Šëkri Aqtaš: ܐܰܡ ܡܕ݂ܝܢܳܬ݂ܶܐ ܘܰܐܩ ܩܷܪܝܰܘܳܬ݂ܶܐ ܕܟܷܬܢܶܐ ܥܰܡܝܪܶܐ ܘܰܐܝܢܰܐ ܕܚܰܪܝܘܝ ܒܛܘܪܥܰܒܕܝܢ / Am mḏinoṯe w aq qëryawoṯe d këtne camire w ayna d ḥariwi b Ṭurcabdin
Am mḏinoṯe w aq qëryawoṯe d këtne camire w ayna d ḥariwi b Ṭurcabdin
ܟܳܟܳܬ݂ܰܘ ܒܘ ܟܬ݂ܳܘܐ ܕܝ ܬܰܫܥܝܬ݂ܐ ܕܡܳܪܝ ܓܰܒܪܺܐܝܶܠ ܕܠܰܦ ܐܝ ܚܰܪܰܝܬܐ ܕܐܘ ܕܳܪܐ ܕܰܬܡܰܢܝܐ ܟܷܬܘܰܐ ܠܰܦ ܡܰܐܬܶܐ ܘܬܠܰܬ ܘܰܐܪܒܥܝ ܩܷܪܝܰܘܳܬ݂ܶܐ ܒܘ ܛܘܪܐ. ܥܰܡ ܐܘ ܥܒܳܪܐ ܕܘ ܙܰܒܢܐ ܟ݂ܰܠܷܢ ܐܰܩ ܩܷܪܝܰܘܳܬ݂ܶܐ ܘܓ݂ܰܠܰܒܶܐ ܡܷܢܢܶܗ ܚܰܪܝܘܝ. ܘܰܐܢ ܢܳܫܶܐ ܥܰܪܝܩܝ ܡܷܢܢܶܗ. ܠܓܳܪܰܢ ܕܝ ܡܰܘܕܥܳܢܘܬ݂ܐ ܕܰܟ ܟܬ݂ܳܘܶܐ܆ ܒܘ ܕܳܪܐ ܕܰܥ ܥܷܣܪܝ ܟܷܬܘܰܐ ܡܐ ܘܚܰܡܫܝ ܡܕ݂ܝܢܳܬ݂ܶܐ ܘܩܷܪܝܰܘܳܬ݂ܶܐ ܥܰܡܝܪܶܐ ܒܛܘܪܥܒܕܝܢ. ܐܝ ܘܰܠܰܝܶܐ ܪܰܒܬ݂ܐ ܕܛܘܪܥܰܒܕܝܢ ܡܷܕ݂ܝܰܕ݂ ܝܐ. ܟܳܦܰܝܫܐ ܒܦܰܠܓܶܗ ܕܝ ܡܰܪܥܝܬ݂ܐ. ܘܚܶܕ݂ܳܪܰܗ ܟܘܠܠܶܗ ܩܷܪܝܰܘܳܬ݂ܶܐ ܢܶܐ. ܒܝ ܫܰܬܐ ܕܘ ܣܰܝܦܐ ܓ݂ܰܠܰܒܶܐ ܢܳܫܶܐ܆ ܐܰܝܢܰܐ ܕܩܰܕܝܪܝ ܥܰܪܝܩܝ ܘܢܰܚܝܬܝ ܠܣܘܪܺܝܰܐ ܘܟ݂ܰܠܝܨܝ ܡܘ ܩܰܛܠܐ. ܐܰܝܢܰܐ ܕܡܰܪܦܰܠܠܶܗ ܐܰܩ ܩܷܪܝܰܘܳܬ݂ܶܐ ܘܥܰܪܝܩܝ ܘܰܐ ܠܕܘܟܳܬ݂ܶܐ ܚܪܶܢܶܐ܆ ܒܷܬ݂ܷܪ ܡܘ ܣܰܝܦܐ ܕܰܥܝܪܝ܆ ܘܡܶܐ ܚܰܬ݂ܳܐ ܡܰܥܡܰܪܪܶܗ ܐܰܒ ܒܳܬܰܬ݂ܬ݂ܶܗ ܘܝܰܬܝܘܝ ܐܰܦ݁ܦ݁ܶܗ. ܒܷܬ݂ܷܪ ܡܶܐ ܕܡܰܠܬܰܡܡܶܗ ܪܘܚܰܝܝܶܗ ܐܷܫܡܐ ܘܡܰܥܡܰܪܪܶܗ ܐܰܒ ܒܳܬܰܬ݂ܬ݂ܶܗ܆ ܝܰܬܝܘܝ ܐܰܦ݁ܦ݁ܶܗ ܘܠܳܐ ܥܰܪܝܩܝ. ܠܰܦ ܐܝ ܫܰܬܐ ܕܰܢ ܐܷܫܬܝ܆ ܒܕܰܠܠܶܗ ܐܰܣ ܣܘܪܝܳܝܶܐ ܕܢܷܦܩܝ ܡܘ ܛܘܪܐ ܘܷܐܙܙܷܢ ܠܷܤܛܰܡܒܷܠ ܕܫܘܓ݂ܠܝ ܘܕܷܡܕܰܒܪܝ ܐܰܚ ܚܰܝܰܬ݂ܬ݂ܶܗ. ܐܶܠܐ ܠܐ ܦܰܝܷܫܝ ܬܰܡܐ ܘܠܐ ܕܰܥܝܪܝ ܠܘ ܛܘܪܐ ܣܬܶܐ. ܩܰܡܰܝܬܐ ܐܰܓ ܓܰܘܪܶܐ ܐܰܙܙܷܢ ܠܰܐܘܪܘܦ݁ܰܐ ܘܒܷܬ݂ܷܪ ܡܳܒܰܠܠܶܗ ܐܰܢ ܢܰܥܝܡܰܬ݂ܬ݂ܶܗ ܣܬܶܐ. ܗܷܢ ܡܰܩ ܩܷܪܝܰܘܳܬ݂ܰܢܝ ܟ݂ܰܠܷܢ ܘܚܰܪܝܘܝ. ܘܗܷܢ ܡܷܢܢܶܗ ܣܘܪܝܳܝܶܐ ܘܛܰܝܶܐ ܥܰܡ ܚܕ݂ܳܕ݂ܶܐ ܟܳܥܰܝܫܝ ܐܰܦ݁ܦ݁ܶܗ ܗܘܠ ܠܰܕܝܰܘܡܰܐ. ܘܗܷܢ ܡܷܢܢܶܗ ܣܬܶܐ ܥܰܡܝܪܶܐ ܢܶܐ ܘܟܳܥܰܝܫܝ ܣܘܪܝܳܝܶܐ ܬܰܢܢܶܐ ܐܰܦ݁ܦ݁ܶܗ. ܐܘܥܕܐ ܓܷܕܟܳܬ݂ܰܘܢܐ ܐܷܫܡܰܝܝܶܗ ܠܰܠܬܰܚ ܠܓܳܪܰܢ ܕܝ ܐܳܠܰܦ ܒܶܝܬ: ܐܘܠܝܢ ܘܠܶܠܝܢ. ܐܝܕܶܗ ܕܰܐܘܰܐ. ܐܰܚܡܰܕܝ. ܐܝܢܰܘܪܰܚ. ܐܰܢܚܷܠ: ܟܝܬܐ ܐܶܒܰܗ ܫܘܰܥ ܐܰܘ ܬܡܳܢܶܐ ܝܰܩܪܳܬ݂ܶܐ ܣܘܪܝܳܝܶܐ ܘܠܰܦ ܬܠܶܬܝ ܝܰܩܪܳܬ݂ܶܐ ܛܰܝܶܐ ܕܰܐܬ݂ܷܢ ܠܰܗ ܡܶܐ ܕܰܠܝܢܶܐ. ܐܰܢ ܢܘܚܠܳܝܶܐ ܕܟܳܥܷܡܪܝ ܒܰܐܘܪܘܦ݁ܰܐ ܡܰܥܡܰܪܪܶܗ ܒܳܬܶܐ ܓ݂ܰܠܰܒܶܐ ܒܰܐܢܚܷܠ ܘܒܘ ܩܰܝܛܐ ܟܳܐܬ݂ܷܢ ܘܦܰܝܫܝ ܒܝ ܩܪܝܬ݂ܐ. ܐܘ ܡܷܢܝܳܢܐ ܕܰܥ ܥܳܡܘܪܶܐ ܒܘ ܩܰܝܛܐ ܟܳܡܳܛܶܐ ܠܰܦ ܬܠܰܬܡܐ. ܐܶܠܐ ܒܘ ܣܰܬ݂ܘܐ ܟܳܕܘܥܪܝ ܕܝܣܰܐ ܠܰܐܘܪܘܦ݁ܰܐ. ܐܶܣܬܷܠ، ܐܝܪܡܰܗ. ܐܶܣܬܝܪ ܓܰܘܰܝܬܐ ܣܰܪܶܐ: ܒܷܬ݂ܷܪ ܕܒܰܢ ܐܷܫܢܶܐ ܕܰܬܷܫܥܝܰܬ ܟ݂ܰܠܝܐ܆ ܥܰܒܝܪܝ ܠܰܗ ܐܰܟ ܟܘܪܕܳܝܶܐ ܢܳܛܘܪܶܐ ܕܟܷܡܡܷܢܢܶܗ ܩܘܪܘܔܝܝܶܐ ܕܨܳܗܪܰܢܶܗ ܘܕܷܥܪܳܘܷܢ. ܘܦܰܝܫܝ ܐܶܒܰܗ ܐܷܫܢܶܐ ܓ݂ܰܠܰܒܶܐ. ܒܷܬ݂ܷܪ ܡܝ ܫܰܬܐ ܕܰܬܪܰܠܦܐ܆ ܐܰܢ ܢܳܫܶܐ ܕܝ ܣܰܪܶܐ ܕܰܥܝܪܝ ܡܶܐ ܐܰܘܪܘܦ݁ܰܐ ܘܡܳܦܰܩܩܶܗ ܐܰܩ ܩܘܪܘܔܝܝܶܐ ܡܝ ܩܪܝܬ݂ܐ ܘܝܰܬܝܘܝ ܐܶܒܰܗ. ܐܰܕܝܰܘܡܰܐ ܟܝܬܐ ܬܰܪܬܶܐ ܝܰܩܪܳܬ݂ܶܐ ܟܳܦܰܝܫܝ ܒܝ ܩܪܝܬ݂ܐ. ܒܘ ܩܰܝܛܐ ܟܳܐܬ݂ܷܢ ܓ݂ܰܠܰܒܶܐ ܡܶܐ ܐܰܘܪܘܦ݁ܰܐ ܟܳܡܰܫܰܦܥܝ ܟܡܐ ܝܰܪܚܶܐ ܒܝ ܩܪܝܬ݂ܐ ܘܒܷܬ݂ܷܪ ܕܝܣܰܐ ܟܳܕܘܥܪܝ ܠܰܐܪܘܦ݁ܰܐ. ܐܦ݁ܫܝ. ܐܳܫܝܬ. ܐܶܫܬܪܰܟܐ. ܐܰܪܒܐ ܐܰܪܒܳܘ: ܒܷܬ݂ܷܪ ܡܶܐ ܕܟ݂ܰܠܝܐ ܒܰܬܷܫܥܝܝܰܬ܆ ܦܰܐܝܫܐ ܐܷܫܢܶܐ ܓ݂ܰܠܰܒܶܐ ܟ݂ܠܝܬ݂ܐ. ܐܶܠܐ ܒܰܢ ܐܷܫܢܶܐ ܚܰܪܳܝܰܢܝ ܕܰܥܝܪܝ ܐܰܢ ܐܰܪܒܳܝܶܐ ܡܶܐ ܐܰܘܪܘܦ݁ܰܐ ܘܡܰܥܡܰܪܪܶܗ ܒܳܬܶܐ ܚܰܬ݂ܶܐ. ܘܡܰܢܕܰܦܦܶܗ ܐܰܒ ܒܳܬܶܐ ܥܰܬܝܩܶܐ. ܡܰܢܕ݂ܰܦܦܶܗ ܐܰܥ ܥܝܬܳܬ݂ܶܐ ܘܡܰܥܡܰܪܪܶܗ ܨܰܠܳܘܢܰܬ ܠܘ ܝܬܳܘܐ. ܟܳܦܰܝܫܝ ܒܝ ܩܪܝܬ݂ܐ ܘܠܰܘ ܟܳܡܰܟ݂ܠܷܠܰܐ. ܒܶܝܬ݂ ܣܒܝܪܝܢܐ ܐܰܘ ܒܣܳܪܝܢܐ: ܟܝܬܐ ܒܝ ܩܪܝܬ݂ܐ ܠܰܦ ܚܰܡܷܫ ܘܥܷܣܪܝ ܝܰܩܪܳܬ݂ܶܐ ܣܘܪܝܳܝܶܐ. ܘܚܕ݂ܐ ܐܝܩܰܪܬ݂ܐ ܛܰܝܰܝܬܐ. ܚܕ݂ܐ ܡܰܩ ܩܷܪܝܰܘܳܬ݂ܶܐ ܥܰܡܝܪܶܐ ܕܛܘܪܥܰܒܕܝܢ ܝܐ. ܟܝܬܐ ܒܝ ܩܪܝܬ݂ܐ ܩܰܪܰܩܳܠ ܕܝ ܥܰܣܟܰܪܝܝܶܗ. ܐܰܢ ܢܳܫܰܝܕ݂ܰܗ ܡܣܰܝܒܰܪܪܶܗ ܟܘܠ ܥܰܣܩܘܬ݂ܐ ܘܠܐ ܡܰܟ݂ܠܰܠܶܗ ܐܝ ܩܪܝܬ݂ܰܬ݂ܬ݂ܶܗ. ܟܝܬܐ ܚܰܡܫܐ ܘܥܷܣܪܝ ܩܰܕܝܫܶܐ ܒܝ ܩܪܝܬ݂ܐ ܘܚܶܕ݂ܳܪܰܗ. ܟܳܡܨܰܠ݂ܢ ܒܝ ܥܝܬܐ ܕܡܳܪܝ ܕܳܕܐ. ܐܘ ܩܰܫܐ ܕܝ ܩܪܝܬ݂ܐ ܩܰܫܐ ܨܰܠܝܒܰܐ ܐܶܪܕܶܢ ܝܐ. ܕܰܥܷܪ ܡܶܐ ܣܘܝܣܪܰܐ ܘܗܰܘܝ ܩܰܫܐ ܠܝ ܩܪܝܬ݂ܐ. ܒܰܐܦܰܐܘܰܗ. ܒܰܐܡܰܢܥܰܡ ܐܰܘ ܒܶܝܬ݂ ܡܰܢܥܰܡ. ܒܰܐܣܰܐܩ ܐܰܘ ܒܶܝܬ݂ ܐܝܣܚܳܩ. ܒܰܐܕܶܒܒܝ ܐܰܘ ܒܶܝܬ ܕܶܒܶܐ. ܒܰܝܠܳܘ. ܒܶܝܬ ܙܪܝܙܐ. ܒܶܝܬ ܚܰܣܪܷܟ. ܒܝܪ ܐܰܪܕܝܬ. ܒܶܝܬ ܒܰܝܫܳܢ. ܒܶܝܬ ܕܝܘܦܐ. ܒܶܝܬ ܪܰܒܐ. ܒܶܝܬ ܫܰܪܒܰܩ. ܒܷܢܟܰܠܒܶܗ. ܒܳܬܶܐ. ܒܶܝܬ ܩܘܤܛܰܢ: ܚܕ݂ܐ ܡܰܩ ܩܷܪܝܰܘܳܬ݂ܶܐ ܕܠܐ ܟ݂ܰܠܝܐ ܘܠܐ ܥܰܒܷܝܪܝܠܰܗ ܛܰܝܶܐ ܝܐ. ܠܰܦ ܐܝ ܫܰܬܐ ܕܰܚ ܚܰܡܫܝ ܟܷܬܘܰܐ ܐܶܒܰܗ ܠܰܦ ܡܐ ܘܥܶܣܪܝ ܝܰܩܪܳܬ݂ܶܐ. ܐܘܥܕܐ ܟܝܬܐ ܠܰܦ ܥܶܣܪܝ ܝܰܩܪܳܬ݂ܶܐ. ܟܝܬܐ ܡܰܕܪܰܫܬܐ ܒܝ ܩܪܝܬ݂ܐ. ܘܰܩܫܐ ܓܰܒܪܺܐܝܶܠ ܐܰܩܛܰܫ ܐܘ ܩܰܫܐ ܕܝ ܩܪܝܬ݂ܐ ܝܐ. ܓܘܢܕܷܟܶܐ ܐܰܘ ܐܝ ܩܪܝܬ݂ܐ ܕܝ ܥܝܬܐ: ܚܕ݂ܐ ܡܰܩ ܩܷܪܝܰܘܳܬ݂ܶܐ ܕܷܢܨܝܘܷܢ ܝܐ. ܟܳܦܰܝܫܐ ܡܩܰܒܷܠ ܕܡܰܪܒܳܒܐ. ܪܰܚܘܩܬܐ ܝܐ ܡܶܐ ܢܨܝܘܷܢ ܠܰܦ ܬܠܶܬ݂ܝ ܟܝܠܳܡܰܬܪܰܬ. ܥܰܡܷܪܬܐ ܝܐ ܘܠܐ ܟ݂ܰܠܝܐ. ܟܝܬܐ ܐܶܒܰܗ ܠܰܦ ܥܣܰܪ ܝܰܩܪܳܬ݂ܶܐ. ܟܝܬܐ ܥܝܬܐ ܒܝ ܩܪܝܬ݂ܐ܆ ܐܶܠܐ ܩܰܫܐ ܠܰܝܬܐ. ܐܝܢܰܩܩܰܐ ܕܟܳܡܷܣܢܳܩܝ ܟܐܘܙܙܶܗ ܩܰܫܐ ܨܰܠܝܒܰܐ ܐܶܪܕܶܢ ܕܷܒܣܳܪܝܢܐ ܟܳܡܨܰܠܶܐ ܘܟܳܡܩܰܪܰܘܘܶܗ. ܔܶܠܷܟ. ܓܘܢܕܷܟ. ܓܪܝܡܝܰܗ. ܔܘܟܰܐ. ܓܳܘܙܝ. ܓܘܡܒܰܝܫܐ. ܓܘܪܢܐ. ܕܷܒܶܢܶܐ. ܕܰܝܪܐ ܕܡܳܪܝ ܙܒܝܢܐ (ܕܶܪܙܒܝܢ). ܕܶܪܟܦܰܢ. ܕܶܪܷܢܕܷܒ. ܕܷܦܢܶܗ. ܕܰܝܪܐ ܕܘ ܨܠܝܒܐ ܕܒܶܝܬ ܐܝܠ: ܟܳܥܰܝܫܝ ܒܝ ܩܪܝܬ݂ܐ ܚܰܡܷܫ ܝܰܩܪܳܬ݂ܶܐ ܣܘܪܝܳܝܶܐ. ܛܰܝܶܐ ܠܰܝܬܐ ܐܶܒܰܗ. ܐܘ ܩܰܫܐ ܕܒܶܩܘܣܝܳܢܶܐ ܟܳܡܩܰܪܰܘ ܘܟܳܡܨܰܠܶܐ ܒܝ ܥܝܬܐ. ܕܶܪܩܘܒܶܐ: ܟܷܬܘܰܐ ܬܪܶܐ ܐܰܚܘܢܳܢܶܐ ܡܰܠܟܶܐ ܘܠܰܚܕܐ ܒܝ ܩܪܝܬ݂ܐ. ܒܝ ܫܰܬܐ ܕܰܐܢ ܐܰܠܦܐ ܘܬܫ̰ܰܥܡܐ ܘܬܠܰܬ ܘܬܷܫܥܝ܆ ܐܝ ܕܰܘܠܰܐ ܡܷܦܩܝܠܰܗ ܘܰܐܙܙܷܢ ܥܰܡ ܐܰܝ ܝܰܩܪܳܬ݂ܰܬ݂ܶܗ ܠܒܶܩܘܣܝܳܢܶܐ. ܒܷܬ݂ܷܪ ܟܡܐ ܐܷܫܢܶܐ ܡܰܥܡܰܪܪܶܗ ܒܳܬܶܐ ܚܰܬ݂ܶܐ ܒܕܶܪܩܘܒܶܐ ܘܕܰܥܝܪܝ ܕܝܣܰܐ ܠܝ ܩܪܝܬ݂ܐ. ܗܶܒܰܢܰܬ. ܗܰܠܰܟ݂ ܐܰܘ ܐܰܚܠܰܚ. ܙܰܐܙ. ܙܝܢܰܘܪܰܚ. ܙܰܪܒܐ. ܙܰܪܢܘܩܰܐ. ܙܰܕܒܕܝܩܐ. ܙܰܪܬܐ ܕܙܰܝܬܐ. ܚܒܳܒ ܐܰܘ ܐܷܚܘܐ: ܡܶܩܷܡ ܡܝ ܫܰܬܐ ܕܰܬ ܬܷܫܥܝܝܰܬ ܟ݂ܰܠܝܐ. ܐܰܥ ܥܳܡܘܪܰܝܕ݂ܰܗ ܐܰܙܙܷܢ ܠܰܐܪܘܦ݁ܰܐ. ܒܷܬܷ݂ܪ ܡܝ ܫܰܬܐ ܕܰܬܪܰܠܦܐ ܗܷܢ ܡܷܢܢܶܗ ܕܰܥܝܪܝ ܘܡܰܥܡܰܪܪܶܗ ܒܳܬܶܐ ܚܰܬ݂ܶܐ ܘܫܰܦܝܪܶܐ ܒܝ ܩܪܝܬ݂ܐ. ܒܘ ܩܰܝܛܐ ܓ݂ܰܠܰܒܶܐ ܡܷܢܢܶܗ ܟܳܐܬ݂ܷܢ ܘܟܳܦܰܝܫܝ ܟܡܐ ܝܰܪܚܶܐ ܒܝ ܩܪܝܬ݂ܐ. ܒܘ ܣܰܬܘܐ ܟܳܕܘܥܪܝ ܠܰܐܘܪܘܦ݁ܰܐ. ܚܰܐܚ: ܚܕ݂ܳܐ ܡܰܩ ܩܷܪܝܰܘܳܬ݂ܶܐ ܥܰܬܝܩܶܐ ܘܪܰܒܶܐ ܕܛܘܪܥܒܕܝܢ ܘܰܐ. ܟܝܬܐ ܐܶܒܰܗ ܕܰܝܪܐ ܕܝܳܠܕܰܬ ܐܰܠܳܗܐ ܘܥܝܬܐ ܪܰܒܬ݂ܐ ܕܡܳܪܝ ܣܳܒܐ ܐܶܠܐ ܚܰܪܘܬܐ ܝܐ ܘܠܐ ܟܳܡܝܨܰܠܶܐ ܐܶܒܰܗ. ܥܝܬܐ ܕܡܳܪܝ ܫܡܘܐܝܶܠ ܘܕܡܳܪܝ ܣܰܪܟܝܣ ܘܒܰܟܳܘܣ. ܐܰܕܝܰܘܡܰܐ ܟܝܬܐ ܠܰܦ ܚܰܡܫܰܥܣܰܪ ܝܰܩܪܳܬ݂ܶܐ ܒܝ ܩܪܝܬ݂ܐ. ܚܡܫܥܣܪ ܒܘ ܝܪܚܐ ܕܛܒܒܟ ܐܘ ܫܗܪܐ ܕܝ ܝܠܕܬ ܐܠܗܐ ܝܐ. ܥܰܡܐ ܓ݂ܰܠܰܒܶܐ ܡܶܐ ܛܘܪܥܰܒܕܝܢ ܘܰܐܝܢܰܐ ܕܟܳܐܬ݂ܷܢ ܡܶܐ ܐܰܘܪܘܦܰ݁ܐ ܠܘ ܒܷܛܠܳܢܐ܆ ܟܐܘܙܙܷܢ ܠܚܰܐܚ ܘܟܳܣܰܝܡܝ ܐܘ ܫܰܗܪܐ ܒܝ ܕܰܝܪܐ ܕܝ ܝܳܠܕܰܬ݂ ܐܰܠܳܗܐ. ܩܰܫܐ ܓܰܒܪܺܐܝܠ ܕܒܶܩܘܣܝܳܢܶܐ ܡܶܐ ܙܰܒܢܐ ܠܙܰܒܢܐ ܟܳܡܨܰܠܶܐ ܘܟܳܡܩܰܪܰܘ ܒܚܰܐܚ. ܚܶܕܷܠ. ܚܘܪܒܰܬ ܬܶܠܳܘ. ܚܰܒܣܘܣ. (ܟܝܬܐ ܚܕ݂ܳܐ ܐܝܩܰܪܬ݂ܐ ܬܰܢܢܶܐ ܣܷܪܝܰܝܬܐ ܒܝ ܩܪܝܬ݂ܐ). ܚܰܛܠܝܒ. ܚܰܙܢܶܗ. ܚܶܣܢܐ ܕܟܺܐܦܐ. ܚܶܣܢܐ ܕܫܘܥܐ. ܚܶܘܳܪܐ. ܛܰܐܦ݁ܘ. ܝܷܪܶܕ. ܟܦܰܪܓܰܘܙܐ. ܟܦܳܢܐ (ܕܶܪܟܦܰܢ). ܟܰܦܪܐ ܥܶܠܰܝܬܐ. ܟܦܰܪܒܳܪܰܢ. ܟܶܦܣܶܢܓ. ܟ݂ܰܪܰܒܶܗ ܟܰܦܪܶܐ. ܟ݂ܰܪܰܒܶܒܰܢܢܰܗ. ܟܰܦܫܷܢܢܶܗ. ܟܰܦܢܰܐܣ. ܟ݂ܝܘܰܟ݂. ܟܶܦܶܪܚܷܘܰܪ. ܟܶܦܶܪܥܷܠܰܒ. ܟܰܪܫܰܦ. ܟܦܰܪܣܰܠܛܐ. ܟܰܦܰܪܒܶܗ. ܟܰܦܪܐ. ܟܰܪܬܗܰܝܬܐ. ܟܦܰܪܓܰܘܣܳܢ. ܟܰܦܰܪܥܷܪܰܒ. ܟܰܦܰܪܒܰܒ. ܟܰܠܰܫܬ. ܟ݂ܰܪܰܒܶܐܰܠܶܗ (ܐܰܪܟܰܚ). ܩܪܝܬ݂ܐ ܥܰܡܷܪܬܐ ܒܰܣ ܣܘܪܝܳܝܶܐ ܝܳܐ. ܠܰܝܬܐ ܛܰܝܶܐ ܒܝ ܩܪܝܬ݂ܐ. ܡܶܩܷܡ ܟܡܐ ܐܷܫܢܶܐ ܡܚܰܕܬ݂ܐ ܐܝ ܥܝܬܐ ܕܡܳܪܝ ܐܰܦܪܶܝܡ ܘܡܳܪܝ ܬܶܐܘܳܕܳܘܪܳܘܣ ܕܝ ܩܪܝܬ݂ܐ. ܥܰܡܝܪܝ ܒܳܬܶܐ ܚܰܬ݂ܶܐ ܓ݂ܰܠܰܒܶܐ. ܟܝܬܐ ܢܳܫܶܐ ܡܝ ܩܪܝܬ݂ܐ ܕܟܳܥܰܝܫܝ ܒܰܐܘܪܘܦ݁ܰܐ ܟܳܐܬܷܢ ܘܟܳܡܰܥܰܡܪܝ ܒܳܬܶܐ ܒܝ ܩܪܝܬ݂ܐ. ܟܝܬܐ ܚܶܕܰܪ ܐܷܫܬܝ ܝܰܩܪܳܬ݂ܶܐ ܒܝ ܩܪܝܬ݂ܐ. ܐܘ ܩܰܫܐ ܕܝ ܩܪܝܬ݂ܐ ܐܶܠܺܝܐ ܔܶܠܝܟ ܥܰܠ ܕܡܰܣܘܠܶܗ܆ ܡܰܣܪܰܚ ܩܰܫܐ ܐܰܦܪܶܝܡ ܟܳܗܢܐ ܠܝ ܩܪܝܬ݂ܐ ܡܷܚܠܳܦܶܗ. ܟܰܦܪܐ ܬܰܚܬܰܝܬܐ: ܒܘ ܙܰܒܢܐ ܕܟܷܬܘܰܐ ܙܘܥܬ݂ܐ ܒܘ ܛܘܪܐ܆ ܐܰܥ ܥܳܡܘܪܶܐ ܕܟܰܦܪܐ ܣܬܶܐ ܥܰܪܝܩܝ ܠܰܐܘܪܘܦ݁ܰܐ. ܐܶܠܐ ܒܷܬ݂ܷܪ ܡܝ ܫܰܬܐ ܕܰܬܪܰܠܦܐ ܒܕܰܠܠܶܗ ܕܡܰܥܰܡܪܝ ܐܝ ܩܪܝܬ݂ܐ ܡܶܐ ܚܰܬ݂ܐ ܘܕܘܥܪܝ ܡܶܐ ܐܰܠܡܰܢܝܰܐ ܘܡܶܐ ܣܘܝܣܪܰܐ ܠܰܦ ܬܪܰܥܣܰܪ ܝܰܩܪܳܬ݂ܶܐ ܠܝ ܩܪܝܬ݂ܐ. ܐܘܥܕܐ ܚܕ݂ܐ ܡܰܩ ܩܷܪܝܰܘܳܬ݂ܶܐ ܕܒܷܬ݂ܷܪ ܡܶܐ ܕܟ݂ܰܠܝܐ ܘܕܝܣܰܐ ܕܥܰܡܝܪܐ ܕܘ ܛܘܪܐ ܝܐ. ܟ݂ܰܪܰܒܶܗܡܷܫܟܰܐ. ܟܰܠܐ ܒܝ ܚܰܪܰܝܬܐ ܕܐܘ ܛܘܪܐ ܕܝ ܒܰܓܳܟܶܐ. ܐܰܢ ܢܳܫܶܐ ܕܝ ܩܪܝܬ݂ܐ ܥܰܪܝܩܝ ܘܰܐ ܠܰܐܘܪܘܦ݁ܰܐ ܘܡܰܟ݂ܠܶܘܰܠܠܶܗ ܐܝ ܩܪܝܬ݂ܐ ܒܢܰܩܩܰܐ ܚܕ݂ܳܐ. ܐܶܠܐ ܒܷܬ݂ܷܪ ܡܐܝ ܫܰܬܐ ܕܰܬܪܰܠܦܐ ܗܷܢ ܡܷܢܢܶܗ ܣܬܶܐ ܕܰܥܝܪܝ ܘܡܰܥܡܰܪܪܶܗ ܒܳܬܶܐ ܪܰܒܶܐ ܘܫܰܦܝܪܶܐ ܒܝ ܩܪܝܬ݂ܐ. ܒܐܘ ܩܰܝܛܐ ܟܳܐܬ݂ܷܢ ܓ݂ܰܠܰܒܶܐ ܢܳܫܶܐ ܠܝ ܩܪܝܬ݂ܐ ܘܒܐܘ ܣܰܬ݂ܘܐ ܟܳܕܘܥܪܝ. ܟܦܰܪܙܶܐ: ܟܦܰܪܙܶܐ ܠܐ ܟ݂ܰܠܝܐ ܡܰܣ ܣܘܪܝܳܝܶܐ. ܟܝܬܐ ܒܝ ܩܪܝܬ݂ܐ ܙܷܬܬܷܪ ܡܰܣ ܣܘܪܝܳܝܶܐ܆ ܛܰܝܶܐ. ܦܰܝܷܫܝ ܠܰܦ ܫܘܰܥ ܝܰܩܪܳܬ݂ܶܐ ܣܘܪܝܳܝܶܐ ܒܝ ܩܪܝܬ݂ܐ. ܗܷܢ ܡܷܢܢܶܗ ܟܳܥܰܝܫܝ ܒܡܷܕ݂ܝܰܕ݂܆ ܘܰܐܚܪܶܢܶܐ ܐܰܙܙܷܢ ܠܰܐܘܪܘܦ݁ܰܐ. ܕܰܝܪܳܝܐ ܡܘܫܶܐ ܓܘܪܒܘܙ ܐܘ ܐܰܚܘܢܐ ܕܚܰܣܝܐ ܥܝܣܰܐ ܓܘܪܒܘܙ ܟܳܡܨܰܠܶܐ ܘܟܳܡܩܰܪܰܘ ܒܝ ܥܝܬܐ ܕܡܳܪܝ ܥܙܳܙܳܐܝܶܠ. ܡܷܕ݂ܝܰܕ݂: ܟܳܦܰܝܫܐ ܒܦܰܠܓܶܗ ܕܛܘܪܥܰܒܕܝܢ. ܘܐܝ ܡܕ݂ܝܬܐ ܪܰܒܬ݂ܐ ܕܛܘܪܥܰܒܕܝܢ ܝܐ. ܐܘ ܡܷܢܝܳܢܐ ܕܰܛ ܛܰܝܶܐ ܝܰܘܡܐ ܒܝܰܘܡܐ ܟܳܙܳܝܰܕ. ܐܘ ܡܷܢܝܳܢܐ ܕܰܥ ܥܳܡܘܪܰܝܕ݂ܰܗ ܥܰܡ ܐܰܩ ܩܷܪܝܰܘܳܬ݂ܶܐ܆ ܣܰܠܷܩ ܗܘܠ ܡܐ ܘܥܷܣܪܳܐ ܐܰܠܦܐ ܢܳܫܶܐ. ܐܶܠܐ ܐܰܣ ܣܘܪܝܳܝܶܐ ܢܰܩܝܣܝ ܒܡܷܕ݂ܝܰܕ݂. ܟܝܬܐ ܠܰܦ ܚܰܡܷܫܡܐ ܣܘܪܝܳܝܶܐ ܒܰܣ. ܐܝ ܐܶܡܐ ܕܰܩ ܩܷܪܝܰܘܳܬ݂ܶܐ ܘܐܘ ܠܶܒܐ ܕܛܘܪܥܰܒܕܝܢ ܝܐ. ܐܝ ܕܰܝܪܐ ܕܡܳܪܝ ܐܰܒܪܳܗܳܡ ܘܡܳܪܝ ܗܳܒܶܝܠ ܟܳܦܰܝܫܐ ܒܷܢܦܳܩܶܗ ܕܝܰܘܡܐ ܕܡܷܕ݂ܝܰܕ݂. ܘܟܝܬܐ ܒܡܷܕ݂ܝܰܕ݂ ܐܝ ܥܝܬܐ ܕܡܳܪܝ ܫܰܪܒܶܝܠ ܘܡܳܪܝ ܒܰܪܨܰܘܡܐ ܘܡܳܪܝ ܐܰܟ݂ܣܢܳܝܐ ܘܡܳܪܬܝ ܫܡܘܢܝ ܘܝܳܠܕܰܬ݂ ܐܰܠܳܗܐ. ܩܰܫܐ ܐܝܣܚܩ ܐܶܪܓܘܢ ܐܘ ܟܳܗܢܐ ܕܰܥ ܥܝܬܳܬ݂ܶܐ ܕܡܷܕ݂ܝܰܕ݂ ܝܐ. ܡܙܝܙܰܚ: ܟܳܥܰܝܫܝ ܐܶܒܰܗ ܬܡܳܢܶܐ ܝܰܩܪܳܬ݂ܶܐ ܣܘܪܝܳܝܶܐ ܘܬܠܶܬ݂ܝ ܛܰܝܶܐ. ܢܰܦܝܩܝ ܕܰܝܪܳܝܶܐ ܘܩܰܫܶܐ ܓ݂ܰܠܰܒܶܐ ܡܶܐ ܡܙܝܙܰܚ. ܐܝ ܩܪܝܬ݂ܐ܆ ܟܳܦܰܝܫܐ ܒܰܝܢ ܠܡܷܕ݂ܝܰܕ݂ ܘܠܡܳܪܝ ܓܰܒܪܺܐܝܶܠ. ܐܝ ܥܝܬܐ ܕܝ ܩܪܝܬ݂ܐ ܡܳܪܝ ܝܘܚܰܢܳܢ ܕܷܟܦܳܢܶܐ ܝܐ. ܐܶܠܐ ܩܰܫܐ ܠܰܝܬܐ ܒܝ ܩܪܝܬ݂ܐ. ܗܰܢܝ ܟܡܳܐ ܐܷܫܢܶܐ ܒܘ ܩܰܝܛܐ ܟܳܐܬ݂ܶܐ ܩܰܫܳܐ ܕܰܢܚܐ ܒܘܠܘܛ ܡܶܐ ܐܰܠܡܰܢܝܰܐ ܘܟܳܡܨܰܠܶܐ ܒܝ ܥܝܬܐ. ܟܳܦܳܝܰܫ ܟܡܐ ܝܰܪܚܶܐ ܒܝ ܩܪܝܬ݂ܐ ܘܒܷܬ݂ܷܪ ܟܳܕܳܥܰܪ ܕܝܣܰܐ ܠܰܐܠܡܰܢܝܰܐ. ܡܝܕܘܢ ܐܰܘ ܡܝܕܷܢ: ܐܝ ܩܪܝܬ݂ܐ ܪܰܒܬ݂ܐ ܘܥܰܡܷܪܬܐ ܕܛܘܪܥܰܒܕܝܢ ܡܝܕܷܢ ܝܐ. ܐܰܥ ܥܳܡܘܪܰܝܕ݂ܰܗ ܟܘܠܠܶܗ ܣܘܪܝܳܝܶܐ ܢܶܐ. ܛܰܝܶܐ ܠܰܝܬܐ. ܟܝܬܐ ܒܡܝܕܷܢ ܠܰܦ ܫܰܘܥܝ ܝܰܩܪܳܬ݂ܶܐ. ܟܳܫܘܓ݂ܠܝ ܒܰܟ ܟܰܪܡܶܐ ܘܒܰܢ ܐܰܪܥܳܬ݂ܶܐ. ܒܷܬ݂ܷܪ ܡܶܐ ܕܷܡܫܰܢܶܠܶܗ ܩܰܫܐ ܡܰܠܟܶܐ ܬܳܩ ܡܰܣܪܰܚ ܩܰܫܐ ܫܶܡܥܘܢ ܐܘܔܰܐܪ ܟܳܗܢܐ ܠܝ ܥܝܬܐ ܕܡܳܪܝ ܝܰܥܩܘܒ. ܡܰܥܣܰܪܬܶܐ. ܡܥܰܪܝܢ. ܡܷܕܳܘ. ܡܶܫܬܝܢ. ܡܷܕܝܰܪܝܒ. ܡܰܪܒܳܒܐ ܐܰܘ ܡܳܪܝ ܒܳܒܝ: ܐܝ ܩܪܝܬ݂ܐ ܕܡܰܪܒܳܒܐ ܪܰܚܘܩܬܐ ܝܐ ܡܶܐ ܢܨܝܘܷܢ ܠܰܦ ܚܰܡܫܐ ܘܥܷܣܪܝ ܟܝܠܳܡܰܬܪܰܬ. ܟܳܦܰܝܫܐ ܡܩܰܒܷܠ ܕܝ ܓܘܢܕܷܟܶܐ. ܥܰܠ ܐܘ ܕܰܪܒܐ ܕܘ ܐܝܦ݁ܰܟ ܕܟܐܘܙܙܶܗ ܠܷܓܙܝܪܐ. ܐܝ ܕܰܘܠܰܐ ܡܰܟ݂ܠܶܘܰܝܠܰܗ ܐܝ ܩܪܝܬ݂ܐ. ܗܷܢ ܡܰܥ ܥܳܡܘܪܶܐ ܐܰܙܙܷܢ ܘܰܐ ܠܝ ܩܪܝܬ݂ܐ ܕܝ ܓܘܢܕܷܟܶܐ. ܘܗܷܢ ܡܷܢܢܶܗ ܐܰܙܙܷܢ ܘܰܐ ܠܰܐܘܪܘܦ݁ܰܐ. ܒܷܬ݂ܷܪ ܒܷܟܡܐ ܐܷܫܢܶܐ܆ ܟܡܐ ܝܰܩܪܳܬ݂ܶܐ ܡܶܐ ܐܰܘܪܘܦ݁ܰܐ܆ ܘܰܐܝܢܰܐ ܕܰܐܙܙܷܢ ܘܰܐ ܠܝ ܓܘܢܕܷܟܶܐ ܣܬܶܐ ܕܰܥܝܪܝ ܠܝ ܩܪܝܬ݂ܐ. ܡܰܥܡܰܪܪܶܗ ܐܰܒ ܒܳܬܰܬ݂ܬ݂ܶܗ ܡܶܐ ܚܰܬ݂ܐ. ܐܰܕܝܰܘܡܰܐ ܟܝܬܐ ܠܰܦ ܥܣܰܪ ܝܰܩܪܳܬ݂ܶܐ ܒܝ ܩܪܝܬ݂ܐ. ܢܰܘܓܐ. ܢܘܢܰܒ. ܣܶܕܰܪܝ: ܟܳܦܰܝܫܐ ܒܘ ܛܘܪܐ ܕܐܝܙܠܐ ܒܰܝܢ ܒܰܕܷܒܶܐ ܘܠܟ݂ܰܪܰܒܶܡܷܫܟܰܐ. ܐܝ ܩܪܝܬ݂ܐ ܕܘ ܣܶܕܰܪܝ ܣܬܶܐ ܟ݂ܰܠܝܐ ܘܰܐ ܡܰܥ ܥܳܡܘܪܰܝܕ݂ܰܗ. ܟܘܠܠܶܗ ܐܰܙܙܷܢ ܘܰܐ ܠܰܐܘܪܘܦ݁ܰܐ. ܗܷܢܢܷܟ ܣܬܶܐ ܟ݂ܘܕ ܐܰܩ ܩܷܪܝܰܘܳܬ݂ܶܐ ܚܪܶܢܶܐ ܡܰܥܡܰܪܪܶܗ ܒܳܬܶܐ ܚܰܬ݂ܶܐ ܒܝ ܩܪܝܬ݂ܐ ܘܕܰܥܝܪܝ. ܐܶܠܐ ܒܘ ܣܰܬ݂ܘܐ ܟܳܕܘܥܪܝ ܠܰܐܘܪܘܦ݁ܰܐ. ܟܳܦܰܝܫܝ ܟܡܐ ܢܳܫܶܐ ܬܰܢܢܶܐ ܒܝ ܩܪܝܬ݂ܐ ܟ݂ܘܕ ܢܳܛܘܪܶܐ. ܣܰܐܪܝ. ܣܰܢܣܘܠ. ܣܰܪܘܰܐܢ. ܣܝܓܘܢ. ܣܳܚܰܪܬܐ. ܥܰܝܢ ܓܰܘܙܐ. ܥܰܝܢ ܠܘܙܐ. ܥܘܪܢܘܣ. ܥܘܝܢܶܗ. ܥܘܬܶܝ. ܥܰܛܰܐܦܰܝܗ. ܥܰܝܢܟܰܦ. ܥܰܪܰܒܝܰܗ. ܥܪܳܘܷܢ. ܥܰܪܡܘܢܐ. ܥܰܝܘܰܪܕܐ. ܩܪܝܬ݂ܐ ܡܫܰܡܰܗܬܐ ܕܒܘ ܣܰܝܦܐ ܣܰܬܝܪܝ ܐܶܒܰܗ ܐܰܣ ܣܘܪܝܳܝܶܐ ܘܟ݂ܰܠܝܨܝ ܡܘ ܩܰܛܠܐ. ܐܰܥ ܥܳܡܘܪܰܝܕ݂ܰܗ ܥܰܪܝܩܝ ܠܰܐܘܪܘܦ݁ܰܐ ܘܠܥܰܡܰܪܝܟܰܐ. ܦܰܝܷܫܝ ܚܰܡܷܫ ܝܰܩܪܳܬ݂ܶܐ ܣܘܪܝܳܝܶܐ ܘܙܷܕ ܡܶܐ ܬܠܶܬ݂ܝ ܝܰܩܪܳܬ݂ܶܐ ܛܰܝܶܐ ܒܝ ܩܪܝܬ݂ܐ. ܟܝܬܐ ܥܝܬܐ ܪܰܒܬ݂ܐ ܕܡܳܪܝ ܚܘܫܰܒܐ ܒܝ ܩܪܝܬ݂ܐ. ܐܶܠܐ ܩܰܫܐ ܠܰܝܬܐ ܕܷܡܨܰܠܶܐ ܘܕܷܡܩܰܪܰܘ. ܨܰܘܪܐ: ܡܕ݂ܝܬܐ ܪܰܒܬ݂ܐ ܝܐ. ܠܰܝܬܐ ܐܶܒܰܗ ܣܘܪܝܳܝܶܐ. ܨܰܠܷܚ ܐܰܘ ܫܝܠܘܚ܆ ܟ݂ܰܠܝܐ ܡܰܣ ܣܘܪܝܳܝܶܐ ܘܡܰܠܝܐ ܛܰܝܶܐ. ܟܝܬܐ ܒܝ ܩܪܝܬ݂ܐ ܕܰܝܪܐ ܕܡܳܪܝ ܝܰܥܩܘܒ ܚܒܝܫܳܝܐ. ܘܒܝ ܕܰܝܪܐ ܟܝܬܐ ܕܰܝܪܳܝܐ ܕܳܢܝܐܝܶܠ ܨܰܘܔܝ ܘܚܰܡܷܫ ܕܰܝܪܳܝܳܬ݂ܶܐ. ܘܥܷܣܪܐ ܝܳܠܘܦܶܐ. ܩܰܢܛܰܐܪܰܗ. ܩܰܨܪܐ ܕܦܳܕܳܢ. ܩܰܪܩܰܦ. ܩܰܪܬܡܝܢ. ܩܰܠܢܙܰܐ. ܪܘܨܝܢ. ܪܝܫ. ܫܰܐܦܰܙܢܐ. ܫܰܡܢܰܙ. ܫܳܪܘܙܒܰܚ. ܫܝܠܘܚ. ܫܰܐܦܰܨܢܰܗ. ܬܰܡܰܪܙ. ܬܰܦܐ. ܬܰܡܪܙܐ. ܬܘܪܣܰܩܢܐ. ܬܶܬܐ.
