Ayhan Gürkan: ܐܘ ܬܰܪܝܟ݂ ܕܡܷܕ݂ܝܰܕ݂ / U tarix d Mëḏyaḏ

U tarix d Mëḏyaḏ

ܡܷܕ݂ܝܰܕ݂ ܟ݂ܷܕ ܟܷܬܝܐ ܐܝܕ݂ܝܥܐ ܚܕ݂ܐ ܡܰܕ ܕܘܟܳܬ݂ܶܐ ܥܰܬܝܩܶܐ ܕܷܒܪܝܬ݂ܐ ܕܘ ܥܰܡܐ ܣܘܪܝܳܝܐ ܕܡܰܥܷܡܪܳܠܶܗ ܝܐ. ܟܡܝܬܰܘܡܰܪܠܰܗ ܐܝ ܐܰܪܷܫܟܰܝܬܐ ܕܛܘܪܥܰܒܕܝܢ ܘܐܝ ܐܶܡܐ ܕܰܩ ܩܷܪܝܰܘܳܬ݂ܶܐ. ܐܷܫܡܰܗ ܠܘ ܓܳܪܰܢ ܕܷܚܕ݂ܐ ܡܰܠ ܠܘܚܝܳܬ݂ܶܐ ܕܘ ܛܝܢܐ ܕܚܰܙܝܐ ܗܘܠ ܐܘܥܕܐ܆ ܐܘ ܬܰܪܝܟ݂ ܕܝܕ݂ܰܗ ܟܡܳܛܶܐ ܠـ 2800 ܐܷܫܢܶܐ. ܒܝ ܟܬ݂ܰܘܬܰܬ݂ܶܐ ܟܳܐܡܰܪ ܐܘ ܡܰܠܟܐ. ܐܷܢܳܐ ܐܰܫܘܪܒܰܢܝܒܰܠ ܡܣܷܟܠܝ ܡܰܬܺܝܰܬ ܘܐܰܩ ܩܷܪܝܰܘܳܬ݂ܰܝܕ݂ܰܗ ܒܫܰܪܰܦ ܪܰܒܐ ܡܚܰܠܰܩܠܝ ܐܰܥܠܰܝܝܶܗ ܒܶܫ ܝܰܥܢܝ ܘܶܪܓܝ ܓ݂ܰܠܰܒܶܐ܀ ܐܷܫܡܰܗ ܕܡܶܕ݂ܝܰܕ݂ ܗܷܢ ܟܷܐܡܡܝ ܐܝ ܡܰܥܢܰܝܕܰܗ ܡܷܪܪܶܐ ܝܐ (ܡܰܚܙܝܬ݂ܐ)܆ ܗܷܢ ܟܷܐܡܡܝ ܟܳܐܬ݂ܶܐ ܡܰܡ ܡܥܰܪܶܐ. ܘܗܶܢ ܟܷܐܡܡܝ ܟܳܐܬ݂ܶܐ ܡܶܐ ܡܰܬ݂ܰܐ ܕܺܝܠ ܡܰܬܰܝܕܺܝ ܒܘ ܠܶܥܙܐ ܡܰܕܷܢܚܳܝܐ ܐܝ ܩܪܝܬ݂ܰܝܕ݂ܝ ܐܰܘ ܐܝ ܘܰܠܰܝܰܝܕ݂ܝ. ܟܳܡܷܬܝܰܩܰܢܢܐ ܐܘ ܪܶܢܝܐ ܚܰܪܳܝܐ ܒܝ ܕܘܟܬ݂ܳܐ ܝܐ܀ ܒܘ ܘܰܟ݂ܬ ܕܝ ܔܘܡܗܘܪܝܝܶܐ ܐܰܒܝܥܝ ܕܷܡܒܰܕܠܝ ܐܷܫܡܰܗ ܕܣܰܝܡܝܠܶܗ ܬܘܪܰܢ ܫܶܗܝܪ ܐܶܠܐ ܐܘ ܥܰܡܐ ܠܐ ܡܰܩܒܶܠܶܗ ܢܰܦܷܩ ܡܩܰܒܷܠ ܕܘ ܡܶܕܰܢܐ ܦܰܝܷܫ ܐܷܫܡܰܗ ܗܘܠ ܠܰܐܕܝܰܘܡܰܐ ܡܶܕ݂ܝܰܕ݂. ܒܰܪ ܪܘܫܡܳܝܳܬ݂ܐ ܡܝܕܝܰܬ. ܐܶܠܐ ܐܰܢ ܐܷܫܡܳܢܶܐ ܥܰܬܝܩܶܐ ܕܰܫ ܫܰܘܬ݂ܰܘܳܬ݂ܰܝܕ݂ܰܗ ܡܰܩܷܠܒܝ ܠܘ ܬܷܪܟܝ ܘܗܰܢܝ ܢܶܐ. ܐܝ ܫܰܘܬ݂ܐ ܩܰܫܪܳܐܘܰܬ ܗܰܘܝܐ ܐܰܩܫ̰ܰܩܰܝܰܐ. ܓ݂ܰܢܢܳܘܰܬ، ܘܒܰܪܠܰܛ ܗܰܘܷܢ ܔܘܡܗܘܪܝܝܶܬ. ܫ̰ܷܦܫ̰ܰܩܰܐ، ܘܒܰܚܕܳܘܰܬ، ܘܔܰܠܡܰܐ ܗܰܘܷܢ ܐܷܫܷܩܠܰܪ. ܣܰܥܝܕܐ ܗܰܘܝܐ ܓܳܠܔܘܟ. ܔܓ݂ܰܝܪ ܡܰܢܝ ܟܷܬܘܰܐ ܐܝ ܫܰܘܬ݂ܐ ܕܰܟ ܟܰܠܕܳܝܶܐ، ܘܡܝܪ، ܘܣܷܪܝܰܢ ܩܰܬܳܠܝܟ، ܘܦ݁ܪܳܛܶܣܬܰܢ ܘܙܰܬܬܝ ܔܰܠܡܰܐ، ܘܙܰܒܳܩ، ܘܓܪܝܓ݂ܐ، ܘܝܰܪܠܝ ܐܝܣܠܰܡ، ܘܝܰܒܰܢܔܝ ܐܝܣܠܰܡ. ܘܶܐܣܬܶܠ ܣܬܶܐ ܕܟܷܬܝܐ ܚܕ݂ܐ ܡܰܫ ܫܰܘܬ݂ܳܘܳܬ݂ܶܐ ܕܡܷܕ݂ܝܰܕ݂܆ ܡܚܰܠܡܳܝܶܐ ܢܶܐ. ܗܝܝܰܐ ܣܬܶܐ ܦܠܝܓ݂ܐ ܠܫܶܬ ܫܰܘܬ݂ܰܘܳܬ݂ܶܐ܀ ܒܝ ܫܬܐ 1968 ܐܰܬ݂ܝ ܐܘ ܔܰܪܝܰܢ ܠܡܶܕ݂ܝܰܕ݂ ܐܶܠܐ ܒܡܶܕ݂ܝܰܕ݂ ܐܝ ܐܝܩܰܪܬ݂ܐ ܕܒܶܐ ܣܶܪܬܝ ܒܷܬ݂ܷܪ ܡܘ ܣܰܝܦܐ ܦܬܷܚܘܰܠܠܶܗ ܪܰܚܝܐ ܕܘ ܩܰܡܚܐ ܡܰܡܛܰܠܠܶܗ ܙ̰ܶܢܶܪܶܬܳܪ ܡܦܰܠܰܓ݂ܘܰܐ ܔܰܪܝܰܢ ܠܝ ܫܰܘܬ݂ܐ ܕܒܶܗ ܒܰܚܕܝ ܘܔܰܠܡܰܐ. ܡܰܘܟ݂ܰܐ ܐܝܢܰܩܩܰܐ ܕܡܰܩܠܰܒܒܶܗ ܐܷܫܡܰܝܝܶܗ ܬܷܪܟܝ ܡܰܚܰܬܬܶܗ ܐܷܫܷܩܠܰܪ. ܡܶܕ݂ܝܰܕ݂ ܟܦܰܝܫܐ ܒܰܝܢ ܠܷܢܨܝܘܷܢ ܘܗܰܙܰܟ݂ ܘܟܰܪܒܳܪܰܢ ܘܟܰܪܔܳܣ ܘܡܰܥܨܰܪܬܶܐ ܐܰܩ ܩܰܙܰܬ. ܘܒܰܝܢ ܠܥܝܘܰܪܕܐ ܘܥܷܪܢܷܣ ܘܨܰܠܷܚ ܘܚܰܒܣܷܣ ܘܟܦܰܪܫܳܡܰܥ ܘܡܙܝܙܰܚ ܐܰܩ ܩܷܪܝܰܘܳܬ݂ܶܐ. ܘܷܐܫܡܶܐ ܕܰܢ ܐܰܪܥܳܬ݂ܶܐ ܘܕܰܕ ܕܘܟܳܬ݂ܶܐ ܕܟܝܬ ܐܶܒܰܗ ܗܰܢܝ ܢܶܐ. ܐܝ ܩܰܘܙܢܝܬ݂ܐ ܘܩܰܦ ܫܘܝܠܐ ܘܐܰܓ݂ ܓ݂ܰܪܙܰܬ ܘܓ݂ܰܪܙܷܟ ܕܘ ܚܰܣܝܐ ܘܒܰܨܠܳܝܶܐ ܘܫܰܥܒܘܢܝܝܶܐ ܘܕܷܪܝܰܢܶܐ ܘܡܷܫܡܷܫܝܝܶܐ ܒܷܟܪܰܢܝܝܶܐ ܣܷܠܰܪܝܝܶܐ ܐܘ ܫܰܠܘܐ ܘܐܘ ܫܰܠܘܐ ܕܘ ܩܘܨܪܐ ܘܐܰܫ ܫܚܰܪܰܬ ܐܰܕ ܕܰܘܡܶܐ ܘܐܰܒ ܒܰܒܰܬ ܘܐܘ ܚܘܠܐ ܘܐܘ ܥܰܬܘܡܐ ܐܘ ܚܰܬ݂ܡܳܢܐ ܘܐܘ ܩܶܢܐ ܕܝ ܕ݂ܰܒܥܐ ܘܐܝ ܡܰܬ݂ܢܐ ܘܐܝ ܒܰܒܶܐ ܘܐܝ ܥܰܝܢܐ ܘܐܝ ܫ̰ܶܢܐ ܘܐܝ ܙܪܘܬܐ ܘܩܰܝܰܣܰܐ ܘܓܪܶܠܰܐ ܘܡܘܛܐ ܐܘ ܩܰܦܰܐ ܐܘ ܟܰܫܟܰܡܒܐ ܘܡܰܥܨܰܪܰܬ݂ܰܐ ܘܡܘܕܘܕܘ܀ ܒܝ ܫܰܬܐ 1870 ܟܷܬܘܰܐ ܒܳܬܶܐ ܣܘܪܝܳܝܶܐ ܕܟܷܬܢܶܐ ܬܰܠܡܝܕ݂ܶܐ ܕܝ ܥܝܬܐ ܣܘܪܝܰܝܬܐ ܐܳܪܬܳܕܳܘܟܣܘ ܕܗܘܘܶܗ ܐܝ ܠܰܡܡܶܐ ܕܝ ܦܰܛܷܪܝܰܪܟ݂ܘܬ݂ܐ. ܒܝ ܫܰܬܐ ܐܨܣ 1960 ܟܷܬܘܰܐ ܐܶܒܰܗ ܐܰܠܦܳܐ ܘܫܶܬ݂ܡܐ ܒܳܬܶܐ ܡܫܝܚܳܝܶܐ. ܒܷܬ݂ܷܪ ܡܰܓ ܓܶܕܫܶܐ ܡܰܩ ܩܰܛܠܶܐ ܕܗܰܘܷܢ ܒܝ ܫܰܬܐ ܐܨܨ 1990 ܐܘ ܥܰܡܐ ܒܕܶܠܶܗ ܕܡܰܗܙܰܡ ܠܰܕ ܕܘܘܰܠ ܕܰܐܘܪܘܦ݁ܰܐ. ܐܰܕܝܰܘܡܰܐ ܦܰܝܷܫ ܒܡܶܕ݂ܝܰܕ݂ ܡܐ ܘܬܠܶܬ݂ܝ ܒܳܬܶܐ ܡܫܝܚܳܝܶܐ. ܐܝ ܐܝܩܰܪܬ݂ܐ ܩܰܡܰܝܬܐ ܥܰܬܷܩܬܐ ܕܟܷܬܝܐ ܒܡܶܕ݂ܝܰܕ݂ ܐܝ ܐܝܩܰܪܬ݂ܐ ܕܒܶܐ ܓܪܝܓ݂ܐ ܝܳܐ. ܐܰܢ ܐܝܩܰܪܝܳܬ݂ܶܐ ܚܪܶܢܶܐ ܕܰܐܬܷ݂ܢ ܒܰܙ ܙܰܒܢܶܐ ܥܰܬܝܩܶܐ ܗܰܢܝ ܢܶܐ. ܡܝ ܟܰܥܒܝܝܶܐ ܒܝ ܫܬܐ 1400 ܒܶܐ ܣܶܦܶܪ، ܘܣܰܥܝܕܐ، ܘܔܰܠܡܰܐ. ܡܶܐ ܐܘܪܗܳܝ ܒܝ ܫܰܬܐ 1750 ܡܰܩܣܝ ܐܰܦܪܶܝܡ ܕܟܳܡܝܕ݂ܳܥܝ ܗܘܠ ܠܰܐܕܝܰܘܡܰܐ ܒܶܐ ܪܗܰܘܝ ܘܒܶܐ ܙܶܪܷܟܶܐ. ܡܶܐ ܚܰܣܢܐ ܕܟܝܦܐ ܒܝ ܫܰܬܐ 1777 ܫܰܥܥܳܐ، ܘܓ݂ܰܢܢܳܐ، ܘܓܰܘܘܳܐ. ܡܶܐ ܡܰܘܨܰܠ 1780 ܐܶܠܝܝܐ ܘܬܪܶܐ ܐܰܒܢܶܐ ܕܝܕ݂ܶܗ ܡܫܰܡܫܳܢܐ ܔܷܪܔܝܣ، ܘܗܷܪܡܷܙ. ܐܰܝ ܝܰܩܪܳܬ݂ܰܢܝ ܒܷܬ݂ܷܪ ܦܪܝܫܝ ܠܓ݂ܰܠܰܒܶܐ ܐܷܫܡܳܢܶܐ. ܡܶܐ ܡܰܪܕܶܐ ܐܝܩܰܪܬ݂ܐ ܕܒܶܝܬ݂ ܡܷܚܚܶܐ. ܡܝ ܕܶܪܷܟܶܐ ܒܶܝܬ݂ ܝܰܡܰܢܝܫ̰ܝ. ܡܶܐ ܦ݁ܰܠܳܘ ܐܰܨܠܰܐܢ ܐܘ ܐܰܒܪܐ ܕܟܰܠܳܐ. ܡܶܐ ܡܷܨܷܪ ܒܶܝܬ݂ ܒܰܫܫܶܐ. ܡܶܐ ܣܥܷܪܬ ܝܰܘܣܷܦ ܐܘ ܐܰܚܘܢܐ ܦ݁ܳܠܐ. ܡܶܐ ܟܰܪܔܳܣ ܡܰܩܣܝ ܡܘܣܰܐ، ܘܣܰܠܡܐ، ܘܫܰܟܟܷܪܶܐ. ܡܶܐ ܟܰܪܟܷܢܢܶܐ ܒܶܝܬ݂ ܟܰܪܟܷܢܢܶܐ. ܡܶܐ ܐܰܚܠܰܚ ܟ݂ܰܠܰܦ ܝܰܥܩܘܒܐ، ܘܒܶܝܬ݂ ܒܰܪܗܶܐ، ܘܒܶܝܬ݂ ܒܪܰܗܷܡ، ܘܒܶܝܬ݂ ܫܰܪܪܳܐ، ܘܒܶܝܬ݂ ܐܘܣܟܶܐ. ܡܶܐ ܥܝܘܰܪܕܐ ܒܶܝܬ݂ ܒܰܚܚܶܐ. ܡܶܐ ܟܰܦܪܐ ܒܶܝܬ݂ ܙ̰ܰܪܶܐ. ܡܶܐ ܥܷܪܢܷܣ ܒܶܝܬ݂ ܒܰܪܳܫܶܐ، ܘܝܰܘܣܶܦ ܢܘܪܶܐ، ܘܕܰܚܷܟܟܶܐ. ܡܶܐ ܐܰܢܚܷܠ ܒܶܝܬ݂ ܚܰܣܢܷܟܰܐ، ܘܡܰܥܶܐ، ܘܝܳܩܷܢ. ܡܶܐ ܐܰܪܒܐ ܒܶܝܬ݂ ܡܶܫܷܟܶܐ، ܘܡܰܩܣܝ ܐܰܠܝܰܐܣ. ܡܝ ܣܰܪܶܐ ܒܶܝܬ݂ ܬܝܝܐ، ܘܓܰܠܘܫܟܶܐ، ܘܟܷܬܬܷܟ، ܘܓܰܠܝܝܐ. ܡܶܐ ܒܳܬܶܐ ܩܰܫܝܫܐ ܥܰܒܕܰܠܠܰܗ ܘܒܶܝܬ݂ ܣܰܪܷܟܶܐ. ܡܶܐ ܚܰܚ ܒܶܝܬ݂ ܨܰܠܝܒܰܐ، ܘܚܰܘܫܐ، ܘܒܰܚܷܟܶܐ، ܘܫܘܫܶܐ. ܡܶܐ ܚܰܒܣܷܣ ܒܶܝܬ݂ ܫܷܒܶܐ، ܘܩܰܘܫܶܐ. ܡܶܐ ܟܦܰܪܙܶܐ ܒܶܝܬ݂ ܟ݂ܘܰܔܰܐ، ܘܝܰܘܢܷܟܶܐ، ܘܚܰܢܟܐ، ܘܡܘܪܷܟܶܐ، ܘܡܰܟܟܘܢܐ، ܘܓܰܘܪܝܝܶܐ ܚܰܠܳܩܐ. ܡܝ ܟܦܰܪܒܶܐ ܒܶܝܬ݂ ܚܰܕܕܐ، ܘܡܰܩܣܝ ܒܰܚܚܶܐ. ܡܶܐ ܟܦܰܪܫܳܡܰܥ ܒܶܝܬ݂ ܡܰܠܟܶܐ ܡܝܪ، ܘܚܰܐܝܕܰܪܝ. ܡܶܐ ܡܝܕܷܢ ܒܶܝܬ݂ ܒܰܠܠܳܥܶܐ. ܡܶܐ ܨܰܠܷܚ ܒܶܝܬ݂ ܡܰܐܠܳܟܶܐ. ܡܶܐ ܫܰܘܪܷܙܒܰܚ ܒܶܝܬ݂ ܚܰܝܕܐ. ܡܶܐ ܙܰܐܙ ܒܶܝܬ݂ ܐܶܠܐ. ܡܶܐ ܕܰܝܪܐ ܕܔܳܡܰܪܝ ܒܶܝܬ݂ ܔܳܡܰܪܝ. ܒܶܐ ܒܰܚܕܝ ܡܶܐ ܒܶܝܬ݂ ܡܰܢܥܰܡ. ܗܰܢܝ ܣܬܶܐ ܟܡܷܚܫܳܘܝ ܡܷܕ݂ܝܳܝܶܐ ܥܰܬܝܩܶܐ. ܔܓ݂ܰܝܪ ܡܰܢܝ ܒܷܬ݂ܷܪ ܐܰܬܝ ܡܰܩ ܩܷܪܝܰܘܳܬ݂ܶܐ ܣܘܪܝܳܝܶܐ ܓ݂ܰܠܰܒܶܐ ܐܰܬ݂ܷܢ ܦܰܝܫܝ ܒܡܶܕ݂ܝܰܕ݂܀ ܒܘ ܬܰܪܝܟܼ ܟܳܟܳܬ݂ܰܘ ܬܰܪܬܶܐ ܢܰܩܩܰܬ ܟ݂ܰܠܝܐ ܡܶܕ݂ܝܰܕ݂ ܡܰܣ ܣܘܪܝܳܝܶܐ܆ ܐܶܠܐ ܢܰܩܩܰܐ ܚܪܶܬܐ ܕܰܥܝܪܝܠܰܗ. ܡܶܕ݂ܝܰܕ݂ ܩܰܠܥܐ ܘܕܘܟܬ݂ܐ ܕܝ ܣܷܬܪܰܐ ܕܰܡ ܡܫܝܚܳܝܶܐ ܘܰܐ. ܐܰܝܟܐ ܕܗܳܘܶܘܰܐ ܙܷܠܷܡ ܛܪܳܕ݂ܐ ܥܰܠ ܐܰܡ ܡܫܝܚܳܝܶܐ ܐܳܬ݂ܷܢܘܰܐ ܦܰܝܫܝܘܰܐ ܒܡܶܕ݂ܝܰܕ݂. ܘܕܠܐ ܦܘܪܫܳܢܐ ܕܷܐܫܡܐ ܘܕܥܝܬܐ ܐܘ ܥܰܡܐ ܕܡܶܕ݂ܝܰܕ݂ ܢܳܦܰܩܘܰܐ ܡܳܪܐ ܠܰܢ ܢܳܫܶܐ ܕܳܐܬ݂ܷܢܘܰܐ ܒܘ ܡܘܟܠܐ ܒܘ ܫܬܳܝܐ ܒܰܒ ܒܳܬܶܐ ܕܳܐܒܷܢܘܰܝܠܷܢ܀ (ܡܶܕ݂ܝܰܕ݂ ܡܝ ܫܰܬܐ 1810 ܡܰܩܷܒܠܐ ܩܰܙܙܰܐ ܒܝ ܫܰܬܐ 1870 ܗܰܘܝܐ ܒܰܠܰܕܝܝܶܐ. ܐܰܪ ܪܝܫܳܢܶܐ ܕܝ ܒܰܠܰܕܝܝܶܐ ܐܘ ܩܰܡܳܝܐ ܬܪܶܐ ܕܰܘܪܶܐ ܣܷܡܠܶܗ ܚܰܢܢܰܐ ܣܰܦܰܪ ܡܝ ܫܰܬܐ 1872 ܗܘܠ 1894. ܘܒܷܬ݂ܷܪ ܡܝܢܶܗ ܓܰܠܠܶܐ ܗܷܪܡܷܙ ܒܝ ܫܰܬܐ 1894 .1903. ܘܒܷܬ݂ܷܪ ܡܶܐ 1903 .1905 ܡܫܰܡܫܳܢܐ ܔܶܪܔܝܣ ܒܘܰܟܰܠܶܐ. ܘܒܝ ܫܰܬܐ 1934 ܒܪܰܗܝܡ ܫܰܒܐ. ܐܝ ܡܰܘܕ݂ܥܳܢܘܬ݂ܰܬ݂ܶܗ ܡܝܕܳܠܝ ܡܘ ܟܬ݂ܳܘܐ ܕܳܐܣܝܳܐ ܢܰܐܝܷܠ ܩܘܠ. ܕܷܐܫܡܶܗ ܐܰܣ ܣܘܪܝܳܝܶܐ ܕܡܶܕ݂ܝܰܕ݂ ܘܛܘܪܥܰܒܕܝܢ ܕܷܛܒܝܥ ܒܝ ܫܰܬܐ 2015 ܬܘܪܟܳܝܐ) ܘܒܝ ܫܰܬܐ 2017. 18 ܐܘ ܪܝܫܳܢܐ ܕܝ ܗܰܝܝܶܐ ܕܡܶܕ݂ܝܰܕ݂ ܐܰܢܛܐ ܕܒܶܐ ܒܷܣܣܶܐ ܗܰܘܝ ܬܰܪܬܶܐ ܢܰܩܩܰܬ ܘܰܟܝܠܐ ܕܘ ܪܝܫܐ ܕܝ ܒܰܠܰܕܝܝܶܐ ܕܡܶܕ݂ܝܰܕ݂ ܔܓ݂ܰܝܪ ܡܰܢܝ ܐܰܪ ܪܝܫܳܢܶܐ ܕܝ ܒܰܠܰܕܝܝܶܐ ܕܰܝܝܡܰܐ ܛܰܝܶܐ ܗܰܘܷܢ܀ ܡܶܕ݂ܝܰܕ݂ ܟܝܬ ܐܶܒܰܗ ܬܡܳܢܶܐ ܥܝܬܳܬ݂ܶܐ ܕܟܷܬܢܶܐ ܥܰܡܝܪܶܐ. ܬܪܶܐ ܟ݂ܰܢܰܬ ܦܘܬܩܶܐ ܪܰܒܶܐ ܐܘ ܟ݂ܰܢ ܥܶܠܳܝܐ، ܐܘ ܟ݂ܰܢ ܬܰܚܬܳܝܐ ܕܒܐܗ ܓܰܠܘܫܟܶܐ. ܘܟܷܬܠܰܗ ܫܘܩܐ ܥܰܬܷܩܬܐ، ܘܚܕ݂ܐ ܣܟ݂ܷܪܬܐ. ܘܰܐܒ ܒܳܬܶܐ ܟܘܠܠܶܗ ܡܰܟ ܟܶܦܶܐ ܕܟܷܬܢܶܐ ܓ݂ܰܠܰܒܶܐ ܢܩܝܫܶܐ، ܘܫܰܦܝܪܶܐ ܣܝܡܶܐ ܢܶܐ܀ ܐܝ ܕܰܝܪܐ ܕܡܳܪܝ ܗܳܒܶܝܠ481 ܡܳܪܝ ܐܰܒܪܳܗܳܡ. 491: ܐܝ ܥܝܬܐ ܕܡܳܪܝ ܐܰܟ݂ܷܣܢܳܝܐ (ܡܳܪܝ ܦܝܠܠܳܘܟܣܝܢܳܘܣ ܕܡܰܒܘܓ݂) ܗܷܢ ܡܝܢܰܗ ܡܶܩܷܡ ܡܶܐ ܡܫܝܚܐ ܘܗܷܢ ܒܘ ܕܳܪܐ ܕܰܚ ܚܰܡܫܐ ܥܰܡܝܪܐ. ܡܳܪܝ ܒܰܪܨܰܘܡܐ ܣܬܶܐ ܒܘ ܕܳܪܐ ܕܰܚ ܚܰܡܫܐ ܥܰܡܝܪܐ܆ ܐܶܠܐ ܠܐ ܟܐܘܕ݂ܥܝܢܰܐ ܒܰܐܝܢܰܐ ܘܰܟ݂ܬ ܡܰܚܷܪܘܰܠܠܶܗ ܆ ܐܰܒ ܒܶܢܝܳܢܶܐ ܕܐܘܥܕܐ ܒܝ ܫܰܬܐ 1902܇1910 ܥܰܡܝܪܝ܀ ܡܳܪܬ݂ܝ ܫܡܘܢܝ ܐܘ ܬܰܪܝܟܼ ܕܝܕ݂ܰܗ ܠܰܬܝܐ ܐܝܕ݂ܝܥܐ ܐܶܠܐ ܐܝܚܬܝܡܰܠ ܪܰܒܐ ܡܘ ܕܳܪܐ ܕܰܫ ܫܰܘܥܐ ܐܰܘ ܕܰܬ ܬܡܰܢܝܐ ܥܰܡܝܪܐ. ܐܝ ܥܝܬܰܬ݂ܶܐ ܡܘ ܝܰܘܡܐ ܩܰܡܳܝܐ ܥܰܠ ܕܟܷܬܝܐ ܩܰܪܷܘܬܐ ܠܘ ܒܰܝܬܐ ܕܰܪ ܪܝܫܳܢܶܐ ܕܡܶܕ݂ܝܰܕ݂ ܒܶܝܬ ܣܶܦܶܪ ܡܰܣܟܰܢ ܕܝ ܚܰܣܝܘܬ݂ܐ ܕܡܶܕ݂ܝܰܕ݂ ܝܐ. ܐܝ ܡܰܢܘܪܰܐ ܕܘ ܢܳܩܘܫܰܝܕ݂ܰܗ ܐܝ ܡܰܢܘܪܰܐ ܥܰܬܷܩܬܐ ܕܛܘܪܥܰܒܕܝܢ ܝܐ. ܒܝ ܫܰܬܐ 1895 ܥܰܡܝܪܐ. ܒܝ ܫܰܬܐ 1970 ܡܰܥܷܡܪܝ ܐܰܕ ܕܝܘܰܢܟ݂ܰܢܰܬ ܕܟܷܬܢܶܐ ܐܰܕܝܰܘܡܰܐ ܒܶܝܬ݂ ܡܩܳܡܐ ܕܝ ܚܰܣܝܘܬܐ ܒܝ ܫܰܬܐ ܕܰܬ ܬܪܶܐ ܐܰܠܦܐ ܐܘ ܡܶܕܶܐ ܕܟܷܬܘܰܐ ܢܳܩܘܨܐ ܐܷܒܰܗ ܟܘܠܶܗ ܡܟܰܡܷܠ. ܡܳܪܝ ܫܰܪܒܶܝܠ 1955 ܗܰܬ݂ܶܐ ܣܬܶܐ ܐܝ ܥܝܬܐ ܩܰܡܰܝܬܐ ܘܚܰܪܰܝܬܐ ܕܥܰܡܝܪܐ ܒܘ ܬܰܪܝܟܼ ܕܝ ܕܰܘܠܶܐ ܕܬܷܪܟܝܝܰܐ ܝܐ. ܗܘܠ ܠܰܐܕܝܰܘܡܰܐ ܥܰܠ ܕܟܷܬܝܐ ܡܡܰܢܥܐ ܐܘ ܬܷܥܡܝܪܐ ܕܰܥ ܥܝܬܳܬ݂ܶܐ ܒܝ ܕܰܘܠܶܐ܆ ܒܘ ܙܰܒܢܰܘܐ ܟܷܬܘܰܐ ܐܝ ܡܰܣܰܠܶܐ ܕܝ ܕܰܝܪܐ ܕܡܳܪܝ ܫܰܪܒܶܝܠ ܒܝ ܚܳܠܐ܆ ܡܰܘܟ݂ܰܐ ܠܝ ܕܰܘܠܶܐ ܣܟ݂ܷܪܠܰܗ ܥܰܝܢܰܗ ܥܰܠ ܐܝ ܥܡܰܪܰܐ ܚܰܬܬܰܐ ܡܥܰܘܰܢܠܰܗ ܐܘ ܥܰܡܐ ܒܘ ܚܰܕܝܕ ܒܝ ܫ̰ܡܰܢܬܐ ܣܬܶܐ. ܥܝܬܐ ܕܝܳܠܕܰܬ݂ ܐܰܠܳܗܐ ܐܘ ܬܰܪܝܟܼ ܕܝܕ݂ܰܗ ܠܰܬܝܐ ܐܝܕ݂ܝܥܐ. ܒܶܝܬ݂ ܐܝܠ(ܥܝܬܐ ܕܰܦ݁ ܦ݁ܪܘܬ) 1900: ܥܝܬܐ ܕܝܳܠܕܰܬ݂ ܐܰܠܳܗܐ ܕܰܟ ܟܰܠܕܳܝܶܐ. ܐܝ ܕܰܝܪܐ ܕܡܳܪܝ ܫܰܪܒܶܝܠ ܡܘ ܕܳܪܐ ܕܰܬ ܬܠܳܬܐ ܥܰܡܝܪܐ ܘܒܘ ܕܳܪܐ ܕܰܥ ܥܷܣܪܝ ܡܰܚܰܬܠܰܗ ܐܝ ܥܰܣܟܰܪܝܝܶܐ ܐܝܕ݂ܐ ܐܰܥܠܰܗ ܡܰܚܪܰܘܠܰܗ ܐܝ ܕܰܝܪܐ ܘܡܰܥܡܰܪܠܰܗ ܒܕܘܟܬ݂ܰܗ ܕܘܟܳܬ݂ܶܐ ܠܘ ܦܝܳܫܐ. ܐܝ ܥܝܬܐ ܕܝܳܠܕܰܬ݂ ܐܰܠܳܗܐ ܕܰܟ ܟܰܠܕܳܝܶܐ ܚܰܪܷܘܬܐ܆ ܘܥܝܬܐ ܥܰܠ ܐܷܫܡܶܗ ܕܡܳܪܝ ܙܳܟܶܐ ܚܰܪܷܘܬܐ܀ ܟ݂ܘܕ ܟܷܬܝܐ ܐܝܕ݂ܝܥܐ ܐܘ ܬܰܪܝܟܼ ܕܷܚܕ݂ܐ ܡܰܥ ܥܝܬܳܬ݂ܶܐ ܕܘ ܐܰܬ݂ܪܐ ܠܐ ܟܳܩܘܕܪܝܢܰܐ ܟ݂ܘܕ ܟܠܳܙܰܡ ܕܡܰܚܟܝܢܰܠܶܗ ܥܰܠ ܕܡܰܚܪܘܝ ܐܰܒ ܒܷܢܝܳܢܶܐ ܘܡܰܘܩܕ݂ܝ ܐܟ ܟܬ݂ܳܘܶܐ. ܒܰܣ ܓܷܡܔܰܪܰܒܢܐ ܕܡܰܚܟܶܢܐ ܡܘ ܡܶܕܶܐ ܕܷܩܪܶܠܝ ܷ ܘܕܫܰܡܷܥܢܶܗ ܡܰܣ ܣܳܘܶܐ. ܐܝ ܥܝܬܐ ܕܡܳܪܝ ܦܝܠܘܟܣܝܢܘܣ ܕܡܰܒܘܓ݂ ܟܡܝܬܰܘܡܰܪܠܶܗ ܡܳܪܝ ܐܰܟ݂ܷܣܢܳܝܐ. ܡܳܪܝ ܐܰܟ݂ܷܣܢܳܝܐ ܐܘ ܐܰܨܷܠ ܕܝܕ݂ܶܗ ܡܶܐ ܬܰܚܷܠ ܐܝ ܩܪܝܬ݂ܐ ܒܘ ܐܰܬ݂ܪܐ ܕܒܶܝܬ݂ ܓܰܪܡܰܝ ܝܐ. ܐܝܢܰܩܰܐ ܕܗܰܘܝ ܛܪܳܕ݂ܐ ܥܰܠ ܐܝ ܡܫܝܚܳܝܘܬ݂ܐ ܡܰܗܙܰܡܡܶܗ ܐܰܒ ܒܰܒܳܢܰܝܕ݂ܶܗ ܐܰܬܷ݂ܢ ܠܒܷܣܳܪܝܢܐ ܐܝ ܩܪܝܬܐ ܦܰܝـܝܫܝ ܬܰܡܐ. ܗܝܝܶܐ ܐܘ ܩܰܕܝܫܐ ܪܰܚܷܩ ܡܰܒ ܒܰܒܳܢܰܝܕ݂ܶܗ ܐܰܠܦܐ ܡܷܬܪܳܘܰܬ ܡܶܕܶܐ ܡܰܥܡܰܪܠܶܠܶܗ ܩܘܡܷܣܚܐ ܠܰܪܘܰܠ ܡܝ ܩܪܝܬ݂ܐ ܡܰܫܦܰܥܠܗ ܘܰܟ݂ܬ ܬܰܡܐ ܒܘ ܨܰܘܡܐ ܒܝ ܨܠܘܬ݂ܐ ܒܰܕ ܕܰܡܥܶܐ. ܒܷܬ݂ܷܪ ܒܘܰܟ݂ܬ ܐܰܬ݂ܝ ܠܝ ܕܰܝܪܐ ܕܡܳܪܝ ܓܰܒܪܐܝܶܠ ܡܰܩܘܶܠܶܗ ܐܘ ܝܘܠܦܳܢܰܝܕ݂ܶܗ ܒܘ ܠܶܫܳܢܐ ܣܘܪܝܳܝܐ ܘܝܰܘܢܳܝܐ. ܢܰܩܰܐ ܐܰܬ݂ܝ ܠܡܶܕ݂ܝܰܕ݂ ܠܰܫܰܢ ܕܙܳܝܰܪ ܐܘ ܚܰܘܪܰܝܕ݂ܶܗ ܡܳܪܝ ܗܳܒܶܝܠ܆ ܡܨܰܠܰܠܠܶܗ ܐܰܬ ܬܪܶܐ. ܡܳܪܝ ܗܳܒܶܝܠ ܥܰܠ ܕܟܷܬܘܰܐ ܝܰܡܝܐ ܕܠܐ ܢܳܚܰܬ ܡܘ ܐܶܤܛܘܢܐ ܢܰܚܶܬ ܐܘ ܟܝܦ ܐܘ ܐܶܤܛܘܢܐ. ܚܕ݂ܷܢܢܶܗ ܚܕ݂ܳܕ݂ܶܐ ܡܒܰܪܟ݂ܝ ܡܶܐ ܚܕ݂ܳܕ݂ܶܐ܆ ܢܰܩܰܐ ܚܪܶܬܐ ܡܣܰܘܶܐ ܐܘ ܐܶܤܛܘܢܐ ܕܰܟ ܟܶܦܶܐ܆ ܠܐ ܚܰܪܷܘ ܠܐ ܢܰܦܷܠ ܚܕ݂ܳܐ ܡܰܟ ܟܶܦܰܝܕ݂ܶܗ. ܡܷܐ ܬܰܡܐ ܐܰܙܙܶܗ ܠܝ ܕܰܝܪܐ ܕܬܷܠܥܰܕܰܐ ܕܟܷܬܝܐ ܩܰܪܷܘܬܐ ܠܰܐܢܛܰܟܝܰܐ ܡܫܰܘܫܰܛܠܶܗ ܪܘܚܶܗ ܒܰܝ ܝܘܠܦܳܢܶܐ ܥܶܠܳܝܶܐ ܥܰܠ ܕܟܷܬܘܰܐ ܬܰܡܐ ܡܰܠܦܳܢܶܐ ܓ݂ܰܠܰܒܶܐ. ܒܝ ܫܬܐ 485 ܡܰܣܪܰܚ ܚܰܣܝܐ ܠܝ ܘܰܠܰܝܶܐ ܕܡܰܒܘܓ݂. ܡܰܩܒܰܠ ܡܘ ܥܰܡܐ ܒܟܶܦ ܓ݂ܰܠܰܒܶܐ. ܣܷܡܠܶܗ ܬܶܕܷܡܪܳܬ݂ܐ ܓ݂ܰܠܰܒܶܐ ܬܰܡܐ. ܫܶܬ ܐܷܫܢܶܐ ܒܰܣ ܦܰܝܷܫ ܚܰܣܝܐ ܒܕܘܟܬ݂ܶܗ. 27 ܐܷܫܢܶܐ ܡܰܫܦܰܥܠܶܗ ܒܘ ܢܰܦܝ. ܒܘ ܘܰܟ݂ܬܰܢܐ ܩܰܘܝܳܘܰܐ ܐܝ ܩܰܠܶܐ ܕܟܷܬܘܰܐ ܒܝ ܡܫܝܚܳܝܘܬ݂ܐ ܐܝ ܡܰܣܰܠܶܐ ܕܷܡܫܝܚܐ ܚܰܐ ܟܝܳܢܐ ܟܷܬܠܶܗ ܐܰܘ ܬܪܶܐ ܟܝܳܢܶܐ ܟܷܬܠܶܗ. ܗܝܝܶܐ ܚܰܐ ܡܰܡ ܡܕܰܦܥܳܢܶܐ ܕܘ ܚܰܐ ܟܝܳܢܳܘܰܐ. ܚܰܡܡܶܫ ܐܷܫܢܶܐ ܡܥܰܕ݂ܰܒܒܶܗ ܒܫܷܟܠܰܬ ܡܫܰܚܠܦܶܐ ܡܷܩܩܰܐ ܕܷܡܔܰܪܰܒܒܶܗ ܕܛܳܪܶܐ ܡܝ ܗܰܝܡܳܢܘܬ݂ܰܝܕ݂ܶܗ ܘܕܬܳܒܰܥܠܷܢ܆ ܗܝܝܶܐ ܠܐ ܙܰܝܷܥ ܘܠܐ ܛܪܶܠܶܗ ܐܝ ܗܰܝܡܳܢܘܬ݂ܰܝܕ݂ܶܗ ܡܢܰܟܰܦܘܰܝܠܷܢ ܒܰܫܬܰܓ݂ܰܠܝܝܰܝܕ݂ܶܗ. ܡܳܪܝ ܐܰܟ݂ܣܢܳܝܐ ܟܬ݂ܷܘܠܶܗ 372 ܐܶܓܰܪܝܳܬ݂ܶܐ ܠܰܢ ܢܳܫܶܐ ܘܠܰܥ ܥܝܬܰܘܳܬ݂ܶܐ ܠܰܫܰܢ ܕܢܷܦܩܝ ܡܳܪܐ ܠܝ ܗܰܝܡܳܢܘܬ݂ܐ. ܟܬ݂ܷܘܠܶܗ ܗܰܡ ܟܬ݂ܳܘܶܐ ܦܰܢܩܝܳܬ݂ܶܐ ܣܬܶܐ ܓ݂ܰܠܰܒܶܐ. ܐܶܠܐ ܒܝ ܚܰܪܰܝܬܐ ܗܰܢܝ ܕܷܡܕܰܦܥܝܘܰܐ ܐܰܬ ܬܪܶܐ ܟܝܳܢܶܐ ܒܔܰܢܩܷܪܝ ܐܝ ܘܰܠܰܝܶܐ ܕܟܷܬܝܳܐ ܩܰܪܷܘܬܐ ܠܥܰܢܩܰܪܰܐ ܒܬܷܪܟܝܰܐ ܒܝ ܫܰܬܐ 523 ܒܥܷܔܔܶܗ ܒܘ ܕܷܟ݂ܳܢܐ ܒܓܰܘܶܗ ܕܘ ܚܰܡܰܡ܀ ܐܘ ܐܰܒܪܐ ܕܝ ܚܳܬ݂ܐ ܕܗܰܘܝ ܚܰܣܝܐ ܒܕܘܟܬ݂ܗ ܐܰܙܙܶܗ ܙܘܷܢܠܶܗ ܐܘ ܦܰܓ݂ܪܐ ܕܘ ܩܰܕܝܫܐ ܡܰܡܛܶܠܶܗ ܠܡܰܒܘܓ݂ ܡܰܚܶܬܠܶܗ ܒܝ ܥܝܬܐ ܕܥܰܡܝܪܐ ܥܰܠ ܐܷܫܡܶܗ. ܐܰܢ ܢܳܫܶܐ ܕܒܷܣܳܪܝܢܐ ܒܷܬ݂ܷܪ ܡܶܐ ܘܰܟ݂ܬ ܡܰܡܛܰܠܠܶܗ ܐܝ ܠܰܫܰܝܕ݂ܶܗ ܐܰܒܝܥܝ ܕܡܰܘܒܠܝܠܰܗ ܠܡܳܪܝ ܓܰܒܪܐܝܶܠ܆ ܢܰܦܝܩܝ ܐܰܡ ܡܷܕ݂ܝܳܝܶܐ ܡܘ ܐܰܗܷܠܰܝܕ݂ܶܗ ܠܩܰܡܘܬܰܝ݂ܝܶܗ ܡܩܰܬܰܠܠܶܗ ܥܰܠ ܐܝ ܫܠܰܕܰܝܕ݂ܶܗ. ܩܛܷܠܠܶܗ ܡܷܐ ܚܕ݂ܳܕ݂ܶܐ ܬܠܳܬ݂ܐ ܓܰܘܪܶܐ. ܡܰܫܡܰܥܥܶܗ ܐܘ ܟ݂ܰܒܪܐ ܠܡܳܪܝ ܗܳܒܶܝܠ ܕܟܷܬܘܰܐ ܥܰܠ ܐܘ ܐܶܤܛܘܢܐ. ܔܒܝܪ ܢܰܚܶܬ ܡܰܠܬܰܡܠܶܗ ܐܰܟ ܟܳܗܢܶܐ܆ ܐܰܕ ܕܰܝܪܳܝܶܐ ܐܘ ܥܰܡܐ ܡܨܰܠܰܠܶܗ ܥܰܡ ܚܕ݂ܳܕ݂ܶܐ ܡܰܩܷܡܡܶܗ ܐܰܩ ܩܛܝܠܳܝܶܐ. ܦܠܷܓ݂ܠܶܗ ܐܝ ܠܰܫܶܐ ܒܰܝܢܳܬ݂ܰܝܝܶܗ܆ ܐܰܡ ܡܷܕ݂ܝܳܝܶܐ ܡܷܕܕܶܗ ܐܘ ܩܰܪܥܐ ܕܘ ܩܰܕܝܫܐ܆ ܐܰܣ ܣܝܪܝܢܳܝܶܐ ܡܰܘܒܰܠܠܶܗ ܐܝ ܠܰܫܶܐ ܠܡܳܪܝ ܓܰܒܪܐܝܶܠ ܡܰܚܬܰܠܠܶܗ ܒܰܒ ܒܶܝܬ݂ ܩܰܕܝܫܶܐ. ܒܝ ܕܘܟܬ݂ܐ ܕܗܰܘܝ ܐܘ ܩܰܛܠܐ ܡܰܥܡܰܪܪܶܗ ܩܘܒܐ ܢܰܥܷܡܬܐ ܗܘܠ ܠܰܐܕܝܰܘܡܰܐ ܟܷܐܡܡܝܠܰܗ ܒܶܬ݂ ܨܠܘܬ݂ܐ. ܐܝ ܔܰܡܔܰܡܬܐ ܕܘ ܩܰܕܝܫܐ ܡܰܚܬܰܠܠܶܗ ܒܓܰܘܶܗ ܕܨܰܢܕܘܩܐ ܒܝ ܥܝܬܐ ܕܰܐܕܝܰܘܡܰܐ ܕܟܷܬܝܐ ܥܠ ܐܷܫܡܶܗ ܕܡܳܪܝ ܐܰܟ݂ܷܣܢܳܝܐ܀ ܒܝ ܫܰܬܐ1145 ܗܰܘܝ ܫܶܒܝܐ ܥܰܠ ܛܘܪܥܰܒܕܝܢ ܡܰܢܗܰܒܒܶܗ ܟܘܠ ܡܶܕܶܐ ܕܰܐܬ݂ܝ ܩܘܡܰܝܝܶܗ. ܡܰܛܷܢ ܠܡܶܕ݂ܝܰܕ݂ ܥܰܒܝܪܝ ܠܝ ܥܝܬܐ ܕܡܳܪܝ ܐܰܟ݂ܷܣܢܳܝܐ ܡܰܚܷܪܘܰܠܠܶܗ ܡܷܕܕܶܗ ܐܘ ܨܰܢܕܘܩܐ ܕܟܷܬܘܰܐ ܪܝܫܶܗ ܕܘ ܩܰܕܝܫܐ ܐܶܒܶܗ ܘܡܚܰܠܰܩܩܶܗ ܩܰܪܥܶܗ ܕܘ ܩܰܕܝܫܐ ܠܰܪܘܰܠ . ܡܷܐ ܕܰܐܙܙܷܢ ܐܰܡ ܡܰܢܷܗܒܳܢܶܐ܆ ܐܘ ܥܰܡܐ ܒܕܶܠܶܗ ܕܕܳܥܰܪ ܠܡܶܕ݂ܝܰܕ݂܆ ܒܷܬ݂ܷܪ ܡܶܐ ܘܰܟ݂ܬ ܒܠܰܠܝܐ ܐܘ ܪܝܫܐ ܕܰܟ ܟܳܗܢܶܐ ܚܙܶܠܶܗ ܕܟܝܬ ܒܰܗܪܐ ܥܰܠ ܐܝ ܔܰܡܔܰܡܬܐ. ܐܰܙܙܗ ܥܰܠ ܐܘ ܒܰܗܪܐ ܚܙܶܠܶܗ ܟܰܠܰܗ ܔܰܡܔܰܡܬܐ ܕܢܳܫܐ܆ ܐܳܡܰܪ ܕܗܳܘܶܐ ܠܳܘܶܐ ܗܰܬ݂ܶܐ ܐܝ ܔܰܡܔܰܡܬܐ ܕܘ ܩܰܕܝܫܐ ܝܐ ܡܰܘܒܠܳܠܶܗ ܠܡܳܪܝ ܐܰܒܪܳܗܳܡ ܡܰܚܬܳܠܶܗ ܠܰܘܓ݂ܷܠ ܕܘ ܡܰܕ݂ܒܚܐ. ܒܝ ܫܰܬܐ ܕܘ ܣܰܝܦܐ ܡܒ݁ܰܝܥܐ ܢܳܫܐ ܠܐܟܳܕ݂ܰܥ ܐܰܝܟܳܝܐ. ܐܝ ܥܝܬܐ ܕܡܳܪܝ ܐܟܣܢܝܐ܆ ܡܶܩܷܡ ܡܝܬܰܘܡܰܪܘܰܝܠܰܗ ܒܶܝܬ݂ ܐܝܠ܆ ܐܰܡ ܡܷܕ݂ܝܳܝܶܐ ܟܷܐܡܡܝܠܰܗ ܐܝ ܥܝܬܐ ܪܰܒܬ݂ܐ. ܘܒܝ ܕܷܪܬܰܝܕ݂ܰܗ ܟܝܬ ܕܘܟܬ݂ܐ ܟܳܡܝܬܰܘܡܰܪܠܰܗ ܒܶܝܬ ܙܰܠܝܩܶܐ. ܟܷܐܡܡܝ ܗܰܪܟܶܐ ܡܶܩܷܡ ܡܶܐ ܡܫܝܚܐ ܥܰܡܷܪܬܳܐ ܝܐ. ܐܝ ܕܘܟܬ݂ܐ ܕܰܒ ܒܰܒܳܢܰܝܕ݂ܰܢ ܕܣܘܓ݂ܕܝܘܰܐ ܠܰܨ ܨܰܠܡܶܐ ܘܟܷܬܘܰܐ ܐܶܒܰܗ ܨܰܠܡܐ ܕܝ ܟܶܦܐ ܥܰܠ ܐܷܫܡܶܗ ܕܗܶܪܰܟܠܝܣ. ܘܟܝܬ ܗܰܡ ܩܰܘܪܶܐ ܣܬܶܐ ܒܝ ܕܷܪܬܐ. ܘܟܷܬܠܰܗ ܒܝ ܕܷܪܬܐ ܥܝܬܐ ܩܰܝܛܰܝܬܐ. ܒܝ ܫܰܬܐ 1410 . ܐܰܡ ܡܘܓ݂ܳܠܳܝܶܐ ܡܰܚܪܰܘܘܶܗ ܓ݂ܰܠܰܒܶܐ ܡܝ ܥܝܬܰܬ݂ܶܐ. ܗܘܠ ܠܝ ܫܰܬܐ 1961 ܦܰܝܷܫܘܰܐ ܡܝܢܰܗ ܕܘܟܬ݂ܳܐ ܥܰܡܷܪܬܐ ܡܨܰܠܷܢܘܰܐ ܐܰܡ ܡܗܰܝܡܢܶܐ ܐܶܒܰܗ. ܒܝ ܫܰܬܰܬ݂ܶܐ ܒܘ ܘܰܟ݂ܬ ܕܩܰܫܐ ܥܰܒܕܰܠܰܗ ܒܳܬܳܝܐ ܐܰܡ ܡܗܰܝܡܢܶܐ ܕܝ ܫܰܘܬ݂ܐ ܒܕܰܠܠܶܗ ܕܡܰܥܡܪܝ ܐܰܕ ܕܘܟܳܬ݂ܶܐ ܕܢܰܦܝܠܝ܆ ܐܶܠܐ ܥܰܠ ܕܟܷܬܝܐ ܗܘܠ ܠܰܐܕܝܰܘܡܰܐ ܐܘ ܣܝܳܡܐ ܕܰܥ ܥܝܬܳܬ݂ܶܐ ܒܬܘܪܟܝܰܐ ܡܡܰܢܥܐ. ܒܠܰܠܝܐ ܫܘܓ݂ܠܝܘܰܐ ܐܶܒܰܗ܆ ܡܰܟ݂ܠܷܢܘܰܐ ܐܘ ܥܰܦܪܐ ܕܟܷܬܘܰܐ ܒܓܰܘܰܗ. ܓ݂ܰܠܰܒܶܐ ܡܰܥ ܥܰܘܳܕܶܐ ܗܷܫ ܒܰܚ ܚܰܝܶܐ ܢܶܐ. ܟܷܐܡܡܝ܆ ܟܷܬܘܰܝܠܰܢ ܫܪܳܓ݂ܐ ܕܘ ܙܰܝܬܐ ܠܐ ܬܰܝܷܡ ܐܘ ܙܰܝܬܰܝܕ݂ܰܗ ܗܘܠ ܕܷܡܟܰܡܷܠܰܢ ܐܘ ܥܰܦܪܰܝܕ݂ܰܗ ܟܘܠܶܗ. ܓܰܘܪܶܐ ܢܶܫܶܐ ܒܘ ܙܳܝܘܕܐ ܕܝ ܫܰܘܬ݂ܐ ܟܘܠܰܢ ܕܠܐ ܙܘܙܶܐ ܫܓ݂ܝܠܰܢ ܐܶܒܰܗ. ܒܷܬ݂ܷܪ ܩܛܷܪܪܶܗ ܐܘ ܩܛܳܪܐ ܢܰܦܝܠܐ ܥܰܠܰ ܐܰܪ ܪܰܓ݂ܠܳܬ݂ܶܗ ܥܰܬܝܩܶܐ. ܟܰܡܝܠܐ ܐܝ ܥܝܬܐ ܒܘ ܚܰܝܠܐ ܕܰܐܠܳܗܐ܆ ܘܡܩܰܕܫܐ ܒܝ ܫܰܬܐ 1962 ܒܐܝܕ݂ܶܗ ܕܡܳܪܝ ܦܝܠܠܘܟܣܝܢܳܘܣ ܝܘܚܰܢܳܢ ܕܘܠܰܒܰܢܝ ܕܡܷܪܕܶܐ. ܘܡܳܪܝ ܐܝܘܰܢܢܝܣ ܐܰܦܪܶܝܡ ܒܝܠܓܝܔ ܕܛܘܪܥܰܒܕܝܢ. ܒܷܬܷ݂ܪ ܡܷܐ ܕܷܡܫܰܢܶܐ ܩܰܫܐ ܥܰܒܕܰܠܠܰܗ ܐܘ ܥܰܡܐ ܕܝ ܫܰܘܬ݂ܐ ܒܝ ܫܰܬܐ 1964 ܡܰܩܷܡܰܢܢܶܗ ܟ݂ܘܪܳܝܐ ܐܰܒܪܳܗܳܡ ܐܰܩܨܰܢ ܕܟܷܬܘܰܐ ܟܳܗܢܐ ܝܰܕ݂ܳܥܐ ܡܗܝܪܐ ܟܷܬܘܰܝܠܶܗ ܟܰܪܰܙܶܐ ܒܰܣܷܡܬܐ ܗܰܡ ܬܰܪܝܟ݂ܔܝܘܰܐ. ܒܰܬ ܬܶܫܥܝܝܰܬ ܡܚܰܣܝܐ ܐܝ ܐܰܬ݂ܬܐ ܒܷܬ݂ܷܪ ܒܷܟܡܐ ܐܷܫܢܶܐ ܐܰܙܙܶܗ ܠܗܳܘܠܰܢܕܰܐ ܓܰܒ ܐܰܢ ܐܰܒܢܶܐ. ܐܝ ܥܝܬܐ ܣܟ݂ܝܪܐ ܠܰܘ ܡܝܨܰܠܘܰܐ ܐܶܒܰܗ. ܒܷܬ݂ܷܪ ܒܷܟܡܐ ܐܷܫܢܶܐ ܡܚܰܣܶܐ ܗܝܝܶܐ ܣܬܶܐ ܡܰܚܷܬ ܐܘ ܦܰܓ݂ܪܰܝܕ݂ܶܗ ܒܝ ܕܰܝܪܐ ܕܗܳܘܠܰܢܕܰܐ ܒܰܐ ܒܶܝܬ݂ ܩܒܘܪܶܐ ܕܰܟ ܟܳܗܢܶܐ. ܒܝ ܫܰܬܐ ܕܰܬ ܬܪܶܐ ܐܰܠܦܐ ܒܝ ܡܷܫܬܰܝܠܳܢܘܬ݂ܐ ܕܝ ܗܰܝܝܶܐ ܕܰܥ ܥܝܬܳܬ݂ܶܐ ܕܡܶܕ݂ܝܰܕ݂܆ ܗܰܡ ܕܘ ܣܠܰܝܡܰܢ ܕܒܶܐ ܚܰܕܕܐ ܡܥܰܕܶܠܶܗ ܐܰܕ ܕܘܟܳܬ݂ܶܗ ܕܦܰܫܘܰܐ ܢܳܩܘܨܐ ܐܶܒܰܗ. ܕܰܥܝܪܐ ܢܰܩܰܐ ܚܪܶܬܐ ܠܘ ܫܘܒܚܰܝܕ݂ܰܗ ܐܘ ܩܰܡܳܝܐ ܒܘ ܚܰܝܠܐ ܕܰܐܠܳܗܐ ܘܕܘ ܥܰܡܐ ܣܘܪܝܳܝܐ ܒܘ ܙܳܝܘܕܐ ܕܝ ܫܰܘܬ݂ܐ ܕܒܶܐ ܔܰܠܡܰܐ. ܐܘ ܥܰܡܡܳܐ ܣܠܰܝܡܰܢ ܕܒܶܐ ܚܰܕܕܐ ܬܰܥܷܒ ܓ݂ܰܠܰܒܶܐ ܒܝ ܥܡܰܪܰܐ ܕܝ ܥܝܬܐ ܘܙܪܷܥܠܶܗ ܒܝ ܕܷܪܬܰܝܕ݂ܰܗ ܘܒܘ ܛܝܳܪܰܝܕ݂ܰܗ ܘܰܪܕܶܐ ܐܝܠܳܢܶܐ ܕܰܦ ܦܝܪܶܐ ܓ݂ܰܠܰܒܶܐ. ܗܘܠ ܠܰܐܕܝܰܘܡܰܐ ܥܰܡܷܪܬܳܐ ܝܐ ܟܳܡܝܨܰܠܶܗ ܐܶܒܰܗ. ܐܝ ܗܰܝܝܶܐ ܕܝ ܥܝܬܐ ܡܰܚܰܬܠܰܗ ܐܷܫܡܶܗ ܕܘ ܛܝܳܪܐ ܕܷܙܪܷܥܠܶܗ ܥܰܠ ܐܷܫܡܶܗ ܠܰܫܰܢ ܐܘ ܬܷܕ݂ܟܰܪ ܠܘ ܢܶܨܚܳܢܐ ܕܘ ܥܰܡܡܳܐ ܣܠܰܝܡܰܢ ܕܒܶܝܬ ܚܰܕܕܳܐ ܀ ܒܟܘܠ ܫܰܬܐ ܐܘ ܝܰܘܡܳܐ ܕܘ ܕܘܟ݂ܪܳܢܐ ܕܘ ܩܰܕܝܫܐ ܟܡܝܣܰܡ ܬܡܳܢܰܥܣܰܪ ܒܘ ܝܰܪܚܐ ܕܰܬ ܬܡܰܢܝܐ. ܒܥܰܣܪܝܝܶܐ ܟܡܝܣܰܡܠܰܗ ܫܰܗܪܐ ܐܘ ܥܰܡܐ ܕܡܶܕ݂ܝܰܕ݂ ܗܰܡ ܕܰܩ ܩܷܪܝܰܘܳܬ݂ܶܐ ܟܳܠܷܬܡܝ ܠܝ ܕܷܪܬܐ ܕܝ ܥܝܬܐ ܟܙܰܝܪܝ ܐܘ ܩܰܕܝܫܐ ܠܰܫܰܢ ܕܡܰܝܕܝ ܒܘܪܟܬ݂ܐ ܡܝܢܶܗ. ܐܰܝ ܝܳܠܘܦܶܐ ܕܰܡ ܡܰܕܪܰܫܝܳܬ݂ܶܐ ܕܡܶܕ݂ܝܰܕ݂ ܟܳܙܷܡܪܝ ܩܳܠܶܐ ܟܳܡܰܦܨܚܝ ܐܘ ܥܰܡܐ ܕܟܳܠܳܬܰܡ. ܘܒܨܰܦܪܐ ܟܡܝܣܰܡ ܩܶܪܳܘܐ܆ ܘܒܷܬ݂ܷܪ ܟܡܝܚܰܝܕ݂ܰܪ ܩܪܳܛܷܢ ܥܰܠܰ ܐܰܪ ܗ ܪܘܚܳܬ݂ܶܐ ܕܰܥ ܥܰܢܝܕ݂ܶܐ ܕܝ ܫܰܘܬ݂ܐ ܡܰܐ ܡܗܰܝܡܢܶܐ ܠܘ ܕܘܟ݂ܪܳܢܐ ܕܘ ܩܰܕܝܫܐ܀ ܟܘܠ ܫܰܬܐ ܐܰܔ ܔܝܪܰܢ ܕܝ ܥܝܬܐ ܕܟܷܬܘܰܝܢܶܐ ܒܶܐ ܚܰܘܫܐ ܐܘ ܩܰܕܝܫܐ ܒܥܰܨܪܝܝܶܐ ܡܳܚܶܘܰܐ ܐܰܦ݁ܦ݁ܶܗ ܟܶܦܶܐ. ܐܘܥܕܐ ܡܝ ܐܝܩܰܪܬ݂ܐ ܕܒܶܐ ܚܰܘܫܐ ܢܳܫܐ ܠܐ ܦܰܝܷܫ ܒܡܶܕ݂ܝܰܕ݂. ܐܶܠܐ ܟܘܠ ܫܰܬܐ ܟܷܡܫܰܕܪܝ ܚܰܩ ܕܘ ܡܘܟܠܐ ܕܷܟܡܝܣܷܡ ܒܘ ܕܘܟ݂ܪܳܢܰܝܕ݂ܶܗ܀ ܐܝ ܥܝܬܐ ܕܡܳܪܝ ܒܰܪܨܰܘܡܐ ܡܶܩܷܡ ܕܰܝܪܐ ܘܰܐ ܡܘ ܕܳܪܐ ܕܰܢ ܐܰܪܒܥܐ ܥܰܡܝܪܐ ܐܝܚܬܝܡܰܠ ܪܰܒܐ ܠܰܡ ܡܘܓ݂ܳܠܳܝܶܐ ܡܰܚܪܘܰܠܠܶܗ ܐܶܠܐ ܠܰܝܬ ܟܬ݂ܝܘܐ ܒܕܘܟܬ݂ܐ. ܐܶܠܐ ܟܝܬ ܒܰܐܢܚܷܠ ܟܬ݂ܳܘܐ ܕܘ ܓܪܰܡܰܛܝܩܝ ܕܷܟܬ݂ܝܘ ܐܶܒܰܗ ܒܝ ܫܰܬܐ 1791. ܕܟܳܐܡܰܪ ܟܰܡܷܠ ܐܘ ܟܬ݂ܳܘܰܢܐ ܒܝ ܕܰܝܪܐ ܕܡܳܪܝ ܒܰܪܨܰܘܡܐ ܕܡܶܕ݂ܝܰܕ݂. ܟܳܡܰܚܘܶܐ ܕܒܝ ܫܰܬܰܬ݂ܶܐ ܗܶܫ ܥܰܡܷܪܬܳܘܰܐ. ܒܝ ܫܰܬܐ 1902 ܒܘ ܟܬ݂ܳܘܐ ܕܘ ܬܰܪܝܟܼ ܕܟ݂ܘܪܝ ܢܷܥܡܰܐܢ ܕܷܟܬ݂ܷܘܠܶܗ ܟܳܐܡܰܪ ܐܰܢ ܢܳܫܶܐ ܕܚܝܕ݂ܳܪܰܗ ܟܘܠ ܝܰܘܡܶܗ ܕܫܰܒܬ݂ܐ ܥܰܨܪܝܝܶܐ ܡܰܩܷܕܚܝܘܰܐ ܫܰܡܥܐ ܐܶܒܰܗ ܡܨܰܠܷܢܘܰܐ. ܦܰܝܷܫܘܰܐ ܡܝܢܰܗ ܚܕ݂ܳܐ ܩܶܠܰܝܬܐ ܘܰܬܠܰܬ݂ ܩܷܫܬܳܬ݂ܶܐ. ܒܝ ܫܰܬܰܬ݂ܶܐ ܡܰܥܡܰܪܪܶܗ ܥܝܬܐ ܢܰܥܷܡܬܐ ܥܰܠ ܐܷܫܡܶܗ ܕܘ ܩܰܕܝܫܐ ܕܰܐܕܝܰܘܡܰܐ ܡܰܕܪܰܫܬܐ ܝܐ. ܒܝ ܫܰܬܐ ܆1910 ܡܰܥܡܰܪܪܶܗ ܐܝ ܥܝܬܐ ܕܰܐܕܝܰܘܡܰܐ ܕܟܷܡܨܰܠܝܢܰܐ ܐܶܒܰܗ. ܒܷܬ݂ܷܪ ܒܓܰܘܰܗ ܒܝ ܫܰܬܐ 1949 ܐܝ ܡܰܥܡܘܕܝܬ݂ܐ܆ 1950 ܐܘ ܡܰܕ݂ܒܚܐ܆ 1951 ܐܝ ܕܝܘܰܢܟ݂ܰܢܰܐ ܕܠܰܠܥܰܠ ܗܰܡ ܐܳܕܰܝܰܬ ܠܰܫܰܢ ܐܘ ܕܡܳܟ݂ܳܐ ܕܰܕ ܕܰܝܦܶܐ܆ 1955 ܐܝ ܡܰܢܘܪܰܐ ܕܘ ܢܳܩܘܫܐ܆ 1969 ܐܝ ܦܳܬ݂ܐ ܕܝ ܥܝܬܐ ܡܷܐ ܠܰܪܘܰܠ ܣܝܡܐ ܚܰܕ݂ܬܐ܆ ܒܥܰܝܢܝ ܫܰܬܐ ܕܝܘܰܢܟ݂ܰܢܰܐ ܪܰܒܬ݂ܐ ܒܝ ܕܷܪܬܐ܆ 2008 ܡܰܠܘܰܫ ܓܰܘܶܗ ܕܝ ܥܝܬܐ ܟܶܦܶܐ ܡܷܐ ܚܰܬ݂ܐ܆ .2016 ܩܠܷܦܦܶܗ ܐܝ ܒܳܝܰܐ ܕܟܷܬܘܰܐ ܥܰܠܰ ܐܰܢ ܢܰܩܫܰܬ ܕܠܰܘܓ݂ܷܠ ܘܐܝ ܐܰܪܥܰܝܕ݂ܰܗ ܣܝܡܐ ܡܰܪܡܰܪ ܥܰܡܘ ܩܰܠܳܪܝܦܶܪ ܕܝܕ݂ܰܗ. ܬܰܘܕܝ ܠܰܐܠܳܗܐ ܐܘܥܕܐ ܟܰܡܝܠܐ ܡܷܐ ܟܘܠ ܡܶܕܶܐ. ܒܝ ܫܰܬܐ 1902 ܐܝ ܢܰܩܰܐ ܕܝ ܘܰܠܰܝܶܐ ܝܰܪܝܘܐ ܡܰܛܝܐ ܠܚܝܕ݂ܳܪܰܗ ܘܡܰܥܡܰܪܪܶܗ ܐܰܒ ܒܶܢܝܳܢܶܐ ܚܰܬ݂ܶܐ ܡܰܘܟ݂ܰܐ ܣܝܡܰܠܠܶܗ ܥܝܬܐ. ܒܷܬ݂ܷܪ ܡܘ ܣܰܝܦܐ ܒܝ ܫܰܬܐ 1926 ܟ݂ܘܕ ܡܶܐ ܡܶܩܷܡ ܕܷܟܬܷܘܠܰܢ ܠܝ ܥܰܣܟܰܪܝܝܶܐ ܡܰܚܰܬܘܰܝܠܰܗ ܐܝܕ݂ܐ ܐܰܥܠܰܗ ܣܬܶܐ ܣܝܡܰܠܠܶܗ ܥܰܡܒܰܪ ܕܘ ܙܰܕ. ܒܝ ܫܰܬܐ ܕܰܬ ܬܪܰܺܐ ܐܰܠܦܐ܆ ܕܰܝܪܳܝܐ ܝܰܘܣܶܦ ܕܒܶܐ ܡܘܩܣܝ ܫܰܡܡܳܐ ܕܟܷܬܝܐ ܐܰܕܝܰܘܡܰܐ ܒܝ ܥܝܬܐ ܕܚܰܠܰܒ ܐܰܬ݂ܝ ܠܷܙܝܰܪܰܐ ܠܘ ܐܰܬ݂ܪܐ. ܡܰܚܟܶܠܶܠܝ ܐܳܡܰܪ ܡܘ ܫܷܒܰܟܰܢܐ ܐܘ ܥܠܝܐ ܕܝ ܓܳܪܐ܆ ܡܰܢܚܰܬܰܠܝ ܒܠܰܠܝܐ ܒܷܓܢܳܘܐ ܡܷܕܠܝ ܚܶܛܶܐ ܠܰܫܰܢ ܐܝ ܣܢܝܩܘܬ݂ܰܝܕ݂ܰܢ ܕܘ ܒܰܝܬܐ. ܗܘܠ ܠܝ ܫܰܬܐ 1948 ܒܐܝܕ݂ܰܗ ܕܝ ܥܰܣܟܰܪܝܝܶܐ ܘܰܐ ܒܷܬܷ݂ܪ ܡܷܐ ܕܢܰܦܝܩܐ ܡܝܢܰܗ. ܒܝ ܝܰܨܝܦܘܬ݂ܐ ܕܟ݂ܘܪܝ ܢܷܥܡܰܢ ܘܕܰܡ ܡܗܰܝܡܢܶܐ ܡܷܕ݂ܝܳܝܶܐ ܡܥܰܕܠܐ ܘܡܰܢܕܦܐ ܘܡܰܛܝܐ ܠܘ ܫܘܒܚܰܝܕ݂ܰܗ ܕܰܐܕܝܰܘܡܰܐ. ܟܘܪܝ ܢܥܡܢ܆ ܟܬ݂ܷܘܠܶܗ ܘܡܰܟܬ݂ܰܘܠܶܗ ܘܡܰܠܬܰܡܠܶܗ ܟܬ݂ܳܘܶܐ ܓ݂ܰܠܰܒܶܐ ܣܷܡܠܶܗ ܒܶܝܬ݂ ܐܰܪܟܶܐ ܠܝ ܥܝܬܐ ܓ݂ܰܠܰܒܶܐ ܡܰܢܢܶܗ ܟܳܦܰܝܫܝ ܗܘܠ ܠܰܐܕܝܰܘܡܰܐ. ܦܬܷܚܠܶܗ ܐܶܒܰܗ ܡܰܕܪܰܫܬܐ ܕܩܰܝܷܡ ܡܝܢܰܗ ܟܳܗܢܶܐ ܘܡܰܠܦܳܢܶܐ ܓ݂ܰܠܰܒܶܐ. ܐܝ ܡܰܕܪܰܫܬܰܝܕ݂ܰܗ ܗܘܠ ܠܰܐܕܝܰܘܡܰܐ ܦܬܷܚܬܳܐ ܝܐ. ܟ݂ܘܪܝ ܢܷܥܡܰܢ ܐܰܙܙܶܗ ܗܝܝܶܐ ܣܬܶܐ ܠܰܐܡܶܪܝܟܰܐ ܠܓܰܒ ܐܰܢ ܐܰܒܢܶܐ. ܒܝ ܫܰܬܐ ܕܰܬ ܬܪܰܶܐ ܐܰܠܦܐ ܘܚܕ݂ܳܐ ܡܚܰܣܶܐ ܡܰܚܷܬ ܐܘ ܦܰܓ݂ܪܰܝܕܶܗ ܬܰܡܐ ܒܰܐܡܶܪܝܟܰܐ. ܡܝ ܚܰܪܰܝܬܐ ܕܝ ܫܰܬܐ 1986 ܗܘܠ ܠܐܘܥܕܐ ܐܳܢܳܐ ܡܰܠܦܳܢܐ ܢܐ ܐܶܒܰܗ. ܒܝ ܫܰܬܐ 1962 ܡܰܣܪܰܚ ܩܰܫܝܫܐ ܥܰܕܐ ܕܒܶܝܬ݂ ܡܰܠܠܶܐ ܩܰܫܝܫܐ ܘܰܡܥܰܘܢܳܢܐ ܠܟ݂ܘܪܝ ܢܷܥܡܰܢ ܠܝ ܥܝܬܐ ܕܡܳܪܝ ܒܰܪܨܰܘܡܐ. ܒܝ ܫܰܬܐ 1999 ܡܰܣܪܰܚ ܟ݂ܘܪܳܝܐ ܠܡܷܕ݂ܝܰܕ݂. ܒܷܬ݂ܷܪ ܡܷܐ ܕܩܰܘܝ ܐܘ ܚܰܪܦ݁ ܒܰܝܢ ܠܝ ܕܰܘܠܶܐ ܠܰܟ ܟܘܪܕܳܝܶܐ ܒܕܶܠܶܗ ܗܰܘܝ ܩܰܛܠܐ ܘܙܘܥܬ݂ܐ ܥܰܠ ܐܘ ܥܰܡܰܝܕ݂ܰܢ. ܐܘ ܥܰܡܐ ܒܕܶܠܗ ܕܡܰܗܙܰܡ ܠܰܕ ܕܘܘܰܠ ܕܰܐܘܪܘܦܰ݁ܐ܆ ܩܰܫܝܫܐ ܝܘܣܘܦ ܕܘܪܨܘܢ ܕܡܳܪܬ݂ܝ ܫܡܘܢܝ܆ ܘܩܰܫܝܫܐ ܝܘܣܘܦ ܔܝܔܰܟ ܕܡܳܪܝ ܫܰܪܒܶܝܠ ܡܰܗܙܰܡܡܶܗ ܛܪܰܠܠܶܗ ܐܘ ܩܰܛܥܰܬ݂ܬ݂ܶܗ ܕܠܐ ܪܳܥܝܐ. ܟ݂ܘܪܝ ܥܰܕܐ ܐܳܢܰܪ ܕܒܶܝܬ݂ ܡܰܠܠܶܐ ܟ݂ܕܷܡܠܶܗ ܐܰܥ ܥܝܬܳܬ݂ܶܐ ܕܡܷܕ݂ܝܰܕ݂ ܟܘܠܠܶܗ ܡܷܬ݂ܚܐ ܕܷܥܣܰܪ ܐܷܫܢܶܐ ܟܷܬܘܰܝܠܗ ܩܳܠܐ ܓ݂ܰܠܰܒܶܐ ܒܰܣܝܡܐ ܘܒܘ ܒܶܝܬ݂ ܓܰܙܐ ܩܰܘܝܳܘܰܐ. ܒܝ ܫܰܬܐ 2005 ܡܚܰܣܶܐ ܡܰܚܷܬ ܐܘ ܦܰܓ݂ܪܰܝܕ݂ܶܗ ܒܓܰܘܰܗ ܕܝ ܥܝܬܐ ܕܡܳܪܝ ܒܰܪܨܰܘܡܐ ܒܘ ܩܰܘܪܐ ܕܟܷܬܝܐ ܬܰܚܬܶܗ ܕܝ ܡܰܥܡܘܕܝܬ݂ܐ. ܒܷܬ݂ܷܪ ܡܷܐ ܕܷܡܚܰܣܶܐ ܟ݂ܘܪܝ ܥܰܕܐ ܡܷܕ݂ܝܰܕ݂ ܬܰܪܬܶܐ ܐܷܫܢܶܐ ܦܰܝـܝܫܐ ܕܠܐ ܟܳܗܢܐ. ܐܳܬ݂ܷܢܘܰܐ ܐܰܕ ܕܰܝܪܳܝܶܐ ܡܝ ܕܰܝܪܐ ܕܡܳܪܝ ܓܰܒܪܐܝܶܠ ܘܕܡܳܪܝ ܝܰܥܩܘܒ ܕܨܰܠܶܚ܆ ܘܷܐܫܬܐ ܝܰܪܚܶܐ ܩܰܫܝܫܐ ܦܶܛܪܘܣ ܫܘܫܶܐ ܡܶܐ ܐܰܠܡܰܢܝܰܐ ܟ݂ܕܷܡܡܶܗ ܒܡܷܕ݂ܝܕ. ܒܝ ܫܰܬܐ 2007 ܡܰܣܪܰܚ ܩܰܫܝܫܐ ܐܝܣܚܳܩ ܟܳܗܢܐ ܠܰܥ ܥܝܬܳܬ݂ܶܐ ܕܡܷܕ݂ܝܰܕ݂. ܟܘܠ ܝܰܘܡܳܐ ܒܨܰܦܪܐ ܥܰܨܪܝܝܶܐ ܟܳܘܶܐ ܨܠܘܬ݂ܐ ܒܡܳܪܝ ܒܰܪܨܰܘܡܐ. ܒܝܰܘܡܶܐ ܕܰܚ ܚܘܫܰܒܶܐ ܟܘܠ ܫܰܒܬܐ ܒܥܝܬܐ ܟܳܘܶܐ ܐܘ ܩܶܪܳܘܐ. ܡܠܦܢܐ ܐܝܗܐܢ ܓܘܪܩܐܢ 2415