Šëkri Aqtaš: ܐܘ ܡܰܟܬܰܒܙܰܒܢܐ ܕܝ ܩܪܝܬ݂ܐ ܕܒܶܝܬܩܘܤܛܰܢ / U maxtabzabno di qriṯo d Bequsyone

U maxtabzabno di qriṯo d Bequsyone

ܐܝ ܩܪܝܬ݂ܐ ܕܒܶܩܘܣܝܳܢܶܐ ܒܰܐܝܢܰܐ ܙܰܒܢܐ ܥܰܡܝܪܐ ܠܰܬܝܐ ܝܕ݂ܝܥܐ. ܐܶܠܐ ܠܓܳܪܰܢ ܕܰܟ ܟܬ݂ܳܘܶܐ ܘܕܰܟܬ݂ܰܘܝܳܬ݂ܶܐ ܕܥܰܠ ܐܰܟ ܟܶܦܶܐ܆ ܟܝܒܰܢ ܕܷܐܡܡܝܢܰܐ ܒܦܰܠܓܶܗ ܕܘ ܕܳܪܐ ܕܰܐܢ ܐܰܪܒܥܐ ܥܰܡܝܪܬܐ ܘܰܐ. ܚܕ݂ܐ ܟܶܦܐ ܕܟܷܬܝܐ ܒܘ ܓܰܒܐ ܕܘ ܓܰܪܒܝܐ ܕܘ ܩܛܳܪܐ ܕܝ ܥܝܬܐ ܟܳܡܫܰܪܪܐ ܐܘ ܡܶܕܰܢܐ. ܗܰܘܟ݂ܰܐ ܟܬ݂ܝܘܐ ܝܐ ܥܰܠ ܐܝ ܟܶܦܐ: «ܒܝ ܫܰܬܐ ܬܠܰܬ݂ܡܐ ܘܬܠܰܬ݂ ܘܰܐܪܒܥܝ ܫܓ݂ܝܠܶܗ ܘܡܰܥܡܰܪܠܶܗ ܐܝ ܥܡܰܪܰܬ݂ܶܐ ܙܒܝܢܐ ܐܘ ܐܰܒܪܐ ܕܰܐܒܪܳܗܳܡ. ܠܘ ܕܘܟ݂ܪܳܢܐ ܘܠܘ ܚܘܣܳܝܐ ܕܰܚܛܳܗܰܬ݂ܬ݂ܶܗ. ܟܘܠ ܢܳܫܐ ܕܩܳܪܶܐ ܛܪܐ ܡܨܰܠܶܐ. ܐܳܢܐ ܥܝܣܰܐ ܕܡܶܐ ܝܰܠܚܐ». ܡܰܪܟܶܐ ܟܳܝܘܠܦܝܢܰܐ ܕܒܘ ܙܰܒܢܰܘܐ ܐܝ ܩܪܝܬ݂ܐ ܥܰܡܷܪܬܐ ܘܰܐ ܒܰܣ ܣܘܪܝܳܝܶܐ. ܐܘ ܐܷܫܡܐ ܕܒܶܝܬܩܘܤܛܰܢ ܟܳܡܝܦܰܫܰܩ ܒܰܝܬܐ ܕܩܘܤܛܰܢ. ܘܟܳܐܬ݂ܶܐ ܡܘ ܐܷܫܡܐ ܕܩܘܤܛܰܢܛܝܢܳܘܣ ܐܘ ܡܰܠܟܐ. ܟ݂ܘܕ ܟܷܬܝܐ ܟܬ݂ܝܘܐ܆ ܐܝܢܰܩܠܰܐ ܕܰܪ ܪܘܡܳܝܶܐ ܡܫܰܠܛܝ ܥܰܠ ܐܘ ܐܰܬ݂ܪܐ܆ ܡܚܰܪܒܝ ܘܰܐ ܥܰܡ ܐܰܦ ܦܳܪܣܳܝܶܐ. ܘܡܘ ܓܰܒܐ ܕܘ ܡܰܕܢܚܐ ܡܰܒܕܷܢ ܘܰܐ ܐܘ ܚܰܪܦ݁. ܒܶܩܘܣܝܳܢܶܐ ܣܬܶܐ ܟܳܦܰܝܫܐ ܒܘ ܕܰܪܒܐ ܕܟܐܘܙܙܶܗ ܒܰܝܢ ܐܰܦ ܦܳܪܣܳܝܶܐ. ܘܒܰܠܟܝ ܐܰܥܠܰܗ ܥܷܒܪܝ ܘܰܐ ܐܝܢܰܩܠܰܐ ܕܷܐܙܙܷܢ ܘܰܐ ܠܘ ܩܪܳܒܐ. ܒܘ ܛܘܪܐ ܕܝ ܩܪܝܬ݂ܐ ܟܝܬܐ ܕܘܟܬ݂ܐ ܕܟܳܡܝܬܰܘܡܰܪܠܰܗ ܐܘ «ܫܘܥܐ ܕܗܶܠܰܢܝ». ܟܘܕ݂ܥܝܢܰܐ ܐܝ ܡܰܠܟܬ݂ܐ ܗܶܠܰܢܝ ܐܝ ܐܶܡܐ ܕܩܘܤܛܰܢܛܝܢܳܘܣ ܐܘ ܡܰܠܟܐ ܝܐ. ܐܘ ܙܰܒܢܐ ܕܥܰܡܝܪܐ ܐܝ ܥܝܬܐ ܘܐܘ ܙܰܒܢܐ ܕܡܰܡܠܰܟ݂ܠܶܗ ܐܘ ܡܰܠܟܐ ܩܘܤܛܰܢܛܝܢܳܘܣ܆ ܩܰܪܝܘܐ ܝܐ ܠܷܚܕ݂ܳܕ݂ܶܐ. ܗܰܬ݂ܶܐ ܣܬܶܐ ܟܳܡܰܩܰܘܝܐ ܐܘ ܪܶܥܝܳܢܐ ܕܐܝ ܩܪܝܬ݂ܐ ܕܒܶܝܬܩܘܤܛܰܢ ܡܷܕܠܰܗ ܐܷܫܡܰܗ ܡܶܐ ܐܷܫܡܶܗ ܕܩܘܤܛܰܢܛܝܢܳܘܣ ܐܘ ܡܰܠܟܐ ܡܗܰܝܡܢܐ ܕܥܳܝܰܫ ܘܰܐ ܒܘ ܕܳܪܐ ܕܰܐܢ ܐܰܪܒܥܐ. ܐܝܢܰܩܠܰܐ ܕܷܡܫܰܬܣܐ ܐܝ ܩܘܛܢܘܬ݂ܐ ܕܬܘܪܟܺܝܰܐ ܒܪܝܫܶܗ ܕܘ ܕܳܪܐ ܕܰܥ ܥܷܣܪܝ܆ ܠܰܫܰܢ ܕܣܷܠܓܐ ܐܘ ܡܰܟܬܰܒܙܰܒܢܐ ܕܰܥ ܥܰܡܡܶܐ ܫܶܪܫܳܢܳܝܶܐ ܘܥܰܬܝܩܶܐ ܕܒܶܝܬܢܰܗܪܝܢ܆ ܡܚܰܠܰܦܠܰܗ ܐܷܫܡܶܗ ܕܰܩ ܩܷܪܝܰܘܳܬ݂ܶܐ ܘܕܰܡܕ݂ܝܢܳܬ݂ܶܐ ܘܕܰܛ ܛܘܪܳܢܶܐ ܘܕܰܕܰܪܒܳܢܶܐ ܟܘܠܠܶܗ. ܘܡܰܚܰܬܬܶܗ ܐܷܫܡܶܗ ܕܒܶܩܘܣܝܳܢܶܐ ܒܘ ܠܶܫܳܢܐ ܬܘܪܟܳܝܐ «ܐܰܠܰܓܳܘܙ». ܐܷܫܡܶܗ ܕܝ ܩܪܝܬ݂ܐ ܒܰܝܢ ܐܘ ܥܰܡܐ ܡܝܕ݂ܰܥܘܰܐ ܒܶܩܘܣܝܳܢܶܐ܆ ܐܶܠܐ ܒܝ ܕܰܘܠܶܐ ܐܰܠܰܓܳܘܙ ܘܰܐ ܗܘܠ ܠܝ ܫܰܬܐ ܕܰܬܪܰܠܦܐ ܘܚܰܡܫܰܥܣܰܪ. ܐܝܢܰܩܠܰܐ ܕܝ ܫܘܠܛܳܢܘܬ݂ܐ ܕܬܘܪܟܺܝܰܐ ܡܳܦܰܩܠܶܗ ܩܳܢܘܢܐ ܕܡܰܢ ܕܳܐܒܰܥ ܡܚܰܠܰܦ ܐܷܫܡܶܗ ܕܝ ܩܪܝܬ݂ܰܝܕ݂ܶܗ܆ ܐܰܥ ܥܳܡܘܪܶܐ ܕܝ ܩܪܝܬ݂ܐ ܒܝ ܫܰܬܐ ܕܰܬܪܰܠܦܐ ܘܚܰܡܫܰܥܣܰܪ ܛܠܷܒܒܶܗ ܪܘܫܡܳܐܝܬ݂ ܡܝ ܒܰܠܰܕܝܝܶܗ ܕܡܷܕ݂ܝܰܕ݂ ܕܷܡܚܰܠܦܝ ܐܷܫܡܶܗ ܕܝ ܩܪܝܬ݂ܐ ܘܣܰܝܡܝܠܶܗ ܒܘ ܠܶܫܳܢܐ ܬܘܪܟܳܝܐ ܣܬܶܐ ܒܶܝܬܩܘܤܛܰܢ. ܐܝ ܒܰܠܰܕܝܝܶܗ ܕܡܷܕ݂ܝܰܕ݂ ܡܰܩܒܶܠܰܗ ܘܡܫܰܕܰܪܠܰܗ ܐܘ ܦܘܣܩܳܢܐ ܠܘ ܘܰܠܝ ܕܡܰܪܕܶܐ. ܒܷܬ݂ܷܪ ܡܶܐ ܕܐܘ ܘܰܠܝ ܣܬܶܐ ܡܰܩܒܶܠܶܗ܆ ܐܷܫܡܰܗ ܕܒܶܩܘܣܝܳܢܶܐ ܒܘ ܬܘܪܟܳܝܐ ܣܬܶܐ ܗܰܘܝ ܒܶܝܬܩܘܤܛܰܢ. ܐܝ ܥܝܬܐ ܕܝ ܩܪܝܬ݂ܐ ܐܝ ܥܝܬܐ܆ ܥܰܡܝܪܐ ܒܘ ܕܳܪܐ ܕܰܐܢ ܐܰܪܒܥܐ ܥܰܠ ܐܷܫܡܶܗ ܕܡܳܪܝ ܐܶܠܝܐ ܐܘ ܬܰܫܒܳܝܐ. ܐܶܠܐ ܐܘ ܡܰܕܒܚܰܝܕ݂ܰܗ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܕ݂ܐ ܥܰܡܝܪ. ܐܘ ܬܰܪܥܐ ܕܘ ܡܰܕ݂ܒܚܐ ܣܬܶܐ ܟ݂ܘܕ ܟܷܬܝܐ ܟܬ݂ܝܘܐ ܠܰܠܥܰܠ ܡܝܢܶܗ ܥܰܡܷܪ ܒܝ ܫܰܬܐ ܕܰܬܪܰܠܦܐ ܘܡܰܬܶܐ ܘܰܐܪܒܰܥ ܝܰܘܢܳܝܬܐ ܕܟܘܝܐ ܐܰܠܦܐ ܘܬܡܳܢܶܡܐ ܘܬܠܰܬ݂ ܘܬܷܫܥܝ ܡܫܝܚܰܝܬܐ. ܡܝ ܫܰܬܐ ܕܰܬܪܰܠܦܐ ܘܫܶܬ ܗܘܠ ܠܝ ܫܰܬܐ ܕܰܬܪܰܠܦܐ ܘܫ̰ܰܥ ܣܝܡ ܚܘܕܳܬ݂ܐ ܓܰܘܳܢܳܝܐ ܒܝ ܥܝܬܐ ܕܡܳܪܝ ܐܶܠܺܝܐ ܘܚܶܕ݂ܳܪܰܗ ܡܶܐ ܠܰܘܓܷܠ ܘܠܰܪܘܰܠ. ܐܘ ܡܰܕܒܚܐ ܡܚܰܠܰܦ ܘܣܝܡ ܚܰܐ ܢܰܥܝܡܐ ܘܫܰܦܝܪܐ ܡܰܐ ܟܶܦܶܐ ܢܚܝܬܶܐ ܘܡܢܰܩܫܶܐ ܒܘ ܫܷܟܷܠ ܕܝ ܛܶܒܠܝܬ݂ܐ ܒܕܘܟܬ݂ܶܗ. ܟܬ݂ܝܘ ܒܓܰܘܶܗ ܕܰܬܠܰܬ݂ ܩܷܫܬܳܬ݂ܶܐ ܢܰܥܝܡܶܐ ܕܘ ܡܰܕ݂ܒܚܐ ܗܰܘܟ݂ܰܐ: «ܡܰܢ ܕܳܐܟ݂ܰܠ ܐܘ ܦܰܓ݂ܪܰܝܕ݂ܝ ܘܫܳܬܶܐ ܐܘ ܐܰܕܡܰܝܕ݂ܝ܆ ܐܶܒܝ ܓܦܳܝܰܫ ܘܐܳܢܐ ܐܶܒܶܗ. ܥܰܡܷܪ ܐܘ ܡܰܕ݂ܒܚܰܢܐ ܒܰܝ ܝܰܘܡܳܬ݂ܶܐ ܕܡܳܪܰܢ ܡܳܪܝ ܐܝܓ݂ܢܰܐܛܝܘܣ ܙܰܟܰܝ ܩܰܡܳܝܐ. ܘܡܳܪܝ ܛܝܡܳܬ݂ܶܐܘܳܣ ܫܡܘܐܶܝܠ ܐܰܩܛܰܫ ܐܘ ܚܰܣܝܐ ܕܛܘܪܥܰܒܕܝܢ ܘܐܘ ܪܝܫ ܕܰܝܪܐ ܕܡܳܪܝ ܓܰܒܪܺܐܶܝܠ. ܒܝ ܥܰܘܰܢܰܐ ܕܩܰܫܐ ܓܰܒܪܺܐܶܝܠ ܐܰܩܛܰܫ ܐܘ ܟܳܗܢܐ ܕܝ ܩܪܝܬ݂ܐ ܘܐܘ ܐܰܒܪܐ ܕܘ ܥܰܡܡܐ ܕܘ ܚܰܣܝܐ. ܐܝ ܫܰܬܐ 2009 ܡܫܝܚܰܝܬܐ». ܣܝܡ ܬܪܶܐ ܡܰܕ݂ܒܚܶܐ ܚܪܶܢܶܐ ܢܰܥܝܡܶܐ ܒܰܬܪܶܐ ܓܰܒܶܐ ܕܘ ܡܰܕ݂ܒܚܐ ܪܰܒܐ. ܐܘ ܬܰܪܥܐ ܪܰܒܐ ܕܘ ܗܰܝܟܠܐ ܣܬܶܐ ܣܝܡ ܡܰܟ ܟܶܦܶܐ ܢܚܝܬܶܐ ܘܡܢܰܩܫܶܐ ܕܡܷܕ݂ܝܰܕ݂. ܠܰܘܓ݂ܷܠ ܒܘ ܓܰܒܐ ܕܘ ܬܰܝܡܢܐ ܘܒܘ ܓܰܪܒܝܐ ܕܝ ܥܝܬܐ ܣܝܡܝ ܩܷܫܬܳܬ݂ܶܐ. ܐܝ ܪܰܓ݂ܠܐ ܚܠܷܡܬܐ ܕܟܷܬܘܰܐ ܒܦܰܠܓܶܗ ܕܝ ܥܝܬܐ܆ ܡܝܕܐ ܘܣܝܡ ܡܷܚܠܳܦܰܗ ܪܰܓ݂ܠܐ ܢܰܥܷܡܬܐ ܘܫܰܦܷܪܬܐ. ܠܰܪܘܰܠ܆ ܐܝ ܕܰܘܡܐ ܪܰܒܬ݂ܐ ܘܥܰܬܷܩܬܐ ܕܘ ܒܰܠܘܛܐ ܕܟܷܬܘܰܐ ܒܦܰܠܓܶܗ ܕܝ ܕܷܪܬܐ܆ ܥܰܠ ܕܐܝ ܕܷܪܬܐ ܢܰܚܝܬܐ ܔܒܝܪܝ ܕܩܘܛܥܝܠܰܗ. ܥܰܡܷܪ ܐܶܤܛܘܐ ܒܰܩ ܩܷܫܬܳܬ݂ܶܐ ܚܶܕ݂ܰܪ ܐܰܬܠܳܬ݂ܳܐ ܓܰܒܶܐ ܕܐܝ ܕܷܪܬܐ. ܒܘ ܓܰܒܐ ܕܷܛܘܳܥܶܐ ܕܝܰܘܡܐ ܥܰܡܷܪ ܥܡܰܪܰܐ ܒܷܬܪܶܐ ܩܰܬܰܬ. ܒܘ ܩܰܬ ܬܰܚܬܳܝܐ܆ ܟܝܬܐ ܨܰܠܳܢ ܠܘ ܝܬܳܘܐ ܘܡܰܕܪܰܫܬܐ ܘܒܶܝܬܣܶܠܝܶܐ. ܒܘ ܩܰܬ ܕܰܬܪܶܐ ܣܬܶܐ܆ ܟܝܬܐ ܐܰܪܒܰܥ ܩܶܠܳܝܳܬ݂ܶܐ ܠܘ ܕܡܳܟ݂ܐ ܕܰܕ݂ܰܝܦܶܐ. ܘܣܝܡ ܬܰܪܥܐ ܪܰܒܐ ܝܰܢܝ ܕܰܪܓܰܐ ܒܰܐ ܟܶܦܶܐ ܢܚܝܬܶܐ ܘܢܩܝܫܶܐ. ܐܝܢܰܩܠܰܐ ܕܢܰܕ݂ܝܦܐ ܘܡܚܰܕܬ݂ܐ ܐܝ ܥܝܬܐ ܡܶܐ ܠܰܘܓ݂ܷܠ ܘܠܰܪܘܰܠ ܘܬܰܝܷܡ ܐܘ ܫܘܓ݂ܠܐ܆ ܡܩܰܝܙܰܢܠܰܗ ܫܘܦܪܐ ܦܪܝܫܐ ܕܟܳܡܝܕܰܘܡܪܝ ܐܰܝܢܰܐ ܕܟܳܚܳܙܷܠܠܶܗ. ܘܗܰܘܝܐ ܚܕ݂ܐ ܡܰܥ ܥܝܬܳܬ݂ܶܐ ܫܰܦܝܪܶܐ ܕܛܘܪܥܰܒܕܝܢ. ܒܝ ܫܰܬܐ ܕܰܬܪܰܠܦܐ ܘܫ̰ܰܥ ܐܷܫܬܰܥܣܰܪ ܒܘ ܝܰܪܚܐ ܕܛܷܒܒܰܟ݂܆ ܐܘ ܚܰܣܝܐ ܕܛܘܪܰܥܒܕܝܢ ܐܝ ܡܥܰܠܝܘܬ݂ܐ ܕܡܳܪܝ ܛܝܡܳܬ݂ܶܐܘܣ ܫܡܘܐܶܝܠ ܐܰܩܛܰܫ ܡܩܰܪܰܘܠܶܗ ܐܶܒܰܗ ܩܶܪܳܘܐ ܩܰܕܝܫܐ ܘܣܷܡܠܶܗ ܐܘ ܦܘܬܳܚܰܝܕ݂ܰܗ. ܕܘܟܬ݂ܶܗ ܕܝ ܩܪܝܬ݂ܐ ܕܒܶܩܘܣܝܳܢܶܐ ܐܝ ܩܪܝܬ݂ܐ ܕܒܶܩܘܣܝܳܢܶܐ܆ ܟܳܦܰܝܫܐ ܒܘ ܓܰܒܐ ܕܘ ܡܰܕܢܚܐ ܕܬܘܪܟܺܝܰܐ. ܒܝ ܡܰܪܥܝܬ݂ܐ ܕܛܘܪܥܰܒܕܝܢ. ܘܡܰܣܷܪܬܳܐ ܝܐ ܒܝ ܡܕ݂ܝܬܐ ܕܡܷܕ݂ܝܰܕ݂. ܥܰܡܷܪܬܐ ܝܐ ܒܚܰܐ ܫܰܠܘܐ ܪܘܝܚܐ܆ ܒܰܝܢ ܡܷܕ݂ܝܰܕ݂ ܠܟܰܪܒܳܪܰܢ. ܪܰܚܘܩܬܳܐ ܝܐ ܡܶܐ ܡܷܕ݂ܝܰܕ݂ ܠܰܦ ܚܰܡܫܐ ܘܬܠܶܬ݂ܝ ܟܝܠܳܡܰܬܪܰܬ ܘܡܶܐ ܟܰܪܒܳܪܰܢ ܠܰܦ ܚܰܡܫܰܥܣܰܪ. ܐܘ ܙܰܒܢܐ ܕܗܰܘܝܐ ܟܰܪܒܳܪܰܢ ܘܰܠܰܝܶܐ܆ ܐܝ ܩܪܝܬ݂ܐ ܪܘܫܡܳܐܝܬ݂ ܡܨܝܪܐ ܐܶܒܰܗ ܗܘܠ ܠܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫܶܬ ܘܬܷܫܥܝ. ܒܷܬ݂ܷܪ ܐܰܥ ܥܳܡܘܪܶܐ ܕܝ ܩܪܝܬ݂ܐ ܛܠܷܒܒܶܗ ܡܝ ܩܘܛܢܘܬ݂ܐ ܕܡܷܨܪܝ ܕܝܣܰܐ ܐܝ ܩܪܝܬ݂ܐ ܒܡܷܕ݂ܝܰܕ݂. ܥܰܠ ܕܟܷܬܘܰܐ ܐܘ ܡܰܙܠܐ ܘܡܰܬ݂ܝܰܬ݂ܬ݂ܶܗ ܠܡܷܕ݂ܝܰܕ݂ ܒܰܣܷܡܬܷܪ ܡܶܐ ܟܰܪܒܳܪܰܢ. ܡܰܩܒܠܐ ܐܝ ܒܥܳܬ݂ܰܬ݂ܬ݂ܶܗ܆ ܘܕܝܣܰܐ ܡܨܝܪܐ ܐܝ ܩܪܝܬ݂ܐ ܡܝ ܫܰܬܰܝܐ ܒܡܷܕ݂ܝܰܕ݂. ܐܝ ܩܪܝܬ݂ܐ ܥܰܡܷܪܬܐ ܝܐ ܒܫܰܠܘܐ ܪܘܝܚܐ ܒܰܝܢ ܐܰܪܒܥܐ ܛܘܪܳܢܶܐ. ܒܘ ܣܰܬ݂ܘܐ ܟܳܘܶܐ ܩܘܪܐ܆ ܘܒܘ ܩܰܝܛܐ ܚܶܡܐ. ܐܝ ܕܰܪܰܔܰܐ ܕܝ ܫܚܰܢܬ݂ܐ ܟܳܣܘܠܩܐ ܗܘܠ ܠܚܰܡܷܫ ܘܰܐܪܒܥܝ. ܒܘ ܩܰܝܛܐ ܐܰܢ ܢܳܫܶܐ ܟܳܕܘܡܟ݂ܝ ܥܰܠ ܐܰܢ ܢܝܓܳܪܶܐ ܘܟܳܡܦܰܪܔܝ ܥܰܠ ܐܰܟ ܟܘܟܘܶܐ. ܥܰܠ ܕܟܷܬܝܐ ܐܝ ܩܪܝܬ݂ܐ ܒܘ ܫܰܠܘܐ܆ ܒܠܰܠܝܐ ܟܳܘܶܐ ܦܘܚܐ. ܒܰܛ ܛܘܪܳܢܶܐ ܕܚܶܕ݂ܰܪ ܐܝ ܩܪܝܬ݂ܐ ܟܝܬܐ ܡܥܰܪܶܐ ܓ݂ܰܠܰܒܶܐ ܕܥܷܡܪܝܘܰܐ ܐܰܦ݁ܦ݁ܶܗ ܡܶܡܶܩܷܡ ܐܰܥ ܥܳܡܘܪܶܐ ܕܝ ܩܪܝܬ݂ܐ. ܒܘ ܙܰܒܢܰܢܐ ܐܘ ܚܰܪܳܝܐ܆ ܟܳܡܰܚܬܝ ܐܰܚܝܶܘܷܢ ܐܰܦ݁ܦ݁ܶܗ. ܘܰܠܰܘ ܐܝ ܩܪܝܬ݂ܐ ܟܷܬܠܰܗ ܛܘܪܳܢܶܐ ܘܰܐܪܥܳܬ݂ܶܐ ܓ݂ܰܠܰܒܶܐ ܆ ܐܶܠܐ ܠܐ ܟܳܡܰܢܦܥܝ ܠܝ ܙܰܪܝܥܰܐ. ܐܰܢ ܐܰܪܥܳܬ݂ܶܐ ܢܰܥܝܡܶܐ ܘܡܰܠܝܶܐ ܟܶܦܶܢܶܐ ܘܠܰܬܢܶܐ ܡܣܰܘܝܶܐ. ܟܳܡܷܙܪܰܥ ܒܰܢ ܐܰܪܥܳܬ݂ܶܐ ܚܶܛܶܐ، ܣܥܳܪܶܐ، ܛܠܰܘܚܶܐ، ܚܷܡܨܶܐ ܘܟܘܫܢܶܐ. ܟܝܬܐ ܟܰܪܡܶܐ ܣܬܶܐ ܚܶܕ݂ܰܪ ܐܝ ܩܪܝܬ݂ܐ. ܐܰܢ ܢܳܫܶܐ ܟܳܘܷܢ ܡܳܪܐ ܠܰܟ ܟܰܪܡܶܐ. ܟܳܟܘܣܚܷܢܢܶܗ ܘܚܷܦܪܝ ܩܡܰܐ ܣܰܬܶܐ. ܒܘ ܩܰܝܛܐ ܟܐܘܟ݂ܠܝ ܥܷܢܘܶܐ ܡܷܢܢܶܗ. ܘܟܳܣܰܝܡܝ ܢܰܒܝܫܳܬ݂ܶܐ، ܕܝܒܷܣ، ܚܰܡܪܐ ܘܚܰܠܝܠܶܗ. ܐܝ ܩܪܝܬ݂ܐ ܟܷܬܠܰܗ ܛܘܪܐ ܪܘܝܚܐ ܘܡܰܠܝܐ ܐܝܠܳܢܶܐ ܕܒ ܒܰܠܘܛܶܐ. ܦܠܝܓ݂ܐ ܝܐ ܒܰܝܢ ܐܰܥ ܥܳܡܘܪܶܐ ܕܝ ܩܪܝܬ݂ܐ. ܟܳܡܰܪܥܷܢ ܐܰܚܝܶܘܷܢܰܬ݂ܬ݂ܶܗ ܘܟܳܩܘܛܥܝ ܩܰܝܣܶܐ ܠܰܫܰܢ ܕܡܘܩܕ݂ܷܢܢܶܗ ܒܝ ܨܳܒܰܐ ܒܰܝ ܝܰܘܡܳܬ݂ܶܐ ܔܰܡܘܕܶܐ ܕܘ ܣܰܬ݂ܘܐ. ܥܰܡܰܐ ܐܝܠܳܢܶܐ ܕܘ ܒܰܠܘܛܐ܆ ܟܝܬܐ ܣܬܶܐ ܠܘܙܶܐ، ܬܶܢܶܐ، ܪܶܡܘܢܶܐ، ܚܰܒܘܫܶܐ، ܡܷܫܡܷܫ، ܬܘܬ݂ܶܐ، ܣܦܰܪܓܠܶܐ ܘܒܰܛܡܶܐ. ܐܘ ܚܘܕܘܬ ܘܰܐܔ ܔܝܪܰܢܶܐ ܕܝ ܩܪܝܬ݂ܐ ܒܷܢܦܳܩܶܐ ܕܝܰܘܡܐ ܝܰܢܝ ܒܘ ܡܰܕܢܚܰܝܕ݂ܰܗ܆ ܟܝܬܐ ܐܝ ܩܪܝܬ݂ܐ ܢܰܥܷܡܬܐ ܕܕܶܪܩܘܒܶܐ. ܪܰܚܷܩܬܐ ܝܐ ܠܰܦ ܥܷܣܪܐ ܟܝܠܳܡܰܬܪܰܬ ܡܝ ܩܪܝܬ݂ܐ. ܟܳܡܳܛܶܐ ܐܘ ܬܟ݂ܘܒ ܕܝ ܩܪܝܬ݂ܐ ܠܓܘܢܕܷܟܶܐ ܢܰܥܡܶܐ. ܒܷܛܘܳܥܶܐ ܕܝܰܘܡܐ ܝܰܢܝ ܒܘ ܡܰܥܪܒܰܝܕ݂ܰܗ܆ ܟܝܬܐ ܐܝ ܩܪܝܬ݂ܐ ܕܟ݂ܰܪܰܒܶܩܰܣܪܶܐ ܩܪܝܬ݂ܐ ܕܰܛ ܛܰܝܶܐ. ܪܰܚܘܩܬܐ ܝܐ ܡܶܐ ܒܶܩܘܣܝܳܢܶܐ ܠܰܦ ܬܡܰܢܝܐ ܟܝܠܳܡܰܬܪܰܬ. ܐܘ ܬܟ݂ܘܒ ܕܝ ܩܪܝܬ݂ܐ ܟܳܡܳܛܶܐ ܠܘ ܛܘܪܐ ܕܝ ܒܰܘܰܛܰܢܶܐ. ܒܘ ܓܰܒܐ ܕܘ ܓܰܪܒܝܰܝܕ݂ܰܗ܆ ܟܝܬܐ ܐܝ ܩܪܝܬ݂ܐ ܕܕܰܝܘܰܢܶܐ ܕܟܳܥܰܝܫܝ ܐܶܒܰܗ ܛܰܝܶܐ. ܪܰܚܘܩܬܐ ܝܐ ܡܝ ܩܪܝܬ݂ܐ ܠܰܦ ܬܷܫܥܐ ܟܝܠܳܡܰܬܪܰܬ. ܐܘ ܬܟ݂ܘܒܰܝܕ݂ܰܗ ܟܳܡܳܛܶܐ ܠܝ ܚܰܪܰܝܬܐ ܕܝ ܩܪܝܬ݂ܐ ܕܒܰܝܠܐ. ܐܶܠܐ ܐܰܩ ܩܘܣܢܳܝܶܐ ܡܶܩܷܡ ܚܰܡܷܫ ܘܬܠܶܬ݂ܝ ܐܷܫܢܶܐ ܡܙܰܒܰܢܢܶܗ ܒܰܝܠܐ. ܒܘ ܓܰܒܐ ܕܘ ܬܰܝܡܢܰܝܕ݂ܰܗ܆ ܟܳܦܰܝܫܐ ܐܝ ܩܪܝܬ݂ܐ ܥܰܬܷܩܬܐ ܕܚܰܐܚ. ܕܟܳܥܰܝܫܝ ܐܰܕܝܰܘܡܰܐ ܐܶܒܰܗ ܠܰܦ ܥܷܣܪܝ ܝܰܩܪܳܬ݂ܶܐ ܣܘܪܝܳܝܶܐ. ܪܰܚܘܩܬܐ ܝܐ ܠܰܦ ܬܠܳܬ݂ܐ ܟܝܠܳܡܰܬܪܰܬ ܡܶܐ ܒܶܩܘܣܝܳܢܶܐ. ܐܘ ܬܟ݂ܘܒ ܟܳܡܳܛܶܐ ܗܘܠ ܠܷܫܟܶܪܰܐ ܒܷܠܷܢܕ ܝܰܢܝ ܫܟܶܪܶܐ ܥܶܠܰܝܬܐ. ܐܰܟܬ݂ܰܘܝܳܬ݂ܶܐ ܥܰܬܝܩܶܐ ܕܟܝܬܐ ܒܝ ܥܝܬܐ ܘܒܝ ܩܪܝܬ݂ܐ ܟ݂ܘܕ ܡܷܪܠܰܢ ܡܶܐ ܠܰܠܥܰܠ܆ ܐܝ ܩܪܝܬ݂ܐ ܕܒܶܩܘܣܝܳܢܶܐ ܥܰܬܷܩܬܳܝܐ. ܐܶܠܐ ܠܰܝܬܐ ܒܶܢܝܳܢܶܐ ܐܰܘ ܒܳܬܶܐ ܐܰܘ ܚܰܪܒܶܐ ܓ݂ܰܠܰܒܶܐ ܥܰܬܝܩܶܐ܆ ܒܓܰܘܰܐ ܕܝ ܩܪܝܬ݂ܐ ܔܓܘܪ ܡܝ ܥܝܬܐ. ܐܰܒ ܒܳܬܶܐ܆ ܣܝܡܝ ܒܰܟ ܟܶܦܶܐ ܘܒܘ ܟܰܠܫܐ ܘܒܝ ܫ̰ܝܡܰܢܬܐ. ܘܠܰܬܢܶܐ ܓ݂ܰܠܰܒܶܐ ܪܰܒܶܐ. ܠܰܦ ܐܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫܰܘܥܝ ܟܷܬܘܰܐ ܒܝ ܩܪܝܬ݂ܐ ܡܐ ܘܥܷܣܪܝ ܝܰܩܪܳܬ݂ܶܐ. ܐܶܠܐ ܐܰܕܝܰܘܡܰܐ ܟܳܥܰܝܫܝ ܚܶܕ݂ܰܪ ܥܷܣܪܝ ܝܰܩܪܳܬ݂ܶܐ ܒܝ ܩܪܝܬ݂ܐ. ܐܝ ܥܝܬܐ ܥܰܡܝܪܐ ܒܦܰܠܓܶܗ ܕܘ ܕܳܪܐ ܕܰܐܢ ܐܰܪܒܥܐ܆ ܐܶܠܐ ܡܶܐ ܙܰܒܢܐ ܠܙܰܒܢܐ ܗܰܘܝ ܫܘܓ݂ܠܳܢܶܐ ܐܶܒܰܗ. ܐܘ ܩܕܘܫܩܘܕܫܝܢ ܥܰܬܝܩܐ ܣܝܡ ܘܰܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܕ݂ܐ܆ ܘܒܰܠܟܝ ܐܘ ܥܰܬܝܩܐ ܕܰܡ ܡܰܕ݂ܒܚܶܐ ܕܛܘܪܥܰܒܕܝܢ ܘܰܐ. ܟܷܬܘܰܐ ܒܷܬܠܰܬ݂ ܕܘܟܳܬ݂ܶܐ ܟܬ݂ܰܘܝܳܬ݂ܶܐ ܣܘܪܝܳܝܶܐ ܐܰܥܠܶܗ. ܐܰܠܥܰܠ ܡܝܢܶܗ ܗܰܘܟ݂ܰܐ ܟܳܬ݂ܰܘ ܘܰܐ: ܐܘ ܩܕܘܫܩܘܕܫܝܢܰܢܐ ܗܰܘܝ ܒܰܝ ܝܰܘܡܳܬ݂ܶܐ ܕܰܢ ܢܰܒܳܗܳܬ݂ܰܝܕ݂ܰܢ ܡܳܪܝ ܐܝܓ݂ܢܰܐܛܝܘܣ ܘܩܰܫܐ ܕܰܢܚܐ ܘܩܰܫܐ ܫܰܒܐ ܣܟܘܠܳܝܶܐ. ܘܐܘ ܥܰܡܐ ܕܐܝ ܩܪܝܬ݂ܐ ܟܘܠܚܰܐ ܟ݂ܕܘ ܚܰܝܠܰܝܕ݂ܶܗ ܡܥܰܘܰܢܠܶܗ. ܐܰܠܳܗܐ ܡܰܩܒܰܠ ܡܷܢܢܶܗ. ܒܦܰܠܓܶܗ ܕܘ ܡܰܕ݂ܒܚܐ ܣܬܶܐ ܗܰܘܟ݂ܰܐ ܟܳܬ݂ܰܘ ܘܰܐ: ܒܫܶܡ ܐܰܒܐ ܘܰܒܪܐ ܘܪܘܚܐ ܩܰܕܝܫܐ܆ ܐܝ ܪܘܚܐ ܩܰܕܝܫܐ ܡܥܰܘܰܢܠܰܗ ܠܩܰܫܐ ܕܰܢܚܐ ܘܣܷܡܠܶܗ ܐܘ ܡܰܕ݂ܒܚܰܢܐ ܠܡܳܪܝ ܐܶܠܺܝܐ. ܒܰܝ ܝܰܘܡܳܬ݂ܶܐ ܕܰܐܢ ܢܰܒܳܗܳܬ݂ܰܝܕ݂ܰܢ ܡܳܪܝ ܐܝܓ݂ܢܰܐܛܝܘܣ ܐܘ ܥܰܒܕܐ ܕܡܳܪܰܢ܆ ܘܐܘ ܐܶܦܶܣܩܘܦܐ ܕܡܷܕ݂ܝܰܕ݂ ܝܰܥܩܘܒ. ܐܝ ܟܬ݂ܰܘܬܐ ܕܰܬܠܰܬ ܣܬܶܐ܆ ܚܷܕ݂ܰܪ ܐܘ ܨܠܝܒܐ ܕܟܷܬܘܰܐ ܒܦܰܠܓܶܗ ܕܘ ܡܰܕ݂ܒܚܐ ܘܰܐ. ܗܰܘܟ݂ܰܐ ܟܳܬ݂ܰܘ ܘܰܐ: ܐܶܒܳܟ݂ ܩܰܝܡܝܢܰܐ ܡܩܰܒܷܠ ܕܰܒܥܶܠܕܒܳܒܰܝܕ݂ܰܢ. ܒܘ ܓܰܒܐ ܝܰܡܝܢܳܝܐ ܕܘ ܬܰܪܥܐ ܕܘ ܡܰܕ݂ܒܚܐ ܟܷܬܘܰܐ ܟܶܦܐ. ܐܝ ܟܬ݂ܰܘܬܰܬ݂ܶܐ ܟܷܬܘܰܐ ܐܰܥܠܰܗ: ܒܫܶܡ ܐܰܒܐ ܘܰܒܪܐ ܘܪܘܚܐ ܩܰܕܝܫܐ ܚܰܕ݂ ܐܰܠܳܗܐ ܫܰܪܝܪܐ. ܐܘ ܨܠܝܒܐ ܓ݂ܠܷܒܠܶܗ ܘܓܷܕܓ݂ܳܠܰܒ. ܒܝ ܫܰܬܐ ܕܰܐܢ ܐܰܠܦܐ ܘܬܡܳܢܶܡܐ ܘܬܠܰܬ݂ ܘܬܷܫܥܝ ܡܫܝܚܰܝܬܐ܆ ܒܰܝ ܝܰܘܡܳܬ݂ܶܐ ܕܐܘ ܒܰܒܰܝܕ݂ܰܢ ܐܘ ܪܘܚܳܢܳܝܐ ܦܰܛܷܪܝܰܪܟ݂ܐ ܦܷܛܪܘܣ ܡܰܘܨܠܳܝܐ ܝܰܢܝ ܐܳܬ݂ܘܪܳܝܐ ܐܘ ܪܝܫܐ ܕܘ ܥܰܡܐ ܣܘܪܝܳܝܐ. ܕܟܳܝܳܬܰܘ ܥܰܠ ܐܘ ܟܘܪܣܝ ܫܠܝܚܳܝܐ ܕܰܐܢܛܝܘܟܺܝܰܐ ܒܝ ܕܰܝܪܐ ܕܘ ܙܰܥܦܰܪܰܢ ܒܕܘܟܬ݂ܶܗ ܕܫܶܡܥܘܢ ܦܷܛܪܘܣ. ܒܰܝ ܝܰܘܡܳܬ݂ܰܢܝ ܐܝ ܢܰܩܩܰܐ ܕܩܰܫܐ ܕܰܢܚܐ ܟܳܗܢܐ ܙܰܗܝܐ ܗܰܘܝ ܓ݂ܝܪܰܢܝ܆ ܘܢܳܛܰܪ ܘܰܐ ܐܰܦ ܦܘܩܕܳܢܶܐ ܟ݂ܘܕ ܟܳܡܰܠܷܩ ܠܘ ܕܰܪܓ݂ܰܝܕ݂ܶܗ...ܓܰܘܪܺܝܶܐ ܡܝ ܩܰܒܝܠܰܗ ܕܒܶܐ ܐܝܣܚܳܩ ܐܘ ܪܝܫܳܢܐ ܕܝ ܩܪܝܬ݂ܐ ܕܒܶܩܘܣܝܳܢܶܐ. ܒܝ ܪܝܫܳܢܘܬ݂ܐ ܕܝܘܚܰܢܳܢ. (ܐܝ ܟܬ݂ܰܘܬܐ ܚܪܶܬܐ ܠܐ ܡܷܩܪܳܝܐ ܘܰܐ). ܟ݂ܘܕ ܟܳܡܰܚܘܶܐ ܡܰܟܬ݂ܰܘܝܳܬܶܐ ܕܥܰܠ ܐܰܟ ܟܶܦܶܐ܆ ܬܰܪܬܶܐ ܟܳܪܶܐ ܗܰܘܝ ܚܘܕܳܬ݂ܐ ܒܝ ܥܝܬܐ. ܐܶܠܐ ܒܘ ܕܳܪܐ ܕܰܥ ܥܷܣܪܝ܆ ܓ݂ܰܠܰܒܶܐ ܟܳܪܶܐ ܗܰܘܝ ܫܘܓ݂ܠܳܢܶܐ ܘܚܘܕܳܬ݂ܶܐ ܗܘܠ ܕܡܰܛܝܐ ܐܝ ܥܝܬܐ ܠܝ ܐܰܝܟܰܢܳܝܘܬ݂ܐ ܕܰܐܕܝܰܘܡܰܐ. ܐܘ ܫܘܪܐ ܕܝ ܕܷܪܬܐ ܕܝ ܥܝܬܐ ܚܰܪܝܘܐ ܘܢܰܦܝܠܐ ܘܰܐ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܕ݂ܳܐ ܘܫܰܘܥܝ. ܒܝ ܝܰܨܝܦܘܬ݂ܐ ܕܩܰܫܐ ܝܰܘܣܦ ܕܶܡܝܪ ܕܟܷܬܘܰܐ ܐܘ ܟܳܗܢܐ ܕܝ ܥܝܬܐ ܘܒܝ ܥܰܘܰܢܰܐ ܕܘ ܥܰܡܐ ܕܝ ܩܪܝܬ݂ܐ܆ ܣܝܡ ܫܘܪܐ ܥܶܠܳܝܐ ܠܝ ܕܷܪܬܐ ܒܕܘܟܬ݂ܶܗ ܕܘ ܥܰܬܝܩܐ. ܘܚܕ݂ܐ ܕܰܪܓܰܐ (ܬܰܪܥܐ ܪܰܒܐ ܕܝ ܕܷܪܬܐ). ܟܳܬ݂ܰܘ ܘܰܐ ܠܰܠܥܰܠ ܡܝ ܕܰܪܓܰܐ ܗܰܘܟ݂ܰܐ: ܣܝܡ ܐܘ ܬܰܪܥܐ ܘܐܘ ܫܘܪܰܢܐ ܒܝ ܝܰܨܝܦܘܬ݂ܐ ܕܩܰܫܐ ܝܰܘܣܶܦ ܘܒܝ ܥܰܘܰܢܰܐ ܕܕܰܢܚܐ ܐܘ ܐܰܒܪܐ ܕܒܰܪܨܰܘܡܐ ܒܝ ܫܰܬܐ 1971. ܘܗܰܘܟ݂ܰܐ ܐܝ ܥܝܬܐ ܫܰܒܝܗܐ ܠܩܰܠܥܰܐ ܕܩܘܕܪܐ ܢܷܛܪܐ ܐܰܢ ܢܰܒܢܰܝܕ݂ܰܗ ܒܰܝ ܝܰܘܡܳܬ݂ܶܐ ܕܝ ܙܘܥܬ݂ܐ. ܒܷܬ݂ܷܪ ܡܶܐ ܕܩܰܫܐ ܝܰܘܣܶܦ ܕܰܡܝܪ ܐܰܙܙܶܗ ܠܰܐܘܪܘܦ݁ܰܐ܆ ܐܝ ܥܝܬܐ ܦܰܐܝܫܐ ܕܠܐ ܟܳܗܢܐ ܙܰܒܢܐ ܝܰܪܝܟ݂ܐ. ܒܘ ܙܰܒܢܰܘܐ ܫܰܡܳܫܐ ܓܰܒܪܺܐܝܶܠ ܐܰܩܛܰܫ܆ ܟ݂ܳܕܰܡ ܘܰܐ ܒܝ ܥܝܬܐ. ܒܘ ܙܰܒܢܰܝܕ݂ܶܗ ܣܬܶܐ ܥܰܡܝܪܝ ܬܠܰܬ݂ ܩܶܠܳܝܳܬ݂ܶܐ ܠܝ ܣܢܝܩܘܬ݂ܐ. ܗܰܘܟ݂ܰܐ ܟܳܬ݂ܰܘ ܘܰܐ ܥܰܠ ܐܝ ܟܶܦܐ ܕܠܰܠܥܰܠ ܡܷܢܢܶܗ: ܥܰܡܝܪܝ ܐܰܩ ܩܶܠܳܝܳܬ݂ܰܢܝ ܒܝ ܝܰܨܝܦܘܬ݂ܐ ܕܷܡܫܰܡܫܳܢܐ ܓܰܒܪܺܐܝܶܠ ܐܰܩܛܰܫ ܘܒܝ ܥܰܘܰܢܰܐ ܕܰܢ ܢܳܫܶܐ ܕܝ ܩܪܝܬ݂ܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܠܰܬ݂ ܘܬܡܳܢܝ. ܒܘ ܙܰܒܢܐ ܕܣܝܡܐ ܐܝ ܥܡܰܪܰܬ݂ܶܐ܆ ܡܰܢܕܰܦܦܶܗ ܐܝ ܕܷܪܬܐ ܕܝ ܥܝܬܐ ܡܰܩ ܩܰܘܪܶܐ ܘܡܣܰܘܝܰܠܠܶܗ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫ̰ܰܥ ܘܬܷܫܥܝ܆ ܢܰܕ݂ܝܦܝ ܐܰܫ ܫܘܪܳܢܶܐ ܕܠܰܘܓ݂ܷܠ ܘܕܠܰܪܘܰܠ ܕܝ ܥܝܬܐ. ܘܣܝܡܐ ܐܝ ܓܳܪܐ ܫ̰ܝܡܰܢܬܐ. ܥܰܠ ܐܰܫ ܫܘܓ݂ܠܳܢܰܢܝ ܣܬܶܐ ܟܬ݂ܝܘ ܥܰܠ ܟܶܦܐ ܗܰܘܟ݂ܰܐ: ܡܨܰܠܶܘܘ ܥܰܠ ܐܰܠܝܰܐܣ ܐܘ ܐܰܒܪܐ ܕܓܰܘܪܺܝܶܐ ܕܒܶܐ ܚܰܘܫܰܒ ܐܘ ܩܘܣܢܳܝܐ ܕܟܳܥܳܝܰܫ ܒܒܰܠܔܝܟܰܐ. ܕܗܝܝܶܗ ܗܘܠܶܗ ܐܘ ܡܰܨܪܰܦ ܕܘ ܫܘܓ݂ܠܰܢܐ ܕܣܝܡ ܒܝ ܥܝܬܐ. ܠܘ ܕܘܟ݂ܪܳܢܐ ܕܰܥ ܥܰܢܝܕ݂ܰܝܕ݂ܶܗ. ܐܝ ܥܝܬܐ܆ ܟ݂ܘܕ ܓ݂ܰܠܰܒܶܐ ܡܰܥ ܥܝܕܳܬ݂ܶܐ ܕܛܘܪܥܰܒܕܝܢ܆ ܡܘ ܝܰܘܡܐ ܕܣܝܡܐ ܠܰܬܘܰܝܠܰܗ ܩܘܒܐ ܕܘ ܢܳܩܘܫܐ. ܒܝ ܫܰܬܐ ܕܰܬܪܰܠܦܐ܆ ܣܝܡܐ ܩܘܒܐ ܫܰܦܷܪܬܐ ܘܚܠܝܬ݂ܐ ܡܰܟ ܟܶܦܶܐ ܢܚܝܬܶܐ ܘܡܢܰܩܫܶܐ ܕܡܷܕ݂ܝܰܕ݂. ܒ݂ܷܬ݂ܷܪ ܡܶܐ ܕܟܰܡܝܠܐ܆ ܗܘܠܐ ܫܘܦܪܐ ܦܪܝܫܐ ܗܰܡ ܠܝ ܥܝܬܐ ܘܗܰܡ ܠܝ ܩܪܝܬ݂ܐ. ܟܬ݂ܝܘ ܒܷܬܪܶܗ ܡܰܓ ܓܰܒܰܝܕ݂ܰܗ ܗܰܘܟ݂ܰܐ: ܣܝܡܐ ܐܝ ܩܘܒܰܬ݂ܶܐ ܒܰܝ ܝܰܘܡܳܬ݂ܶܐ ܕܡܳܪܰܢ ܡܳܪܝ ܐܝܓ݂ܢܰܐܛܝܘܣ ܙܰܟܰܝ ܩܰܡܳܝܐ ܕܒܶܐ ܥܝܘܰܨ. ܘܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ ܐܘ ܚܰܣܝܐ ܕܛܘܪܥܰܒܕܝܢ. ܒܝ ܫܰܬܐ ܕܰܬܪܰܠܦܐ ܡܫܝܚܰܝܬܐ. ܒܘ ܓܰܒܐ ܕܘ ܡܰܕܢܚܐ ܣܬܶܐ ܗܰܘܟ݂ܰܐ ܟܬ݂ܝܘܳܝܐ: ܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ܆ ܗܘܠܶܗ ܚܰܩ ܕܝ ܩܘܒܰܬ݂ܶܐ ܕܘ ܢܳܩܘܫܐ. ܡܨܰܠܶܘܘ ܥܰܠ ܩܰܫܐ ܓܰܒܪܺܐܝܶܠ ܐܰܩܛܰܫ ܕܒܶܐ ܓ݂ܙܰܠܐ ܘܥܰܠ ܟܘܠ ܡܰܢ ܕܗܰܘܝܠܶܗ ܫܰܘܬܳܦܘܬ݂ܐ. ܟܷܬܘܰܐ ܟܶܦܐ ܚܪܶܬܐ ܥܰܬܷܩܬܐ ܕܩܰܘܪܐ ܕܟܷܬܘܰܐ ܟܬܰܘܬܐ ܐܰܥܠܰܗ ܒܘ ܫܘܪܐ ܕܝ ܥܝܬܐ. ܗܰܘܟ݂ܰܐ ܟܬ݂ܝܘܳܝܐ ܐܰܥܠܰܗ: ܢܰܦܷܩ ܡܘ ܥܳܠܡܰܢܐ܆ ܘܡܫܰܢܶܠܶܗ ܓܰܒ ܐܘ ܡܳܪܰܝܕ݂ܶܗ ܪܰܒܰܢ ܡܰܪܘܢ. ܒܝ ܫܰܬܐ ܕܰܐܢ ܐܰܠܦܐ ܘܚܰܡܷܫܡܐ ܘܫ̰ܰܥ ܘܚܰܡܫܝ. ܒܓܰܘܶܗ ܕܝ ܩܪܝܬ݂ܐ ܔܓ݂ܘܪ ܡܝ ܥܝܬܐ܆ ܠܰܝܬܐ ܥܡܰܪܰܬ ܥܰܬܝܩܶܐ. ܐܶܠܐ ܚܶܕ݂ܰܪ ܐܝ ܩܪܝܬ݂ܐ ܘܒܘ ܛܘܪܐ ܟܝܬܐ ܥܝܕܳܬ݂ܶܐ ܘܕܰܝܪܶܐ ܘܚܰܪܒܶܐ ܥܰܬܝܩܶܐ. ܐܝ ܚܘܒܐ ܕܘ ܥܰܡܐ ܕܝ ܩܪܝܬ݂ܐ ܕܠܰܦ ܐܝ ܗܰܝܡܳܢܘܬ݂ܐ ܐܘ ܥܰܡܐ ܕܝ ܩܪܝܬ݂ܐ ܕܒܶܩܘܣܝܳܢܶܐ܆ ܡܰܙ ܙܰܒܢܶܐ ܩܰܡܳܝܶܐ ܟܰܫܝܪܐ ܘܐܘ ܡܗܰܝܡܢܳܝܐ. ܡܘ ܝܰܘܡܐ ܕܡܰܩܒܰܠܠܶܗ ܐܝ ܡܫܝܚܳܝܘܬ݂ܐ ܗܘܠ ܠܰܕܝܰܘܡܰܐ܆ ܐܝ ܩܪܝܬ݂ܐ ܗܰܘܝܐ ܩܪܝܬ݂ܐ ܕܰܡܫܝܚܳܝܶܐ ܣܘܪܝܳܝܶܐ. ܘܠܰܬܝܐ ܟܬ݂ܝܘܐ ܒܘ ܡܰܟܬܰܒܙܰܒܢܐ ܕܟ݂ܰܠܝܐ ܐܘ ܕܥܰܐܝܫܝ ܐܶܒܰܗ ܛܰܝܶܐ. ܥܰܠ ܕܐܘ ܥܰܡܐ ܕܐܝ ܩܪܝܬ݂ܐ ܒܟܘܠ ܓ݂ܝܪܰܐ ܢܛܷܪܠܶܗ ܐܝ ܩܪܝܬ݂ܐ ܘܠܐ ܛܪܶܠܶܗ ܕܥܳܒܰܪܠܰܗ ܪܰܓ݂ܠܐ ܢܘܟ݂ܪܰܝܬܐ. ܒܰܙ ܙܰܒܢܶܐ ܩܰܡܳܝܶܐ܆ ܐܘ ܡܷܢܝܳܢܐ ܕܘ ܥܰܡܐ ܕܝ ܩܪܝܬ݂ܐ ܓ݂ܰܠܰܒܶܐ ܘܰܐ܆ ܡܰܘܟ݂ܰܐ ܐܰܢ ܢܳܫܶܐ ܢܷܦܩܝܘܰܐ ܠܰܪܘܰܠ ܡܝ ܩܪܝܬ݂ܐ ܘܡܰܥܰܡܪܝ ܘܰܐ ܟܰܦܪܘܢܶܐ ܝܰܢܝ ܩܷܪܝܰܘܳܬ݂ܶܐ ܢܰܥܝܡܶܐ ܕܥܷܡܪܝ ܐܰܦ݁ܦ݁ܗ. ܘܙܷܬܬܷܪ ܡܶܐ ܕܟܷܬܘܰܝܢܶܗ ܫܓ݂ܝܡܳܝܶܐ ܒܰܫ ܫܘܓ݂ܠܳܢܰܬ݂ܬ݂ܶܗ܆ ܫܓ݂ܝܡܳܝܶܘܰܝܢܶܗ ܒܘ ܦܘܠܚܳܢܐ ܪܘܚܳܢܳܝܐ. ܘܗܰܬ݂ܶܐ ܟܳܡܰܚܰܘܝܐ ܡܰܥ ܥܝܕܳܬ݂ܶܐ ܕܡܰܥܡܰܪܪܶܗ ܚܶܕ݂ܰܪ ܐܝ ܩܪܝܬ݂ܐ ܘܒܰܛ ܛܘܪܳܢܶܐ. ܐܰܕܝܰܘܡܰܐ ܣܬܶܐ ܗܰܡ ܒܛܘܪܥܰܒܕܝܢ ܘܗܰܡ ܒܰܐܘܪܘܦ݁ܰܐ܆ ܙܷܬܬܷܪ ܡܰܩ ܩܷܪܝܰܘܳܬ݂ܶܐ ܟܘܠܠܶܗ ܟܝܬܐ ܚܰܣܝܶܐ ܘܕܰܝܪܳܝܶܐ ܘܩܰܫܶܐ ܡܶܐ ܒܶܩܘܣܝܳܢܶܐ. ܟܝܬܐ ܠܰܦ ܚܰܡܷܫ ܘܥܷܣܪܝ ܥܝܕܳܬ݂ܶܐ ܘܕܰܝܪܶܐ ܒܰܛ ܛܘܪܳܢܶܐ ܚܶܕ݂ܰܪ ܒܶܩܘܣܝܳܢܶܐ. ܐܘܥܕܐ ܓܷܕܟܘܬ݂ܘܝܢܰܐ ܐܷܫܡܶܗ ܕܰܐܝܢܰܐ ܕܟܷܬܢܶܗ ܝܕ݂ܝܥܶܐ: ܐܝ ܩܪܝܬ݂ܐ ܕܕܶܪܩܘܒܶܐ: ܟܷܡܡܝ ܡܶܡܶܩܷܡ ܗܰܬ݂ܶܐ ܕܰܝܪܐ ܘܰܐ. ܒܷܬ݂ܷܪ ܐܝ ܢܰܩܩܰܐ ܕܠܰܬܷܡ ܥܰܡܐ ܡܶܐ ܒܶܩܘܣܝܳܢܶܐ ܘܡܶܐ ܓܘܢܕܷܟܶܐ ܢܰܥܡܶܐ ܠܕܶܪܩܘܒܶܐ܆ ܗܰܘܝܐ ܩܪܝܬ݂ܐ ܢܰܥܷܡܬܐ. ܟܝܬܐ ܐܶܒܰܗ ܐܝ ܥܝܬܐ ܕܡܳܪܝ ܝܰܥܩܘܒ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܬܷܫܥܝ܆ ܐܝ ܩܘܛܢܘܬ݂ܐ ܕܬܷܪܟܺܝܰܐ ܡܰܟ݂ܠܳܠܰܗ ܘܡܳܦܰܩܠܰܗ ܐܰܬ ܬܰܪܬܶܐ ܝܰܩܪܳܬ݂ܶܐ ܡܝܢܰܗ. ܐܰܝ ܝܰܩܪܳܬ݂ܳܐ ܐܰܙܙܷܢ ܠܝ ܩܪܝܬ݂ܐ ܕܒܶܩܘܣܝܳܢܶܐ ܗܘܠ ܠܝ ܫܰܬܐ ܕܰܬܪܰܠܦܐ ܘܬܰܪܬܶܐ. ܒܷܬ݂ܷܪ ܕܰܥܝܪܝ ܘܡܰܥܡܰܪܪܶܗ ܒܳܬܶܐ ܡܶܐ ܚܰܬ݂ܐ ܒܝ ܩܪܝܬ݂ܐ ܕܕܶܪܩܘܒܶܐ. ܐܝ ܩܪܝܬ݂ܐ ܕܣܰܪܗܰܦܕܰܢܰܐ: ܐܝ ܩܪܝܬ݂ܐ ܥܰܬܷܩܬܐ ܕܣܰܪܗܰܦܕܰܢܰܐ ܟܳܦܰܝܫܐ ܠܰܦ ܢܦܳܩܶܗ ܕܝܰܘܡܐ ܕܕܶܪܩܘܒܶܐ. ܟܝܬܐ ܬܰܡܐ ܗܶܫ ܚܰܪܒܶܐ ܘܚܕ݂ܐ ܩܷܫܬܐ ܥܰܬܷܩܬܐ ܘܫܰܦܷܪܬܐ ܕܟܳܡܝܕ݂ܳܥܐ ܐܝ ܥܝܬܐ ܕܝ ܝܳܠܕܰܬ݂ ܐܰܠܳܗܐ ܕܥܰܡܝܪܐ ܒܘ ܕܳܪܐ ܕܰܐܢ ܐܰܪܒܥܐ ܒܷܬ݂ܷܪ ܡܶܐ ܡܫܝܚܐ. ܐܝ ܕܰܝܪܐ ܕܒܰܝܢ ܐܰܢ ܢܰܚܠܶܐ: ܐܝ ܕܰܝܪܰܬ݂ܶܐ ܩܰܪܘܬܐ ܠܣܰܪܗܰܦܕܰܢܰܐ ܝܐ. ܐܝ ܥܝܬܐ ܕܡܳܪܝ ܐܳܣܝܐ: ܗܶܫ ܥܰܡܷܪܬܐ ܝܐ ܘܟܳܦܰܝܫܐ ܒܘ ܛܘܪܐ ܕܣܰܪܗܰܦܕܰܢܰܐ. ܗܰܡ ܐܰܡܫܝܚܳܝܶܐ ܗܰܡ ܣܬܶܐ ܐܰܛ ܛܰܝܶܐ ܟܳܙܰܝܪܝ ܐܝ ܥܝܬܰܬ݂ܶܐ ܠܰܫܰܢ ܕܢܳܝܰܚܚܶܗ ܡܰܟ ܟܶܘܶܐ ܕܟܷܬܬܶܗ. ܐܝ ܩܪܝܬ݂ܐ ܕܒܰܝܠܐ: ܩܪܝܬ݂ܐ ܥܰܬܷܩܬܐ ܝܐ. ܒܘ ܡܰܟܬܰܒܙܰܒܢܐ ܕܝ ܚܰܣܝܘܬ݂ܐ ܕܛܘܪܥܰܒܕܝܢ ܙܷܬܬܷܪ ܡܶܐ ܒܶܩܘܣܝܳܢܶܐ ܟܳܫܳܦܰܥ ܐܷܫܡܰܗ. ܗܘܠ ܠܘ ܕܳܪܐ ܕܰܬܫ̰ܰܥܣܰܪ ܥܰܝܫܝܘܰܐ ܢܳܫܶܐ ܒܝ ܩܪܝܬ݂ܐ ܕܒܰܝܠܐ. ܐܝ ܥܝܬܰܝܕ݂ܰܗ ܗܘܠ ܠܰܢ ܐܷܫܢܰܢܝ ܥܰܡܷܪܬܐ ܘܰܐ. ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܬܡܳܢܝ ܦܬܝܚ ܕܰܪܒܐ ܡܶܐ ܒܶܩܘܣܝܳܢܶܐ ܠܘ ܣܰܪܕܶܦ. ܐܝܢܰܩܩܰܐ ܕܷܦܬܷܚܚܶܗ ܐܘ ܕܰܪܒܐ ܡܰܚܪܰܘܘܶܗ ܐܝ ܥܝܬܐ. ܐܰܚ ܚܰܪܒܶܐ ܕܡܳܪܝ ܓܰܒܪܺܐܝܶܠ: ܐܰܚ ܚܰܪܒܰܢܝ ܟܳܦܰܝܫܝ ܒܷܢܦܳܩܶܗ ܕܝܰܘܡܐ ܕܝ ܩܪܝܬ݂ܐ ܕܒܶܩܘܣܝܳܢܶܐ. ܪܰܚܘܩܶܢܶܐ ܡܝ ܩܪܝܬ݂ܐ ܠܰܦ ܬܠܳܬ݂ܐ ܟܝܠܳܡܰܬܪܰܬ. ܠܓܳܪܰܢ ܕܘ ܡܰܡܪܐ ܕܰܣ ܣܳܘܶܐ܆ ܐܘ ܩܰܕܝܫܐ ܡܳܪܝ ܓܰܒܪܺܐܝܶܠ ܒܰܚ ܚܰܪܒܰܢܝ ܡܰܘܠܰܕ݂ ܘܝܰܪܘ. ܡܰܘܟ݂ܰܐ ܗܘܠ ܠܰܕܝܰܘܡܰܐ ܟܳܡܷܩܪܷܢ ܐܰܚ ܚܰܪܒܶܐ ܕܡܳܪܝ ܓܰܒܪܺܐܝܶܠ. ܐܝ ܕܰܝܪܐ ܕܡܳܪܝ ܫܶܡܥܘܢ: ܟܳܦܰܝܫܐ ܒܷܢܦܳܩܶܗ ܕܝܰܘܡܐ ܕܒܶܩܘܣܝܳܢܶܐ. ܩܰܪܘܬܳܝܐ ܠܝ ܩܪܝܬ݂ܐ ܒܘ ܕܰܪܒܐ ܕܟܘܙܙܶܗ ܡܶܐ ܒܶܩܘܣܝܳܢܶܐ ܠܕܶܪܩܘܒܶܐ. ܒܰܝܢ ܐܘ ܥܰܡܐ ܕܝ ܩܪܝܬ݂ܐ ܟܳܡܝܕ݂ܳܥܐ ܐܝ ܕܝܪܷܢܬܐ ܝܰܢܝ ܕܰܝܪܐ ܢܰܥܷܡܬܐ. ܐܘ ܩܛܳܪܰܝܕ݂ܰܗ ܢܰܦܷܠ ܐܶܠܐ ܐܰܫ ܫܘܪܳܢܶܐ ܗܶܫ ܠܐ ܢܰܦܝܠܝ. ܐܝ ܥܝܬܐ ܕܡܳܪܝ ܒܰܪܨܰܘܡܐ ܕܝ ܒܰܪܚܶܡܝܝܶܗ: ܟܳܦܰܝܫܐ ܒܘ ܛܘܪܐ ܕܒܶܩܘܣܝܳܢܶܐ ܘܩܰܪܘܬܳܝܐ ܠܝ ܒܰܪܚܶܡܝܝܶܗ. ܐܝ ܥܝܬܐ ܥܰܡܷܪܬܳܝܐ ܘܢܰܩܰܘܰܬ ܟܳܡܝܨܰܠܶܐ ܐܶܒܰܗ. ܒܝ ܫܰܬܐ ܕܰܬܪܰܠܦܐ ܘܬܰܪܬܶܗ ܒܝ ܥܰܘܰܢܰܐ ܕܟ݂ܳܪܝ ܡܰܠܟܶܐ ܐܰܩܝܘܙ܆ ܢܰܕ݂ܝܦܐ ܘܡܚܰܕܬ݂ܐ. ܢܰܩܠܰܘܳܬ݂ܶܐ ܟܳܡܝܨܰܠܶܐ ܘܟܳܡܝܩܰܪܰܘ ܐܶܒܰܗ. ܐܝ ܥܝܬܐ ܕܝ ܕܰܘܡܐ ܕܘ ܣܩܳܘܦ ܝܰܢܝ ܕܘ ܐܶܦܶܣܩܘܦܐ: ܟܳܦܰܝܫܐ ܠܰܦ ܛܘܳܥܶܗ ܕܝܰܘܡܐ ܕܝ ܩܪܝܬ݂ܐ. ܟܝܬܐ ܕܰܘܡܐ ܪܰܒܬ݂ܐ ܒܝ ܕܷܪܬܰܝܕ݂ܰܗ ܕܟܳܡܰܚܰܘܝܐ ܡܝ ܩܪܝܬ݂ܐ. ܐܷܫܡܶܗ ܕܰܝ ܝܰܩܪܳܬ݂ܐ ܕܒܶܩܘܣܝܳܢܶܐ ܟܝܬܐ ܚܶܕ݂ܰܪ ܥܣܰܪ ܥܰܐܝܠܰܬ ܪܰܒܶܐ ܒܝ ܩܪܝܬ݂ܐ. ܥܰܡ ܐܘ ܙܰܒܢܐ ܐܰܥ ܥܰܐܝܠܰܢܝ ܝܰܪܝܘܝ ܘܡܒܰܪܒܙܝ ܒܷܒܪܝܬ݂ܐ. ܐܷܫܡܶܗ ܕܰܥ ܥܰܐܝܠܰܬ ܪܰܒܶܐ ܗܰܢܝܢܶܗ: ܐܰܟ݂ ܟ݂ܰܙܡܳܟܝܝܶܗ. ܐܰ ܐܳܕܷܡܟܝܝܶܗ. ܐܰܣ ܣܰܦܰܪܟܝܝܶܗ. ܐܰܫ ܫܰܗܷܪܟܰܢܝܝܶܗ. ܐܰܣܚܳܩܰܝܬܟܝܝܶܗ ܘܰܐܒ ܒܰܫܳܟܝܝܶܗ ܩܰܪܝܘܶܢܶܐ ܠܷܚܕ݂ܳܕ݂ܶܐ. ܐܰܚ ܚܰܢܳܟܝܝܶܗ. ܐܰܓ ܓܰܘܪܳܟܝܝܶܗ. ܒܶܐ ܝܰܬܘܡܐ ܘܒܶܐ ܨܠܝܘܐ ܩܰܪܝܘܶܢܶܐ ܠܷܚܕ݂ܳܕ݂ܶܐ. ܒܶܐ ܫ̰ܘܪܐ. ܒܶܐ ܠܰܥܓܐ ܘܒܶܐ ܩܰܫܐ ܪܰܒܐ ܩܰܪܝܘܶܢܶܐ ܠܷܚܕ݂ܳܕ݂ܶܐ. ܒܶܐ ܩܰܫܐ ܕܰܢܚܐ. ܐܰܟ ܟܳܗܢܶܐ ܕܢܰܦܝܩܝ ܡܶܐ ܒܶܩܘܣܝܳܢܶܐ ܥܰܡ ܐܘ ܥܒܳܪܐ ܕܰܙ ܙܰܒܢܶܐ܆ ܢܰܦܝܩܝ ܟܳܗܢܶܐ ܓ݂ܰܠܰܒܶܐ ܡܝ ܩܪܝܬ݂ܐ ܕܒܶܩܘܣܝܳܢܶܐ ܕܷܡܫܰܡܰܫܫܶܗ ܐܝ ܥܝܬܐ ܘܐܘ ܥܰܡܐ ܣܘܪܝܳܝܐ. ܒܘ ܙܰܒܢܰܢܐ ܣܬܶܐ ܟܝܬܐ ܙܷܬܬܷܪ ܡܰܩ ܩܷܪܝܰܘܳܬ݂ܶܐ ܟܘܠܠܶܗ ܩܰܫܶܐ ܘܕܰܝܪܳܝܶܐ ܘܚܰܣܝܶܐ ܕܡܰܘܠܕ݂ܝ ܒܝ ܩܪܝܬ݂ܐ ܘܟܳܟ݂ܘܕܡܝ ܒܛܘܪܥܰܒܕܝܢ ܘܒܰܐܘܪܘܦ݁ܰܐ. ܐܝ ܩܪܝܬ݂ܐ ܕܒܶܩܘܣܝܳܢܶܐ ܟܷܬܠܰܗ ܫܘܒܗܳܪܐ ܪܰܒܐ ܥܰܠ ܕܢܰܦܷܩ ܡܝܢܰܗ ܩܰܕܝܫܐ ܡܫܰܡܗܐ ܘܪܰܒܐ ܡܳܪܝ ܓܰܒܪܺܐܝܶܠ ܣܬܶܐ. ܐܘܥܕܐ ܓܷܕܟܘܬ݂ܘܝܢܰܐ ܐܰܢ ܢܷܫܡܳܢܶܗ ܕܰܟ ܟܳܗܢܶܐ ܕܡܶܩܷܡ ܡܘ ܣܰܝܦܐ ܕܟܷܬܢܶܐ ܝܕ݂ܝܥܶܐ ܐܰܢ ܢܷܫܡܳܢܰܬ݂ܬ݂ܶܗ܆ ܘܰܐܟ ܟܳܗܢܶܐ ܕܰܐܕܝܰܘܡܰܐ ܟܳܟ݂ܘܕܡܝ ܒܝ ܥܝܬܐ ܣܘܪܝܰܝܬܐ: - ܩܰܫܐ ܕܰܢܚܐ܆ ܡܫܰܡܰܫ ܘܰܐ ܒܰܝܢ ܠܝ ܫܰܬܐ ܕܰܐܢ ܐܰܠܦܐ ܘܬܡܳܢܶܡܐ ܘܚܰܡܫܝ ܠܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܕ݂ܐ. ܐܷܫܡܶܗ ܟܬ݂ܝܘܐ ܘܰܐ ܥܰܠ ܐܘ ܩܕܘܫܩܘܕܫܝܢ ܥܰܬܝܩܐ ܟ݂ܘܕ ܡܰܚܘܶܠܰܢ ܡܶܐ ܠܰܠܥܰܠ. - ܩܰܫܐ ܫܰܒܐ܆ ܡܝ ܥܰܐܝܠܰܐ ܕܰܓ ܓܰܘܪܳܟܝܝܶܗ ܘܰܐ. ܗܝܝܶܗ ܣܬܶܐ ܐܷܫܡܶܗ ܟܬ݂ܝܘܐ ܘܰܐ ܥܰܠ ܐܘ ܩܕܘܫܩܘܕܫܝܢ ܥܰܬܝܩܐ. - ܩܰܫܐ ܐܶܠܺܝܐ܆ ܐܘ ܐܰܒܪܐ ܕܩܰܫܐ ܕܰܢܚܐ ܘܰܐ. ܒܷܬ݂ܷܪ ܡܶܐ ܕܷܡܚܰܣܶܐ ܐܘ ܒܰܒܐ ܡܰܣܪܰܚ ܟܳܗܢܐ ܒܕܘܟܬ݂ܶܗ. - ܩܰܫܐ ܝܶܫܘܥ܆ ܡܝ ܝܩܰܪܬ݂ܐ ܕܒܶܐ ܩܰܫܐ ܪܰܒܐ ܘܰܐ. - ܩܰܫܐ ܓܰܒܪܺܐܝܶܠ܆ ܟܬ݂ܝܘܐ ܝܐ ܐܷܫܡܶܗ ܒܘ ܡܰܟܬܰܒܙܰܒܢܐ ܕܝ ܩܪܝܬ݂ܐ. - ܕܰܝܪܳܝܐ ܨܰܘܡܶܐ܆ ܡܝ ܝܩܰܪܬ݂ܐ ܕܒܶܐ ܒܰܚܕܐ ܕܰܐ ܐܳܕܷܡܟܝܝܶܗ ܝܐ. ܐܷܫܡܗ ܕܘ ܒܰܒܐ ܐܰܦܪܶܝܡ ܘܰܐ. ܥܰܝܷܫ ܘܰܐ ܒܝ ܥܝܬܐ ܕܡܳܪܝ ܒܰܪܨܰܘܡܐ ܕܝ ܒܰܪܚܶܡܝܝܶܗ. ܟܷܡܡܝ ܛܪܶܠܶܗ ܐܝ ܥܝܬܐ ܕܡܳܪܝ ܒܰܪܨܰܘܡܐ ܘܰܐܙܙܶܗ ܘܰܐ ܠܷܚܕ݂ܐ ܡܰܕ ܕܰܝܪܶܐ ܕܘ ܛܘܪܐ ܕܐܝܙܠܐ. - ܕܰܝܪܳܝܐ ܝܘܚܰܢܳܢ܆ ܡܝ ܝܩܰܪܬ݂ܐ ܕܒܶܐ ܡܘܪܰܕ ܕܰܓ ܓܰܘܪܳܟܝܝܶܗ ܘܰܐ. - ܕܰܝܪܳܝܐ ܣܰܦܰܪ܆ ܗܰܢܐ ܣܬܶܐ ܡܝ ܝܩܰܪܬ݂ܐ ܕܰܓ ܓܰܘܪܳܟܝܝܶܗ ܘܐܘ ܐܰܒܪܐ ܕܘ ܥܰܡܡܐ ܕܩܰܫܐ ܫܰܒܐ ܘܰܐ. ܡܫܰܢܶܠܶܗ ܒܝ ܕܰܝܪܐ ܕܡܳܪܝ ܝܰܥܩܘܒ ܐܝ ܕܶܪܓ݂ܷܙܰܠܟܶܐ. ܐܰܚ ܚܰܣܝܶܐ ܘܰܐܕ ܕܰܝܪܳܝܶܐ ܘܰܐܩ ܩܰܫܶܐ ܕܟܳܡܫܰܡܫܝ ܐܰܕܝܰܘܡܰܐ ܒܝ ܥܝܬܐ ܣܘܪܝܰܝܬܐ ܐܝ ܩܪܝܬ݂ܐ ܕܒܶܩܘܣܝܳܢܶܐ܆ ܡܝ ܚܰܪܰܝܬܐ ܕܘ ܕܳܪܐ ܕܰܬܫ̰ܰܥܣܰܪ ܗܘܠ ܠܦܰܠܓܶܗ ܕܘ ܕܳܪܐ ܕܰܥ ܥܷܣܪܝ܆ ܥܰܠ ܕܠܰܬܘܰܐ ܟܳܗܢܐ ܐܰܘ ܡܰܠܦܳܢܐ ܐܶܒܰܗ܆ ܦܰܐܝܫܐ ܪܰܚܘܩܬܐ ܡܘ ܝܘܠܦܳܢܐ ܡܫܝܚܳܝܐ ܘܡܝ ܡܰܪܕܘܬ݂ܐ ܣܘܪܝܰܝܬܐ. ܒܷܬ݂ܷܪ ܡܘ ܣܰܝܦܐ܆ ܡܰܪܰܘܓܶܐ ܕܒܶܐ ܩܰܫܡܶܐ ܕܟܷܬܝܐ ܡܝ ܝܩܰܪܬ݂ܐ ܕܰܐ ܐܳܕܷܡܟܝܝܶܗ ܗܰܘܝ ܪܝܫܐ ܠܝ ܩܪܝܬ݂ܐ. ܡܫܰܐܶܠܶܗ ܥܰܠ ܟܳܗܢܐ ܘܡܰܡܛܶܠܶܗ ܫܰܡܳܫܐ ܡܘܪܰܕ ܐܘ ܐܰܒܪܐ ܕܩܰܫܐ ܐܶܠܺܝܐ ܕܒܶܐ ܩܰܫܐ ܕܰܢܚܐ ܘܡܰܣܪܰܚ ܟܳܗܢܐ ܠܝ ܩܪܝܬ݂ܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫܶܬ݂ ܘܥܷܣܪܝ. ܐܶܠܐ ܒܷܬ݂ܷܪ ܥܰܪܷܩ ܠܣܘܪܺܝܰܐ ܘܕܝܣܰܐ ܐܝ ܩܪܝܬ݂ܐ ܙܰܒܢܐ ܝܰܪܝܟ݂ܐ ܦܰܐܝܫܐ ܕܠܐ ܟܳܗܢܐ. ܐܰܬ ܬܷܫܡܫܳܬ݂ܐ ܪܘܚܳܢܳܝܶܐ ܐܰܩ ܩܰܫܶܐ ܙܰܙܳܝܶܐ ܩܰܫܐ ܓܰܒܪܺܐܝܶܠ ܘܩܰܫܐ ܕܰܘܝܕ ܡܟܰܡܠܷܢܘܰܢܢܶܗ. ܒܷܬ݂ܷܪ ܡܷܢܢܶܗ ܩܰܫܐ ܦܷܛܪܘܣ ܐܘ ܚܰܐܚܳܝܐ ܣܬܶܐ ܟ݂ܕܷܡܠܶܗ ܐܝ ܩܪܝܬ݂ܐ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܰܪܬܶܐ ܘܚܰܡܫܝ ܡܰܣܪܰܚ ܩܰܫܐ ܝܰܘܣܶܦ ܕܶܡܝܪ ܟܳܗܢܐ ܠܝ ܩܪܝܬ݂ܐ. ܟ݂ܕܷܡܠܶܗ ܐܝ ܥܝܬܐ ܘܐܝ ܩܪܝܬ݂ܐ ܗܘܠ ܠܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܡܳܢܝ. ܒܷܬ݂ܷܪ ܡܶܐ ܕܰܐܙܙܶܗ ܠܰܐܘܪܘܦ݁ܰܐ܆ ܐܝ ܩܪܝܬ݂ܐ ܦܰܐܝܫܐ ܚܰܡܷܫ ܐܷܫܢܶܐ ܕܠܐ ܟܳܗܢܐ. ܒܷܬ݂ܷܪ ܡܝܢܶܗ ܫܰܡܳܫܐ ܓܰܒܪܺܐܝܶܠ ܐܰܩܛܰܫ ܗܘܠ ܕܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܬܡܳܢܝ ܡܰܣܪܰܚ ܟܳܗܢܐ ܡܶܐ ܐܝܕ݂ܶܗ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ ܟ݂ܳܕܰܡ ܘܰܐ ܒܝ ܥܝܬܐ. ܩܰܫܐ ܓܰܒܪܺܐܝܶܠ ܐܰܩܛܰܫ ܡܘ ܝܰܘܡܰܘܐ ܗܘܠ ܠܰܕܝܰܘܡܰܐ ܕܠܐ ܟܠܳܝܐ ܟܳܟ݂ܳܕܰܡ ܐܝ ܥܝܬܐ ܘܐܝ ܩܪܝܬ،ܐ. ܠܰܠܬܰܚ ܓܷܕܟܘܬ݂ܘܝܢܰܐ ܐܰܢ ܐܷܫܡܳܢܶܐ ܕܰܐܟ ܟܳܗܢܶܐ ܩܘܣܢܳܝܶܐ ܕܟܳܡܫܰܡܫܝ ܐܰܕܝܰܘܡܰܐ ܒܝ ܥܝܬܐ. - ܡܥܰܠܝܘܬ݂ܶܗ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ܆ ܐܘ ܚܰܣܝܐ ܕܛܘܪܥܰܒܕܝܢ ܘܪܝܫ ܕܰܝܪܐ ܕܡܳܪܝ ܓܰܒܪܺܐܝܶܠ. - ܡܥܰܠܝܘܬ݂ܐ ܕܡܳܪܝ ܕܺܝܳܘܣܩܳܘܪܳܘܣ ܒܶܢܝܰܡܶܢ ܐܰܛܰܫ܆ ܐܘ ܚܰܣܝܐ ܕܘ ܣܘܶܝܕ. - ܕܰܝܪܳܝܐ ܬܐܘܡܰܐ ܐܰܩܨܳܝ܆ ܒܝ ܕܰܝܪܐ ܕܡܳܪܝ ܓܰܒܪܺܐܝܶܠ. - ܕܰܝܪܳܝܐ ܐܝܫܳܘ ܐܰܛܰܫ܆ ܪܝܫ ܕܰܝܪܐ ܕܡܳܪܝ ܡܰܠܟܶܐ ܒܘ ܛܘܪܐ ܕܐܝܙܠܐ. - ܟ݂ܳܘܪܝ ܓܰܒܪܺܐܝܶܠ ܐܰܩܝܘܙ܆ ܐܘ ܟܳܗܢܐ ܕܡܰܪܕܶܐ. - ܩܰܫܐ ܓܰܒܪܺܐܝܶܠ ܐܰܩܛܰܫ܆ ܐܘ ܟܳܗܢܐ ܕܒܶܩܘܣܝܳܢܶܐ. - ܟ݂ܳܘܪܝ ܥܰܦܕܐ ܔܝܔܰܟ܆ ܟܳܗܢܐ ܒܘ ܣܘܶܝܕ. - ܟ݂ܳܘܪܝ ܥܰܙܝܙ ܐܰܨܠܰܢ܆ ܟܳܗܢܐ ܒܗܰܡܒܘܪܓ ܕܰܐܠܡܰܢܝܰܐ. - ܕܰܝܪܳܝܐ ܕܳܢܝܐܝܶܠ ܨܰܘܔܝ܆ ܐܘ ܪܝܫ ܕܰܝܪܐ ܕܝ ܕܰܝܪܐ ܕܡܳܪܝ ܝܰܥܩܘܒ ܚܒܝܫܳܝܐ ܕܨܰܠܷܚ. - ܩܰܫܐ ܒܰܪܨܰܘܡܐ ܐܰܔܰܪ܆ ܟܳܗܢܐ ܒܘ ܣܘܶܝܕ. - ܟ݂ܳܘܪܝ ܣܟܰܢܕܰܪ ܟܘܔܘܟܩܰܦ݁ܠܰܢ܆ ܐܘ ܟܳܗܢܐ ܕܝ ܥܝܬܐ ܕܡܳܪܝ ܐܶܠܺܝܐ ܒܓܝܣܶܢ ܕܰܐܠܡܰܢܝܰܐ. - ܟ݂ܳܘܪܝ ܡܰܠܟܶܐ ܐܰܩܝܘܙ܆ ܟܳܗܢܐ ܒܷܐܤܛܰܢܒܷܠ. - ܟ݂ܳܘܪܝ ܝܰܘܣܶܦ ܐܰܛܰܫ܆ ܟܳܗܢܐ ܒܝ ܥܝܬܐ ܕܡܳܪܝ ܐܰܦܪܶܝܡ ܣܘܕܶܪܬܶܠܝܰܐ ܒܘ ܣܘܶܝܕ. - ܩܰܫܐ ܥܰܙܝܙ ܐܰܩܝܘܙ܆ ܟܳܗܢܐ ܒܝ ܥܝܬܐ ܕܣܝܢܣܗܰܝܡ ܒܰܐܠܡܰܢܝܰܐ. - ܕܰܝܪܳܝܐ ܓܰܒܪܺܐܝܶܠ ܐܰܩܬܘܪܟ܆ ܟܳܥܳܝܰܫ ܒܰܐܠܡܰܢܝܰܐ. - ܩܰܫܐ ܝܰܥܩܘܒ ܕܒܶܐ ܩܰܫܐ ܕܰܢܚܐ܆ ܐܘ ܩܰܫܐ ܕܝ ܥܝܬܐ ܕܝܳܠܕܰܬ݂ ܐܰܠܳܗܐ ܒܐܳܪܶܒܪܳܘ ܒܘ ܣܘܶܝܕ. - ܩܰܫܐ ܥܝܣܰܐ ܐܰܔܰܪ܆ ܟܳܗܢܐ ܒܝ ܡܕ݂ܝܬܐ ܕܓܘܬܶܪܣܠܳܘ ܒܰܐܠܡܰܢܝܰܐ. - ܩܰܫܐ ܐܶܠܺܝܐ ܔܶܠܝܟ܆ ܐܘ ܩܰܫܐ ܕܝ ܥܝܬܐ ܕܡܳܪܝ ܓܰܒܪܺܐܝܶܠ ܕܘܝܣܒܰܕܶܝܢ ܒܰܐܠܡܰܢܝܰܐ. - ܩܰܫܐ ܥܝܣܰܐ ܕܶܡܝܪ܆ ܐܘ ܩܰܫܐ ܕܝ ܥܝܬܐ ܕܡܳܪܝ ܓܰܒܪܺܐܝܶܠ ܕܟܝܪܟܰܪܬ ܕܰܐܠܡܰܢܝܰܐ. - ܩܰܫܐ ܤܛܰܝܦܰܢܳܘܣ ܐܰܩܝܘܙ܆ ܐܘ ܩܰܫܐ ܕܝ ܡܕ݂ܝܬܐ ܕܰܐܫܰܦܰܢܒܘܪܓ ܕܰܐܠܡܰܢܝܰܐ. - ܕܰܝܪܳܝܐ ܐܰܦܪܶܝܡ ܠܰܚܕܐ܆ ܕܰܝܪܳܝܐ ܒܘ ܣܘܶܝܕ. - ܩܰܫܐ ܕܰܘܝܕ ܔܰܠܝܟ. ܩܰܫܐ ܒܓܘܬܶܪܣܠܳܗ ܕܰܐܠܡܰܢܝܰܐ. ܐܰܡ ܡܰܣܰܠܰܬ ܡܘܗܝܡ ܕܗܰܘܷܢ ܒܝ ܩܪܝܬ݂ܐ ܕܒܶܩܘܣܝܳܢܶܐ ܡܶܩܷܡ ܡܶܐ ܕܢܳܦܰܩ ܐܘ ܬܶܟܢܳܠܳܙ̰ܝ ܘܡܳܛܶܐ ܠܛܘܪܥܰܒܕܝܢ܆ ܐܰܥ ܥܰܕܰܬ ܕܟܷܬܘܰܝܢܶܗ ܒܰܩ ܩܷܪܝܰܘܳܬ݂ܶܐ ܕܛܘܪܥܰܒܕܝܢ ܡܷܢܛܳܪܝܘܰܐ ܒܘ ܬܶܚܟܝܝܐ ܕܰܡ ܡܰܣܰܠܰܬ ܕܡܶܐ ܚܰܐ ܠܘܚܪܶܢܳܐ. ܐܰܢ ܢܳܫܶܐ ܕܝ ܩܪܝܬ݂ܐ܆ ܒܰܒ ܒܰܛܠܳܢܶܐ ܘܒܰܚ ܚܘܫܰܒܶܐ ܘܥܰܣܪܝܝܰܘܳܬ݂ܶܐ܆ ܠܷܬܡܝܘܰܐ ܒܘ ܒܰܝܬܐ ܕܘ ܟܳܗܢܐ ܐܰܘ ܕܘ ܡܘܟ݂ܬܰܪ ܕܝ ܩܪܝܬ݂ܐ. ܒܘ ܠܬܳܡܰܢܐ ܫܷܡܥܝܘܰܐ ܐܰܡ ܡܰܣܰܠܰܬ ܕܗܰܘܷܢ ܒܝ ܩܪܝܬ݂ܐ ܡܰܣ ܣܳܘܶܐ ܐܰܘ ܡܰܪ ܪܝܫܳܢܶܐ ܕܝ ܩܪܝܬ݂ܐ. ܣܰܝܡܝܘܰܐ ܥܰܡ ܚܕ݂ܳܕ݂ܶܐ ܔܷܒ݂ܰܬܶܐ ܘܕܷܪܫܝܘܰܐ ܥܰܠ ܡܰܣܰܠܶܐ ܕܝ ܩܪܝܬ݂ܐ. ܒܘ ܫܷܟܠܰܢܳܐ ܢܛܝܪܝ ܐܰܥ ܥܰܕܰܬ ܘܐܘ ܡܰܟܬܰܒܙܰܒܢܐ ܘܟܘܠܡܶܕܶܐ ܕܗܰܘܝ ܒܝ ܩܪܝܬ݂ܐ܆ ܡܘ ܫܡܳܥܐ ܘܡܘ ܬܶܚܟܝܝܐ. ܥܰܠ ܕܗܶܫ ܠܰܬܘܰܐ ܠܐ ܪܰܕܝܐ ܘܠܐ ܬܶܠܶܦܷܙܝܳܘܢ ܘܠܐ ܐܝܢܬܶܪܢܶܬ ܒܰܒ ܒܳܬܶܐ. ܟܳܚܳܙܝܢܰܐ ܟܘܠܡܶܕܶܐ ܕܝܰܠܝܦܝ ܐܰܣ ܣܳܘܶܐ ܒܰܝ ܝܰܘܡܳܬ݂ܰܢܷܟ܆ ܠܐ ܛܰܥܷܠܠܶܗ. ܐܝܢܰܩܩܰܐ ܕܟܳܡܰܚܟܷܢ ܡܰܣܰܠܶܐ ܥܰܠ ܐܝ ܩܪܝܬ݂ܐ ܐܰܘ ܥܰܠ ܐܘ ܐܰܬܪܐ ܟܷܡܡܝ܆ ܐܳܢܐ ܢܰܥܝܡܐ ܒܰܒܝ ܗܰܘܟ݂ܐ ܡܷܪܠܶܗ. ܐܰܘ ܐܘ ܩܰܫܐ ܕܝ ܩܪܝܬ݂ܐ ܗܰܘܟ݂ܰܐ ܡܰܚܟܶܘܰܝܠܰܢ. ܒܟܘܠ ܩܪܝܬ݂ܐ ܟܷܬܘܰܐ ܪܝܫܳܢܶܐ ܝܰܠܝܦܶܐ ܕܢܷܛܪܝܘܰܐ ܐܘ ܡܶܕܶܐ ܕܫܰܡܝܥܝܠܶܗ ܡܰܒ ܒܰܒܳܢܰܬ݂ܬ݂ܶܗ ܐܘ ܡܰܣ ܣܳܘܶܐ܆ ܘܡܰܚܟܷܢܘܰܝܠܶܗ ܠܰܢ ܢܳܫܶܐ ܕܝ ܩܪܝܬ݂ܐ ܒܘ ܙܰܒܢܰܬ݂ܬ݂ܶܗ. ܒܝ ܩܪܝܬ݂ܐ ܕܒܶܩܘܣܝܳܢܶܐ ܣܬܶܐ ܐܘ ܚܰܐ ܕܟܷܬܘܰܐ ܝܕ݂ܝܥܐ ܒܰܡ ܡܰܣܰܠܰܬ܆ ܚܰܢܢܐ ܕܒܶܐ ܡܰܪܰܘܓܶܐ ܕܒܶܐ ܝܫܷܥ ܘܰܐ. ܐܝܢܰܩܩܰܐ ܕܚܳܕ݂ܰܪ ܘܰܐ ܒܘ ܒܰܝܬܐ ܕܘ ܡܘܟ݂ܬܰܪ܆ ܗܘܠ ܠܰܣܣܰܥܰܝܰܬ ܚܰܪܳܝܶܐ ܕܘ ܠܰܠܝܐ ܡܰܚܟܶܘܰܐ ܐܘ ܡܶܕܶܐ ܕܫܰܡܷܥ ܥܰܠ ܐܝ ܩܪܝܬ݂ܐ. ܟ݂ܘܕ ܡܰܠܦܳܢܐ ܕܟܳܡܳܠܰܦ ܐܰܝ ܝܳܠܘܦܰܝܕ݂ܶܗ ܘܟ݂ܘܕ ܟܳܡܦ݁ܝܘܬܶܪ ܢܛܷܪܠܶܗ ܟܘܠܡܶܕܶܐ ܕܫܰܡܷܥ ܘܕܷܚܙܶܠܶܗ. ܐܘ ܥܰܡܐ ܕܝ ܩܪܝܬ݂ܐ ܣܬܶܐ ܡܷܬܝܰܩܢܝܘܰܝܠܶܗ ܘܒܷܠܗܝܩܘܬ݂ܐ ܡܰܨܝܬ݂ܝܘܰܐ ܥܰܠ ܐܝ ܫܬܰܓ݂ܰܠܝܝܰܝܕ݂ܶܗ. ܗܘܠ ܠܰܕܝܰܘܡܰܐ ܐܰܣ ܣܳܘܶܐ ܕܝ ܩܪܝܬ݂ܐ ܟܳܡܰܚܟܷܢ ܟܡܐ ܡܰܣܰܠܰܬ ܕܫܰܡܝܥܝ ܡܝܢܶܗ ܥܰܠ ܒܶܩܘܣܝܳܢܶܐ. ܒܷܬ݂ܷܪ ܡܶܐ ܕܥܰܒܷܪ ܐܘ ܬܶܟܢܳܠܳܙ̰ܝ ܠܰܒ ܒܳܬܶܐ ܘܠܰܟ ܟܝܣܶܐ ܕܰܢ ܢܳܫܶܐ ܕܛܘܪܥܰܒܕܝܢ܆ ܐܰܥ ܥܰܕܰܢܝ ܡܫܰܚܠܦܝ ܘܰܐܢ ܢܳܫܶܐ ܛܰܥܷܢܢܶܗ. ܐܰܕܝܰܘܡܰܐ ܡܷܚܠܰܦ ܐܰܢ ܢܳܫܰܢܝ ܕܡܰܚܟܷܢܘܰܐ ܘܕܡܷܠܦܝܘܰܐ܆ ܟܝܬܐ ܬܶܠܶܦܙܝܳܘܢ ܘܟܳܡܦ݁ܝܘܬܶܪ ܘܬܶܠܶܦܳܢ ܕܘ ܟܝܣܐ ܘܐܝܢܬܶܪܢܶܬ ܒܰܒ ܒܳܬܶܐ. ܟܘܠܚܰܐ ܟܳܚܳܝܰܪ ܒܘ ܬܶܠܶܦܘܢܰܝܕ݂ܶܗ ܕܘ ܟܝܣܐ. ܘܢܳܫܶܐ ܠܰܫܰܢ ܔܷܒ݂ܰܬܰܬ ܗܰܘ ܟܳܠܳܬܰܡ ܓܰܒ ܩܰܫܐ ܐܰܘ ܡܘܟ݂ܬܰܪ. ܐܝܢܰܩܩܰܐ ܕܟܐܘܙܙܷܢ ܓܰܒ ܚܕ݂ܳܕ݂ܶܐ ܡܶܩܷܡ ܡܶܐ ܟܘܠܡܶܕܶܐ ܟܳܡܫܰܝܠܝ ܥܰܠ ܐܘ ܩܠܝܕ݂ܳܐ ܝܰܢܝ ܐܝ ܫܝܦܪܶܐ ܕܘ ܐܝܢܬܶܪܢܶܬ. ܡܰܘܟ݂ܰܐ ܟܳܚܳܙܝܢܰܐ ܕܐܘ ܬܶܟܢܳܠܳܙ̰ܝ ܡܰܒܕܶܠܶܗ ܚܰܝܶܐ ܚܰܬ݂ܶܐ ܒܰܩ ܩܷܪܝܰܘܳܬ݂ܶܐ ܕܛܘܪܥܰܒܕܝܢ ܣܬܶܐ. ܐܝ ܓܳܠܘܬ݂ܐ ܡܰܝܷܪܬܐ ܒܘ ܙܰܒܢܐ ܩܰܡܳܝܐ ܕܪܰܟܝܘܐ ܐܝ ܕܰܘܠܰܐ ܕܬܘܪܟܺܝܰܐ܆ ܟ݂ܘܕ ܟܷܬܘܰܐ ܒܟܘܠܠܶܗ ܐܰܩ ܩܷܪܝܰܘܳܬ݂ܶܐ ܕܛܘܪܥܰܒܕܝܢ ܓܰܒܶܐ ܕܝ ܒܰܪܒܰܪܝܝܶܐ܆ ܒܒܶܩܘܣܝܳܢܶܐ ܣܬܶܐ ܟܷܬܘܰܐ ܓܰܒܶܐ ܝܰܢܝ ܦ݁ܰܪܬܝܝܰܬ. ܚܰܐ ܡܰܓ ܓܰܒܰܢܝ ܥܰܡ ܐܰܟ ܟܘܪܕ ܕܟܷܬܘܰܝܢܶܗ ܚܰܘܪܶܗ ܕܝ ܕܰܘܠܰܐ ܘܰܐ، ܘܚܰܐ ܡܷܢܢܶܗ ܥܰܡ ܐܰܟ ܟܘܪܕ ܕܟܷܬܘܰܝܢܶܗ ܡܩܰܒܷܠ ܕܝܕ݂ܰܗ. ܥܰܠ ܗܰܬ݂ܶܐ ܗܰܘܷܢ ܩܰܠܰܬ ܘܒܰܪܒܰܪܝܝܰܬ ܓ݂ܰܠܰܒܶܐ ܒܰܝܢ ܐܘ ܥܰܡܐ ܕܡܰܕ݂ܷܪܪܶܗ ܗܰܡ ܚܕ݂ܳܕ݂ܶܐ ܘܗܰܡ ܐܝ ܩܪܝܬ݂ܐ. ܘܗܰܘܷܢ ܣܰܒܰܦ݁ ܠܝ ܓܳܠܘܬ݂ܐ ܕܡܶܐ ܒܶܩܘܣܝܳܢܶܐ. ܟܝܒܰܢ ܦܷܠܓ݂ܝܢܰܐ ܐܝ ܓܳܠܘܬ݂ܐ ܕܗܰܘܝܐ܆ ܠܰܐܪܒܥܐ ܙܰܒܢܶܐ ܡܫܰܚܠܦܶܐ܆ ܐܝܢܰܩܩܰܐ ܩܰܡܰܝܬܐ ܒܕܶܠܰܗ ܒܘ ܫܘܪܳܝܐ ܕܘ ܕܳܪܐ ܕܰܥ ܥܷܣܪܝ. ܐܰܣ ܣܘܪܝܳܝܶܐ ܐܰܙܙܷܢ ܠܰܐܬܪܰܘܳܬ݂ܐ ܪܰܚܘܩܶܐ ܟ݂ܘܕ ܐܰܡܶܪܝܟܰܐ، ܟܰܢܰܕܰܐ، ܒܪܶܙܝܠܝܰܐ ܘܰܐܪܔܰܢܬܝܢ. ܐܝܢܰܩܩܰܐ ܕܰܬ ܬܰܪܬܶܐ܆ ܒܕܶܠܰܗ ܒܝ ܫܰܬܐ ܕܰܐܢ ܐܰܠܦܐ ܬܫ̰ܰܥܡܐ ܘܬܰܪܬܶܐ ܘܰܐܪܒܥܝ. ܡܘ ܟܰܦܢܐ ܘܡܝ ܥܰܣܟܰܪܝܝܶܗ (ܐܷܚܬܝܝܰܬ). ܠܣܘܪܺܝܰܐ ܘܠܷܒܢܰܢ ܘܐܝܣܪܳܐܝܶܠ ܘܥܷܐܪܰܩ. ܐܝܢܰܩܩܰܐ ܕܰܬܠܬ݂܆ ܐܝ ܓܳܠܘܬ݂ܐ ܒܕܶܠܰܗ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܐܷܫܬܝ ܡܶܐ ܛܘܪܥܰܒܕܝܢ ܠܷܤܛܰܢܒܷܠ. ܐܝܢܰܩܩܰܐ ܕܰܐܢ ܐܰܪܒܰܥ܆ ܒܕܶܠܰܗ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܫܰܘܥܝ ܠܰܕ ܕܰܘܠܰܬ ܕܰܐܘܪܘܦ݁ܰܐ. ܒܝ ܫܰܬܐ ܕܰܐܢ ܢܷܫܬܝܝܰܬ܆ ܥܰܝܫܝ ܘܰܐ ܒܝ ܩܪܝܬ݂ܐ ܕܒܶܩܘܣܝܳܢܶܐ ܠܰܦ ܡܳܐ ܘܥܷܣܪܝ ܝܰܩܪܳܬ݂ܶܐ. ܐܶܠܐ ܐܰܕܝܰܘܡܰܐ ܟܳܚܳܙܝܢܰܐ ܕܠܐ ܦܰܐܝܷܫ ܔܓ݂ܘܪ ܡܶܐ ܬܡܳܢܰܥܣܰܪ ܥܰܐܝܠܰܬ. ܐܘ ܡܷܢܝܳܢܐ ܕܰܢ ܢܳܫܶܐ ܕܝ ܩܪܝܬ݂ܐ ܟܳܡܳܛܶܐ ܠܰܦ ܡܐ ܘܚܰܡܫܝ ܢܰܦܫܳܬ݂ܶܐ. ܐܰܝ ܝܰܩܪܳܬ݂ܶܐ ܕܟܝܬܐ ܐܰܕܝܰܘܡܰܐ ܒܝ ܩܪܝܬ݂ܐ ܗܰܢܝܢܶܐ: ܩܰܫܐ ܓܰܒܪܺܐܝܶܠ ܐܰܩܛܰܫ ܕܒܶܐ ܓ݂ܙܰܠܐ ܘܕܳܢܝܐܝܶܠ ܐܰܩܛܰܫ ܐܘ ܐܰܒܪܰܝܕ݂ܶܗ. ܒܪܰܗܝܡ ܐܰܩܛܰܫ ܕܒܶܐ ܓ݂ܙܰܠܐ ܘܔܳܘܪܔ ܐܰܩܛܰܫ ܐܘ ܐܰܒܪܰܝܕ݂ܶܗ. ܝܰܘܣܶܦ ܐܰܩܛܰܫ ܕܒܶܐ ܓ݂ܙܰܠܐ ܘܐܘ ܐܰܒܪܰܝܕ݂ܶܗ ܦܶܛܪܘܣ ܐܰܩܛܰܫ. ܐܝ ܝܩܰܪܬ݂ܐ ܕܫܰܡܳܫܐ ܠܰܚܕܐ ܐܰܔܰܪ. ܐܰܚܐ ܐܰܔܰܪ ܕܒܶܐ ܒܪܰܗܷܡ. ܐܰܘܓܝܢ ܕܘܡܰܢ ܕܒܶܐ ܣܰܦܰܪ ܘܐܘ ܐܰܚܘܢܰܝܕ݂ܶܗ ܝܘܚܰܢܳܢ ܕܘܡܰܢ. ܠܰܚܕܐ ܐܰܩܝܘܙ ܕܒܶܐ ܡܷܪܔܐ. ܡܘܪܰܕ ܐܰܨܠܰܢ ܕܒܶܐ ܓܪܝܓ݂ܐ. ܠܰܚܕܐ ܔܳܫܩܘܢ ܕܒܶܐ ܚܰܢܘܫ ܘܡܘܫܶܐ ܔܳܫܩܘܢ ܐܘ ܐܰܒܪܰܝܕ݂ܶܗ. ܡܰܠܟܶܐ ܐܰܔܰܪ ܕܒܶܐ ܝܘܚܶܐ. ܡܘܪܰܕ ܐܰܔܰܪ ܕܒܶܐ ܐܰܕܕܶܗ. ܨܰܘܡܶܐ ܕܘܪܡܰܙ ܕܒܶܐ ܐܰܦܪܐ ܘܐܘ ܐܰܒܪܰܝܕ݂ܶܗ ܡܘܣܰܐ ܕܘܪܡܰܙ. ܒܘ ܣܰܝܦܐ܆ ܐܰܩ ܩܘܣܢܳܝܶܐ ܥܰܪܝܩܝ ܡܝ ܩܪܝܬ݂ܐ ܘܡܰܟ݂ܰܠܝܰܠܠܶܗ. ܘܦܰܐܝܫܐ ܠܰܦ ܫܶܬ ܐܷܫܢܶܐ ܟ݂ܠܝܬ݂ܐ. ܐܰܛ ܛܰܝܶܐ ܐܝܢܰܩܩܰܐ ܕܷܚܙܰܠܠܶܗ ܕܒܶܩܘܣܝܳܢܶܐ ܟ݂ܰܠܝܐ܆ ܐܰܬ݂ܷܢ ܝܰܬܝܘܝ ܒܰܙܒ݂ܷܢܩܰܬ ـ ܩܷܪܝܰܘܳܬ݂ܐ ܢܰܥܝܡܶܐ ـ ܕܚܶܕ݂ܳܪܰܗ. ܘܡܦܰܠܰܓ݂ܓ݂ܶܗ ܐܰܟ ܟܰܪܡܶܐ ܘܰܐܢ ܐܰܪܥܳܬ݂ܐ ܒܰܝܢܶܗ ܪܘܚܰܝܝܶܗ. ܒܷܬ݂ܷܪܟܶܐ ܐܰܬ݂ܝ ܫ̰ܰܠܰܒܝ ܐܰܓ݂ܰܐ ܣܷܡܠܶܗ ܟܢܘܫܝܐ ܥܰܡ ܐܰܪ ܪܝܫܳܢܶܐ ܕܝ ܩܪܝܬ݂ܐ܆ ܘܡܷܕ݂ܥܝܠܶܗ ܕܟܳܒܰܥ ܡܳܦܰܩ ܐܰܛ ܛܰܝܶܐ ܘܡܰܕܥܰܪ ܐܰܣ ܣܘܪܝܳܝܶܐ ܕܝܣܰܐ ܠܝ ܩܪܝܬ݂ܐ. ܐܶܠܐ ܐܰܪ ܪܝܫܳܢܶܐ ܕܰܛ ܛܰܝܶܐ ܠܳܡܰܩܒܰܠܠܶܗ ܐܘܡܶܕܶܐ ܕܡܷܪܠܶܗ ܫ̰ܰܠܰܒܝ ܐܰܓ݂ܰܐ. ܒܷܬ݂ܷܪ ܙܰܒܢܐ ܟܰܪܝܐ ܕܝܣܰܐ ܝܰܬܘ ܥܰܡ ܐܰܪ ܪܝܫܳܢܶܐ. ܘܰܠܰܘ ܠܐ ܡܰܩܒܰܠܠܶܗ ܘܩܰܐܝܡܝ ܡܩܰܒܷܠ ܕܝܕ݂ܶܗ܆ ܐܶܠܐ ܒܝܙܳܪܝܝܶܗ ܡܷܦܩܝܠܶܗ ܡܶܐ ܒܶܩܘܣܝܳܢܶܐ. ܡܰܕܥܰܪܠܶܗ ܐܰܩ ܩܘܣܢܳܝܶܐ ܠܝ ܩܪܝܬ݂ܐ ܘܣܷܡܠܶܗ ܡܰܪܰܘܓܶܐ ܕܒܶܐ ܩܰܫܡܶܐ ܪܝܫܐ ܠܝ ܩܪܝܬ݂ܐ. ܒܷܬ݂ܷܪܟܶܐ ܡܰܪܰܘܓܶܐ ܣܬܶܐ ܡܳܦܰܩܠܶܗ ܐܰܛ ܛܰܝܶܐ ܕܟܷܬܘܰܝܢܶܗ ܒܰܙܒ݂ܷܢܓܰܬ ܕܚܶܕ݂ܰܪ ܐܝ ܩܪܝܬ݂ܐ. ܚܕ݂ܐ ܡܷܢܢܶܗ ܣܬܶܐ ܐܝ ܩܪܝܬ݂ܐ ܕܕܶܪܩܘܒܶܐ ܘܰܐ. ܐܰܫ ܫܘܫܳܛܶܐ ܕܗܰܘܷܢ ܒܘ ܝܘܠܦܳܢܐ ܘܒܝ ܡܰܪܕܘܬ݂ܐ ܒܷܬ݂ܷܪ ܡܘ ܣܰܝܦܐ܆ ܐܰܝ ܝܰܠܝܦܶܐ ܘܰܐܩ ܩܰܪܳܝܶܐ ܢܰܩܝܨܝ ܘܰܐ ܒܛܘܪܥܰܒܕܝܢ ܟܘܠܰܐ ܘܒܝ ܩܪܝܬ݂ܐ ܕܒܶܩܘܣܝܳܢܶܐ ܣܬܶܐ. ܒܝ ܫܰܬܐ ܕܰܐܢ ܐܰܠܦܐ ܘܬܠܰܬ݂ ܘܚܰܡܫܝ ܦܬܝܚܐ ܐܝ ܡܰܕܪܰܣܶܐ ܕܒܶܩܘܣܝܳܢܶܐ ܡܶܐ ܚܰܬ݂ܐ. ܒܕܰܠܠܶܗ ܐܰܢ ܢܰܥܝܡܶܐ ܕܝܘܠܦܝ ܠܶܫܳܢܐ ܣܘܪܝܳܝܐ ܘܰܐܨܠܰܘܳܬ݂ܶܐ ܕܝ ܥܝܬܐ. ܡܰܟܬܰܦ݁ ܕܘ ܬܷܪܟܝ ܠܰܬܘܰܐ ܒܝ ܩܪܝܬ݂ܐ܆ ܡܰܘܟ݂ܰܐ ܔܓ݂ܘܪ ܡܶܐ ܟܡܐ ܢܳܫܶܐ܆ ܢܳܫܐ ܠܳܕ݂ܰܥ ܘܰܐ ܠܶܫܳܢܐ ܬܷܪܟܝ. ܒܝ ܫܰܬܐ ܕܰܐܢ ܐܰܠܦܐ ܘܚܰܡܷܫ ܘܶܐܫܬܝ ܦܬܝܚ ܐܘ ܡܰܟܬܰܦ݁ ܕܝ ܩܪܝܬ݂ܐ ܒܰܚ ܚܰܦܪܶܐ. ܡܝ ܫܰܬܰܝܐ ܒܕܰܠܠܶܗ ܐܰܢ ܢܰܥܝܡܶܐ ܘܰܐܥ ܥܠܰܝܡܶܐ ܕܝܘܠܦܝ ܠܶܫܳܢܐ ܬܷܪܟܝ ܣܬܶܐ ܒܘ ܡܰܟܬܰܦ݁. ܐܘ ܡܰܠܦܳܢܐ ܩܰܡܳܝܐ ܕܘ ܡܰܟܬܰܦ݁ ܐܷܫܡܶܗ ܟܶܡܰܠ ܒܰܠܰܢܔܝ ܘܰܐ ܘܒܘ ܫܶܪܫܰܝܕ݂ܶܗ ܡܶܐ ܡܰܪܕܶܐ ܘܰܐ. ܐܰܢ ܢܳܫܶܐ ܕܝ ܩܪܝܬ݂ܐ ܦܨܝܚܝ ܓ݂ܰܠܰܒܶܐ ܒܘ ܦܬܳܚܐ ܕܘ ܡܰܟܬܰܦ݁܆ ܐܶܠܐ ܥܰܡ ܚܒܳܠ ܥܰܠ ܕܘܟܬ݂ܶܗ ܕܝ ܥܡܰܪܰܐ ܕܘ ܡܰܟܬܰܦ݁ ܢܰܦܷܩ ܩܰܠܶܗ ܪܰܒܬ݂ܐ ܒܰܝܢ ܐܰܢ ܢܳܫܶܐ ܕܝ ܩܪܝܬ݂ܐ܆ ܘܡܰܛܝܐ ܘܰܐ ܐܝ ܩܪܝܬ݂ܐ ܠܷܚܪܳܘܳܐ. ܐܝܢܰܩܠܰܐ ܕܐܝ ܕܰܘܠܰܐ ܐܰܒܝܥܐ ܕܡܰܥܡܪܐ ܐܘ ܡܰܟܬܰܦ݁܆ ܟܷܬܘܰܐ ܬܪܶܐ ܓܰܒܶܐ ܒܝ ܩܪܝܬ݂ܐ܆ ܘܰܐܢ ܢܳܫܶܐ ܕܝ ܩܪܝܬ݂ܐ ܦܰܩܝܪܶܘܰܝܢܶܗ. ܟܘܠܚܰܐ ܡܰܓ ܓܰܒܶܐ ܐܳܒܰܥܘܰܐ ܐܝ ܦܰܝܕܰܝܕ݂ܶܗ. ܝܰܢܝ ܟܘܠܚܰܐ ܐܳܒܰܥܘܰܐ ܕܡܰܥܡܪܝ ܐܘ ܡܰܟܬܰܦ݁ ܒܝ ܕܘܟܬ݂ܐ ܕܟܳܒܰܥ. ܥܰܠ ܕܠܰܬ݂ܷܢ ܠܷܚܕ݂ܳܕ݂ܶܐ ܥܰܠ ܐܝ ܕܘܟܬ݂ܐ ܕܘ ܡܰܟܬܰܦ݁ ܢܰܦܝܩܐ ܩܰܠܶܗ ܪܰܒܬ݂ܐ ܒܰܝܢܳܬ݂ܰܝܝܶܗ. ܐܝܢܰܩܩܰܐ ܕܰܛ ܛܰܝܶܐ ܕܙܰܟ݂ܘܪܰܢ ܫܰܡܝܥܝ ܕܰܩ ܩܘܣܢܳܝܶܐ ܡܩܰܬܰܠܠܶܗ܆ ܐܰܬ݂ܷܢ ܕܷܡܥܰܘܢܝ ܐܰܚ ܚܰܘܪܳܢܰܬ݂ܬ݂ܶܗ. ܗܰܘܟ݂ܰܐ ܐܝ ܩܰܠܶܗ ܝܰܪܝܘܐ ܘܩܛܷܠܠܶܗ ܚܕ݂ܳܕ݂ܶܐ ܥܰܠ ܕܘܟܬ݂ܶܗ ܕܘ ܡܰܟܬܰܦ݁. ܐܝܢܰܩܩܰܐ ܕܷܗܔܷܡܡܶܗ ܐܰܙ ܙܰܟ݂ܘܪܰܢܝܝܶܐ ܥܰܠ ܒܶܩܘܣܝܳܢܶܐ܆ ܠܰܩܷܢ ܒܫܰܒܐ ܐܰܩܛܰܫ ܐܘ ܒܰܒܐ ܕܩܰܫܐ ܓܰܒܪܺܐܝܶܠ ܘܕܘ ܡܘܟ݂ܬܰܪ ܒܪܰܗܝܡ ܐܰܩܛܰܫ ܕܰܐܙܙܶܗ ܘܰܐ ܠܩܰܡܘܬ݂ܰܝܝܶܗ ܕܠܐ ܛܳܪܶܐ ܕܥܘܒܪܝ ܠܝ ܩܪܝܬ݂ܐ܆ ܘܥܰܠ ܠܐ ܡܶܕܶܐ ܩܛܷܠܠܶܗ ܠܰܠܬܰܚ ܡܝ ܥܝܬܐ ܩܰܪܝܘܐ ܠܝ ܡܷܩܒܰܪܰܐ ܕܰܐܕܝܰܘܡܰܐ. ܐܝܢܰܩܩܰܐ ܕܰܩ ܩܘܣܢܳܝܶܐ ܕܷܚܙܰܠܠܶܗ܆ ܕܰܐܟ ܟܘܪܕܳܝܶܐ ܩܛܷܠܠܶܗ ܫܰܒܐ ܘܗܶܫ ܟܳܗܘܔܡܝ ܕܡܰܢܗܒܝ ܐܝ ܩܪܝܬ݂ܐ܆ ܩܰܝܡܝ ܡܩܰܒܷܠ ܕܷܬ݂ܬ݂ܶܗ ܠܓܳܪܰܢ ܕܘ ܚܰܝܠܰܬ݂ܬ݂ܶܗ. ܘܗܷܢܷܟ ܣܬܶܗ ܩܛܷܠܠܶܗ ܚܰܐ ܡܷܢܢܶܗ ܘܡܔܰܪܰܚܶܗ ܟܡܐ ܡܷܢܢܶܗ. ܒܷܬ݂ܷܪ ܡܶܐ ܕܷܩܛܝܠ ܐܘ ܚܰܘܪܰܬ݂ܬ݂ܶܗ ܙܰܝܥܝ ܘܥܰܪܝܩܝ. ܐܘ ܩܰܪܰܩܳܠ ܒܘ ܙܰܒܢܰܐ ܘܐ ܒܝ ܩܪܝܬ݂ܐ ܕܷܫܬܪܰܟܐ ܘܰܐ. ܠܐ ܒܒܶܩܘܣܝܳܢܶܐ ܘܠܐ ܒܚܰܐܚ ܠܰܬܘܰܐ ܩܰܪܰܩܳܠ. ܒܷܬ݂ܷܪ ܡܘ ܩܰܛܠܐ ܕܗܰܘܝ ܐܝ ܕܰܘܠܰܐ ܡܫܰܕܰܪܠܰܗ ܟܡܐ ܥܰܣܶܟܷܪ ܕܢܷܛܪܝ ܐܰܩ ܩܘܣܢܳܝܶܐ ܡܰܛ ܛܰܝܶܐ ܕܚܶܕ݂ܳܪܰܝܝܶܗ. ܐܘ ܡܰܟܬܰܦ݁ ܣܬܶܐ ܦܰܝܷܫ ܦܬܝܚܐ ܗܘܠ ܠܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫ̰ܰܥ ܘܬܡܳܢܝ܆ ܒܷܬ݂ܷܪ ܣܟ݂ܝܪ ܘܦܰܝܷܫ ܟܡܐ ܐܷܫܢܶܐ ܣܟ݂ܝܪܐ ܡܝ ܙܘܥܬ݂ܐ ܕܟܷܬܘܰܐ ܒܛܘܪܥܰܒܕܝܢ ܘܒܰܩ ܩܷܪܝܰܘܳܬ݂ܶܐ. ܐܝܢܰܩܩܰܐ ܕܟܰܠܝ ܐܷܫܡܐ ܐܘ ܩܪܳܒܐ ܕܷܡܕܰܘܰܡܘܰܐ ܒܰܝܢ ܐܰܟ ܟܘܪܕܳܝܶܐ ܘܠܝ ܕܰܘܠܰܐ܆ ܒܝ ܫܰܬܐ ܕܰܬܪܰܠܦܐ ܕܝܣܰܐ ܦܬܝܚ. ܐܰܕܝܰܘܡܰܐ ܟܝܬܐ ܡܰܠܦܳܢܐ ܬܘܪܟܳܝܐ ܘܟܳܩܳܪܷܢ ܐܶܒܶܗ ܐܰܝ ܝܳܠܘܦܶܐ ܡܘ ܣܶܕܪܐ ܕܘ ܚܰܐ ܗܘܠ ܠܰܐܢ ܐܰܪܒܥܐ ܕܟܳܘܷܢ ܠܰܦ ܥܷܣܪܐ ܝܳܠܘܦܶܐ. ܐܰܝ ܝܳܠܘܦܶܐ ܕܪܰܒܬܷܪ ܟܐܘܙܙܷܢ ܠܙܰܟ݂ܘܪܰܢ ܘܬܰܡܐ ܟܳܩܳܪܷܢ ܡܘ ܣܶܕܪܐ ܕܰܚ ܚܰܡܫܐ ܗܘܠ ܠܰܬܡܰܢܝܐ. ܐܰܫ ܫܘܫܳܛܶܐ ܚܪܶܢܶܐ ܕܗܰܘܷܢ ܒܝ ܩܪܝܬ݂ܐ ܒܰܙ ܙܰܒܢܶܐ ܩܰܡܳܝܶܐ܆ ܐܝܢܰܩܩܰܐ ܕܰܐܩ ܩܘܣܢܳܝܶܐ ܡܷܣܢܳܩܝܘܰܐ ܕܷܐܙܙܷܢ ܠܡܷܕ݂ܝܰܕ݂ ܕܙܰܘܢܝ ܡܶܕܶܐ܆ ܡܗܰܠܟ݂ܝܘܰܐ ܠܚܰܐܚ ܐܰܘ ܠܔܘܟܰܐ ܐܝ ܩܪܝܬ݂ܐ. ܘܡܶܐ ܬܰܡܐ ܪܰܘܟ݂ܝܘܰܐ ܒܰܪ ܪܰܕ݂ܳܝܳܬ݂ܐ. ܐܶܠܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܠܰܬ݂ ܘܬܡܳܢܝ܆ ܐܝ ܕܰܘܠܰܐ ܦܬܷܚܠܰܗ ܕܰܪܒܐ ܕܝ ܪܰܕ݂ܳܝܬܐ ܡܶܐ ܚܰܐܚ ܠܒܶܩܘܣܝܳܢܶܐ. ܘܒܷܬ݂ܷܪ ܐܷܫܢܶܐ ܓ݂ܰܠܰܒܶܐ ܝܰܢܝ ܒܝ ܫܰܬܐ ܕܰܬܪܰܠܦܐ ܘܚܕ݂ܐ ܣܷܡܡܶܗ ܙܷܦܬܐ ܝܰܢܝ ܐܰܣܦܰܠܛ. ܘܒܰܣܷܡ ܐܘ ܡܰܙܠܐ ܘܐܘ ܡܰܬ݂ܝܐ ܕܰܩ ܩܘܣܢܳܝܶܐ ܠܡܷܕ݂ܝܰܕ݂ ܘܠܰܐܝܟܐ ܚܪܶܢܐ ܕܷܐܒܥܝܘܰܐ ܕܷܐܙܙܷܢ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܕ݂ܐ ܘܬܷܫܥܝ܆ ܐܝ ܕܰܘܠܰܐ ܦܬܷܚܘܰܝܠܰܗ ܕܰܪܒܐ ܚܪܶܢܐ ܡܶܐ ܒܶܩܘܣܝܳܢܶܐ ܠܘ ܣܰܪܕܶܦ. ܐܶܠܐ ܥܰܠ ܕܟܷܬܝܐ ܥܰܦܪܐ܆ ܥܰܣܩܳܝܐ ܕܷܐܙܙܷܢ ܐܶܒܶܗ. ܒܝ ܫܰܬܐ ܕܰܐܢ ܐܠܰܦܐ ܘܫ̰ܰܥܡܐ ܘܰܐܪܒܰܥ ܘܬܡܳܢܝ܆ ܐܝܢܰܩܩܰܐ ܩܰܡܰܝܬܐ ܓܪܝܫ ܐܘ ܔܰܝܪܰܢ ܠܝ ܩܪܝܬ݂ܐ. ܘܒܰܣܝܡܝ ܐܰܚ ܚܰܝܶܐ ܕܰܥ ܥܳܡܘܪܶܐ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܬܡܳܢܝ܆ ܒܝ ܝܰܨܝܦܘܬ݂ܐ ܕܝ ܡܥܰܠܝܘܬ݂ܐ ܕܡܳܪܝ ܛܝܡܳܬ݂ܶܐܘܳܣ ܫܡܘܐܶܝܠ ܐܰܩܛܰܫ ܐܘ ܚܰܣܝܐ ܕܛܘܪܥܰܒܕܝܢ܆ ܦܬܷܚܚܶܗ ܥܰܝܢܐ ܕܰܡ ܡܰܝܶܐ. ܡܘ ܥܘܡܩܐ ܕܡܰܬ݂ܶܐ ܘܚܰܡܫܝ ܡܷܬܪܳܘܰܬ ܟܳܡܷܦܩܐ ܡܰܝܶܐ ܘܟܳܡܒܰܪܒܙܐ ܥܰܠ ܐܰܒ ܒܳܬܶܐ. ܗܰܘܟ݂ܰܐ ܗܰܡ ܐܰܢ ܢܳܫܶܐ ܗܰܡ ܐܰܚ ܚܰܝܶܘܷܢ ܟܳܫܳܬܷܢ ܡܰܝܶܐ ܢܰܕ݂ܝܦܶܐ ܕܟܳܢܷܦܩܝ ܡܝ ܥܰܝܢܐ. ܘܰܐܚ ܚܰܝܶܐ ܕܝ ܩܪܝܬ݂ܐ ܙܷܬܬܷܪ ܒܰܣܝܡܝ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܡܳܢܶܐ ܘܬܡܳܢܝ܆ ܓܪܝܫ ܐܘ ܟ݂ܛܘܛܐ ܕܘ ܬܰܠܰܦܘܢ ܠܝ ܩܪܝܬ݂ܐ. ܘܰܐܢ ܢܳܫܶܐ ܟܳܩܘܕܪܝ ܕܡܷܔܓ݂ܳܠܝ ܥܰܡ ܐܰܢ ܢܳܫܰܬ݂ܬ݂ܶܗ ܕܟܷܬܢܶܗ ܒܝ ܓܳܠܘܬ݂ܐ ܘܡܶܐ ܙܰܒܢܐ ܝܰܪܝܟ݂ܐ ܠܐ ܫܰܡܝܥܝ ܩܳܠܰܝܝܶܗ. ܥܰܠ ܕܟܷܬܘܰܐ ܚܰܐ ܬܰܠܰܦܘܢ ܬܰܢܢܶܗ ܒܝ ܩܪܝܬ݂ܐ܆ ܐܰܢ ܢܳܫܶܐ ܥܘܒܪܝܘܰܐ ܠܝ ܣܝܪܰܐ ܕܩܘܕܪܝ ܡܷܔܓ݂ܳܠܝ. ܐܶܠܐ ܐܰܕܝܰܘܡܰܐ ܟܝܬܐ ܒܟܘܠ ܒܰܝܬܐ ܬܰܠܰܦܘܢ ܘܬܶܠܰܦܷܙܝܳܘܢ ܘܐܝܢܬܶܪܢܶܬ. ܘܟܘܠܚܰܐ ܐܶܡܰܐ ܕܟܳܒܰܥ ܟܳܡܷܔܓ݂ܰܠ ܥܰܡ ܡܰܢ ܕܟܳܒܰܥ. ܐܰܢ ܢܳܫܶܐ ܕܝ ܩܪܝܬ݂ܐ ܣܬܐ ܓ݂ܰܠܰܒܶܐ ܦܨܝܚܝ ܒܘ ܦܬܳܚܐ ܕܘ ܕܰܪܒܐ ܘܒܘ ܬܷܡܛܺܝܐ ܕܘ ܔܰܝܪܰܢ ܘܕܘ ܬܰܠܰܦܘܢ ܘܕܰܡ ܡܰܝܶܐ ܘܕܘ ܐܝܢܬܶܪܢܶܬ܆ ܠܝ ܩܪܝܬ݂ܐ. ܒܝ ܫܰܬܐ ܕܰܬܪܰܠܦܐ ܘܚܰܡܷܫ܆ ܐܝ ܕܰܘܠܰܐ ܕܬܘܪܟܺܝܰܐ ܡܳܦܰܩܠܰܗ ܩܳܢܘܢܐ ܕܡܝܩܰܝܕܝ ܐܰܟ ܟܰܪܡܶܐ ܘܰܐܒ ܒܳܬܶܐ ܘܰܐܢ ܐܰܪܥܳܬ݂ܶܐ ܥܰܠ ܐܰܢ ܢܷܫܡܳܢܶܐ ܕܰܡ ܡܳܪܰܬ݂ܬ݂ܶܗ. ܐܝܢܰܩܠܰܗ ܕܰܐܬ݂ܝܐ ܐܝ ܣܝܪܰܐ ܠܒܶܩܘܣܝܳܢܶܐ܆ ܐܰܩ ܩܘܣܢܳܝܶܐ ܡܒܰܝܰܢܢܶܗ ܐܷܫܬܐ ܫܰܟ݂ܣܰܬ ܕܟܘܕܥܝ ܐܰܡ ܡܷܠܟܰܬ ܕܝ ܩܪܝܬ݂ܐ ܠܰܫܰܢ ܕܷܡܥܰܘܢܝ ܠܘ ܡܰܥܡܘܪ ܒܘ ܩܶܝܳܕܐ. ܗܰܢܝܢܶܐ ܐܰܫ ܫܰܟ݂ܣܰܬ: ܡܰܠܟܶܐ ܐܰܔܰܪ ܕܒܶܐ ܝܘܚܶܐ. ܨܰܘܡܶܐ ܕܘܪܡܰܙ ܕܒܶܐ ܐܰܣܡܰܪ ܐܰܦܪܐ. ܡܘܪܰܕ ܐܰܔܰܪ ܕܒܶܐ ܐܰܕܕܶܐ. ܝܰܘܣܶܦ ܐܰܩܛܰܫ ܕܒܶܐ ܓ݂ܙܰܠܐ. ܡܰܠܟܶܐ ܐܶܪܓܘܢ ܕܒܶܐ ܕܰܢܚܐ ܡܶܐ ܕܶܪܩܘܒܶܐ. ܡܘܪܰܕ ܐܰܨܠܰܢ ܕܒܶܐ ܥܰܦܕܰܠܐ. ܐܝܢܰܩܩܰܐ ܕܡܰܛܝܐ ܐܝ ܣܝܪܰܐ ܠܝ ܩܪܝܬ݂ܐ܆ ܐܰܬ݂ܝ ܐܘ ܡܰܥܡܘܪ ܕܘ ܬܰܦ݁ܳܘ ܘܥܰܡ ܐܰܫ ܫܰܟ݂ܣܰܬ ܕܟܷܬܝܐ ܐܷܫܡܰܝܝܶܗ ܠܰܠܥܰܠ܆ ܒܕܰܠܠܶܗ ܕܷܡܩܰܝܕܝ ܐܰܡ ܡܷܠܟܰܬ ܥܰܠ ܐܷܫܡܶܗ ܕܰܡ ܡܳܪܰܬ݂ܬ݂ܶܗ ܕܟܷܬܢܶܐ ܒܝ ܩܪܝܬ݂ܐ ܐܰܘ ܒܰܐܘܪܘܦ݁ܰܐ. ܗܰܟܟܰܐ ܟܰܪܡܐ ܐܰܘ ܒܰܝܬܐ ܐܰܘ ܐܰܪܥܐ. ܘܗܰܘܟ݂ܰܐ ܐܝܢܰܩܩܰܐ ܩܰܡܰܝܬܐ ܪܘܫܡܳܐܝܬ݂ ܡܩܰܝܕܝ ܐܰܡ ܡܷܠܟܰܬ ܥܰܠ ܐܷܫܡܶܗ ܕܰܡ ܡܳܪܰܬ݂ܬ݂ܶܗ ܘܡܷܕܕܶܗ ܐܰܛ ܛܰܦ݁ܳܘܰܬ݂ܬ݂ܶܗ. ܡܠܦܢܐ ܫܟܪܝ ܐܩܛܫ 4201 ܡ̈ܠܐ