Michael Toere: ܐܝ ܚܙܰܝܬܐ ܕܘ ܬܱܠܱܦܳܢ / I ḥzayto du täläfon

I ḥzayto du täläfon

ܐܝ ܫܰܬܐ ܒܝ ܫܰܬܐ ܐܘ ܒܰܪܢܳܫܐ ܟܷܡܗܰܠܷܟ݂ ܠܰܩܷܕܰܡ ܟܷܡܫܰܘܫܷܛ ܪܘܚܶܗ ܘܒܘ ܙܰܒܢܰܢܐ ܕܟܳܦܰܝܷܬ ܐܘ ܒܰܪܢܳܫܐ ܟܘܠ ܢܰܩܠܰܐ ܟܳܣܳܝܰܡ ܡܶܕܳܢܶܐ ܕܷܡܥܰܘܢܝ ܒܰܚ ܚܰܝܰـܝـܕ݂ܶܗ ܘܣܳܝܰܡܡܶܗ ܦܫܝܛܶܐ ܠܪܘܚܶܗ. ܕܝܠܳܢܳܐܝܬ݂ ܟܳܚܳܙܝܢܰܐ ܒܘ ܕܳܪܰܢܐ ܐܘ ܚܰܪܳܝܐ ܐܰܝܕܰܪܒܐ ܐܘ ܬܶܟܢܳܠܳܙ̰ܝ ܡܫܰܘܫܰܛ ܓ݂ܰܠܰܒܶܐ. ܚܰܐ ܡܰܐ ܡܶܕܳܢܰܢܝ ܐܰܪ ܪܰܒܶܐ ܐܘ ܬܰܠܰܦܘܢ ܝܐ. ܐܰܕܝܰܘܡܰܐ ܒܘ ܙܳܝܘܕܐ ܐܰܥ ܥܠܰܝܡܶܐ ܕܠܐ ܟܳܡܰܪܦܝܠܶܗ ܡܶܐ ܐܝܕ݂ܰܝܶܗ. ܫܪܳܪܐ ܗܰܘܝ ܠܶܗ ܦܰܝܕܰܐ ܓ݂ܰܠܰܒܶܐ، ܛܪܶܠܶܗ ܐܰܪ ܪܰܚܘܩܶܐ ܕܗܳܘܷܢ ܩܰܪܝܘܶܐ، ܡܩܰܕܰܡܠܶܗ ܒܪܝܬ݂ܐ ܠܷܚܕ݂ܳܕ݂ܶܐ، ܐܰܛ ܛܶܒܶܐ ܕܟܳܘܷܢ ܒܷܒܪܝܬ݂ܐ ܒܓܰܘܶܗ ܕܷܟܡܐ ܕܰܩܝܩܰܬ ܟܘܠ ܢܳܫܐ ܟܳܫܳܡܰܥܥܶܗ. ܟܝܒܶܗ ܚܰܐ ܐܶܡܰܐ ܕܳܒܰܥ ܕܚܳܙܶܐ ܐܰܢ ܢܳܫܶܐ ܐܘ ܐܰܗܷܠ ܐܰܪ ܪܳܚـܡܰܝܕ݂ܶܗ. ܥܰܡ ܗܰܢܝ ܟܘܠܠܶܗ ܐܝܢܰܩܰܐ ܕܘ ܒܰܪܢܳܫܐ ܕܠܐ ܡܷܣܬܰܥܡܶܠܶܗ ܟ݂ܘܕ ܕܟܳܠܳܙܰܡ. ܟܝܬ ܐܶܒܶܗ ܡܶܕܳܢܶܐ ܠܐ ܛܰܘܶܐ ܣܬܶܐ. ܚܰܐ ܟܷܙܙܶܐ ܠܝ ܔܷܒ݁ܰܬܶܐ ܟܳܚܳܙܰܬ ܟܘܠ ܚܰܐ ܟܰܠܶܗ ܥܰܝܢܶܗ ܒܘ ܬܰܠܰܦܘܢ ܕܝܕ݂ܶܗ، ܟܳܩܳܛܰܥ ܐܘ ܡܰܗܘܐ ܫܩܳܠܐ ܕܒܰܝܢܳܬ݂ܰܝـܝܶܗ. ܒܓ݂ܰܠܰܒܶܗ ܕܘܟܳܬ݂ܶܐ ܐܰܝ ܝܳܠܘܦܶܐ ܟܳܡܰܥܷܒܪܝ ܠܶܗ ܠܝ ܡܰܕܪܰܫܬܐ ܘܠܐ ܟܳܘܶܐ ܗܰܘܢܰـܝـܶܗ ܥܰܠ ܐܰܗ ܗܷܪܓܰܬ݂ܬ݂ܶܗ. ܓ݂ܰܠܰܒܶܐ ܛܘܟܳܣܶܐ ܡܰܪܷܗܒܳܢܶܐ ܐܰܘ ܡܰܦܝܰܬ ܥܰܠ ܐܝ ܣܳܣܝܰܠ ܡܶܕܝܰܐ ܐܰܘ ܒܘ ܬܰܠܰܦܘܢ ܟܳܡܳܛܷܢ ܠܝ ܥܠܰܝܡܘܬ݂ܐ ܟܳܡܰܩܷܢܥܝ ܘܟܳܡܰܕܪܝ ܓ݂ܰܠܰܒܶܐ ܢܳܫܶܐ ܡܘ ܕܰܪܒܐ. ܟܝܬ ܓ݂ܰܠܰܒܶܐ ܢܳܫܶܐ ܣܬܶܐ ܐܰܓ݂ܠܰܒ ܡܘ ܙܰܒܢܰܬ݂ܬ݂ܶܗ ܟܳܡܰܦܝܬܝܠܶܗ ܒܰܬ ܬܷܫܬܥܷܢܝܶܐ ܕܟܝܬ ܐܶܒܶܗ ܟܳܥܰܝܫܝ ܒܰܣ ܒܝ ܒܪܝܬ݂ܐ ܕܘ ܬܰܠܰܦܘܢ. ܐܘ ܬܰܠܰܦܘܢ ܓ݂ܰܠܰܒܶܐ ܢܳܫܶܐ ܟܳܡܷܪ ܓܪܰܗܰܡ ܒܶܠ ܚܙܶܠܶܗ، ܐܶܠܐ ܐܘ ܡܶܕܰܢܐ ܒܝ ܫܰܬܐ ܕܰܬܪܶܐ ܐܰܠܦܐ ܬܪܶܐ ܢܰܦܷܩ ܕܟܷܬܝܐ ܦܰܘܕܐ. ܒܷܬ݂ܷܪ ܡܶܕ ܐܰܦ݁ ܦ݁ܪܳܦܰܣܳܪ ܕܝܬܰܠܝܰܐ ܘܕܰܐܡܶܪܝܟܰܐ ܣܷܡܡܶܗ ܒܘܚܳܢܶܐ ܥܰܠ ܐܘ ܡܶܕܰܢܐ ܐܰܕ݂ܝܥܝ ܕܘ ܬܰܠܰܦܘܢ ܠܐ ܓܪܰܗܰܡ ܒܶܠ ܚܙܶܠܶܗ ܐܶܠܐ ܚܰܐ ܓܰܠܘܳܝܐ ܕܡܶܐ ܐܝܬܰܠܝܰܐ ܐܷܫܡܶܐ ܐܰܢܬܳܢܝܐ ܡܰܐܘܔܝ ܗܝـܝܶܗ ܚܙܶܠܶܗ ܐܘ ܬܰܠܰܦܘܢ. ܐܘ ܓܰܒܪܰܢܐ ܐܘ ܓܰܠܘܝܐ ܡܰܢܝܐ ܘܐܰܝܕܰܪܒܐ ܚܙܶܠܶܗ ܐܘ ܬܰܠܰܦܘܢ. ܐܰܢܬܳܢܝܐ ܡܰܐܘܔܝ ܡܰܘܠܷܕ݂ ܒܝ ܫܰܬܐ ܕܰܢ ܐܰܠܦܐ ܬܡܳܢܶܡܐ ܘܬܡܳܢܶܐ. ܒܝ ܫܰܬܐ ܕܰܢ ܐܰܠܦܐ ܬܡܳܢܶܡܐ ܘܚܕ݂ܐ ܥܷܣܪܝ ܥܰܒܷܪ ܠܘ ܒܶܝܬ ܣܶܦܪܐ ܕܷܦܠܳܪܰܢܣ ܐܰܟܰܕܶܡܝ. ܗܰܪܟܶܐ ܒܕܶܠܶܗ ܕܩܳܪܶܗ ܟܝܡܝܰܐ ܘܡܘܗܰܢܕܝܣ ܕܰܡ ܡܰܟܝܢܰܬ، ܒܷܬܷ݂ܪ ܡܶܐ ܬܰܪܬܶܐ ܐܷܫܢܶܐ ܥܰܠ ܕܐܝ ܐܝܩܰܪܬ݂ܐ ܡܳܡܘܢܳܝܬ݂ ܢܳܩܘܣܶܘܰܝܢܶܗ ܓ݂ܰܠܰܒܶܐ ܗܰܘ ܩܰܕܝܪܝ ܕܡܰܩܪܷܢ ܐܘ ܐܰܒܪܰܬ݂ܬ݂ܶܗ ܡܰܘܟ݂ܰܐ ܢܰܦܷܩ ܡܘ ܡܰܟܬܰܒ ܘܒܕܶܠܶܗ ܕܫܳܓ݂ܠܷ ܕܷܡܥܰܘܷܢ ܐܝ ܐܝܩܰܪܬ݂ܐ. ܒܷܬ݂ܷܪ ܡܶܕ ܫܰܓ݂ܠܷ ܙܰܒܢܐ ܒܘ ܓܷܡܪܷܟ ܟ݂ܘܕ ܡܰܥܡܘܪ ܡܕܰܘܰܡܠܶܗ ܕܝܣܰܐ ܒܘ ܡܰܟܬܰܒ ܐܶܠܐ ܦܷܠܓܶܐ ܕܘ ܝܰܘܡܐ ܕܝܣܰܐ ܫܳܓ݂ܰܠ ܘܰܐ. ܒܝ ܫܰܬܐ ܕܐܰܠܦܐ ܬܡܳܢܶܡܐ ܐܰܪܒܥܐ ܬܠܶܬ݂ܝ ܡܝ ܣܢܝܩܘܬ݂ܐ ܣܷܡܠܶܗ ܐܘ ܣܝܣܬܶܡ ܐܰܟܘܣܬܝܟ ܕܘ ܬܰܠܰܦܢ ܩܰܡܳܝܐ ܕܩܘܕܪܝ ܡܷܔܓ݂ܳܠܝ ܥܰܡ ܚܕ݂ܳܕ݂ܶܐ. ܒܰܢ ܢܷܫܢܰܢܷܟ ܕܒܷܬ݂ܷܪ ܐܘ ܣܝܣܬܰܡܰܢܐ ܕܣܷܡܠܶܗ ܒܕܰܠܠܶܗ ܕܡܷܣܬܰܥܷܡܠܝܠܶܗ ܒܰܓ ܓܰܡܝـܝܰܬ. ܐܰܢܬܳܢܝܐ ܒܝ ܫܰܬܰܝܐ ܓܰܘܷܪ ܥܰܡ ܐܝ ܚܰܘܪܐ ܕܘ ܫܘܓ݂ܠܐ ܐܶܣܬܝܪ ܡܳܐܟ݂ܝ. ܒܝ ܫܰܬܐ ܕܐܰܠܦܐ ܬܡܳܢܶܡܐ ܘܚܰܡܫܐ ܬܠܶܬ݂ܝ ܡܓܰܠܘܶܠܶܗ ܥܰܡ ܐܝ ܐܰܬ݂ܬܐ ܠܟܘܒܰܐ، ܘܡܶܐ ܬܰܡܐ ܒܝ ܫܰܬܐ ܕܰܐܠܦܐ ܬܡܳܢܶܡܐ ܘܚܰܡܫܝ ܡܓܰܠܘܶܠܶܗ ܠܰܐܡܶܪܝܟܰܐ. ܒܰܙ ܙܘܙܶܐ ܕܡܰܠܬܰܡܘܰܝܠܶܗ ܠܶܗ ܒܰܢ ܢܷܫܢܶܐ ܕܫܰܦܷܥ ܣܷܡܠܶܠܶܗ ܦܰܒܪܝܩܰܐ ܕܰܫ ܫܰܡܥܶܐ ܒܢܷܘܝܳܪܟ. ܡܕܰܘܰܡܠܶܗ ܐܰܚ ܚܰܝܶܕ݂ܶܐ ܗܰܪܟܶܐ. ܒܷܬ݂ܷܪ ܡܝ ܫܰܬܐ ܕܰܐܠܦܐ ܬܡܳܢܶܡܐ ܘܚܰܡܷܫ ܘܰܐܪܒܥܝ ܐܝ ܐܰܬ݂ܬܐ ܡܰܫܦܰܥܠܰܗ ܟܶܘܐ ܘܒܰܣ ܩܘܕܪܳܘܰܐ ܕܷܡܗܰܠܟ݂ܐ ܡܰܘܟ݂ܰܐ ܐܰܢܬܳܢܝܐ ܟܘܠܢܰܩܠܰܗ ܡܔܰܪܰܒܘܰܐ ܕܚܳܙܶܗ ܡܶܕܳܢܶܗ ܕܷܡܥܰܘܢܝ ܐܝ ܐܰܬ݂ܬܐ ܘܕܡܰܟ݂ܝܦܝ ܐܘ ܛܰܥܢܐ ܐܰܥܠܶܗ. ܐܷܫܢܶܐ ܐܰܪܝܟܐ ܡܔܰܪܰܒܠܶܗ ܡܶܕܳܢܶܐ ܥܰܠ ܐܘ ܐܶܠܶܟܬܪܐ ܡܰܢܝܶܬܝܟ ܕܘ ܩܠܐ ܕܷܡܫܰܕܰܪܠܶܗ ܠܕܘܟܬ݂ܐ ܚܪܶܬܐ، ܡܝ ܫܰܬܐ ܕܰܐܠܦܐ ܬܡܳܢܶܡܐ ܘܫܶܬ݂ ܚܰܡܫܝ ܩܰܕܷܪ ܕܷܡܫܰܕܷܪ ܐܘ ܩܠܐ ܒܰܬ ܬܶܠܰܬ ܡܶܐ ܕܘܟܬ݂ܐ ܠܕܘܟܬ݂ܐ. ܒܝ ܩܰܡܰܝܬܐ ܐܘ ܩܠܐ ܒܰܐ ܫܰܠܩܰܬ ܕܘ ܔܰܝܪܰܢ ܘܷܒܬܷ݂ܪ ܡܶܐ ܬܰܠܰܦܢ ܠܬܰܠܰܦܢ ܒܣܝܣܬܶܡ ܕܟܳܡܰܪܠܶܗ ܬܶܠܶܬܪܦܢܐ ܕܰܐܕܝܳܡܰܐ ܟܳܡܝܬܰܩܒܷܠ ܐܘ ܒܰܒܐ ܕܰܐ ܬܰܠܝܦܳܢܶܐ. ܩܰܕܷܪ ܡܫܰܕܷܪ ܐܘ ܩܠܐ ܡܶܐ ܕܘܟܬ݂ܐ ܠܕܘܟܬ݂ܐ. ܒܡܶܬ݂ܚܐ ܕܥܷܣܪܝ ܐܷܫܢܶܐ ܣܷܡܠܶܗ ܙܷܬ ܡܶܐ ܬܠܶܬ݂ܝ ܫܷܟܷܠܰܬ ܕܦ݁ܪܳܬܳܬܝܦ݁ ܕܰܐ ܬܶܠܝܦܳܢܶܐ. ܐܳܒܰܥܘܰܐ ܕܗܶܫ ܡܫܰܘܫܷܬ ܐܘ ܣܝܣܬܶܡ ܕܘ ܬܰܠܰܦܢ ܕܣܷܡܠܶܗ ܐܶܠܐ ܗܰܘ ܩܳܕܰܪܘܰܐ ܕܷܡܕܰܒܷܪ ܪܘܚܶܗ ܡܳܡܘܢܝܬ݂ ܥܰܠ ܕܝ ܦܰܒܪܝܩܰܐ ܕܰܐ ܫܰܡܥܶܐ ܡܰܦܠܰܣܘܰܝܠܰܗ ܠܐ ܩܳܕܰܪܘܰܗ ܕܷܡܕܰܒܷܪ ܐܝ ܫܷܪܟܶܐ ܕܣܷܡܠܶܗ ܕܰܐ ܬܰܠܰܦܳܢܶܐ. ܒܕܶܠܶܗ ܕܟܳܪܷܟ݂ ܒܰܝܢ ܐܰܢ ܢܳܫܶܐ ܥܰܬܝܪܶܐ ܕܷܡܥܰܘܢܝܠܶܗ ܒܘ ܫܘܓ݂ܠܐ ܕܰܬ ܬܰܠܰܦܳܢܶܐ، ܐܶܠܐ ܥܰܠ ܕܟܷܬܘܰܐ ܒܘ ܙܰܒܢܰܘܐ ܓ݂ܰܠܰܒܶܐ ܫܓ݂ܘܫܝܐ ܕܰܚ ܚܰܪܒܰܬ ܢܳܫܶܐ ܠܐ ܡܥܰܘܰܢܠܶܗ، ܠܐ ܐܷܒܥܝܘܰܐ ܡܰܚܬܝ ܐܰܙ ܙܘܙܰܬ݂ܬ݂ܶܐ ܥܰܠ ܡܶܕܳܢܶܐ ܗܰܘܟ݂ܰܐ. ܒܷܬ݂ܷܪ ܡܶܐ ܥܰܣܩܘܬ݂ܐ ܓ݂ܰܠܰܒܶܐ ܦܰܝܷܫ ܡܰܔܒܘܪ ܘܡܙܰܒܰܢܠܶܗ ܐܘ ܒܰܝܬܐ ܕܟܷܬܘܰܐ ܐܶܒܶܗ، ܘܐܘ ܝܰܘܡܐ ܒܘ ܝܰܘܡܐ ܙܷܬ ܗܳܘܶܘܰܐ ܦܰܩܝܪܐ. ܟܷܬܘܰܝܠܶܗ ܚܰܘܪܐ ܡܥܰܘܢܘܰܝܠܶܗ ܐܷܫܡܐ ܒܰܙ ܙܘܙܶܐ ܕܩܳܕܷܪ ܦܳܝܷܫ ܥܰܠ ܐܝ ܪܰܓ݂ܠܐ. ܐܰܢܬܳܢܝܐ ܡܔܰܪܰܒܠܶܗ ܕܡܳܝܷܕ ܐܘ ܦܰ݁ܬܶܢܬ ܕܘ ܬܶܠܶܬܪܰܦܳܢ ܐܶܠܐ ܠܳܙܰܡܘܰܐ ܕܳܒܶܐ ܥܷܣܪܝ ܕܳܠܰܪܶܐ ܥܰܠ ܕܠܰܬܘܰܝܠܶܗ ܠܐ ܩܰܕܷܪ ܕܡܳܝܷܕ ܐܘ ܦ݁ܰܬܶܢܬ. ܒܷܬ݂ܷܪ ܡܶܐ ܙܰܒܢܐ ܚܙܶܠܶܗ ܓܪܰܗܰܡ ܒܶܠ ܘܒܕܶܠܶܗ ܕܫܳܓܷ݂ܠ ܐܰܥܡܶܗ ܘܕܣܰܝܡܝ ܡܶܕܳܢܶܐ ܚܰܬ݂ܶܐ ܘܕܷܡܫܰܘܫܛܝ ܐܰܦ ܦܘܠܚܳܢܰܬ݂ܬ݂ܶܗ. ܕܝܠܳܢܳܝܬ ܐܰܢܬܳܢܝܐ ܐܳܒܰܥܘܰܐ ܕܷܡܫܰܘܫܷܬ ܐܘ ܣܝܣܬܶܡ ܕܐܘ ܬܰܠܰܦܢ. ܕܠܐ ܡܝܢܶܗ ܓܪܰܗܰܡ ܒܶܠ ܡܷܕܠܶܗ ܐܘ ܦܰ݁ܬܶܢܬ ܕܘ ܬܶܠܶܬܪܰܦܳܢ ܘܡܫܰܚܠܰܦܠܶܗ ܐܷܫܡܶܐ ܘܡܷܪܠܶܠܶܗ ܬܰܠܝܦܘܢ. ܒܷܬ݂ܷܪ ܓܪܰܗܰܡ ܒܶܠ ܡܙܰܒܰܢܠܶܗ ܐܘ ܣܝܣܬܶܡ ܕܐܘ ܬܰܠܰܦܢ ܒܙܘܙܶܐ ܓ݂ܰܠܰܒܶܐ ܠܫܷܪܟܶܐ ܐܷܫܡܰܐ ܘܶܣܬܶܪܢ ܐܘܢܝܢ. ܒܷܬ݂ܷܪ ܡܶܐ ܙܰܒܢܐ ܐܝܢܰܩܠܰܐ ܕܰܐܢܬܳܢܝܐ ܝܰܠܷܦ ܐܘ ܡܶܕܰܢܐ ܦܬܷܚܠܶܗ ܡܰܚܟܰܡܰܬ ܥܰܠ ܓܪܰܗܰܡ ܒܶܠ ܘܡܷܪܠܶܗ ܗܰܢܐ ܓܢܷܘܠܶܗ ܐܘ ܡܶܕܶܐ ܕܳܐܢܐ ܣܷܡܠܝ ܘܕܠܐ ܡܝܢܝ ܡܙܰܒܰܢܠܶܗ. ܒܷܬܷ݂ܪ ܡܶܐ ܕܷܡܕܰܘܰܡܠܰܐ ܐܝ ܡܰܚܟܰܡܰܐ ܬܫܰܥ ܐܷܫܢܶܐ ܢܰܦܷܩ ܦܘܣܩܳܢܐ ܕܟܷܬܝܐ ܐܰܢܬܳܢܝܐ ܡܳܪܶܗ ܕܘ ܡܶܕܰܢܐ، ܘܓܪܰܗܰܡ ܒܶܠ ܒܣܷܟ݂ܬܰܟܰܪܝܶܗ ܓܢܘܠܶܗ. ܒܝ ܫܰܬܐ ܕܰܐܠܦܐ ܬܡܳܢܶܡܐ ܘܰܬܫܰܥ ܬܡܳܢܝ ܦܰܝܷܫܘܰܐ ܐܷܫܡܐ ܕܟܷܡܠܝ ܐܰܡ ܡܰܚܟܰܡܰܬ ܡܚܰܝܨܷܠ ܐܰܢܬܳܢܝܐ ܒܟܶܘܐ ܘܡܰܝܷܬ݂، ܡܰܘܟ݂ܰܐ ܠܐ ܩܰܕܷܪ ܕܣܳܝܷܡ ܡܶܕܶܐ ܒܷܓܪܰܗܰܡ ܒܶܠ ܘܐܝ ܡܰܚܟܰܡܰܐ ܡܒܰܛܶܠܰܐ ܟܘܠ ܡܶܕܶܐ ܘܐܝ ܕܰܥܘܰܐ ܢܰܦܝܠܐ، ܡܬܰܚܷܬ ܐܘ ܦܰܓܪܐ ܕܰܐܢܬܳܢܝܐ ܒܢܷܘܝܳܪܟ. ܡܰܘܟ݂ܰܐ ܐܰܕܝܳܡܰܐ ܟܳܡܝܕܷ݂ܥ ܓܪܰܗܰܡ ܒܶܠ ܐܘ ܓܰܒܪܐ ܕܷܚܙܶܠܶܗ ܐܘ ܬܰܠܰܦܢ. ܚܕ݂ܰܥܣܰܪ ܒܷܚܙܝܪܷܢ ܒܝ ܫܰܬܐ ܕܰܬܪܶܐ ܐܰܠܦܐ ܘܬܰܪܬܶܐ ܐܘ ܦܰ݁ܪܠܰܡܰܢܬܐ ܕܰܐܡܶܪܝܟܰܐ ܒܷܬܷ݂ܪ ܡܶܐ ܒܘܚܳܢܐ ܡܫܰܪܰܪܶܗ ܕܰܐܢܬܳܢܝܐ ܡܶܐܪܘܔܝ ܝܐ ܕܷܚܙܶܠܶܗ ܐܘ ܬܰܠܰܦܢ ܩܰܡܳܝܐ، ܘܒܷܬ݂ܷܪ ܡܝ ܫܰܬܰܬ݂ܶܐ ܡܬܰܚܷܬ ܐܷܫܡܶܐ ܒܰܟ ܟܬܳܘܶܐ ܟ݂ܘܕ ܟܳܠܳܙܷܡ ܠܘ ܐܝܩܳܪܶܕ݂ܶܗ. ܒܷܬܷ݂ܪ ܡܶܐ ܕܷܡܫܰܢܶܠܶܗ ܐܰܢܬܳܢܝܐ، ܓܪܰܗܰܡ ܒܶܠ ܡܫܰܘܫܰܛܠܶܗ ܐܘ ܬܰܠܰܦܢ ܓ݂ܰܠܰܒܶܐ. ܒܝ ܫܰܬܐ ܕܰܐܠܦܐ ܬܡܳܢܶܡܐ ܘܫܶܬ݂ ܘܫܰܘܥܝ ܐܝܢܰܩܠܰܐ ܩܰܡܰܝܬܐ ܔܓ݂ܝܠ ܓܪܰܗܰܡ ܒܶܠ ܡܶܐ ܬܰܠܰܦܢ ܠܬܰܠܰܦܢ ܚܪܶܢܐ ܥܰܡ ܐܘ ܡܥܰܘܢܳܢܶܕ݂ܶܗ ܬܐܘܡܰܐ ܘܰܐܬܣܢ. ܒܷܬ݂ܷܪ ܡܘ ܡܶܕܰܢܐ ܐܘ ܪܰܒܐ ܓܪܰܗܰܡ ܒܶܠ ܦܬܷܚܠܶܗ ܠܶܗ ܦܰܒܪܝܩܰܐ ܘܒܕܶܠܶܗ ܕܣܳܝܷܡ ܐܰܬ ܬܰܠܰܦܳܢܶܐ ܘܡܙܰܒܰܢܶܗ ܠܟܘܠ ܕܘܟܬ݂ܐ. ܒܘ ܫܷܟܷܠܰܢܐ ܗܰܘܝ ܚܰܐ ܡܰܥ ܥܰܬܝܪܶܐ ܕܰܐܡܶܪܝܟܰܐ. ܘܡܫܰܢܶܠܶܗ ܒܝ ܫܰܬܐ ܕܰܐܠܦܐ ܬܫ̰ܰܥܡܐ ܬܰܪܬܶܐ ܘܥܷܣܪܝ ܒܰܐܡܶܪܝܟܰܐ. (ܡܝܕܐ ܐܝܟ ܟܬܰܘܬܰܬ݂ܶܐ ܡܝ ܕܰܦܐ ܕܗܰܩܰܢ ܩܘܬܠܘܐܰܝ) ܡܝܟܐܝܠ ܬܪܐ 825 ܡ̈ܠܐ.