Šëkri Aqtaš: ܐܘ ܡܰܟ݂ܬܰܒܙܰܒܢܐ ܕܝ ܦܰܛܷܪܝܰܪܟ݂ܘܬ݂ܐ ܕܝ ܥܝܬܐ ܣܘܪܝܰܝܬܐ ܐܳܪܬܳܕܘܟܣܰܝܬܐ ܕܰܐܢܛܰܐܟܝܰܐ / U maxtabzabno di faṭëryarxuṯo di Cito Suryayto Ortoduksayto d Anṭakya

U maxtabzabno di faṭëryarxuṯo di Cito Suryayto Ortoduksayto d Anṭakya

ܒܝ ܩܰܡܰܝܬܐ، ܫܶܡܥܘܢ ܦܶܛܪܘܣ ܕܟܷܬܝܐ ܐܘ ܪܝܫܐ ܕܰܬܪܰܥܣܰܪ ܫܠܝܚܶܐ ܕܷܡܫܝܚܐ، ܡܫܰܬܰܣܠܶܗ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܒܝ ܫܰܬܐ ܕܰܫܘܰܥ ܘܬܠܶܬ݂ܝ ܒܷܬ݂ܷܪ ܡܶܐ ܡܫܝܚܐ. ܒܝ ܡܕ݂ܝܬܐ ܕܰܐܢܛܰܟܝܰܐ ܕܟܷܬܘܰܐ ܒܘ ܙܰܒܢܰܘܐ ܐܘ ܪܝܫܐ ܕܰܡܕ݂ܝܢܳܬ݂ܐ ܕܣܘܪܝܝܰܐ، ܘܗܝܝܶܗ ܝܐ ܐܘ ܦܰܛܷܪܝܰܪܟ݂ܐ ܩܰܡܳܝܐ. ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܦܰܐܝܷܫ ܗܘܠ ܠܝ ܫܰܬܐ ܕܚܰܡܷܫܡܐ ܘܬܡܳܢܰܥܣܰܪ ܒܐܰܢܛܰܟܝܰܐ. ܐܘ ܡܰܠܟܐ ܕܰܒ ܒܝܙܰܢܛܳܝܶܐ ܝܘܤܛܝܢܝܰܢܘܣ، ܥܰܠ ܐܰܦ ܦܠܝܓ݂ܘܳܬ݂ܐ ܕܗܰܘܝ ܒܝ ܡܫܝܚܳܝܘܬ݂ܐ، ܡܚܰܠܰܩܠܶܗ ܦܰܛܷܪܝܰܪܟ݂ܐ ܣܶܘܶܪܝܘܣ ܕܟܷܬܝܐ ܐܘ ܬܳܓ݂ܐ ܕܰܣ ܣܘܪܝܳܝܶܐ ܠܘ ܢܰܦܝ، ܡܶܐ ܐܰܢܛܰܟܝܰܐ ܠܡܷܨܷܪ. ܘܡܶܐ ܬܰܡܐ ܡܕܰܒܰܪܠܶܗ ܐܝ ܥܝܬܐ ܗܘܠ ܕܷܡܫܰܢܶܠܶܗ. ܒܷܬ݂ܷܪ ܡܘ ܩܰܛܪܰܢܐ، ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܠܐ ܦܰܐܝܷܫ ܒܐܰܢܛܰܟܝܰܐ. ܡܝ ܫܰܬܐ ܕܚܰܡܷܫܡܐ ܗܘܠ ܠܝ ܫܰܬܐ ܕܫ̰ܰܥܡܐ ܘܫ̰ܰܥ ܐܷܫܬܝ، ܦܰܐܝܷܫ ܒܰܕ ܕܰܝܪܶܐ ܘܒܰܐ ܡܕ݂ܝܢܳܬ݂ܶܐ ܕܚܶܕ݂ܰܪ ܐܰܢܛܰܟܝܰܐ. ܦܰܛܷܪܝܰܪܟ݂ܐ ܝܘܚܰܢܳܢ ܕܰܫ ܫܰܘܥܐ، ܥܰܡ ܐܰܪܒܥܐ ܚܰܣܝܶܐ ܡܘ ܓܰܒܐ ܕܘ ܡܰܠܟܐ ܡܚܰܠܰܩ ܠܘ ܚܰܦܷ݁ܣ. ܒܷܬ݂ܷܪ ܡܶܐ ܕܢܰܦܷܩ، ܙܷܪܠܶܗ ܐܝ ܕܰܝܪܐ ܕܡܳܪܝ̱ ܒܰܪܨܰܘܡܐ ܕܡܰܠܰܛܝܰܐ. ܪܚܷܡܠܶܗ ܓ݂ܰܠܰܒܶܐ ܐܝ ܕܰܝܪܐ، ܐܶܠܐ ܠܐ ܡܰܚܰܬܠܶܗ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܐܶܒܰܗ. ܡܳܒܶܠܶܗ ܘܡܰܪܟܰܘܠܶܗ ܒܝ ܕܰܝܪܐ ܕܒܰܪܷܕ ܕܟܷܬܘܰܐ ܢܰܥܷܡܬܷܪ ܡܝ ܕܰܝܪܐ ܕܡܳܪܝ̱ ܒܰܪܨܰܘܡܐ. ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܦܰܐܝܷܫ ܒܝ ܕܰܝܪܐ ܕܒܰܪܷܕ ܗܘܠ ܠܝ ܫܰܬܐ ܕܫ̰ܰܥܡܐ ܘܚܰܡܷܫ ܘܬܡܳܢܝ، ܕܟܷܬܝܐ ܒܥܰܝܢܝ ܙܰܒܢܐ ܐܝ ܫܰܬܐ ܕܘ ܫܘܢܳܝܐ ܕܦܰܛܷܪܝܰܪܟ݂ܐ ܝܘܚܰܢܳܢ ܫܒܝܥܳܝܐ. ܦܰܛܷܪܝܰܪܟ݂ܐ ܕܝܘܢܘܣܝܘܣ ܕܰܐܢ ܐܰܪܒܥܐ، ܡܘ ܟܒܘܫܝܐ ܕܰܒ ܒܝܙܰܢܛܳܝܶܐ، ܒܝ ܫܰܬܐ ܕܰܐܢ ܐܰܠܦܐ ܘܰܐܪܒܰܥ ܘܬܠܶܬ݂ܝ، ܢܩܝܠܶܗ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܕܝ ܥܝܬܐ ܣܘܪܝܳܝܬܐ ܡܶܐ ܡܰܠܰܛܝܰܐ ܠܕܷܝܰܪܒܰܟܷܪ ܠܝ ܥܝܬܐ ܡܫܰܡܰܗܬܐ ܕܝ ܝܳܠܕܰܬ ܐܰܠܳܗܐ. ܦܰܛܷܪܝܰܪܟ݂ܐ ܕܝܘܢܘܣܝܘܣ ܪܒܝܥܳܝܐ، ܒܘ ܙܰܒܢܐ ܕܝ ܦܰܛܷܪܝܰܪܟ݂ܘܬ݂ܰܝܕ݂ܶܗ، ܙܷܪܠܶܗ ܐܝ ܕܰܝܪܐ ܕܘ ܙܰܥܦܰܪܰܐܢ، ܘܪܚܝܡܳܠܶܗ ܓ݂ܰܠܰܒܶܐ. ܒܝ ܫܰܬܐ ܕܰܐܢ ܐܰܠܦܐ ܘܚܕ݂ܐ ܬܷܫܥܝ، ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܢܩܝܠ ܠܝ ܕܰܝܪܐ ܕܡܳܪܝ̱ ܒܰܪܨܰܘܡܐ ܒܐܝܕ݂ܶܗ ܕܦܰܛܷܪܝܰܪܟ݂ܐ ܐܰܒܘ ܐܠܦܰܪܰܔ ܐܷܒܷܢ ܓܰܡܡܰܪ ܐܘ ܕܝܰܪܒܶܟܷܪܠܝ. ܥܰܠ ܕܒܘ ܙܰܒܢܰܘܐ، ܐܝ ܕܰܝܪܐ ܕܡܳܪܝ̱ ܒܰܪܨܰܘܡܐ ܪܰܒܬ݂ܐ ܘܡܥܰܕܰܠܬܳܘܰܐ ܠܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ. ܐܝ ܘܰܠܰܝܶܐ ܕܡܰܠܰܛܝܰܐ ܣܬܶܐ، ܚܕ݂ܐ ܡܰܘ ܘܰܠܰܝܰܬ ܪܰܒܶܐ ܕܘ ܟܘܪܣܝ ܕܰܐܢܛܰܟܝܰܘܰܐ. ܥܰܝܫܝܘܰܐ ܐܶܒܰܗ ܔܓ݂ܘܪ ܡܰܢ ܢܰܥܝܡܶܐ ܘܡܰܢ ܢܝܫܶܐ، ܠܰܦ ܐܷܫܬܝ ܐܰܠܦܐ ܓܰܘܪܶܐ ܘܥܠܰܝܡܶܐ. ܟܷܬܘܰܐ ܣܬܶܐ ܒܝ ܘܰܠܰܝܶܐ ܫܶܬ݂ ܘܚܰܡܫܝ ܥܝܬܳܬ݂ܶܐ. ܢܰܦܷܩ ܡܶܐ ܡܰܠܰܛܝܰܐ ܫܰܘܥܐ ܦܰܛܷܪܝܰܪܟ݂ܐ (ܬܪܶܐ ܡܷܢܢܶܗ ܠܐ ܩܳܢܘܢܳܝܶܐ)، ܬܠܳܬ݂ܐ ܡܰܦܷܪܝܳܢܶܐ، ܬܡܰܢܝܐ ܚܰܣܝܶܐ، ܚܰܐ ܟܰܬ݂ܳܘܐ ܘܚܰܐ ܐܳܡܘܪܐ ܟܰܬ݂ܳܘܐ ܕܰܡ ܡܝܡܪܶܐ ܘܚܰܐ ܣܬܶܐ ܩܰܫܐ ܝܰܕ݂ܘܥܬ݂ܳܢܐ. ܘܢܰܦܷܩ ܣܬܶܐ ܡܝܢܰܗ ܝܰܠܝܦܶܐ ܘܝܰܕ݂ܘܥܬ݂ܳܢܶܐ ܚܪܶܢܶܐ ܟ݂ܘܕ ܐܘ ܒܰܪ ܥܶܒܪܳܝܐ. ܥܰܠ ܕܟܷܬܘܰܐ ܣܬܶܐ ܡܰܕܪܰܫܬܐ ܒܡܰܠܰܛܝܰܐ ܕܡܷܠܦܝܘܰܐ ܐܶܒܰܗ ܝܰܕ݂ܥܳܬ݂ܐ ܘܝܘܠܦܳܢܶܐ ܥܶܠܳܝܶܐ. ܦܰܛܷܪܝܰܪܟ݂ܐ ܡܝܟ݂ܳܐܝܶܠ ܪܰܒܐ ܕܡܰܘܠܰܕ݂ ܒܡܰܠܰܛܝܰܐ، ܝܰܠܷܦ ܘܩܪܶܠܶܗ ܒܝ ܕܰܝܪܐ ܕܡܳܪܝ ܒܰܪܨܰܘܡܐ. ܬܡܳܢܰܥܣܰܪ ܒܘ ܝܰܪܚܐ ܕܰܬ ܬܷܫܥܐ ܒܝ ܫܰܬܐ ܕܰܐܢ ܐܰܠܦܐ ܘܡܐ ܘܫܶܬ݂ ܘܷܫܬܝ، ܡܢܰܩܶܐ ܘܗܰܘܝ ܦܰܛܷܪܝܰܪܟ݂ܐ ܠܝ ܥܝܬܐ ܣܘܪܝܳܝܬܐ. ܒܷܬ݂ܷܪ ܡܶܐ ܕܗܰܘܝ ܦܰܛܷܪܝܰܪܟ݂ܐ، ܣܷܡܠܶܗ ܐܘ ܚܰܓܐ ܕܘ ܐܝܬܳܘܐ ܕܥܰܠ ܐܝ ܟܘܪܣܝ ܒܝ ܕܰܝܪܐ ܕܘ ܙܰܥܦܰܪܰܐܢ. ܐܘ ܚܰܣܝܐ ܕܷܕܝܰܪܒܰܟܷܪ ܡܳܪܝ ܕܝܘܢܘܣܝܘܣ ܒܰܪ ܨܰܠܝܒܝ ܣܬܶܐ ܣܷܡܠܶܗ ܡܰܡܠܐ ܒܰܣܝܡܐ ܒܘ ܚܰܓܰܝܕ݂ܶܗ. ܒܷܬ݂ܷܪ ܢܩܝܠܶܗ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܣܬܶܐ ܠܝ ܕܰܝܪܐ ܕܘ ܙܰܥܦܰܪܰܐܢ. ܐܶܠܐ ܟܘܠ ܢܰܩܩܰܐ ܙܳܝܰܪܘܰܐ ܐܝ ܕܰܝܪܐ ܕܡܳܪܝ ܒܰܪܨܰܘܡܐ ܘܠܐ ܩܳܛܰܥܘܰܐ ܐܰܪ ܪܝܫܶܐ ܡܝܢܰܗ. ܡܰܫܦܰܥܘܰܐ ܓ݂ܰܠܰܒܶܐ ܡܰܝ ܝܰܘܡܳܬ݂ܰܝܕ݂ܶܗ ܐܶܒܰܗ. ܐܰܦ ܦܰܛܷܪܝܰܪܟ݂ܐ ܕܒܷܬ݂ܷܪ ܡܶܐ ܡܳܪܝ ܡܝܟ݂ܳܐܝܶܠ ܪܰܒܐ ܣܬܶܐ، ܒܢܰܩܠܰܐ ܚܕ݂ܐ ܠܐ ܡܬܰܪܰܟܟܶܐ ܐܝ ܕܰܝܪܐ ܕܡܳܪܝ ܒܰܪܨܰܘܡܐ. ܥܰܠ ܕܟܷܬܘܰܐ ܣܬܶܐ ܡܷܢܝܳܢܐ ܪܰܒܐ ܕܥܰܡܐ ܣܘܪܝܳܝܐ ܬܰܡܐ، ܟܘܠ ܢܰܩܩܰܐ ܐܷܙܙܷܢ ܘܙܰܝܪܝܘܰܐ ܡܰܠܰܛܝܰܐ. ܦܰܛܷܪܝܰܪܟ݂ܐ ܦܝܠܘܟܣܝܢ ܢܰܡܪܘܕ، ܒܝ ܫܰܬܐ ܕܰܐܢ ܐܰܠܦܐ ܘܡܰܬ݂ܶܐ ܘܬܠܰܬ݂ ܘܬܷܫܥܝ، ܡܫܰܢܶܠܶܗ ܒܝ ܕܰܝܪܐ ܕܘ ܙܰܥܦܰܪܰܐܢ. ܒܷܬ݂ܷܪ ܡܝܢܶܗ ܒܥܰܝܢܝ ܫܰܬܐ ܡܢܰܩܶܐ ܦܰܛܷܪܝܰܪܟ݂ܐ ܐܝܓ݂ܢܰܐܛܝܘܣ ܝܰܘܣܶܦ ܒܰܪ ܘܰܗܝܒ ܠܕܘܟܬ݂ܶܗ. ܦܰܛܷܪܝܰܪܟ݂ܐ ܝܰܘܣܶܦ ܒܰܪ ܘܰܗܝܒ، ܒܝ ܫܰܬܰܝܐ ܢܩܝܠܶܗ ܪܘܫܡܳܐܝܬ݂ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܠܝ ܕܰܝܪܐ ܕܘ ܙܰܥܦܰܪܰܐܢ. ܘܦܰܐܝܷܫ ܐܘ ܟܘܪܣܝ ܗܘܠ ܠܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܰܪܬܶܐ ܘܬܠܶܬ݂ܝ ܒܝ ܕܰܝܪܐ ܕܟܘܪܟܡܐ ܕܟܳܡܝܕ݂ܳܥܐ ܕܘ ܙܰܥܦܰܪܰܐܢ. ܐܘ ܟܘܢܳܝܐ ܕܐܝܓ݂ܢܰܐܛܝܘܣ ܕܟܳܡܷܣܬܰܥܡܠܝܠܶܗ ܐܰܦ ܦܰܛܷܪܝܰܪܟ݂ܶܐ ܟܘܠܠܶܗ ܗܘܠ ܠܰܕܝܰܘܡܰܐ، ܐܝܢܰܩܩܰܐ ܩܰܡܰܝܬܐ ܝܰܘܣܶܦ ܒܰܪ ܘܰܗܝܒ ܡܷܣܬܰܥܡܶܠܶܗ. ܠܰܦ ܐܝ ܚܰܪܰܝܬܐ ܕܘ ܕܳܪܐ ܕܰܬܠܳܬ݂ܰܥܣܰܪ، ܐܝ ܥܝܬܐ ܣܘܪܝܳܝܬܐ ܒܕܶܠܰܗ ܕܡܰܢܩܨܐ ܘܕܟ݂ܘܨܪܐ ܐܘ ܚܰܝܠܰܝܕ݂ܰܗ. ܒܝ ܫܰܬܐ ܕܰܐܢ ܐܰܠܦܐ ܘܡܰܬ݂ܶܐ ܘܬܠܰܬ݂ ܘܬܷܫܥܝ، ܡܶܐ ܣܰܒܰܒܶܐ ܕܠܰܬܢܶܐ ܐܝܕ݂ܝܥܶܐ، ܐܝ ܥܝܬܐ ܣܘܪܝܳܝܬܐ ܕܰܐܢܛܰܟܝܰܐ ܦܠܝܓ݂ܐ ܠܷܬܪܶܐ ܟܘܪܶܣܝ. ܘܡܫܰܬܰܣ ܟܘܪܣܝ ܬܰܚܬܘ ܐܷܫܡܐ ܕܝ ܦܰܛܷܪܝܰܪܟ݂ܘܬ݂ܐ ܕܣܝܣ. ܣܝܣ ܡܕ݂ܝܬܐ ܕܰܐܕܰܢܰܐ ܝܐ. ܐܘ ܟܘܪܣܝ ܕܐܝ ܦܰܛܷܪܝܰܪܟ݂ܘܬ݂ܐ ܕܣܝܣ، ܡܕܰܘܰܡܠܶܗ ܡܐ ܘܬܰܪܬܶܐ ܘܚܰܡܫܝ ܐܷܫܢܶܐ. ܝܰܢܝ ܗܘܠ ܠܝ ܫܰܬܐ ܕܰܐܢ ܐܰܠܦܐ ܘܰܐܪܒܰܥܡܐ ܘܫܶܬ ܘܰܐܪܒܥܝ. ܒܘ ܙܰܒܢܐ ܕܟܷܬܘܰܐ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܒܝ ܕܰܝܪܐ ܕܘ ܙܰܥܦܰܪܰܐܢ، ܡܝ ܡܚܝܠܘܬ݂ܐ ܕܝ ܡܕܰܒܪܳܢܘܬ݂ܐ، ܦܠܝܓ݂ܐ ܐܝ ܦܰܛܷܪܝܰܪܟ݂ܘܬ݂ܐ ܘܡܫܰܬܣܐ ܚܰܬ݂ܐ ܐܝ ܦܰܛܷܪܝܰܪܟ݂ܘܬ݂ܐ ܕܛܘܪܥܰܒܕܝܢ. ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܛܘܪܥܰܒܕܝܢ، ܡܝ ܫܰܬܐ ܕܰܐܢ ܐܰܠܦܐ ܘܬܠܰܬ݂ܡܐ ܘܰܐܪܒܰܥ ܘܐܷܫܬܝ ܗܘܠ ܠܝ ܫܰܬܐ ܕܰܐܢ ܐܰܠܦܐ ܘܬܡܳܢܶܡܐ ܘܫ̰ܰܥ ܘܬܠܶܬ݂ܝ، ܒܝ ܕܰܝܪܐ ܕܡܳܪܝ ܝܰܥܩܘܒ ܚܒܝܫܳܝܐ ܕܨܰܠܷܚ ܘܰܐ. ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܬܰܪܬܶܐ ܘܬܠܶܬ݂ܝ، ܐܝ ܦܰܛܷܪܝܰܪܟ݂ܘܬ݂ܐ ܦܪܝܫܐ ܡܝ ܕܰܝܪܐ ܕܘ ܙܰܥܦܰܪܰܐܢ، ܘܢܩܝܠܐ ܠܣܘܪܺܝܰܐ. ܦܰܛܷܪܝܰܪܟ݂ܐ ܐܰܠܝܰܐܣ ܫܰܟܷܪ ܬܠܝܬ݂ܳܝܐ، ܒܥܰܝܢܝ ܫܰܬܐ ܣܷܡܠܶܗ ܙܝܰܪܰܐ ܠܘ ܥܰܡܐ ܘܠܝ ܥܝܬܐ ܣܘܪܝܳܝܬܐ ܕܘ ܗܷܢܕ. ܡܰܛܝ ܠܘ ܗܷܢܕ ܘܦܳܝܰܫܘܰܐ ܒܝ ܥܝܬܐ ܕܡܳܪܝ ܤܛܶܦܰܢܘܣ ܕܟܷܬܝܐ ܒܷܚܕ݂ܐ ܡܰܩ ܩܷܪܝܰܘܳܬ݂ܶܐ ܕܝ ܡܕ݂ܝܬܐ ܕܟܶܪܰܠܰܐ. ܗܝܝܶܗ ܒܝ ܥܝܬܐ ܕܡܳܪܝ ܤܛܶܦܰܢܘܣ، ܟܰܝܘܠܶܗ. ܠܐ ܢܰܐܝܷܚܠܶܗ ܘܬܠܳܬ݂ܰܥܣܰܪ ܒܘ ܝܰܪܚܐ ܕܷܫܘܷܛ، ܡܫܰܢܶܠܶܗ. ܩܘܝܪ ܒܝ ܕܷܪܬܐ ܕܝ ܥܝܬܐ ܕܡܳܪܝ ܤܛܶܦܰܢܘܣ، ܘܒܷܬ݂ܷܪ ܡܰܥܡܰܪܪܶܗ ܐܰܗ ܗܶܢܕܘܳܝܶܐ ܕܰܝܪܐ ܪܰܒܬ݂ܐ ܒܝ ܕܘܟܬ݂ܰܝܐ ܒܷܫܡܶܗ ܕܡܳܪܝ ܐܝܓ݂ܢܰܐܛܝܘܣ. ܒܷܬ݂ܷܪ ܡܘ ܫܘܢܳܝܐ ܕܦܰܛܷܪܝܰܪܟ݂ܐ ܐܰܠܝܰܐܣ ܬܠܝܬ݂ܳܝܐ، ܐܰܚ ܚܰܣܝܶܐ ܡܷܕܕܶܗ ܦܘܣܩܳܢܐ ܒܘ ܣܘܢܢܶܕܘܣ، ܘܢܩܷܠܠܶܗ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܠܝ ܡܕ݂ܝܬܐ ܕܚܷܡܷܨ ܕܣܘܪܺܝܰܐ. ܘܡܢܰܩܶܐ ܦܰܛܷܪܝܰܪܟ݂ܐ ܐܰܦܪܶܝܡ ܒܰܪܨܰܘܡ ܩܰܕܡܳܝܐ ܦܰܛܷܪܝܰܪܟ݂ܐ ܠܝ ܥܝܬܐ ܣܘܪܝܳܝܬܐ. ܒܷܬ݂ܷܪ ܡܐ ܕܦܰܛܷܪܝܰܪܟ݂ܐ ܐܰܦܪܶܝܡ ܒܰܪܨܰܘܡ ܡܫܰܢܶܠܶܗ ܒܝ ܫܰܬܐ ܕܰܐܢ ܐܰܠܦܐ ܘܫ̰ܰܥܡܐ ܘܫ̰ܰܥ ܘܚܰܡܫܝ، ܢܩܝܠ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܠܘ ܫܰܡ ܕܟܷܬܝܐ ܗܘܠ ܠܰܕܝܰܘܡܰܐ ܐܶܒܰܗ. ܐܘ ܩܰܪܰܪ ܕܘ ܬܰܘܒܝܠܐ ܕܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܡܶܐ ܬܘܪܟܺܝܰܐ ܠܣܘܪܺܝܰܐ، ܡܷܨܪܳܝܐ ܐܷܫܡܐ ܒܰܩ ܩܳܢܘܢܶܐ ܕܝ ܕܰܘܠܰܐ ܕܬܘܪܟܺܝܰܐ ܕܷܡܫܰܬܣܐ ܒܷܬ݂ܷܪ ܡܝ ܐܝܡܦ݁ܰܪܰܬܳܪܝܝܶܐ ܕܰܐܢ ܐܳܨܡܰܢܠܝܝܶܐ. ܟܳܟܳܬ݂ܰܘ ܒܰܩ ܩܳܢܘܢܶܐ ܚܰܬ݂ܶܐ ܕܬܘܪܟܺܝܰܐ، ܕܟܳܠܳܙܰܡ ܐܘܚܰܐ ܕܡܝܢܰܩܶܐ ܦܰܛܷܪܝܰܪܟ݂ܐ، ܗܳܘܶܠܶܗ ܗܝܝܘܬ݂ܐ ܬܘܪܟܳܝܬܐ. ܗܘܠ ܠܰܕܝܰܘܡܰܐ ܐܘ ܟܘܪܣܝ ܕܝ ܦܰܛܷܪܝܰܪܟ݂ܘܬ݂ܐ ܕܝ ܥܝܬܐ ܣܘܪܝܳܝܬܐ ܐܳܪܬܕܘܟܣܳܝܬܐ ܕܰܐܢܛܰܟܝܰܐ، ܒܘ ܫܰܡ ܝܐ. ܘܐܘ ܦܰܛܷܪܝܰܪܟ݂ܐ ܕܝ ܥܝܬܐ ܣܬܶܐ ܡܳܪܰܢ ܡܳܪܝ ܐܝܓ݂ܢܰܐܛܝܘܣ ܐܰܦܪܶܝܡ ܟܰܪܝܡ ܬܪܰܝܳܢܐ ܝܐ. ܐܝ ܦܰܛܷܪܝܰܪܟ݂ܘܬ݂ܐ ܕܛܘܪܥܰܒܕܝܢ ܒܷܬ݂ܷܪ ܡܐ ܕܐܝ ܦܰܛܷܪܝܰܪܟ݂ܘܬ݂ܐ ܕܰܐܢܛܰܟܝܰܐ ܢܩܝܠܐ ܪܘܫܡܳܐܝܬ݂ ܠܝ ܕܰܝܪܐ ܕܘ ܙܰܥܦܰܪܰܐܢ ܒܝ ܫܰܬܐ ܕܰܐܢ ܐܰܠܦܐ ܘܡܰܬ݂ܶܐ ܘܬܰܪܬܶܐ ܘܬܷܫܥܝ، ܒܝ ܫܰܬܐ ܕܰܐܢ ܐܰܠܦܐ ܘܬܠܰܬ݂ܡܐ ܘܰܐܪܒܰܥ ܘܷܐܫܬܝ، ܛܘܪܥܰܒܕܝܢ ܦܪܝܫܐ ܡܝܢܰܗ ܘܡܫܰܬܣܐ ܐܝ ܦܰܛܷܪܝܰܪܟ݂ܘܬ݂ܐ ܕܛܘܪܥܰܒܕܝܢ. ܐܶܠܐ ܐܘ ܡܶܕܶܐ ܡܰܦܰܨܚܳܢܐ ܕܗܰܘܝ، ܒܷܬ݂ܷܪ ܕܝܣܰܐ ܒܝ ܫܰܬܐ ܕܰܐܢ ܐܰܠܦܐ ܘܰܐܪܒܰܥܡܐ ܘܰܐܪܒܰܥ ܘܬܷܫܥܝ، ܡܚܰܝܕ݂ܐ ܥܰܡ ܐܝ ܦܰܛܷܪܝܰܪܟ݂ܘܬ݂ܐ ܕܝ ܥܝܬܐ ܣܘܪܝܳܝܬܐ ܕܟܷܬܘܰܐ ܒܝ ܕܰܝܪܐ ܕܘ ܙܰܥܦܰܪܰܐܢ. ܐܘ ܦܘܪܫܳܢܰܢܐ ܘܐܘ ܩܰܛܪܰܢܐ ܕܢܰܦܷܩ، ܟ݂ܘܕ ܓܡܰܚܟܝܢܰܐ ܠܰܠܬܰܚ، ܡܝ ܡܚܝܠܘܬ݂ܐ ܕܝ ܡܕܰܒܪܳܢܘܬ݂ܐ ܗܰܘܝ. ܚܰܐ ܕܰܝܪܳܝܐ ܐܷܫܡܶܗ ܓܶܘܰܪܓܝܣ، ܡܰܫܟܶܠܶܗ ܠܦܰܛܷܪܝܰܪܟ݂ܐ ܐܝܣܡܰܐܥܝܠ ܕܟܷܬܘܰܐ ܒܝ ܕܰܝܪܐ ܕܘ ܙܰܥܦܰܪܰܐܢ، ܥܰܠ ܡܳܪܝ ܒܰܣܶܠܝܘܣ ܐܘ ܚܰܣܝܐ ܕܨܰܠܷܚ ܕܟܷܬܘܰܐ ܐܘ ܟܘܪܣܝܰܝܕ݂ܶܗ ܒܝ ܕܰܝܪܐ ܕܡܳܪܝ ܝܰܥܩܘܒ ܚܒܝܫܳܝܐ ܕܨܰܠܷܚ. ܐܘ ܦܰܛܷܪܝܰܪܟ݂ܐ ܣܬܶܐ، ܠܐ ܩܪܶܠܶܗ ܠܘ ܚܰܣܝܐ ܘܠܐ ܡܰܨܷܬ݂ܠܶܗ ܥܰܠ ܐܘ ܡܶܕܶܐ ܕܡܝܪ ܒܚܰܩ ܕܝܕ݂ܶܗ، ܒܢܰܩܠܰܐ ܚܕ݂ܐ ܡܰܚܪܰܡܠܶܗ. ܐܘ ܚܰܣܝܐ ܡܳܪܝ ܒܰܣܶܠܝܘܣ، ܥܰܘܷܠ ܕܫܰܡܷܥ ܕܡܰܚܪܰܡ ܡܘ ܦܰܛܷܪܝܰܪܟ݂ܐ، ܕܠܐ ܟܠܳܝܐ ܐܰܙܙܶܗ ܠܝ ܕܰܝܪܐ ܕܘ ܙܰܥܦܰܪܰܐܢ، ܠܰܫܰܢ ܕܛܳܠܰܒ ܫܘܒܩܳܢܐ ܡܘ ܦܰܛܷܪܝܰܪܟ݂ܐ. ܦܰܐܝܷܫ ܬܠܳܬ݂ܐ ܝܰܘܡܶܐ ܩܘܡ ܕܘ ܬܰܪܥܐ ܕܝ ܕܰܝܪܐ، ܐܶܠܐ ܠܐ ܦܬܷܚܰܠܠܶܗ ܐܘ ܬܰܪܥܐ ܘܠܐ ܡܰܥܒܰܪܪܶܗ ܘܠܐ ܩܰܕܷܪ ܕܚܳܙܶܐ ܐܘ ܦܰܛܷܪܝܰܪܟ݂ܐ. ܒܷܬ݂ܷܪ ܕܰܥܷܪ ܠܛܘܪܥܰܒܕܝܢ ܘܟܬ݂ܘܠܶܗ ܐܶܓܰܪܬ݂ܐ ܥܰܠ ܐܘ ܡܶܕܶܐ ܕܗܰܘܝ ܐܰܥܡܶܗ، ܠܰܟ ܟܳܗܢܶܐ ܘܠܘ ܥܰܡܐ. ܘܟܳܛܳܠܰܒ ܡܷܢܢܶܗ ܣܬܶܐ ܕܷܡܥܰܘܢܝܠܶܗ، ܠܰܫܰܢ ܕܛܳܠܰܒ ܫܘܒܩܳܢܐ ܡܘ ܦܰܛܷܪܝܰܪܟ݂ܐ. ܐܰܟ ܟܳܗܢܶܐ ܘܐܘ ܥܰܡܐ ܡܰܩܒܰܠܠܶܗ ܘܰܐܙܙܷܢ ܐܰܥܡܶܗ ܠܝ ܕܰܝܪܐ ܕܘ ܙܰܥܦܰܪܰܐܢ ܓܰܒ ܐܘ ܦܰܛܷܪܝܰܪܟ݂ܐ. ܐܶܠܐ ܥܰܡ ܚܒܳܠ، ܦܰܐܝܫܝ ܗܷܢܢܷܟ ܣܬܶܐ ܐܰܪܒܥܐ ܝܰܘܡܶܐ ܩܘܡ ܕܘ ܬܰܪܥܐ ܕܝ ܕܰܝܪܐ ܘܠܐ ܦܬܷܚܰܢܢܶܗ ܐܘ ܬܰܪܥܐ. ܐܝܢܰܩܠܰܐ ܕܠܐ ܚܙܰܠܠܶܗ ܫ̰ܰܪܰܐ، ܛܥܷܢܢܶܗ ܐܘ ܚܰܣܝܐ ܥܰܠ ܟܰܬܦܳܬ݂ܰܝܝܶܗ ܘܡܰܟܪܰܟ݂ܟ݂ܶܗ ܚܶܕ݂ܰܪ ܐܝ ܕܰܝܪܐ ܬܠܰܬ݂ ܟܳܪܶܐ ܘܡܷܪܪܶܗ؛ ܐܘܟܣܝܘܣ ܐܘܟܣܝܘܣ ܫܳܘܶܐ ܘܙܳܕܶܩ ܡܳܪܝ ܒܰܣܶܠܝܘܣ. ܘܡܰܣܪܰܚܚܶܗ ܦܰܛܷܪܝܰܪܟ݂ܐ ܘܡܰܡܛܰܠܠܶܗ ܡܳܬܰܘܘܶܗ ܒܝ ܕܰܝܪܐ ܕܡܳܪܝ ܝܰܥܩܘܒ ܕܨܰܠܷܚ. ܒܘ ܫܷܟܠܰܢܐ ܦܪܷܫܫܶܗ ܐܝ ܡܰܪܥܝܬ݂ܐ ܕܛܘܪܥܰܒܕܝܢ ܘܣܝܡܰܠܠܶܗ ܦܰܛܷܪܝܰܪܟ݂ܘܬ݂ܐ ܦܪܷܫܬܐ ܒܘ ܐܷܫܡܐ ܕܝ ܦܰܛܷܪܝܰܪܟ݂ܘܬ݂ܐ ܕܛܘܪܥܰܒܕܝܢ. ܟܷܬܘܰܐ ܚܰܡܷܫ ܡܰܪܥܝܳܬ݂ܶܐ ܒܛܘܪܥܰܒܕܝܢ، ܘܡܷܨܪܝ ܒܝ ܦܰܛܷܪܝܰܪܟ݂ܘܬ݂ܐ ܕܛܘܪܥܰܒܕܝܢ. ܐ. ܐܝ ܡܰܪܥܝܬ݂ܐ ܕܡܳܪܝ ܓܰܒܪܺܐܝܶܠ. ܒ. ܐܝ ܡܰܪܥܝܬ݂ܐ ܕܝ ܕܰܝܪܐ ܕܘ ܨܠܝܒܐ ܘܕܚܰܐܚ. ܓ. ܐܝ ܡܰܪܥܝܬ݂ܐ ܕܒܶܝܬ݂ ܪܝܫܶܐ ܐܰܘ ܕܝ ܕܰܝܪܐ ܕܡܳܪܝ ܡܰܠܟܶܐ. ܕ. ܐܝ ܡܰܪܥܝܬ݂ܐ ܕܝ ܕܰܝܪܐ ܕܡܳܪܝ ܩܘܪܝܰܩܘܣ ܕܝ ܒܫܶܪܝܝܶܐ. ܗ. ܘܐܝ ܡܰܪܥܝܬ݂ܐ ܕܡܷܕ݂ܝܰܕ݂. ܐܝ ܦܰܛܷܪܝܰܪܟ݂ܘܬ݂ܐ ܕܛܘܪܥܰܒܕܝܢ ܡܕܰܘܰܡܠܰܗ ܒܓܰܘܶܗ ܕܰܢ ܐܷܫܢܶܐ ܕܡܰܬ݂ܟܰܪܠܰܢ ܡܶܐ ܠܰܠܥܰܠ. ܚܰܡܷܫ ܟܳܪܶܐ ܗܰܘܷܢ ܐܝܬܰܘܝܳܬ݂ܶܐ ܒܰܝܢ ܕܝ ܦܰܛܷܪܝܰܪܟ݂ܘܬ݂ܐ ܕܡܰܪܕܶܐ ܘܠܝ ܦܰܛܷܪܝܰܪܟ݂ܘܬ݂ܐ ܕܛܘܪܥܰܒܕܝܢ ܠܰܫܰܢ ܐܘ ܫܰܝܢܐ ܘܠܰܫܰܢ ܐܝ ܚܕ݂ܳܝܘܬ݂ܐ، ܐܶܠܐ ܠܰܐܬ݂ܷܢ ܠܷܚܕ݂ܳܕ݂ܶܐ ܘܠܐ ܡܚܰܝܕ݂ܝ. ܒܝ ܚܰܪܰܝܬܐ ܗܰܘܝ ܫܰܝܢܐ ܘܚܕ݂ܳܝܘܬ݂ܐ، ܒܝ ܪܝܫܳܢܘܬ݂ܐ ܘܒܘ ܙܰܒܢܐ ܕܦܰܛܷܪܝܰܪܟ݂ܐ ܡܰܣܥܘܕ ܐܘ ܙܰܐܙܳܝܐ. ܥܰܠ ܕܦܰܛܷܪܝܰܪܟ݂ܐ ܡܰܣܥܘܕ ܡܰܣܪܰܚܘܰܝܠܶܗ ܬܪܰܥܣܰܪ ܚܰܣܝܶܐ ܘܚܰܐ ܡܰܦܷܪܝܳܢܐ، ܐܘ ܥܰܡܐ ܩܚܝܪ ܡܝܢܶܗ ܘܡܰܫܟܰܠܠܶܗ ܐܰܥܠܶܗ ܠܘ ܐܰܡܝܪܐ ܕܚܰܣܢܐ ܕܟܶܦܐ ܒܝ ܫܰܬܐ ܕܰܐܢ ܐܰܠܦܐ ܘܰܐܪܒܰܥܡܐ ܘܰܐܪܒܰܥ ܘܬܷܫܥܝ. ܐܘ ܐܰܡܝܪܐ ܣܬܶܐ ܩܪܶܠܶܠܶܗ ܠܚܰܣܢܐ ܕܟܶܦܐ ܘܛܠܷܒܠܶܗ ܡܝܢܶܗ ܚܰܡܷܫܡܐ ܠܝܪܰܬ ܕܕܰܗܘܐ ܘܚܒܷܣܠܶܗ ܒܝ ܕܰܝܪܐ ܕܡܳܪܝ ܙܳܟ݂ܶܐ. ܒܷܬ݂ܷܪ ܡܶܐ ܕܦܰܐܝܷܫ ܐܰܪܒܥܐ ܝܰܘܡܶܐ ܚܒܝܣܳܝܐ، ܚܙܶܠܶܗ ܕܢܳܫܐ ܠܐ ܟܳܡܫܰܝܰܠ ܐܰܥܠܶܗ. ܐܰܙܙܶܗ ܓܰܒ ܐܘ ܐܰܡܝܪܐ ܘܡܷܪܠܶܠܶܗ؛ ܕܡܰܪܦܰܬܠܝ ܓܷܐܙܙܝܢܐ ܓܰܒ ܐܘ ܥܰܡܐ ܘܓܡܰܠܬܰܡܢܐ ܡܷܢܢܶܗ ܐܘ ܕܰܗܘܐ ܕܟܷܒܥܰܬ. ܒܷܬ݂ܷܪ ܡܶܐ ܕܰܐܙܙܶܗ ܒܰܝܢ ܕܘ ܥܰܡܐ، ܐܘ ܥܰܡܐ ܠܐ ܡܰܩܒܶܠܶܗ ܘܠܐ ܗܘܠܶܠܶܗ ܕܰܗܘܐ. ܒܷܬ݂ܷܪ ܟܬ݂ܘܠܶܗ ܐܶܓܰܪܬ݂ܐ ܠܘ ܥܰܡܐ ܘܡܷܪܠܶܗ؛ ܐܳܢܐ ܗܰܘ ܟܳܕܳܥܰܪܢܐ ܘܠܐ ܟܳܡܰܩܒܰܠܢܐ ܕܡܝܬܰܣܪܰܚ ܦܰܛܷܪܝܰܪܟ݂ܐ ܠܕܘܟܬ݂ܝ. ܡܛܰܘܘ ܘܡܰܩܒܶܠܘ ܐܘ ܦܰܛܷܪܝܰܪܟ݂ܐ ܕܡܰܪܕܶܐ. ܚܰܐ ܦܰܛܷܪܝܰܪܟ݂ܐ ܟܳܡܰܟܦܶܐ ܗܰܡ ܠܛܘܪܥܰܒܕܝܢ ܗܰܡ ܣܬܶܐ ܠܡܰܪܕܶܐ. ܟ݂ܘܕ ܟܳܐܡܰܪ ܐܘ ܡܓܰܠܝܘܢ؛ ܚܰܐ ܩܰܛܥܐ ܘܚܰܐ ܪܳܥܝܐ. ܐܘ ܚܰܐ ܣܬܶܐ ܕܠܐ ܡܰܛܷܥ ܘܕܡܰܣܪܰܚ ܦܰܛܷܪܝܰܪܟ݂ܐ ܠܕܘܟܬ݂ܝ، ܓܡܰܚܪܰܡܢܶܗ. ܒܷܬ݂ܷܪ ܐܰܙܙܶܗ ܠܷܚܕ݂ܐ ܕܰܝܪܐ ܘܒܝ ܫܰܬܐ ܕܐܰܠܦܐ ܘܚܰܡܷܫܡܐ ܘܬܪܰܥܣܰܪ ܡܫܰܢܶܠܶܗ ܒܣܘܪܺܝܰܐ. ܐܰܚ ܚܰܣܝܶܐ ܕܛܘܪܥܰܒܕܝܢ، ܡܰܩܒܰܠܠܶܗ ܐܘ ܦܘܩܕܳܢܐ ܕܦܰܛܷܪܝܰܪܟ݂ܐ ܡܰܣܥܘܕ ܘܡܨܝܪܝ ܒܝ ܦܰܛܷܪܝܰܪܟ݂ܘܬ݂ܐ ܕܡܰܪܕܶܐ. ܘܰܐܙܙܷܢ ܓܰܒ ܐܘ ܐܰܡܝܪܐ ܕܚܰܣܢܐ ܕܟܶܦܐ ܘܡܳܕ݂ܰܥܥܶܗ ܥܰܠ ܟܘܠ ܡܶܕܶܐ. ܒܷܬ݂ܷܪ ܒܝ ܫܰܬܐ ܕܰܐܢ ܐܰܠܦܐ ܘܰܐܪܒܰܥܡܐ ܘܚܰܡܷܫ ܘܬܷܫܥܝ، ܗܰܘܝ ܫܰܝܢܐ ܘܚܕ݂ܳܝܘܬ݂ܐ ܒܘ ܙܰܒܢܐ ܕܦܰܛܷܪܝܰܪܟ݂ܐ ܢܘܚ ܠܶܒܢܳܢܳܝܐ. ܥܰܡ ܚܒܳܠ، ܒܘ ܥܒܳܪܐ ܕܰܙ ܙܰܒܢܶܐ ܚܰܡܷܫ ܟܳܪܶܐ ܛܘܪܥܰܒܕܝܢ ܦܪܝܫܐ ܡܝ ܦܰܛ݂ܪܝܰܪܟ݂ܘܬ݂ܐ، ܘܕܝܣܰܐ ܡܨܝܪܐ ܐܶܒܰܗ. ܒܝ ܚܰܪܰܝܬܐ ܣܬܶܐ ܒܝ ܫܰܬܐ ܕܰܐܢ ܐܰܠܦܐ ܘܬܡܳܢܶܡܐ ܘܰܐܪܒܰܥ ܘܬܠܶܬ݂ܝ ܡܨܝܪܐ ܒܝ ܦܰܛܷܪܝܰܪܟ݂ܘܬ݂ܐ ܕܰܐܢܛܰܟܝܰܐ ܗܘܠ ܠܰܕܝܰܘܡܰܐ. ܡܠܦܢܐ ܫܟܪܝ ܐܩܛܫ 1390 ܡ̈ܠܐ.