Šëkri Aqtaš: ܐܝ ܬܷܫܡܷܫܬܐ ܕܰܪ ܪܝܫܳܢܶܐ / I tëšmëšto dar rišone

I tëšmëšto dar rišone

ܗܰܟܟܰܐ ܪܝܫܳܢܳܗܰܬ، ܟܳܠܳܙܰܡ ܕܗܳܘܰܬ ܛܘܦܣܐ ܫܰܦܝܪܐ ܒܟܘܠܠܶܗ ܐܰܥ ܥܰܕܰܝܕ݂ܘܟ݂. ܗܘܰܝ ܡܰܚܝܣܐ ܒܟܘܠ ܡܶܕܶܐ ܕܣܰܝܡܰܬ، ܠܐ ܡܗܰܠܟ݂ܰܬ ܒܕܰܪܒܳܢܶܐ ܡܚܰܠܦܶܐ. ܟ݂ܘܕ ܐܝ ܡܷܪܰܝܶܐ ܗܰܬ ܠܰܝܢܰܐ ܕܟܷܬܢܶܗ ܬܰܚܬܘ ܐܰܡܪܰܝܕ݂ܘܟ݂. ܟܘܠܡܶܕܶܐ ܕܚܳܙܷܢ ܐܶܒܘܟ݂، ܓܡܰܝܕܝܠܶܗ ܡܰܬ݂ܠܐ ܠܪܘܚܰܝܝܶܗ ܘܗܷܢܢܷܟ ܣܬܶܐ ܓܷܕܣܰܝܡܝ ܟ݂ܳܬ݂ܘܟ݂. ܗܰܟܟܰܐ ܕܡܰܠܟ݂ܰܬ ܒܕܰܪܒܐ ܡܣܰܘܝܐ ܗܷܢܢܷܟ ܣܬܶܐ ܓܡܰܠܟ݂ܝ ܒܘ ܕܰܪܒܰܘܐ. ܗܰܟܟܰܐ ܕܡܰܝܠܰܬ ܡܘ ܕܰܪܒܐ ܡܣܰܘܝܐ ܘܐܷܙܙܘܟ݂ ܒܕܰܪܒܐ ܥܘܝܔܐ، ܗܷܢܢܷܟ ܣܬܶܐ ܓܷܕܐܳܬ݂ܷܢ ܒܷܬ݂ܪܘܟ݂. ܗܰܟܟܰܐ ܕܕܰܝܫܰܬ ܐܰܩ ܩܳܢܘܢܶܐ ܘܠܐ ܡܝܰܩܪܝܠܘܟ݂، ܗܷܢܢܷܟ ܣܬܶܐ ܓܣܰܝܡܝ ܐܘ ܡܶܕܶܐ ܕܣܷܡܠܘܟ݂. ܟܳܠܳܙܰܡ ܕܷܐܕ݂ܥܰܬ، ܕܐܘ ܦܰܘܕܐ ܕܘ ܪܝܫܳܢܐ ܡܷܩܩܰܐ ܕܗܳܘܶܐ ܢܰܥܝܡܐ ܣܬܶܐ، ܟܳܡܰܚܘܶܐ ܒܥܰܝܢܶܐ ܕܐܘ ܥܰܡܐ ܓ݂ܰܠܰܒܶܐ ܪܰܒܐ. ܐܝ ܢܦܰܠܬܐ ܕܟܶܦܐ ܢܰܥܷܡܬܐ ܡܘ ܛܘܪܐ، ܠܷܓܡܰܕ݂ܝܪܐ ܘܠܷܓܡܰܚܷܘܝܐ ܕܘܟܬ݂ܰܗ. ܐܶܠܐ ܐܝ ܢܦܰܠܬܐ ܕܘ ܩܰܬܳܪܐ ܡܘ ܛܘܪܐ، ܟܳܡܰܢܦܠܐ ܟܶܦܶܐ ܚܪܶܢܶܐ ܐܰܥܡܰܗ ܘܕܘܟܬ݂ܰܗ ܓ݂ܰܠܰܒܶܐ ܟܳܡܰܚܰܘܝܐ. ܥܰܝܢܝ ܡܶܕܶܐ ܐܝܢܰܩܠܰܐ ܕܢܷܦܠܐ ܟܶܦܐ ܡܝ ܥܡܰܪܰܐ ܕܘ ܒܰܝܬܐ، ܠܳܟܳܘܶܐ ܟ݂ܣܰܪܰܐ ܪܰܒܬ݂ܐ. ܐܶܠܐ ܕܢܷܦܠܐ ܟܶܦܐ ܪܰܒܬ݂ܐ ܡܘ ܪܷܟܷܢ ܕܘ ܒܰܝܬܐ، ܓܢܳܦܰܠ ܐܘ ܒܰܝܬܐ ܘܓܬܳܘܶܐ ܟ݂ܣܰܪܰܐ ܪܰܒܬ݂ܐ. ܒܘ ܫܷܟܠܰܢܐ، ܚܰܐ ܒܰܪܢܳܫܐ ܥܳܠܡܳܝܐ ܕܚܳܛܶܐ، ܟܳܡܰܕ݂ܷܪ ܪܘܚܶܗ ܘܐܘ ܥܰܡܐ ܠܐ ܟܳܚܳܛܶܐ ܐܰܥܡܶܗ. ܐܶܠܐ ܐܘ ܪܝܫܳܢܐ ܕܘ ܥܰܡܐ ܕܚܳܛܶܐ، ܟܳܡܰܚܛܶܐ ܓ݂ܰܠܰܒܶܐ ܢܳܫܶܐ ܕܷܟܷܬܢܶܗ ܒܷܬ݂ܪܶܗ ܘܟܳܡܗܰܝܡܢܝ ܐܶܒܶܗ. ܚܰܟܝܡܐ ܒܰܪ ܐܰܣܝܪܐ ܡܷܪܠܶܗ؛ ܐܰܡ ܡܫܰܡܫܳܢܶܐ ܕܘ ܚܰܟܷܡ، ܟܳܘܷܢ ܟ݂ܳܐܬ݂ܶܗ. ܘܰܐܥ ܥܳܡܘܪܶܐ ܕܝ ܘܰܠܰܝܶܐ، ܟܳܘܷܢ ܟ݂ܘܕ ܐܘ ܪܝܫܳܢܐ ܕܝ ܘܰܠܰܝܶܐ. ܐܝܕ݂ܰܐ ܐܝ ܕܰܘܡܐ ܡܣܰܘܰܝܬܳܝܐ، ܐܘ ܛܶܠܳܠܰܝܕ݂ܰܗ ܣܬܶܐ ܟܳܘܶܐ ܡܣܰܘܝܐ. ܟܘܠ ܪܝܫܳܢܐ ܕܳܐܒܰܥ ܐܘ ܥܰܡܰܝܕ݂ܶܗ ܡܰܠܰܟ݂ ܒܷܬ݂ܪܶܗ، ܟܳܠܳܙܰܡ ܕܗܳܘܰܠܠܶܗ ܛܘܦܣܐ ܛܳܘܐ. ܩܰܡܰܝܬܐ ܛܪܐ ܗܝܝܶܗ ܡܰܠܰܟ݂ ܒܘ ܕܰܪܒܐ ܛܳܘܐ ܘܣܳܝܰܡ ܟܘܠܡܶܕܶܐ ܕܟܳܡܷܛܠܰܒ ܡܝܢܶܗ. ܒܷܬ݂ܷܪ ܛܪܐ ܛܳܠܰܒ ܡܘ ܥܰܡܰܝܕ݂ܶܗ ܕܣܳܝܰܡ. ܐܘ ܪܝܫܐ ܝܐ ܐܘ ܡܕܰܒܪܳܢܐ ܕܘ ܓܘܫܡܐ ܘܕܰܗ ܗܰܕܳܡܶܐ. ܐܝܕ݂ܰܐ ܐܘ ܪܝܫܐ ܕܟܳܡܕܰܒܰܪ ܐܰܗ ܗܰܕܳܡܶܐ ܘܐܘ ܓܘܫܡܐ ܟܘܠܶܗ ܕܗܳܘܶܐ ܒܰܛܝܠܐ، ܐܰܗ ܗܰܕܳܡܶܐ ܣܬܶܐ ܘܐܘ ܓܘܫܡܐ ܣܬܶܐ ܟܳܘܶܐ ܒܰܛܝܠܐ. ܒܘ ܫܷܟܠܰܢܐ ܟܘܠ ܪܝܫܳܢܐ ܕܣܳܠܰܩ ܠܘ ܕܰܪܓ݂ܐ ܕܝ ܪܝܫܳܢܘܬ݂ܐ ܗܰܟܟܰܐ ܪܘܚܳܢܳܝܐ ܘܗܰܟܟܰܐ ܡܕ݂ܝܢܳܝܐ، ܟܳܠܳܙܰܡ ܕܗܳܘܶܐ ܩܰܘܝܐ ܘܡܣܰܘܝܐ ܘܟܝܢܐ ܘܡܪܰܚܡܳܢܐ. ܐܰܥ ܥܰܪܒܶܐ ܟܘܙܙܷܢ ܒܷܬ݂ܪܶܗ ܕܘ ܪܳܥܝܐ ܠܰܝܟܐ ܕܷܐܙܙܶܗ. ܘܐܘ ܩܰܛܥܐ ܟܳܡܗܰܠܰܟ݂ ܒܷܬ݂ܪܶܗ ܕܘ ܪܳܥܝܐ. ܟܘܠ ܡܕܰܒܪܳܢܐ ܘܪܝܫܐ، ܠܰܙܷܡ ܕܗܳܘܐ ܓ݂ܰܠܰܒܶܐ ܡܰܚܝܣܐ ܕܠܐ ܡܰܚܛܶܐ ܘܠܐ ܡܰܢܦܰܠ ܐܘ ܥܰܡܰܝܕ݂ܶܗ ܒܕܰܪܒܳܢܶܐ ܠܐ ܛܳܘܶܐ ܕܟܳܡܷܒܠܝ ܠܘ ܗܰܠܰܟ. ܐܝܢܰܩܠܰܐ ܕܐܝ ܪܰܘܡܐ ܡܶܐ ܠܰܘܓ݂ܷܠ ܘܡܶܐ ܠܰܠܬܰܚ ܡܷܫܓ݂ܳܫܐ، ܐܰܡ ܡܰܝܰܝܕ݂ܰܗ ܟܳܡܝܚܰܘܕܠܝ. ܗܰܘܟ݂ܰܐ ܣܬܶܐ ܐܘ ܪܝܫܳܢܐ ܕܠܳܘܶܐ ܡܫܰܝܢܐ ܥܰܡ ܪܘܚܶܗ ܘܥܰܡ ܐܘ ܥܰܡܰܝܕ݂ܶܗ، ܓܡܷܟ݂ܠܰܩ ܫܓܘܫܝܐ ܘܒܷܠܒܳܠܐ ܒܰܝܢ ܕܘ ܥܰܡܰܝܕ݂ܶܗ. ܟܳܚܳܙܝܢܰܐ ܡܶܩܷܡ ܡܝ ܙܩܝܦܘܬ݂ܐ ܕܷܡܫܝܚܐ ܣܬܶܐ، ܐܝܢܰܩܠܰܐ ܕܷܫܓ݂ܝܫ ܐܘ ܡܰܠܟܐ ܗܶܪܳܘܕܶܣ، ܒܷܬ݂ܷܪ ܫܓ݂ܝܫܐ ܐܰܥܡܶܗ ܐܘܪܝܫܠܶܡ ܟܘܠܰܗ. ܐܘ ܦܰܘܕܐ ܕܟܳܘܶܐ ܡܶܐ ܚܰܐ ܥܳܠܡܳܝܐ، ܟ݂ܘܕ ܒܪܝܢܶܐ ܢܰܥܷܡܬܐ ܒܝ ܐܝܕ݂ܐ ܐܰܘ ܒܝ ܪܰܓ݂ܠܳܝܐ. ܟܝܒܶܗ ܚܰܐ ܕܡܳܨܰܪܠܰܗ ܘܕܷܡܟܰܣܶܠܰܗ ܕܠܐ ܡܚܰܘܝܐ. ܐܶܠܐ ܐܘ ܦܰܘܕܐ ܕܟܳܘܶܐ ܡܶܐ ܚܰܐ ܪܝܫܳܢܐ ܐܰܘ ܡܕܰܒܪܳܢܐ ܕܥܰܡܐ، ܟܳܫܷܒܗܐ ܠܝ ܒܪܝܢܶܐ ܪܰܒܬ݂ܐ ܕܒܝ ܦܳܬ݂ܐ ܕܠܐ ܟܳܡܝܟܰܣܝܐ ܘܟܘܠܢܳܫܐ ܟܳܚܳܙܶܠܰܗ. ܐܘ ܪܝܫܳܢܐ، ܟܳܠܳܙܰܡ ܕܠܐ ܡܷܬܝܰܩܰܢ ܠܟܘܠ ܡܶܕܶܐ ܕܫܳܡܰܥ. ܘܠܐ ܚܳܟܰܡ ܐܰܢ ܢܳܫܶܐ. ܐܶܠܐ ܒܝ ܩܰܡܰܝܬܐ ܓܷܡܫܰܝܰܠ ܘܓܝܳܠܰܦ ܐܘ ܫܪܳܪܐ ܘܒܷܬ݂ܷܪ ܒܟܝܢܘܬ݂ܐ ܓܚܳܟܰܡ ܘܓܕܳܒܶܐ ܩܰܪܰܪ. ܠܰܝܬܐ ܠܐ ܚܰܟܝܡܘܬ݂ܐ ܘܠܐ ܟܝܢܘܬ݂ܐ ܒܘ ܚܷܟܷܡ ܘܒܘ ܩܰܪܰܪ ܕܟܳܡܝܬܰܗܘܶܐ ܟ݂ܰܐܝܦܐ. ܛܪܐ ܠܐ ܡܷܩܚܰܪ ܟ݂ܰܐܝܦܐ ܒܘ ܓܰܙܷܢ ܕܡܝܣܰܡ ܡܝܢܶܗ ܘܠܐ ܡܷܦܨܰܚ ܣܬܶܐ ܟ݂ܰܐܝܦܐ ܒܟܘܠ ܡܶܕܶܐ ܕܡܝܘܰܨܰܦ. ܐܝ ܛܰܘܛܐ، ܛܪܐ ܡܰܪܘܰܚ ܠܶܒܶܗ ܘܡܣܰܝܒܰܪ ܡܩܰܒܷܠ ܕܟܘܠ ܡܶܕܶܐ ܕܚܳܙܶܐ ܐܰܘ ܕܫܳܡܰܥ. ܐܘ ܡܶܕܶܐ ܕܫܳܡܰܥ ܐܰܘ ܕܚܳܙܶܐ ܣܬܶܐ، ܛܪܐ ܟ݂ܰܐܝܦܐ ܠܐ ܦܳܪܰܣܠܶܗ ܒܰܝܢ ܕܘ ܥܰܡܰܝܕ݂ܶܗ. ܟܘܠ ܪܝܫܳܢܐ ܟܳܠܳܙܰܡ ܕܗܳܘܶܐ ܓ݂ܰܠܰܒܶܐ ܡܰܚܝܣܐ ܟ݂ܘܕ ܐܘ ܩܰܦ̇ܛܰܢ ܚܰܟܝܡܐ. ܕܠܐ ܛܳܪܶܐ ܕܝ ܓܰܡܝܝܶܐ ܡܷܓ݂ܡܳܛܐ ܒܘ ܒܰܚܰܪ ܘܟܘܠܢܳܫܐ ܕܶܐܒܰܗ ܡܳܝܰܬ݂ ܘܡܝܣܰܟܰܪ. ܐܶܠܐ ܐܘ ܚܰܐ ܕܡܰܡܛܶܐ ܐܝ ܓܰܡܝܝܰܝܕ݂ܶܗ ܠܘ ܠܝܡܰܢ ܗܝܝܶܗ ܝܐ ܐܘ ܩܰܦ݁ܛܰܢ ܚܰܟܝܡܐ ܘܡܕܰܒܪܳܢܐ ܫܰܪܝܪܐ. ܡܠܦܢܐ ܫܟܪܝ ܐܩܛܫ 500 ܡ̈ܠܐ.