Šëkri Aqtaš: ܥܠ ܐܝ ܨܠܘܬ݂ܐ ܪܘܚܳܢܳܝܬܐ / Cal i ṣluṯo ruḥonayto
Cal i ṣluṯo ruḥonayto
ܐܰܢ ܐܰܒܳܗܳܬ݂ܐ ܟܳܡܦܰܫܩܝ ܐܝ ܨܠܘܬ݂ܐ ܒܣܘܟܳܠܐ ܦܫܝܛܐ، ܫܬܰܓ݂ܰܠܝܝܶܐ ܕܥܰܡ ܐܰܠܳܗܐ ܒܟ݂ܰܒܪܶܐ ܪܘܚܳܢܳܝܶܐ. ܫܬܰܓ݂ܰܠܝܝܶܐ ܕܘ ܠܝܫܳܢܐ ܝܐ ܐܰܘ ܕܘ ܠܶܒܐ؟ ܕܠܐ ܦܘܠܳܓ݂ܐ ܫܬܰܓ݂ܰܠܝܝܶܐ ܕܘ ܠܶܒܐ ܝܐ. ܡܰܘܟ݂ܰܐ ܡܳܪܝܐ ܡܫܝܚܐ ܡܘܰܒܰܟ݂ܠܶܗ ܠܰܢܷܟ ܕܟܳܡܨܰܠܷܢ ܒܣܰܦ݁ܦ݁ܳܬ݂ܰܝܝܶܐ ܬܰܢܢܶܗ. ܘܡܷܪܠܰܠܶܗ؛ ܐܘ ܥܰܡܰܢܐ ܒܣܰܦ݁ܦ݁ܳܬ݂ܶܗ ܬܰܢܢܶܗ ܟܳܡܝܰܩܰܪܠܝ. ܠܶܒܶܗ ܪܰܚܘܩܐ ܝܐ ܡܝܢܝ. ܡܰܪܟܶܐ ܟܳܝܘܠܦܝܢܰܐ ܕܐܝ ܨܠܘܬ݂ܐ ܠܰܬܝܐ ܟ݂ܰܒܪܶܐ ܐܰܘ ܫܬܰܓ݂ܰܠܝܝܶܐ ܬܰܢܢܶܗ. ܐܝ ܨܠܘܬ݂ܐ ܡܘ ܓܰܒܐ ܪܘܚܳܢܳܝܐ، ܚܘܒܐ ܘܠܗܝܩܘܬ݂ܐ ܕܠܰܦ ܐܰܠܳܗܳܐ ܝܐ. ܟ݂ܘܕ ܕܰܘܝܕ ܐܘ ܡܙܰܡܪܳܢܐ ܡܷܪܠܶܗ؛ ܟ݂ܘܕ ܐܝ ܐܰܝܠܐ ܕܟܳܓܘܥܝܐ ܥܰܠ ܐܰܡ ܡܰܝܶܐ، ܗܰܘܟ݂ܰܐ ܐܝ ܢܰܦܫܰܝܕ݂ܝ ܨܗܝܬ݂ܐ ܝܐ ܐܶܠܳܟ݂ ܐܰܠܳܗܐ ܚܰܝܐ. ܗܰܘܟ݂ܰܐ ܣܬܶܐ ܟܘܠ ܒܰܪܢܳܫܐ ܕܟܷܬܝܐ ܠܗܝܩܳܝܐ ܠܰܐܠܳܗܐ، ܐܝܢܰܩܠܰܐ ܕܷܡܨܰܠܶܐ ܓܡܷܦܨܰܚ ܥܰܠ ܕܟܳܡܷܔܓ݂ܰܠ ܐܰܥܡܶܗ ܒܟ݂ܰܒܪܶܐ ܪܘܚܳܢܳܝܶܐ. ܐܝ ܨܠܘܬ݂ܐ، ܣܘܳܥܐ ܪܘܚܳܢܳܝܐ ܝܐ. ܒܘ ܫܷܟܷܠ ܕܟܳܣܳܘܰܥ ܐܘ ܦܰܓ݂ܪܐ ܡܘ ܡܘܟܠܐ، ܗܰܘܟ݂ܰܐ ܐܝ ܢܰܦܫܐ ܟܳܣܰܘܥܐ ܐܝܢܰܩܠܰܐ ܕܡܝܨܰܠܶܐ ܡܘ ܠܶܒܐ ܥܰܡ ܐܰܠܳܗܐ. ܐܝܢܰܩܠܰܐ ܕܐܘ ܡܨܰܠܝܳܢܐ ܠܐ ܡܰܫܷܟ ܒܘ ܣܘܳܥܐ ܪܘܚܳܢܳܝܐ، ܗܰܘܢܶܗ ܫܓ݂ܝܫܳܝܐ ܝܐ ܘܠܐ ܟܳܡܨܰܠܶܐ ܡܘ ܠܶܒܐ. ܐܝܢܰܩܠܰܐ ܕܡܰܠܬܰܡ ܗܰܘܢܶܗ ܒܝ ܨܠܘܬ݂ܐ ܘܕܳܐܕ݂ܰܥ ܡܷܢ ܟܳܡܨܰܠܶܐ، ܐܝ ܪܘܚܰܝܕ݂ܶܗ ܣܬܶܐ ܓܡܝܒܰܣܡܐ ܘܓܷܕܣܰܘܥܐ. ܐܝ ܨܠܘܬ݂ܐ، ܓܝܫܪܐ ܝܰܢܝ ܟܳܦ݁ܪܝ ܪܘܚܳܢܳܝܐ ܝܐ ܒܰܝܢ ܕܘ ܟ݂ܰܠܳܩܐ ܠܘ ܟ݂ܠܝܩܐ ܝܰܢܝ ܒܰܝܢ ܕܰܐܠܳܗܐ ܠܘ ܒܰܪܢܳܫܐ. ܟܳܡܰܡܛܝܐ ܠܒܳܠܰܢ ܐܘ ܣܷܠܰܡ ܕܝܰܥܩܘܒ ܕܟܳܡܳܛܶܐ ܡܝ ܐܰܪܥܐ ܠܝ ܫܡܰܝܐ. ܟܳܣܷܠܩܝ ܐܶܒܶܗ ܐܰܡ ܡܰܠܰܟ݂ܶܐ ܘܟܳܡܷܣܩܝ ܐܰܨ ܨܠܰܘܳܬ݂ܶܐ ܐܰܥܡܰܝܝܶܗ ܓܰܒ ܐܰܠܳܗܐ. ܘܟܳܡܰܡܛܷܢ ܐܰܦ ܦܘܢܳܝܶܐ ܡܶܐ ܓܰܒܶܗ ܠܰܢ ܢܳܫܶܐ ܡܨܰܠܝܳܢܶܐ ܘܡܗܰܝܡܢܶܐ. ܐܝ ܨܠܘܬ݂ܐ، ܐܰܣܝܪܘܬ݂ܐ ܕܥܰܡ ܐܰܠܳܗܐ ܝܐ. ܗܰܘܟ݂ܰܐ ܟܘܠ ܡܨܰܠܝܳܢܐ ܟܳܡܰܚܷܣ ܒܪܘܚܶܗ ܐܝܢܰܩܠܰܐ ܕܟܳܡܨܰܠܶܐ، ܩܷܡ ܐܰܠܳܗܐ ܟܳܩܳܝܰܡ ܘܟܳܡܷܔܓ݂ܰܠ ܐܰܥܡܶܗ. ܐܰܚ ܚܰܢܦܶܐ ܠܐ ܟܳܡܗܰܝܡܢܝ ܕܟܷܬܝܐ ܐܝ ܨܠܘܬ݂ܐ ܫܬܰܓ݂ܰܠܝܝܶܐ ܕܥܰܡ ܐܰܠܳܗܐ. ܐܝܢܰܩܠܰܐ ܕܚܰܐ ܕܷܡܨܰܠܶܐ ܘܕܠܳܘܶܐ ܗܰܘܢܶܗ ܡܷܨܪܐ ܒܰܐܠܳܗܐ، ܟܳܫܳܒܰܗ ܠܰܫܪܳܓ݂ܶܐ ܘܠܰܒ ܒܰܗܪܶܐ ܕܠܐ ܟܳܒܷܢ ܒܰܗܪܐ. ܐܘ ܒܰܪܢܳܫܐ ܕܟܳܡܨܰܠܶܐ ܘܕܟܳܬܳܝܰܒ، ܠܶܒܶܗ ܘܗܰܘܢܶܗ ܟܳܢܘܗܪܝ ܘܟܳܢܷܕ݂ܦܝ. ܐܘ ܗܰܘܢܐ ܠܐ ܟܳܡܰܩܒܰܠ ܦܬܰܟܰܪ ܐܰܘ ܝܘܠܦܳܢܐ ܕܟܷܬܝܐ ܢܘܟ݂ܪܳܝܐ ܘܡܩܰܒܷܠ ܕܝ ܗܰܝܡܳܢܘܬ݂ܐ ܘܕܘ ܝܘܠܦܳܢܐ ܐܰܠܳܗܳܝܐ. ܐܝ ܨܠܘܬ݂ܐ ܒܥܰܝܢܝ ܙܰܒܢܐ ܟܳܡܰܪܚܩܐ ܐܘ ܗܰܘܢܐ ܡܶܐ ܟܘܠ ܡܶܕܶܐ ܐܰܪܥܳܢܳܝܐ ܕܟܳܡܰܚܛܶܐ. ܘܟܳܡܰܢܕ݂ܦܳܠܶܗ ܡܰܫ ܫܰܗܘܰܬ ܐܰܪܥܳܢܳܝܶܐ ܕܠܰܬܢܶܗ ܪܚܝܡܶܐ ܥܰܠ ܐܰܠܳܗܐ. ܐܰܩ ܩܰܕܝܫܶܐ ܟܷܐܡܡܝ؛ ܐܝ ܨܠܘܬ݂ܐ، ܡܰܘܬܐ ܡܘ ܥܳܠܡܳܐ ܝܐ. ܝܰܢܝ ܐܘ ܒܰܪܢܳܫܐ ܕܗܳܘܶܐ ܡܨܰܠܝܳܢܐ ܘܠܶܒܶܗ ܡܷܨܪܐ ܒܰܐܠܳܗܐ، ܟܳܘܶܐ ܢܘܟ݂ܪܳܝܐ ܠܘ ܥܳܠܡܐ ܘܠܰܫ ܫܰܗܘܰܝܕ݂ܶܗ ܟܘܠܠܶܗ. ܐܝ ܨܠܘܬ݂ܐ، ܢܷܨܚܳܢܐ ܘܐܝܩܳܪܐ ܪܰܒܐ ܝܐ ܠܘ ܒܰܪܢܳܫܐ. ܟܳܠܳܙܰܡ ܕܷܡܫܰܝܰܠ ܠܪܘܚܶܗ ܘܕܳܐܡܰܪ؛ ܐܳܢܐ ܒܰܪܢܳܫܐ ܥܰܦܪܳܢܐ ܡܰܢܢܐ ܕܡܰܛܝܢܐ ܠܕܰܪܓ݂ܐ ܕܡܷܔܓ݂ܰܠܢܐ ܥܰܡ ܐܰܠܳܗܐ ܐܘ ܡܰܠܟܐ ܕܰܡ ܡܰܠܟܶܐ ܘܐܘ ܡܳܪܐ ܕܰܡ ܡܳܪܰܘܳܬ݂ܐ؟ ܒܷܫܪܳܪܐ ܢܷܨܚܳܢܐ ܪܰܒܐ ܝܐ ܐܶܠܰܢ ܕܠܰܬܢܰܐ ܠܰܐܝܷܩ ܐܶܠܶܗ. ܥܰܡ ܓ݂ܰܠܰܒܶܐ ܪܰܒܳܢܶܐ ܘܪܝܫܳܢܶܐ ܕܘ ܥܳܠܡܐ ܟܷܒܥܝܢܰܐ ܕܡܷܔܓ݂ܳܠܝܢܰܐ ܘܕܛܷܠܒܝܢܰܐ ܡܶܕܶܗ ܡܷܢܢܶܗ، ܐܶܠܐ ܠܐ ܟܳܩܘܕܪܝܢܰܐ ܕܡܳܛܝܢܰܢܢܶܗ ܘܕܡܷܔܓ݂ܳܠܝܢܰܐ ܐܰܥܡܰܝܝܶܗ. ܐܝ ܨܠܘܬ݂ܐ، ܡܝܳܕܐ ܕܰܛ ܛܰܝܷܒܘܳܬ݂ܶܐ ܝܐ. ܐܘ ܒܰܪܢܳܫܐ ܐܝܢܰܩܠܰܐ ܕܦܳܪܰܫ ܙܰܒܢܐ ܠܝ ܨܠܘܬ݂ܐ، ܛܪܐ ܠܐ ܚܳܫܰܘ ܕܟܳܟ݂ܳܨܰܪ ܐܘ ܙܰܒܢܰܝܕ݂ܶܗ ܘܟܳܡܰܥܒܰܪܠܶܗ ܕܠܐ ܦܰܝܕܰܐ. ܟܳܚܳܙܝܢܰܐ ܢܰܩܩܰܘܳܬ݂ܶܐ ܕܰܐܢ ܢܳܫܶܐ ܟܷܐܡܡܝ ܠܰܬܠܰܢ ܙܰܒܢܐ ܕܷܡܨܰܠܝܢܰܐ ܘܠܐ ܟܳܟ݂ܳܠܝܢܰܐ ܡܘ ܫܘܓ݂ܠܐ. ܘܗܰܢܐ ܦܰܘܕܐ ܪܰܒܐ ܝܐ. ܟܳܠܳܙܰܡ ܕܷܐܕ݂ܥܝ ܐܝܢܰܩܠܰܐ ܕܷܡܨܰܠܷܢ ܟܳܡܰܝܕܝ ܘܟܳܡܩܰܝܙܢܝ ܡܶܕܳܢܶܐ ܓ݂ܰܠܰܒܶܐ ܡܶܐ ܐܰܠܳܗܐ ܫܘܒܚܐ ܠܷܐܫܡܶܗ. ܒܝ ܨܠܘܬ݂ܐ ܟܳܡܰܩܰܒܠܝ ܒܘܪܟܳܬ݂ܶܐ ܘܫܬܰܓ݂ܰܠܝܝܶܐ ܒܰܣܷܡܬܐ ܕܥܰܡ ܐܰܠܳܗܐ ܘܡܰܘܗܒܳܬ݂ܶܐ ܕܠܷܓܡܷܒܢܷܢ. ܟܷܡܡܝܢܰܐ ܠܰܐܠܳܗܐ؛ ܗܰܬ ܠܰܬܰܬ ܣܢܝܩܳܝܐ ܠܝ ܨܠܘܬ݂ܰܝܕ݂ܰܢ، ܐܶܠܐ ܐܰܚܢܰܐ ܣܢܝܩܳܝܶܐ ܢܰܐ ܠܝ ܪܰܒܘܬ݂ܰܝܕ݂ܘܟ݂ ܘܠܝ ܡܪܰܚܡܳܢܘܬ݂ܰܝܕ݂ܘܟ݂. ܐܝ ܨܠܘܬ݂ܐ، ܙܰܒܢܐ ܕܝ ܦܨܝܚܘܬ݂ܐ ܕܥܰܡ ܐܰܠܳܗܐ ܝܐ. ܡܰܘܟ݂ܰܐ ܐܰܢ ܐܰܒܳܗܳܬ݂ܐ ܕܝ ܥܝܬܐ ܡܛܰܟܰܣܣܶܗ ܩܝܢܳܬ݂ܶܐ ܠܰܩ ܩܳܠܶܐ ܘܠܰܙ ܙܡܝܪܳܬ݂ܶܐ. ܠܰܫܰܢ ܕܐܝ ܩܝܢܬܐ ܡܰܘܕܥܐ ܐܝ ܚܕ݂ܳܝܘܬ݂ܰܝܕ݂ܰܢ ܩܷܡ ܐܰܠܳܗܐ. ܐܝ ܨܠܘܬ݂ܐ ܕܡܝܨܰܠܝܐ ܒܩܝܢܬܐ، ܟܳܡܰܦܰܨܚܐ ܐܰܠ ܠܶܒܶܐ. ܥܰܠ ܕܐܝܢܰܩܠܰܐ ܕܟܳܩܰܝܡܝܢܰܐ ܩܷܡ ܐܰܠܳܗܐ، ܐܰܠ ܠܶܒܰܘܳܬ݂ܰܝܕ݂ܰܢ ܟܳܡܷܡܠܷܢ ܒܘܣܳܡܐ ܘܦܨܝܚܘܬ݂ܐ. ܒܟܘܠܠܶܗ ܐܰܥ ܥܶܕ݂ܰܝܕ݂ܰܢ، ܟܳܡܨܰܠܝܢܰܐ ܒܟܘܠܠܶܗ ܐܰܪ ܪܶܓ݂ܫܰܝܕ݂ܰܢ ܒܷܚܕ݂ܐ ܢܰܦܫܐ ܘܒܚܰܐ ܨܶܒܝܳܢܐ ܘܒܚܰܐ ܠܶܒܐ ܠܰܐܠܳܗܳܐ. ܡܠܦܢܐ ܫܟܪܝ ܐܩܛܫ 497 ܡ̈ܠܐ.
