Ayhan Gürkan: ܣܢܝܩܘܬ݂ܐ ܕܝ ܫܰܬܐ / Sniquṯo di šato
Sniquṯo di šato
ܒܰܙ ܙܰܒܢܶܐ ܥܰܬܝܩܶܐ ܥܰܠ ܕܠܰܬܘܰܐ ܥܰܪܰܒܰܬ ܘܕܰܪܒܳܢܶܐ، ܐܘ ܥܰܡܐ ܕܝ ܘܰܠܰܝܶܐ ܘܗܰܡ ܕܰܩ ܩܷܪܝܰܘܳܬ݂ܶܐ ܥܰܠ ܐܰܚ ܚܡܳܪܶܐ، ܘܥܰܠ ܐܰܒ ܒܰܓ݂ܠܶܐ، ܘܐܰܣ ܣܘܣܝܶܐ ܐܷܙܙܷܢ ܘܳܐܬ݂ܶܢܘܰܐ. ܐܘ ܡܰܗܘܳܐ ܫܩܳܠܐ ܘܐܝ ܬܷܔܔܰܪܰܐ ܐܰܥܠܰܝـܝܶܗ ܣܰܝܡܝܘܰܝܠܰܗ. ܘܡܶܩܷܡ ܒܰܙ ܙܰܒܢܶܐ ܥܰܬܝܩܶܐ ܗܳܘܷܢܘܰܐ ܐܰܣ ܣܰܬ݂ܘܶܐ ܓ݂ܰܠܰܒܶܐ ܝܰܩܘܪܶܐ. ܒܰܡ ܡܷܬܪܳܘܰܬ ܐܳܬ݂ܶܘܰܐ ܬܰܠܓܳܐ. ܐܝܕ݂ܰܐ ܕܷܡܣܰܚܝܳܘܰܐ ܐܰܥܠܶܗ ܐܰܠܳܗܐ ܡܰܣܛܰܪ ܒܰܝ ܝܰܪܚܶܐ ܠܐ ܦܳܫܰܪܘܰܐ ܐܘ ܬܰܠܓܐ. ܐܘ ܥܰܡܐ ܘܰܐܚ ܚܷܝܶܘܷܢ ܕܝܕ݂ܶܗ ܦܳܝܰܫܘܰܐ ܒܰܝ ܝܰܘܡܶܐ ܚܒܝܣܳܝܐ ܒܰܒ ܒܳܬܶܐ. ܐܣ ܣܳܘܶܐ ܟܳܡܰܚܟܷܢ ܘܟܷܐܡܡܝ؛ ܐܰܢ ܢܝܓܳܪܶܐ ܕܰܒ ܒܳܬܶܐ ܡܶܩܷܡ ܟܘܠܠܶܗ ܥܰܦܪܳܘܰܝܢܶܐ. ܘܟܷܬܘܰܝܠܰܢ ܡܰܢܕܰܪܘܢܶܐ ܝܰܥܢܝ ܟܶܦܐ ܪܰܒܬ݂ܐ، ܝܰܩܷܪܬܐ ܘܡܕܰܘܪܰܢܬܐ ܥܰܠ ܐܝ ܓܳܪܐ. ܒܘ ܣܰܬ݂ܘܐ ܟܘܠ ܫܰܒܬܐ ܥܰܣܪܐ ܝܰܘܡܶܐ ܡܷܐ ܕܐܰܬ݂ܝ ܐܘ ܡܰܛܪܐ ܣܷܠܩܝܘܰܝܢܰܐ ܠܝ ܓܳܪܐ ܘܡܰܪܝܣܝܘܰܝܢܰܐ ܬܰܘܢܐ ܐܰܥܠܰܗ. ܘܒܷܬ݂ܷܪ ܐܝ ܡܰܢܕܰܪܘܢܶܐ ܡܰܟܷܪܟ݂ܝܘܰܝܢܰܠܰܗ ܐܰܥܠܰܗ ܠܰܫܰܢ ܕܡܝܕܰܘܰܣ ܐܘ ܥܰܦܪܐ ܕܝ ܓܳܪܐ ܛܰܘܘܐ ܠܰܫܰܢ ܕܠܐ ܕܷܠܦܐ ܐܝ ܓܳܪܐ. ܘܒܘ ܫܷܟܷܠܰܢܳܐ ܐܝ ܓܳܪܐ ܠܰܘ ܕܷܠܦܳܘܰܐ. ܘܡܶܩܷܡ ܓ݂ܰܠܰܒܶܐ ܐܳܬ݂ܶܘܰܐ ܬܰܠܓܐ ܢܰܩܩܰܬ ܒܰܡ ܡܷܬܪܳܘܰܬ ܗܳܘܶܘܰܐ ܘܦܳܝܰܫܘܰܐ ܒܰܫ ܫܰܒܶܐ ܘܒܰܝ ܝܰܪܚܶܐ ܥܰܠ ܐܝ ܐܰܪܥܐ. ܒܷܬ݂ܷܪ ܡܷܐ ܕܓܷܪܦܝܘܰܝܢܰܐ ܐܘ ܬܰܠܓܐ ܐܰܢ ܢܝܓܳܪܶܐ ܡܝܣܰܘܷܢܘܰܐ ܥܰܡ ܚܕ݂ܳܕ݂ܶܐ ܡܘ ܬܰܠܓܳܐ. ܐܰܡ ܡܰܝܶܐ ܕܘ ܬܰܠܓܐ ܥܰܠ ܕܟܷܬܢܶܐ ܚܰܪܘܦܶܐ ܐܰܢ ܢܝܓܳܪܶܐ ܕܠܐ ܡܝܬܰܢܕܪܝ ܟܳܕܷܠܦܝ. ܡܝ ܢܰܩܩܰܐ ܕܢܰܦܝܩܐ ܐܝ ܫ̰ܝܡܰܢܬܐ ܣܝܡ ܚܰܨܶܗ ܕܰܢ ܢܝܓܳܪܶܐ ܫ̰ܝܡܰܢܬܐ ܐܘ ܥܰܡܐ ܟ݂ܰܠܷܨ ܡܘ ܬܰܥܒܐ ܕܘ ܬܷܢܕܝܪܐ ܕܰܢ ܢܝܓܳܪܶܐ. ܥܰܠ ܗܰܬ݂ܶܐ ܒܰܩ ܩܷܪܝܰܘܳܬ݂ܶܐ ܣܬܶܐ ܠܰܘ ܟܳܚܳܙܝܢܰܐ ܡܰܢܕܘܰ ܪܝـܝܰܬ ܥܰܠ ܰܐܢ ܢܝܓܳܪܶܐ ܕܰܒ ܒܳܬܶܐ. ܡܰܘܟ݂ܰܐ ܡܶܩܷܡ ܕܳܐܬ݂ܶܐ ܐܘ ܣܰܬ݂ܘܐ ܐܘ ܥܰܡܐ ܡܚܰܝܕ݂ܰܪܘܰܐ ܐܝ ܣܢܝܩܘܬ݂ܐ ܕܘ ܣܰܬ݂ܘܐ ܕܟܳܠܳܙܰܡ ܐܶܠܶܗ ܘܠܰܚ ܚܷܝܶܘܷܢ ܕܝܕ݂ܶܗ. ܐܘܥܕܐ ܐܰܢ ܐܝܡܟܰܢܰܬ ܙܰܝـܝܕܝ، ܗܰܘܝ ܥܰܪܰܒܰܬ، ܦܬܝـܚـܝ ܕܰܪܒܳܢܶܐ ܠܰܩ ܩܷܪܝܰܘܳܬ݂ܶܐ ܟܘܠܠܶܗ. ܚܰܬܬܰܐ ܕܳܐܬ݂ܶܐ ܒܰܡ ܡܷܬܪܳܘܰܬ ܬܰܠܓܐ ܣܬܶܐ ܐܝ ܕܰܘܠܶܗ ܒܓܰܘܶܗ ܕܷܟܡܐ ܣܰܥܰܝܰܬ ܐܰܘ ܝܰܘܡܶܐ ܟܳܦܷܬܚܐ ܐܰܕ ܕܰܪܒܳܢܶܐ ܟܘܠܠܶܗ. ܐܘ ܥܰܡܐ ܠܐ ܟܳܦܳܝܰܫ ܚܒܝܣܳܝܐ ܟ݂ܘܕ ܡܶܩܷܡ. ܐܝܢܰܩܩܰܐ ܕܰܐܕܝܰܘܡܰܐ ܚܰܐ ܕܟܳܪܰܟܼ ܒܝ ܫܘܩܐ ܟܘܠ ܡܶܕܶܐ ܟܳܡܝܩܰܦܶܐ، ܚܰܬܬܰܐ ܐܘ ܡܶܕܶܐ ܕܠܐ ܟܳܝܳܥܶܐ ܒܝ ܕܘܟܬ݂ܐ، ܘܠܰܝܬ ܒܝ ܕܰܘܠܶܐ ܣܬܶܐ ܟܳܡܝܛܰܡܬܶܐ ܡܰܕ ܕܘܘܰܠ ܕܠܰܪܘܰܠ . ܒܘ ܡܰܥܷܪܒܐ ܐܘ ܒܰܝܬܐ؛ ܐܝ ܣܢܝܩܘܬ݂ܐ ܕܘ ܝܰܘܡܐ ܟܳܫܳܩܰܠ ܚܰܬ݂ܳܐ ܒܚܰܬ݂ܐ. ܐܶܠܐ ܓܰܒܰܝܢܰܐ ܐܘ ܡܶܕܰܢܐ ܗܰܘܝ ܥܰܕܶܐ ܥܰܡ ܐܘ ܥܰܡܐ. ܠܐ ܠܰܫܰܢ ܝܰܘܡܐ، ܘܫܰܒܬ݂ܐ ܟܳܫܳܩܰܠ. ܗܶܫ ܓ݂ܰܠܰܒܶܐ ܡܘ ܥܰܡܐ ܟܷܡܚܰܝܕ݂ܰܪ ܐܝ ܣܢܝܩܘܬ݂ܐ ܕܘ ܣܰܬ݂ܘܐ ܟܘܠܰܗ. ܡܰܘܟ݂ܰܐ ܗܶܫ ܒܘ ܝܰܪܚܐ ܕܰܫ ܫܰܘܥܐ ܟܳܒܷܕܝܐ ܐܝ ܚܰܕܷ݂ܪܝـܝܶܐ ܕܘ ܣܰܬ݂ܘܐ. ܡܷܐ ܕܡܰܛܝ ܐܘ ܙܰܕ ܠܘ ܚܨܳܕܐ ܟܳܢܳܦܰܩ ܐܘ ܥܰܡܐ ܠܘ ܚܨܳܕܐ ܟܳܚܳܨܰܕ ܐܘ ܙܰܕ ܕܝܕ݂ܶܗ. ܟܳܬܳܠܶܗ ܐܝ ܣܢܝܩܘܬ݂ܰܝܕ݂ܶܗ ܘܕܘ ܣܰܘܰܠ ܕܝܕ݂ܶܗ. ܘܗܰܡ ܟܳܬܳܠܶܗ ܒܘܙܰܪܥܐ ܠܰܫܰܢ ܐܘ ܙܪܳܥܐ. ܐܘ ܡܶܕܶܐ ܚܪܶܢܐ ܟܷܡܙܰܒܰܢܠܶܗ ܒܝ ܫܘܩܐ ܟܳܫܳܩܰܠ ܐܝ ܣܢܝܩܘܬ݂ܰܝܕ݂ܶܗ ܐܝ ܚܪܶܬܐ. ܡܶܐ ܕܰܐܬ݂ܝ ܐܘ ܝܰܪܚܐ ܕܰܥ ܥܰܣܪܐ ܘܕܰܚ ܚܕ݂ܰܥܣܰܪ ܥܰܠ ܕܟܷܡܩܰܕܷܡ ܐܘ ܣܰܬ݂ܘܐ. ܟܳܚܳܙܝܢܰܐ ܒܛܘܪܥܰܒܕܝܢ ܒܰܒ ܒܳܬܶܐ ܟܳܘܶܐ ܫܘܓ݂ܠܐ ܘܬܰܥܒܐ ܓ݂ܰܠܰܒܶܐ، ܥܰܠ ܕܟܷܡܚܰܝܕ݂ܪܝ ܐܝ ܣܢܝܩܘܬ݂ܐ ܕܘ ܣܰܬ݂ܘܐ ܡܶܩܷܡ ܕܢܳܚܰܬ ܡܰܛܪܐ، ܘܬܰܠܓܐ. ܐܘ ܚܫܳܘܐ ܕܰܢ ܢܳܫܶܐ ܟܳܡܝܣܰܡ ܗܘܠ ܨܰܘܡܐ ܪܰܒܐ. ܐܶܠܐ ܐܘ ܚܫܳܘܐ ܕܰܚ ܚܷܝܶܘܷܢ ܗܘܠ ܠܘ ܥܶܕ݂ܐ ܕܘ ܣܝܒܳܪܐ ܟܳܡܝܣܰܡ. ܡܷܐ ܕܰܐܬ݂ܝ ܐܘ ܝܰܘܡܐ ܕܘ ܣܝܒܳܪܐ ܐܘ ܥܰܡܐ ܟܳܡܷܦܨܰܚ ܥܰܠ ܕ ܠܰܘ ܟܳܡܷܢܛܰܪ ܬܰܠܓܐ، ܐܘ ܬܰܠܓܐ ܕܟܝܬ ܣܬܶܐ ܒܘ ܛܘܪܐ ܟܳܦܳܫܰܪ، ܐܘ ܣܰܘܰܠ ܟܳܒܳܕܶܐ ܕܢܳܦܰܩ ܠܘ ܛܘܪܐ ܐܘ ܥܰܡܐ ܟܳܡܷܬ݂ܢܰܚ ܡܘ ܬܷܥܠܝܦܐ ܕܘ ܣܰܘܰܠ. ܐܘ ܫܘܓ݂ܠܐ ܕܟܳܡܝܣܰܡ ܗܰܢܐ ܝܐ. ܡܶܐ ܟ݂ܰܨܪܰܐ ܫܡܳܛܐ ܕܘ ܓܶܠܐ، ܣܝܳܡܐ ܕܰܦ ܦܬܝܠܶܐ، ܩܛܳܥܐ ܕܰܩ ܩܰܝܣܶܐ، ܬܷܢܫܝܦܐ ܕܝ ܝܰܪܳܩܘܬ݂ܐ، ܐܘ ܚܨܳܕܐ، ܕܶܪܳܝܐ ܕܘ ܬܰܘܢܐ، ܛܰܪܦܶܐ ܐܘ ܙܰܕ ܠܰܫܰܢ ܐܰܚ ܚܷܝܶܘܷܢ، ܩܛܳܦܐ ܕܰܬ ܬܶܢܶܐ ܣܝܳܡܐ ܕܘ ܪܰܔܰܠ ܘܬܶܢܫܝܦܐ. ܩܛܳܦܐ ܘܥܨܳܪܐ ܕܰܥ ܥܶܢܘܶܐ. ܣܝܳܡܐ ܕܝ ܚܰܠܝܘܬ݂ܐ ܟ݂ܘܕ ܥܳܠܝܩܶܐ، ܐܰܦܫܳܬ݂ܶܐ، ܚܰܠܝܠܶܐ، ܦ݁ܰܣܬܝܩ، ܕܝܒܷܣ. ܫܠܳܩܐ ܕܰܚ ܚܶܛܶܐ ܐܘ ܕܝܳܩܐ ܕܘ ܒܷܪܓ݂ܷܠ ܐܘ ܣܝܳܡܐ ܕܘ ܣܰܡܕܐ ܗܘܪܷܟ. ܘܢܚܳܪܐ ܕܘ ܕܰܪܡܰܠܰܐ. ܒܷܐ ܡܷܩܩܰܐ ܐܘ ܣܝܳܡܐ ܕܗܷܢ ܡܰܢܝ ܬܰܥܒܐ ܘܙܰܚܡܶܐ ܝܐ ܐܶܠܐ ܗܷܢ ܡܰܢܢܶܗ ܟܳܡܰܫܷܦܥܷܢܢܶܗ ܒܟܷܦ ܘܒܡܘܟܠܐ ܘܒܷܫܬܳܝܐ. ܐܘܥܕܐ ܓܡܰܚܟܷܢܐ ܐܰܝܕܰܪܒܐ ܟܳܡܝܣܳܡܝ. ܗܰܢܝ ܐܘ ܣܝܳܡܰܬ݂ܬ݂ܶܗ ܠܰܬܝܐ ܟ݂ܘܕ ܟܳܡܰܚܘܶܐ ܡܶܐ ܠܰܪܘܰܠ ܣܰܗܷܠ. ܟܘܠ ܚܰܐ ܡܰܡ ܡܶܕܳܢܰܢܝ ܟܷܬܠܶܗ ܫܷܟܷܠ ܕܷܣܝܳܡܐ ܘܟܰܝܠܐ. ܒܘ ܪܰܒܷܥ ܐܝܢܰܩܩܰܐ ܕܟܳܡܘܪܩܝ ܐܰܣ ܤܰܬܶܐ، ܟܷܐܙܙܷܢ ܐܰܢ ܢܝܫܶܐ ܟܳܫܷܡܛܝ ܐܰܦ݁ ܦ݁ܰܠܠܰܬ ܕܰܣ ܤܰܬܶܐ ܗܶܫ ܝܰܪܳܩܶܐ ܘܬܰܙܰܐ. ܟܰܡܰܡܛܷܢܢܶܗ ܠܘ ܒܰܝܬܐ ܡܶܩܷܡ ܟܘܙܕܝܘܰܝܠܷܢ ܒܝ ܡܰܠܚܐ ܬܳܠܝܘܰܝܠܷܢ ܠܘ ܣܰܬ݂ܘܐ. ܐܘܥܕܐ ܟܳܡܰܪܬ݂ܚܷܢܢܶܗ ܐܷܫܡܐ ܟܳܦܷܠܓ݂ܷܢܢܶܗ ܐܰܟܰܠܬ ܠܰܫܰܢ ܐܘ ܡܘܟܠܐ، ܟܳܡܰܚܬܝܠܷܢ ܒܰܟ ܟܝܣܶܐ ܕܘ ܢܰܝܠܳܢ، ܟܳܣܘܟ݂ܪܝ ܦܶܡܡܰܝـܝܶܗ ܟܳܡܰܚܬܝܠܷܢ ܒܘ ܡܰܓܷܠܕ݂ܳܢܐ. ܒܷܬ݂ܷܪ ܒܰܝ ܝܰܘܡܶܐ ܕܘ ܣܰܬ݂ܘܐ ܟܳܡܷܦܩܝܠܷܢ ܗܘܠ ܕܦܳܫܰܪ ܐܘ ܓܠܝܕ݂ܰܬ݂ܬ݂ܶܗ ܟܳܣܰܝܡܝܠܷܢ ܐܰܦ݁ܪܰܟܼ. ܒܘ ܩܰܝܛܐ ܡܶܩܷܡ ܡܷܐ ܕܢܳܫܰܦ ܐܘ ܓܶܠܐ ܐܘ ܥܰܡܐ ܟܳܢܳܦܰܩ ܠܘ ܛܘܪܐ. ܟܳܫܳܡܰܛ ܓܶܠܐ ܟܳܡܰܠܷܦ ܘܟܳܒܳܪܰܡܠܶܗ ܥܰܠ ܚܕ݂ܳܕ݂ܶܐ ܟܳܣܳܝܰܡܠܶܗ ܦܬܝܠܶܐ. ܟܳܡܰܡܛܶܠܷܢ ܠܘ ܒܰܝܬܐ ܗܘܠ ܕܢܷܫܦܝ، ܒܬܪ ܟܳܬܳܠܶܠܷܢ ܠܰܘܓ݂ܷܠ ܒܘ ܐܰܟ݂ܳܪ. ܘܒܘ ܣܰܬ݂ܘܐ ܟܳܐܒܶܠܷܢ ܠܰܚ ܚܷܝܶܘܷܢ ܕܝܕ݂ܶܗ ܕܐܘܟ݂ܠܝܠܶܗ. ܕܝܣܰܐ ܗܷܫ ܒܘ ܩܰܝܛܐ ܟܷܐܙܙܷܢ ܠܘ ܛܘܪܐ ܠܘ ܩܛܳܥܐ ܕܰܣ ܣܰܘܟܳܬ݂ܶܐ، ܘܕܰܩ ܩܰܝܣܶܐ ܟܳܡܰܡܛܷܢܢܶܗ ܠܘ ܒܰܝܬܐ ܠܰܫܰܢ ܐܝ ܨܳܦܰ݁ܐ ܐܰܘ ܠܝ ܬܦܰܝܐ. ܗܰܪܟܶܐ ܟܳܠܳܙܰܡ ܐܘ ܒܰܪܢܳܫܐ ܕܗܳܘܶܐ ܡܰܚܝܣܐ ܘܡܳܪܐ ܠܘ ܛܘܪܐ. ܗܘܠ ܕܳܐܬ݂ܶܐ ܡܝܢܶܗ ܕܠܳܐ ܫܳܡܰܛ ܐܰܢ ܐܝܠܳܢܶܐ ܡܘ ܩܘܪܡܐ. ܐܶܠܐ ܕܗܳܘܶܐ ܡܘܡܟܘܢ ܟܣܳܚܐ ܕܟܳܣܰܚـܚܶܗ. ܐܰܘ ܐܰܢ ܢܰܫܝܦܰܬ݂ܬ݂ܶܗ ܕܫܳܡܰܛ ܡܰܡܛܶܠܷܢ ܠܘ ܒܰܝܬܐ. ܐܝܢܰܩܩܰܐ ܕܠܳܐ ܣܳܝܰܡ ܕܷܩܩܰܐ ܓܕܳܐܬ݂ܶܐ ܝܰܘܡܐ ܓܡܷܩܫܰܥ ܐܘ ܛܘܪܐ. ܡܷܐ ܕܷܩܛܷܥܠܷܢ ܐܰܩ ܩܰܝܣܶܐ ܟܳܡܰܡܛܝܠܷܢ ܥܰܠ ܐܰܚ ܚܡܳܪܶܐ ܠܘ ܒܰܝܬܐ ܘܟܳܡܰܢܥܡܝܠܷܢ، ܟܳܛܳܪܝܠܷܢ ܒܝ ܫܷܡܫܐ ܗܘܠ ܕܢܷܫܦܝ. ܒܷܬ݂ܷܪ ܟܳܡܰܥܒܪܝܠܷܢ ܠܰܘܓ݂ܠ ܠܰܫܰܢ ܐܰܝ ܝܰܘܡܳܬ݂ܶܐ ܕܘ ܣܰܬ݂ܘܐ ܕܡܰܘܩܕ݂ܷܢܢܶܗ. ܐܝ ܫܚܰܢܬܐ ܕܝ ܢܘܪܐ ܕܰܩ ܩܰܝܣܶܐ ܓ݂ܰܠܰܒܶܐ ܒܰܣܷܡܬܳܐ ܝܐ ܒܘ ܙܳܝܘܕܐ ܐܝܢܰܩܩܰܐ ܕܗܳܘܶܐ ܓ݂ܰܠܰܒܶܐ ܩܘܪܐ ܠܰܪܘܰܠ. ܐܘ ܫܠܳܩܐ ܕܰܒ ܒܰܠܘܛܶܐ ܕܥܰܠ ܐܝ ܨܳܦ݁ܰܐ ܘܐܘ ܡܘܟܠܰܬ݂ܬ݂ܶܗ ܠܐ ܟܳܡܝܬܰܚܟܶܐ ܡܷܩܩܰܐ ܒܰܣܝܡܐ ܝܐ. ܒܘ ܝܰܪܚܐ ܕܰܬ ܬܡܰܢܝܐ ܒܝ ܩܰܡܰܝܬܐ ܟܷܡܩܰܛܥܝ ܐܰܒ ܒܰܙܷܢܔܰܢ ܣܶܡܳܩܶܐ، ܘܐܰܟ ܟܳܡܶܐ، ܘܰܐܡ ܡܰܔܢܘܢܶܐ. ܟܳܡܰܟ݂ܠܷܢ ܓܰܘܰܝـܝܶܗ ܘܟܳܟ݂ܷܪܙܷܢܢܶܗ ܒܰܚ ܚܘܛܶܐ. ܟܳܡܥܰܠܩܷܢܢܶܗ ܩܘܡ ܐܝ ܫܷܡܫܐ ܗܘܠ ܕܢܷܫܦܝ ܘܒܷܬ݂ܷܪ ܟܳܬܳܠܷܢܢܶܗ. ܒܷܬ݂ܷܪ ܒܘ ܣܰܬ݂ܘܐ ܟܳܡܰܬܷܠܓ݂ܷܢܢܶܗ ܒܰܡ ܡܰܝܶܐ ܫܰܚܝܢܶܐ ܟܳܣܰܝܡܝ ܡܰܢܢܶܗ ܕܳܠܡܰܐ. ܒܘ ܣܰܬ݂ܘܐ ܥܰܠ ܕܒܘ ܐܰܬ݂ܪܐ ܠܐ ܟܳܡܝܩܰܦܶܐ ܝܰܪܳܩܘܬ݂ܐ، ܐܝܕ݂ܰܐ ܕܗܳܘܶܐ ܣܬܶܐ ܥܰܠ ܕܟܳܘܷܢ ܛܝܡܐ، ܗܷܫ ܒܘ ܩܰܝܛܐ ܟܳܡܩܰܛܥܝ ܒܰܙܷܢܔܰܢ ܟܳܡܶܐ ܘܣܶܡܳܩܶܐ ܘܡܰܔܢܘܢܶܐ ܟܳܡܒܰܫܠܷܢܢܶܗ ܐܷܫܡܐ ܟܳܡܰܚܬܷܢܢܶܗ ܒܰܫ ܫܘܫܰܝܰܬ ܕܘ ܔܰܡ ܘܟܳܬܳܠܷܢܢܶܗ ܒܕܘܟܳܬ݂ܶܐ ܔܰܡܘܕܶܐ ܠܰܝ ܝܰܘܡܳܬ݂ܶܐ ܕܘ ܣܰܬ݂ܘܐ. ܟܳܣܰܝܡܷܢܢܶܗ ܡܰܬܦܘܢܝـܝܶܗ ( ܛܷܪܫܷܟܟܶܐ ). ܒܷܬ݂ܷܪ ܟܳܐܬ݂ܶܐ ܐܘ ܘܰܟ݂ܬ ܕܰܘ ܘܰܪܙܶܐ. ܡܷܐ ܕܡܰܛܷܢ ܐܰܦ ܦܘܔܶܐ ܘܰܐܦ ܦܰܪܚܶܐ . ܟܘܠ ܬܪܶܐ ܝܰܘܡܶܐ ܢܰܩܩܰܐ ܟܷܐܙܙܷܢ ܠܘ ܫܡܳܛܰܬ݂ܬ݂ܶܗ. ܐܘ ܡܶܕܶܐ ܕܟܳܙܳܝܰܕ ܐܰܥܠܰܝـܝܶܗ ܕܝܣܰܐ ܟܷܡܙܰܒܢܝܠܶܗ ܒܝ ܫܘܩܐ. ܒܰܣ ܡܰܦ ܦܘܔܶܐ ܟܳܡܷܦܩܝ ܐܘ ܒܘܙܰܪܥܐ ܟܳܡܰܫܝܓ݂ܝܠܶܗ، ܟܳܡܰܠܚـܝܠܶܗ ܘܟܳܡܰܢܫܦܝܠܶܗ ܒܝ ܫܷܡܫܐ. ܒܷܬ݂ܷܪ ܒܘ ܣܰܬ݂ܘܐ ܟܷܡܩܰܠܝܠܶܗ ܠܰܫܰܢ ܐܘ ܓܝܳܨܐ. ܐܝ ܥܰܕܶܐ ܕܘ ܓܝܳܨܐ ܕܰܒ ܒܘܙܰܪܥܶܐ ܕܰܦ ܦܘܔܶܐ ܒܡܷܕ݂ܝܰܕ݂ ܕܝܠܳܢܳܐܝܬ݂ ܒܰܝܢ ܕܰܡ ܡܷܕ݂ܝܳـܝܶܐ ܓ݂ܰܠܰܒܶܐ ܡܰܫܗܘܪ ܝܐ. ܘܡܰܦ ܦܘܔܶܐ ܟܳܡܝܣܰܡ ܫܷܟܷܠ ܕܚܰܠܝܘܬ݂ܐ ܕܟܷܐܡܡܝܠܰܗ ܩܰܕܷܕ. ܟܳܩܷܠܦܝ ܐܰܦ ܦܰܠܩܶܐ ܕܰܦ ܦܘܔܶܐ ܟܳܡܰܚܬܷܢܢܶܗ ܩܘܡ ܐܝ ܫܷܡܫܐ ܠܰܫܰܢ ܕܢܷܫܦܝ. ܡܷܐ ܕܢܰܫܝܦܝ ܒܷܬ݂ܷܪ ܟܳܥܷܨܪܝ ܐܰܥ ܥܷܢܘܶܐ ܟܳܡܰܪܬ݂ܚܝ ܐܰܡ ܡܰܝܰܬ݂ܬ݂ܶܗ ܛܰܘܘܐ ܟܳܡܟܰܘܬܷܢܢܶܗ. ܒܷܬܷ݂ܪ ܟܳܓ݂ܰܝܛܝ ܐܰܦ ܦܰܠܩܶܐ ܕܰܦ ܦܘܔܶܐ ܕܢܰܫܝܦܝ ܐܰܦ݁ܦ݁ܶܗ ܘܟܡܷܦܩܷܢܢܶܗ ܘܟܳܛܳܪܷܢܢܶܗ ܩܘܡ ܐܝ ܫܷܡܫܐ ܗܘܠ ܕܢܷܫܦܝ ܠܰܫܰܢ ܕܠܐ ܡܝܥܰܝܦܢܝ. ܡܷܐ ܕܢܰܫܝܦܝ ܗܰܢܝ ܣܬܶܐ ܟܳܡܷܬܠܳܝܝ ܠܘ ܣܰܬ݂ܘܐ ܫܷܟܷܠ ܕܚܰܠܝܘܬ݂ܐ. ܐܰܦ ܦܰܪܚܶܐ. ܡܰܦ ܦܰܪܚܶܐ ܣܬܶܐ ܟܳܡܢܰܩܷܢ ܐܰܢ ܢܰܥܝܡܰܬ݂ܬ݂ܶܗ ܟܳܣܰܝܡܷܢܢܶܗ ܛܷܪܫܝ ܒܓܰܘܶܗ ܕܰܫ ܫܘܫܰܝܰܬ، ܘܕܰܒ ܒܝܕܳܢܶܐ. ܠܰܫܰܢ ܐܘ ܣܰܬ݂ܘܐ ܒܘ ܙܳܝܘܕܐ ܠܰܝ ܝܰܘܡܳܬ݂ܶܐ ܕܨܰܘܡܐ ܪܰܒܐ. ܐܰܩ ܩܰܪܥܶܐ. ܡܰܩ ܩܰܪܥܶܐ ܟܳܣܰܝܡܝ ܪܰܫ̰ܰܠ. ܟܳܡܰܚܬܝ ܟܰܠܫܐ ܒܓܰܘܶܗ ܕܰܡ ܡܰܝܶܐ ܘܩܰܪܝܘܐ ܠܣܰܥܰܝܶܐ. ܒܷܬ݂ܷܪ ܟܳܡܙܰܢܙܠܝ ܐܰܡ ܡܰܝܶܐ ܡܘ ܟܰܠܫܐ، ܘܟܳܩܷܠܦܝ ܐܰܩ ܩܰܪܥܶܐ ܟܳܡܩܰܛܥܷܢܢܶܗ ܦܰܠܩܶܐ ܢܰܥܝܡܶܐ ܟܳܡܰܚܬܷܢܢܶܗ ܒܓܰܘܶܗ ܕܰܡ ܡܰܝܰܢܷܟ ܝܰܘܡܐ ܚܰܐ. ܕܶܪ ܕܘ ܝܰܘܡܐ ܟܳܡܷܦܩܷܢܢܶܗ ܘܟܳܡܰܫܝܓ݂ܷܢܢܶܗ ܫܰܘܥܐ ܦܶܡܶܐ ܕܡܰܝܶܐ. ܒܷܬ݂ܷܪ ܟܳܡܰܚܬܝ ܣܶܦܳܩܐ ܡܰܠܝܐ ܕܩܰܪܥܶܐ ܡܩܰܛܥܶܐ، ܚܰܐ ܕܫܰܟܰܪ، ܬܪܶܐ ܦܰܠܓܶܗ ܕܡܰܝܶܐ. ܟܳܡܰܚܬܝ ܐܰܡ ܡܰܝܶܐ ܐܘ ܫܰܟܰܪ ܥܰܠ ܐܝ ܢܘܪܐ ܟܳܡܝܬܰܪܬ݂ܚܝ ܗܘܠ ܕܦܳܫܰܪ ܐܘ ܫܰܟܰܪ ܛܰܘܘܐ. ܒܷܬ݂ܷܪ ܟܳܡܰܚܬܝ ܐܰܩ ܩܰܪܥܶܐ ܒܓܰܘܰܝـܝܶܗ ܟܳܡܰܪܬ݂ܚܷܢܢܶܗ ܥܰܡ ܚܕ݂ܳܕ݂ܶܐ ܩܰܪܝܘܐ ܠܚܰܡܡܷܫ ܣܰܥܰܝܰܬ. ܡܶܩܷܡ ܕܡܝܬܰܢܚܬܝ ܡܶܐ ܥܰܠ ܐܝ ܢܘܪܐ ܟܳܡܰܚܬܝ ܐܷܫܡܐ ܕܰܪܔܝܢ ܘܩܰܪܰܢܦܝܠ ܒܰܝܢܳܬ݂ܰܝـܝܶܗ ܟܳܟ݂ܷܠܛܷܢܢܶܗ ܒܷܚܕ݂ܳܕ݂ܶܐ. ܒܷܬ݂ܷܪ ܟܳܡܰܢܷܚܬܷܢܢܶܗ ܡܶܐ ܥܰܠ ܐܝ ܢܘܪܐ. ܡܷܐ ܕܔܰܡܝܕܝ ܟܳܡܰܚܬܷܢܢܶܗ ܒܓܰܘܶܗ ܕܰܒ ܒܝܕܳܢܶܐ ܢܰܥܝܡܶܐ ܟܳܬܳܠܷܢܢܶܗ ܠܘ ܡܘܟܠܐ. ܗܷܢ ܢܳܫܶܐ ܟܳܬܳܠܷܢ ܐܰܩ ܩܰܪܥܶܐ ܠܘ ܣܰܬ݂ܘܐ. ܐܝܢܰܩܩܰܐ ܕܟܳܡܝܣܰܡ ܛܠܰܘܚܶܐ ܟܳܡܩܰܛܥܷܢܢܷܗ، ܘܟܳܡܰܚܬܷܢܢܷܗ ܒܓܰܘܰܝـܝܶܗ. ܗܰܡ ܟܳܡܝܣܰܡ ܡܰܢܢܶܗ ܡܘܟܠܐ ܣܬܶܐ ܕܷܐܫܡܶܐ ܦ݁ܰܠܰܣܝܣ. ܟܳܡܩܰܛܥܷܢܢܶܗ ܦܰܠܩܶܐ ܥܰܡ ܒܰܨܪܐ ܟܳܫܷܠܩܷܢܢܶܗ ܟܳܘܶܐ ܡܘܟܠܐ ܒܰܣܝܡܐ. ܐܰܙ̰ ܙ̰ܰܒܰܫ. ܡܷܐ ܕܡܰܛܷܢ ܐܰܙ̰ ܙ̰ܰܒܰܫ ܣܬܶܐ ܟܷܐܙܙܷܢ ܟܳܩܷܛܦܷܢܢܶܗ ܡܘ ܘܰܪܙܐ. ܘܟܳܡܷܦܩܝ ܐܘ ܒܘܙܰܪܥܰܬ݂ܬ݂ܶܗ ܟܡܰܫܝܓ݂ܝܠܶܗ ܘܟܳܡܰܢܫܦܝܠܶܗ. ܡܷܐ ܕܠܰܬܷܡ ܠܷܚ ܚܕ݂ܳܕ݂ܶܐ ܒܷܬ݂ܷܪ ܟܳܡܰܚܬܝܠܶܗ ܒܕܰܣܬܐ ܡܰܠܝܐ ܡܰܝܶܐ ܘܩܰܛܡܐ ܟܳܫܷܠܩܝܠܶܗ. ܡܷܐ ܕܷܫܠܝܩ ܟܡܰܢܚܬܝܠܶܗ ܟܡܰܫܝܓ݂ܝܠܶܗ ܛܰܘܘܐ ܡܘ ܩܰܛܡܐ. ܒܷܬܷ݂ܪ ܢܰܩܩܰܐ ܚܪܶܬܐ ܟܳܡܰܚܬܝܠܶܗ ܒܘ ܕܰܣܬܐ ܘܰܐܥܠܶܗ ܡܰܠܚܐ ܗܘܠ ܕܡܝܩܰܠܶܐ ܛܰܘܘܐ. ܒܷܬ݂ܷܪ ܟܳܡܰܢܷܚܬܝܠܶܗ، ܟܳܡܰܢܫܦܝܠܶܗ ܘܟܳܬܳܠܝܠܶܗ ܠܰܫܰܢ ܐܘ ܓܝܳܨܐ. ܐܰܩ ܩܠܳܦܶܐ ܕܰܦ ܦܘܔܶܐ، ܘܕܰܙ̰ ܙ̰ܰܒܰܫ، ܘܕܰܦ ܦܰܪܚܶܐ ܘܐܰܚ ܚܰܪܝܘܰܬ݂ܬܶܗ ܟܳܡܩܰܛܥܷܢܢܶܗ ܠܰܫܰܢ ܐܘ ܣܰܘܰܠ ܕܷܬ݂ܬ݂ܶܗ ܕܳܐܟ݂ܶܠܷܢ. ܟܝܬ ܡܰܬ݂ܠܐ ܥܰܠ ܐܝ ܙ̰ܰܒܰܫܶܐ ܟܷܐܡܡܝ؛ ܐܰܬ݂ܷܢ ܒܘܰܟ݂ܬ ܗܷܢ ܝܘܕ݂ܳܝܶܐ ܠܡܷܪܕܶܐ ܠܓܰܒ ܗܷܢ ܣܘܪܝܳܝܶܐ. ܐܘ ܡܳܪܐ ܕܘ ܒܰܝܬܐ ܡܷܪܠܶܗ ܠܝ ܐܰܬ݂ܬܐ ܡܚܰܝܕ݂ܰܪ ܡܘܟܠܐ ܠܰܕ݂ ܕ݂ܰܝܦܶܐ. ܥܰܠ ܕܠܰܬܘܰܝܠܷܢ ܡܶܕܶܐ ܒܘ ܒܰܝܬܐ ܐܝ ܐܰܬ݂ܬܐ ܩܠܷܦܠܰܗ ܙ̰ܰܒܰܫܶܐ ܡܰܚܰܬܠܰܗ ܩܘܡ ܐܰܕ݂ ܕ݂ܰܝܦܶܐ. ܘܰܐܩ ܩܠܳܦܰܝܕ݂ܰܗ ܡܩܰܛܥܝܠܰܗ ܘܡܰܚܬܝܠܰܗ ܩܘܡ ܐܰܣ ܣܘܣܝܰܬ݂ܬ݂ܶܗ. ܘܰܐܒ ܒܘܙܰܪܥܶܐ ܫܠܝܩܝܠܰܗ ܡܰܚܬܝܠܰܗ ܩܘܡܰܝـܝܶܗ. ܚܷܪܠܷܢ ܐܰܝ ܝܘܕ݂ܳܝܶܐ ܒܷܚܕ݂ܳܕ݂ܶܐ ܡܷܪܠܷܢ؛ ܗܰܪܟܶܐ ܠܰܬܠܰܢ ܠܰܚܡܐ ܓܰܒ ܢܳܫܶܐ. ܕܡܶܐ ܚܰܐ ܡܶܕܶܐ ܗܘܘܰܠܠܰܢ ܡܘܟܠܐ، ܘܫ̰ܰܪܰܙ ܐܶܠܰܢ، ܘܥܰܠܳܦܐ ܠܰܚ ܚܷܝܶܘܷܢ ܕܝܕ݂ܰܢ. ܕܶܪ ܕܘ ܝܰܘܡܐ ܐܰܙܙܷܢ ܡܶܐ ܬܰܡܐ. ܐܘ ܫܠܳܩܐ ܕܘ ܒܷܪܓ݂ܷܠ. ܐܝ ܚܶܛܐ ܥܰܠ ܕܡܘ ܝܰܘܡܐ ܩܰܡܳܝܐ ܗܘܠ ܐܘܥܕܐ ܟܷܬܝܐ ܐܘ ܐܰܣܰܣ ܕܰܚ ܚܰܝܶܐ ܕܘ ܒܰܪܢܳܫܐ. ܘܥܰܠ ܕܘ ܥܰܡܐ ܣܘܪܝܳܝܐ ܕܟܷܬܝܐ ܥܰܡܐ ܥܰܬܝܩܐ ܘܡܳܪܶܐ ܕܡܰܪܕܘܬ݂ܐ ܥܰܬܷܩܬܐ، ܡܰܘܟ݂ܰܐ ܡܝ ܚܶܛܐ ܟ݂ܠܷܩܠܶܗ ܓ݂ܰܠܰܒܶܐ ܫܷܟܠܰܬ ܕܡܘܟܠܳܢܶܐ. ܐܘ ܫܠܳܩܐ ܕܘ ܒܷܪܓ݂ܷܠ ܗܰܘܟ݂ܰܐ ܟܳܡܝܣܰܡ. ܒܝ ܩܰܡܰܝܬܐ ܟܳܡܰܫܝܓ݂ܝ ܐܰܚ ܚܶܛܶܐ ܡܘ ܥܰܔܰܩ ܟܳܡܰܨܠܷܢܢܶܗ. ܒܷܬ݂ܷܪ ܟܷܡܚܰܝܕ݂ܪܝ ܐܝ ܬܦܰܝܐ ܟܳܡܰܚܬܝ ܕܰܣܬܐ ܐܰܘ ܨܷܦܪܝܝܶܗ ܪܰܒܬ݂ܐ ܡܠܝܬ݂ܐ ܡܰܝܶܐ ܐܰܥܠܰܗ. ܘܟܳܡܰܚܬܝ ܐܰܚ ܚܶܛܶܐ ܒܓܰܘܰܝـܝܶܗ ܘܟܳܡܰܪܬ݂ܚܝ ܐܰܡ ܡܰܝܶܐ ܗܘܠ ܕܡܷܫܠܳܩܝ ܐܰܚ ܚܶܛܶܐ. ܡܷܐ ܕܷܫܠܝܩܝ ܐܰܚ ܚܶܛܶܐ ܟܳܡܷܦܩܝ ܘܟܳܦܷܪܣܷܢܢܶܗ ܥܰܠ ܐܰܢ ܢܝܓܳܪܶܐ ܠܰܫܰܢ ܕܢܷܫܦܝ. ܒܷܬ݂ܷܪ ܟܳܩܳܪܷܢ، ܟܳܠܳܬܰܡ ܟܡܐ ܓܰܘܪܶܐ ܘܟܡܐ ܢܝܫܶܐ ܚܝܕ݂ܳܪܶܗ ܕܘ ܓܘܪܢܐ ܕܘ ܕܝܳܩܐ. ܟܳܡܰܪܝܣܝ ܐܷܫܡܐ ܕܡܰܝܶܐ ܥܰܠ ܐܰܚ ܚܶܛܶܐ ܕܒܘ ܓܘܪܢܐ، ܟܘܠ ܚܰܐ ܐܘ ܕܳܩܘܩܰܝܕ݂ܶܗ ܒܐܝܕ݂ܶܗ. ܐܰܥ ܥܠܰܝܡܶܐ ܟܳܕܰܝܩܝ ܐܰܥ ܥܠܰܝܡܳܬ݂ܶܐ ܟܳܡܰܠܬܡܝ ܐܘ ܡܶܕܶܐ ܕܟܳܛܳܝܰܪ ܡܘ ܓܘܪܢܐ. ܗܰܡ ܟܳܕܰܝܩܝ ܘܗܰܡ ܟܳܙܷܡܪܝ. ܡܶܩܷܡ ܐܘ ܕܝܳܩܐ ܕܘ ܒܷܪܓ݂ܷܠ ܚܰܐ ܡܰܣ ܣܰܒܰܒܶܐ ܕܘ ܥܠܰܝܡܐ ܘܐܝ ܥܠܰܝܡܬ݂ܐ ܕܚܳܙܷܢܘܰܐ ܚܕ݂ܳܕ݂ܶܐ ܘܰܐ. ܡܰܘܟ݂ܰܐ ܐܘ ܥܠܰܝܡܐ ܠܰܫܰܢ ܕܡܰܚܘܶܐ ܪܘܚܶܗ ܘܐܘ ܚܰܝܠܰܝܕ݂ܶܗ ܒܟܘܠ ܦܨܝܚܘܬ݂ܐ ܐܷܙܙܷܘܰܐ. ܡܷܐ ܕܟܰܡܷܠ ܐܘ ܕܝܳܩܐ ܟܳܦܷܪܣܝܠܶܗ، ܟܳܡܰܢܫܦܝܠܶܗ ܒܝ ܫܷܡܫܐ ܠܰܫܰܢ ܕܠܐ ܡܝܥܰܝܦܷܢ. ܒܷܬ݂ܷܪ ܐܰܢ ܢܝܫܶܐ ܟܷܡܕܰܪܷܢ ܐܰܚ ܚܶܛܶܐ ܠܰܫܰܢ ܕܡܷܦܪܳܫܐ ܡܝܢܶܗ ܐܝ ܟܰܠܦܷ݁ܟܟܶܐ. ܒܷܬ݂ܷܪ ܟܡܰܘܒܠܝ ܐܰܚ ܚܶܛܶܐ ܟܳܓܷܪܣܷܢܢܶܗ ܒܝ ܓܳܪܘܣܬܐ ܡܶܐ ܬܰܡܐ ܟܳܢܷܚܠܝܠܶܗ ܒܝ ܡܳܟ݂ܷܠ. ܐܘ ܩܰܡܳܝܐ ܟ݂ܰܫܘܢܐ ܟܳܘܶܐ ܒܷܪܓ݂ܷܠ. ܕܢܰܥܷܡ ܡܝܢܶܗ ܣܰܡܕܐ ܘܕܢܰܥܷܡ ܗܘܪܷܟ. ܡܰܬ ܬܠܳܬ݂ܐ ܫܷܟܷܠܰܬܰܢܝ ܟܳܣܰܝܡܝ ܓ݂ܰܠܰܒܶܐ ܫܷܟܠܰܬ ܕܡܘܟܠܳܢܶܐ. ܡܶܩܷܡ ܐܝ ܟܰܠܦܷ݁ܟܶܐ ܣܬܶܐ ܠܐ ܡܚܰܠܩܝܘܰܝܠܰܗ ܐܶܠܐ ܣܰܝܡܝܘܰܝܠܰܗ ܡܟ݂ܰܕܰܬ ܠܰܫܰܢ ܐܘ ܕܡܳܟ݂ܳܐ. ܗܘܠ ܠܰܙ ܙܰܒܢܰܢܝ ܐܰܚ ܚܰܪܳܝܶܐ ܐܰܡ ܡܟ݂ܰܕܰܬ ܟܘܠܠܶܗ ܡܝ ܟܰܠܦܷ݁ܟܶܘܰܝܢܶܐ. ܐܰܬ ܬܶܢܶܐ. ܡܷܐ ܕܡܰܛܷܢ ܐܰܬ ܬܶܢܶܐ ܟܘܠ ܟܡܳܐ ܝܰܘܡܶܐ ܟܷܐܙܙܷܢ ܠܘ ܩܛܳܦܰܬ݂ܬ݂ܶܗ. ܗܰܪܟܶܐ ܒܘ ܛܘܪܐ ܐܰܬ ܬܶܢܶܐ ܕܰܐܢܚܷܠ ܐܝ ܩܪܝܬ݂ܐ ܓ݂ܰܠܰܒܶܐ ܡܰܫܗܘܪ ܘܒܰܣܝܡܶܐ ܢܶܐ. ܗܷܢ ܡܰܢ ܢܳܫܶܐ ܟܳܡܰܚܬܝ ܐܰܬ ܬܶܢܶܐ ܩܘܡ ܐܝ ܫܷܡܫܐ ܗܘܠ ܕܢܷܫܦܝ. ܒܷܬ݂ܷܪ ܗܷܢ ܒܡܰܝܶܐ ܕܰܥ ܥܷܢܘܶܐ، ܘܗܷܢ ܒܡܰܝܶܐ ܘܫܰܟܰܪ ܡܷܐ ܕܡܰܪܬ݂ܰܚܚܶܗ ܐܰܡ ܡܰܝܰܢܝ ܟܳܡܰܚܬܝ ܐܰܬ ܬܶܢܶܐ ܢܰܫܝܦܶܐ ܒܓܰܘܰܝـܝܶܗ ܟܷܡܟܰܘܬܷܢܢܶܗ ܐܷܫܡܐ. ܒܷܬ݂ܷܪ ܟܳܡܷܦܩܝ ܟܳܡܰܢܫܦܷܢܢܶܗ ܒܝ ܫܷܡܫܐ ܟܳܬܳܠܷܢܢܶܗ ܫܷܟܷܠ ܕܚܰܠܝܘܬ݂ܐ ܠܰܫܰܢ ܐܰܝ ܝܰܘܡܳܬ݂ܶܐ ܕܘ ܣܰܬ݂ܘܐ. ܐܘ ܣܝܳܡܐ ܕܰܥ ܥܳܠܝܩܶܐ. ܒܛܘܪܥܰܒܕܝܢ ܐܰܢ ܐܝܠܳܢܶܐ ܕܰܓ ܓܰܘܙܶܐ ܢܳܩܘܨܶܐ ܢܶܐ. ܐܰܓ݂ܠܰܒ ܟܳܫܷܩܠܝ ܐܰܓ ܓܰܘܙܶܐ ܡܝ ܫܘܩܐ ܘܟܳܬܰܘܪܷܢܢܶܗ. ܟܳܡܷܦܩܝ ܐܰܠ ܠܶܒܰܬ݂ܬ݂ܶܗ ܟܳܡܰܬܪܷܢܢܶܗ ܒܰܡ ܡܰܝܶܐ، ܒܷܬ݂ܷܪ ܟܳܟ݂ܷܪܙܷܢܢܶܗ ܒܰܚ ܚܘܛܶܐ. ܟܳܥܷܣܪܝ ܐܰܥ ܥܷܢܘܶܐ ܕܟܷܬܢܶܐ ܡܰܙܪܳܢܰܐ. ܐܰܡ ܡܰܝܶܐ ܕܰܥ ܥܷܢܘܶܐ ܘܟܳܡܰܚܬܝ ܒܓܰܘܰܝـܝܶܗ ܟܶܦܶܐ ܕܝ ܢܩܘܪܬܐ، ܟܳܡܰܪܬ݂ܚܷܢܢܶܗ ܥܰܠ ܐܝ ܬܦܰܝܐ ܒܘ ܕܰܣܬܐ ܗܘܠ ܕܢܳܩܰܨ ܪܘܥܰܝـܝܶܗ. ܗܷܢܢܶܐ ܥܰܠ ܐܝ ܢܘܪܐ ܕܰܝـܝܡܰܐ ܟܳܠܳܙܰܡ ܕܗܳܘܶܐ ܢܳܫܶܐ ܥܰܠ ܪܝܫܰܝـܝܶܗ ܕܷܡܟ݂ܠܰܛܛܶܗ ܒܷܚܕ݂ܳܕ݂ܶܐ. ܕܠܐ ܨܰܝܕܝ ܐܰܪܥܶܗ ܕܘ ܕܰܣܬܐ ܕܝܘܩܕ݂ܝ ܘܕܳܐܬ݂ܶܐ ܪܶܚܶܗ ܕܘ ܟܶܘܙܳܪܐ ܡܰܢܢܶܗ. ܐܝ ܟܰܦ݁ܦ݁ܶܐ ܕܰܐܥܠܰܝـܝܶܗ ܟܳܩܰܝܫܝܠܰܗ ܒܝ ܡܩܰܫܫܶܐ. ܒ݂ܷܬ݂ܷܪ ܟܳܡܰܢܚܬܷܢܢܶܗ ܡܶܐ ܥܰܠ ܐܝ ܢܘܪܐ ܡܷܐ ܕܔܰܡܝܕܝ ܟܳܡܙܰܢܙܠܷܢܢܶܗ. ܒܷܬ݂ܷܪ ܡܰܐ ܐܷܫܬܐ ܟܰܝܠܶܐ ܟܳܡܰܚܬܝ ܬܠܳܬ݂ܐ ܟܰܝܠܶܐ ܡܰܢܢܶܗ ܒܘ ܕܰܣܬܐ ܟܳܡܰܪܬ݂ܚܷܢܢܶܗ. ܒܰܬ ܬܠܳܬܐ ܟܰܝܠܶܐ ܚܪܶܢܶܐ ܐܰܔ ܔܰܡܘܕܶܐ ܟܳܡܰܚܬܝ ܟܰܝܠܐ ܕܩܰܡܚܐ ܒܰܝܢܳܬ݂ܰܝܝܶܗ ܘܟܳܡܰܚܬܝ ܐܷܫܡܐ ܕܰܪܔܝܢ، ܘܒܘܙܘܪ ܐܰܦ݁ܦ݁ܶܗ ܟܳܟ݂ܷܠܛܷܢܢܶܗ ܒܷܚܕ݂ܳܕ݂ܶܐ. ܡܷܐ ܕܰܩ ܩܰܡܳܝܶܐ ܪܰܬ݂ܝܚܝ ܟܳܡܰܟ݂ܠܷܢ ܐܰܚ ܚܪܶܢܶܐ ܐܰܥܠܰܝܝܶܗ. ܗܘܠ ܕܪܷܬ݂ܝܚܝ ܛܰܘܘܐ ܘܔܷܡܕܝ. ܒܷܬ݂ܷܪ ܐܰܓ ܓܰܘܙܶܐ ܕܟܷܬܢܶܐ ܟ݂ܪܝܙܶܐ ܒܰܚ ܚܘܛܶܐ ܟܳܓ݂ܰܝܬܷܢܢܶܗ ܒܝ ܚܰܘܕܰܠ ܟܷܡܥܰܠܩܷܢܢܶܗ ܥܰܠ ܐܰܫ ܫܳܪܝܛܶܐ ܩܡܝ ܫܷܡܫܐ ܗܘܠ ܕܢܷܫܦܝ ܛܰܘܘܐ. ܟܝܬ ܢܳܫܶܐ ܟܳܓ݂ܰܝܬܷܢܢܶܗ ܬܰܪܬܶܐ ܢܰܩܩܰܬ ܟܳܦܳܝܰܫ ܠܘ ܓܳܪܰܢ ܚܰܐ ܕܟܳܪܳܚܰܡ. ܡܷܐ ܕܢܰܫܝܦܝ ܡܶܩܷܡ ܡܰܪܝܣܝܘܰܐ ܐܰܥܠܰܝܝܶܗ ܩܰܡܚܐ، ܘܡܰܠܝܦܝܘܰܢܢܶܗ ܒܰܔ ܔܘܠܶܐ ܬܳܠܷܢܘܰܢܢܶܗ. ܐܘܥܕܐ ܥܰܠ ܕܟܳܡܰܚܬܷܢܢܶܗ ܒܰܒ ܒܰܡ ܡܰܔܷܡܕܳܢܶܐ ܠܰܝܬ ܣܢܝܩܘܬܐ ܕܡܰܪܝܣܝ ܐܰܥܠܰܝـܝܶܗ ܩܰܡܚܐ. ܐܘ ܣܝܳܡܐ ܕܰܢ ܐܰܦܫܳܬ݂ܳܐ. ܡܷܐ ܕܡܰܛܷܢ ܐܰܥ ܥܷܢܘܶܐ ܠܘ ܩܛܳܦܐ ܟܷܐܙܙܷܢ ܟܳܩܷܛܦܷܢܢܶܗ ܡܰܟ ܟܰܪܡܶܐ ܘܟܳܡܰܡܛܷܢܢܶܗ ܠܘ ܒܰܝܬܐ. ܡܶܩܷܡ ܒܰܟ ܟܰܪܡܶܐ ، ܐܶܠܐ ܐܘܥܕܐ ܒܰܒ ܒܳܬܐ ܟܳܣܰܝܡܷܢܢܶܗ. ܡܶܩܷܡ ܒܝܰܘܡܐ ܟܳܡܰܚܬܝ ܩܰܛܡܐ ܒܰܡ ܡܰܝܶܐ ܕܘ ܕܰܣܬܐ ܘܟܳܡܰܪܬ݂ܚܷܢܢܶܗ ܛܰܘܘܐ. ܕܷܪ ܕܘ ܝܰܘܡܐ ܡܷܐ ܕܔܰܡܝܕܝ ܟܳܡܙܰܢܙܠܷܢܢܶܗ ܕܠܐ ܦܳܝܰܫ ܩܰܛܡܐ ܐܰܦ݁ܦ݁ܶܗ. ܟܳܡܰܪܬ݂ܚܷܢܢܶܗ ܢܰܩܩܰܐ ܚܪܶܬܐ ܒܘ ܕܰܣܬܐ ܥܰܠ ܐܝ ܬܦܰܝܐ. ܡܷܐ ܕܪܰܬ݂ܝܚܝ ܗܶܫ ܐܰܡ ܡܰܝܶܐ ܥܰܠ ܐܝ ܢܘܪܐ ܟܳܓ݂ܰܝܛܝ ܐܰܥ ܥܷܢܘܶܐ ܐܰܦ݁ܦ݁ܶܗ ܘܟܳܡܷܦܩܷܢܢܶܗ ܘܟܳܦܷܪܣܷܢܢܶܗ ܥܰܠ ܐܝ ܐܰܪܥܐ ܕܗܳܘܶܐ ܡܘܡܟܘܢ ܥܰܠ ܐܘ ܥܰܦܪܐ. ܡܷܐ ܕܢܰܫܝܦܝ ܛܰܘܘܐ ܟܡܝܬܰܢܬ݂ܪܝ ܡܰܣ ܣܝܓܶܐ ܘܟܳܡܝܢܰܩܷܢ، ܘܟܳܡܷܬܠܳܝܝ ܒܰܟ ܟܘܪܶܐ ܠܰܫܰܢ ܐܘ ܣܰܬ݂ܘܐ. ܡܶܩܷܡ ܟܷܬܘܰܐ ܒܓܰܘܶܗ ܕܰܒ ܒܳܬܶܐ ܟܘܪܶܐ ܕܡܘ ܛܝܢܐ ܡܝܣܳܡܝܘܰܐ. ܬܳܠܷܢܘܰܐ ܒܓܰܘܰܝܝܶܗ ܐܘ ܙܰܕ ܘܐܰܢ ܐܰܦܫܳܬ݂ܶܐ. ܐܘ ܣܝܳܡܐ ܕܝ ܚܰܠܝܠܶܐ. ܐܝ ܚܰܠܝܠܶܐ ܣܬܶܐ ܟܳܡܝܣܳܡܐ ܡܰܥ ܥܷܢܘܶܐ ܡܰܙܪܳܢܰܐ. ܒܝ ܩܰܡܰܝܬܐ ܟܳܥܷܨܪܝ ܐܰܥ ܥܷܢܘܶܐ ܒܝ ܡܰܥܨܰܪܬܐ. ܒܷܬ݂ܷܪ ܟܳܡܰܚܬܝ ܐܰܡ ܡܰܝܶܐ ܒܘ ܕܰܣܬܐ ܥܰܠ ܐܝ ܬܦܰܝܐ ܘܟܳܡܰܚܬܝ ܟܶܦܐ ܕܝ ܢܩܘܪܬܐ ܐܰܦ݁ܦ݁ܶܗ ܘܟܳܡܰܪܬ݂ܚܷܢܢܶܗ. ܗܷܢܢܶܐ ܥܰܠ ܐܝ ܢܘܪܐ ܕܰܝܝܡܰܐ ܟܳܠܳܙܰܡ ܕܗܳܘܶܐ ܢܳܫܶܐ ܥܰܠ ܪܝܫܰܝܝܶܗ ܕܟ݂ܳܠܰܛܛܶܗ ܒܷܚܕ݂ܳܕ݂ܶܐ. ܕܠܐ ܨܰܝܕܝ ܐܰܪܥܶܗ ܕܘ ܕܰܣܬܐ ܕܝܘܩܕ݂ܝ ܘܕܳܐܬ݂ܶܐ ܪܶܚܶܗ ܕܘ ܟܶܘܙܳܪܐ ܡܰܢܢܶܗ. ܗܘܠ ܕܡܝܟܰܘܬܝ ܛܰܘܘܐ ܕܢܘܩܨܝ ܐܷܫܡܐ ܙܷܬ ܡܘ ܦܰܠܓܐ. ܕܷܪ ܕܘ ܝܰܘܡܐ ܟܷܡܙܰܢܙܠܷܢܢܶܗ ܛܰܘܘܐ. ܡܰܚ ܚܰܡܫܐ ܟܰܝܠܶܐ ܦܰܠܓܰܝܝܶܗ ܟܡܰܚܬܷܢܢܶܗ ܒܘ ܕܰܣܬܐ ܟܡܰܪܬ݂ܚܷܢܢܶܗ ܕܝܣܰܐ. ܐܘ ܦܰܠܓܐ ܚܪܶܢܐ ܟܳܟ݂ܘܠܛܝ ܚܰܐ ܟܰܝܠܐ ܕܩܰܡܚܐ ܐܰܦ݁ܦ݁ܶܗ. ܘܟܳܡܰܚܬܝ ܐܷܫܡܐ ܕܰܪܔܝܢ، ܘܒܘܙܘܪ ܐܰܦ݁ܦ݁ܶܗ. ܘܟܳܟܷܦܟ݂ܷܢܢܶܗ ܥܰܠ ܐܘ ܕܰܣܬܐ ܡܷܐ ܕܪܰܬ݂ܝܚܝ ܥܰܡ ܚܕ݂ܳܕ݂ܶܐ ܩܰܪܝܘܐ ܠܦܰܠܓܶܗ ܕܣܰܥܰܐ ܟܳܡܰܢܚܬܷܢܢܶܗ ܡܶܐ ܥܰܠ ܐܝ ܢܘܪܐ. ܒܷܬ݂ܷܪ ܟܳܡܰܬܪܷܢ ܐܰܣ ܣܶܦܳܩܶܐ ܒܰܡ ܡܰܝܶܐ ܟܳܡܰܝܕܝ ܒܝ ܝܰܢܕܐ ܐܝ ܚܰܘܕܰܠ ܟܳܟܘܦܟ݂ܝ ܐܰܦ݁ܦ݁ܶܗ. ܡܷܐ ܕܢܰܫܝܦܐ ܐܷܫܡܐ ܟܳܡܷܦܩܝܠܰܗ ܘ ܟܳܡܩܰܛܥܝܠܰܗ ܦܰܠܩܶܐ ܟܡܰܩܷܠܒܝܠܰܗ ܥܰܠ ܐܝ ܦܳܬ݂ܐ ܚܪܶܬܐ ܘܟܳܡܰܚܬܝܠܰܗ ܒܝ ܫܷܡܫܐ ܗܘܠ ܕܢܷܫܦܐ. ܘܒܷܬ݂ܷܪ ܟܳܬܳܠܝܠܰܗ ܒܘ ܡܰܔܰܡܕܳܢܐ ܐܰܘ ܒܕܘܟܬ݂ܐ ܔܰܡܷܬܬܐ. ܗܰܬ݂ܶܐ ܣܬܶܐ ܡܶܩܷܡ ܡܰܪܝܣܝܘܰܐ ܐܰܥܠܰܗ ܩܰܡܚܐ. ܐܘ ܣܝܳܡܐ ܕܘ ܦ݁ܰܣܬܝܩ. ܟܳܥܷܨܪܝ ܐܰܥ ܥܷܢܘܶܐ ܕܰܡ ܡܰܙܪܳܢܰܐ ܒܝ ܡܰܥܨܰܪܬܐ. ܒܷܬ݂ܷܪ ܟܳܡܰܪܬ݂ܚܷܢܢܶܗ ܥܰܠ ܐܝ ܬܦܰܝܐ ܒܘ ܕܰܣܬܐ ܘܟܳܡܰܚܬܝ ܟܶܦܐ ܕܝ ܢܩܘܪܬܐ ܐܰܦ݁ܦ݁ܶܗ. ܗܷܢܢܶܐ ܥܰܠ ܐܝ ܢܘܪܐ ܕܰܝܝܡܰܐ ܟܳܠܳܙܰܡ ܕܗܳܘܶܐ ܢܳܫܶܐ ܥܰܠ ܪܝܫܰܝܝܶܗ ܕܟ݂ܳܠܰܛܛܶܗ ܒܷܚܕ݂ܳܕ݂ܶܐ. ܕܠܐ ܨܰܝܕܝ ܐܰܪܥܶܗ ܕܘ ܕܰܣܬܐ ܕܝܘܩܕ݂ܝ ܘܕܳܐܬ݂ܶܐ ܪܶܚܶܗ ܕܘ ܟܶܘܙܳܪܐ ܡܰܢܢܶܗ. ܡܷܐ ܕܷܡܟܰܘܬܝ ܛܰܘܘܐ ܘܕܢܘܩܨܝ ܢܳܩܷܨܬܷܪ ܡܘ ܪܘܥܐ ܟܡܰܢܚܬܷܢܢܶܗ ܡܶܐ ܥܰܠ ܐܝ ܢܘܪܐ. ܕܷܪ ܕܘ ܝܰܘܡܐ ܟܳܡܙܰܢܙܠܷܢܢܶܗ ܘܟܳܡܰܚܬܝ ܦܰܠܓܰܝܝܶܗ ܒܘ ܕܰܣܬܐ ܘܟܳܡܰܪܬ݂ܚܷܢܢܶܗ. ܐܘ ܦܰܠܓܐ ܚܪܶܢܐ ܟܳܟ݂ܘܠܬܝ ܐܰܦ݁ܦ݁ܶܗ ܒܰܫ ܫܰܘܥܐ ܚܰܐ ܟܰܝܠܐ ܕܩܰܡܚܐ ܘܟܳܟܷܦܟ݂ܝܠܶܗ ܥܰܠ ܐܰܚ ܚܪܶܢܶܐ. ܡܷܐ ܕܪܰܬ݂ܝܚܝ ܦܰܠܓܶܗ ܕܣܰܥܰܐ ܥܰܡ ܚܕ݂ܳܕ݂ܶܐ ܟܳܡܰܚܬܝ ܒܓܰܘܰܝܝܶܗ ܐܷܫܡܐ ܕܰܪܔܝܢ، ܘܒܘܙܘܪ ܟܳܟ݂ܷܠܛܷܢܢܶܗ ܛܰܘܘܐ ܒܷܚܕ݂ܳܕ݂ܶܐ. ܒܷܬ݂ܷܪ ܟܳܡܰܝܕܝ ܒܝ ܝܰܢܕܐ ܡܝ ܚܰܘܕܰܠ ܟܳܟܷܦܟ݂ܝܠܶܗ ܥܰܠ ܐܰܬ݂ ܬ݂ܶܘܒܶܐ ܕܘ ܩܘܡܰܫ ܟܳܡܠܰܘܠܩܝܠܶܗ ܪܰܩܝܩܐ. ܒܷܬ݂ܷܪ ܐܰܬ݂ ܬ݂ܰܘܒܰܢܝ ܟܳܦܷܪܣܷܢܢܶܗ ܝܰܘܡܐ ܥܰܠ ܐܰܫ ܫܳܪܝܛܶܐ ܩܡܝ ܫܷܡܫܐ ܠܰܫܰܢ ܕܢܷܫܦܝ. ܕܷܪ ܕܘ ܝܰܘܡܐ ܟܳܡܰܬܪܷܢ ܚܰܨܶܗ ܕܰܬ ܬ݂ܰܘܒܶܐ ܒܦܰܣܬܐ ܬܪܝܬ݂ܐ ܘܟܳܫܷܠܚܝ ܐܘ ܦ݁ܰܣܬܝܩ ܡܘ ܔܘܠܐ. ܟܳܡܳܚܝܠܶܗ ܟܡܳܐ ܣܰܥܰܝܰܬ ܠܝ ܫܷܡܫܐ. ܒܷܬ݂ܷܪ ܟܳܩܰܝܨܝܠܰܗ ܦܰܠܩܶܐ ܦܰܠܩܶܐ ܟܳܠܰܝܦܝܠܶܗ ܥܰܠ ܚܕ݂ܳܕ݂ܶܐ ܟܳܣܰܝܡܝܠܶܗ ܕܰܡܷܟܰܬ. ܡܶܩܷܡ ܡܰܪܝܣܝܘܰܐ ܩܰܡܚܐ ܐܰܥܠܶܗ ܐܘܥܕܐ ܟܳܬܳܠܝܠܶܗ ܒܘ ܡܰܔܰܡܕܳܢܐ ܐܰܘ ܒܕܘܟܬ݂ܐ ܔܰܡܷܬܬܐ. ܐܘ ܚܰܡܪܐ. ܐܘ ܚܰܡܪܐ ܣܬܶܐ ܚܰܐ ܡܰܫ ܫܬܳܝܶܐ ܥܰܬܝܩܶܐ ܕܷܒܪܝܬ݂ܐ ܝܐ. ܒܷܬ݂ܷܪ ܡܘ ܛܰܘܦܳܢܐ ܟ݂ܘܕ ܟܳܟܳܬ݂ܰܘ ܒܝ ܬܰܘܪܰܐ؛ ܢܘܚ ܐܝܢܰܩܩܰܐ ܕܢܰܦܷܩ ܡܝ ܓܰܡܝܝܶܐ ܙܪܷܥܠܶܠܶܗ ܟܰܪܡܐ. ܡܰܥ ܥܶܢܘܶܐ ܕܘ ܟܰܪܡܐ ܣܷܡܠܶܗ ܚܰܡܪܐ ܫܬܶܠܶܗ ܘܪܰܘܝ. ܡܰܐܬ݂ܶܐ ܟܳܡܝܕ݂ܰܥ ܐܘ ܚܰܡܪܐ ܩܰܡܳܝܐ ܒܒܶܝܬ݂ܢܰܗܪܝܢ ܣܝܡ. ܐܘ ܥܰܡܐ ܣܘܪܝܳܝܐ ܥܰܠ ܕܟܷܬܝܐ ܐܘ ܥܰܡܐ ܥܰܬܝܩܐ ܕܟܳܥܳܝܰܫ ܒܒܶܝܬ݂ܢܰܗܪܝܢ ܟܳܡܕܰܘܰܡ ܐܘ ܣܝܳܡܐ ܕܘ ܚܰܡܪܐ ܒܘ ܒܰܝܬܐ. ܗܰܢܝ ܟܡܐ ܐܷܫܢܶܐ ܚܰܪܳܝܶܐ ܦܬܝܚܝ ܬܰܪܬܶܐ ܦܰܒܪܝܩܰܬ ܕܘ ܚܰܡܪܐ ܣܬܶܐ. ܥܰܠ ܕܒܰܫ ܫܬܳܝܶܐ ܕܠܰܪܘܰܠ ܟܳܡܰܚܬܝ ܕܰܪܡܳܢܶܐ ܠܰܫܰܢ ܐܘ ܢܛܳܪܐ ܕܘ ܚܰܡܪܐ ܕܠܐ ܚܳܪܰܘ. ܒܷܒܪܝܬ݂ܳܐ ܟܝܬ ܓ݂ܰܠܰܒܶܐ ܢܳܫܶܐ ܟܳܟܷܪܟ݂ܝ ܥܰܠ ܡܶܕܶܐ ܕܟܷܬܝܐ ܪܰܚܘܩܐ ܡܘ ܕܰܪܡܳܢܐ. ܡܰܘܟ݂ܰܐ ܒܛܘܪܥܰܒܕܝܢ ܟܝܒܰܢ ܕܷܐܡܡܝܢܰܐ ܒܟܘܠ ܒܰܝܬܐ ܟܳܡܝܣܰܡ ܚܰܡܪܐ ܗܰܡ ܠܘ ܫܬܳܝܐ ܘܗܰܡ ܠܘ ܙܶܒܳܢܐ. ܡܶܐ ܟܘܠ ܫܷܟܷܠ ܕܝ ܥܶܢܘܐ ܟܳܡܝܣܰܡ ܚܰܡܪܐ. ܐܶܠܐ ܟܝܬ ܫܷܟܷܠ ܕܥܶܢܘܐ ܟܷܡܬܐ ܕܝ ܩܠܷܦܬܰܝܕ݂ܰܗ ܩܘܝܬ݂ܐ ܝܐ ܐܘ ܛܰܥܡܰܝܕܰܗ ܠܰܬܝܐ ܚܰܠܝܐ ܐܰܓ݂ܠܰܒ ܡܶܐ ܗܰܬ݂ܶܐ ܟܳܡܝܣܰܡ ܐܘ ܚܰܡܪܐ. ܟܳܡܷܩܛܳܦܝ ܐܰܥ ܥܷܢܘܶܐ ܟܳܡܝܦܰܪܕ݂ܢܝ ܡܰܣ ܣܝܓܶܐ، ܘܟܳܡܝܬܰܚܬܝ ܒܓܰܘܶܗ ܕܰܠ ܠܰܓܰܢܶܐ ܗܘܠ ܫܰܒܬ݂ܐ ܒܝ ܫܷܡܫܐ. ܟܘܠ ܨܰܦܪܐ ܘܥܰܨܪܝܝܶܐ ܟܷܡܦ݁ܰܪܫ̰ܩܷܢܢܶܗ ܒܐܝܕ݂ܰܝܝܶܗ. ܒܷܬ݂ܷܪ ܡܝ ܫܰܒܬ݂ܐ ܟܳܡܝܬܰܚܬܝ ܒܓܰܘܶܗ ܕܰܟ ܟܝܣܶܐ ܟܳܥܷܨܪܷܢܢܶܗ ܒܝ ܡܰܥܨܰܪܬܐ. ܐܰܡ ܡܰܝܰܬ݂ܬ݂ܶܗ ܟܳܡܝܬܰܚܬܝ ܒܰܒ ܒܝܕܳܢܶܐ ܟܳܣܘܟ݂ܪܝ ܦܶܡܰܝܝܶܗ ܛܰܘܘܐ ܕܠܳܡܰܝܕܝ ܗܰܘܰܐ ܘܟܳܬܳܠܷܢܢܶܗ ܒܕܘܟܬ݂ܐ ܫܰܚܷܢܬܐ. ܒܷܬ݂ܷܪ ܡܶܐ ܬܪܶܐ ܐܰܘ ܬܠܳܬ݂ܳܐ ܝܰܪܚܶܐ ܒܷܬ݂ܷܪ ܟܳܦܷܬܚܝ ܟܳܫܳܬܝܠܶܗ. ܐܰܣ ܣܝܓܶܐ ܟܳܒܷܢܢܶܗ ܠܘ ܣܰܐܘܰܠ. ܐܘ ܕܰܪܡܰܠܰܐ. ܡܶܩܷܡ ܥܰܠ ܕܡܰܔܰܡܕܳܢܶܐ ܠܰܬܘܰܐ ܐܘ ܒܰܪܢܳܫܐ ܚܳܙܶܘܰܝܠܶܗ ܫ̰ܰܪܰܐ ܠܘ ܬܠܳܝܐ ܕܘ ܡܶܕܶܐ. ܕܰܐܝܕܰܪܒܐ ܒܰܝ ܝܰܪܚܶܐ ܕܬܳܠܶܐ ܐܘ ܡܶܕܶܐ ܕܠܐ ܚܳܪܰܘ ܘܠܐ ܡܝܥܰܝܦܰܢ. ܐܘ ܒܰܨܪܐ ܣܬܶܐ ܚܰܐ ܡܰܐ ܡܶܕܳܢܰܢܝ ܝܐ. ܟܘܠ ܒܰܝܬܐ ܗܶܫ ܒܘ ܩܰܝܛܐ ܟܳܨܳܝܰܕܠܶܗ ܚܰܝܘܰܢ ܟ݂ܘܕ ܐܰܪܘܳܢܐ ܐܰܘ ܪܷܢܔܝܝܶܐ ܐܘ ܪܝܫܐ ܕܣܰܘܰܠ. ܟܘܠ ܚܰܐ ܠܘ ܓܳܪܰܢ ܕܘ ܚܰܝܠܰܝܕ݂ܶܗ ܘܠܘ ܓܳܪܰܢ ܕܰܢ ܢܰܦܫܳܬ݂ܶܐ ܕܘ ܒܰܝܬܐ. ܐܘ ܚܰܝܘܰܢܰܢܐ ܒܘ ܩܰܝܛܐ ܟܘܠܶܗ ܟܳܘܶܐ ܡܷܣܪܐ ܒܘ ܒܰܝܬܐ ܟܷܡܥܰܠܦܝܠܶܗ ܠܰܫܰܢ ܕܬܳܩܰܢ ܓ݂ܰܠܰܒܶܐ. ܡܷܐ ܕܡܰܛܝ ܚܰܡܫܰܥܣܰܪ ܒܘ ܝܰܪܚܐ ܕܰܚܕ݂ܰܥܣܰܪ ܕܟܷܬܝܐ ܐܘ ܝܰܘܡܐ ܕܡܳܪܝ ܫܰܠܝܛܐ ܐܰܓ݂ܠܰܒ ܕܰܢ ܢܳܫܶܐ ܒܘ ܝܰܘܡܰܢܐ ܟܳܢܷܚܪܝ ܐܘ ܕܰܪܡܰܠܐ ܕܷܬ݂ܬ݂ܶܗ. ܟܳܡܩܰܛܥܝ ܐܘ ܒܰܨܪܐ ܟܳܦܷܠܓ݂ܝܠܶܗ ܡܶܐ ܚܕ݂ܳܕ݂ܶܐ. ܐܘ ܨܶܢܳܢܐ ܠܪܘܚܶܗ ܐܰܓ ܓܰܪܡܶܐ ܠܪܘܚܰܝܝܶܗ. ܗܷܢ ܡܘ ܨܶܢܳܢܐ ܟܳܡܫܰܕܪܝܠܶܗ ܠܝ ܫܘܩܐ ܟܳܦܷܪܡܝܠܶܗ ܟܳܣܰܝܡܝܠܶܗ ܩܝܡܰܐ. ܐܘ ܚܪܶܢܐ ܟܳܬܳܠܝܠܶܗ ܠܰܫܰܢ ܐܘ ܛܶܘܳܝܐ. ܒܷܬ݂ܷܪ ܐܘ ܨܶܢܳܢܐ، ܘܐܝ ܩܝܡܰܐ ܘܰܓ ܓܰܪܡܶܐ ܟܳܣܰܝܡܷܢܢܶܗ ܐܰܟܠܰܬ ܠܰܫܰܢ ܡܘܟܠܐ ܟܳܬܳܠܷܢܢܶܗ ܒܘ ܡܰܔܰܡܕܳܢܐ. ܐܰܩ ܩܰܪܥܶܐ ܘܪܰܓ݂ܠܶܐ ܣܬܶܐ ܟܷܡܫܰܘܥܬܷܢܢܶܗ ܒܝ ܢܘܪܐ ܒܷܬ݂ܷܪ ܟܳܣܰܝܡܝ ܡܰܢܢܶܗ ܡܘܟܠܐ ܕܷܐܫܡܶܗ ܝܰܟ݂ܢܝ ܡܰܚ ܚܷܡܨܶܐ ܘܥܰܡ ܒܷܪܓ݂ܷܠ. ܒܘ ܝܰܘܡܐ ܕܘ ܢܚܳܪܐ ܕܘ ܕܰܪܡܰܠܰܐ ܒܟܘܠ ܒܰܝܬܐ ܟܳܘܶܐ ܥܰܙܝܡܰܐ ܟܳܩܳܪܷܢ ܠܰܪ ܪܳܚܡܶܐ ܘܚܰܒܝܒܰܬ݂ܬ݂ܶܗ ܟܳܡܒܰܫܠܝ ܒܰܨܪܐ ܘܟܐܘܟ݂ܠܝ ܥܰܡ ܚܕ݂ܳܕ݂ܶܐ. ܡܶܩܷܡ ܐܘ ܒܰܨܪܐ ܡܰܠܚܝܘܰܝܠܶܗ ܒܝ ܡܰܠܚܐ، ܘܬܳܠܷܢܘܰܝܠܶܗ ܒܘ ܒܰܝܬܐ ܒܓܰܘܶܗ ܕܨܰܢܕܘܩܐ ܠܰܫܰܢ ܐܰܝ ܝܰܘܡܳܬ݂ܶܐ ܕܘ ܣܰܬ݂ܘܐ. ܡܷܐ ܕܠܳܙܰܡܘܰܝܠܷܢ ܐܰܟܠܶܐ؛ ܡܘܦܩܝܘܰܐ ܡܰܫܝܓ݂ܝܘܰܝܠܶܗ ܡܝ ܡܰܠܚܐ ܛܰܘܘܐ، ܒܷܬ݂ܷܪ ܫܷܠܩܝܘܰܐ ܐܰܘ ܡܛܰܘܝܘܰܝܠܶܗ. ܐܰܕ ܝܰܘܡܰܐ ܟܳܡܰܚܬܝܠܶܗ ܒܰܡ ܡܰܔܰܡܕܳܢܶܐ ܟܳܡܰܓܷܠܕ݂ܝܠܶܗ. ܒܷܫܪܳܪܐ ܐܘ ܛܰܥܡܐ ܕܘ ܒܰܨܪܐ ܟܣܝܕܐ ܒܰܣܷܡ ܡܘ ܒܰܣܪܐ ܕܟܳܡܝܬܰܓܠܷܕ݂ܐ ܝܐ ܘܗܰܡ ܠܘ ܚܘܠܡܳܢܐ ܛܰܘܬܷܪ ܝܐ. ܐܰܪ ܪܶܡܘܢܶܐ. ܐܰܪ ܪܶܡܘܢܶܐ ܣܬܶܐ ܒܷܬ݂ܷܪ ܡܷܐ ܕܟܳܡܳܛܷܢ ܟܳܫܷܡܛܝ ܟܳܡܰܢܬ݂ܪܝ ܐܰܚ ܚܰܦ݁ܦ݁ܳܬ݂ܰܬ݂ܶܗ ܘܟܳܡܰܪܝܣܝ ܐܷܫܡܐ ܕܡܰܠܚܐ ܐܰܥܠܰܝܝܶܗ ܘܟܳܡܰܚܬܷܢܢܶܗ ܩܡܝ ܫܷܡܫܐ ܗܘܠ ܕܢܷܫܦܝ. ܡܷܐ ܕܢܰܫܝܦܝ ܛܰܘܘܐ ܟܳܡܷܣܬܰܥܷܡܠܷܢܢܶܗ ܒܰܝܢ ܐܰܙ ܙܰܠܰܬܰܬ ܘܒܰܝܢ ܐܰܛ ܛܠܰܘܚܶܐ. ܟܷܐܡܡܝ ܠܷܢ ܚܰܒܷܪܡܰܢ. ܘܗܷܢ ܣܬܶܐ ܟܳܡܰܢܬ݂ܪܝ ܐܰܚ ܚܰܦ݁ܦ݁ܳܬ݂ܶܗ ܕܰܪ ܪܶܡܘܢܶܐ ܟܳܥܷܣܪܝ ܐܰܡ ܡܰܝܰܬ݂ܬ݂ܶܗ ܛܰܘܘܐ. ܟܳܡܰܚܬܷܢܢܶܗ ܒܓܰܘܶܗ ܕܕܰܣܬܐ ܘܟܳܡܰܪܬ݂ܚܷܢܢܶܗ ܗܘܠ ܕܚܷܠܡܝ ܕܩܳܫܷܢ ܛܰܘܘܐ. ܒܷܬ݂ܷܪ ܟܳܡܰܚܬܝ ܡܰܠܚܐ ܒܰܝܢܳܬ݂ܰܝܝܶܗ ܘܟܳܬܳܠܷܢܢܶܗ ܒܰܫ ܫܘܫܰܝܰܬ ܒܘ ܒܰܝܬܐ. ܗܰܢܝ ܣܬܶܐ ܟܳܡܷܣܬܰܥܷܡܠܷܢܢܶܗ ܒܰܙ ܙܰܠܰܬܰܬ ܘܒܰܝܢ ܐܰܡ ܡܘܟܠܳܢܶܐ. ܐܘ ܚܰܐ ܕܚܳܡܰܣ ܐܘ ܡܘܟܠܐ ܥܰܠ ܠܶܒܶܗ ܟܳܐܟ݂ܶܠܶܗ ܐܷܫܡܐ ܕܚܰܒܷܪܡܰܢ ܐܰܘ ܟܳܫܳܬܶܐ ܬܰܪܘܳܕ݂ܳܐ ܡܰܡ ܡܰܝܰܢܝ. ܡܶܩܷܡ ܟܘܠ ܒܰܝܬܐ ܒܘ ܙܳܝܘܕܐ ܒܰܩ ܩܷܪܝܰܘܳܬ݂ܶܐ ܟܷܬܘܰܝܠܶܢ ܚܷܝܶܘܷܢ ܟ݂ܘܕ ܚܡܳܪܶܐ، ܒܰܓ݂ܠܶܐ ܐܰܘ ܣܘܣܝܶܐ ܠܰܫܰܢ ܐܘ ܡܰܙܠܐ ܘܡܰܬ݂ܝܐ ܘܗܰܡ ܠܰܫܰܢ ܐܘ ܕܘܳܪܐ، ܘܠܰܛ ܛܰܥܢܶܐ. ܬܰܘܪܳܬ݂ܶܐ، ܥܘܳܢܶܐ، ܥܶܙܶܐ، ܓܝܳܬ݂ܶܐ ܣܬܶܐ ܠܰܫܰܢ ܐܘ ܚܰܠܘܐ، ܡܰܣܬܐ، ܓܘܶܬܐ، ܡܷܫܚܐ، ܒܶܥܶܐ ܘܒܰܨܪܐ. ܐܝܕ݂ܰܐ ܡܶܩܷܡ ܐܘ ܒܰܪܢܳܫܐ ܕܡܰܠܬܰܡܠܷܗ ܐܝ ܣܢܝܩܘܬ݂ܐ ܕܘ ܣܰܬ݂ܘܐ ܟܳܐܒܰܥ ܒܰܡ ܡܷܬܪܳܘܰܬ ܛܪܳܐ ܐܳܬ݂ܶܐ ܬܰܠܓܐ ܠܰܬܝܐ ܒܓ݂ܰܡܶܗ. ܐܝܕ݂ܰܐ ܐܘ ܕܘܪܘܡ ܕܝ ܐܝܩܰܪܬ݂ܐ ܕܠܳܘܶܐ ܛܰܘܘܐ ܐܰܠܳܗܐ ܡܰܣܬܰܪ. ܡܰܘܟ݂ܰܐ ܐܘ ܣܰܬ݂ܘܐ ܐܘ ܙܰܒܢܐ ܕܝ ܪܰܚܰܐ ܕܘ ܒܰܪܢܳܫܐ ܘܕܰܚ ܚܝܶܘܷܢ ܘܕܝ ܛܰܒܝܥܰܐ ܝܐ. ܐܶܠܐ ܠܰܫܰܢ ܐܘ ܦܰܩܝܪܐ ܙܰܒܢܐ ܕܘ ܟܰܦܢܐ ܕܝ ܣܰܦܰܠܰܐ ܝܐ. ܐܘ ܩܰܝܛܐ ܐܘ ܒܰܒܐ ܕܰܦ ܦܷܩܷܪ ܘܦܰܩܝܪܶܐ ܝܐ ܘܐܘ ܣܰܬ݂ܘܐ ܐܘ ܒܰܒܐ ܕܰܥ ܥܰܬܝܪܶܐ ܝܐ. ܡܠܦܢܐ ܐܝܗܐܢ ܓܘܪܩܐܢ 2727 ܡ̈ܠܐ.
