒܪܰܚܰܐ ܕܠܐ ܬܰܥܒܶܐ ܘܬ݂ܢܝܚܳܝܶܢܶܐ ܡܘ ܓܰܒܐ ܕܘ ܡܳܡܘܢܐ. ܐܘ ܥܰܡܐ ܕܰܐ ܩܷܪܝܰܘܳܬ݂ܶܐ ܟܳܬܳܥܷܒ ܓ݂ܰܠܰܒܶܐ ܒܘ ܣܰܬ݂ܘܐ ܘܒܘ ܩܰܝܛܐ ܐܶܠܐ ܡܶܕܶܐ ܕܘ ܓܰܒܐ ܡܳܡܘܢܐ ܠܐ ܟܳܦܳܝܷܫ ܒܝܕ݂ܰܝܶܐ. ܐܶܠܐ ܐܘ ܥܰܡܐ ܕܰܐܘܪܦܰܐ݁ ܡܘ ܓܰܒܐ ܕܐܝ ܐܘܡܬ݂ܐ ܘܕܝ ܗܝܘܬ݂ܐ ܣܘܪܝܰܝܬܐ ܐܷܫܡܐ ܒܷܫܡܐ ܥܰܠ ܐܘ ܦܫܳܪܳܢܶܐ. ܟܝܬܐ ܒܰܝܢܳܬ݂ܰܝܶܐ ܕܟܳܡܔܰܪܒܝ ܕܣܰܝܡܝ ܡܶܕܳܢܶܐ ܐܶܠܐ ܠܰܬܬܶܗ ܫ̰ܰܪܰܐ. ܘܒܘ ܟܪܳܟ݂ܰܢܐ ܐܰܕܷ݂ܥܢܐ ܕܟܳܚܰܝܪܝ ܒܟܘܠ ܚܰܐ ܕܟܳܬ݂ܶܐ ܡܶܐ ܛܘܪܥܰܒܕܝܢ ܙܝܰܪܰܐ ܠܰܘܪܘܦܰ݁ܐ ܟܳܚܰܝܪܝ ܐܰܦ݁ܦ݁ܶܐ ܒܥܰܝܢܐ ܕܰܐܬ݂ܷܢ ܠܬܷܠܬܝܡܐ ܕܙܘܙܶܐ ܠܐ ܟܳܡܷܬܦܰܟܪܝ ܕܒܰܣ ܐܰܬ݂ܝ ܠܷܚܙܰܝܬܐ ܕܐܘ ܐܰܗܷܠ. ܐܶܠܐ ܟܝܬܐ ܗܰܢܝ ܕܟܳܬܷ݂ܢ ܡܶܐ ܐܰܘܪܘܦܰ݁ܐ ܒܰܐ ܩܰܝܛܶܐ ܠܰܐ ܩܷܪܝܰܘܳܬ݂ܶܐ ܒܘ ܙܰܒܢܐ ܕܰܐ ܘܰܪܙܶܐ، ܕܰܐ ܦܘܔܶܐ ܘܕܰܥ ܥܷܢܘܶܐ ܟܳܡܝܒܰܣܡܝ ܬܰܪܬܶܐ ܫܰܒܶܐ ܐܰܘ ܝܰܪܚܐ ܟܳܡܷܬܦܰܟܪܝ ܕܒܰܐ ܩܷܪܝܰܘܳܬ݂ܶܐ ܐܝ ܫܰܬܐ ܟܘܠܰܐ ܗܰܘܟ݂ܰܝܐ ܐܶܠܐ ܠܐ ܟܳܡܷܬܦܰܟܪܝ ܒܘ ܣܰܬ݂ܘܐ ܐܝ ܥܰܣܩܘܬ݂ܐ ܕܟܳܡܷܓܪܷܫ ܒܘ ܩܘܪܐ، ܒܰܡ ܡܰܛܪܶܐ، ܒܰܬ ܬܰܠܓܶܐ ܘܒܘ ܛܝܢܐ ܕܐܝ ܩܪܝܬ݂ܐ ܐܰܘ ܒܘ ܙܰܒܢܐ ܕܐܘ ܕܘܳܪܐ ܐܝ ܬܰܥܒܰܝܐ ܟܘܠܰܐ. ܟܳܣܰܝܡܝ ܐܘܩܰܐ ܫܘܓ݂ܠܰܘܐ ܐܝܢܰܩܰܐ ܕܠܐ ܟܳܬ݂ܶܐ ܡܰܛܪܐ ܠܐ ܟܳܡܰܘܪܷܩ ܬܷܡܶܕܶܐ ܒܘ ܘܰܪܙܐ ܒܘ ܟܰܪܡܐ ܐܘ ܬܰܥܒܐ ܟܘܠܶܗ ܟܷܙܶܝܐ ܒܘ ܟ݂ܰܠܝܐ. ܗܰܢܝ ܕܟܷܡܡܝ ܡܟܰܝܦܶܗܰܬܘ ܒܛܘܪܥܰܒܕܝܢ ܓ݂ܰܠܰܒܶܐ ܡܷܢܢܶܐ ܠܐ ܫܰܪܝܪܐ ܟܷܡܡܝ ܐܶܠܐ ܕܷܡܒܰܣܡܝ ܠܶܒܶܐ ܕܰܐܢ ܢܳܫܶܐ ܥܰܠ ܕܢܳܫܐ ܠܐ ܟܳܛܳܪܶܗ ܐܝ ܡܰܠܟܘܬ݂ܐ ܘܥܳܪܷܩ ܠܝ ܓܝܗܰܢܐ. ܛܘܪܥܰܒܕܝܢ ܐܰܚ ܚܰܝܶܕ݂ܰܐ ܕܒܷܣܡܝܘܰܐ ܚܰܐ ܠܐ ܟܳܦܰܫܘܰܐ ܬܰܡܐ ܟܘܠܠܶܗ ܓܕܘܥܪܝܘܰܐ. ܫܪܳܪܳܝܐ ܐܘ ܚܰܐ ܕܟ݂ܰܣܷܪ ܐܰܢ ܢܰܥܝܡܶܕ݂ܶܐ ܟܳܡܰܢܕܷܡ ܥܰܠ ܕܰܐܙܙܶܝܐ ܒܰܤ ܗܷܢܷܟ ܣܬܶܐ ܟܘܕ݂ܥܝ ܡܷܢ ܕܗܳܘܶܐ ܛܪܳܘܶܐ ܬܰܡܐ ܪܷܚܰܬܬܷܪܢܶܐ ܐܶܠܐ ܐܰܚ ܚܪܶܢܶܐ ܦܨܝܚܳܝܶܢܶܗ ܓ݂ܰܠܰܒܶܐ ܒܚ ܚܰܝܰܬ݂ܶܐ. ܒܘ ܫܷܟܷܠܰܢܐ ܐܝܢܰܩܠܰܐ ܩܰܡܰܝܬܐ ܟܰܪܷܟ݂ܢܐ ܘܚܙܶܠܝ ܐܰܕ ܕܰܘܠܰܬ ܕܰܐܘܪܘܦܰ݁ܐ ܘܐܘ ܣܝܣܬܶܡ ܕܟܷܬܬܶܗ ܒܰܬܪܶܐ ܝܰܪܚܶܐ. ܘܗܰܘܝܠܝ ܪܷܢܝܐ ܘܚܙܰܝܬܐ ܥܰܠ ܐܰܬ ܬܪܶܐ ܓܰܒܶܐ ܘܰܐܕܷ݂ܥܢܐ ܘܦܰܗܷܡܢܐ ܩܰܝ ܐܘ ܥܰܡܰܢܐ ܟܘܠܶܗ ܛܪܶܠܶܗ ܐܘ ܐܰܬ݂ܪܐ ܐܘ ܥܰܦܪܐ ܐܰܩ ܩܰܘܪܶܐ ܕܰܐ ܒܰܒܳܢܰܬ݂ܬ݂ܶܗ ܘܩܰܝ ܡܰܛܝܢܰܐ ܠܘ ܫܷܟܷܠܰܢܐ ܘܠܘ ܕܰܪܓ݂ܰܢܐ ܕܟܷܬܢܶܐ ܐܶܒܶܗ ܐܰܣ ܣܘܪܝܳܝܶܐ. ܒܢܝܡܝܢ ܬܪܐ 1312 ܡ̈ܠܐ.
