Šëkri Aqtaš: ܐܘ ܩܰܛܠܐ ܕܫܰܒܐ ܐܰܩܛܰܫ ܒܝ ܩܪܝܬ݂ܐ ܕܒܶܩܘܣܝܳܢܶܐ (22.03.1965) / U qaṭlo d Šabo Aqtaš bi qriṯo d Bequsyone

U qaṭlo d Šabo Aqtaš bi qriṯo d Bequsyone

ܬܪܶܐ ܥܷܣܪܝ ܒܘ ܝܰܪܚܐ ܕܳܐܕ݂ܳܪ ܒܝ ܫܰܬܐ ܕܰܐܢ ܐܰܠܦܐ ܫ̰ܰܥܡܐ ܘܚܰܡܷܫ ܘܷܐܫܬܝ، ܡܩܰܝܰܕ ܝܰܘܡܐ ܟܳܡܐ ܘܕܰܦܐ ܡܫܰܚܰܪܬܐ ܒܘ ܡܰܟܬܰܒܙܰܒܢܐ ܕܝ ܩܪܝܬ݂ܐ ܕܒܶܩܘܣܝܳܢܶܐ. ܥܰܠ ܕܷܩܛܝܠ ܒܘ ܝܰܘܡܰܢܐ ܫܰܒܐ ܐܰܩܛܰܫ ܕܒܶܐ ܓ݂ܷܙܰܠܐ ܒܝ ܩܪܝܬ݂ܐ. ܐܝ ܩܪܝܬ݂ܐ ܥܰܡܷܪܬܳܘܰܐ ܘܟܷܬܘܰܐ ܠܰܦ ܡܐ ܝܰܩܪܳܬ݂ܶܐ ܐܶܒܰܗ. ܟܷܬܘܰܐ ܣܬܶܐ ܦܠܝܓ݂ܘܬ݂ܐ ܩܫܝܬ݂ܐ ܒܰܝܢ ܕܰܩ ܩܘܣܢܳܝܶܐ ܒܝ ܩܪܝܬ݂ܐ. ܒܚܰܐ ܡܰܝ ܝܰܘܡܶܐ، ܥܰܠ ܐܝ ܕܘܟܬ݂ܐ ܕܷܓܡܷܒܢܶܐ ܐܘ ܡܰܟܬܰܦ݁ ܩܰܐܝܬ݂ܝ ܒܷܚܕ݂ܳܕ݂ܶܐ ܘܡܩܰܬܰܠܠܶܗ. ܗܰܘܝ ܫܓ݂ܘܫܝܐ ܘܙܘܥܬ݂ܐ ܪܰܒܬ݂ܐ ܒܝ ܩܪܝܬ݂ܐ. ܒܰܒܝ ܒܪܰܗܝܡ ܐܰܩܛܰܫ ܕܟܷܬܝܐ ܐܘ ܐܰܒܪܐ ܕܫܰܒܐ ܐܰܩܛܰܫ ܗܰܘܐ ܕܷܩܛܝܠ ܘܗܰܘܝ ܣܳܗܕܐ ܥܰܠ ܦܳܬ݂ܰܐ ܕܝ ܩܪܝܬ݂ܐ، ܗܰܘܟ݂ܰܐ ܟܳܡܰܚܟܶܐ ܘܟܳܐܡܰܪ ܥܰܠ ܐܘ ܝܰܘܡܰܘܐ؛ ܠܐ ܟܳܕ݂ܰܥ ܢܐ ܡܰܝܟܐ ܒܳܕܶܐ ܢܐ. ܘܰܐܝܕܰܪܒܐ ܡܰܚܟܶܐ ܢܐ. ܟܘܠ ܕܟܳܐܬ݂ܶܐ ܐܘ ܝܰܘܡܐ ܕܘ ܩܰܛܠܐ ܕܒܰܒܝ ܠܒܳܠܝ، ܐܰܟ݂ ܟ݂ܰܒܪܶܐ ܟܳܡܷܩܛܳܪܝ ܒܷܩܕ݂ܳܠܝ ܘܠܐ ܟܳܢܷܦܩܝ. ܘܠܝܫܳܢܝ ܠܐ ܟܳܟܳܪܰܟ݂ ܕܡܰܚܟܶܐ ܘܕܡܷܔܓ݂ܰܠ ܥܰܠ ܐܘ ܝܰܘܡܰܘܐ ܕܟܷܬܝܐ ܝܰܘܡܐ ܟܳܡܐ ܘܡܰܠܝܐ ܓ݂ܰܡܐ ܕܝܠܳܢܳܐܝܬ݂ ܐܶܠܝ. ܘܓܰܘܳܢܳܐܝܬ݂ ܠܝ ܐܝܩܰܪܬ݂ܰܝܕ݂ܰܢ ܕܒܶܐ ܓ݂ܷܙܰܠܐ. ܐܶܠܐ ܠܰܫܰܢ ܕܠܐ ܡܷܛܥܶܐ ܘܕܠܐ ܡܷܠܚܶܐ ܐܘ ܕܘܟ݂ܪܳܢܐ ܕܒܰܒܝ، ܟܳܡܰܚܟܶܐ ܢܐ ܘܟܳܡܰܪܢܐ ܠܰܢ ܐܰܒܢܰܝܕ݂ܝ ܕܝܷܠܦܝ ܘܕܠܐ ܛܳܥܷܢ ܐܝ ܒܰܪܒܪܳܝܘܬ݂ܐ ܕܗܰܘܝܐ ܒܘ ܝܰܘܡܰܘܐ. ܒܘ ܙܰܒܢܰܘܐ ܐܘ ܩܰܪܰܩܳܠ ܒܝ ܩܪܝܬ݂ܐ ܕܷܐܫܬܪܰܟܳܘܰܐ. ܐܰܬ݂ܷܢ ܬܪܶܐ ܢܰܦܰܪܶܐ ܝܰܢܝ ܥܰܣܶܟܷܪ ܠܝ ܩܪܝܬ݂ܐ ܘܡܷܪܪܶܐ؛ ܐܰܬ݂ܝ ܐܰܡܪܐ ܡܝ ܫܘܠܛܳܢܘܬ݂ܐ ܓܡܰܥܰܡܪܝܢܰܢܟ݂ܘ ܡܰܟܬܰܦ݁ ܠܰܫܰܢ ܕܩܳܪܷܢ ܐܰܢ ܢܰܥܝܡܰܬ݂ܟ݂ܘ ܠܶܫܳܢܐ ܬܷܪܟܝ. ܒܷܬ݂ܷܪ ܐܰܢ ܢܳܫܶܐ ܕܝ ܩܪܝܬ݂ܐ ܩܪܰܠܠܶܗ ܠܷܚܕ݂ܳܕ݂ܶܐ ܕܡܷܔܓ݂ܳܠܝ ܥܰܠ ܐܝ ܡܰܣܰܠܶܐ ܕܝ ܥܡܰܪܰܐ ܕܘ ܡܰܟܬܰܦ݁. ܠܰܬܝܡܝ ܟܘܠܠܶܗ ܥܰܡ ܐܘ ܡܘܟ݂ܬܰܪ ܘܰܐܢ ܐܰܙܰܘܝܢ. ܐܘ ܡܘܟ݂ܬܰܪ ܕܝ ܩܪܝܬ݂ܐ ܝܰܚܩܳܐ ܔܶܠܝܟ ܘܰܐ. ܣܰܥܝܕ ܕܒܶܐ ܔܷܠܠܐ ܐܰܙܰܘܰܐ. ܕܰܘܷܕܐ ܕܒܶܐ ܡܘܩܣܝ ܒܰܟܫ̰ܝܘܰܐ. ܩܪܰܠܠܶܗ ܠܷܚܕ݂ܳܕ݂ܶܐ، ܘܰܐܙܙܷܢ ܕܚܰܝܪܝ ܘܡܥܰܝܢܝ ܐܝ ܕܘܟܬ݂ܐ ܕܷܓܡܷܒܢܶܐ ܐܶܒܰܗ ܐܘ ܡܰܟܬܰܦ݁. ܒܘ ܙܰܒܢܰܘܐ ܣܬܶܐ ܟܷܬܘܰܐ ܦ݁ܰܪܬܝ ܘܒܰܪܒܰܪܝܝܶܐ ܩܫܝܬ݂ܐ ܘܦܠܝܓ݂ܘܬ݂ܐ ܒܝ ܩܪܝܬ݂ܐ. ܚܰܐ ܡܰܓ ܓܰܒܶܐ ܕܰܐ ܗܰܦܶܪܟܝ ܘܐܘ ܓܰܒܐ ܚܪܶܢܐ ܕܰܐ ܕܰܓܫܘܪܝܝܶܘܰܐ. ܐܝܢܰܩܠܰܐ ܕܡܰܛܷܢ ܠܝ ܕܘܟܬ݂ܐ ܕܘ ܡܰܟܬܰܦ݁، ܟܘܠ ܚܰܐ ܡܷܪܠܶܗ ܡܶܕܶܐ ܘܠܐ ܡܘܰܦܩܝ ܥܰܠ ܐܝ ܕܘܟܬ݂ܐ ܕܘ ܡܰܟܬܰܦ݁. ܐܘܣܐ ܕܒܶܐ ܔܷܠܠܐ ܣܬܶܐ ܒܥܰܟܣܝـܝܶܐ ܡܷܪܠܶܗ؛ ܗܰܪܟܶܐ ܣܬܶܐ ܟܬܳܘܶܐ ܕܰܪܒܐ. ܡܘܣܰܐ ܕܒܶܐ ܒܪܰܗܷܡ ܩܰܝܷܡ ܡܩܰܒܷܠ ܕܝܕ݂ܶܗ ܡܨܰܥܰܪܠܶܗ ܘܡܷܪܠܶܗ؛ ܠܐ ܟܳܘܶܐ ܗܰܪܟܶܐ ܕܰܪܒܐ. ܒܷܬ݂ܷܪ ܡܰܣ ܣܘܥܪܶܐ ܘܡܰܟ݂ ܟܰܒܪܰܢܝ، ܡܩܰܬܰܠܠܶܗ ܘܡܰܚܰܬܬܶܗ ܥܰܠ ܚܕ݂ܳܕ݂ܶܐ. ܥܰܠ ܕܟܷܬܘܰܐ ܣܬܶܐ ܝܰܘܡܶܐ ܕܚܘܫܰܒܐ، ܐܰܢ ܢܳܫܶܐ ܠܰܬܘܰܝܢܶܐ ܫܰܓ݂ܳܠܶܐ ܘܟܘܠܠܶܗ ܒܝ ܩܪܝܬ݂ܳܘܰܝܢܶܐ. ܢܳܫܐ ܗܶܫ ܠܐ ܪܰܡܷܫܘܰܐ ܡܝ ܩܪܝܬ݂ܐ. ܐܘ ܥܰܡܐ ܒܘ ܙܰܒܢܰܘܐ ܗܶܫ ܠܰܙܙܶܘܰܐ ܠܐ ܠܷܤܛܰܢܒܷܠ ܘܠܐ ܠܰܐܘܪܘܦ݁ܰܐ. ܘܟܘܠܠܶܗ ܠܰܬܝܡܝ ܠܝ ܩܰܠܶܐ. ܐܳܢܐ ܝܰܬܝܘܐ ܒܘ ܒܰܝܬܐ، ܫܰܡܷܥܢܐ ܩܳܠܶܗ ܕܐܝܫܳܟܶܐ ܕܟܳܐܡܰܪ؛ ܝܘܚܰܢܷܢ ܝܘܚܰܢܷܢ؛ ܡܩܰܬܰܠܠܶܗ ܒܝ ܬܰܪܶܐ ܥܶܠܰܝܬܐ. ܐܝܢܰܩܠܰܐ ܕܫܰܡܷܥ ܢܐ ܐܳܢܐ ܣܬܶܐ ܪܰܗܷܛ ܢܐ ܠܝ ܬܰܪܶܐ ܥܶܠܰܝܬܐ. ܐܝܢܰܩܠܰܐ ܕܡܰܛܝܢܐ، ܡܷܢ ܚܳܙܶܐ ܢܐ. ܟܰܠܟܐ ܡܩܰܬܠܝ ܘܟܳܡܳܚܷܢ ܠܷܚܕ݂ܳܕ݂ܶܐ ܕܠܐ ܪܰܚܡܶܐ. ܐܰܟ ܟܶܦܶܐ ܒܝ ܗܰܘܰܐ ܩܰܝܬ݂ܝܘܰܐ ܒܷܚܕ݂ܳܕ݂ܶܐ. ܐܰܓ ܓܰܘܪܶܐ ܘܰܐܙܠܰܡܰܬ ܘܰܐܢ ܢܝܫܶܐ ܘܰܥܠܰܝܡܶܐ ܟܘܠܠܶܗ ܢܰܦܝܠܝ ܒܷܚܕ݂ܳܕ݂ܶܐ. ܡܩܰܕܰܡܠܝ ܓܰܒܰܝܝܶܗ ܘܫ̰ܝܟܢܐ ܒܬܰܪܥܐ ܕܠܐ ܩܰܝܬ݂ܝ ܐܶܒܝ ܐܰܟ ܟܶܦܶܐ، ܘܟܳܡܦܰܪܰܔܢܐ ܐܰܥܠܰܝܝܶܗ ܒܙܘܥܬ݂ܐ. ܐܰܬ ܬܪܶܐ ܥܰܣܰܟܷܪ ܫ̰ܝܟܝ ܒܰܝܢܳܬ݂ܰܝܝܶܗ ܕܦܷܪܫܷܢܢܶܗ ܡܷܐ ܚܕ݂ܳܕ݂ܶܐ. ܐܷܫܡܶܗ ܕܚܰܐ ܡܷܢܢܶܗ ܥܝܣܰܐ ܘܰܐ ܘܕܘ ܚܪܶܢܐ ܪܷܙܰܐ ܘܰܐ. ܚܙܶܠܝ ܕܚܰܐ ܡܷܢܢܶܗ ܡܷܕܠܶܗ ܐܘ ܫܰܘܝܐ ܡܷܐ ܐܝܕ݂ܶܗ ܕܝܘܚܰܢܷܢ ܕܒܶܐ ܝܰܚܩܐ، ܘܟܳܡܳܚܶܐ ܠܡܰܢ ܕܟܳܡܳܛܶܠܶܗ ܠܰܫܰܢ ܕܡܷܦܪܳܫܝ ܡܶܐ ܚܕ݂ܳܕ݂ܶܐ. ܐܘ ܥܰܣܟܰܪ ܚܪܶܢܐ ܣܬܶܐ ܗܘܠܶܗ ܦܶܡܰܗ ܕܝ ܬܦܷܢܓܶܐ ܠܝ ܗܰܘܰܐ ܘܡܚܶܠܶܗ ܟܡܐ ܒܘܓ݂ܪܶܐ ܠܰܫܰܢ ܕܡܰܙܷܥܥܶܗ ܘܡܷܦܪܳܫܝ. ܐܶܠܐ ܢܳܫܐ ܠܐ ܡܰܨܷܬ݂ܘܰܐ. ܒܝ ܚܰܪܰܝܬܐ، ܒܝ ܙܳܪܝـܝܶܐ ܗܶܕܝ ܗܶܕܝ ܦܪܝܫܝ ܡܶܐ ܚܕ݂ܳܕ݂ܶܐ. ܐܰܣ ܣܚܳܩܰܝܬܟܝـܝܶܐ ܦܪܝܫܝ، ܘܢܰܚܝܬܝ ܓܰܒ ܐܘ ܬܘܬ݂ܐ ܕܓܰܠܠܐ. ܒܷܬ݂ܷܪ ܚܙܶܠܰܢ ܕܗܘܘܶܗ ܦܳܬ݂ܰܝـܝܶܐ ܒܝ ܓܰܠܶܐ ܘܰܐܙܙܷܢ. ܐܰܚ ܚܪܶܢܶܐ ܕܦܰܐܝܫܝ ܓܰܒ ܐܘ ܡܰܟܬܰܦ݁، ܚܫܘܘܶܐ ܓܕܘܥܪܝ ܐܰܥܠܰܝܝܶܗ ܠܰܫܰܢ ܕܕܝܣܰܐ ܡܩܰܬܠܝ. ܗܷܢܢܷܟ ܣܬܶܐ ܣܰܠܝܩܝ ܒܘ ܛܘܪܐ ܕܘ ܚܰܡܝܕܰܐ، ܬܰܡܐ ܣܬܶܐ ܠܰܩܷܢ ܒܷܚܕ݂ܳܕ݂ܶܐ ܘܡܩܰܬܰܠܠܶܗ ܒܰܟ ܟܶܦܶܐ. ܒܷܬ݂ܷܪ ܩܰܫܐ ܝܘܣܷܦ ܕܒܶܐ ܡܝܪܟܶܐ ܘܩܰܫܐ ܒܪܰܗܝܡ ܕܟܰܪܒܘܪܰܢ، ܢܰܦܝܩܝ ܡܝ ܥܝܬܐ ܕܡܳܪܝ ܐܶܠܝܐ ܥܰܡ ܒܰܒܝ ܕܦܷܪܫܷܢܢܶܐ ܡܶܐ ܚܕ݂ܳܕ݂ܶܐ. ܫ̰ܝܟܝ ܒܰܝܢܳܬ݂ܰܝܝܶܗ ܘܦܪܝܫܷܢܢܶܗ ܡܶܐ ܚܕ݂ܳܕ݂ܶܐ. ܒܥܰܝܢܝ ܝܰܘܡܐ ܕܝ ܩܰܠܶܐ ܠܰܦ ܥܰܨܪܝܝܶܐ، ܐܰܥ ܥܰܣܶܟܷܪ ܙܒܷܛܛܶܗ ܗܷܢ ܡܰܓ ܓܰܘܪܶܐ ܘܡܷܒܠܷܢܢܶܗ ܠܷܐܫܬܪܰܟܐ ܠܘ ܩܰܪܰܩܳܠ. ܒܷܬ݂ܷܪ ܐܰܬ݂ܷܢ ܥܰܣܰܟܷܪ ܚܪܶܢܶܐ ܘܟܰܪܝܟ݂ܝ ܒܰܒ ܒܳܬܶܐ ܘܙܒܷܛܛܶܐ ܐܰܓ ܓܰܘܪܶܐ ܚܪܶܢܶܐ ܣܬܶܐ ܕܷܡܩܰܬܰܠܘܰܠܠܶܗ. ܗܷܢ ܡܷܢܢܶܗ ܐܷܕ݂ܥܝܘܰܐ ܓܕܳܐܬ݂ܶܐ ܐܘ ܩܰܪܰܩܳܠ، ܠܰܫܰܢ ܕܠܐ ܡܰܣܰܠܡܝ ܪܘܚܰܝܝܶܗ ܥܰܪܝܩܝܘܰܐ ܘܬܠܰܠܶܗ ܪܘܚܰـܝـܝܶܗ. ܡܰܪܰܘܓܶܐ ܕܒܶܐ ܡܘܩܣܝ، ܐܰܙܙܶܗ ܠܙܰܟ݂ܘܪܰܢ ܓܰܒ ܐܰܛ ܛܰܝܶܐ ܘܡܷܪܠܰܠܶܗ؛ ܐܰܓ ܓܰܘܪܶܐ ܕܰܩ ܩܘܣܢܳܝܶܐ ܟܘܠܠܶܗ ܙܒܝܛܝ ܘܟܰܢܢܶܗ ܒܘ ܩܰܪܰܩܳܠ. ܢܳܫܐ ܠܐ ܦܰܐܝܷܫ ܒܝ ܩܪܝܬ݂ܐ ܔܓ݂ܘܪ ܡܰܢ ܢܝܫܶܐ ܘܡܰܢ ܢܰܥܝܡܶܐ. ܬܳܟ݂ܘ ܡܰܢܗܶܒܘ ܐܝ ܩܪܝܬ݂ܐ ܘܡܰܩܝܡܘ ܐܘ ܬܰܠܰܢܰܝܕ݂ܰܗ. ܐܳܢܐ ܪܳܥܝܳܘܰܝܢܐ. ܐܰܚܢܰܐ ܠܰܬܠܰܢ ܟ݂ܰܒܪܐ ܡܶܐ ܡܶܕܶܐ. ܘܠܐ ܟܘܕ݂ܥܝܢܰܐ ܕܡܰܪܰܘܓܶܐ ܕܒܶܐ ܡܘܩܣܝ ܗܘܠܶܗ ܟ݂ܰܒܪܐ ܠܰܙ ܙܰܟ݂ܘܪܰܢܝـܝܶܐ. ܝܰܘܡܶܗ ܕܷܬܪܶܐ ܨܰܦܪܰܝܬܐ ܟ݂ܘܕ ܟܘܠ ܢܰܩܩܰܐ، ܐܰܙܙܝ ܢܐ ܩܘܡ ܐܰܥ ܥܶܙܶܐ. ܡܪܰܣܬܰܩܠܝ ܐܰܥ ܥܶܙܶܐ ܘܡܰܛܝܢܐ ܓܰܒ ܐܘ ܓܰܪܢܳܣܐ ܕܘ ܒܷܠܒܷܠ. ܡܶܐ ܬܰܡܐ ܚܙܶܠܝ ܕܰܛ ܛܰܝܶܐ ܒܰܠܝܩܝ ܒܝ ܢܰܩܰܒܶܐ ܠܰܠܥܰܠ ܡܝ ܩܪܝܬ݂ܐ. ܕܠܐ ܚܳܙܷܢܘܰܝܠܰܢ، ܓܢܘܚܬܝܘܰܐ ܡܣܰܘܝܐ ܠܘ ܒܰܝܬܐ ܕܒܶܐ ܒܪܰܗܷܡ. ܥܰܠ ܕܐܝ ܩܰܠܶܐ ܒܰܝܢ ܕܒܶܐ ܒܪܰܗܷܡ ܘܠܒܶܐ ܔܷܠܠܐ ܢܰܦܝܩܳܘܰܐ. ܒܶܐ ܔܷܠܠܐ ܚܰܘܪܶܗ ܕܰܛ ܛܰܝܶܘܰܝܢܶܐ. ܐܝܢܰܩܠܰܐ ܕܰܛ ܛܰܝܶܐ ܚܙܰܠܰܠܰܢ، ܐܰܬ݂ܷܢ ܒܘ ܚܰܡܝܕܰܐ ܘܒܝ ܓܰܠܶܐ ܠܰܦܶܠܰܢ ܕܡܰܝܕܝ ܐܰܥ ܥܶܙܶܐ ܡܝܢܰܝܢܰܐ. ܐܳܢܐ ܣܬܶܐ ܦܰܗܷܡܢܐ ܕܰܐܬ݂ܷܠܠܝ ܕܡܰܝܕܝ ܐܰܥ ܥܶܙܶܐ. ܕܠܐ ܟܠܳܝܐ ܡܰܕܥܰܪܠܝ ܐܰܥ ܥܶܙܶܐ ܠܰܦ ܐܘ ܒܰܝܬܐ. ܡܰܛܝܢܐ ܓܰܒ ܐܝ ܪܰܘܡܐ ܘܟܳܡܰܠܷܙ ܢܐ ܕܡܰܕܥܰܪܢܰܢܶܗ ܠܘ ܒܰܝܬܐ. ܐܘ ܩܰܛܥܐ ܕܒܷܪܗܐ ܣܬܶܐ ܒܩܰܡܘܬ݂ܝܘܰܐ. ܡܰܛܝܢܐ ܠܘ ܕܰܪܓ݂ܐ ܕܝ ܟܰܫܶܐ ܕܠܰܠܬܰܚ ܡܝ ܥܝܬܐ. ܐܰܬ݂ܝܳܘܰܐ ܚܳܬ݂ܝ ܣܰܝܕܶܐ ܣܬܶܐ ܠܰܦ ܐܶܠܝ ܕܷܡܥܰܘܢܳܠܝ. ܚܷܢܓܝ ܡܳܚܷܢܘܰܐ ܟܶܦܶܐ ܘܡܰܙܰܥܩܝܘܰܐ، ܐܰܥ ܥܶܙܶܐ ܙܰܐܝܥܝ ܘܗܰܘ ܡܰܠܟ݂ܝܘܰܐ. ܥܰܠ ܐܘ ܩܳܠܐ ܕܗܰܘܝ ܒܝ ܩܪܝܬ݂ܐ، ܒܰܒܝ ܢܰܦܷܩ ܡܘ ܒܰܝܬܐ ܘܣܰܠܷܩ ܥܰܠ ܐܝ ܓܳܪܐ ܕܚܳܙܶܐ ܡܷܢ ܗܰܘܝ. ܡܷܪܠܶܗ ܠܶܐܡܝ؛ ܡܰܪ ܠܣܰܝܕܶܐ ܕܷܐܙܙܰܗ ܠܰܦ ܒܪܰܗܝܡ. ܟܳܐܡܰܢܢܐ ܓܕܳܐܬ݂ܷܢܠܰܢ ܐܰܙ ܙܰܟ݂ܘܪܰܢܝܝܶܐ. ܒܷܬ݂ܷܪ ܕܠܐ ܟܠܳܝܐ ܣܰܠܷܩ ܠܰܦ ܒܶܐ ܒܪܰܗܷܡ ܥܰܠ ܕܳܐܕ݂ܰܥܘܰܐ ܐܝܕ݂ܰܐ ܕܳܐܬ݂ܷܢ ܐܰܙ ܙܰܟ݂ܘܪܰܢܝܝܶܐ، ܡܣܰܘܝܐ ܓܷܙܙܷܢ ܠܒܶܐ ܒܪܰܗܷܡ. ܡܰܛܝ ܓܰܒ ܐܘ ܬܘܬ݂ܐ ܕܓܰܠܠܐ. ܚܙܶܠܶܗ ܕܥܝܣܰܐ ܕܒܶܐ ܒܰܣܢܰܐ ܣܬܶܐ ܢܰܦܷܩ ܡܘ ܒܰܝܬܐ. ܒܰܒܝ ܡܷܪܠܶܠܶܗ؛ ܥܝܣܰܐ݂ ܕܥܰܪ ܠܘ ܒܰܝܬܐ. ܐܰܙ ܙܰܟ݂ܘܪܰܢܝܝܶܐ ܓܕܳܐܬ݂ܷܢܟ݂ܘ. ܡܰܓ ܓܰܘܪܶܐ ܕܒܶܐ ܒܪܰܗܷܡ، ܥܝܣܰܐ ܘܥܰܙܝܙܟܐ ܬܰܢܢܶܐ ܒܘ ܒܰܝܬܳܘܰܝܢܶܐ. ܒܰܒܝ ܣܬܶܐ ܐܝܢܰܩܠܰܐ ܕܷܚܙܶܠܶܗ ܕܰܛ ܛܰܝܶܐ ܟܳܢܘܚܬܝ ܠܰܦ ܐܝ ܓܰܠܶܐ، ܗܝܝܶܐ ܣܬܶܐ ܢܰܚܷܬ ܠܰܦ ܐܝ ܥܝܬܐ ܐܝ ܕܘܟܬ݂ܐ ܕܳܐܬ݂ܶܘܰܐ ܩܳܠܐ ܓ݂ܰܠܰܒܶܐ. ܐܳܢܐ ܣܬܶܐ ܗܰܡ ܡܳܚܶܘܰܝܢܐ ܟܶܦܶܐ ܒܰܛ ܛܰܝܶܐ ܘܗܰܡ ܩܳܠܰܥܘܰܝܢܐ ܐܰܥ ܥܶܙܶܐ ܕܡܰܕܥܰܪܢܰܢܶܗ ܠܘ ܒܰܝܬܐ ܕܠܐ ܡܰܝܕܷܢܢܶܗ ܡܝܢܝ. ܡܷܩܩܰܐ ܕܟܳܡܳܚܶܢܐ ܠܰܥ ܥܶܙܶܐ، ܡܶܐ ܩܳܠܶܗ ܕܰܬܦܷܢܓܰܬ ܘܕܰܟ ܟܶܦܶܐ، ܗܰܘ ܟܳܡܰܠܟ݂ܝ. ܐܘ ܩܰܛܥܐ ܕܒܷܪܗܐ ܕܟܷܬܘܰܐ ܒܩܰܡܘܬ݂ܝ، ܟ݂ܰܠܝܨܝ ܘܡܰܛܷܢ ܠܘ ܒܰܝܬܐ. ܒܰܒܝ ܣܬܶܐ ܢܰܚܷܬ ܡܝ ܬܰܪܶܐ ܥܶܠܰܝܬܐ ܘܰܐܬ݂ܝ ܒܰܝܢ ܐܝ ܡܷܩܒܰܪܰܐ ܕܷܡܥܰܘܰܢܠܝ. ܐܳܢܐ ܥܰܠ ܕܟܷܬܘܰܝܢܐ ܒܘ ܕܰܪܒܐ، ܠܐ ܚܳܙܶܘܰܝܢܶܗ ܐܶܠܐ ܗܝܝܶܗ ܚܳܙܶܘܰܝܠܝ. ܣܰܪܳܟܶܐ ܕܒܶܐ ܩܰܫܐ ܡܰܥܠܶܠܰܗ ܩܳܠܰܗ ܘܡܷܪܠܰܠܶܗ؛ ܫܰܒܐ ܡܬܰܟ݂ܰܪ... ܫܰܒܐ ܡܬܰܟ݂ܰܪ... ܓܷܕܩܘܛܠܝܠܘܟ݂. ܡܰܕܥܰܪܠܶܗ ܐܰܥܠܰܗ ܘܡܷܪܠܶܗ؛ ܡܰܐ ܗܶܙ̰ܢܘ. ܐܰܛ ܛܰܝܶܐ، ܢܰܚܝܬܝ ܠܩܰܡܘܬ݂ܶܗ ܕܰܥ ܥܶܙܶܐ ܘܡܰܕܰܥܪܷܢܢܶܗ. ܘܡܝܕܷܢܢܶܗ ܡܝܢܝ. ܗܰܘ ܕܩܰܕܷܪ ܢܐ ܣܳܝܰܡ ܢܐ ܡܶܕܶܐ. ܩܛܷܠܠܶܗ ܒܰܒܝ ܘܡܚܰܠܠܶܗ ܗܰܡ ܐܶܠܝ ܘܗܰܡ ܠܚܳܬ݂ܝ ܣܰܝܕܶܐ ܘܡܳܒܰܠܠܶܗ ܐܘ ܩܰܛܥܐ ܕܰܥ ܥܶܙܶܐ. ܢܰܩܠܰܐ ܐܰܬ݂ܝ ܩܳܠܶܗ ܕܩܰܪܝܘܝ ܥܝܣܰܐ ܕܒܶܐ ܣܰܝܕܶܐ ܠܰܠܬܰܚ ܡܝ ܥܝܬܐ ܥܰܠ ܐܘ ܓܘܒܐ ܕܝ ܟܰܫܶܐ ܐܳܡܰܪ؛ ܝܰܐ ܙܰܟ݂ܘܪܰܢܝـܝܶܐ ܩܛܷܠܟ݂ܘ ܫܰܒܐ ܕܒܶܐ ܓܰܠܐ ܣܬܶܐ. ܒܷܬ݂ܷܪ ܡܷܕ ܕܡܷܕܕܶܐ ܐܰܥ ܥܶܙܰܝܕ݂ܰܢ، ܡܣܰܘܝܐ ܣܰܠܝܩܝ ܓܰܒ ܒܶܐ ܒܪܰܗܷܡ. ܥܰܡܬ݂ܝ ܡܰܪܝܰܡ ܣܬܶܐ ܐܝ ܚܳܬ݂ܐ ܕܒܰܒܝ ܫܰܒܐ، ܐܝܢܰܩܠܰܐ ܕܷܚܙܶܠܰܗ ܕܷܩܛܝܠ ܐܘ ܐܰܚܘܢܰܝܕ݂ܰܗ، ܕܰܥܝܪܐ ܠܘ ܒܰܝܬܐ. ܗܝܝܰܗ ܕܰܥܰܪܬܐ ܠܘ ܒܰܝܬܐ، ܐܰܛ ܛܰܝܶܐ ܒܷܬ݂ܷܪܰܗ ܘܒܷܬ݂ܷܪܰܗ ܟܐܘܙܙܷܢ. ܗܝܝܰܗ ܡܰܛܝܐ ܠܘ ܒܰܝܬܐ ܘܰܐܒܝܥܐ ܕܣܘܟ݂ܪܐ ܐܘ ܬܰܪܥܐ. ܐܶܠܐ ܐܰܛ ܛܰܝܶܐ ܗܘܔܡܝܘܰܐ ܘܠܐ ܛܳܪܷܢܘܰܐ ܕܣܘܟ݂ܪܳܠܶܗ. ܐܘ ܬܰܪܥܐ ܣܬܶܐ ܡܰܩ ܩܰܝܣܶܐ ܕܰܒ ܒܰܠܘܛܶܘܰܐ ܘܒܰܝܢ ܕܰܕ ܕܰܦܶܐ ܦܬܝܚܳܘܰܐ ܐܷܫܡܐ. ܟܷܬܘܰܐ ܫܘܪܐ ܢܰܥܝܡܐ ܓܰܒ ܐܘ ܬܰܪܥܐ. ܥܰܙܝܙܟܐ ܘܥܝܣܐ ܒܷܬ݂ܪܶܗ ܕܘ ܫܘܪܳܘܰܝܢܶܗ. ܐܘ ܛܰܝܐ ܡܰܚܰܬܠܶܗ ܒܘܓ݂ܪܐ ܐܰܥܠܰܝܝܶܗ، ܐܶܠܐ ܠܐ ܡܚܰܝܨܠܝܠܶܗ ܥܰܠ ܕܟܷܬܘܰܝܢܶܗ ܒܷܬ݂ܪܶܗ ܕܘ ܫܘܪܐ ܠܰܘܓ݂ܷܠ. ܐܘ ܛܰܝܐ ܠܐ ܟܰܠܝ ܘܗܳܔܰܡܘܰܐ ܥܰܠ ܐܘ ܬܰܪܥܐ. ܥܝܣܐ ܟܷܬܘܰܐ ܫ̰ܷܦܬܰܐ ܐܰܥܡܶܗ ܘܥܰܙܝܙܟܐ ܬܦܷܢܓܶܐ. ܒܷܬ݂ܷܪ ܥܝܣܐ ܡܰܚܰܬܠܶܗ ܦܶܡܰܗ ܕܝ ܫ̰ܷܦܬܰܐ ܒܰܝܢ ܕܰܕ ܕܰܦܶܐ ܕܘ ܬܰܪܥܐ ܥܰܠ ܦܳܐܬ݂ܶܗ ܕܘ ܛܰܝܐ. ܘܩܛܝܠܶܗ ܒܝ ܕܘܟܬ݂ܐ. ܐܝܢܰܩܠܰܐ ܕܰܚ ܚܰܘܪܳܢܰܝܕ݂ܶܗ ܚܙܰܠܠܶܗ ܕܐܘ ܚܰܘܪܰܬ݂ܬ݂ܶܗ ܫܰܪܪܐ ܩܛܝܠ، ܒܰܪܝܡܝ ܚܶܕ݂ܰܪ ܐܘ ܒܰܝܬܐ ܕܥܷܒܪܝ ܩܘܛܠܝ ܐܰܢ ܢܳܫܶܐ ܕܟܝܬܐ ܒܘ ܒܰܝܬܐ. ܐܶܠܐ ܠܐ ܩܰܕܝܪܝ ܥܰܠ ܕܐܘ ܣܰܘܓܐ ܕܝ ܕܷܪܬܐ ܥܶܠܳܝܳܘܰܐ. ܒܷܬ݂ܷܪ ܒܰܪܝܡܝ ܒܕܘܟܬ݂ܐ ܚܪܶܬܐ ܘܢܰܚܝܬܝ ܠܝ ܕܷܪܬܐ. ܥܰܙܝܙܟܐ ܣܬܶܐ ܐܝܢܰܩܠܰܐ ܕܷܚܙܰܠܠܶܗ ܕܟܳܗܘܔܡܝ ܐܰܥܠܰܝܝܶܗ، ܡܰܚܰܬܠܶܗ ܬܦܷܢܓܶܐ ܥܰܠ ܚܰܐ ܚܪܶܢܐ ܡܰܛ ܛܰܝܶܐ ܕܟܷܬܘܰܐ ܐܷܫܡܶܗ ܠܰܛܝܦܐ. ܐܘ ܒܘܓ݂ܪܐ ܥܰܒܷܪ ܒܥܰܛܡܶܗ ܕܘ ܝܰܡܝܢܐ ܘܢܰܦܷܩ ܒܥܰܛܡܶܗ ܕܘ ܣܶܡܳܠܐ. ܠܐ ܡܚܰܝܨܶܠܶܗ ܠܐ ܓܰܪܡܐ ܘܠܐ ܘܰܪܝܕ݂ܐ. ܢܰܦܷܠ ܥܰܠ ܐܝ ܐܰܪܥܐ ܒܝ ܕܷܪܬܐ ܐܶܠܐ ܠܐ ܡܰܝܷܬ݂. ܒܷܬ݂ܷܪ ܐܰܚ ܚܰܘܪܳܢܰܝܕ݂ܶܗ ܡܷܕܕܶܗ ܐܘ ܚܰܘܪܰܬ݂ܬ݂ܶܗ ܐܘ ܡܔܰܪܚܐ، ܘܥܰܪܝܩܝ ܡܝ ܕܷܪܬܐ. ܐܝܢܰܩܠܰܐ ܕܡܷܒܠܝܘܰܝܠܶܗ ܠܝ ܩܪܝܬ݂ܰܝܕ݂ܶܗ، ܐܰܬ݂ܝ ܐܘ ܝܘܙܒܰܫܝ ܘܠܰܩܷܠܠܶܗ ܒܘ ܕܰܪܒܐ، ܘܙܒܝܛܝܠܶܗ. ܡܳܒܰܠܠܶܗ ܩܰܡܰܝܬܐ ܠܝ ܩܷܣܬܰܟ݂ܰܢܰܐ ܗܘܠ ܕܢܰܝܷܚܠܶܗ. ܒܷܬ݂ܷܪ ܡܰܚܰܬܬܶܗ ܒܘ ܚܰܦܷ݁ܣ. ܐܘ ܡܝܬ݂ܐ ܣܬܶܐ ܡܳܦܰܩܩܶܐ ܠܰܢ ܐܰܕܪܳܬ݂ܶܐ ܩܘܡ ܕܘ ܬܰܪܥܐ. ܒܰܪܨܷܟܐ ܕܒܶܐ ܡܘܩܣܝ ܡܛܶܠܶܗ ܕܰܘܫܰܟ ܘܡܙ̰ܷܕܕܶܗ ܐܰܥܠܶܗ. ܘܒܷܬ݂ܷܪ ܡܳܒܰܠܠܶܗ ܠܙܰܟ݂ܘܪܰܢ ܘܩܘܷܪܪܶܗ. ܒܷܬ݂ܷܪ ܐܰܬ݂ܷܢ ܐܘ ܝܘܙܒܰܫܝ ܘܐܘ ܨܰܘܔܝ ܕܣܰܝܡܝ ܡܰܚܟܰܡܰܐ. ܡܘܪܰܕ ܕܒܶܐ ܫܘܥܐ ܘܚܰܢܢܐ ܕܒܶܐ ܫܰܡܰܠܐ ܗܰܘܷܢ ܣܳܗܕܶܐ. ܥܰܙܝܙܟܐ ܗܘܠܶܗ ܐܝܦܰܕܰܐ ܘܡܷܪܠܶܗ؛ ܠܰܛܝܦܐ ܐܳܢܐ ܣܷܡܠܝ ܒܪܷܝܢܕܰܪ. ܐܝܕ݂ܰܐ ܕܡܳܝܰܬ݂ ܘܐܝܕ݂ܰܐ ܕܦܳܝܰܫ. ܐܶܠܐ ܫܰܪܪܐ ܠܐ ܐܳܢܐ ܩܛܝܠܝ ܐܶܠܐ ܟܳܡܰܢܢܐ ܠܰܚ ܚܰܘܪܳܢܰܝܕ݂ܶܗ ܩܛܷܠܠܶܗ. ܐܝ ܡܰܚܟܰܡܰܐ ܙܒܷܛܠܰܗ ܥܰܙܝܙܟܐ. ܐܘ ܨܰܘܔܝ ܡܫܰܐܶܠܶܗ ܡܶܐ ܐܶܡܝ ܘܡܷܪܠܶܗ؛ ܠܡܰܢ ܩܛܝܠܶܗ ܐܘ ܙܠܰܡܰܝܕ݂ܰܟ ܫܰܒܐ ܕܒܶܐ ܓ݂ܙܰܠܐ؟ ܐܶܡܝ ܒܰܣܣܶܐ ܡܷܪܠܰܗ؛ ܟ݂ܰܠܝܠܶܐ ܪܰܫܐ ܩܛܝܠܶܗ. ܟ݂ܰܠܝܠܶܐ ܪܰܫܐ ܐܰܓ݂ܰܐ ܕܰܐܢ ܐܰܠܷܟܝܝܶܘܰܐ. ܙܳܠܘܡܐ ܘܢܳܫܐ ܒܝ ܕܘܟܬ݂ܰܬ݂ܶܐ ܕܝܕ݂ܰܢ ܠܐ ܡܰܔܪܶܘܰܐ ܕܡܷܔܓ݂ܰܠ ܡܝܢܶܗ. ܟܘܠ ܢܳܫܐ ܙܳܝܰܥܘܰܐ ܡܝܢܶܗ. ܐܝܢܰܩܠܰܐ ܕܐܘ ܨܰܘܔܝ ܡܫܰܐܶܠܶܗ ܡܰܣ ܣܳܗܕܶܐ ܡܷܪܪܶܗ؛ ܫܳܪܝܟܶܐ ܕܘ ܕܘܳܪܳܘܰܝܢܰܐ ܥܰܡ ܫܰܒܐ ܕܒܶܐ ܓ݂ܙܰܠܐ. ܨܰܦܪܰܝܬܐ ܡܶܩܷܡ ܕܷܐܙܙܰܢܐ ܠܘ ܕܘܳܪܐ، ܫܰܡܝܥܝܢܰܐ ܩܳܠܶܗ ܕܷܒܪܰܗܝܡ ܕܟܳܕܳܪܶܐ ܗܰܘܰܪ. ܐܰܙܙܰܢܐ ܥܰܠ ܐܘ ܗܰܘܰܪ ܓܰܒ ܐܝ ܥܝܬܐ، ܘܚܙܶܠܰܢ ܕܟ݂ܰܠܝܠܶܐ ܪܰܫܐ ܡܩܰܕܰܡܠܶܗ ܘܡܰܚܰܬܠܶܗ ܐܝ ܬܦܷܢܓܶܐ ܥܰܠ ܫܰܒܐ ܘܩܛܝܠܶܗ. ܒܷܬ݂ܷܪ ܙܒܷܛܠܰܢ ܐܰܘܘܟܰܬ ܐܷܫܡܶܗ ܢܝܝܰܙܝ ܠܰܫܰܢ ܕܷܡܕܰܦܰܥܠܰܢ ܒܝ ܡܰܚܟܰܡܰܐ. ܐܝ ܡܰܚܟܰܡܰܐ ܒܡܷܕ݂ܝܰܕ݂ܘܰܐ. ܥܰܠ ܕܥܰܪܰܒܰܬ ܠܰܬܘܰܐ ܒܘ ܙܰܒܢܰܘܐ، ܐܳܢܐ ܘܐܰܚܘܢܝ ܓܰܒܪܐܝܶܠ ܘܶܐܡܝ ܒܰܣܣܶܐ ܘܚܰܙܢܝـܝܶܐ ܕܒܶܐ ܒܪܰܗܷܡ ܘܬܪܶܐ ܣܳܗܕܶܐ ܥܰܡ ܬܠܳܬ݂ܐ ܫܬܪܰܟܳܝܶܐ، ܐܷܙܙܰܘܰܝܢܰܐ ܒܰܪ ܪܰܓ݂ܠܶܐ ܠܡܷܕ݂ܝܰܕ݂. ܒܷܬ݂ܷܪ ܫܰܬܐ ܐܰܬ݂ܝܐ ܐܝ ܡܰܚܟܰܡܰܐ ܠܝ ܩܪܝܬ݂ܐ ܕܣܰܝܡܐ ܟܰܫܷܦ. ܡܷܪܰܠܠܝ ܙܘܟ݂ ܠܝ ܕܘܟܬ݂ܐ ܕܟܷܬܘܰܝܬ ܪܳܥܝܐ ܐܝܢܰܩܠܰܐ ܕܰܐܬ݂ܷܢ ܐܰܛ ܛܰܝܶܐ ܘܕܪܶܠܘܟ݂ ܗܰܘܰܪ ܥܰܠ ܐܝ ܩܪܝܬ݂ܐ. ܐܰܬ݂ܝ ܚܰܐ ܡܰܥܡܘܪ ܐܰܥܡܝ ܘܰܐܙܙܰܢܐ ܠܰܠܬܰܚ ܡܘ ܓܰܪܢܳܣܐ ܕܘ ܒܷܠܒܷܠ. ܐܘ ܡܰܥܡܘܪ ܡܷܪܠܶܠܝ؛ ܡܷܢ ܣܷܡܠܘܟ݂ ܐܝܢܰܩܠܰܐ ܕܷܚܙܶܠܘܟ݂ ܐܰܛ ܛܰܝܶܐ ܕܰܐܬ݂ܷܢ ܡܝ ܢܰܩܰܒܶܐ ܘܗܔܷܡܡܶܐ ܠܝ ܩܪܝܬ݂ܐ؟ ܐܳܡܰܢܢܐ؛ ܐܳܢܐ ܓܰܒ ܐܘ ܓܰܪܢܳܣܳܘܰܝܢܐ. ܐܝܢܰܩܠܰܐ ܕܷܚܙܰܠܠܝ، ܣܰܠܷܩ ܢܐ ܥܰܠ ܐܘ ܫܘܪܰܢܐ. ܐܘ ܡܰܥܡܘܪ ܚܪܶܢܐ ܣܬܶܐ ܡܳܣܰܩܠܶܗ ܚܰܢܢܐ ܘܡܘܪܰܕ ܥܰܠ ܐܝ ܓܳܪܐ. ܒܷܬ݂ܷܪ ܐܘ ܡܰܥܡܘܪ ܡܷܪܠܶܠܝ؛ ܐܘܥܕܐ ܕܪܰܝ ܗܰܘܰܪ ܟ݂ܘܕ ܐܘ ܝܰܘܡܐ ܕܷܩܛܝܠ ܒܰܒܘܟ݂. ܚܳܙܝܢܰܐ ܒܶܐ ܐܰܣ ܣܳܗܕܶܐ ܫܪܳܠܐ ܓܫܷܡܥܝ ܩܳܠܘܟ݂. ܐܳܢܐ ܣܬܶܐ ܡܰܙܥܰܩܠܝ ܘܡܗܰܘܰܪܠܝ ܡܶܐ ܬܰܡܐ: ܗܰܘܰܪܰܐ... ܗܰܘܰܪܰܐ.... ܬܳܟ݂ܘ ܠܰܐܦܶܠܝ. ܟܬ݂ܘܘܶܗ ܐܘ ܡܶܕܶܐ ܕܠܳܙܰܡܘܰܐ ܘܰܐܙܙܷܢ ܕܰܥܝܪܝ ܠܡܷܕ݂ܝܰܕ݂. ܐܶܡܝ ܒܰܣܣܶܐ ܡܷܪܠܰܗ؛ ܐܘ ܝܰܘܡܐ ܕܷܩܛܝܠ ܫܰܒܐ، ܐܰܙܙܝܢܐ ܓܰܒܒܶܗ ܡܝܪܟܶܐ. ܐܰܬܪܶܐ ܩܰܫܶܐ ܟܰܢܢܶܗ ܝܰܬܝܘܶܐ. ܡܷܪܠܝ ܠܩܰܫܐ ܝܘܣܷܦ؛ ܐܰܒܘܢܰܐ ܩܛܷܠܠܶܗ ܫܰܒܐ ܡܷܢ ܣܰܝܡܳܢܐ؟ ܡܷܪܠܶܗ؛ ܐܰܠܐ ܓ݂ܰܒܝܢܶܗ ܘܚܰܝܦ ܕܫܰܒܐ. ܒܷܬ݂ܷܪ ܝܰܘܡܐ ܝܰܢܝ ܒܷܬܠܳܬ݂ܐ ܘܥܷܣܪܝ ܒܘ ܝܰܪܚܐ ܕܳܐܕ݂ܳܪ ܕܝ ܫܰܬܐ 1965 ܡܠܰܘܶܠܰܢ ܒܰܒܝ ܘܩܘܷܪܠܰܢ. ܗܰܘܝ ܣܳܗܕܐ ܩܷܡ ܐܝ ܩܪܝܬ݂ܐ ܐܶܠܐ ܚܰܐ ܡܰܩ ܩܘܣܢܳܝܶܐ ܕܟܷܬܘܰܝܢܶܗ ܒܘ ܓܰܒܐ ܚܪܶܢܐ ܠܰܐܬ݂ܷܢ ܠܝ ܔܰܢܰܙܰܐ ܕܒܰܒܝ. ܒܘ ܝܰܘܡܐ ܕܘ ܩܰܛܠܐ ܕܒܰܒܝ، ܐܰܚܘܢܳܢܝ ܓܰܒܪܐܝܶܠ ܘܐܰܠܝܰܣ ܘܢܘܪܶܐ ܐܝ ܐܰܬܬ݂ܐ ܕܓܰܒܪܐܝܶܠ، ܐܰܙܙܷܢܘܰܐ ܠܘ ܟܰܪܡܐ ܕܝ ܚܰܒܰܪܶܐ ܠܘ ܕܘܳܪܐ. ܗܶܫ ܡܶܩܷܡ ܕܒܳܕܷܢ ܒܘ ܕܘܳܪܐ، ܫܰܡܝܥܝ ܩܳܠܶܐ ܕܰܬܦܷܢܓܰܬ. ܓܰܒܪܐܝܶܠ ܥܰܠ ܩܳܠܶܐ ܕܰܬܦܷܢܓܰܬ ܕܰܥܷܪ ܠܰܦ ܐܝ ܩܪܝܬ݂ܐ. ܐܶܡܝ ܣܬܶܐ ܡܝ ܩܪܝܬ݂ܐ ܐܰܙܙܰܗ ܒܷܬ݂ܷܪܰܝܝܶܗ. ܠܰܩܝܳܠܶܗ ܒܘ ܕܰܪܒܐ ܘܡܷܪܠܰܠܶܗ؛ ܠܰܘܐ ܐܰܛ ܛܰܝܶܐ ܩܛܷܠܠܶܗ ܒܰܒܰܝܟ݂ܘ. ܕܳܐܬ݂ܘܬܘ ܠܝ ܩܪܝܬ݂ܐ، ܕܠܳܩܷܢ ܐܰܒܟ݂ܘ ܓܷܕܩܘܛܠܝ ܗܰܬܘ ܣܬܶܐ. ܕܣܰܝܡܘܬܘ ܒܕܝܕ݂ܝ، ܙܳܟ݂ܘ ܠܝ ܩܪܝܬ݂ܐ ܕܓܘܢܕܷܟܶܐ ܟ݂ܰܔܔܶܐ ܓܰܒ ܩܰܣܷܡܟܶܐ ܐܳܣܡܶܢ ܕܟܷܬܝܐ ܪܳܚܡܐ ܕܒܰܒܰܝܟ݂ܘ ܒܰܠܟܝ ܣܷܬܪܘܬܘ ܬܰܡܐ ܘܟ݂ܘܠܨܘܬܘ. ܒܷܬ݂ܷܪ ܓܰܒܪܐܝܶܠ ܟܳܐܡܰܪ؛ ܩܠܷܥܠܰܢ ܐܰܩ ܩܰܢܝܳܢܶܐ ܩܰܡܘܬ݂ܰܢ ܘܰܐܙܙܰܢܐ ܠܓܘܢܕܷܟܶܐ ܕܟܰܔܔܶܐ. ܒܪܝܫܶܗ ܕܘ ܛܘܪܐ، ܠܰܩܝܢܰܐ ܠܰܣ ܣܰܗܝܕܰܬ ܕܗܷܢܢܷܟ ܣܬܶܐ ܟܳܪܘܗܛܝ ܕܷܐܙܙܷܢ ܠܘ ܬܰܠܰܢ ܕܒܶܩܘܣܝܳܢܶܐ. ܡܫܰܝܰܠܠܶܗ ܘܡܷܪܰܠܠܰܢ؛ ܡܷܢ ܗܰܘܝ ܒܒܶܩܘܣܝܳܢܶܐ؟ ܐܰܙ ܙܰܟ݂ܘܪܰܢܝـܝܶܐ ܐܰܬ݂ܷܢ ܠܘ ܬܰܠܰܢ ܕܒܶܩܘܣܝܳܢܶܐ؟ ܡܰܕܥܰܪܠܝ ܐܰܥܠܰܝܝܶܗ؛ ܠܰܝܬ ܗܰܘܟ݂ܰܐ ܡܶܕܶܐ. ܐܰܩ ܩܘܣܢܳܝܶܐ ܡܩܰܬܰܠܠܶܗ ܥܰܡ ܚܕ݂ܳܕ݂ܶܐ. ܘܡܶܕܶܐ ܚܪܶܢܐ ܠܰܝܬܐ. ܠܐ ܡܷܬܝܰܩܰܢܢܶܗ ܡܝܢܰܢ، ܘܰܐܙܙܷܢ ܪܰܗܳܛܶܐ ܠܝ ܩܪܝܬ݂ܐ. ܚܙܰܠܠܶܗ ܕܚܰܐ ܛܰܝܐ ܩܛܝܠ ܒܝ ܩܪܝܬ݂ܐ. ܒܷܬ݂ܷܪ ܕܠܐ ܟܠܳܝܐ ܕܰܥܝܪܝ ܘܪܰܗܝܛܝ ܒܷܬ݂ܪܰܢ. ܗܷܫ ܠܐ ܡܰܛܝܢܰܐ ܠܝ ܩܪܝܬ݂ܐ، ܫ̰ܝܟܝ ܩܘܡܰܢ ܘܡܷܕܕܶܗ ܐܰܩ ܩܰܢܝܳܢܰܝܕ݂ܰܢ ܡܝܢܰܢ. ܐܰܚܢܰܐ ܣܬܶܐ ܥܰܪܝܩܝܢܰܐ ܘܰܐܙܙܰܢܐ ܠܘ ܒܰܝܬܐ ܕܩܰܣܷܡܟܐ. ܗܝܝܶܗ ܠܰܬܘܰܐ ܒܘ ܒܰܝܬܐ. ܐܝ ܒܰܪܬ݂ܰܝܕ݂ܶܗ ܐܷܫܡܰܐ ܥܰܛܛܳܘܰܐ. ܐܝܢܰܩܠܰܐ ܕܷܗܔܷܡܡܶܗ ܥܰܠ ܐܘ ܒܰܝܬܐ، ܟܰܠܝܐ ܒܘ ܬܰܪܥܐ ܩܰܡܘܬ݂ܰܝܝܶܗ ܘܡܷܪܠܰܗ؛ ܠܐ ܟܳܡܳܩܰܒܠܳܢܐ ܕܢܳܫܐ ܡܷܢܟ݂ܘ ܡܩܰܪܰܫ ܘܓܳܝܰܫ ܒܰܢ ܢܳܫܰܢܝ ܕܰܐܬ݂ܷܢ ܓܰܒܰܝܢܰܐ. ܘܠܐ ܛܪܶܠܰܗ ܢܳܫܐ ܡܷܢܢܶܗ ܕܷܡܩܰܪܰܫ ܐܶܒܰܢ. ܒܷܬ݂ܷܪ ܐܰܕ ܕܶܪܨܰܠܝܒܝـܝܶܐ ܫܰܡܝܥܝ ܐܘ ܓܘܢܚܐ ܕܗܰܘܝ ܒܒܶܩܘܣܝܳܢܶܐ. ܘܫܰܡܝܥܝ ܕܥܰܪܝܩܝܢܰܐ ܠܓܘܢܕܷܟܶܐ ܟ݂ܰܔܔܶܐ. ܐܰܬ݂ܝ ܓܰܘܪܝـܝܶܐ ܡܝ ܕܰܝܪܐ ܕܘ ܨܠܝܒܐ ܘܡܷܪܠܶܠܰܢ؛ ܐܰܙ ܙܰܟ݂ܘܪܰܢܝـܝܶܐ ܕܫܷܡܥܝ ܗܰܪܟܶܐ ܗܰܬܘ، ܓܷܕܳܐܬ݂ܷܢܟ݂ܘ. ܕܡܰܨܝܬ݂ܘܬܘ ܐܰܥܠܝ، ܬܳܟ݂ܘ ܐܰܥܡܝ ܙܰܢܐ ܠܝ ܕܰܝܪܐ ܕܘ ܨܠܝܒܐ ܘܬܰܡܐ ܓܬܳܠܝܢܰܢܟ݂ܘ. ܐܰܚܢܰܐ ܣܬܶܐ ܐܰܙܙܰܢܐ ܐܰܥܡܶܗ ܠܝ ܕܰܝܪܐ ܕܘ ܨܠܝܒܐ. ܩܰܣܷܡܟܐ ܣܬܶܐ، ܐܰܬ݂ܝ ܠܘ ܒܰܝܬܐ ܘܡܫܰܐܶܠܶܗ ܐܰܥܠܰܢ. ܐܝ ܒܰܪܬ݂ܐ ܡܷܪܠܰܠܶܗ؛ ܐܰܠܐ ܐܰܙܙܷܢ ܠܝ ܕܰܝܪܐ ܕܘ ܨܠܝܒܐ. ܒܠܰܠܝܐ ܘܒܘ ܡܰܛܪܐ ܪܰܘܷܟ݂ ܕܠܐ ܟܠܳܝܐ ܥܰܠ ܐܘ ܚܡܳܪܐ ܘܰܐܬ݂ܝ ܠܝ ܕܰܝܪܐ ܕܘ ܨܠܝܒܐ ܒܷܬ݂ܪܰܝܢܰܐ. ܐܰܬ݂ܝ ܠܝ ܕܰܝܪܐ ܘܡܚܶܠܶܗ ܥܰܠ ܐܘ ܬܰܪܥܐ. ܡܷܪܪܶܗ ܡܰܢܗܰܬ؟ ܐܳܡܰܪ؛ ܩܰܣܷܡܟܐ ܢܐ. ܡܷܪܠܝ؛ ܗܰܢܐ ܐܘ ܚܰܘܪܐ ܕܒܰܒܝ ܝܐ ܦܬܰܚܷܠܠܶܗ ܐܘ ܬܰܪܥܐ ܛܪܳܬ݂ܶܐ. ܐܰܬ݂ܝ ܠܰܘܓ݂ܷܠ ܘܐܘ ܠܰܠܝܰܘܐ ܦܰܐܝܷܫ ܗܝܝܶܗ ܣܬܶܐ ܒܝ ܕܰܝܪܐ ܕܘ ܨܠܝܒܐ ܓܰܒܰܝܢܰܐ. ܨܰܦܪܰܝܬܐ ܐܳܡܰܪ: ܡܰܠܶܟ݂ܘ ܓܷܙܙܰܢܐ ܓܰܒܰܝܢܰܐ ܠܘ ܒܰܝܬܐ. ܐܰܕ ܕܶܪܨܰܠܝܒܝـܝܶܐ ܡܷܪܪܶܗ؛ ܚܰܝܪܰܐ ܟܝܬܐ ܩܰܛܠܐ ܒܝ ܚܳܠܐ. ܐܰܙ ܙܰܟ݂ܘܪܰܢܝـܝܶܐ ܕܫܷܡܥܝ ܓܰܒܘܟ݂ܢܶܗ، ܓܩܘܛܠܝ ܐܰܢ ܢܰܥܝܡܰܢܝ ܟ݂ܘܕ ܩܛܷܠܠܶܗ ܐܘ ܒܰܒܰܬ݂ܬ݂ܶܗ. ܡܰܕܥܰܪܠܶܗ ܐܰܥܠܰܝܝܶܗ ܘܡܷܪܠܶܗ؛ ܒܰܐܠܳܗܐ ܗܘܠ ܕܠܐ ܩܘܛܠܝ ܐܳܢܐ ܠܐ ܟܳܛܳܪܶܢܐ ܢܳܫܐ ܕܓܳܝܰܫ ܐܰܦ݁ܦ݁ܶܗ. ܒܷܬ݂ܷܪ ܐܰܬ݂ܝ ܐܰܥܡܰܝܝܶܗ ܘܡܛܷܠܠܶܗ ܠܝ ܩܪܝܬ݂ܐ ܗܘܠ ܠܘ ܒܰܝܬܐ. ܠܰܚܕܐ ܐܰܨܠܰܢ ܕܒܶܐ ܝܘܚܶܐ ܣܬܶܐ، ܐܰܙܙܶܗ ܒܷܬ݂ܪܗ ܕܰܛ ܛܰܝܶܐ ܕܡܳܒܰܠܠܶܗ ܐܰܩ ܩܰܢܝܳܢܶܐ ܡܝܕܝܠܶܗ ܡܷܢܢܶܗ ܘܡܰܕܰܥܪܝܠܶܗ. ܐܶܠܐ ܐܰܥ ܥܶܙܶܐ ܘܗܷܢ ܡܰܩ ܩܰܢܝܳܢܶܐ ܠܐ ܕܰܥܝܪܝ. ܐܘ ܙܰܒܢܐ ܕܰܐܬ݂ܝ ܐܘ ܓܘܢܚܰܢܐ ܒܪܝܫܰܢ، ܥܷܡܪܝ ܬܡܳܢܰܥܣܰܪ ܐܷܫܢܶܘܰܐ. ܩܛܝܠ ܒܰܒܝ ܘܡܰܥܪܰܩܩܶܗ ܐܘ ܣܰܘܰܠܰܝܕ݂ܰܢ. ܘܦܰܐܝܫܝܢܰܐ ܐܳܢܐ ܘܬܠܳܬ݂ܐ ܐܰܚܘܢܳܢܶܐ ܘܬܰܪܬܶܐ ܐܰܚܘܳܬ݂ܶܐ ܝܰܬܘܡܶܐ ܥܰܡ ܐܶܡܝ. ܒܝ ܥܠܰܝܡܘܬ݂ܰܝܕ݂ܝ ܛܥܷܡܠܝ ܐܝ ܡܰܐܝܪܘܬ݂ܐ ܕܰܚ ܚܰܝܶܐ. ܐܘ ܓܘܢܚܐ ܕܥܰܝܷܫ ܢܶܐ ܒܘ ܝܰܘܡܐ ܕܘ ܩܰܛܠܐ ܕܒܰܒܝ، ܐܰܠܳܗܐ ܠܐ ܡܰܡܛܶܠܶܗ ܒܪܝܫܶܗ ܕܢܳܫܶܐ. ܐܶܠܐ ܠܐ ܥܰܪܷܩܢܐ ܘܠܐ ܓ݂ܒܝܢܢܐ ܡܰܚ ܚܰܝܶܐ. ܡܥܰܘܰܢܠܝ ܐܰܚܘܢܳܢܝ. ܘܡܷܕܠܝ ܐܘ ܡܘܗܘܪ ܕܝ ܡܘܟ݂ܬܰܪܝܝܶܐ ܕܡܝܕܘܰܐ ܒܙܰܒܢܐ ܡܶܐ ܒܰܒܝ. ܡܙܰܘܰܓ݂ ܢܐ ܘܐܰܠܳܗܐ ܗܘܠܶܠܝ ܫܰܘܥܐ ܐܰܒܢܶܐ ܘܬܰܪܬܶܐ ܒܢܳܬ݂ܶܐ. ܡܳܪܰܘܠܝ ܐܰܢ ܢܰܥܝܡܰܝܕ݂ܝ ܘܠܐ ܡܫܰܕܰܪܠܝ ܚܰܐ ܡܷܢܢܶܗ ܠܰܐܘܪܘܦ݁ܰܐ. ܘܟ݂ܕܷܡܠܝ ܐܝ ܩܪܝܬ݂ܐ ܕܒܶܩܘܣܝܳܢܶܐ ܒܙܰܒܢܶܐ ܓ݂ܰܠܰܒܶܐ ܥܰܣܩܐ، ܡܶܐ ܟܘܠܶܗ ܠܶܒܝ ܘܒܟܘܠܶܗ ܐܘ ܚܰܝܠܰܝܕ݂ܝ ܫܘܰܥ ܘܬܠܶܬ݂ܝ ܐܷܫܢܶܐ ܟ݂ܘܕ ܡܘܟ݂ܬܰܪ. ܡܰܠܦܳܢܐ ܫܷܟܪܝ ܐܰܩܛܰܫ 2000 ܡ̈ܠܐ.