Šëkri Aqtaš: ܐܝ ܪܰܣܰܡܶܐ ܕܟ݂ܳܘܪܝ ܓܰܒܪܺܐܝܶܠ ܐܰܩܛܰܫ / I räsame d Xori Gabriel Aqtaš
I räsame d Xori Gabriel Aqtaš
ܟ݂ܳܘܪܝ ܓܰܒܪܺܐܝܶܠ ܐܰܩܛܰܫ ܡܰܘܠܰܕ݂ ܒܝ ܩܪܝܬ݂ܐ ܕܒܶܩܘܣܝܳܢܶܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܰܐܪܒܥܝ. ܐܷܫܡܶܗ ܕܐܘ ܒܰܒܐ ܫܰܒܐ ܘܕܝ ܐܶܡܰܝܕ݂ܶܗ ܒܰܣܣܶܐ ܝܐ. ܐܘ ܒܰܒܐ܆ ܩܛܝܠ ܒܝ ܩܪܝܬ݂ܐ ܡܰܟ ܟܘܪܕܳܝܶܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܷܐܫܬܝ ܘܗܰܘܝ ܣܳܗܕܐ ܕܝ ܩܪܝܬ݂ܐ ܕܒܶܩܘܣܝܳܢܶܐ. ܟܷܬܠܶܗ ܬܠܳܬ݂ܐ ܐܰܚܘܢܳܢܶܗ ܘܬܰܪܬܶܐ ܐܰܚܘܳܬ݂ܶܐ. ܟܷܬܠܶܗ ܣܬܶܐ ܐܰܪܒܥܐ ܐܰܒܢܶܐ ܘܬܠܰܬ݂ ܒܢܳܬ݂ܶܐ. ܐܝ ܒܰܬ݂ܩܝܰܘܡܐ ܢܘܪܶܐ܆ ܡܚܰܣܝܐ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫܶܬ ܘܬܷܫܥܝ ܡܶܐ ܟܶܘܐ ܩܰܫܝܐ. ܡܶܐ ܢܰܥܡܘܬ݂ܶܗ ܪܳܚܰܡܘܰܐ ܐܘ ܝܘܠܦܳܢܐ ܣܘܪܝܳܝܐ ܘܐܝ ܬܷܫܡܷܫܬܐ ܕܝ ܥܝܬܐ. ܩܪܶܠܶܗ ܒܝ ܡܰܕܪܰܣܶܐ ܕܝ ܩܪܝܬ݂ܐ ܘܝܰܠܷܦ ܠܶܫܳܢܐ ܣܘܪܝܳܝܐ ܘܗܰܝܡܳܢܘܬ݂ܐ ܡܫܝܚܰܝܬܐ. ܒܷܬ݂ܷܪ ܥܰܠ ܐܝ ܣܢܝܩܘܬ݂ܐ ܕܟܷܬܘܰܐ܆ ܩܰܡܰܝܬܐ ܗܰܘܝ ܡܰܠܦܳܢܐ ܕܝ ܡܰܕܪܰܣܶܐ ܕܝ ܥܝܬܐ ܕܡܳܪܝ ܐܶܠܝܝܐ ܘܒܷܬ݂ܷܪ ܗܰܘܝ ܫܰܡܳܫܐ ܨܘܝܥܐ. ܐܝܢܰܩܠܰܐ ܕܦܰܐܝܫܐ ܐܝ ܥܝܬܐ ܕܡܳܪܝ ܐܶܠܝܝܐ ܕܠܐ ܩܰܫܐ܆ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܚܰܡܷܫ ܘܬܡܳܢܝ ܡܰܣܪܰܚ ܩܰܫܐ ܡܐܝܕ݂ܳܬ݂ܶܗ ܕܝ ܡܥܰܠܝܘܬ݂ܐ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ ܐܘ ܚܰܣܝܐ ܕܛܘܪܥܰܒܕܝܢ. ܒܝ ܫܰܬܐ ܕܰܬܪܰܠܦܐ ܟܬ݂ܘܠܶܗ ܒܝ ܟܬ݂ܰܘܬܰܝܕ݂ܶܗ ܐܝ ܫܰܦܷܪܬܐ ܐܰܪܒܰܥ ܦܰܢܩܝܳܬ݂ܶܐ ܕܐܘ ܟܪܘܟ݂ܝܐ ܫܰܬܳܢܳܝܐ ܟܘܠܶܗ. ܐܰܦ ܦܰܢܩܝܳܬ݂ܰܢܝ ܛܒܝܥܝ ܘܡܒܰܪܒܙܝ ܒܰܥ ܥܝܬܳܬ݂ܶܐ ܗܰܡ ܕܐܘ ܐܰܬ݂ܪܐ ܗܰܡ ܣܬܶܐ ܕܰܐܘܪܘܦܐ ܟܘܠܠܶܗ. ܘܡܘ ܝܰܘܡܐ ܕܡܰܣܪܰܚ ܩܰܫܐ ܗܘܠ ܠܰܕܝܰܘܡܰܐ܆ ܗܰܢܝ ܬܠܰܬ݂ ܘܬܠܶܬ݂ܝ ܐܷܫܢܶܐ ܕܠܐ ܟܠܳܝܐ ܟܳܟ݂ܳܕܰܡ ܪܘܚܳܢܳܐܝܬ݂ ܐܝ ܩܪܝܬ݂ܐ ܕܒܶܩܘܣܝܳܢܶܐ ܘܚܰܐܚ ܘܕܶܪܩܘܒܐ ܘܐܝ ܕܰܝܪܐ ܕܘ ܨܠܝܒܐ. ܒܰܢ ܐܷܫܢܶܐ ܕܟܷܬܘܰܐ ܙܘܥܬ݂ܐ ܒܘ ܐܰܬ݂ܪܐ܆ ܠܐ ܥܰܪܷܩ ܘܠܐ ܛܪܶܠܶܗ ܐܝ ܥܝܬܰܝܕ݂ܶܗ ܘܐܝ ܩܪܝܬ݂ܰܝܕ݂ܶܗ. ܥܰܠ ܐܝ ܬܷܫܡܷܫܬܰܬ݂ܶܗ ܕܝܕ݂ܶܗ ܐܝ ܡܩܰܠܰܣܬܐ܆ ܐܘ ܚܰܣܝܐ ܕܛܘܪܥܰܒܕܝܢ ܒܷܬ݂ܷܪ ܡܶܐ ܕܡܷܕܠܶܗ ܕܰܤܛܷܪ ܡܘ ܦܰܛܷܪܝܰܪܟ݂ܐ ܡܰܣܪܰܚܠܶܗ ܘܡܰܥܠܶܠܶܗ ܡܘ ܕܰܪܓ݂ܐ ܕܝ ܩܰܫܘܬ݂ܐ ܠܘ ܕܰܪܓ݂ܐ ܕܝ ܟ݂ܘܪܳܝܘܬ݂ܐ. ܐܰܪܒܥܐ ܒܘ ܝܰܪܚܐ ܕܰܚܕ݂ܰܥܣܰܪ ܒܝ ܫܰܬܐ ܕܰܬ ܬܪܰܠܦܐ ܘܬܡܳܢܰܥܣܰܪ܆ ܕܟܷܬܘܰܐ ܐܘ ܚܘܫܰܒܐ ܕܩܘܕܳܫ ܥܝܬܐ ܐܘ ܚܘܫܰܒܐ ܩܰܡܳܝܐ ܕܘ ܛܷܟܣܐ ܕܝ ܥܝܬܐ܆ ܒܚܰܓܐ ܪܘܚܳܢܳܝܐ ܪܣܝܡ ܘܗܰܘܝ ܟ݂ܘܪܝ. ܘܡܩܰܒܷܠ ܕܝ ܟ݂ܷܕܡܰܝܕ݂ܶܗ ܣܬܶܐ܆ ܐܘ ܚܰܣܝܐ ܡܕܰܫܰܢܠܶܠܶܗ ܨܠܝܒܐ ܩܰܕܝܫܐ. ܠܓܳܪܰܢ ܕܘ ܬܚܘܡܐ ܕܝ ܥܝܬܐ܆ ܒܟܘܠ ܡܰܪܥܝܬ݂ܐ ܟܳܠܳܙܰܡ ܕܗܳܘܶܐ ܚܰܐ ܟ݂ܘܪܝ. ܠܰܫܰܢ ܕܷܡܥܰܘܰܢ ܐܘ ܚܰܣܝܐ ܕܝ ܡܰܪܥܝܬ݂ܐ ܒܰܦ ܦܘܠܚܳܢܶܐ ܪܘܚܳܢܳܝܶܐ. ܒܝ ܡܰܪܥܝܬ݂ܐ ܕܛܘܪܥܰܒܕܝܢ܆ ܒܝ ܚܰܪܰܝܬܐ ܟܷܬܘܰܐ ܟ݂ܘܪܝ ܥܰܕܐ ܐܳܢܰܪ ܕܒܶܐ ܡܰܠܠܶܐ ܐܘ ܡܷܕ݂ܝܳܝܐ. ܐܶܠܐ ܒܝ ܫܰܬܐ ܕܰܬܪܰܠܦܐ ܘܚܰܡܷܫ ܡܫܰܢܶܠܶܗ. ܘܡܝ ܫܰܬܰܝܐ ܗܘܠ ܠܰܫ̰ ܫ̰ܰܬܐ ܠܰܬܘܰܐ ܟ݂ܘܪܝ ܒܝ ܡܰܪܥܝܬ݂ܐ. ܐܘܥܕܐ ܕܷܪܣܝܡ ܟ݂ܘܪܝ ܓܰܒܪܺܐܝܶܠ ܐܰܩܛܰܫ܆ ܗܝܝܶܗ ܬܰܢܢܶܗ ܟ݂ܘܪܝ ܝܐ ܒܛܘܪܥܰܒܕܝܢ. ܒܷܬ݂ܷܪ ܡܶܐ ܕܥܰܡ ܐܘ ܚܰܣܝܐ܆ ܡܥܰܝܰܢ ܐܘ ܝܰܘܡܐ ܘܐܝ ܕܘܟܬ݂ܐ ܕܝ ܪܰܣܰܡܶܐ܆ ܡܚܰܕ݂ܰܪܠܰܢ ܙܡܝܢܘܬ݂ܐ. ܘܒܝ ܩܰܡܰܝܬܐ ܡܫܰܕܪܐ ܠܰܟ ܟܳܗܢܶܐ ܘܠܘ ܥܰܡܐ ܕܛܘܪܥܰܒܕܝܢ. ܘܒܷܬ݂ܷܪ ܡܫܰܕܪܐ ܠܰܟ ܟܳܗܢܶܐ ܩܘܣܢܳܝܶܐ ܘܚܰܐܚܳܝܶܐ ܕܟܷܬܢܶܐ ܒܰܐܘܪܘܦ݁ܰܐ. ܐܝܢܰܩܠܰܐ ܕܫܰܡܝܥܝ ܥܰܠ ܐܝ ܪܰܣܰܡܶܐ ܕܘ ܟ݂ܘܪܝ ܟܘܠܠܶܗ ܦܨܝܚܝ܆ ܘܷܐܡܡܝܘܰܐ ܒܷܫܪܳܪܐ ܩܰܫܐ ܓܰܒܪܺܐܝܶܠ ܡܶܐ ܙܰܘܢܐ ܫܳܘܶܐ ܘܰܐ ܕܡܝܬܰܥܠܶܐ ܠܘ ܕܰܪܓ݂ܐ ܕܝ ܟ݂ܘܪܳܝܘܬ݂ܐ. ܐܘ ܐܰܗܷܠ ܘܰܐܢ ܢܳܫܶܐ ܕܘ ܟ݂ܘܪܝ ܕܟܷܬܢܶܗ ܒܰܐܠܡܰܢܝܰܐ ܘܒܘ ܣܘܶܝܕ ܣܬܶܐ ܥܰܘܷܠ ܕܫܰܡܝܥܝ. ܒܙܰܒܢܐ ܟܰܪܝܐ ܡܚܰܕܰܪܪܶܗ ܪܘܚܰܝܝܶܗ ܘܰܐܬ݂ܷܢ ܕܚܘܕ݂ܪܝ ܒܝ ܪܰܣܰܡܶܐ. ܝܰܘܡܶܗ ܕܚܘܫܰܒܐ ܡܶܐ ܚܶܠܳܝܐ܆ ܥܰܡ ܐܝ ܡܥܰܠܝܘܬ݂ܐ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ܆ ܐܰܙܙܰܢܐ ܠܝ ܩܪܝܬ݂ܐ ܕܒܶܩܘܣܝܳܢܶܐ. ܐܝܢܰܩܠܰܐ ܕܡܰܛܝܰܢܐ ܠܝ ܥܝܬܐ܆ ܚܙܶܠܰܢ ܕܟܰܠܶܗ ܟܘܠ ܕܘܟܬ݂ܐ ܢܰܕ݂ܷܦܬܐ ܘܡܛܰܟܰܣܬܐ. ܥܰܒܝܪܝܢܰܐ ܠܝ ܥܝܬܐ ܘܡܕܰܘܰܡܠܰܢ ܐܰܥܡܰܝܝܶܗ ܡܝ ܕܘܟܬ݂ܐ ܕܡܰܛܷܢ ܒܝ ܨܠܘܬ݂ܐ. ܡܶܩܷܡ ܕܒܳܕܶܐ ܐܘ ܚܰܣܝܐ ܒܘ ܩܶܪܳܘܐ܆ ܡܰܠܝܐ ܘܰܐ ܐܝ ܥܝܬܐ ܥܰܡܐ. ܐܰܢ ܢܳܫܶܐ܆ ܡܶܐ ܡܷܕ݂ܝܰܕ݂ ܘܡܰܩ ܩܷܪܝܰܘܳܬ݂ܶܐ ܐܰܬ݂ܷܢܘܰܐ ܕܚܘܕ݂ܪܝ ܒܘ ܩܶܪܳܘܐ ܘܒܝ ܪܰܣܰܡܶܐ. ܡܶܐ ܣܰܥܰܝܶܐ ܠܣܰܥܰܝܶܐ ܐܘ ܡܷܢܝܳܢܐ ܕܘ ܥܰܡܐ ܙܳܝܰܕܘܰܐ. ܠܰܘܓ݂ܷܠ ܘܠܰܪܘܰܠ ܡܰܠܝܘܰܐ ܢܳܫܶܐ. ܐܰܬ݂ܷܢܘܰܐ ܣܬܶܐ ܣܦܰܪܝܰܘܡܳܝܶܐ ܢܘܟ݂ܪܳܝܶܐ ܕܓܘܪܫܝ ܘܣܰܝܡܝ ܛܶܒܶܐ ܥܰܠ ܐܝ ܪܰܣܰܡܶܐ ܕܘ ܟ݂ܘܪܝ. ܘܦܷܪܣܷܢܢܶܗ ܒܰܬ ܬܰܠܰܦܷܙܝܳܢܶܐ ܡܫܰܡܗܶܐ ܕܷܒܪܝܬ݂ܐ ܟ݂ܘܕ ܪܳܝܬܷܪܣ، ܘܐܘ ܩܳܠܐ ܕܰܐܡܶܪܝܟܰܐ ܘܡܶܐ ܪܘܣܝܰܐ ܣܦ݁ܘܬܢܝܟ ܢܝܘܣ ܘܚܪܶܢܶܐ ܕܟܳܣܰܝܡܝ ܛܶܒܶܐ ܒܷܒܪܝܬ݂ܐ ܟܘܠܰܗ. ܐܝܢܰܩܠܰܐ ܕܷܡܫܰܪܶܠܶܗ ܐܘ ܩܶܪܳܘܐ܆ ܐܘ ܟ݂ܘܪܝ ܠܘܷܫܠܶܗ ܐܝ ܒܰܕܠܶܗ ܕܘ ܩܶܪܳܘܐ ܔܓ݂ܘܪ ܡܝ ܔܷܒܶܗ. ܘܟܰܠܝ ܠܰܠܬܰܚ ܗܘܠ ܕܟܰܡܷܠ ܐܘ ܩܶܪܳܘܐ. ܪܝܫܶܗ ܣܬܶܐ ܡܟܰܣܝܳܘܰܐ ܒܡܰܢܕܶܠܐ. ܐܝܢܰܩܠܰܐ ܕܐܘ ܚܰܣܝܐ ܡܟܰܡܶܠܶܗ ܐܘ ܩܶܪܳܘܐ܆ ܙܒܷܛܠܶܗ ܒܐܝܕ݂ܶܗ ܘܡܷܪܠܶܠܶܗ: ܐܝ ܪܘܚܐ ܩܰܕܝܫܐ ܟܳܩܘܪܝܳܠܘܟ݂ ܕܗܳܘܰܬ ܟ݂ܘܪܝ ܒܝ ܥܝܬܐ ܩܰܕܝܫܬܐ. ܬܪܶܐ ܡܰܟ ܟܳܗܢܶܐ ܙܒܷܛܛܶܗ ܡܶܐ ܕܪܘܥܳܢܶܗ ܘܡܳܣܰܩܩܶܗ ܠܘ ܡܰܕ݂ܒܚܐ. ܐܰܫ ܫܰܡܳܫܶܐ ܣܬܶܐ ܙܡܷܪܪܶܗ ܐܘ ܩܳܠܐ ܕܛܘܒܰܝܗܘܢ ܠܥܰܒܕܶܐ ܛܳܒܶܐ. ܒܷܬ݂ܷܪܟܶܐ ܐܘ ܚܰܣܝܐ ܘܰܐܟ ܟܳܗܢܶܐ ܘܰܐܫ ܫܰܡܳܫܶܐ ܒܕܰܠܠܶܗ ܒܘ ܛܷܟܣܐ ܕܝ ܪܰܣܰܡܶܐ ܕܰܟ݂ ܟ݂ܳܘܪܝܝܶܐ. ܐܝܢܰܩܠܰܐ ܕܟܰܡܝܠܝ ܐܰܩ ܩܳܠܶܐ ܘܰܐܩ ܩܷܪܝܳܢܶܐ ܘܐܘ ܡܓܰܠܝܘܢ܆ ܒܝ ܚܰܪܰܝܬܐ ܐܘ ܚܰܣܝܐ ܡܰܠܘܰܫܠܶܗ ܐܝ ܔܷܒܒܶܗ ܘܐܘ ܚܰܨܐ ܠܘ ܟ݂ܘܪܝ. ܐܝܢܰܩܠܰܐ ܕܐܘ ܚܰܣܝܐ ܡܰܙܥܰܩܠܶܗ ܘܡܷܪܠܶܗ: ܟܳܡܷܪܣܰܡ ܩܰܫܐ ܓܰܒܪܺܐܝܶܠ ܟ݂ܘܪܝ ܠܝ ܥܝܬܐ ܕܡܳܪܝ ܐܶܠܝܝܐ ܕܒܶܝܬܩܘܤܛܰܢ ܕܛܘܪܥܰܒܕܝܢ܆ ܐܘ ܥܰܡܐ ܡܦܰܩܰܣܠܶܗ. ܘܰܐܢ ܢܝܫܶܐ ܡܗܰܠܗܰܠܠܶܗ. ܘܗܷܢ ܡܰܢ ܢܳܫܶܐ ܕܘ ܟ݂ܘܪܝ ܡܝ ܦܨܝܚܘܬ݂ܐ ܒܳܟܷ݂ܢܘܰܐ. ܒܷܬ݂ܷܪܟܶܐ ܐܘ ܚܰܣܝܐ ܡܷܪܠܶܗ ܐܝ ܬܷܫܡܷܫܬܐ ܕܘ ܨܠܝܒܐ܆ ܘܡܰܚܰܬܠܶܠܶܗ ܨܠܝܒܐ ܩܰܕܝܫܐ ܟ݂ܘܕ ܕܳܫܢܐ ܠܝ ܬܷܫܡܷܫܬܰܝܕ݂ܶܗ ܐܝ ܥܝܬܳܢܳܝܬܐ. ܒܷܬ݂ܷܪܟܶܐ ܩܰܡܰܝܬܐ ܐܘ ܚܰܣܝܐ ܟܪܷܙܠܶܗ ܘܡܷܪܠܶܗ: ܐܰܕܝܰܘܡܰܐ ܕܟܷܬܝܐ ܐܘ ܚܘܫܰܒܐ ܕܩܘܕܳܫ ܥܝܬܐ܆ ܐܘ ܫܘܪܳܝܐ ܕܘ ܛܷܟܣܐ ܕܝ ܥܝܬܐ ܝܐ. ܟ݂ܘܕ ܟܘܕܥܘܬܘ ܐܝ ܥܝܬܐ ܒܰܝܬܐ ܕܝ ܨܠܘܬ݂ܐ ܝܐ ܠܰܫܰܢ ܐܰܡ ܡܗܰܝܡܢܶܐ. ܘܒܘ ܝܰܘܡܰܢܐ ܐܘ ܡܩܰܕܫܐ܆ ܐܰܬ݂ܝܢܰܐ ܟܘܠܰܝܢܰܐ ܠܰܪܟܶܐ ܕܪܷܣܡܝܢܰܐ ܩܰܫܐ ܓܰܒܪܺܐܝܶܠ ܟ݂ܘܪܝ. ܗܰܘܐ ܕܡܶܐ ܡܶܩܷܡ ܬܠܰܬ݂ ܘܬܠܶܬ݂ܝ ܐܷܫܢܶܐ ܒܝ ܥܝܬܰܬ݂ܶܐ ܡܰܣܪܰܚܘܰܝܠܰܢ ܟܳܗܢܐ. ܟܘܕ݂ܥܘܬܘ ܝܰܐ ܡܗܰܝܡܢܶܐ܆ ܟܳܪܷܣܡܝܢܰܐ ܐܘ ܟ݂ܳܘܪܝ ܠܐ ܠܰܫܰܢ ܕܗܳܘܶܐ ܪܰܒܐ ܒܝ ܥܝܬܐ. ܐܶܠܐ ܕܗܳܘܶܐ ܡܥܰܘܢܳܢܐ ܘܡܡܰܬ݂ܠܳܢܐ ܕܘ ܚܰܣܝܐ ܒܝ ܡܰܪܥܝܬ݂ܐ ܐܝܢܰܩܩܰܐ ܕܡܝܫܰܕܰܪ ܠܕܘܟܟܳܬ݂ܶܐ ܡܷܚܠܳܦܶܗ. ܐܰܕܝܰܘܡܰܐ ܡܰܣܪܰܚܠܰܢ ܐܘ ܩܰܫܐ ܘܣܷܡܠܰܢ ܟ݂ܳܘܪܝ ܘܗܘܠܰܢܠܶܗ ܨܠܝܒܐ܆ ܥܰܠ ܕܬܰܥܷܒ ܓ݂ܰܠܰܒܶܐ. ܗܰܡ ܒܘ ܟܬ݂ܳܘܐ ܕܰܦ ܦܰܢܩܝܳܬ݂ܶܐ ܘܗܰܡ ܣܬܶܐ ܒܰܢ ܐܷܫܢܰܢܝ ܒܘ ܚܘܕܳܬ݂ܐ ܕܝ ܥܝܬܐ ܘܒܝ ܥܡܰܪܰܝܕ݂ܰܗ. ܥܰܠ ܗܰܬ݂ܶܐ ܐܝ ܥܝܬܐ ܟܘܠܢܰܩܩܰܐ ܟܳܒܐ ܐܘ ܚܰܩ ܕܰܫ ܫܰܓ݂ܳܠܰܝܕ݂ܰܗ. ܟ݂ܘܕ ܟܳܐܬ݂ܶܐ ܒܘ ܡܓܰܠܝܘܢ ܟܳܐܡܰܪ: ܐܘ ܦܳܥܠܐ ܟܳܫܳܘܶܐ ܐܘ ܐܰܓ݂ܪܰܝܕ݂ܶܗ. ܡܰܘܟ݂ܰܐ ܒܷܬ݂ܷܪ ܡܶܐ ܕܡܷܕܠܰܢ ܕܰܤܛܷܪ ܡܝ ܩܰܕܝܫܘܬ݂ܐ ܕܘ ܦܰܛܷܪܝܰܪܟ݂ܐ܆ ܐܰܕܝܰܘܡܰܐ ܪܣܷܡܠܰܢ ܟ݂ܳܘܪܝ ܘܗܘܠܰܢܠܶܗ ܨܠܝܒܐ. ܒܝ ܚܰܪܰܝܬܐ ܕܝ ܟܳܪܘܙܘܬ݂ܐ ܣܬܶܐ: ܡܩܰܕܰܡܠܶܗ ܬܰܘܕܝ݂ܳܬ݂ܶܐ ܠܘ ܥܰܡܐ ܕܰܐܬ݂ܝ ܡܰܕ ܕܘܟܳܬ݂ܶܐ ܪܰܚܘܩܶܐ ܘܩܰܪܝܘܶܐ ܕܚܳܕ݂ܰܪ ܒܘ ܝܰܘܡܰܢܐ. ܒܷܬ݂ܷܪ ܡܝ ܡܥܰܠܝܘܬ݂ܐ ܕܘ ܚܰܣܝܐ܆ ܐܰܢ ܢܝܫܶܐ ܡܗܰܠܗܰܠܠܶܗ ܘܰܐܓ ܓܰܒܪܶܐ ܢܩܷܫܫܶܗ ܟܰܦܐ. ܟ݂ܳܘܪܝ ܓܰܒܪܺܐܝܶܠ ܐܰܩܛܰܫ ܢܫܷܩܠܶܗ ܐܝ ܝܰܡܝܢܐ ܕܘ ܚܰܣܝܐ ܘܰܐܬ݂ܝ ܠܦܶܡܶܗ ܕܘ ܬܰܪܥܐ ܕܘ ܡܰܕ݂ܒܚܐ ܕܟܳܪܰܙ. ܩܰܡܰܝܬܐ ܡܩܰܕܰܡܠܶܗ ܬܰܘܕܝܳܬ݂ܶܐ ܠܝ ܩܰܕܝܫܘܬ݂ܐ ܕܘ ܦܰܛܷܪܝܰܪܟ݂ܐ ܘܒܷܬ݂ܷܪ ܠܝ ܡܥܰܠܝܘܬ݂ܐ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ ܐܘ ܚܰܣܝܐ ܕܛܘܪܥܰܒܕܝܢ ܘܪܝܫ ܕܰܝܪܐ ܕܡܳܪܝ ܓܰܒܪܺܐܝܶܠ. ܘܗܰܘܟ݂ܰܐ ܡܷܪܠܶܗ: ܟܳܗܢܶܐ ܙܗܰܝܐ ܘܡܫܰܡܫܳܢܶܐ ܕܟ݂ܰܝܐ ܘܥܰܡܐ ܡܝܰܩܪܐ ܕܚܰܕ݂ܝܪܘܬܘ ܐܰܕܝܰܘܡܰܐ ܒܝ ܥܝܬܐ ܕܡܳܪܝ ܐܶܠܝܝܐ. ܟܳܡܰܘܕܶܢܐ ܠܘ ܡܳܪܝܐ ܐܘ ܐܰܠܳܗܰܝܕ݂ܝ ܕܡܰܫܘܶܠܶܠܝ ܕܥܳܠܶܢܐ ܠܘ ܕܰܪܓ݂ܰܢܐ ܕܝ ܟܘܪܳܝܘܬ݂ܐ. ܝܰܐ ܐܰܚܘܢܳܢܶܐ܆ ܡܝ ܢܰܥܡܘܬ݂ܰܝܕ݂ܝ ܝܰܪܘܢܐ ܒܐܝܩܰܪܬ݂ܐ ܡܗܰܝܡܰܢܬܐ. ܘܝܰܠܷܦܢܐ ܐܝ ܗܰܝܡܳܢܘܬ݂ܐ ܡܫܝܚܰܝܬܐ ܕܷܡܫܰܬܣܐ ܥܰܠ ܐܝ ܗܰܝܡܳܢܘܬ݂ܐ ܕܦܷܛܪܘܣ ܐܘ ܫܠܝܚܐ. ܘܕܡܳܪܝ ܣܶܘܶܝܪܝܳܘܣ ܐܘ ܬܳܓ݂ܐ ܕܰܣ ܣܘܪܝܳܝܶܐ. ܘܕܡܳܪܝ ܓܰܒܪܺܐܝܶܠ ܐܘ ܩܘܣܢܳܝܐ. ܟ݂ܘܕ ܟܘܕ݂ܥܘܬܘ ܐܘ ܕܰܪܓ݂ܐ ܕܝ ܟܳܗܢܘܬ݂ܐ܆ ܕܰܪܓ݂ܐ ܥܶܠܳܝܐ ܘܡܝܰܩܪܐ ܝܐ. ܐܶܠܐ ܟܷܬܠܶܗ ܛܰܥܢܐ ܝܰܩܘܪܐ ܘܬܰܥܒܐ ܘܡܣܰܝܒܪܳܢܘܬ݂ܐ ܡܩܰܒܷܠ ܕܰܡ ܡܗܰܝܡܢܶܐ. ܠܐ ܕܡܷܟ݂ܕܰܡ ܐܶܠܐ ܕܟ݂ܳܕܰܡ ܐܘ ܥܰܡܐ. ܐܳܢܐ ܣܬܶܐ ܟܳܕ݂ܰܥܢܐ ܕܰܐܕܝܰܘܡܰܐ ܐܘ ܛܰܥܢܰܝܕ݂ܝ ܙܷܬܬܷܪ ܡܶܐ ܡܶܩܷܡ ܝܰܩܷܪ. ܐܘܥܕܐ ܕܗܰܘܝܢܐ ܟ݂ܳܘܪܝ܆ ܠܐ ܠܘ ܫܘܒܗܳܪܐ ܐܶܠܐ ܠܘ ܫܘܒܚܐ ܕܷܡܫܝܚܐ ܓܷܡܫܰܡܰܫܢܐ. ܥܰܠ ܗܰܬ݂ܶܐ ܫܘܒܗܳܪܐ ܝܐ ܐܶܠܝ ܓ݂ܰܠܰܒܶܐ ܐܰܕܝܰܘܡܰܐ܆ ܕܒܘ ܚܰܝܠܐ ܕܝ ܪܘܚܐ ܩܰܕܝܫܐ ܕܡܷܪܣܰܡܢܐ ܟ݂ܳܘܪܝ ܡܐܝܕ݂ܶܗ ܕܡܳܪܝ ܛܝܡܳܬ݂ܶܐܘܳܣ ܫܡܘܐܝܶܠ ܐܰܩܛܰܫ ܐܘ ܐܰܒܪܐ ܕܥܰܡܡܝ. ܗܰܘܐ ܕܡܶܩܷܡ ܡܶܐ ܬܠܰܬ ܘܬܠܶܬ݂ܝ ܐܷܫܢܶܐ ܒܝ ܥܝܬܰܬ݂ܶܐ ܣܷܡܠܶܠܝ ܩܰܫܐ. ܒܶܐ ܐܰܝܕܰܪܒܐ ܗܘܠ ܠܰܕܝܰܘܡܰܐ ܟ݂ܕܷܡܠܝ ܐܝ ܥܝܬܐ܆ ܡܘܥܕܐ ܐܰܙܳܠܐ ܣܬܶܐ ܒܓ݂ܝܪܐ ܘܒܚܘܒܐ ܓܷܡܕܰܘܰܡܢܐ ܕܟ݂ܳܕܰܡܢܐ ܐܝ ܩܪܝܬ݂ܰܝܕ݂ܝ ܒܶܩܘܣܝܳܢܶܐ ܘܚܰܐܚ ܘܐܝ ܕܰܝܪܐ ܕܘ ܨܠܝܒܐ ܘܕܶܪܩܘܒܶܐ ܕܟܷܬܢܐ ܡܘܰܟܠܐ ܐܰܥܠܰܝܝܶܗ. ܒܰܡ ܡܶܠܰܢܝ ܡܰܬܷܡܠܶܗ ܐܝ ܟܳܪܘܙܘܬ݂ܰܝܕ݂ܶܗ ܐܝܢܰܩܩܰܐ ܕܟܳܡܩܰܕܰܡ ܬܰܘܕܝܳܬ݂ܶܐ ܠܰܟ ܟܳܗܢܶܐ ܘܠܘ ܥܰܡܐ ܘܠܰܡ ܡܫܰܡܫܳܢܶܐ ܘܠܰܡ ܡܫܰܡܫܳܢܝܳܬ݂ܶܐ ܕܚܰܕ݂ܝܪܝ ܒܝ ܪܰܣܰܡܶܐ. ܐܝܢܰܩܠܰܐ ܕܟܰܡܝܠܐ ܐܝ ܪܰܣܰܡܶܐ܆ ܐܘ ܟ݂ܳܘܪܝ ܘܐܘ ܚܰܣܝܐ ܓܪܷܫܫܶܗ ܨܷܪܬܳܬ݂ܶܐ ܥܰܡ ܐܘ ܥܰܡܐ ܕܦܰܝܫܝ ܕܘܟܪܳܢܐ ܕܘ ܝܰܘܡܰܢܐ ܐܘ ܡܰܟܬܰܒܙܰܒܢܳܝܐ. ܐܘ ܥܰܡܐ ܣܬܶܐ ܡܗܰܢܶܠܶܗ ܐܘ ܟ݂ܳܘܪܝ ܘܗܷܢ ܡܷܢܢܶܗ ܡܩܰܕܰܡܰܠܠܶܗ ܕܳܫܢܶܐ. ܘܗܷܢ ܡܷܢܢܶܗ ܣܬܶܐ ܦܪܷܣܘܰܠܠܶܗ ܚܰܝܐ ܐܘ ܩܶܪܳܘܐ ܘܐܝ ܪܰܣܰܡܶܐ ܒܘ ܦܰܝܣܒܘܟ ܠܰܫܰܢ ܐܰܝܢܰܐ ܕܠܐ ܩܰܕܝܪܝ ܕܚܘܕ݂ܪܝ ܕܷܡܦܰܪܔܝ. ܐܳܢܐ ܣܬܶܐ ܥܰܠ ܕܐܝܢܰܩܩܰܐ ܩܰܡܰܝܬܐ ܟܳܚܳܙܶܢܐ ܪܰܣܰܡܶܐ ܕܟ݂ܳܘܪܝ ܒܛܘܪܥܰܒܕܝܢ܆ ܓ݂ܰܠܰܒܶܐ ܦܨܝܚܢܐ. ܘܝܰܘܡܐ ܕܠܐ ܟܳܛܳܥܶܢܶܐ ܒܰܚ ܚܰܝܰܝܕ݂ܝ ܥܰܠ ܕܚܰܕ݂ܷܪܢܐ ܒܝ ܪܰܣܰܡܶܐ ܕܥܰܡܝ ܟ݂ܳܘܪܝ ܕܷܪܣܝܡ ܒܷܐܝܕ݂ܶܗ ܕܥܰܡܝ ܚܰܣܝܐ. ܐܝܢܰܩܠܰܐ ܕܢܰܦܝܩܝܢܰܐ ܡܝ ܥܝܬܐ ܚܙܶܠܰܢ ܕܟܝܬܐ ܥܰܝܘܶܐ ܒܝ ܫܡܰܝܐ ܘܳܐܬܶܐ ܘܰܐ ܐܷܫܡܐ ܡܰܛܪܐ. ܐܶܠܐ ܠܰܬܘܰܐ ܩܘܪܐ. ܐܰܢ ܢܳܫܶܐ ܝܰܬܝܘܶܘܰܝܢܶܗ ܥܰܠ ܐܰܛ ܛܶܒܠܳܝܳܬ݂ܶܐ ܘܐܘܟ݂ܠܝܘܰܐ ܡܘܟܠܐ. ܐܘ ܚܰܣܝܐ ܘܰܐܟ ܟܳܗܢܶܐ ܣܬܶܐ ܐܰܟ݂ܷܠܠܶܗ ܒܘ ܨܰܠܳܘܢ ܕܝ ܥܝܬܐ. ܐܘ ܚܰܐ ܕܰܐܟ݂ܝܠܶܗ ܛܠܷܒܠܶܗ ܟ݂ܰܛܷܪ ܡܘ ܚܰܣܝܐ ܘܡܗܰܢܶܠܶܗ ܐܘ ܟ݂ܳܘܪܝ ܘܕܰܥܝܪܝ ܒܫܰܝܢܐ ܘܒܰܫܠܳܡܐ ܠܰܒ ܒܳܬܰܬ݂ܶܗ ܘܠܰܩ ܩܷܪܝܰܘܳܬ݂ܰܬ݂ܶܗ. ܡܠܦܢܐ ܫܟܪܝ ܐܩܛܫ 1130 ܡ̈ܠܐ.
