Šëkri Aqtaš: ܐܘ ܕܰܪܓ݂ܐ ܕܝ ܕܰܝܪܳܝܘܬ݂ܐ ܒܝ ܥܝܬܐ ܣܘܪܝܰܝܬܐ / U darġo di dayroyuṯo bi Cito Suryayto
U darġo di dayroyuṯo bi Cito Suryayto
ܐܝ ܕܰܝܪܳܝܘܬ݂ܐ ܚܰܐ ܡܰܕ ܕܰܪܓ݂ܶܐ ܡܝܰܩܪܶܐ ܕܝ ܥܝܬܐ ܣܘܪܝܰܝܬܐ ܝܐ. ܐܝ ܥܝܬܐ ܣܘܪܝܰܝܬܐ ܡܘ ܝܰܘܡܐ ܕܪܰܟܝܘܐ܆ ܥܝܬܐ ܡܛܰܟܰܣܬܐ ܘܕܶܡܳܩܪܰܛܳܝܬܐ ܝܐ. ܥܰܠ ܗܰܬ݂ܶܐ ܟܳܡܝܰܩܪܐ ܐܰܕ ܕܰܪܓ݂ܶܐ ܕܝ ܟܳܗܢܘܬ݂ܐ ܟܘܠܠܶܗ. ܡܰܙ ܙܰܒܢܶܐ ܩܰܡܳܝܶܐ܆ ܟܝܬܐ ܕܰܪܓ݂ܐ ܕܰܡܙܰܘܓ݂ܶܐ ܘܕܰܪܓ݂ܐ ܕܰܒܬ݂ܘܠܶܐ ܝܰܢܝ ܕܰܥ ܥܰܣܒܶܐ. ܐܝܢܰܩܠܰܐ ܕܟܳܚܰܝܪܝܢܰܐ ܒܰܥ ܥܝܬܳܬ݂ܶܐ ܕܰܟ ܟܰܬܘܠܝܟ ܐܰܘ ܕܰܦ݁ܪܳܛܶܣܬܰܢ܆ ܟܳܚܳܙܝܢܰܐ ܕܗܘܠ ܠܰܕܝܰܘܡܰܐ ܠܐ ܫܪܰܠܠܶܗ ܐܘ ܩܰܛܪܰܢܐ. ܒܝ ܥܝܬܐ ܟܰܬܘܠܝܟ܆ ܐܰܟ ܟܳܗܢܶܐ ܟܘܠܠܶܗ ܟܳܦܰܝܫܝ ܒܬ݂ܘܠܶܐ ܝܢܝ ܠܳܟܳܡܝܙܰܘܓ݂ܝ. ܘܒܝ ܥܝܬܐ ܦ݁ܪܘܛܳܝܬܐ ܣܬܶܐ ܟܘܠܠܶܗ ܟܳܡܝܙܰܘܓ݂ܝ. ܒܝ ܥܝܬܰܝܕܰܢ ܣܬܶܐ ܐܘ ܕܰܪܓ݂ܐ ܕܝ ܟܳܗܢܘܬ݂ܐ ܟܳܡܷܦܠܰܓ݂ ܠܷܬܪܶܐ. ܕܰܕ ܕܰܝܪܳܝܶܐ ܘܕܰܩ ܩܰܫܶܐ. ܔܓ݂ܘܪ ܡܘ ܕܰܪܓ݂ܐ ܕܝ ܕܰܝܪܳܝܘܬ݂ܐ܆ ܐܰܕ ܕܰܪܓ݂ܶܐ ܚܪܶܢܶܐ ܒܘ ܓܘܒܳܝܐ ܕܘ ܥܰܡܐ ܘܕܰܡܗܰܝܡܢܶܐ ܟܳܘܷܢ. ܐܶܠܐ ܐܝ ܕܰܝܪܳܝܘܬ݂ܐ ܟܳܦܰܝܫܐ ܥܰܠ ܐܘ ܨܶܒܝܳܢܐ ܕܘ ܚܰܐ ܕܟܳܒܰܥ ܗܳܘܶܐ ܕܰܝܪܳܝܐ. ܐܘ ܥܠܰܝܡܐ ܐܰܘ ܐܝ ܥܠܰܝܡܬ݂ܐ ܕܷܐܒܥܝ ܘܕܪܷܚܡܝ ܐܰܚ ܚܰܝܶܐ ܕܝ ܕܰܝܪܳܝܘܬ݂ܐ ܟܳܘܷܢ ܕܰܝܪܳܝܶܐ. ܒܰܙ ܙܰܒܢܶܐ ܩܰܡܳܝܶܐ܆ ܐܘ ܥܠܰܝܡܐ ܕܪܳܚܰܡܘܰܐ ܕܗܳܘܶܐ ܕܰܝܪܳܝܐ܆ ܠܳܙܰܡܘܰܐ ܕܥܳܝܰܫ ܐܷܫܢܶܐ ܓ݂ܰܠܰܒܶܐ ܒܝ ܕܰܝܪܐ ܘܒܰܝܢ ܐܰܕ ܕܰܝܪܳܝܶܐ. ܒܷܬ݂ܷܪ ܡܶܐ ܙܰܒܢܐ ܝܰܪܝܟ݂ܐ ܕܡܰܥܒܰܪܠܶܗ ܒܝ ܕܰܝܪܐ܆ ܗܰܟܟܰܐ ܕܳܐܒܰܥ ܕܗܳܘܶܐ ܕܰܝܪܳܝܐ، ܟܳܠܳܙܰܡ ܕܳܐܡܰܪܠܶܗ ܠܘ ܪܝܫ ܕܰܝܪܐ. ܐܝܕ݂ܰܐ ܐܘ ܪܝܫ ܕܰܝܪܐ ܣܬܶܐ ܪܚܷܡܠܶܗ ܘܚܙܶܠܶܗ ܕܟܳܡܰܠܷܩ ܠܝ ܕܰܝܪܳܝܘܬ݂ܐ܆ ܟܳܡܳܕ݂ܰܥ ܠܘ ܚܰܣܝܐ ܕܝ ܡܰܪܥܝܬ݂ܰܝܕ݂ܶܗ. ܐܘ ܚܰܣܝܐ ܕܝ ܡܰܪܥܝܬ݂ܐ܆ ܒܷܬ݂ܷܪ ܡܶܐ ܕܫܰܡܷܥ ܟܳܐܒܰܥ ܗܳܘܶܐ ܕܰܝܪܳܝܐ܆ ܒܶܐܓܰܪܬ݂ܐ ܟܳܡܰܘܕܰܥ ܠܘ ܦܰܛܷܪܝܰܪܟ݂ܐ ܐܰܥܠܶܗ. ܡܶܐ ܕܐܘ ܦܰܛܷܪܝܰܪܟ݂ܐ ܗܘܠܶܗ ܕܰܤܛܷܪ ܕܡܷܪܣܰܡ ܕܰܝܪܳܝܐ܆ ܒܝܰܘܡܐ ܐܝܕ݂ܝܥܐ ܘܒܛܷܟܣܐ ܕܝܠܳܢܳܝܐ ܕܝ ܪܰܣܰܡܶܐ ܕܰܕ ܕܰܝܪܳܝܶܐ܆ ܐܘ ܚܰܣܝܰܝܕ݂ܶܗ ܟܳܪܳܣܰܡܠܶܗ ܩܰܡܰܝܬܐ ܕܰܝܪܳܝܐ ܫܰܪܘܳܝܐ ܘܟܳܦܳܝܰܫ ܐܰܦܷܕ݂ܝܰܩܢܐ ܘܒܷܬ݂ܷܪܟܶܐ ܫܰܡܳܫܐ ܨܘܝܥܐ. ܒܷܬ݂ܷܪ ܡܶܐ ܕܝܰܠܷܦ ܐܘ ܛܶܟܣܐ ܕܝ ܕܰܝܪܳܝܘܬ݂ܐ ܛܳܘܐ܆ ܟܳܡܷܪܣܰܡ ܕܰܝܪܳܝܐ ܟܳܗܢܐ. ܡܶܐ ܕܷܪܣܝܡ ܟܳܗܢܐ܆ ܗܰܘ ܟܝܒܗ ܕܫܳܠܰܚ ܐܘ ܐܶܣܟܝܡܐ ܕܝ ܕܰܝܪܳܝܘܬ݂ܐ ܘܕܳܥܰܪ ܠܝ ܥܳܠܡܳܝܘܬ݂ܐ. ܓܡܰܫܦܰܥ ܐܰܚ ܚܰܝܰܝܕ݂ܶܗ ܟܘܠܠܶܗ ܒܕܰܝܪܐ ܘܒܝ ܕܰܝܪܳܝܘܬ݂ܐ. ܒܘ ܩܪܳܝܐ ܕܘ ܟܬ݂ܳܘܐ ܩܰܕܝܫܐ. ܒܘ ܨܰܘܡܐ ܘܒܝ ܨܠܘܬ݂ܐ ܘܒܟܘܠ ܫܘܓ݂ܠܐ ܕܟܷܬܝܐ ܪܚܝܡܐ ܗܰܡ ܥܰܠ ܐܰܠܳܗܐ ܘܗܰܡ ܥܰܠ ܰܐܢ ܢܳܫܶܐ. ܐܝܢܰܩܠܰܐ ܕܝܳܠܰܦ ܘܡܫܰܘܫܰܛ ܪܘܚܶܗ܆ ܕܗܳܘܶܐ ܣܢܝܩܘܬ݂ܐ ܟܝܒܶܗ ܡܝܢܰܩܶܐ ܠܝ ܚܰܣܝܘܬ݂ܐ ܡܘ ܥܰܡܐ ܘܡܰܟ ܟܳܗܢܶܐ ܕܝ ܡܰܪܥܝܬ݂ܐ. ܟ݂ܘܕ ܟܷܬܝܐ ܐܝܕ݂ܝܥܐ܆ ܐܰܩ ܩܰܫܶܐ ܟܷܦ݁ܦ݁ܶܗ ܗܳܘܷܢ ܟ݂ܘܪܳܝܶܐ ܐܶܠܐ ܠܰܦ݁ܦ݁ܶܗ ܕܗܳܘܷܢ ܚܰܣܝܶܐ. ܐܝܢܰܩܠܰܐ ܕܝ ܒܰܬ݂ܩܝܰܘܡܐ ܡܝܚܰܣܝܐ܆ ܐܘ ܩܰܫܐ ܠܰܘ ܟܝܒܶܗ ܕܡܝܙܰܘܰܓ݂ ܢܰܩܠܰܐ ܚܪܶܬܐ. ܕܳܐܒܰܥ ܩܰܡܰܝܬܐ ܟܝܒܶܗ ܕܗܳܘܶܐ ܕܰܝܪܳܝܐ ܘܒܷܬ݂ܷܪ ܐܶܦܷܣܩܘܦܐ. ܐܰܣ ܣܘܪܝܳܝܶܐ܆ ܡܘ ܝܰܘܡܐ ܕܡܰܩܒܰܠܠܶܗ ܐܝ ܡܫܝܚܳܝܘܬ݂ܐ܆ ܪܚܝܡܰܠܠܶܗ ܡܶܐ ܟܘܠܶܗ ܠܶܒܰܝܝܶܗ. ܪܚܷܡܡܶܗ ܐܰܚ ܚܰܝܶܐ ܪܘܚܳܢܳܝܶܐ ܙܷܬܬܷܪ ܡܰܥ ܥܳܠܡܳܝܶܐ. ܘܟܬ݂ܘܘܶܗ ܟܬ݂ܳܘܶܐ ܓ݂ܰܠܰܒܶܐ ܠܓܳܪܰܢ ܕܘ ܡܓܰܠܝܘܢ. ܘܟ݂ܠܷܩܩܶܗ ܡܕ݂ܝܢܳܝܘܬ݂ܐ ܥܰܬܷܪܬܐ ܘܥܰܡܷܩܬܐ. ܥܰܠ ܗܰܬ݂ܶܐ ܟܳܚܳܙܝܢܰܐ ܕܠܐ ܟ݂ܠܷܛܛܶܗ ܐܰܫ ܫܘܓ݂ܠܳܢܰܬ݂ܬ݂ܶܗ ܐܰܥ ܥܳܠܡܳܝܶܐ ܒܰܥ ܥܝܬܳܢܳܝܶܐ. ܗܰܘܟ݂ܰܐ ܢܛܷܪܪܶܗ ܘܡܝܰܩܰܪܪܶܗ ܐܷܫܡܶܗ ܕܐܝ ܥܝܬܐ ܒܕܰܪܓ݂ܐ ܥܶܠܳܝܐ. ܒܝ ܚܘܒܐ ܫܰܚܷܢܬܐ ܕܟܷܬܘܰܠܠܶܗ ܠܰܦ ܐܝ ܥܝܬܐ ܘܠܰܦ ܐܰܚ ܚܰܝܶܐ ܪܘܚܳܢܳܝܶܐ܆ ܡܰܥܡܰܪܪܶܗ ܕܰܝܪܶܐ ܕܠܐ ܡܷܢܝܳܢܐ ܪܰܚܘܩܶܐ ܡܰܩ ܩܷܪܝܰܘܳܬ݂ܶܐ ܘܡܰܡ ܡܕ݂ܝܢܳܬ݂ܶܐ ܒܪܝܫܶܗ ܕܰܛ ܛܘܪܳܢܶܐ. ܘܒܰܢ ܐܰܠܦܰܝܳܐ ܥܠܰܝܡܶܐ ܛܳܪܷܢܘܰܐ ܡܘ ܥܳܠܡܐ ܘܪܘܗܛܝܘܰܐ ܠܰܕ ܕܰܝܪܶܐ ܕܥܷܒܕܝ ܘܕܗܳܘܷܢ ܕܰܝܪܳܝܶܐ ܘܥܳܢܘܳܝܶܐ. ܐܝܢܰܩܠܰܐ ܕܟܳܩܳܪܝܢܰܐ ܐܘ ܡܰܟܬܰܒܙܰܒܢܐ ܕܝ ܥܝܬܐ ܣܘܪܝܰܝܬܐ ܟܳܚܳܙܝܢܰܐ ܒܘ ܡܰܕܷܢܚܐ ܕܐܘܪܗܳܝ ܟܷܬܘܰܐ ܛܘܪܐ. ܘܒܘ ܕܳܪܐ ܕܰܚ ܚܰܡܫܐ ܟܷܬܘܰܐ ܒܘ ܛܘܪܰܢܐ ܬܠܰܬ݂ܡܐ ܘܚܰܡܫܝ ܥܝܬܳܬ݂ܶܐ ܘܕܰܝܪܶܐ. ܘܒܰܕ ܕܰܝܪܰܢܝ ܥܷܡܪܝܘܰܐ ܠܰܦ ܬܷܫܥܝ ܐܰܠܦܐ ܕܰܝܪܳܝܶܐ ܥܰܡ ܚܕ݂ܳܕܶܐ. ܒܝ ܕܰܝܪܐ ܕܡܳܪܝ ܡܰܬܰܝ ܕܟܷܬܝܐ ܩܰܪܘܬܐ ܠܡܰܘܨܰܠ܆ ܥܰܝܫܝܘܰܐ ܬܪܰܥܣܰܪ ܐܰܠܦܐ ܕܰܝܪܳܝܶܐ. ܒܝ ܕܰܝܪܐ ܕܡܳܪܝ ܒܳܣܘܣ ܕܟܷܬܝܐ ܩܰܪܘܬܐ ܠܚܷܡܷܨ ܣܬܶܐ ܥܰܝܫܝܘܰܐ ܠܰܦ ܐܷܫܬܐ ܐܰܠܦܐ ܘܬܠܰܬܡܐ ܕܰܝܪܳܝܶܐ. ܠܓܳܪܰܢ ܕܘ ܟܬ݂ܳܘܐ ܕܘ ܡܰܟܬܰܒܙܰܒܢܐ ܕܝ ܥܝܬܐ ܕܷܟܬ݂ܘܠܶܗ ܦܰܛܷܪܝܰܪܟ݂ܐ ܝܰܥܩܘܒ ܬܠܝܬ݂ܳܝܐ܆ ܟܷܬܘܰܐ ܫܶܬܡܐ ܐܰܠܦܐ ܕܰܝܪܳܝܶܐ ܒܝ ܥܝܬܐ ܒܰܝܢ ܠܘ ܕܳܪܐ ܕܰܚ ܚܰܡܫܐ ܠܰܬ ܬܡܰܢܝܐ ܕܟܳܡܝܕ݂ܰܥ ܐܘ ܕܳܪܐ ܕܰܗܒܳܢܳܝܐ ܕܝ ܥܝܬܐ ܣܘܪܝܰܝܬܐ. ܗܷܢ ܢܳܫܶܐ ܣܬܶܐ ܟܷܡܡܝ: ܥܰܠ ܕܟܷܬܘܰܐ ܕܰܝܪܳܝܶܐ ܥܰܒܳܕܶܐ ܓ݂ܰܠܰܒܶܐ ܒܛܘܪܥܰܒܕܝܢ܆ ܩܪܶܐ ܒܘ ܡܰܟܬܰܒܙܰܒܢܐ ܛܘܪܐ ܕܰܥ ܥܰܒܳܕܶܐ. ܓ݂ܰܠܰܒܶܐ ܡܰܕ ܕܰܝܪܳܝܰܢܝ ܕܷܡܥܰܢܰܬܬܶܗ ܡܘ ܥܳܠܡܐ ܘܪܰܚܝܩܝ ܡܝܢܶܗ ܘܠܘܷܫܫܶܗ ܐܘ ܐܶܣܟܝܡܐ ܕܝ ܕܰܝܪܳܝܘܬ݂ܐ܆ ܗܰܘܷܢ ܬܶܕ݂ܡܪܳܬ݂ܶܐ ܒܐܝܕ݂ܰܝܝܶܗ. ܒܝ ܚܰܪܰܝܬܐ ܕܥܷܡܪܰܝܝܶܗ ܣܬܶܐ ܗܰܘܷܢ ܩܰܕܝܫܶܐ. ܥܰܠ ܕܗܰܘܝ ܩܰܕܝܫܶܐ ܓ݂ܰܠܰܒܶܐ ܒܝ ܥܝܬܐ ܣܷܪܝܰܝܬܐ܆ ܟܳܡܝܕ݂ܳܥܐ ܐܝ ܐܶܡܐ ܕܰܩ ܩܰܕܝܫܶܐ. ܗܘܠ ܠܰܕܝܰܘܡܰܐ ܟܳܡܝܣܰܡ ܐܘ ܕܘܟ݂ܪܳܢܐ ܕܰܩ ܩܰܕܝܫܶܐ ܒܝ ܥܝܬܐ. ܘܐܘ ܥܰܡܐ ܣܘܪܝܳܝܐ ܩܰܡܰܝܬܐ ܒܘ ܐܰܬ݂ܪܐ ܕܰܢ ܐܰܒܳܗܳܬ݂ܐ܆ ܘܒܰܢ ܢܷܫܢܰܢܝ ܐܰܚ ܚܰܪܳܝܶܐ ܒܰܐܘܪܘܦ݁ܰܐ ܡܰܥܡܰܪܪܶܗ ܥܝܬܳܬ݂ܶܐ ܪܰܒܶܐ ܘܫܰܦܝܪܶܐ ܥܰܠ ܐܷܫܡܰܝܝܶܗ. ܘܰܐܡܗܰܝܡܢܶܐ ܟܳܩܳܪܷܢ ܘܝܷܠܦܝ ܐܰܩ ܩܷܣܰܬ ܕܰܚ ܚܰܝܰܬ݂ܬ݂ܶܗ ܘܟܳܙܷܒܛܝ ܐܰܒ ܒܰܛܠܳܢܰܬ݂ܬ݂ܶܗ. ܠܰܫܰܢ ܕܷܡܗܰܠܟ݂ܝ ܒܷܬ݂ܪܰܝܝܶܗ ܘܒܰܕ ܕܰܪܒܳܢܰܬ݂ܬ݂ܶܗ. ܒܝ ܡܰܫܠܡܳܢܘܬ݂ܐ ܕܝ ܥܝܬܐ ܣܘܪܝܰܝܬܐ܆ ܐܝ ܕܰܝܪܳܝܘܬ݂ܐ ܕܰܪܓ݂ܐ ܡܩܰܕܫܐ ܝܐ. ܐܘ ܕܰܝܪܳܝܐ ܠܰܫܰܢ ܕܬܳܝܰܒ ܘܡܰܬܪܰܟ ܐܘ ܥܳܠܡܐ܆ ܘܠܳܘܰܫ ܚܰܝܶܐ ܚܰܬ݂ܶܐ ܘܢܰܕ݂ܝܦܶܐ܆ ܟܳܘܶܐ ܕܰܝܪܳܝܐ. ܟܳܡܳܝܰܕ ܐܘ ܨܠܝܒܐ ܕܰܚ ܚܰܝܶܐ ܘܟܐܘܙܙܶܗ ܒܷܬ݂ܪܶܗ ܡܫܝܚܐ ܐܘ ܡܳܪܰܝܕ݂ܰܢ. ܟ݂ܘܕ ܡܷܪܠܶܗ ܡܫܝܚܐ ܒܘ ܡܓܰܠܝܘܢ: ܡܰܢ ܕܠܐ ܛܳܥܰܢ ܐܘ ܨܠܝܒܰܝܕ݂ܶܗ ܘܛܳܪܶܐ ܡܘ ܒܰܒܐ ܘܡܝ ܐܶܡܐ ܘܡܝ ܐܰܬ݂ܬܐ ܘܚܰܬܬܰܐ ܕܟܳܦܰܪ ܒܪܘܚܶܗ܆ ܠܰܝܒܶܗ ܕܗܳܘܶܠܝ ܬܰܠܡܝܕ݂ܐ. ܗܷܢ ܡܰܢ ܐܰܒܳܗܳܬ݂ܐ ܕܝ ܥܝܬܐ ܟܷܐܡܡܝ: ܐܝ ܕܰܝܪܳܝܘܬ݂ܐ ܡܰܘܬܳܝܐ ܒܘ ܥܳܠܡܰܢܐ. ܐܝܢܰܩܠܰܐ ܕܟܳܠܳܘܰܫ ܐܘ ܐܶܣܟܝܡܐ ܕܝ ܕܰܝܪܳܝܘܬ݂ܐ܆ ܟܳܡܳܝܰܬ݂ ܠܰܚ ܚܰܝܶܐ ܥܳܠܡܳܝܶܐ܆ ܘܟܳܥܳܡܰܕ݂ ܡܶܐ ܚܰܬ݂ܐ ܠܰܚ ܚܰܝܶܐ ܪܘܚܳܢܳܝܶܐ. ܐܝ ܕܰܝܪܳܝܘܬ݂ܐ ܟܷܬܠܰܗ ܬܠܳܬ݂ܐ ܢܝܫܶܐ ܐܳܠܨܳܝܶܐ: ܐ ـ ܒܬ݂ܘܠܘܬ݂ܐ ܡܰܟܝܟ݂ܬܐ ܟܘܠܠܶܗ ܐܰܚ ܚܰܝܰܝܕ݂ܶܗ. ܒ ـ ܡܷܣܟܝܢܘܬ݂ܐ. ܥܰܢܬܐ ܡܘ ܡܰܠ ܕܝ ܒܪܝܬ݂ܰܬ݂ܶܗ. ܓ ــ ܡܰܟܝܟ݂ܘܬ݂ܐ ܐܰܘ ܡܶܫܬܰܡܥܳܢܘܬ݂ܐ. ܐܰܕ ܕܰܝܪܳܝܶܐ܆ ܟܳܠܳܙܰܡ ܕܝܘܠܦܝ ܐܰܚ ܚܰܝܶܐ ܘܐܘ ܝܘܠܦܳܢܐ ܕܷܡܫܝܚܐ، ܠܰܫܰܢ ܕܡܰܠܟ݂ܝ ܒܘ ܕܰܪܒܰܝܕ݂ܶܗ. ܥܰܠ ܕܷܡܫܝܚܐ ܣܬܶܐ ܡܥܰܢܰܬܠܶܗ ܡܘ ܥܳܠܡܰܢܐ ܘܡܰܒ ܒܘܣܳܡܰܝܕ݂ܶܗ ܐܡ ܡܰܛܷܥܝܳܢܶܐ ܘܡܶܐ ܟܘܠ ܡܶܕܶܐ ܕܟܝܬܐ ܐܶܒܶܗ. ܘܡܳܠܰܦܠܶܗ ܥܰܠ ܐܰܚ ܚܰܝܶܐ ܘܥܰܠ ܐܝ ܡܰܠܟܘܬ݂ܐ ܕܒܘ ܥܳܠܡܐ ܕܷܓܕܳܐܬ݂ܶܐ. ܟܳܩܳܪܝܰܢܐ ܒܘ ܡܓܰܠܝܘܢ ܕܡܰܬܰܝ܆ ܐܝܢܰܩܠܰܐ ܕܘ ܥܠܰܝܡܐ ܟܳܡܫܰܝܰܠ ܠܷܡܫܝܚܐ ܘܟܳܐܡܰܪ: ܠܰܫܰܢ ܕܥܳܒܰܪܢܐ ܠܝ ܡܰܠܟܘܬ݂ܐ ܡܷܢ ܟܳܠܳܙܰܡ ܕܣܳܝܰܡܢܐ؟ ܡܰܕܥܰܪܠܶܗ ܐܰܥܠܶܗ ܡܫܝܚܐ ܘܡܷܪܠܶܠܶܗ: ܐܝܕ݂ܰܐ ܕܟܷܒܥܰܬ ܥܷܒܪܰܬ ܠܝ ܡܰܠܟܘܬ݂ܐ܆ ܙܘܟ݂ ܡܙܰܒܰܢ ܟܘܠ ܡܶܕܶܐ ܕܟܷܬܠܘܟ݂ ܘܗܰܘܶܐ ܠܰܦ ܦܰܩܝܪܶܐ. ܓܬܳܘܶܠܘܟ݂ ܟܷܙܢܰܐ ܒܝ ܫܡܰܝܐ܆ ܘܬܘܟ݂ ܒܷܬ݂ܪܝ. ܒܰܕ ܕܳܪܶܐ ܩܰܡܳܝܶܐ܆ ܐܝ ܕܰܝܪܳܝܘܬ݂ܐ ܒܝ ܥܝܬܐ ܣܘܪܝܰܝܬܐ ܕܰܐܢܛܰܟܝܰܐ܆ ܠܷܬܠܳܬ݂ܐ ܕܰܪܒܳܢܶܐ ܡܷܦܠܳܓ݂ܳܘܰܐ. ܟܘܠ ܕܰܪܒܐ ܟܷܬܘܰܝܠܶܗ ܚܰܝܶܐ ܘܩܳܢܘܢܶܐ ܘܔܘܠܶܐ ܕܦܷܪܫܷܢܘܰܢܢܶܗ ܡܷܚܕ݂ܳܕ݂ܶܐ. ܐ: ܐܰܦܪܶܝܡܳܝܶܐ. ܒ: ܐܰܢܛܘܢܝܣܳܝܶܐ. ܓ: ܣܪܘܓ݂ܳܝܶܐ. ܐ: ܐܰܕ ܕܰܝܪܳܝܶܐ ܐܰܦܪܶܝܡܳܝܶܐ: ܗܰܢܝ ܕܟܳܡܰܠܟ݂ܝ ܒܷܬ݂ܪܶܗ ܡܳܪܝ ܐܰܦܪܶܝܡ ܡܰܠܦܳܢܐ ܘܫܷܡܫܐ ܕܰܣ ܣܘܪܝܳܝܶܐ. ܕܥܰܐܝܷܫ ܒܘ ܕܳܪܐ ܕܰܐܢ ܐܰܪܒܥܐ ܒܝ ܡܕ݂ܝܬܐ ܕܷܢܨܝܘܷܢ. ܟܳܡܷܠܦܝ ܐܰܝ ܝܳܠܘܦܶܐ ܘܰܐܝ ܝܳܠܘܦܳܬ݂ܶܐ ܒܰܡ ܡܰܕܪܰܣܰܬ. ܟܳܡܥܰܘܢܝ ܐܰܝ ܝܰܬܘܡܶܐ ܘܰܐܢ ܐܰܪܡܠܳܬ݂ܶܐ ܘܰܐܟ ܟܰܐܝܘܶܐ. ܡܳܪܝ ܐܰܦܪܶܝܡ܆ ܒܝ ܡܰܕܪܰܫܬܐ ܕܷܢܨܝܘܷܢ ܡܳܠܰܦܘܰܐ ܐܰܩ ܩܝܢܳܬ݂ܶܐ ܘܐܘ ܡܘܣܝܩܝ ܕܝ ܥܝܬܐ ܠܰܥܠܰܝܡܶܐ ܘܠܰܥܠܰܝܡܳܬ݂ܶܐ. ܗܝܝܶܗ ܒܝ ܩܰܡܰܝܬܐ ܛܪܶܠܶܗ ܕܰܥܠܰܝܡܳܬ݂ܶܐ ܙܷܡܪܝ ܒܝ ܥܝܬܐ. ܒܷܬ݂ܷܪ ܡܶܐ ܕܰܐܙܙܶܗ ܡܷܢ ܢܨܝܘܷܢ ܠܐܘܪܗܳܝ܆ ܡܳܠܰܦܘܰܐ ܐܰܕ ܕܰܝܪܳܝܶܐ ܝܘܠܦܳܢܐ ܪܘܚܳܢܳܝܐ ܘܡܫܝܚܳܝܐ. ܐܰܝ ܝܳܠܘܦܰܝܕ݂ܶܗ ܦܰܝܫܝܘܰܐ ܕܰܝܪܳܝܶܐ ܫܰܪܘܳܝܶܐ ܘܠܷܒܥܝܘܰܐ ܕܗܳܘܷܢ ܟܳܗܢܶܐ. ܟ݂ܘܕ ܟܷܬܝܐ ܐܝܕ݂ܝܥܐ ܡܳܪܝ ܐܰܦܪܶܝܡ ܣܬܶܐ ܠܰܘܝ ܟܳܗܢܐ. ܥܰܠ ܗܰܬ݂ܶܐ܆ ܐܝ ܬܷܫܡܷܫܬܐ ܕܰܕ ܕܰܝܪܳܝܶܐ ܐܰܦܪܶܝܡܳܝܶܐ، ܕܟܘܪܟ݂ܝ ܐܰܡ ܡܰܕܪܫܳܬ݂ܶܐ ܕܰܣ ܣܘܪܝܳܝܶܐ ܘܡܷܠܦܝ ܠܰܝ ܝܳܠܘܦܶܐ ܝܘܠܦܳܢܐ ܪܘܚܳܢܳܝܐ ܘܰܐ. ܒ: ܐܰܕ ܕܰܝܪܳܝܶܐ ܐܰܢܛܘܢܝܣܳܝܶܐ: ܐܘ ܕܰܪܓ݂ܰܢܐ ܕܰܕ ܕܰܝܪܳܝܶܐ ܡܷܣܪܳܝܐ ܒܰܚ ܚܰܝܶܐ ܕܰܐܒܐ ܐܰܢܛܳܘܢܝܳܘܣ ܕܥܳܝܰܫܘܰܐ ܒܡܷܨܷܪ. ܟ݂ܘܕ ܐܰܒܐ ܐܰܢܛܳܘܢܝܳܘܣ ܟܳܪܘܚܩܝ ܡܰܢ ܢܳܫܶܐ ܘܟܳܥܘܒܕܝ ܒܰܕ ܕܰܝܪܶܐ ܘܒܰܡܥܰܪܶܐ ܘܒܰܫܩܝܦܶܐ. ܟܳܘܷܢ ܓ݂ܰܠܰܒܶܐ ܡܰܟܝܟ݂ܶܐ ܘܡܷܫܬܰܡܥܳܢܶܐ. ܘܒܟܘܠܠܶܗ ܐܰܚ ܚܰܝܰܬ݂ܬ݂ܶܗ ܟܳܡܨܰܠܷܢ ܘܟܳܨܰܝܡܝ ܘܟܳܫܘܗܪܝ ܒܠܰܠܝܐ ܘܒܝܡܳܡܐ. ܥܰܠ ܕܒܘ ܙܳܘܘܕܐ ܟܳܩܳܪܷܢ ܐܘ ܟܬ݂ܳܘܐ ܩܰܕܝܫܐ ܘܰܐܡ ܡܰܙܡܘܪܶܐ ܕܕܰܘܝܕ ܐܘ ܢܒܝܝܐ܆ ܠܐ ܟܳܘܷܢ ܪܝܫܳܢܶܐ ܐܰܘ ܚܰܣܝܶܐ ܐܰܘ ܦܰܛܷܪܝܰܪܟ݂ܶܐ. ܡܬܰܪܟܝܘܰܐ ܐܘ ܥܳܠܡܐ ܘܥܰܝܫܝܘܰܐ ܚܰܝܶܐ ܪܘܚܳܢܳܝܶܐ ܘܥܷܒܕܝܘܰܐ. ܝܘܠܦܳܢܐ ܥܳܠܡܳܝܐ ܘܡܕ݂ܝܢܳܝܐ ܠܐ ܩܳܪܷܢܘܰܐ. ܓ: ܐܰܕ ܕܰܝܪܳܝܶܐ ܣܪܘܓ݂ܳܝܶܐ: ܗܰܢܝ ܣܬܶܐ ܐܰܕ ܕܰܝܪܳܝܶܐ ܕܟܳܡܰܠܟ݂ܝ ܒܷܬ݂ܪܶܗ ܕܡܳܪܝ ܝܰܥܩܘܒ ܕܰܣܪܘܓ݂ ܢܶܐ. ܥܰܡ ܐܘ ܝܘܠܦܳܢܐ ܪܘܚܳܢܳܝܐ܆ ܩܳܪܷܢܘܰܐ ܦܰܠܣܰܦܶܐ، ܗܰܢܕܰܣܶܐ، ܕܰܟ݂ܬܘܪܝܝܶܗ ܘܝܘܠܦܳܢܶܐ ܚܪܶܢܶܐ. ܝܘܠܦܝܘܰܐ ܒܰܡ ܡܰܕܪܰܣܰܬ ܕܐܘܪܗܳܝ ܘܢܨܝܘܷܢ ܘܩܶܢܢܶܫܪܝܢ. ܓ݂ܰܠܰܒܶܐ ܡܰܪ ܪܝܫܳܢܶܐ ܕܝ ܥܝܬܐ ܡܝ ܡܰܕܪܰܣܶܐ ܕܰܐܢܛܰܟܝܰܐ ܢܰܦܝܩܝܘܰܐ. ܗܘܠ ܠܰܕܝܰܘܡܰܐ ܐܰܚ ܚܰܝܶܐ ܕܝ ܕܰܝܪܳܝܘܬ݂ܐ ܟܳܡܕܰܘܡܝ ܒܰܕ ܕܰܝܪܶܐ ܕܛܘܪܥܰܒܕܝܢ. ܟ݂ܘܕ ܡܷܪܠܰܢ ܡܶܐ ܠܰܠܥܰܠ܆ ܒܰܕ ܕܳܪܶܐ ܕܰܗܒܳܢܳܝܶܐ ܕܝ ܡܫܝܚܳܝܘܬ݂ܐ ܣܳܠܰܩܘܰܐ ܐܘ ܡܷܢܝܳܢܰܬ݂ܬ݂ܶܗ ܠܰܢ ܐܰܠܦܰܝܐ. ܐܶܠܐ ܒܘ ܕܳܪܐ ܕܰܥ ܥܷܣܪܝ ܡܫܰܪܶܠܶܗ ܐܘ ܡܷܢܝܳܢܐ ܕܘ ܥܰܡܐ ܣܘܪܝܳܝܐ ܢܳܩܰܨ ܒܘ ܐܰܬ݂ܪܰܝܕ݂ܶܗ ܐܘ ܫܷܪܫܳܢܳܝܐ. ܫܰܬܐ ܒܷܬܪܝ ܫܰܬܐ ܐܘ ܡܷܢܝܳܢܐ ܕܰܕ ܕܰܝܪܳܝܶܐ ܣܬܶܐ ܢܰܩܷܨ ܒܰܕ ܕܰܝܪܶܐ. ܐܰܝܰܘܡܰܐ ܟܝܬܐ ܒܝ ܕܰܝܪܐ ܕܡܳܪܝ ܓܰܒܪܐܝܶܠ ܒܝ ܪܝܫܳܢܘܬ݂ܐ ܕܝ ܡܥܰܠܝܘܬ݂ܰܝܕ݂ܶܗ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ ܐܘ ܚܰܣܝܐ ܕܛܘܪܥܰܒܕܝܢ ܘܪܝܫ ܕܰܝܪܐ ܕܡܳܪܝ ܓܒܪܺܐܝܶܠ. ܬܠܳܬ݂ܐ ܕܰܝܪܳܝܶܐ. ܕܟܷܬܢܶܗ: ܕܰܝܪܳܝܐ ܬܘܡܰܐ ܐܰܩܨܳܝ ܩܘܣܢܳܝܐ ܘܕܰܝܪܳܝܐ ܚܰܢܢܰܐ ܣܶܘܶܢ ܕܒܶܐ ܩܷܪܡܷܙ ܡܙܝܙܰܟ݂ܝ ܘܕܰܝܪܳܝܐ ܓܰܒܪܺܐܝܶܠ ܔܰܬܝ ܐܰܪܟܰܚܳܝܐ ܥܰܡ ܬܠܳܬ݂ܰܥܣܰܪ ܕܰܝܪܳܝܳܬ݂ܶܐ. ܒܝ ܕܰܝܪܐ ܕܡܳܪܝ ܡܰܠܟܶܐ ܕܟܷܬܝܐ ܓܰܒ ܐܰܪܟܰܚ ܐܝ ܩܪܝܬ݂ܐ ܣܬܶܐ ܟܝܬܐ ܪܰܒܰܢ ܕܰܝܪܳܝܐ ܐܝܫܐ ܐܰܛܰܫ ܩܘܣܢܳܝܐ ܘܕܰܝܪܳܝܐ ܥܰܙܝܙ ܔܶܠܝܟ ܐܰܪܟܰܚܰܝܐ. ܥܰܡ ܬܰܪܬܶܐ ܕܰܝܪܳܝܳܬ݂ܶܐ. ܒܝ ܕܰܝܪܐ ܕܡܳܪܝ ܐܰܘܓܝܢ ܣܬܶܐ ܟܝܬܐ ܬܪܶܐ ܕܰܝܪܳܝܶܐ. ܕܰܝܪܳܝܐ ܝܘܝܰܩܝܡ ܐܘܢܦܰܐܠ ܥܘܪܢܘܣܳܝܐ ܘܕܰܝܪܳܝܐ ܕܰܘܝܕ ܟܰܪܠܝ ܡܙܝܙܰܟ݂ܝ. ܒܝ ܕܰܝܪܐ ܕܡܳܪܝ ܝܰܥܩܘܒ ܕܩܰܪܢܐ ܕܟܷܬܝܐ ܓܰܒ ܒܰܕܷܒܶܐ ܐܝ ܩܪܝܬ݂ܐ ܒܘ ܛܘܪܐ ܕܐܝܙܠܐ ܟܝܬܐ ܕܰܝܪܳܝܐ ܐܰܚܐ ܒܝܠܶܔܶܢ ܡܶܐ ܟܰܦܪܐ ܐܝ ܥܶܠܰܝܬܐ ܒܘ ܫܷܪܫܰܝܕ݂ܶܗ. ܒܝ ܕܰܝܪܐ ܕܡܳܪܝ ܝܰܥܩܘܒ ܐܘ ܚܒܝܫܳܝܐ ܕܟܷܬܝܐ ܒܝ ܩܪܝܬ݂ܐ ܕܨܰܠܷܚ ܟܝܬܐ ܕܰܝܪܳܝܐ ܕܳܢܝܐܝܶܠ ܨܰܘܔܝ ܐܘ ܩܘܣܢܳܝܐ ܘܚܰܡܡܷܫ ܕܰܝܪܳܝܳܬ݂ܶܐ. ܟܝܬܐ ܣܬܶܐ ܕܰܝܪܳܝܐ ܡܘܫܶܐ ܓܘܪܒܘܙ ܟܦܰܪܙܳܝܐ ܟܳܡܫܰܡܰܫ ܒܝ ܥܝܬܐ ܕܡܳܪܝ ܥܙܳܙܳܐܝܶܠ ܕܷܟܦܰܪܙܶܐ. ܐܰܕ ܕܰܝܪܳܝܶܐ ܕܟܷܬܢܶܐ ܒܰܕ ܕܰܝܪܶܐ ܕܛܘܪܥܰܒܕܝܢ܆ ܟܳܠܰܘܫܝ ܔܘܠܶܐ ܟܳܡܶܐ. ܗܷܢ ܡܷܢܢܶܗ ܟܘܠ ܢܰܩܩܰܐ ܟܳܠܰܘܫܝ ܦܝܣܛܰܢ ܘܗܷܢ ܡܷܢܢܶܗ ܟܳܠܰܘܫܝ ܦ݁ܰܢܛܳܠܳܢ ܘܓܷܡܠܰܟ ܘܔܰܟܶܬ. ܟܳܡܰܚܬܝ ܩܘܒܰܥܬ݂ܐ ܥܰܠ ܪܝܫܰܝܝܶܗ. ܟܝܬܐ ܥܰܠ ܐܝ ܩܘܒܰܥܬ݂ܐ ܬܪܰܥܣܰܪ ܨܠܝܒܶܐ ܕܟܳܡܰܕܝܠܝ ܥܰܠ ܐܘ ܡܷܢܝܳܢܐ ܕܰܬܪܰܥܣܰܪ ܫܠܝܚܶܐ ܕܷܡܫܝܚܐ. ܐܝܢܰܩܠܰܐ ܕܟܳܒܷܢ ܩܰܪܰܪ ܕܗܳܘܷܢ ܕܰܝܪܳܝܶܐ܆ ܟܳܡܷܦܪܳܫܝ ܡܰܝ ܝܰܩܪܳܬ݂ܰܬ݂ܶܗ. ܟܳܡܰܫܰܦܥܝ ܥܷܡܪܰܝܝܶܗ ܟܘܠܶܗ ܒܝ ܕܰܝܪܐ. ܐܝܢܰܩܠܰܐ ܕܗܳܘܶܐ ܣܢܝܩܘܬ݂ܐ܆ ܒܘ ܐܰܡܪܐ ܕܘ ܚܰܣܝܐ ܟܳܡܝܫܰܕܪܝ ܡܶܐ ܕܰܝܪܐ ܠܕܰܝܪܐ ܚܪܶܬܐ. ܒܝ ܕܰܝܪܐ ܣܬܶܐ܆ ܟܳܩܳܪܷܢ ܘܝܘܠܦܝ. ܗܷܢ ܡܷܢܢܶܗ ܟܳܡܰܩܪܷܢ ܐܰܝ ܝܳܠܘܦܶܐ ܠܶܫܳܢܐ ܘܛܶܟܣܳܝܳܬ݂ܐ ܕܝ ܥܝܬܐ. ܗܷܢ ܡܷܢܢܶܗ ܟܳܫܘܓ݂ܠܝ ܒܝ ܓܰܢܬ݂ܐ. ܟܳܙܘܪܥܝ ܐܝܠܳܢܶܐ ܘܟܰܪܡܶܐ. ܟܳܕܰܘܪܝ ܐܰܢ ܐܰܪܥܳܬ݂ܶܐ، ܟܳܟܘܣܚܝ ܐܰܟ ܟܰܪܡܶܐ. ܘܟܳܙܘܪܥܝ ܘܰܪܙܶܐ. ܗܷܢ ܡܷܢܢܶܗ ܟܳܟܘܬ݂ܘܝ ܘܟܳܡܬܰܪܔܡܝ ܟܬ݂ܳܘܶܐ ܘܟܳܘܷܢ ܡܳܪܐ ܠܰܒ ܒܶܝܬ݂ܐܰܪܟܶܐ. ܗܷܢ ܡܷܢܢܶܗ ܟܳܫܘܓ݂ܠܝ ܒܝ ܥܡܰܪܰܐ ܕܰܒ ܒܶܢܝܳܢܶܐ. ܘܗܷܢ ܡܷܢܢܶܗ ܟܳܝܘܬܘܝ ܥܰܡ ܐܰܕ݂ ܕ݂ܰܝܦܶܐ ܕܟܳܙܰܝܪܝ ܐܝ ܕܰܝܪܐ ܘܡܝܒܰܪܟ݂ܝ ܡܰܓ ܓܰܪܡܶܐ ܕܰܩ ܩܰܕܝܫܶܐ. ܗܰܘܟ݂ܰܐ ܡܷܢ ܫܘܓ݂ܠܐ ܘܡܷܢ ܣܢܝܘܩܘܬ݂ܐ ܕܟܝܬܐ܆ ܒܟܘܠܰܗ ܒܰܣܝܡܘܬ݂ܐ ܟܳܣܰܝܡܝ. ܒܰܙ ܙܰܒܢܶܐ ܩܰܡܳܝܶܐ܆ ܐܰܕ ܕܰܝܪܶܐ ܕܰܕ ܕܰܝܪܳܝܶܐ ܘܕܰܕ ܕܰܝܪܳܝܳܬ݂ܶܐ ܦܪܝܫܶܘܰܝܢܶܗ ܡܶܐ ܚܕ݂ܳܕ݂ܶܐ. ܐܶܠܐ ܒܰܙ ܙܰܒܢܰܢܝ ܐܰܚ ܚܰܪܳܝܶܐ ܥܰܠ ܕܢܰܩܷܨ ܐܘ ܡܷܢܝܳܢܰܬ݂ܬ݂ܶܗ܆ ܟܳܦܰܝܫܝ ܒܥܰܝܢܝ ܕܰܝܪܐ. ܐܰܕ ܕܰܝܪܳܝܳܬ݂ܶܐ ܣܬܶܐ ܟܳܫܘܓ݂ܠܝ ܓ݂ܰܠܰܒܶܐ ܘܟܳܬܘܥܒܝ ܒܝ ܕܰܝܪܐ ܕܟܷܬܢܶܗ. ܗܷܢ ܡܷܢܢܶܗ ܟܳܩܳܪܷܢ ܘܟܳܡܷܠܦܝ. ܗܷܢ ܡܷܢܢܶܗ ܟܳܡܰܢܕ݂ܦܝ ܐܝ ܕܰܝܪܐ. ܗܷܢ ܡܷܢܢܶܗ ܟܳܘܷܢ ܡܳܪܐ ܠܰܚܝܶܘܷܢ. ܟܳܚܘܠܘܷܢܢܶܗ ܘܟܳܣܰܝܡܝ ܡܘ ܚܰܠܘܰܬ݂ܬ݂ܶܗ ܩܰܛܝܪܐ، ܓܘܶܬܐ ܘܙܷܒܕܐ. ܘܗܷܢ ܡܷܢܢܶܗ ܟܳܣܰܝܡܝ ܡܘܟܠܐ ܗܰܡ ܠܰܥ ܥܳܡܘܪܶܐ ܕܝ ܕܰܝܪܐ ܗܰܡ ܣܬܶܐ ܠܰܕ݂ ܕ݂ܰܝܦܶܐ ܕܟܳܙܰܝܪܝ ܒܗܰܝܡܳܢܘܬ݂ܐ ܐܝ ܕܰܝܪܐ. ܗܷܢ ܡܷܢܢܶܗ ܟܳܘܷܢ ܡܳܪܐ ܠܰܕ ܕܰܒܳܫܶܐ ܘܟܳܣܰܝܡܝ ܕܰܘܫܐ. ܐܝܢܰܩܠܰܐ ܕܠܳܘܰܠܠܶܗ ܫܘܓ݂ܠܐ ܓ݂ܰܠܰܒܶܐ ܡܘܗܝܡ ܠܷܟܢܷܦܩܝ ܡܝ ܕܰܝܪܐ. ܒܘ ܫܷܟܠܰܢܐ ܟܳܡܰܫܰܦܥܝ ܐܰܚ ܚܰܝܰܬ݂ܬ݂ܶܗ ܒܘ ܨܰܘܡܐ ܘܒܝ ܨܠܘܬ݂ܐ ܘܒܝ ܬܷܫܡܷܫܬܐ ܕܝ ܥܝܬܐ ܘܕܘ ܥܰܡܐ. ܡܠܦܢܐ ܫܟܪܝ ܐܩܛܫ 1422 ܡ̈ܠܐ.
