Šëkri Aqtaš: ܥܰܠ‌ ܐܝ ܥܠܰܝܡܘܬ݂ܐ / Cal i claymuṯo

Cal i claymuṯo

ܐܝ ܥܠܰܝܡܘܬ݂ܐ܆ ܐܘ ܙܰܒܢܐ ܒܰܣܝܡܐ ܘܐܝ ܫܶܬܶܣܬܐ ܕܰܚ ܚܰܝܶܐ ܕܘ ܒܰܪܢܳܫܐ ܝܐ. ܐܝܕ݂ܰܐ ܐܰܥ ܥܠܰܝܡܶܐ ܕܗܳܘܷܢ ܟܰܫܝܪܶܐ ܒܘ ܙܰܒܢܰܢܐ ܘܕܷܡܟܰܡܠܝ ܟܘܠ ܬܶܫܡܷܫܬܐ ܕܟܳܢܷܦܠܐ ܐܰܥܠܰܝـܝܶܗ، ܓܷܡܚܰܕ݂ܪܷܢܢܶܗ ܥܬܝܕ݂ܘܬ݂ܐ ܛܰܘܬܐ ܠܪܘܚܰـܝـܝܶܗ ܠܰܫܰܢ ܕܥܰܝܫܝ ܚܰܝܶܐ ܡܰܠܝܶܐ ܒܘܣܳܡܶܐ ܘܦܨܝـܚܘܬ݂ܐ ܘܟܰܫܝܪܘܬ݂ܐ. ܘܓܬܳܘܷܢ ܥܠܰܝܡܶܐ ܕܟܳܡܰܘܬ݂ܪܝ ܠܘ ܥܰܡܐ ܘܠܝ ܥܝܬܐ ܘܠܘ ܐܰܬ݂ܪܐ. ܐܝܕ݂ܰܐ ܣܬܶܐ ܕܚܘܫܘܝ ܐܝ ܥܠܰܝܡܘܬ݂ܐ، ܙܰܒܢܐ ܕܘ ܟܪܳܟ݂ܐ ܘܕܘ ܬܶܫܬܥܷܢܝܐ، ܓܷܡܣܰܟܪܝ ܐܝ ܥܬܝܕ݂ܘܬ݂ܰܬ݂ܬ݂ܶܗ ܘܓܷܕܥܰܝܫܝ ܚܰܝܶܐ ܠܐ ܒܰܣܝܡܶܐ ܘܡܰܝـܝܪܶܐ. ܐܘ ܙܰܒܢܐ ܕܝ ܥܠܰܝܡܘܬ݂ܐ ܟܳܡܫܰܪܶܐ ܒܷܬ݂ܷܪ ܡܰܢ ܐܰܪܒܰܥܣܰܪ ܐܷܫܢܶܐ. ܐܘ ܥܠܰܝܡܐ ܒܘ ܙܰܒܢܰܢܐ، ܗܰܡ ܒܘ ܗܰܘܢܐ ܗܰܡ ܒܘ ܓܘܫܡܐ ܟܳܡܝܫܰܚܠܰܦ. ܟܘܠ ܥܠܰܝܡܐ ܐܝܢܰܩܠܰܐ ܕܚܳܙܶܐ ܒܰܝܢ ܠܪܘܚܶܗ ܘܠܰܚ ܚܰܘܪܳܢܰܝܕ݂ܶܗ ܐܰܚ ܚܪܶܢܶܐ ܫܘܚܠܳܦܐ، ܟܳܠܳܙܰܡ ܕܠܐ ܥܳܔܰܙ ܘܠܐ ܡܷܩܚܰܪ. ܥܰܠ ܕܟܘܠ ܢܳܫܐ ܗܰܡ ܒܘ ܫܘܦܪܰܝܕ݂ܶܗ ܗܰܡ ܒܘ ܓܰܘܢܰܝܕ݂ܶܗ ܗܰܡ ܒܘ ܗܰܘܢܰܝܕ݂ܶܗ ܗܰܡ ܒܘ ܓܘܫܡܰܝܕ݂ܶܗ ܦܪܝܫܐ ܟ݂ܠܝܩ. ܟܘܠ ܥܠܰܝܡܐ ܟܳܠܳܙܰܡ ܕܗܳܘܶܐ ܡܰܚܝܣܐ ܒܝ ܫܬܰܓ݂ܰܠܝـܝܰـܝܕ݂ܶܗ ܘܒܰܙ ܙܰܘܥܰܝܕ݂ܶܗ ܘܒܝ ܬܰܪܒܝܬ݂ܰܝܕ݂ܶܗ، ܠܰܫܰܢ ܕܡܷܪܚܰܡ ܘܡܝـܝܰܩܰܪ ܡܶܐ ܟܘܠ ܢܳܫܐ. ܟܳܠܳܙܰܡ ܕܘ ܥܠܰܝܡܐ ܣܳܝܰܡ ܐܰܬ ܬܶܫܡܫܳܬ݂ܶܐ ܕܟܳܢܷܦܠܝ ܐܰܥܠܶܗ، ܘܠܐ ܡܰܣܷܡܡܶܗ ܒܷܚܪܶܢܶܐ. ܘܠܐ ܙܳܝܰܥ ܡܘ ܫܘܓ݂ܠܐ ܘܠܐ ܡܥܰܘܰܩ ܠܘ ܫܘܓ݂ܠܐ ܕܰܐܕܝܰܘܡܰܐ، ܠܪܰܡܚܷܠ. ܒܝ ܥܠܰܝܡܘܬ݂ܐ؛ ܐܘ ܣܰܥܪܐ ܟܳܚܳܠܰܡ. ܘܟܳܢܷܦܩܝ ܐܰܫ ܫܘܶܪܷܒ ܘܐܘ ܕܰܩܢܐ. ܐܝ ܩܘܡܬ݂ܐ ܘܐܘ ܟܝܠܐ ܟܳܡܝܫܰܚܠܦܝ. ܐܰܘ ܘܰܪܝܕ݂ܶܐ ܟܳܩܳܘܷܢ ܘܟܳܚܘܠܡܝ. ܟܳܢܷܦܩܝ ܒܰܪܒܘܛܶܐ ܒܝ ܦܳܬ݂ܐ ܘܒܘ ܓܘܫܡܐ. ܐܘ ܩܳܠܐ ܟܳܚܳܠܰܡ ܘܟܳܥܳܠܶܐ. ܒܘ ܫܷܟܠܰܢܐ ܐܘ ܓܘܫܡܐ ܕܘ ܥܠܰܝܡܐ ܟܳܡܝܫܰܚܠܰܦ. ܥܰܠ ܗܰܬ݂ܶܐ ܐܘ ܥܠܰܝܡܐ ܕܗܳܘܶܐ ܝܰܠܝܦܐ ܘܚܰܕ݂ܝܪܐ ܠܰܫ ܫܘܚܠܳܦܰܢܝ، ܛܰܘܬܷܪ ܓܷܡܚܰܕ݂ܰܪ ܪܘܚܶܗ ܠܰܚ ܚܰܝܶܐ ܕܠܰܦ ܩܷܕܰܡ. ܐܘ ܒܰܪܢܳܫܐ، ܡܶܐ ܢܰܥܡܘܬ݂ܶܗ ܟܳܠܳܙܰܡ ܕܝܳܠܰܦ ܐܰܝܕܰܪܒܐ ܘܡܷܢ ܫܷܟܷܠ ܢܳܛܰܪ ܪܘܚܶܗ ܢܰܕ݂ܝܦܐ. ܥܰܠ ܕܘ ܚܘܠܡܳܢܐ ܬܳܓܐ ܕܡܰܠܝܐ ܟܶܦܶܐ ܝܰܩܝܪܶܐ ܝܐ ܒܪܝܫܶܗ ܕܘ ܥܠܰܝܡܐ. ܒܝ ܥܠܰܝܡܘܬ݂ܐ ܣܬܶܐ ܡܶܩܷܡ ܡܶܐ ܟܘܠ ܡܶܕܶܐ ܐܰܢ ܐܝܕ݂ܳܬ݂ܶܐ ܥܰܠ ܕܟܳܩܰܝܬ݂ܝ ܒܟܘܠ ܡܶܕܶܐ، ܙܷܬܬܷܪ ܡܘ ܓܘܫܡܐ ܟܘܠܶܗ ܟܳܡܷܥܔܳܩܝ. ܡܰܘܟ݂ܰܐ ܐܰܢ ܐܝܕ݂ܳܬ݂ܶܐ ܟܘܠ ܢܰܩܩܰܐ ܟܳܠܳܙܰܡ ܕܡܝܬܰܫܝܓ݂ܝ ܒܰܡ ܡܰܝܶܐ ܘܒܘ ܨܰܦܳܢܐ ܘܦܰܝܫܝ ܢܰܕ݂ܝܦܶܐ. ܡܶܩܷܡ ܘܒܷܬ݂ܷܪ ܡܘ ܡܘܟܠܐ. ܒܷܬ݂ܷܪ ܡܘ ܡܰܙܠܐ ܕܠܰܒ ܒܶܣܷܠܝܶܐ. ܒܘ ܙܰܒܢܐ ܕܘ ܟܶܘܐ ܘܕܝܠܳܢܳܐܝܬ݂ ܒܷܬ݂ܷܪ ܡܶܐ ܕܷܡܚܰܠܩܝܢܰܐ ܐܰܙ ܙܷܒܠܶܐ ܟܳܠܳܙܰܡ ܕܡܰܫܝܓ݂ܝܢܰܐ ܐܝܕ݂ܳܬ݂ܰܝܢܰܐ. ܐܰܛ ܛܰܦܪܳܬ݂ܶܐ ܣܬܶܐ ܟܳܠܳܙܰܡ ܕܡܝܩܳܨܝ ܠܰܫܰܢ ܕܠܐ ܠܳܬܰܡ ܥܷܔܰܩ ܬܰܚܬܰܝـܝܶܗ. ܐܘ ܡܘܟܠܐ ܕܰܛ ܛܰܦܪܳܬ݂ܶܐ ܟܳܘܶܐ ܥܰܕܶܐ ܥܰܡ ܗܷܢ ܡܰܥ ܥܠܰܝܡܶܐ. ܐܰܢ ܐܰܒܳܗܶܐ ܘܰܐܡ ܡܰܠܦܳܢܶܐ، ܐܝܢܰܩܠܰܐ ܕܚܳܙܷܢ ܕܘ ܢܰܥܝܡܐ ܐܰܘ ܥܠܰܝܡܐ ܟܳܢܳܟܰܬ ܐܝܕ݂ܳܬ݂ܶܗ ܐܰܘ ܟܳܐܟ݂ܰܠ ܛܰܦܪܳܬ݂ܶܗ، ܟܳܠܳܙܰܡ ܕܡܰܚـܝܣܝܠܶܗ ܘܡܷܠܦܝܠܶܗ ܥܰܠ ܐܘ ܡܝܟܪܳܦ݁ ܕܟܳܠܳܬܰܡ ܬܰܚܬܰܝـܝܶܗ. ܚܰܐ ܡܰܫ ܫܘܚܠܳܦܶܐ ܕܟܳܘܶܐ ܒܘ ܓܘܫܡܐ ܕܘ ܥܠܰܝܡܐ، ܐܰܒ ܒܰܪܒܘܛܶܐ ܢܶܐ. ܠܓܳܪܰܢ ܕܰܢ ܐܳܣܰܘܳܬ݂ܐ، ܟܳܠܳܙܰܡ ܕܘ ܥܠܰܝܡܐ ܠܐ ܚܳܝܰܟܟܶܗ ܐܰܘ ܥܳܨܰܪܪܶܗ. ܟܳܘܶܐ ܕܒܷܬ݂ܷܪ ܦܳܝܰܫ ܕܰܩܩܰܬ ܐܘ ܓܘܪܬܳܬ݂ܶܐ ܒܝ ܦܳܬ݂ܐ. ܐܶܠܐ ܛܪܐ ܡܰܚܘܶܐ ܪܘܚܶܗ ܠܘ ܐܳܣܝܐ ܕܘ ܓܰܠܕܐ. ܐܰܕ ܕܰܪܡܳܢܶܐ ܕܳܐܒܶܠܶܗ ܐܘ ܐܳܣܝܐ ܐܰܘ ܐܘ ܬܶܫܝܓ݂ܐ ܕܝ ܦܳܬ݂ܐ ܒܘ ܨܰܦܳܢܐ، ܓܡܰܢܦܥܝ ܠܘ ܢܝܳܚܐ ܕܰܒ ܒܰܪܒܘܛܶܐ. ܟܘܠ ܥܠܰܝܡܐ، ܟܳܠܳܙܰܡ ܕܡܰܫܷܓ݂ ܣܰܥܪܶܗ ܘܪܝܫܶܗ ܒܝ ܫܰܒܬ݂ܐ ܒܘ ܢܳܩܘܨܐ ܬܠܰܬ݂ ܐܰܘ ܐܰܪܒܰܥ ܟܳܪܶܐ. ܐܘ ܢܬ݂ܳܪܐ ܕܘ ܣܰܥܪܐ، ܠܰܬܠܶܗ ܐܰܣܝܪܘܬ݂ܐ ܥܰܡ ܐܘ ܬܶܫܝܓ݂ܐ. ܐܘ ܚܰܐ ܕܟܳܐܡܰܪ، ܠܰܫܰܢ ܕܠܐ ܢܳܬ݂ܰܪ ܣܰܥܪܝ ܠܐ ܟܳܡܰܫܷܓ݂ܢܶܗ، ܦܰܘܕܐ ܟܳܣܳܝܰܡ. ܒܘ ܙܰܒܢܐ ܕܝ ܥܠܰܝܡܘܬ݂ܐ، ܟܳܘܶܐ ܟܰܢܢܶܐ ܒܣܰܥܪܶܗ ܕܗܷܢ ܡܰܢ ܢܳܫܶܐ. ܐܰܝܢܰܐ ܕܟܝܬܐ ܟܰܢܢܶܐ ܒܣܰܥܪܶܗ، ܟܝܒܶܗ ܡܫܰܝܰܠ ܡܘ ܐܳܣܝܐ ܐܰܥܠܰܗ. ܟܘܠ ܥܠܰܝܡܐ ܛܪܐ ܡܷܣܬܰܥܡܰܠ ܐܘ ܡܣܰܪܩܐ ܕܪܘܚܶܗ ܘܠܐ ܕܢܳܫܐ ܚܪܶܢܐ. ܠܰܫܰܢ ܕܠܐ ܛܳܦܷܢ ܐܰܟ ܟܶܘܶܐ ܕܘ ܪܝܫܐ ܡܶܐ ܚܰܐ ܠܷܚܪܶܢܐ. ܐܝ ܢܰܕ݂ܰܦܰܐ ܕܘ ܦܶܡܐ ܘܕܰܥ ܥܰܪܫܳܢܶܐ ܣܬܶܐ ܓ݂ܰܠܰܒܶܐ ܡܘܗܝܡ ܝܐ. ܠܰܫܰܢ ܕܠܐ ܠܳܬܰܡ ܥܰܔܰܩ ܘܡܝܟܪܳܦ݁ ܒܘ ܦܶܡܐ ܘܒܰܝܢ ܕܰܥ ܥܰܪܫܳܢܶܐ، ܟܳܠܳܙܰܡ ܕܒܘ ܝܰܘܡܐ ܒܘ ܢܳܩܘܨܐ ܬܰܪܬܶܐ ܟܳܪܶܐ ܐܰܥ ܥܠܰܝܡܶܐ ܡܰܫܝܓ݂ܝ ܦܶܡܰܝـܝܶܗ ܘܥܰܪܫܳܢܰܝـܝܶܗ ܒܕܰܪܡܳܢܐ ܘܦܷܪܫ̰ܰܐ ܛܰܘܬܐ. ܐܝܕ݂ܰܐ ܕܗܳܘܶܐ ܡܟܳܢܘܬ݂ܐ، ܟܘܠ ܐܷܫܬܐ ܝܰܪܚܶܐ ܛܪܐ ܓܰܒ ܐܘ ܐܳܣܝܐ ܣܰܝܡܝ ܟܳܢܬܪܳܠ ܕܰܥ ܥܰܪܫܶܐ ܠܰܫܰܢ ܕܠܐ ܚܘܪܘܝ. ܐܘ ܚܰܐ ܕܟܷܬܢܶܐ ܥܰܪܫܳܢܶܗ ܚܶܘܳܪܶܐ ܘܢܰܕ݂ܝܦܶܐ ܐܘ ܓܰܚܟ݂ܰܝܕ݂ܶܗ ܣܬܶܐ ܟܳܘܶܐ ܫܰܦܝܪܐ. ܐܘ ܥܰܔܰܩ ܕܟܳܠܳܬܰܡ ܒܘ ܦܶܡܐ ܘܒܰܝܢ ܕܰܥ ܥܰܪܫܳܢܶܐ، ܕܠܐ ܢܳܕ݂ܰܦ ܥܰܡ ܐܘ ܙܰܒܢܐ ܟܳܣܳܪܶܐ ܘܟܳܡܷܟ݂ܠܰܛ ܒܰܡ ܡܘܟܠܳܢܶܐ. ܘܒܷܬ݂ܷܪ ܟܳܟ݂ܳܠܰܩ ܟܶܘܶܐ ܝܰܩܘܪܶܐ ܕܠܐ ܟܳܢܰܝـܚـܝ. ܒܘ ܙܰܒܢܐ ܕܝ ܥܠܰܝܡܘܬ݂ܐ، ܐܘ ܥܠܰܝܡܐ ܟܳܡܩܰܬܰܰܠ ܡܩܰܒܷܠ ܕܚܰܪܰܟܰܬ ܘܙܰܘܥܶܐ ܘܦܬܰܟܰܪܰܬ ܓ݂ܰܠܰܒܶܐ. ܟܳܐܒܰܥ ܕܣܳܝܰܡ ܓ݂ܰܠܰܒܶܐ ܡܶܕܳܢܶܐ ܘܠܐ ܟܳܡܣܰܝܒܰܪ ܕܳܐܬ݂ܶܐ ܐܘ ܙܰܒܢܰܬ݂ܬ݂ܶܗ. ܡܰܘܟ݂ܰܐ ܟܳܢܳܦܰܠ ܒܰܦ ܦܰܚܶܐ ܘܒܰܢ ܢܶܣܝܘܢܶܐ. ܟܳܒܳܕܶܐ ܕܗܳܘܷܢܠܶܗ ܩܰܛܪܶܐ ܥܰܡ ܐܰܢ ܐܰܒܳܗܰܝܕ݂ܶܗ. ܟܘܠ ܢܰܩܩܰܐ ܟܳܩܳܝܰܡ ܡܩܰܒܷܠ ܕܷܬ݂ܬ݂ܶܗ ܘܟܳܐܡܰܪܪܶܗ؛ ܐܳܢܐ ܠܰܬܢܐ ܢܰܥܝܡܐ ܕܡܰܫܝܪܘܬܘ ܐܰܥܠܝ ܗܰܘܝܢܐ ܪܰܒܐ. ܗܰܬܘ ܠܐ ܟܳܦܷܗܡܘܬܘܠܝ. ܥܰܡ ܐܘ ܙܰܒܢܐ ܟܳܪܳܚܰܩ ܡܝ ܐܶܡܐ ܘܡܘ ܒܰܒܐ ܘܡܰܢ ܐܰܚܘܢܳܢܶܐ ܘܟܳܘܶܐ ܚܰܘܪܐ ܥܰܡ ܥܠܰܝܡܶܐ ܚܪܶܢܶܐ. ܒܝ ܥܠܰܝܡܘܬ݂ܐ ܐܘ ܢܶܩܳܝܐ ܕܰܚ ܚܰܘܪܳܢܶܐ ܣܬܶܐ ܟ݂ܘܕ ܐܘ ܢܶܩܳܝܐ ܕܰܟ ܟܬ݂ܳܘܶܐ، ܓ݂ܰܠܰܒܶܐ ܡܘܗܝܡ ܝܐ. ܐܝܕ݂ܰܐ ܕܷܡܢܰܩܶܐ ܚܰܘܪܳܢܶܐ ܠܐ ܛܳܘܶܐ ܘܡܰܠܰܟ݂ ܐܰܥܡܰܝـܝܶܗ، ܒܙܰܒܢܐ ܟܰܪܝܐ ܓܬܳܘܶܐ ܟ݂ܳܬ݂ܰܝـܝܶܗ. ܓܪܳܚܰܩ ܡܝ ܡܰܕܪܰܫܬܐ ܘܡܝ ܥܝܬܐ ܘܡܶܐ ܒܰܝܢ ܕܘ ܥܰܡܐ. ܓܷܡܗܰܠܰܟ݂ ܒܕܰܪܒܐ ܕܟܷܬܝܐ ܐܘ ܕܥܳܪܐ ܕܡܝܢܶܗ ܙܰܚܡܶܐ. ܥܰܠ ܗܰܬ݂ܶܐ ܟܝܬܐ ܡܰܬ݂ܠܐ ܕܟܳܐܡܰܪ؛ ܡܰܪܠܝ ܐܘ ܚܰܘܪܰܝܕ݂ܘܟ݂ ܡܰܢܝܐ، ܓܕܳܡܰܪܢܘܟ݂ ܡܰܢܗܰܬ. ܐܘ ܥܠܰܝܡܐ، ܟܳܠܳܙܰܡ ܕܡܰܨܷܬ ܘܡܰܛܷܥ ܘܡܝܰܩܰܪ ܠܰܢ ܐܰܒܳܗܰܝܕ݂ܶܗ ܒܟܘܠ ܡܶܕܶܐ. ܥܰܠ ܕܗܷܢܢܷܐ ܟܳܪܘܚܡܝܠܶܗ ܘܟܘܠ ܢܰܩܩܰܐ ܟܷܐܒܥܝ ܐܝ ܛܳܘܘܬ݂ܰܝܕ݂ܶܗ ܘܐܝ ܟܰܫܝܪܘܬ݂ܰܝܕ݂ܶܗ. ܠܓܳܪܰܢ ܕܰܩ ܩܳܢܘܢܶܐ ܡܕ݂ܝܢܳܝܶܐ ܣܬܶܐ، ܐܘ ܐܰܒܪܐ ܐܰܘ ܐܝ ܒܰܪܬ݂ܐ، ܗܘܠ ܠܰܬܡܳܢܰܥܣܰܪ ܐܷܫܢܶܐ ܠܰܦ݁ܦ݁ܶܗ ܕܣܰܝܡܝ ܡܶܕܶܐ ܕܠܐ ܡܘ ܕܰܤܛܷܪ ܕܰܢ ܐܰܒܳܗܰܬ݂ܬ݂ܶܗ. ܘܚܰܐ ܡܰܩ ܩܳܢܘܢܶܐ ܐܰܠܳܗܳܝܶܐ ܣܬܶܐ ܟܳܡܰܘܨܶܐ ܠܰܢ ܐܰܒܢܶܐ ܕܷܡܝܰܩܪܝ ܐܰܢ ܐܰܒܳܗܰܬ݂ܬ݂ܶܗ ܘܫܷܡܥܷܢܢܶܗ ܒܟܘܠܠܶܗ ܐܰܚ ܚܰܝܰܬ݂ܬ݂ܶܗ. ܠܰܫܰܢ ܕܡܷܪܚܰܡ ܐܘ ܥܠܰܝܡܐ ܒܝ ܥܠܰܝܡܘܬ݂ܰܝܕ݂ܶܗ ܟܳܠܳܙܰܡ، ܡܰܩܒܰܠ ܘܡܝܰܩܰܪ ܐܝ ܝܩܰܪܬ݂ܰܝܕ݂ܶܗ ܟ݂ܘܕ ܕܟܷܬܝܐ، ܗܰܟܟܰܐ ܥܰܬܝܪܬܐ ܘܗܰܟܟܰܐ ܦܰܩܷܪܬܐ. ܡܰܩܒܰܠ ܘܪܳܚܰܡ ܪܘܚܶܗ ܒܘ ܫܷܟܷܠ ܕܟܷܬܝܐ ܘܠܐ ܐܳܡܰܪ؛ ܐܳܢܐ ܩܰܝ ܠܰܬܢܐ ܟ݂ܘܕ ܦܠܰܢ؟. ܕܥܳܝܰܫ ܒܰܝܢ ܕܘ ܥܰܡܐ ܘܡܝܰܩܰܪ ܐܰܩ ܩܳܢܘܢܶܐ ܓܰܘܳܢܳܝܶܐ ܕܟܳܡܗܰܠܟ݂ܝ ܒܰܝܢ ܕܘ ܟܶܢܫܐ. ܒܷܬ݂ܷܪ ܡܰܢܝ ܟܘܠܠܶܗ ܣܬܶܐ ܕܗܳܘܶܠܶܗ ܢܝܫܐ ܛܳܘܐ ܠܰܚ ܚܰـܝܰـܝܕ݂ܶܗ ܕܰܥܬܝܕ݂. ܟ݂ܘܕ ܡܷܪܠܰܢ ܡܶܐ ܠܰܠܥܰܠ، ܐܘ ܙܰܒܢܐ ܕܝ ܥܠܰܝܡܘܬ݂ܐ ܐܰܓ݂ܘܢܐ ܘܩܰܠܶܐ ܝܐ ܡܩܰܒܷܠ ܕܰܙ ܙܰܘܥܶܐ ܘܚܰܪܰܟܰܬ ܘܦܬܰܟܰܪܰܬ ܒܝܫܶܐ. ܒܝ ܥܠܰܝܡܘܬ݂ܐ، ܐܰܕ ܕܰܪܒܳܢܶܐ ܕܟܳܡܷܒܠܝ ܠܰܦ ܦܰܘܕܶܐ ܓ݂ܰܠܰܒܶܐ ܢܶܐ. ܐܝܕ݂ܰܐ ܐܘ ܥܠܰܝܡܐ ܕܠܐ ܗܳܘܶܐ ܦܳܪܘܫܐ ܘܡܗܰܘܢܐ، ܟ݂ܰܝـܝܦܐ ܟܳܡܰܩܒܰܠ ܘܟܳܪܳܚܰܡ ܕܷܐܙܙܶܗ ܒܰܕ ܕܰܪܒܳܢܰܢܝ. ܐܘ ܬܶܠܶܦܘܢ ܕܘ ܟܝܣܐ ܘܐܘ ܐܝܢܬܶܪܢܶܬ ܘܥܰܡ ܗܰܢܝ ܐܘ ܫܬܳܝܐ ܕܝ ܔܷܓ݂ܰܪܰܐ ܘܕܰܓ ܓܶܠܳܢܶܐ ܘܕܰܕ ܕܰܪܡܳܢܶܐ، ܟܳܐܬ݂ܷܢ ܒܝ ܩܰܡܰܝܬܐ ܕܰܢ ܢܷܫܘܶܐ ܘܕܰܦ ܦܰܚܶܐ ܕܟܳܡܝܨܰܕ ܐܰܦ݁ܦ݁ܶܗ ܐܘ ܥܠܰܝܡܐ. ܐܝܢܰܩܠܰܐ ܕܟܳܚܳܙܶܐ ܐܰܚ ܚܰܘܪܳܢܰܝܕ݂ܶܗ ܟܳܡܷܣܬܰܥܡܠܝ ܒܰܡ ܡܶܕܳܢܰܢܝ، ܘܗܝܝܶܐ ܠܐ ܟܳܡܷܣܬܰܥܡܰܠ، ܟܳܡܝܢܰܟܰܦ ܘܟܳܚܫܰܘܠܰܗ ܠܪܘܚܶܗ ܢܘܩܨܰܢܝܝܶܐ. ܥܰܠ ܕܠܐ ܟܐܕ݂ܰܥ ܡܷܢ ܙܰܪܰܪ ܟܷܬܬܶܗ ܐܰܓ ܓܶܠܳܢܰܢܝ ܐܰܘ ܐܝ ܔܷܓ݂ܰܪܰܐ ، ܟܳܡܔܰܪܰܒ ܗܝـܝܶܐ ܣܬܶܐ ܕܫܳܬܶܐ. ܩܰܡܰܝܬܐ ܟܳܣܳܝܰܡ ܡܰܪܰܩ، ܒܷܬ݂ܷܪ ܠܪܘܚܶܗ ܟܳܐܡܰܪ؛ ܡܰܐ ܡܷܢ ܓܬܳܘܶܐ ܡܶܐ ܚܕ݂ܐ ܢܰܩܩܰܐ ܕܷܡܔܰܪܰܒܢܐ. ܐܰܘ ܟܳܚܳܫܰܘ ܫܘܒܗܳܪܐ ܝܐ ܐܘ ܫܬܳܝܐ ܕܝ ܔܷܓ݂ܰܪܰܐ . ܒܷܬ݂ܷܪ ܕܡܝܫܰܝܰܠ ܡܝܢܶܗ؛ ܩܰܝ ܒܕܶܠܘܟ݂ ܒܘ ܫܬܳܝܐ ܕܰܡ ܡܶܕܳܢܰܢܝ؟ ܓܡܰܕܥܰܪ ܘܓܕܳܐܡܰܪ؛ ܢܰܩܩܰܘܳܬ݂ܶܐ ܟܳܡܷܩܚܰܪܢܐ ܠܰܫܰܢ ܕܢܳܩܰܨ ܐܘ ܩܰܚܪܰܝܕ݂ܝ. ܐܰܘ ܓܕܳܐܡܰܪ؛ ܐܰܚ ܚܰܘܪܳܢܰܝܕ݂ܝ ܔܒܷܪܰܠܠܝ ܠܰܐܒܷܥܢܐ ܕܛܳܘܰܪܢܰܢܶܗ. ܒܘ ܫܷܟܠܰܢܐ ܓܷܡܕܰܦܰܥ ܥܰܠ ܪܘܚܶܗ. ܐܘ ܝܘܠܦܳܢܐ ܕܝ ܐܳܣܝܘܬ݂ܐ ܟܳܡܫܰܪܰܪ ܕܟܝܬܐ ܫ̰ܰܥܣܰܪ ܣܰܡܳܢܶܐ ܒܘ ܓܶܠܐ ܕܝ ܔܷܓ݂ܰܪܰܐ. ܘܟܘܠܠܶܗ ܡܰܕ݂ܝܪܳܢܶܐ ܘܡܣܰܡܡܳܢܶܐ ܢܶܐ. ܚܷܢܓܝ ܩܰܘܝܶܐ ܘܡܰܕ݂ܝܪܳܢܶܐ ܢܶܐ، ܗܘܠ ܐܘܥܕܐ ܠܐ ܚܙܶܐ ܕܰܪܡܳܢܐ ܕܷܒܢܰܩܩܰܐ ܚܕ݂ܐ ܕܟܳܡܰܢܷܚܚܶܗ. ܐܘ ܣܰܡܐ ܕܟܳܡܰܕ݂ܷܪ ܙܷܬܬܷܪ ܡܶܐ ܟܘܠܠܶܗ ܐܘ ܢܝܟܳܬܝܢ ܝܐ ܥܰܠ ܕܩܰܛܳܠܐ ܕܘ ܓܘܫܡܐ ܘܕܰܗ ܗܰܕܳܡܶܐ ܝܐ. ܐܘ ܥܠܰܝܡܐ ܕܫܳܬܶܐ ܔܷܓ݂ܰܪܰܐ، ܠܰܝܒܶܗ ܕܡܝܫܰܘܫܰܛ ܒܰܚ ܚܰـܝܰـܝܕ݂ܶܗ. ܕܝܠܳܢܳܐܝܬ݂ ܒܘ ܣܦ݁ܳܪ ܘܒܰܬ ܬܷܫܬܥܷܢܝܶܐ ܕܘ ܓܘܫܡܐ ܟ݂ܘܕ ܕܘ ܣܚܳܝܐ ܐܰܘ ܦܘܬܒܳܠ ܐܰܘ ܪܰܗܛܐ ܐܰܘ ܣܬܶܐ ܒܘ ܒܰܣܟܶܬܒܳܠ. ܥܰܠ ܕܡܘ ܝܰܘܡܐ ܕܟܳܒܳܕܶܐ ܒܘ ܫܬܳܝܐ ܕܝ ܔܷܓ݂ܰܪܰܐ، ܟܳܒܳܕܶܐ ܒܝ ܩܰܡܰܝܬܐ ܕܫܳܥܰܠ ܘܚܳܦܰܟ݂. ܒܷܬ݂ܷܪ ܥܰܡ ܐܘ ܙܰܒܢܐ ܐܘ ܓܘܫܡܐ ܘܰܐܗ ܗܰܕܳܡܶܐ ܟܘܠܠܶܗ ܟܳܪܳܦܷܢ. ܐܘ ܠܶܒܐ ܘܐܰܘ ܘܰܪܝܕ݂ܶܐ ܠܰܘ ܟܳܥܰܘܕܝ ܟ݂ܘܕ ܟܳܠܳܙܰܡ. ܥܰܡ ܗܰܢܝ ܐܘ ܗܰܘܢܐ ܣܬܶܐ ܟܳܡܷܫܓ݂ܰܫ ܘܰܐܙ ܙܰܘܥܶܐ ܟܳܡܝܫܰܚܠܦܝ. ܘܟܘܠ ܢܰܩܩܰܐ ܟܳܐܬ݂ܶܐ ܪܶܚܐ ܕܘ ܬܷܬܷܢ ܡܝܢܶܗ. ܫܪܳܪܐ ܝܐ ܕܠܐ ܟܳܡܩܰܝܙܰܢ ܐܘ ܥܠܰܝܡܐ ܡܝ ܔܷܓ݂ܰܪܰܐ ܔܓ݂ܘܪ ܡܶܐ ܢܰܦܰܣ ܥܔܝܩܐ ܘܠܶܒܐ ܪܰܦܝܐ ܘܩܕ݂ܳܠܐ ܢܰܫܝܦܐ ܘܗܰܘܢܐ ܫܓ݂ܝܫܐ ܘܕܷ݂ܥܦܝـܝܶܐ ܕܘ ܓܘܫܡܐ ܓܰܘܳܢܳܐܝܬ݂. ܡܰܘܟ݂ܰܐ ܟܷܐܡܡܝ ܐܰܡ ܡܰܠܦܳܢܶܐ؛ ܟܘܠ ܔܷܓ݂ܰܪܰܐ ܕܟܳܡܷܫܬܳܝܐ، ܒܰܨܡܳܪܐ ܕܟܳܡܷܡܚܶܐ ܒܘ ܬܰܒܘܬ ܝܐ. ܝܰܕ݂ܘܥܬ݂ܳܢܐ ܚܪܶܢܐ ܡܷܪܠܶܗ؛ ܟܳܒܳܣܰܡܠܝ ܕܚܳܙܶܢܐ ܟܘܪܦܐ ܒܰܝܢ ܨܰܘܥܳܬ݂ܶܗ ܕܘ ܥܠܰܝܡܐ، ܡܶܐ ܕܚܳܙܶܢܐ ܔܷܓ݂ܰܪܰܐ ܒܐܝܕ݂ܶܗ. ܐܶܠܐ ܠܰܫܰܢ ܕܢܳܛܰܪ ܪܘܚܶܗ ܡܶܐ ܟܘܠ ܡܶܕܶܐ ܕܟܳܡܰܕ݂ܷܪܠܶܗ ܟܳܠܳܙܰܡ؛ ܟܘܠ ܢܰܩܩܰܐ ܗܳܘܷܢܠܶܗ ܐܶܣܳܪܶܐ ܫܰܪܝܪܶܐ ܘܩܰܘܝܶܐ ܥܰܡ ܐܝ ܝܩܰܪܬ݂ܰܝܕ݂ܶܗ ܘܥܰܡ ܐܰܡ ܡܰܠܦܳܢܰܝܕ݂ܶܗ ܘܠܐ ܡܕܰܓܰܠ ܐܰܥܠܰܝـܝܶܗ. ܕܦܳܪܰܫ ܒܰܝܢ ܟܘܠ ܡܶܕܶܐ ܕܟܳܡܰܢܦܰܥܠܶܗ ܘܕܟܳܡܰܕ݂ܷܪܠܶܗ. ܩܳܕܰܪ ܕܳܐܡܰܪ ܠܐ، ܠܟܘܠ ܡܶܕܶܐ ܕܟܳܡܰܕ݂ܷܪ ܘܟܳܡܰܚܛܶܠܶܗ. ܝܳܠܰܦ ܥܰܕܰܬ ܒܰܣܝܡܶܐ ܘܛܳܘܶܐ ܠܰܫܰܢ ܕܗܳܘܶܠܶܗ ܟܝܳܢܐ ܪܰܟܝܟ݂ܐ. ܐܝܢܰܩܩܰܐ ܕܗܳܘܶܐ ܣܢܝܩܘܬ݂ܐ ܡܥܰܘܰܢ ܒܟܘܠ ܢܰܩܩܰܐ ܘܒܟܘܠ ܫܘܓ݂ܠܐ ܠܟܘܠ ܣܢܝܩܳܝܐ. ܣܳܝܰܡ ܓ݂ܰܠܰܒܶܐ ܡܶܕܳܢܶܐ ܘܰܠܰܘ ܕܥܳܔܰܙ ܡܘ ܣܝܳܡܰܬ݂ܬ݂ܶܗ ܣܬܶܐ. ܐܝܢܰܩܠܰܐ ܕܠܐ ܡܰܨܷܬ ܘܫܳܡܰܥ ܠܰܡ ܡܰܠܦܳܢܰܝܕ݂ܶܗ ܘܠܰܢ ܐܰܒܳܗܰܝܕ݂ܶܗ، ܓܬܳܘܶܐ ܟܘܒܐ ܒܘ ܓܘܫܡܐ ܕܝ ܢܳܫܘܬ݂ܐ ܘܒܰܠܰܐ ܗܰܡ ܠܪܘܚܶܗ ܗܰܡ ܣܬܶܐ ܠܝ ܝܩܰܪܬܰܝܕ݂ܶܗ. ܚܰܐ ܡܰܦ ܦܰܚܶܐ ܪܰܒܶܐ ܕܘ ܕܳܪܰܢܐ ܩܰܡܘܬ݂ܶܗ ܕܰܥ ܥܠܰܝܡܶܐ، ܐܘ ܬܶܟܢܳܠܳܘܙ̰ܝ ܝܐ. ܥܰܠ ܕܥܰܡ ܐܝ ܦܰܝܕܰܝܕ݂ܶܗ، ܟܷܬܠܶܗ ܟ݂ܣܰܪܰܐ ܣܬܶܐ، ܟܳܠܳܙܰܡ ܕܝܷܠܦܝ ܐܰܥ ܥܠܰܝܡܶܐ ܐܰܝܕܰܪܒܐ ܘܠܰܫܰܢ ܡܷܢ ܡܷܣܬܰܥܷܡܠܝܠܶܗ. ܐܝ ܦܰܝܕܰܐ ܕܘ ܐܝܢܬܶܪܢܶܬ ܐܰܘ ܕܨܳܨܝܰܠ ܡܶܕܝܰܐ ܓ݂ܰܠܰܒܶܐ ܝܐ. ܟܝܒܶܗ ܐܘ ܥܠܰܝܡܐ ܡܝ ܕܘܟܬ݂ܐ ܕܟܷܬܝܐ، ܡܷܔܓ݂ܰܠ ܐܰܘ ܡܫܰܕܰܪ ܐܶܓܰܪܬ݂ܐ ܠܘ ܪܳܚܡܰܝܕ݂ܶܗ ܕܟܷܬܝܐ ܒܘ ܓܰܒܐ ܚܪܶܢܐ ܕܷܒܪܝܬ݂ܐ. ܟܳܘܷܢܠܶܗ ܚܰܘܪܳܢܶܐ ܡܶܐ ܥܰܡܶܐ ܘܡܰܪܕܘܳܬ݂ܶܐ ܡܫܰܚܠܦܶܐ. ܐܘ ܡܘܙܝܟ ܕܷܡܩܰܝܰܕ ܐܰܘ ܐܰܨ ܨܷܪܬܳܬ݂ܶܐ ܕܟܳܓܳܪܰܫ، ܟܝܒܶܗ ܦܳܪܰܣܣܶܗ ܠܰܫܰܢ ܕܰܢ ܢܳܫܶܐ ܚܳܙܷܢܢܶܗ. ܓ݂ܰܠܰܒܶܐ ܟ݂ܰܝـܝܦܐ ܟܝܒܶܗ ܡܰܫܡܰܥ ܛܶܒܶܐ ܒܰܣܝܡܶܐ ܐܰܘ ܡܰܚܫܳܢܶܐ ܠܝ ܕܘܟܬ݂ܐ ܕܟܳܐܒܰܥ. ܟܝܒܶܗ ܡܝܫܰܘܬܰܦ ܒܰܓ ܓܪܘܒܰܬ ܕܟܳܫܘܓ݂ܠܝ ܥܰܠ ܬܰܪܡܝܳܬ݂ܶܐ ܐܰܘ ܦ݁ܪܳܙ̰ܰܬ ܡܫܰܚܠܦܶܐ. ܟܝܒܶܗ ܣܬܶܐ ܣܳܝܰܡ ܐܰܘ ܘܳܠܝܳܬ݂ܶܐ ܕܟܳܒܷܢܠܶܗ ܐܰܡ ܡܰܠܦܳܢܶܐ. ܘܟܝܒܶܗ ܣܬܶܐ ܒܘ ܙܰܒܢܐ ܟ݂ܰܠܝܐ ܡܷܫܬܰܥܶܐ ܒܘ ܐܝܢܬܶܪܢܶܬ. ܐܶܠܐ ܐܘ ܥܠܰܝܡܐ ܐܝܢܰܩܩܰܐ ܕܡܷܡܨܰܪ ܒܘ ܐܝܢܬܶܪܢܶܬ ܘܟܘܠ ܢܰܩܩܰܐ ܕܗܳܘܶܐ ܥܰܠ ܒܳܠܶܗ، ܓܟ݂ܳܨܰܪ ܓ݂ܰܠܰܒܶܐ. ܥܰܠ ܕܷܓܛܳܪܶܐ ܡܰܗ ܗܶܪܓܰܝܕ݂ܶܗ ܘܡܶܐ ܟܘܠ ܬܶܫܡܷܫܬܐ ܕܟܷܬܠܶܗ. ܒܷܬ݂ܷܪ ܓܒܳܕܷܢ ܐܰܩ ܩܰܛܪܰܝܕ݂ܶܗ ܒܝ ܩܰܡܰܝܬܐ ܒܓܰܘܰܗ ܕܝ ܝܩܰܪܬ݂ܐ ܘܒܷܬ݂ܷܪ ܥܰܡ ܐܰܡ ܡܰܠܦܳܢܶܐ ܒܝ ܡܰܕܪܰܫܬܐ ܘܥܰܡ ܐܰܚ ܚܰܘܪܳܢܰܝܕ݂ܶܗ ܟܘܠܠܶܗ. ܟܝܬܐ ܗܷܢ ܥܠܰܝܡܶܐ ܕܙܳܘܘܕܐ ܟܳܡܷܡܨܳܪܝ ܒܨܳܨܝܰܠ ܡܶܕܝܰܐ. ܟܳܥܘܒܪܝ ܠܘ ܦܰܝܣܒܘܟ ܘܠܘ ܬܘܝܬܬܷܪ ܘܠܘ ܐܝܢܣܬܰܓܪܰܡ ܙܷܕ ܡܘ ܟܰܝܠܐ. ܟܳܡܫܰܪܶܐ ܥܰܡ ܗܰܢܝ ، ܕܶܦ݁ܪܶܣܝܳܘܢ ܘܟܳܪܷܚܡܝ ܕܟܘܠ ܢܰܩܩܰܐ ܕܦܰܝܫܝ ܠܪܘܚܰـܝـܝܶܗ ܘܥܰܝܢܰܝـܝܶܗ ܒܘ ܬܶܠܶܦܘܢ. ܐܝ ܫܰܢܬ݂ܐ ܟܳܡܝܚܰܪܡܐ ܐܰܥܠܰܝـܝܶܗ ܘܡܘܟܠܐ ܠܰܘ ܟܐܘܟ݂ܠܝ ܟ݂ܕܝ ܥܰܕܶܐ. ܠܐ ܟܳܪܘܚܡܝ ܕܩܰܝܡܝ ܡܶܐ ܕܘܟܬܰܝـܝܶܗ ܠܰܫܰܢ ܕܣܰܝܡܝ ܫܘܓ݂ܠܐ ܡܶܕܶܐ ܐܰܘ ܕܐܘܟ݂ܠܝ ܐܘ ܡܘܟܠܰܬ݂ܬ݂ܶܗ ܒܘ ܦܳܬ݂ܘܪܐ ܥܰܡ ܐܝ ܝܩܰܪܬ݂ܐ. ܐܝܢܰܩܠܰܐ ܕܗܳܘܶܐ ܐܘ ܬܶܠܶܦܘܢ ܒܘ ܙܰܒܢܐ ܕܰܗ ܗܶܪܓܶܐ ܒܟܝܣܶܗ ܕܘ ܝܳܠܘܦܐ، ܠܐ ܟܳܡܰܨܷܬ ܥܰܠ ܐܰܗ ܗܶܪܓܶܐ ܐܶܠܐ ܓܡܷܫܬܰܥܶܐ ܐܶܒܶܗ ܐܰܘ ܟܳܢܳܛܰܪ ܕܳܐܬ݂ܶܐ ܠܶܗ ܐܶܓܰܪܬ݂ܐ ܡܘ ܚܰܘܪܰܝܕ݂ܶܗ. ܝܕ݂ܝܥܐ ܝܐ ܕܰܝ ܝܳܠܘܦܶܐ ܕܟܳܡܷܣܬܰܥܡܠܝ ܬܶܠܶܦܘܢ، ܐܰܗ ܗܶܪܓܰܬ݂ܬ݂ܶܗ ܢܳܩܘܨܬܷܪ ܡܰܝ ܝܳܠܘܦܶܐ ܕܠܐ ܟܳܡܷܣܬܰܡܠܝ ܢܶܐ. ܐܰܥ ܥܠܰܝܡܶܐ ܕܟܳܡܷܣܬܰܥܡܠܝ ܓ݂ܰܠܰܒܶܐ ܐܘ ܐܝܢܬܶܪܢܶܬ ܘܡܰܫܰܦܥܝ ܙܰܒܢܐ ܝܰܪܝܟ݂ܐ ܒܘ ܚܝܳܪܐ ܕܘ ܬܶܠܶܦܘܢ ܐܰܘ ܕܘ ܟܳܡܦ݁ܝܘܬܶܪ، ܟܳܢܳܩܰܨ ܐܘ ܢܘܗܪܐ ܕܥܰܝܢܰܝـܝܶܗ ܘܚܰܨܰܝـܝܶܗ ܟܳܟܳܝܰܘ. ܠܐ ܟܳܣܰܘܥܝ ܠܐ ܫܰܢܬ݂ܐ ܘܠܐ ܡܘܟܠܐ ܣܬܶܐ. ܘܟܳܪܘܚܩܝ ܗܰܡ ܡܝ ܝܩܰܪܬ݂ܐ ܗܰܡ ܣܬܶܐ ܡܰܚ ܚܰܘܪܳܢܶܐ. ܟܳܠܳܙܰܡ ܩܰܡܰܝܬܐ ܐܘ ܥܠܰܝܡܐ ܝܳܠܰܦ ܛܰܘܘܐ ܗܰܡ ܐܝ ܦܰܝܕܰܐ ܗܰܡ ܣܬܶܐ ܐܝ ܟ݂ܣܰܪܰܐ ܕܟܳܡܳܛܶܠܶܗ ܡܘ ܐܝܢܬܶܪܢܶܬ. ܛܪܐ ܠܐ ܐܳܡܰܪ؛ ܠܐ ܟܳܐܬ݂ܶܐ ܠܪܝܫܝ ܐܰܘ ܠܐ ܟܳܔܳܪܶܠܝ ܡܶܕܶܐ. ܐܶܠܐ ܛܪܐ ܗܳܘܶܐ ܡܰܚܝܣܐ ܡܩܰܒܷܠ ܕܟܘܠ ܕܰܦܐ ܕܚܳܝܰܪ ܐܰܘ ܟܘܠ ܬܶܫܬܥܷܢܝܐ ܐܰܘ ܟܘܠ ܦܷܠܝܡ ܕܷܡܦܰܪܰܔ. ܛܪܐ ܠܐ ܛܳܪܶܐ ܕܢܳܫܐ ܦܳܬܰܚ ܐܰܕ ܕܰܦܰܝܕ݂ܶܗ ܐܰܘ ܥܳܒܰܪ ܠܰܚܫܳܘܰܝܕ݂ܶܗ. ܟܳܘܶܐ ܕܡܷܚܟܰܡ ܐܰܘ ܡܝܔܰܙܶܐ ܡܶܐ ܟܘܠ ܡܶܕܶܐ ܕܦܳܪܰܣ ܒܘ ܐܝܢܬܶܪܢܶܬ ܐܰܘ ܒܘ ܦܰܝܣܒܘܟ. ܥܰܠ ܗܰܬ݂ܶܐ ܟܳܠܳܙܰܡ ܐܰܩ ܩܠܝܕ݂ܶܐ ܕܰܚܫܳܘܰܝܕ݂ܶܗ ܗܳܘܷܢ ܐܰܥܡܶܗ ܒܰܠܚܘܕ݂ܶܗ. ܟ݂ܰܒܪܶܐ، ܨܷܪܬܳܬ݂ܶܐ ܐܰܘ ܟܬ݂ܰܘܝܳܬ݂ܶܐ ܕܟܳܡܰܕ݂ܝܪܝ ܐܰܘ ܕܟܳܡܰܩܰܚܪܝ ܛܪܐ ܠܐ ܦܳܪܰܣ ܒܘ ܦܰܝܣܒܘܟ ܐܰܘ ܒܘ ܐܝܢܣܬܰܓܪܰܡ ܕܠܐ ܒܷܬ݂ܷܪ ܡܰܕ݂ܝܪܝܠܶܗ ܘܚܷܟܡܝܠܶܗ. ܐܰܢ ܢܳܫܶܐ ܕܠܐ ܟܳܐܕ݂ܰܥܥܶܗ، ܛܪܐ ܠܐ ܗܳܘܶܐ ܚܰܘܪܐ ܐܰܥܡܰܝـܝܶܗ ܘܐܳܡܰܪܪܶܗ ܐܰܪ ܪܳܙܶܐ ܕܠܶܒܶܗ. ܟܘܠ ܚܰܐ ܕܗܳܘܶܐ ܚܰܘܪܐ ܐܰܥܡܶܗ ܒܘ ܦܰܝܣܒܘܟ ܣܬܶܐ، ܠܐ ܟܳܠܳܙܰܡ ܕܷܐܙܙܶܗ ܝܳܬܰܘ ܐܰܥܡܶܗ ܐܰܘ ܚܳܙܶܠܶܗ. ܥܰܠ ܕܓ݂ܰܠܰܒܶܐ ܢܳܫܶܐ ܟܳܡܷܣܬܰܥܡܠܝ ܒܘ ܦ݁ܪܳܦܝܠܰܬ݂ܬ݂ܶܗ ܨܷܪܬܐ ܐܰܘ ܐܷܫܡܐ ܦܪܝܫܐ ܡܶܐ ܕܪܘܚܰܝـܝܶܗ ܠܰܫܰܢ ܕܰܢ ܢܳܫܶܐ ܠܷܐܕ݂ܥܷܢܢܶܗ. ܘܗܰܘܟܐ ܟܳܡܰܛܥܷܢ ܐܰܢ ܢܳܫܶܐ ܘܟܳܡܰܢܦܠܷܢܢܶܗ ܒܕܰܪܒܳܢܶܐ ܠܐ ܛܳܘܶܐ. ܒܝ ܚܰܪܰܝܬܐ ܕܟܘܠ ܡܶܕܶܐ، ܟܳܠܳܙܰܡ ܕܘ ܥܠܰܝܡܐ ܒܕܷܩܩܰܐ ܡܷܣܬܰܥܡܰܠ ܐܘ ܐܝܢܬܶܪܢܶܬ ܘܠܐ ܗܳܘܶܠܶܗ ܓܪܶܥܐ. ܐܶܠܐ ܕܣܳܝܰܡ ܐܘ ܐܝܢܬܶܪܢܶܬ ܓܪܶܥܐ ܠܪܘܚܶܗ ܘܠܟܘܠ ܫܘܓ݂ܠܐ ܕܟܷܬܠܶܗ. ܡܠܦܢܐ ܫܟܪܝ ܐܩܛܫ 1598 ܡ̈ܠܐ.