Šëkri Aqtaš: ܥܰܠ ܐܘ ܙܘܘܳܓ݂ܐ (ܓܘܳܪܐ) ܒܝ ܥܝܬܐ ܣܘܪܝܳܝܬܐ / Cal u zuwoġo (gworo) bi Cito Suryayto

Cal u zuwoġo (gworo) bi Cito Suryayto

ܐ: ܥܰܠ ܐܘ ܙܘܘܳܓ݂ܐ ܘܥܰܠ ܐܝ ܒܬ݂ܘܠܘܬ݂ܐ. ܗܷܢ ܡܰܢ ܢܳܫܶܐ ܟܳܚܘܫܘܝ ܕܐܘ ܙܘܘܳܓ݂ܐ ܥܠܶܬܷܪ ܡܝ ܒܬ݂ܘܠܘܬ݂ܐ ܝܐ. ܘܟܷܐܡܡܝ ܗܰܘܟ݂ܰܐ؛ ܥܰܠ ܐܘ ܙܘܘܳܓ݂ܐ ܟܝܬܐ ܦܘܩܕܳܢܐ ܡܶܐ ܐܰܠܳܗܐ. ܘܟܳܐܡܰܪ؛ ܡܰܡܛܶܘܘ ܦܝܪܶܐ ܘܡܠܰܘܘ ܐܝ ܐܰܪܥܐ. ܥܰܠ ܐܝ ܒܬ݂ܘܠܘܬ݂ܐ ܣܬܶܐ، ܠܰܝܬܐ ܦܘܩܕܳܢܐ ܡܶܐ ܐܰܠܳܗܐ ܟ݂ܘܕ ܟܳܐܡܰܪ ܦܰܘܠܳܘܣ ܐܘ ܫܠܝܚܐ ܒܝ ܐܶܓܰܪܬ݂ܰܝܕ݂ܶܗ ܕܠܰܩ ܩܘܪܝܢܬܳܝܶܐ. ܥܰܠ ܐܝ ܒܬ݂ܘܠܘܬ݂ܐ، ܦܘܩܕܳܢܐ ܡܶܐ ܐܰܠܳܗܐ ܠܐ ܐܰܬ݂ܝ ܠܝ. ܐܶܠܐ ܫܝܪܰܐ ܟܳܡܰܫܷܪܢܐ ܐܰܥܠܰܝܟ݂ܘ. ܠܓܳܪܰܢ ܕܘ ܦܬܰܟܰܪ ܕܰܐܢ ܐܰܒܳܗܳܬ݂ܶܐ ܕܝ ܥܝܬܐ ܣܬܶܐ، ܐܘ ܫܪܳܪܐ ܗܰܢܐ ܝܐ، ܐܝ ܒܬ݂ܘܠܘܬ݂ܐ ܫܪܝܪܬܐ، ܥܠܶܬܷܪ ܡܘ ܙܘܘܳܓ݂ܐ ܝܐ. ܠܝ ܒܬ݂ܘܠܘܬ݂ܐ ܟܳܠܳܙܰܡܠܰܗ ܚܰܝܶܐ ܪܘܚܳܢܳܝܶܐ ܘܩܛܝܥܶܐ ܡܘ ܥܳܠܡܐ ܘܡܰܒ ܒܘܣܳܡܰܝܕ݂ܰܗ ܟܘܠܠܶܗ. ܐܰܢ ܐܰܒܳܗܳܬ݂ܶܐ ܟܳܡܫܰܒܗܝ ܐܝ ܒܬ݂ܘܠܘܬ݂ܐ ܫܰܪܝܪܬܐ ܒܷܐܫܡܳܢܶܐ ܓ݂ܰܠܰܒܶܐ ܫܰܦܝܪܶܐ، ܡܰܬ݂ܠܐ ܟܷܐܡܡܝ؛ ܐܝ ܒܬ݂ܘܠܘܬ݂ܐ ܫܪܝܪܬܐ، ܟܷܬܠܰܗ ܚܰܝܶܐ ܫܰܦܝܪܶܐ. ܪܝܫܐ ܥܶܠܳܝܐ. ܐܘ ܛܰܥܢܰܝܕ݂ܰܗ ܟ݂ܰܐܝܦܐ ܝܐ. ܢܰܗܷܪܬܐ ܝܐ. ܥܠܶܬܷܪ ܡܘ ܗܰܘܢܐ ܢܳܫܳܝܐ ܝܐ. ܪܰܚܘܩܬܐ ܡܰܫ ܫܰܗܘܰܬ ܕܘ ܦܰܓ݂ܪܐ ܝܐ. ܠܷܓܡܷܦܠܳܓ݂ܐ ܠܷܬܪܶܐ ܡܰܠܟܶܐ ܐܶܠܐ ܠܚܰܐ ܡܰܠܟܐ ܕܟܷܬܝܐ ܐܘ ܡܰܠܟܐ ܫܡܰܝܳܢܐ. ܡܝܕ݂ܶܗ ܕܟܷܬܝܐ ܐܝ ܒܬ݂ܘܠܘܬ݂ܐ ܗܰܩܩܰܐ ܡܝܰܬܪܘܬ݂ܐ ܥܶܠܰܝܬܐ، ܟܘܠ ܢܳܫܐ ܠܐ ܟܳܩܳܕܰܪ ܕܷܡܩܰܝܙܰܢܠܰܗ. ܢܳܩܘܨܶܢܶܐ ܐܰܝܢܰܐ ܕܟܳܦܰܝܫܝ ܒܬ݂ܘܠܶܐ ܒܘ ܥܳܠܡܐ. ܟܳܩܳܪܝܢܰܐ ܒܐܘܡܓܰܠܝܘܢ ܕܡܳܪܰܢ ܝܶܫܘܥ ܡܫܝܚܐ ܡܷܪܠܶܗ ܠܰܦܪܝܫܶܐ ܕܟܳܡܔܰܪܒܝܠܶܗ، ܐܝܢܰܩܠܰܐ ܕܟܳܡܰܚܘܰܠܠܶܗ ܐܝ ܥܰܣܩܘܬ݂ܐ ܕܘ ܦܪܳܫܐ ܕܝ ܐܰܬ݂ܬܐ ܡܘ ܓܰܘܪܰܝܕ݂ܰܗ. ܐܰܠܳܗܐ ܕܷܟ݂ܠܷܩܠܶܗ ܐܘ ܐܝܢܣܰܢ، ܡܶܐ ܩܰܡܰܝܬܐ ܓܰܘܪܐ ܘܰܐܬܬ݂ܐ ܟ݂ܠܝܩܝܠܶܗ. ܘܡܷܪܠܶܗ؛ ܥܰܠ ܗܰܬ݂ܶܐ ܛܪܐ ܐܘ ܓܰܘܪܐ ܛܳܪܶܐ ܐܘ ܒܰܒܐ ܘܐܝ ܐܶܡܐ، ܘܡܳܛܶܐ ܠܝ ܐܰܬܬ݂ܰܝܕ݂ܶܗ. ܘܰܐܬܪܶܐ ܛܪܳܘܷܢ ܚܰܐ ܔܶܣܶܬ. ܠܐ ܟܳܦܰܝܫܝ ܬܪܶܐ، ܐܶܠܐ ܟܳܘܷܢ ܚܰܐ ܦܰܓ݂ܪܐ. ܐܘ ܡܶܕܶܐ ܕܰܐܠܳܗܐ ܟ݂ܠܷܛܠܶܗ، ܐܘ ܒܰܪܢܳܫܐ ܛܪܐ ܠܐ ܦܳܪܰܫܠܶܗ. ܐܝܢܰܩܠܰܐ ܕܫܰܡܝܥܝ ܐܰܬ ܬܰܠܡܝܕ݂ܶܐ ܐܘ ܟ݂ܰܒܪܰܢܐ ܕܡܷܪܠܶܗ ܡܫܝܚܐ، ܡܷܪܪܶܗ؛ ܐܝܢܰܩܠܰܐ ܕܟܝܬܐ ܚܛܝܬ݂ܐ ܒܰܝܢ ܕܘ ܓܰܒܪܐ ܠܝ ܐܰܬܬ݂ܐ، ܐܝܢܰܩܠܰܝܐ ܠܷܓܠܳܙܰܡ ܕܓܰܘܪܝܢܰܐ. ܝܰܢܝ ܗܰܟܟܰܐ ܗܰܘܟ݂ܰܐ ܥܰܣܩܳܝܐ ܐܘ ܦܪܳܫܐ ܕܡܝ ܐܰܬܬ݂ܐ، ܐܝܢܰܩܠܰܝܐ ܠܡܷܢ ܓܷܕܓܰܘܪܝܢܰܐ ܐܰܥܡܰܗ. ܒܘ ܫܷܟܠܰܢܐ ܟܳܚܳܙܝܢܰܐ، ܕܒܰܟܬ݂ܳܘܶܐ ܪܘܚܳܢܳܝܶܐ ܣܬܶܐ ܟܝܬܐ ܡܰܬ݂ܠܶܐ ܓ݂ܰܠܰܒܶܐ ܥܰܠ ܐܝ ܥܰܣܩܘܬ݂ܐ ܕܝ ܒܬ݂ܘܠܘܬ݂ܐ. ܐܶܠܐ ܡܫܝܚܐ ܡܷܪܠܶܗ؛ ܡܰܢ ܕܷܡܣܰܝܒܰܪ ܘܕܷܡܬܰܚܡܰܠ ܗܘܠ ܠܝ ܚܰܪܰܝܬܐ، ܗܰܘܐ ܓܷܕܟ݂ܳܠܰܨ. ܐܘܥܕܐ ܓܩܳܪܝܢܰܐ ܥܰܠ ܐܘ ܙܘܘܳܓ݂ܐ ܢܳܡܘܣܳܝܐ ܝܰܢܝ ܕܟܷܬܝܐ ܠܓܳܪܰܢ ܕܰܩ ܩܳܢܘܢܶܐ ܕܝ ܥܝܬܐ. ܒ: ܐܝ ܐܳܠܨܳܝܘܬ݂ܐ ܕܘ ܙܘܘܳܓ݂ܐ ܩܳܢܘܢܳܝܐ ܐܘ ܣܰܝܳܡܐ ܕܰܩ ܩܳܢܘܢܶܐ ܡܘܫܶܐ ܐܘ ܢܒܺܝܐ، ܟܳܐܡܰܪ؛ ܐܘ ܙܘܘܳܓ݂ܐ ܟ݂ܘܕ ܒܘܪܟܬ݂ܐ ܗܝܘ ܡܶܐ ܐܰܠܳܗܐ ܠܰܢ ܢܳܫܶܐ. ܐܰܠܳܗܐ ܟ݂ܠܷܩܠܶܗ ܠܳܐܕ݂ܳܡ ܒܝ ܨܷܪܬܰܝܕ݂ܶܗ. ܘܒܘ ܫܷܟܷܠ ܕܰܐܠܳܗܐ ܟ݂ܠܷܩܠܶܗ. ܟ݂ܠܝܩܝܠܶܗ ܣܬܶܐ ܓܰܘܪܐ ܘܰܐܬܬ݂ܐ. ܒܷܬ݂ܷܪܟܶܐ ܐܰܠܳܗܐ ܫܘܒܚܐ ܠܷܐܫܡܶܗ ܡܒܰܪܰܟ݂ܠܶܗ ܐܳܕ݂ܳܡ ܘܚܰܘܐ ܘܡܷܪܠܰܠܶܗ؛ ܡܰܡܛܶܘܘ ܦܝܪܶܐ ܝܰܢܝ ܢܰܥܝܡܶܐ ܘܡܠܰܘܘ ܐܝ ܐܰܪܥܐ. ܒܷܬ݂ܷܪ ܡܶܐ ܕܳܐܕ݂ܷܡ ܘܚܰܘܐ ܬܘܷܪܪܶܗ ܐܘ ܦܘܩܕܳܢܰܝܕ݂ܶܗ ܣܬܶܐ، ܠܰܫܰܢ ܕܰܐܠܳܗܐ ܠܐ ܡܒܰܛܠ ܐܝ ܒܘܪܟܬ݂ܰܬ݂ܶܐ، ܠܷܛܠܶܗ ܠܝ ܐܰܪܥܐ ܘܠܐ ܠܷܛܠܶܗ ܗܷܢܢܷܟ. ܫܠܶܝܡܘܢ ܐܘ ܚܰܟܝܡܐ ܣܬܶܐ ܟܳܐܡܰܪ ܥܰܠ ܐܘ ܪܳܙܰܢܐ؛ ܡܘ ܓܰܒܐ ܕܰܐܠܳܗܐ ܟܘܝܐ ܐܝ ܐܰܬܬ݂ܐ ܠܘ ܓܰܘܪܰܝܕ݂ܰܗ. ܦܰܘܠܳܘܣ ܐܘ ܫܠܝܚܐ ܣܬܶܐ ܕܟܷܬܘܰܝܠܶܗ ܗܰܘܢܐ ܡܫܝܚܳܝܐ ܒܟܘܠ ܡܶܕܶܐ ܕܳܐܡܰܪܘܰܐ، ܡܳܪܰܘܠܶܗ ܐܘ ܪܳܙܰܢܐ ܐܝܢܰܩܠܰܐ ܕܟܳܐܡܰܪ؛ ܐܘ ܪܳܙܰܢܐ ܪܰܒܐ ܝܐ. ܐܳܢܐ ܟܳܐܡܰܢܢܐ ܥܰܠ ܡܫܝܚܐ ܘܥܰܠ ܐܝ ܥܝܬܰܝܕ݂ܶܗ. ܐܶܠܐ ܗܰܬܘ ܟܳܠܳܙܰܡ ܕܟܘܠ ܚܰܐ ܡܷܢܟ݂ܘ ܪܳܚܰܡ ܐܝ ܐܰܬܬ݂ܰܝܕ݂ܶܗ ܟ݂ܘܕ ܪܘܚܶܗ. ܟ݂ܘܕ ܡܫܝܚܐ ܪܚܷܡܠܶܗ ܐܝ ܥܝܬܐ ܘܡܰܨܠܰܘܠܶܗ ܪܘܚܶܗ ܐܰܥܠܰܗ ܠܰܫܰܢ ܕܷܡܩܰܕܰܫ ܘܕܡܰܢܕ݂ܰܦܠܰܗ. ܡܳܪܝ ܝܰܥܩܘܒ ܐܘ ܡܰܠܦܳܢܐ ܒܚܰܐ ܡܰܡ ܡܝܡܪܰܝܕ݂ܶܗ ܕܥܰܠ ܐܘ ܙܘܘܳܓ݂ܐ ܗܰܘܟ݂ܰܐ ܟܳܐܡܰܪ؛ ܐܘ ܙܘܘܳܓ݂ܐ ܪܚܝܡܐ ܝܐ. ܘܡܶܐ ܐܰܠܳܗܐ ܝܐ. ܐܝ ܬܰܫܘܝܬ݂ܐ ܕܰܡܙܰܘܓ݂ܶܐ ܢܰܕ݂ܷܦܬܐ ܝܐ ܘܫܰܦܷܪܬܐ ܝܐ. ܕܰܪܒܐ ܪܰܒܐ ܘܢܰܕ݂ܝܦܐ ܝܐ ܘܠܰܝܬ ܬܘܩܰܠܬ݂ܐ ܐܶܒܶܗ. ܐܰܟ ܟܝܢܶܐ ܘܰܐܙ ܙܰܕܝܩܶܐ ܣܬܶܐ ܒܰܫ ܫܘܦܪܰܬ݂ܬ݂ܶܗ ܟܳܡܰܠܟ݂ܝ ܒܘ ܕܰܪܒܰܐ ܢܐ. ܒܝ ܩܰܡܰܝܬܐ ܐܳܕ݂ܳܡ ܘܚܰܘܐ ܡܰܠܰܟ݂ܟ݂ܶܗ ܐܶܒܶܗ. ܒܷܬ݂ܷܪ ܡܷܢܢܶܗ ܫܝܬ݂ ܐܘ ܫܰܦܝܪܐ. ܘܰܐܢܘܫ ܘܚܢܘܟ݂ ܘܢܘܚ ܘܰܐܒܪܳܗܳܡ ܘܐܝܣܚܳܩ ܘܝܰܥܩܘܒ. ܒܷܬ݂ܪܶܗ ܚܕ݂ܳܕ݂ܶܐ ܡܰܠܰܟ݂ܟ݂ܶܗ ܒܘ ܕܰܪܒܰܐ ܢܐ ܕܟܷܬܝܐ ܡܰܠܝܐ ܫܘܦܪܶܐ. ܡܰܢ ܓܡܰܔܪܶܐ ܥܳܔܰܩ ܐܰܘ ܡܰܚܪܰܘ ܐܘ ܕܰܪܒܰܐ ܢܐ ܕܟܷܬܝܐ ܡܰܠܝܐ ܚܘܒܐ ܘܒܘܪܟܬ݂ܐ. ܓ: ܐܝ ܦܰܝܕܰܐ ܕܘ ܓܘܳܪܐ ܠܓܳܪܰܢ ܕܰܐܢ ܐܰܒܳܗܳܬ݂ܐ ܕܝ ܥܝܬܐ، ܚܰܡܷܫ ܦܰܝܕܰܬ ܟܝܬܐ ܒܘ ܓܘܳܪܐ ܩܳܢܘܢܳܝܐ. ܐܝ ܦܰܝܕܰܐ ܩܰܡܰܝܬܐ؛ ܐܰܢ ܢܰܥܝܡܶܐ ܢܶܐ. ܐܘ ܢܝܫܐ ܩܰܡܳܝܐ ܒܘ ܙܘܘܳܓ݂ܐ ܟܳܠܳܙܰܡ ܕܗܳܘܶܐ ܐܘ ܬܷܡܛܝܝܐ ܕܰܢ ܢܰܥܝܡܶܐ. ܟ݂ܘܕ ܡܷܪܠܰܢ ܡܶܐ ܠܰܠܥܰܠ، ܐܰܠܳܗܐ ܒܝ ܩܰܡܰܝܬܐ ܡܷܪܠܶܗ ܠܳܐܕ݂ܳܡ ܘܠܚܰܘܐ؛ ܣܘܡܘ ܦܝܪܶܐ (ܢܰܥܝܡܶܐ) ܘܡܠܰܘܘ ܐܝ ܐܰܪܥܐ ܟܘܠܰܗ. ܐܘ ܢܶܨܚܳܢܐ ܘܐܘ ܐܝܩܳܪܐ ܕܟܳܡܩܰܝܙܢܝ ܐܰܢ ܐܰܒܳܗܶܐ ܒܰܢ ܢܰܥܝܡܶܐ، ܪܰܒܐ ܝܐ. ܐܘ ܢܰܥܝܡܐ ܣܬܶܐ ܡܷܕ ܕܟܳܡܝܬܰܘܠܰܕ݂ ܐܰܪܒܥܐ ܢܝܫܶܐ ܟܷܬܠܶܗ. ܐ: ܟܳܡܟܰܡܰܠ ܐܘ ܦܘܩܕܳܢܐ ܕܰܐܠܳܗܐ ܕܡܷܪܠܶܗ ܡܰܡܛܶܘܘ ܢܰܥܝܡܶܐ. ܒ: ܕܡܰܚܬܝ ܥܰܝܢܐ ܥܰܠ ܐܰܢ ܐܰܒܳܗܶܐ ܩܰܡܳܝܶܐ ܕܡܰܡܛܰܠܠܶܗ ܢܰܥܝܡܶܐ ܟ݂ܘܕ ܐܰܒܪܳܗܳܡ ܘܐܝܣܚܳܩ ܘܝܰܥܩܘܒ. ܓ: ܐܝ ܦܨܝܚܘܬ݂ܐ ܕܟܳܘܶܐ ܠܰܢ ܐܰܒܳܗܶܐ ܒܘ ܡܰܘܠܳܕ݂ܐ ܕܰܢ ܢܰܥܝܡܶܐ، ܕܝܠܳܢܳܐܝܬ݂ ܐܝܢܰܩܠܰܐ ܕܗܳܘܷܢ ܛܳܘܶܐ ܘܡܷܫܬܰܡܥܳܢܶܐ. ܕ: ܒܷܬ݂ܷܪ ܡܘ ܡܰܘܬܐ ܕܰܢ ܐܰܒܳܗܶܐ ܕܦܰܝܫܝ ܒܷܬ݂ܪܰܝܝܶܗ ܐܰܒܢܶܐ ܡܗܰܝܡܢܶܐ ܘܕܷܡܨܰܠܷܢ ܡܷܚܠܳܦܰܝܝܶܗ ܠܰܐܠܳܗܐ. ܐܝ ܦܰܝܕܰܐ ܕܰܬ ܬܰܪܬܶܐ. ܕܝܳܫܐ ܕܥܰܠ ܐܝ ܪܶܓܬ݂ܐ ܒܝܫܬܐ ܕܘ ܦܰܓ݂ܪܐ. ܘܢܛܳܪܐ ܕܡܝ ܦܰܚܙܘܬ݂ܐ. ܦܰܘܠܳܘܣ ܐܘ ܫܠܝܚܐ ܥܰܠ ܗܰܬ݂ܶܐ ܟܳܡܰܘܨܶܐ ܠܰܡܙܰܘܓ݂ܶܐ ܘܟܳܐܡܰܪ؛ ܠܐ ܩܘܛܥܘܬܘ ܚܰܐ ܠܘ ܚܪܶܢܐ. ܘܛܪܐ ܐܘ ܫܝܕ݂ܐ ܠܐ ܡܔܰܪܰܒܟ݂ܘ ܥܰܠ ܐܝ ܪܰܝܰܓܰܐ ܕܘ ܦܰܓ݂ܪܰܬ݂ܟ݂ܘ. ܡܷܚܠܰܦ ܕܝܘܩܕ݂ܘܬܘ ܒܝ ܪܰܝܰܓܰܐ، ܡܘܕܘ ܐܰܬܬ݂ܐ ܘܡܝܙܰܘܶܓ݂ܘ ܛܰܘܬܷܪܝܐ. ܒܰܪ ܐܰܣܝܪܐ ܐܘ ܚܰܟܝܡܐ ܣܬܶܐ ܟܳܐܡܰܪ؛ ܐܘ ܟܰܪܡܐ ܕܠܰܬܠܶܗ ܫܘܪܐ ܕܢܳܛܰܪܠܶܗ، ܓܚܳܪܰܘ ܘܓܡܷܩܫܰܥ. ܐܘ ܒܰܝܬܐ ܣܬܶܐ ܕܠܰܝܬ ܐܶܒܶܗ ܐܰܬܬ݂ܐ ܚܰܪܝܘܐ ܝܐ. ܐܝ ܦܰܝܕܰܐ ܕܰܬܠܰܬ݂. ܐܘ ܗܰܘܢܐ ܬ݂ܢܝـܚܳـܝܐ ܕܟܳܘܶܠܶܗ ܐܘ ܒܰܪܢܳܫܐ. ܐܝܢܰܩܠܰܐ ܕܠܳܘܶܐ ܓܰܘܝܪܐ، ܟܳܠܳܙܰܡ ܕܟܘܠ ܢܰܩܩܰܐ ܡܩܰܬܰܠ ܘܡܔܰܕܰܠ ܥܰܡ ܐܰܦ ܦܷܟܪܰܬ ܕܘ ܫܝܕ݂ܐ. ܐܝܢܰܩܠܰܐ ܕܷܡܩܰܬܰܠ ܥܰܡ ܐܘ ܫܝܕ݂ܐ، ܠܐ ܟܳܘܶܠܶܗ ܙܰܒܢܐ ܕܷܡܨܰܠܶܐ ܘܕܨܳܝܰܡ ܐܘ ܕܩܳܪܶܐ ܟܬ݂ܳܘܶܐ. ܐܝ ܦܰܝܕܰܐ ܕܰܢ ܐܰܪܒܰܥ. ܐܝܢܰܩܠܰܐ ܕܝ ܐܰܬܬ݂ܐ ܛܰܘܬܐ ܕܷܡܕܰܒܪܐ ܐܘ ܒܰܝܬܐ، ܐܘ ܓܰܘܪܰܝܕ݂ܰܗ ܟܳܘܶܐ ܬ݂ܢܝـܚܳـܝܐ ܘܦܨܝـܚܳـܝܐ. ܟ݂ܘܕ ܡܷܪܠܶܗ ܐܘ ܚܰܟܝܡܐ؛ ܕܩܰܐܝܡܐ ܐܝ ܐܰܬܬ݂ܐ ܒܠܰܠܝܐ، ܘܡܳܟܶܠܰܗ ܠܰܢ ܐܰܒܢܰܝܕ݂ܰܗ. ܘܗܰܘܝܐ ܡܳܪܐ ܠܰܒܢܳܬ݂ܰܝܕ݂ܰܗ. ܐܝ ܦܰܝܕܰܐ ܕܰܚ ܚܰܡܷܫ. ܒܟܘܠ ܡܶܕܶܐ ܕܟܳܡܣܰܝܒܰܪ ܐܘ ܓܰܘܪܐ ܡܩܰܒܷܠ ܕܰܙ ܙܰܘܥܶܐ ܘܕܰܡ ܡܶܕܳܢܶܐ ܕܟܳܛܷܠܒܐ ܐܝ ܐܰܬܬ݂ܰܝܕ݂ܶܗ، ܟܳܡܩܰܝܙܰܢ ܢܶܨܚܳܢܐ ܘܛܰܝܒܘܬ݂ܐ. ܐܝ ܐܰܬܬ݂ܐ ܛܰܘܬܐ ܘܡܗܰܝܡܰܢܬܐ، ܟܳܡܰܟ݂ܝܦܐ ܐܘ ܛܰܥܢܐ ܕܘ ܓܰܘܪܰܝܕ݂ܰܗ. ܡܰܘܟ݂ܰܐ ܐܝ ܟܝܢܘܬ݂ܐ ܘܐܝ ܡܣܰܝܒܪܳܢܘܬ݂ܐ ܕܘ ܓܰܘܪܐ ܣܬܶܐ ܥܰܡ ܐܝ ܐܰܬܬ݂ܐ ܟܳܡܝܕ݂ܳܥܐ. ܕ: ܐܝ ܟ݂ܣܰܪܰܐ ܕܘ ܓܘܳܪܐ ܒܷܬܠܳܬ݂ܐ ܡܶܕܳܢܶܐ ܟܳܟ݂ܳܣܰܪ ܐܘܚܰܐ ܕܓܳܘܰܪ. ܐ: ܐܝ ܟ݂ܣܰܪܰܐ ܩܰܡܰܝܬܐ، ܐܘ ܓܰܘܪܐ ܕܟܷܬܝܐ ܓܰܘܝܪܐ ܘܟܷܬܠܶܗ ܐܰܒܢܶܐ، ܐܝܢܰܩܠܰܐ ܕܠܐ ܩܳܕܰܪ ܗܳܘܰܠܠܶܗ ܡܳܪܐ ܘܡܟܰܡܰܠ ܐܘ ܡܶܕܶܐ ܕܟܳܡܷܣܢܳܩܝܠܶܗ، ܒܰܠܟܝ ܓܳܢܰܘ ܘܡܰܢܗܰܒ ܢܳܫܶܐ. ܐܝ ܚܛܝܬ݂ܐ ܘܐܝ ܟ݂ܣܰܪܰܐ ܕܘ ܓܢܳܘܐ ܪܰܒܬ݂ܐ ܝܐ. ܐܝܢܰܩܠܰܐ ܕܓܳܢܰܘ ܟܳܟ݂ܳܣܰܪ ܗܰܡ ܢܰܦܫܳܢܳܐܝܬ݂ ܗܰܡ ܣܬܶܐ ܦܰܓ݂ܪܳܢܳܐܝܬ݂. ܒ. ܐܝ ܟ݂ܣܰܪܰܐ ܕܰܬ ܬܰܪܬܶܐ، ܐܝܢܰܩܠܰܐ ܕܠܐ ܡܣܰܝܒܰܪ ܘܡܬܰܚܡܰܠ ܐܝ ܛܰܒܝܥܰܐ ܕܐܝ ܐܰܬܬ݂ܐ ܣܬܶܐ ܓܟ݂ܳܣܰܪ. ܟܘܠܢܰܩܩܰܐ ܓܷܕܟܳܪܰܟ ܥܰܠ ܦܷܪܣܰܐ ܐܰܘ ܚܷܔܔܰܐ ܠܰܫܰܢ ܕܡܰܪܦܶܠܰܗ ܘܕܟ݂ܳܠܰܨ ܡܝܢܰܗ. ܐܝܢܰܩܠܰܐ ܕܠܐ ܚܳܙܶܐ ܦܷܪܣܰܐ ܣܬܶܐ ܒܰܠܟܝ ܥܳܪܰܩ ܡܘ ܒܰܝܬܐ ܐܰܘ ܕܣܳܝܰܡ ܡܶܕܶܐ ܡܰܕ݂ܝܪܳܢܐ ܒܪܘܚܶܗ. ܓ. ܐܝ ܟ݂ܣܰܪܰܐ ܕܰܬܠܰܬ݂، ܐܝܢܰܩܠܰܐ ܕܡܷܩܪܐ ܐܘ ܛܰܥܢܰܝܕ݂ܶܗ ܘܠܐ ܡܥܰܘܢܳܠܶܗ، ܓܷܕܪܳܚܰܩ ܡܘ ܫܘܓ݂ܠܐ ܪܘܚܳܢܳܝܐ. ܥܰܠ ܗܰܬ݂ܶܐ ܡܷܪܠܶܗ ܝܶܫܘܥ ܡܫܝܚܐ، ܡܰܢ ܕܳܐܬ݂ܶܐ ܓܰܒܝ، ܘܕܠܐ ܡܥܰܢܰܬ ܡܘ ܒܰܒܐ ܘܡܝ ܐܶܡܐ ܘܡܰܢ ܐܰܚܘܢܳܢܶܗ ܘܡܰܢ ܐܰܚܘܳܬ݂ܶܗ ܘܡܝ ܐܰܬܬ݂ܐ ܘܡܰܢ ܢܰܥܝܡܰܝܕ݂ܶܗ ܘܡܶܐ ܪܘܚܶܗ، ܠܐ ܟܳܩܳܕܰܪ ܗܳܘܶܠܝ ܬܰܠܡܝܕ݂ܐ. ܟܘܠ ܢܳܫܐ ܠܐ ܟܳܩܳܕܰܪ ܕܡܳܛܶܐ ܠܘ ܕܰܪܓܐ ܕܰܟ ܟܝܢܶܐ ܘܕܰܙ ܙܰܕܝܩܶܐ ܕܟܷܬܘܰܝܢܶܐ ܓܰܘܝܪܶܐ. ܦܰܘܠܳܘܣ ܐܘ ܫܠܝܚܐ ܟܳܐܡܰܪ؛ ܐܳܒܰܥܘܰܝܢܐ ܕܟܘܠ ܢܳܫܐ ܕܗܳܘܶܐ ܟ݂ܳܐܬ݂ܝ، ܐܶܠܐ ܡܰܢ ܕܠܐ ܡܣܰܝܒܰܪ ܘܕܟܳܒܰܥ ܓܳܘܰܪ، ܛܪܐ ܓܳܘܰܪ. ܐܝܕ݂ܰܐ ܕܰܐܓ ܓܰܘܪܶܐ ܒܝ ܟܝܢܘܬ݂ܐ ܕܥܰܝܫܝ ܥܰܡ ܐܰܢ ܢܝܫܰܬ݂ܬ݂ܶܗ، ܘܕܷܡܬܰܚܡܠܝ ܐܘ ܟܝܳܢܰܬ݂ܬ݂ܶܗ، ܘܗܰܘܢܰܝܝܶܗ ܕܠܐ ܡܷܫܓ݂ܰܫ ܥܰܡ ܐܰܩ ܩܰܛܪܰܬ݂ܬ݂ܶܗ، ܓܷܕܥܰܝܫܝ ܚܰܝܶܐ ܒܰܣܝܡܶܐ ܒܘ ܙܘܘܳܓ݂ܰܬ݂ܬ݂ܶܗ. ܗ: ܐܰܡ ܡܝܰܬܪܳܬ݂ܐ ܕܟܳܠܳܙܰܡ ܕܗܳܘܷܢ ܒܝ ܢܟ݂ܝܪܰܝܬܐ. ܥܣܰܪ ܕܝܠܳܝܳܬ݂ܶܐ ܟܳܠܳܙܰܡ ܕܗܳܘܷܢ ܒܝ ܢܟ݂ܝܪܰܝܬܐ ܡܶܩܷܡ ܕܡܷܛܠܳܒܐ. ܐܰܕ ܕܝܠܳܝܳܬ݂ܰܢܝ ܟܳܡܰܥܠܷܢ ܪܝܫܶܗ ܕܘ ܢܟ݂ܝܪܳܝܰܝܕ݂ܰܗ ܕܟܳܒܰܥ ܛܳܠܰܒܠܰܗ ܕܗܘܝܐ ܫܳܪܷܟܬܐ ܕܰܚ ܚܰܝܰܝܕ݂ܶܗ. ܐ܆ ܐܝ ܕܝܠܳܝܬܐ ܩܰܡܰܝܬܐ، ܟܳܠܳܙܰܡ ܕܗܳܘܶܐ ܒܠܶܒܰܗ ܙܘܥܬ݂ܐ ܕܰܐܠܳܗܐ ܘܕܗܳܘܶܠܰܗ ܐܳܙ̰ܕܰܢ ܢܰܕ݂ܝܦܐ. ܐܝ ܚܕ݂ܐ ܕܟܷܬܝܐ ܗܰܘܟ݂ܰܐ، ܟܳܡܝܬܰܘܡܰܪܠܰܗ ܐܰܬܬ݂ܐ ܛܰܘܬܐ. ܒܰܪ ܐܰܣܝܪܐ ܐܘ ܚܰܟܝܡܐ ܟܳܐܡܰܪ، ܛܘܒܐ ܠܘ ܓܰܘܪܐ ܕܟܷܬܠܶܗ ܐܰܬܬ݂ܐ ܛܰܘܬܐ، ܐܰܚ ܚܰܝܰܝܕ݂ܶܗ ܝܰܪܝܟ݂ܶܐ ܢܶܐ. ܐܝ ܐܰܬܬ݂ܐ ܒܝܫܬܐ ܣܬܶܐ، ܓܳܡܰܟܷܪܝܐ ܐܰܚ ܚܰܝܶܐ ܕܘ ܓܰܘܪܰܝܕ݂ܰܗ. ܒ܆ ܐܝ ܕܝܠܳܝܬܐ ܕܰܬ ܬܰܪܬܶܐ، ܟܳܠܳܙܰܡ ܕܗܘܝܐ ܡܢܰܟܦܳܢܝܬ݂ܐ ܘܡܰܟܝܟ݂ܬܐ. ܠܐ ܡܩܰܬܠܐ ܥܰܡ ܐܘ ܙܠܰܡܰܝܕ݂ܰܗ ܘܠܐ ܡܔܰܕܠܐ ܐܰܥܡܶܗ. ܓ܆ ܐܝ ܕܝܠܳܝܬܐ ܕܰܬܠܰܬ݂، ܕܠܐ ܗܘܝܐ ܚܒܰܢܳܢܝܬ݂ܐ ܘܟܰܣܘܠܬܐ. ܐܶܠܐ ܕܗܘܝܐ ܟܰܫܝܪܬܐ ܘܓ݂ܝܪܰܢܝ ܠܰܦ ܐܘ ܒܰܝܬܰܝܕ݂ܰܗ ܘܠܰܦ ܐܰܢ ܢܰܥܝܡܰܝܕ݂ܰܗ ܘܠܰܦ ܐܰܕ ܕܰܝܦܰܝܕ݂ܰܗ. ܐܝ ܐܰܬܬ݂ܐ ܟܰܫܝܪܬܐ، ܟܠܝܠܐ ܝܐ ܒܪܝܫܶܗ ܕܘ ܙܠܰܡܰܝܕ݂ܰܗ. ܫܠܶܡܘܢ ܐܘ ܚܰܟܝܡܐ ܟܳܐܡܰܪ؛ ܡܰܢ ܓܩܳܝܰܬ݂ܠܶܗ ܐܰܬܬ݂ܐ ܟܰܫܝܪܬܐ. ܐܝ ܐܰܬܬ݂ܐ ܟܰܫܝܪܬܐ ܝܰܩܘܪܬܘܪ ܡܰܡ ܡܰܪܓܳܢܝܳܬ݂ܐ ܝܐ ܕܠܰܬܬܶܗ ܙܘܳܢܐ. ܕ܆ ܐܝ ܕܝܠܳܝܬܐ ܕܰܐܢ ܐܰܪܒܰܥ، ܟܳܠܳܙܰܡ ܕܗܘܝܐ ܫܰܦܷܪܬܐ ܘܠܐ ܡܰܟܪܘܚ. ܐܝܕ݂ܰܐ ܕܠܘܝܐ ܫܰܦܷܪܬܐ ܒܥܰܝܢܶܗ ܕܘ ܢܟ݂ܝܪܳܝܰܝܕ݂ܰܗ، ܓܚܳܝܰܪ ܒܰܢ ܢܶܫܶܐ ܚܪܶܢܶܐ ܘܓܚܳܛܶܐ. ܐܘ ܫܘܦܪܐ ܣܬܶܐ، ܟܳܠܳܙܰܡ ܕܗܳܘܶܐ ܐܰܥܡܶܗ ܙܘܥܬ݂ܐ ܕܰܐܠܳܗܐ. ܒܘ ܫܷܟܷܠ ܕܟܳܡܰܢܗܪܐ ܐܝ ܫܷܡܫܐ ܡܝ ܫܡܰܝܐ ܠܝ ܐܰܪܥܐ ܟܘܠܰܗ، ܗܰܘܟ݂ܰܐ ܐܘ ܫܘܦܪܐ ܕܝ ܐܰܬܬ݂ܐ ܟܳܡܰܢܗܰܪ ܐܘ ܒܰܝܬܰܝܕ݂ܰܗ. ܐܶܠܐ ܟܳܠܳܙܰܡ، ܕܐܘ ܫܘܦܪܐ ܕܐܝ ܐܰܬܬ݂ܐ ܠܐ ܡܰܛܥܶܐ ܐܘ ܢܟ݂ܝܪܳܝܰܝܕ݂ܰܗ. ܥܰܠ ܕܐܘ ܫܘܦܪܰܝܕ݂ܰܗ ܐܘ ܒܰܪܳܝܐ، ܡܷܨܪܐ ܝܐ ܒܘ ܫܘܦܪܐ ܕܠܰܘܓ݂ܷܠ ܝܰܢܝ ܕܘ ܠܶܒܐ ܢܰܕ݂ܝܦܐ ܘܕܝ ܗܰܝܡܳܢܘܬ݂ܐ. ܗ܆ ܕܝܠܳܝܬܐ ܕܰܚ ܚܰܡܷܫ، ܕܠܐ ܡܰܛܥܢܐ ܛܰܥܢܶܐ ܝܰܩܘܪܶܐ ܘܕܠܐ ܛܷܠܒܐ ܡܶܕܳܢܶܐ ܙܳܝܘܕܶܐ ܡܘ ܢܟ݂ܝܪܳܝܰܝܕ݂ܰܗ. ܐܶܠܐ ܕܩܘܢܥܐ ܒܘ ܡܶܕܶܐ ܕܟܷܬܠܰܗ ܗܰܟܟܰܐ ܐܷܫܡܐ ܘܗܰܟܟܰܐ ܓ݂ܰܠܰܒܶܐ. ܐܘ ܚܰܟܝܡܐ ܟܳܐܡܰܪ؛ ܐܘ ܢܟ݂ܝܪܳܝܐ ܐܰܘ ܐܝ ܢܟ݂ܝܪܰܝܬܐ ܡܶܩܷܡ ܕܡܝܢܰܝܫܢܝ ܕܰܡܫܰܝܠܝ ܥܰܠ ܐܘ ܡܰܠ ܕܷܚܕ݂ܳܕ݂ܶܐ، ܟܳܡܷܚܫܳܘܝ ܓܰܢܳܘܶܐ. ܘ܆ ܕܝܠܳܝܬܐ ܕܰܫ ܫܶܬ݂܆ ܕܗܘܝܐ ܐܝ ܢܟ݂ܝܪܰܝܬܐ ܡܘ ܓܶܢܣܐ ܕܰܢ ܢܝܫܶܐ ܕܟܳܡܰܘܠܕ݂ܝ ܢܰܥܝܡܶܐ. ܥܰܡ ܐܘ ܡܰܘܠܳܕ݂ܐ ܕܰܢ ܢܰܥܝܡܶܐ، ܐܝ ܚܘܒܐ ܘܐܝ ܚܕ݂ܳܝܘܬ݂ܐ ܟܳܙܰܝܕܝ ܒܓܰܘܰܗ ܕܝ ܐܝܩܰܪܬ݂ܐ. ܙܙ܆ ܐܝ ܕܝܠܳܝܬܐ ܕܰܫܘܰܥ، ܒܬ݂ܘܠܘܬ݂ܐ، ܕܟܷܬܝܐ ܐܝ ܕܝܠܳܝܬܐ ܪܰܒܬ݂ܐ ܕܝ ܚܘܒܐ ܘܕܝ ܚܕ݂ܳܝܘܬ݂ܐ. ܐܝ ܐܰܬܬ݂ܐ ܕܓܰܘܝܪܐ ܡܶܐ ܡܶܩܷܡ، ܐܰܘ ܕܷܔܓ݂ܝܠܐ ܥܰܡ ܥܠܰܝܡܶܐ ܓ݂ܰܠܰܒܶܐ، ܘܰܠܰܘ ܕܓܷܢܘܐ ܟܘܠܡܶܕܶܐ ܕܟܷܬܠܶܗ ܐܘ ܙܠܰܡܰܝܕ݂ܰܗ ܣܬܶܐ، ܠܐ ܟܳܟܘܠܝܐ ܓܰܒܶܗ ܘܓܡܰܪܦܝܳܠܶܗ. ܚ܆ ܐܝ ܕܝܠܳܝܬܐ ܕܰܬܡܳܢܶܐ، ܕܗܘܝܐ ܐܝ ܢܟ݂ܝܪܰܝܬܐ ܡܶܐ ܓܶܢܣܐ ܘܡܶܐ ܐܝܩܰܪܬ݂ܐ ܡܳܪܶܐ ܕܢܶܨܚܳܢܐ ܘܕܐܝܩܳܪܐ. ܥܰܠ ܕܘ ܡܳܪܰܝܕ݂ܰܢ ܝܶܫܘܥ ܡܫܝܚܐ ܡܷܪܠܶܗ؛ ܐܘ ܐܝܠܳܢܐ ܛܳܘܐ، ܠܐ ܟܳܒܶܐ ܦܝܪܶܐ ܒܝܫܶܐ. ܘܠܐ ܐܘ ܒܝܫܐ ܟܳܒܶܐ ܦܝܪܶܐ ܛܳܘܶܐ. ܛ܆ ܕܝܠܳܝܬܐ ܕܰܫ̰ ܫ̰ܰܥ، ܕܠܐ ܗܘܝܐ ܡܘ ܐܰܗܷܠ ܐܰܘ ܡܰܩ ܩܰܪܝܘܳܢܶܐ. ܚܕ݂ܐ، ܠܰܫܰܢ ܕܗܳܘܷܢ ܐܰܢ ܢܘܟ݂ܪܳܝܶܐ ܣܬܶܐ ܐܰܗܷܠ ܘܩܰܪܝܘܶܐ. ܕܰܬ ܬܰܪܬܶܐ، ܕܠܐ ܢܳܦܰܩ ܟܶܘܐ ܒܝ ܐܝܩܰܪܬ݂ܐ ܘܒܰܢ ܢܰܥܝܡܶܐ ܕܗܳܘܷܢ. ܝ܆ ܕܝܠܳܝܬܐ ܕܰܥܣܰܪ، ܕܠܘܝܐ ܡܶܐ ܬܰܘܕܝܬ݂ܐ ܘܡܶܐ ܗܰܝܡܳܢܘܬ݂ܐ ܚܪܶܬܐ. ܐܝܢܰܩܠܰܐ ܕܷܡܗܰܝܡܢܐ ܒܗܰܝܡܳܢܘܬ݂ܐ ܚܪܶܬܐ، ܥܰܡ ܐܘ ܙܰܒܢܐ ܓܡܷܦܪܳܫܐ ܡܘ ܓܰܘܪܰܝܕ݂ܰܗ ܘܓܛܷܪܝܐ ܡܝܢܶܗ. ܡܠܦܢܐ ܫܟܪܝ ܐܩܛܫ 1375 ܡ̈ܠܐ.